【龔成問答信箱】（Q22401-Q22420）

Q22401：

Hello 依家溫緊進階班第5堂 notes 你話如果附屬公司多而且比較接近50％ or 小數股東股益較大 個純利率會扭曲左

想問下幾多間附屬公司先為之多。同樣 小數股東股益點樣先為之大 例如佔左總盈利既某個%就叫大？

龔成老師︰

我地要估這個調整，主要係因為當集團對附屬公司持股，較接近50%時，即附屬公司盈利中，有不少比重非有集團所有，令計算出來的純利率出現偏差。

所以，我地有時係會唔扣"非控股權益"，直接用盈利(而非股東應佔溢利)去除營業額，去計算純利率。

但我地唔需要一見到"非控股權益"有數字，就去做這個調整。因為有時個數字好細，當你調整後，發現純利率其實無明顯變化。

所以，你預"非控股權益"大於"盈利"10%，我地才會對純利率進行調整，令佢數字更能反映真實情況。

------------------------------------------------

Q22402：

你好請教1928，見佢近期弱左，如靠債去還債，賺到的利潤都會被利息蠶食。

派一次中期息都要10億美元，好難想像何時內可以做到。

還未計續牌等政治風險，以你的專業分析點解可以對此企業有咁堅定信心？


龔成老何：

金沙（1928）風險度的確增加左，但投資者分析時，不要將中短期因素太過放大，其實只要澳門疫情穩定翻少少，其實就無事。

睇翻上半年，金沙中期經調整物業EBITDA 2.34億美元，銀娛都是EBITDA有正數的，反映如果唔計會計因素，佢是有錢賺的，除非疫情惡化，否則，佢無問題，而我地從投資，是投資企業的長期，不用將當刻的短期因素太過放大，同時佢持有的資產好有價值，要融資都十分容易。

至於政治因素，的確有少少，但如果從「澳門政府想那些博企續牌的角度」，就是金沙、銀娛，這是從就業、澳門發展等的角度去分析。

------------------------------------------------

Q22403：

你好。想問9926同2878點睇，9926跟人買跌左十元。點算，唉。守唔守好

龔成老師：

康方生物（9926）你預佢上落會較大，不宜持有太多。

主要從事生物製藥業務，專注於腫瘤學及免疫學治療領域。

佢候選藥物例如有ＡＫ１０４：適應症包括子宮頸癌、肝細胞癌、食管鱗狀細胞瘤、胃癌、非小細胞肺癌、黑色素瘤、晚期實體瘤、外周Ｔ細胞淋巴瘤；預計於２０２１年下半年在中國提交治療子宮頸癌的首次ＮＤＡ（新藥申請／生物製品許可申請），及開始在美國進行治療晚期或轉移性實體瘤的Ｉｂ／ＩＩ期臨床試驗，以
及聯合治療實體瘤的試驗。

這企業現時是投資期，回報要慢慢先見到，不過，這股估值十分難。因為無實在的收入與盈利進行計算。

只可以話，風險較高，是有危有機的類別。投資注碼一定不能大。

如果持貨，小注，長線，不是不可。投資得就一定長線，等佢長期回報。

如黑持貨多，宜減。

晶門半導體（2878）都算有長線投資價值，佢係一間無晶圓廠半導體公司，主要從事設計、開發及銷售專有集成電路晶片產品及系統解決方案業務。

佢的產品及方案可供應用於智能手機、平板電腦、電視╱顯示器、筆記本電腦以及其他智能產品。

雖然都有一定的生意，但多年來都出現虧損，到近年才算好轉。行業需求對佢是利好的。

這企業質素未算好高，因為技術未算好強，這股如果持貨不過多，都可守住先。

------------------------------------------------

Q22404：

我想請教你
2869在11元買入
1313 在 9.9買入需止蝕嗎？

我知3319/1313是優質股可以守，2869是優質股嗎？
多謝阿sir解告令我心態有改變

龔成老師：

綠城服務（2869）仍算有質素的。佢為中國高端住宅物業服務供應商，提供以下三類服務：

（１）物業管理服務：包括保安服務、保潔及園藝服務，以及物業維修及保養服務。

（２）顧問諮詢服務：包括在建物業服務（示範單位管理服務及建築工地保安服務）及管理諮詢服務（於項目設計及開發階段提供物業開發諮詢服務，以及於物業交付後提供各種物業管理諮詢服務）。

（３）園區增值服務：包括園區產品及服務（購物協助、拎包入住服務、交通服務、文化教育服務、房屋返租與置換服務及二手房交易的經紀服務）、家居生活服務（物業維修及保養、家政服務、保健及娛樂），以及園區空間服務（出租廣告空間，並提供廣告設計、製作及出版服務）。

過往發展不差，業務有增長，現價合理區中上部。

這股都可以守，但你預佢中短期會有少少波動。

至於另外兩股，都可持有。但你較集中在內地地產相關行業，小心行業集中風險。

------------------------------------------------

Q22405：

如果我40歲，加按d錢出嚟投資會唔會有風險？謝謝你的意見

龔成老師︰

以你年齡可承受的風險程度(以你年紀，建議總負債，最多只可以佔總資產6成)，加上現時仍處低息期，加按是沒有問題的。

關鍵是加按後，將資金買入其他資產，創造更高的回報，由於加按是要支付利息的，所以新資產產生的利息回報一定要比加按的利率高，這樣才值得做。

最好有比較明顯的息差回報，這樣才能抵銷加按後，加大負債為你所帶來的風險。因此，你加按前，最好先計劃如何分配新資金，如何平衡風險，怎樣說服自己獲得理想的回報，即是有充分的理由，而非為加按而按。

若是投資於股市，相信中低風險會較合適，公用股、內銀股、收息股、房託等，都可考慮，策略為長期的增值及收息，期望股息回報大於加按利息，這樣就值得做。但絕不建議炒賣等方式投入股市。

------------------------------------------------

Q22406：

到目前為止，我們現住的村屋政府還沒有任何收地計劃。估計還可以起碼多住十年八載。我想得到一些資料關於鄰近地區政府收地價、土地私人買賣價錢等資料，

從而比較一下地主開出的價錢是否合理。請問以上資料可以從哪裏得知呢？謝謝你的幫忙！祝生活愉快！

除了以上住屋問題之外，從二月至今，已分段買入以下股票合共約200,000。(之前打算用1,000,000投資，其中500,000分注入市及月供股票；

其餘500,000手持現金等大跌市才大力度掃貨)，請問暫時這個股票組合是否合適我？分注買入速度又是否過急呢？

66 - 43.50 （12.3%）
1658 - 5.70 （9.6%）
1928 - 29.20 （13.2%）
1972 - 22.90 （12.9%）

2800 - 27.80 （7.8%)
3067 - 17.60 （19.9%)
9633 - 56.80 (12.8%)
9988 - 198 (11.2%)

另外，月供股票方面也開始了兩個月。分別月供以下股票。月供股票因為剛開始，未有計算在以上。

2800 - $3000
27 - $2000
66 - $1000

請問以上我的股票組合是否潛力股方面佔約40%太多呢？之後再分注買入的資金，我會偏向平穩增長股及收息股。請問龔sir有什麼股票建議加入我的組合呢？

以上問題太多，不好意思。希望得到你的抽空回覆。祝身體健康，生活愉快！

龔成老師︰

你可以去田土廳和地政總署，可以睇到交易金額和一些補償計算資料，你可以用來參考。

你現時持股和月供計劃，大致上係可以。但安碩恒生科技(3067)和阿里巴巴(9988)係潛力股，這類股票以你48歲，最多佔2成左右好了。

未來時間，就正如你所講，要偏向平穩增長股及收息股，去慢慢拉低翻潛力股比例，以免風險過高。以下都是一些合適選擇，現價都合理，你可以參考下。

但緊記唔好偏重個別企/行業，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時你投入了1/5資金，這個比例係可以。當再出現多10-15%左右回調，就可以再加下一注。而另外50萬，但等大跌市出現，才分注入貨。

------------------------------------------------

Q22407：

1) 龔sir , 想問一問關於美股TLRY , 持有半年虧損接近40% , 應繼續持有還是止損，能幫手分析一下嗎

2) 龔sir, 6993 係米仲可以持有 ,仲可以守

龔成老師︰

1) Tilray Inc (TLRY)從事是一家從事製藥業務的公司。該公司是一家向藥品分銷商供應大麻產品的供應商。

大麻股過往曾是熱炒對象，過去一年波幅好大，由$5至到$67。上市後，更曾經升至$300，可見這隻股票，有一定投機味道。

我自己無仔細研究過大麻行業和相關股份，但從佢財務數據睇，上市後收入係有明顯上升，但依然未能達至收支平衡。

因此，此股現價不少部份，係來自投資者對"將來"的睇去。只要未來前景稍有偏離，你預佢會有較大幅調整。

此股唔係話無投資價值，但確定性較高，只宜小小注。

2) 藍月亮（6993）不是劣質，但最新業績令人失望，由於上市前的數據幾靚，因此，有可能佢上市前執靚盤數，這亦是我對新股/半新股有保留的原因。

佢最新的中期虧損約$4400萬元，去年同期純利約$3億元。虧損主因是市場上，其他平台出現過剩的較低價產品，導致佢定價策略及產品在市場上的價格體系受到干擾。

為統一產品在市場上的定價，佢向其客戶提供若干折扣以穩定產品的市場價格，此類折扣對其於上半年的毛利率產生約9%的負面影響。

相信中短期未必強，但長遠，其實又不算好差，佢成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一。

整體有質素，不過之前貴，現價算是合理區中上部，如果你小注持有都可以。

------------------------------------------------

Q22408：

龔老師你好，我想聽一下老師的意見.本人可承受高風險。

1. 持有1257，20,000股平均價3.4。現價掉到2.77左右，應否繼續持有或減持?

2. 持有1448，6,000股平均價7.02。現價7.42應否增持?

還是增加其它平衡增長股?

龔成老師︰

1) 中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值。但不建議太過大注，始終都有風險，同時可能仍會弱一段時期。你明白這些風險，你照長線持有係可以。

當然，若你持股佔組合較多的話，我比較建議你沽出少少，去平衡翻個風險，咁會較好。

2) 福壽園(1448)有質素，現價算合理區頂，如果你現貨佔組合比重不多，或者資金較充裕，現價可以再加小小注。

否則，你等佢回多10%左右，才再加注會較好。

以下增長股，都適合你30歲年紀，你可以參考下。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、粵海(0270)

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22409：

真的衷心感謝，讓我瞓吾著幾日不斷思考過去錯在哪！同時，我並非抗拒買股票，亦十分認同你價值投資的方法。

我從不同category 選了一些之前心儀的和你推薦的選一至两隻，想把台灣現金調回來建立一個組合，比D意見？

銀行-滙豐/恆生/中銀3988（但PE 4倍不到，好似鬼鬼哋）/citibank
地產 - 恒基/新世界/置富
科網-阿里/騰訊/MSFT
手機-小米/舜宇/瑞聲
網絡-電盈/香港電訊/移動

電車-比亞迪/中國電車/雅廸
公共-地鐵
醫療-和黃醫藥/平安好醫生
零售-佐丹奴/六福/周大福
休閒-金沙/銀河
指數或基金-2800或3086華夏納指

建倉用80至100萬，留150萬現金等。

有點長，抱歉！

老實講，我清楚年齡影響可承擔的投資風險，只是希望在還有生產力（10-12年）間，除完成兩個小朋友在外地讀完書和以後照顧到自己已滿足了！

龔成老師︰

以你48歲年紀，我唔建議太進取。你可以用恒基(0012)、地鐵(0066)、金沙(1928)/銀娛(0027)、六福(0590)/周大福(1929)、指數基金作為核心，為組合提供平穏增值能力。

之後，再配以一些收息股，好似滙豐/恆生/中銀3988、置富(0778)、佐丹奴(0709)。

中行(3988)和一些內銀股，你會發現地市盈率都係好低。因為市場覺得佢地壞帳潛在風險大，所以市場唔會比佢地個市盈率太高。

最後，若果你想個增長力強少少，可以加入一些潛力股，例如阿里(9988)、騰訊(0700)、比亞迪(1211 - 但現價偏貴，可先用2845代替)。但由於潛力股風險較高，總額不要高於組合2成。

現時大市只在合理水平，先用80至100萬建倉，再另留150萬現金等大跌市機會，係可以。

若你想加快增值速度(但會承受較高風險)，你可以調高少少潛力股和平穏增長股比重。

否則，你這個年紀，我建議按潛力股/平穏增長股/收息股(20/40/40)的比例，會較穏當。

------------------------------------------------

Q22410：

龔成老師, 你好~ 本人35歲, 月入2萬幾, 60萬左右, 買了以下股票~ 月儲萬五至2萬左右~

買了以下股票, 但一直持續跌勢, 雖然以下股票都是有質素的, 但.. 某些股票仍需要賣出先止蝕嗎? 謝謝!

另外, 怎樣可以增加財富呢.. 因有可能10年後便跟小朋友去外國讀書, 相信在外國對於我來說, 不易搵工作… 買那些股票是比較隱陣呢, 謝謝!

700 騰訊 買入: $616 x 400 (現價約: $537)
1211 比亞迪 買入 $157 x 500 (現價約: $218.
388 港交所 買入: $437.5 x 200 (現價約: $531.5)
2800 盈富 買入: $28.43 x 3000 (現價約: $27.72)
3690 美團 買入: $290.30 X 200 (現價約: $268.80)

9988 阿里巴巴 買入: $223.8 X 100 (現價約: $202.60)
1398 工商銀行 買入: $5.33 X 3000 (現價約: $4.39)
1810 小米集團 買入: $24.75 X 400 (現價約: $26.
1972 太古地產 買入 $23.10 X 400 (現價約: $22.95)

1177 中國生物製藥 買入 $7.44 X 1000 (現價約: $6.99)
3067 安碩 買入: $17.12 X 300 (現價約: $15.28)
2638 港燈 SS 買入: $7.61 X 500 (現價約: $7.80)
3088 華夏恆生 買入: $10.34 X 200 (現價約: $9.22)

龔成老師︰

你現時持股都係有質素，你唔好太比個買入價或者大市氣氛影響，令你做出錯誤決定。緊記只要係有質素，長線投資價無轉壞，就算股價下跌，我地都應該照持有。

由於你尚有10年時間，用以上股票去增值，都係可以。

但有個較大問題，你而家太偏重左係潛力股(0700, 1211, 0388, 3690, 9988, 1810, 1177, 3067, 3088)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

但你唔需要減持任何股票，只要未來時間，加大翻平穏增長股部份，令組合慢慢回復平衡，咁就可以。

平穏增長股：指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

但到10年後，你要移居外國，你可能會需要穏定現金流，去支援生活，多於財富增值。

那時候，你可以將部份股票，慢慢換成收息股，用股息收入，去減輕你生活負擔。至於比重多少，你就按自己實際情況而定。

------------------------------------------------

Q22411：

龔 sir 您好！又要打擾您！有關一些資產問題希望您可提供一些意見。

本人有一層剛供完的樓，由於預計子女在未來五至八年後會移居外國 （他們已有當地護照），所以我希望在當地置業。但由於疫情關係，

暫時不能往來外地親自考察當地不同區域的環境，而我又不想只靠海外agent 隔山買牛，所以暫時對於將要付出的金額只有很初步的概念。

現在問題是，我應否在此期間先翻按現在的居所，先keep 錢向手，再等時機去用這筆錢於海外買樓（根據疫情，有機會我要兩年左右才真正落實買到，

甚或如果到時樓價因大量移民而飛升, 海外置業計劃亦可能泡湯）

另一考慮是，我自己工作的房屋津貼將會屆滿，人工也已經到了max, 所以翻按的還款能力會降低，我應否take risk 仍然去翻按 （因市場常有消息指高息時代很快重臨）

不好意思，可能說得有些亂。盼龔sir 比D意見

龔成老師︰

你2個問題，都係建基於一些假設性結果(外地樓價大升/環球息口大升)，但這些結果，到底會否成真，幾時會成真，無人會知。

我地係投資時，係唔應該用"估"去做策略。我地係因應現時情況，平衡各方利弊，去找出一個較可行方向。

由於你子女尚有5-8年才會移民當地，有一定時間。你而一刻其實唔需要急住買當地物，除非你好有信心，長線當地升幅，一定會跑嬴香港樓，咁就另作別論。

至於翻按，你就要一直支付利息開支成本。但你又未知幾時先買外國樓。如果到時外國樓升幅不多，可能這筆錢跟本用不上，你就白比利息。

我建議你先計劃清楚，如果你擔心到時賣左香港樓，都唔足夠你買外國樓。你可以把握這5-8年，用優質股去增值財富，令自己有更多資金可以動用，減少到時的不確定性。

------------------------------------------------

Q22412：

老師，我上了堂， 計算了00698 通達之估價為

市盈率9-12
保守盈利預測0.05
市值股價約$0.45-0.6

不知道為什麼，00698的估價跌了很多，我之前已經減持了很多，上堂後覺得此公司不優質，但還有少量貨，不知道如何處理剩下少量貨，約40000 股，請老師指導

龔成老師︰

佢過往市盈率大約係9-10.5倍，但由於佢質素唔係咁高，我會再打折扣，下調至6-8倍左右。

而每股盈利，可以用佢過去10年平均，大約HKD0.09。

合理價︰HKD0.54 - 0.72。

但要留意，通達集團（0698），只是不過不失。

佢主要從事電器產品（包括手機、手提電腦及其他電器產品）零部件生產；為電子產品及電器提供金屬外殼及其他五金部件；及提供塑膠機頂盒及生產體育產品。

現價計係偏平，但由於質素只係一般，唔值得持有太多，勉強可長線。若40000股只係佔你成個組合，一個好低的比重，你照持有係可以。否則，當有反彈，就要再沽多少少。

------------------------------------------------

Q22413：

老師,其實etf回報係唔係理應回報多過投資個股? 我見差唔多全部etf股價都係步步向上,好似無邊d係大起大落 或者 長線向下? 想問下呢個係ETF特性?

問題二. 想請問下一我地係咪應該買ETF好過買個股? 一般人理應唔會下下買中倍升股,但係etf就基本上股價係一直向上? 長線好小跌?

謝謝你的寶貴意見

龔成老師︰

1) 唔一定，因為ETF係一籃子優質企業，可以係追蹤一個股票市場、一個行業、或者特定產品(如黃金)。

以盈富(2800)這隻較為人所熟識的ETF為例，佢係追蹤恆生指數，等同買入58間優質企業。

但當中有潛力股，有平穏增長股，也收息股。若你用當中的比亞迪(1211)為例，佢近2年一定係跑嬴盈富(2800)。

但如果你用中國人壽(2628)做比較，佢就明顯係跑輸恆指。所以，ETF唔一定係跑嬴個股。只係佢較有風險分散能力，令個整體回報相對穏定。

2) 如果你係初階投資者，不懂選股，但又睇好個別市場，ETF就會係一個唔錯選擇。

因為佢係一籃子股票，就算當中有些股票，表現未如理想，但只要大市或者相關行業係正面發展，你都會享受到成果。這就是分散風險，有利之處。

當然，如果你係買中一隻較具潛力的企業，升幅係有權優於ETF。但若投資個股時，你選擇錯誤，係可以大市/行業升，但你個隻跌。

------------------------------------------------

Q22414：

龔成 我係你fans 有買你啲書 亦曾經係你股票班學生 不過喺度好想同你講聲對唔住 我覺得自己好似辜負咗你咁 因為你當初教嗰套信念我無好好記住

搞到依家由賺錢變倒輸 初初我齋買港股都好哋哋 後尾學人買美股 賺咗少少之後就開始心雄 再玩埋沽空 結果依家輸到損手爛腳 我好嬲我自己

當初嫌你嗰套賺錢慢 於是就不知不覺好似走咗入賭場咁 仲要唔識走 越賭越大 到依家諗返轉頭 原來你一路教嗰套先係最穩陣 雖然唔會一夜致富

但最終一定有收成 依家我down得好緊要

近排工作 前途 甚至依家股市 無一樣嘢順利 好似時不與我咁 唔知點樣走出呢個困局…

龔成老師︰

其實，有唔少人都會因為短炒成功幾次，就會心雄，只後走上短炒之路。這就是點解我成日Q&A度提讀者，以前做證券行個陣，見短炒個班，可能會短期賺，但長遠都係輸晒架原因。

我地投資要成功，除了要學好一套投資方法外，經驗、自律性和心理素質，都係同樣重要。

有些人，本身心理素質好穏定，可以好好地操作個長線投資計劃。有些人，要好像你有一樣，要有所經歷才會明白。但重點係，這2種人最終都會走到財務自由之路。原因是，他們都"學懂"了。

你現時才34歲，依然很年青，只要你現時開始用正確方法，去創造你財富增值組合，係一D都唔遲。

而且，你比其他人經歷更多，對未來操作"真正"大升大跌市時，你心理上優勢，係會更加明顯，這都對你長線投資有利。

所以，你現時要做，就係收拾心情，做你應該做的事，一切自然慢慢會好。加油!!!

------------------------------------------------

Q22415：

老師，我手持幾隻蟹貨，可唔可以strong hold 牙？

3692 $33.1 2000 shares
2160 $16.7 5000 shares
1913 $55.5 500 shares
873 $24.7 3000 shares

謝謝

龔成老師︰

持有與否，你要睇翻企業本身有無質素。如果無，就算唔係蟹貨，係賺緊錢，都要減持，甚至係沽出。

微創心通醫療科技（2160）和翰森製藥（3692）不確定性較高，近期中央相關政策，令佢地風險高左，故暫時不要再加注。

普拉達（1913）有質素的。

佢係全球時裝及奢侈品集團之一，透過Ｐｒａｄａ、Ｍｉｕ　Ｍｉｕ、Ｃｈｕｒｃｈ’ｓ　及Ｃａｒ　Ｓｈｏｅ品牌，從事設計、生產、推廣及銷售高級皮具用品、成衣及鞋履，以及透過特許協議提供眼鏡及香水。

有一定的品牌價值，但都較受經濟週期情況，你預佢中短期都會較波動，這股有長線投資的價值。

世茂服務（0873）由世茂集團（0813）分拆上市，業務有（１）物業管理服務（２）社區增值服務（３）非業主增值服務。

睇翻佢過往的財務數據，基本上都正面，業務不差同時有增長力，不過上市年期不算耐，因此參考價值會減。

股價上落較大，要注意風險。這股都有質素，有長線投資價值。

------------------------------------------------

Q22416：

龔sir, 睇而家個勢6088同788前景如何。6088坐緊3.48，788坐緊1.44

1858之前40入跌到20放埋一邊冇理到 點知前排彈咗一彈上30 好後悔冇溝 係咪繼續坐吓等

龔成老師︰

唔好用買入價，去決定是否持有一隻股票。我地要睇的是企業質素，只要佢有長線投資價值，中短期帳面虧損，唔係咁重要。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，但預期長遠的增長力只是中等。若你持貨不多，可以守。

中國鐵塔（0788）質素無大變，但你預佢增長潛力同幾年前相比，會係弱左。整體而言，都有長線投資價值。

春立醫療（1858）長遠有發展的，但本身佢股價和盈利，都係較大上大落。你現貨照持有，只要唔係佔組合太重比例，咁就可以。

------------------------------------------------

Q22417：

老師點睇1024快手？佢差唔多每曰都跌，有投資價值嗎？現價$142是否仲係貴既水平？

問題2，另外今個月開始每月會買1手你書中介紹的潛力股1833（平安好醫生），用老師上堂教的估值計是合理價，現價吸引，會持續1年至2年買入，佢升到咩價位應該停買？

想問請如何操作？老師又覺得e家1833是處於咩水平？

龔成老師︰

1) 快手(1024)之前貴，現價開始合理，大致在合理區中上至頂。近期受大市和中央政策風險所影響，有較大回調，但本質上無太大轉變，有貨可照持有。

2) 平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區中間位。

但好波動，你每月買1手，去平均個價格，係可以。但此股始終不確定性較高，不宜佔組合太多。

如果一個月買一手，會令佢佔你組合比例過重。你可以更改為月供，或者隔開多少少，例如每2,3個月才買一手，去平衡。

------------------------------------------------

Q22418：

龔sir，我有個理財問題想請教你，我手上有兩個物業出租，一個已經供完每月收租金$11500.00，

另一個仲有20幾年要供，每月租金收入$12500.00，租金可以cover供款和物業管理費等支出。

我的問題係我自己住的單位是租的，每月扣除租金收入後還需要付$20500.00。

我上完你初階股票班後一直思考，我係咪應該把手頭上兩個出租物業賣出，先幫自己買入一個自住用的物業來減底支出呢？

謝謝！

龔成老師︰

其實都唔一定，因為香港買賣樓宇成本唔細，你這個變動，可能要用你唔少錢。你可以主要考慮翻，邊個方法可以令你有更在資金空出，作投資增值之用。

如果你現時置業，反而令你每月投資優質股資金少左，其實係成個配置角度，就未必值得咁做。

當然，長線計你照好都持有一個適合自己長線生活需要的物業，但唔需要過急去進行。

你現時持有2個物業，若都有一定質素，你可以照持有，用佢地來資產追資產，平衡樓市波動的影響。

另一邊，你繼續用優質股去增值，到你可以做到買自住樓之餘，又可以保留一定優質股(最好可保留一間收租物業)，才去出手買自住樓都未遲。

------------------------------------------------

Q22419：

1) 也想請問你1093, 《50值博倍升股》中亦提及此股能穩中求勝，請問此股的便宜區是多少？

2) 1297的便宜區是多少？

3) 你的著作《50值博倍升股》中提及1181是穩中求勝之選，請問此股的便宜區是多少？

4) 《50值博倍升股》中提及1458成功打開了一片藍海，請問此股的便宜區在哪？

5) 《50值博倍升股》中提及1373是穩中求勝之選，請問此股的便宜區是多少？

6)《50值博倍升股》中提及868是穩中求勝之選，請問此股的便宜區是多少？

7) 讀完仍的《50值博倍升股了》，但發現很多股票已升了很多，如果現時從書本中選一隻，你會選哪一隻？

8) 想問根據過往數據，本港樓市平均每年會上升多少？（樓價、租金分別上升多少？）我已在書中找到了。

9) 想問現有哪隻優質潛力股已跌至便宜區？

龔成老師︰

1) 石藥集團(1093)現價算合理區上部，要平宜區，要有好大幅回調，接近回一半才到。

2) 中國擎天軟件（1297）規模較細，以及行業存有風險。此股較難做個穏當估值，如你想投資，現價都有投資價值﹐但要控制注碼。

3) 唐宮中國(1181)現價計，你預回多3,4成，會開始到初步平宜區。

4) 周黑鴨(1458)雖然近期回落唔少，但都仲係偏貴，你預佢真係有好大跌幅，去有機會進入平宜區。

同埋，其股都有一定風險，不宜大注。

5) 國際家居零售（1373）你預跌在多2,3成，才算係初步平宜區。

6) 信義玻璃（0868）過往一段時間，累積了不少升幅，就算合理區，都要有一個明顯大回調才會到。所以，暫時唔好入市住。如果真係想入，最好用月供去儲貨。

7) 我會選中生(1177)和信義光能(0968)，2隻雖然只在合理區上部，但本身質素較高。故在當中，值博率會係較好的2隻。

但由於現價唔平，只宜小注，等有明顯回調，才正式入市。

8) 過往數據，你可以作為一個參考。但更重要，你應著眼面前轉變、房屋政策、樓市供求問題。未來預期，香港中短期房屋都係維持供不應求。

再加上，近年多國政府都用量化寬鬆政策去救市，令市場資金大量增加。所以，可預見的將來，樓價都會維持上升。

9) 沒有，其實高質素的潛力股，極少跌到平宜區。所以你唔好諗住平宜區先入，要係合理區就開始分注，如果唔係，好機會錯失入市機會。

------------------------------------------------

Q22420：

老師，我睇返中國銀行和中銀香港每年既股息增長率，中國銀行既股息增長比較快，而家中國銀行呢個價位股息有8厘，如果股息再增長股價必定有影響，那投資中國比行不是比中銀香港好嗎？

同埋我想問如果我想查返中銀香港10年前既股價可以係邊到查詢？

同我想問通漲對阿里巴巴，騰訊，香港中華煤氣，同中銀香港會唔會有影響，我照你推介已買入呢四隻股票，之後仲想入d香港電訊同置富

龔成老師︰

我地唔可以單憑派息增長力，就去判斷一個企業情況。無錯，當中行(3988)股息再上調，有機會令股價再上。但

但始終中行(3988)本身已經好大間，加上佢業務上發展比中銀香港(2388)細，故增長力預期會較弱。

以你3X歲年紀，應該集中係財富增長上，故中銀香港(2388)會較為適合。

至於你想睇10年前股價，你可以去YAHOO財經，或者睇各個財經網的圖表，都會有。

阿里巴巴(9988)，騰訊(0700)，香港中華煤氣(0003)，同中銀香港(2388)都係有質素的企業，長線都會跑嬴通漲，你長線持有就可以。

至於指數基金都係適合你，但香港電訊(6823)只係收息股，增長力不高，不太適合你這個年紀。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21781-Q21800）

Q21781：

龔sir, 我係你舊生，有關於現金流嘅問題想請教，我偶爾聽到你評論一些公司現金流強，請問現金流強、普通、弱有什麼指標?謝謝你百忙抽空回答

龔成老師：

投資者會分析企業的現金流量表，在年報可以找到的，當中會分為「經營活動」、「投資活動」、「融資活動」3部分，而我地會集中分析經營活動部分。

如果企業的經營活動現金流保持強勁，反映企業憑做生意，持續保到理想現金流，除了反映業務不差外，企業得到大量現金，無論發展，又或派息，都是有利因素。

你預保持年年正數，就是現金流強或普通，而當中的數字大，就是強勁。當然，我地仍有好多因素分析，例如現金流量表的各項目，盈利的情況等。

------------------------------------------------

Q21782：

龔老師你好丫，我係你嘅忠粉，我有問題想請教你的‍

我現時28歲，剛上車一年，地點係粉嶺聯和墟帝庭軒，買入價係550萬。

想問下黎緊幾年個區樓價升幅大唔大？因為我見附近又有新盤開賣。

我想過幾年轉返出沙田或荃灣的地方住。所以先上車再換樓，咁樣做岩唔岩丫

龔成老師：

坦白講，粉嶺聯和墟始終離市區有距離，就算去翻地鐵粉嶺站，都要坐小巴或行一段時間，長遠的升值潛力不算大。

當然，聯和墟有點似一個小鎮，如果工作地點不是市區，從本身的生活配套上，其實不算差，因此不是劣質。

你擁有一個物業，都算是處於「物業追物業」的狀態，不過選擇物業就不是最好類別，但都不是差。現時你物業，可持有的，到你日後，可轉翻出去沙田或荃灣，無論自住定長遠升值能力都會較好。

------------------------------------------------

Q21783：

龔老師你好。我今年已32歲，一直都沒有理財概念，只係被動地儲錢（即係用剩先儲，但我唔買名牌嘅）。

上年好不幸地被裁員，剛剛搵到工，但人工只剛剛夠食住行+俾屋企人藥錢（年頭驗到有事），差唔多無剩。而我亦只是個文員仔，唔望會加人工，就算搵新工都唔會加到好多。

我嘅人生好似入左個死胡同咁，晚晚臨瞓時都眼濕濕，唔知未來點算。

目前儲蓄只有20萬，深明擺係銀行只有慢慢眨值，想請問有什麼資產增值的方法？

龔成老師︰

現時大環境唔係咁理想，就業市場，以至人工收入受到影響，係正常，唔好諗得太負面。大環境我地係改變唔到，但個人心態係可以改變。

你先要了解自己未來工作發展目標，講緊係長線，10年以上。

再睇翻，現時工作，可唔可以幫你達成目標。如果唔得，那這份工作，純粹只過渡性。你就要工作之餘，努力為你目標工作做準備。

學習相門知識、上相關課程、或者做有關兼職。目標係當市道轉好時，這些經驗可以增加你成功就職理想工作的勝算。

至於財富增值方面，你要一改以往金錢觀念。想做到理想財富增值效果，每月我地係先要儲起一筆錢投資，到真係有錢剩，才作休閒消費，概念是跟你以往係倒轉。

我建議你有時間的話，可以找些增加收入方法，例如兼職、網上小生意等，目的係每月可以開始空出一定資金，作投資增值。

以你32歲，可以選擇一些「平穩增值股」+「潛力股」作投資目標。

到你每月可儲到錢時，你可以每月先用一半儲蓄做月供股票，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於20萬，我建議你扣起半年開支和屋企人藥錢。有剩的一半，你可以分注買入上述股票，餘下同樣等大跌市機會。

------------------------------------------------

Q21784：

龔sir你好，我今年年初開始接觸到你呢個Facebook page，好有啟發，慢慢開始改正我投資觀念，仲一次過買左你幾本書希望增加投資知識。

有兩個問題想請教你：

1）未認識你呢個網之前只係靠屋企人一d介紹買入一d股票，所以唔識睇“平貴”同優質程度去揀同買，宜家手上股票組合需要慢慢調整，

其中手上持有696呢隻股票，而且係組合入面都佔左幾多（大概20萬入面嘅5萬）。我睇過你嘅書知道呢隻股票有佢嘅獨特性，但我當時2-3年前嘅平均買入為$21-22，

宜家佢股價一路都上唔返去。我因為某d原因暫時唔可以再投入額外新資金去買股票，可以動用黎買嘅現金只有萬五左右。如果我得戶口入面個二十萬黎增值財富，

咁我應該繼續放係度繼續等待定先賣出部份黎增加現金同買其他股票增值？

2）另外，你係書度提過可以留意係生活之中自己喜歡嘅野同埋身邊嘅潮流黎發掘潛力/優質股。最近香港人都係度談論Viutv/mirror/error，

我都係一份子。請問龔sir點睇電盈前景？我睇過佢地係電視業務之前都仲蝕錢，但已經慢慢開始有改善，如果佢地咁嘅走勢，

會唔會有潛力突破到一直以來嘅“穩定”？
先謝謝你！

龔成老師︰

1) 中國民航信息網絡（0696）係資訊服務及網絡管理解決方案商，目標市場為中國航空客運及旅遊行業。

例如電子旅遊分銷系統、機場旅客處理系統等，過往業務穩定，有長線投資價值，不過不是高增長類。

你買入價有少少貴，但又唔係好貴，可以守。若你係年青至中年人士，這股適合，照持有就可以。但由於佢佔你組合較重比例(個股應維持少於組合15%)，我建議你都部份，換至其他優質股，咁會較好。

記住，我地投資股票，就等同你投資緊一間企業，一盤生意。你必需了解佢業務、賺錢能力、行業發展、財務狀況等，才去做決定。

如果你而一刻投資經驗較淺，不懂定平貴。你可以用分注或者月供模式去儲貨，去平衡買貴貨架風險。

現時大市只在合理區，你餘下5萬蚊就先儲起，等大跌市才出手。

2) 生活選股法，係其中一個選股模式。因為這些企業和你生活息息相關，所以你較易了解佢當中營運模式和優勢。

但這只是初級，之後我地就要進一步審視佢本質、行業未來發展、財務狀況等等，才可以決定，是否一間值得投資的企業。

電盈（0008）雖然業務算穩定，但由於負債較多，都有一定風險。

VIU TV最近的確發展不錯，但當你再仔細分析佢年報。你會發現媒體部份，其實佔佢收入比重不高。

因此，就算佢有較理想發展，當整個集團盈利幫助，唔會好大。

這股作為收息股，可以，但增長力不強，若你較年輕，就不宜持有太多。同時負債多有風險，不建議大手投資。現價合理的。

雖然這隻算不上係優質股，但你這個思考模式係正確。只要你再努力學習更具體的投資知識，和累積經驗，相信你長線會有唔錯成績。

------------------------------------------------

Q21785：

龔成老師你好，一家準備移民到英國生活，賣出香港物業後可預計套現800萬。

準備到當地買一層$200~300樓自住，其餘想投資賺取生活費，因為未必會在當地工作，所以需要現金流。

請問：用50%~70%資金買英國樓收租，其餘買收息股好唔好？

如果買收息股，應該係買英國股？還是買港股比較好？

因為對英國股票唔熟悉，只有留意港股，阿sir有無英國收息股推薦？

我見阿sir話個組合要平衡，同一股不能太多，咁一般收息組合應該買幾多隻股票？

(好難搵到太多唔同行業又有6%以上既收息股）例如3988 1398 939 都係銀行業

多謝阿sir解答

龔成老師︰

買入自住物業後，用50%~70%資金買英國樓收租，其餘買收息股架策略，係可以。

但你投資英國樓時，緊記只可以投資一些真正了解的項目，堅守「不認識就不投資」的原則。

確保自已真的已了解當地的物業市場、租務市場、法例、經濟發展。而物業有潛力，租金回報率又理想，咁就可以。

另外，唔好用晒全數資金去投資，要保留一部份現金在手，大約半年開支左右(你可自己按情況調整)，以備不時之需。

至於收息股，其實你買美股、英股、港股都係無問題。你只要睇翻你自己的認識程度、交易成本、稅務成本等，去做決定就可以。

我自己主力研究港股，所以比你建議，都會集中係港股。由於現市大市只係合理區，有不少優質收息股，都無6%咁高。

但我地唔會知，未段一段時間，佢地會唔會回到6%以上。所以，我地只可以策略性地，因應平貴，係現階段先入小注入貨。每有回調，再慢慢加注。

但正如你所講，係配置股票組合時，唔好太集中某行業，以免出現過度集中性風險。相同行業不可佔組合多於30%，而單一企業不要高過15%。

特別要留意係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

收息股︰港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

最後，你要留意英國係收取股息時，係會抽稅。係計算你實際現金流時，你注意這點，以免高估左實際股息回報。詳細計算方法，建議你上官方網頁，或者向當地稅務顧問查詢。

------------------------------------------------

Q21786：

你好，龔成老師，我今年34歲，獨女，屋企供滿左層居屋市值大概480萬，月入4萬，之前因為種種原因幾乎沒有儲蓄。現時有5萬現金，MPF 30萬，

黎緊每月可以儲1.5萬

1. 希望可以55歲退休，想之後每月有最少2萬現金流，請問我應該可以點步署？

2. 屋企人曾經提出以現有單位再買私樓，但居屋原來不能再按，所以唯一方法就係賣出現有單位再另外買私樓，請問長遠計係咪私樓會保值啲？

老師有冇建議我可以點做？點樣安排會好啲？
多謝龔成老師

龔成老師︰

1) 如果你希望55歲退休時，每月有2萬蚊現金流，以股息率6%計，你需要本金400萬。

你可以用「平穏增長股」 + 「潛力股」的組合，去累積這筆資金。現在你每月先用5成儲蓄，即$7500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

2) 居屋雖然投資價值，一般都遜於私樓，但好處係投入資金較少。可以用空出資金，作其他投資之用。

由於你這間是自住屋，是否配合你長線生活需要，會比佢保值能力更重要。除非你現時自住樓，真係好唔理想，配合唔倒你長線生活要求。否則，我唔建議你沽出。

若你想投資物業，你可以先用優質股增值，到一定金額才買物業投資。

------------------------------------------------

Q21787：

早晨龔sir,我除左月供apple外，頌可以月供咩股票可以做到五年連本賺200萬，月供資金有1萬蚊其實有無咁既機會？

現持有9988兩手、823四手、6618兩手、966三手、BIDU 8手，Apple 26股、JD京東20股,Qcom 21股 美股都係依兩星期內先入手

現持有股票還可行？

龔成老師：

你月供apple，可以，佢有質素，無論持術、發展、品牌、銷售網絡都十分強，是可以長線持有的股票。

佢設計了各種各樣的消費電子設備，如智能手機（iPhone）、（iPad）、智慧手錶等。

而iPhone占蘋果總收入的大部分。另外，蘋果亦為客戶提供各種服務，亦是一些延伸的賺錢模式，如蘋果音樂、iCloud、蘋果電視、蘋果支付等。

由於已經發展得好大，因此，最高速增長期已過，之後會進入穩定的增長期。長遠的投資價值仍在，但要留意股價。近年大部分時間在合理區中上部至略貴的水平，如投資要分注，長線。

至於其他股，都可以持有，基本上都是有質素的。

不過，你較多比例集中在科網類別，這會出現集中風險，你要注意翻。

要5年$200萬，$10000月供，仍未足夠的，你要提高金額同時供其他股。另外，每月仍要儲到基本現金，等機會。

選股無問題，但最好平衡翻個組合。同時，在買入時，要慢慢分注，不要一次過買入太過。要同時留現金。

------------------------------------------------

Q21788：

Sir,其實到水桶3楷段買收息股，基本上長期收息，不會常常買出買入，應該選優質的企業的股息越高越好，你常推介的置富和陽光分別5.7%、6.1%

我見3988中國銀行有7.1%更多，反而很少推介是否有問題呢？

龔成老師：

其實最好是建立一個「收息股組合」，因此，幾隻都得，可同時持有。

但我地在分析收息股時，要同時考慮佢業務，因為業務將會影響佢的股價及股息變動，金融業的不確定性以及內銀的風險，比本地的收租企業，前者風險較高。

------------------------------------------------

Q21789：

龔sir。本人48歲，因健康問題已退休，正準備移民往台灣！有幸在半年前朋友介紹而認識你！

購入你的作品，有股票勝經、年報勝經、50穩健收息股、財務自由行及80後百萬富翁！

想請教，我現持有以下股票：

66 有728股 （在IPO時購入一手，持有多年有碎股！）
178 有6000股 （平均價$1.927）
270 有6000股 （平均價$13.773）
435 有1000股 （平均價$3.48）
778 有2000股 （平均價$6.98）

823 有100股 （購入價$69.9）
1398 有1000股 （購入價：$4.94）
1810 有400股 （平均價：$23.35）
2638 有1000股 （平均價：$7.77）
2800 有500股 （購入價$26.62）另開始月供，每月投入$4000

另有3067 有500股（平均價$17.66

我會繼續購入，還有50萬資金！

1.請問龔sir 我是否買得太多問種類股票？

2.需要整合一下嗎？可以如何優化？

3.另我還想購入9988及0285作長線投資！

麻煩你

龔成老師︰

1) 你現時持有種類和數量，算可以。長線計，組合維持10隻左右，會較理想。

2) 從質素上而言，你持股係無問題，可持有。但由於你係退休人士，投資選項時，我地要保守少少。

你應該較集中係「收息股」類別，因為你退休之後係無收入，需要透過「收息股」的現金流，去支援你的生活開支。

因此，你應以「現金流是否充足」作大前題，去考慮你個財富配置。現時你收息股只有陽光(0435)、置富(0778)、工行(1398)和港燈(2638)，唔算太多。

長線計，唔好太集中係幾隻身上，應建立一個平衡的收息組合，包括不同企業和行業，唔好太集中係個別股票。相同行業不可佔組合多於3成，而單一企業不要高過15%。

以下係一些優質收息股，你可以參考下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

當然，你都可以參考我<50穩健收息股>書中資料。

如果你現有收息股，產出現金流已經係足夠應付你基本生活。你才考慮增持一些「平穏增長股」來增值，好似盈富(2800)、港鐵(0066)、粵海(0270)、領展(0823)、莎莎(0178)等。

否則，「平穏增長股」類持有現貨好了，唔好再加注。

而小米(1810)、安碩恒生科技(3067)這類「潛力股」雖有增長潛力，但波動性太高，唔適合你。現貨可持有，但唔好加注了。

現時大市只在合理區，你可以用多15-20萬，以分注形式入市。餘下的就等大跌市，才用來入貨。

但由於你將會移民台灣，加上你本身身體都有些問題。建議你先預留相關的潛在支出，才開始投資計劃，這樣安排會較為穏當。

3) 阿里(9988)和比亞迪電子(0285)同屬「潛力股」類別，波動性太高，唔建議你投資。

------------------------------------------------

Q21790：

龔成老師你好！本人想請教你有關投資方案 , 本人50歲 , 因市況不景氣, 剛被公司辭退, 待業中 , 家中有兩老需照顧及供養。

本人住公屋, 有積蓄大約25-30萬, 希望老師可以指導如何投資增值, 以維持家庭基本生活.

感激萬分 !! 謝謝 !
本人為基層人士

龔成老師︰

我地做財富增值，係需要因應人生階段、投資經驗、客觀環境等因素，去作出一個配置。

由於你暫時無收入，加上有雙親需要照顧，中短期現金的需求不少。所以我地投資前，先要保障好你生活上無問題，做好防守部份，才考慮進攻。

以你現時情況，我建議你先儲起半年基本開支(包括照顧雙親部份)的應急錢，計好數，真的「閒錢」才開始投資計劃。

你可以用「收息股」作投資目標，雖然佢增長力唔高。但派發的股息，可以為你提供穏定現金流，去減輕生活支出的壓力。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜。因始資金不要用盡，大約先用一半，以分注形式慢慢入貨，餘下等大跌市才動用。

到你將來工作變得穏定，有更多空閒資金可作投資。你就可以加入一些較有增長力的「平穏增長股」，去提升翻個增長力。

但現階段，你應以維持家庭基本生活為主要目標。故先集中係能提供現金流的「收息股」身上，「平穏增長股」就暫時不要考慮。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

------------------------------------------------

Q21791：

龔Sir，最近我媽媽退休，有一筆$28萬退休金，現想幫她作投資，想請教一下阿Sir

Plan A
$20萬 股票收息股投資
$5萬 作定期或買Ibond
$3萬作後備資金

收息組合
6823 (15%)
1883 (15%)
778 (15%)
6 (15%)
435 (15%)
1038 (10%)
939 (5%)
1373 (5%)
1398 (5%)

Plan B
$25萬，特選客戶優惠
放5年，每年回$6萬，5年後總共得到$30萬
途中如需提出餘下金錢，則不可再累積任何利息，並需收取3%手續費

龔Sir 對兩個計劃有什麼意見？那個較好？

龔成老師︰

整體而言，PLAN A會係較好。

如果想組合更加平衡，可以加入ＧＸ恒生高股息率ETF（3110），同時減少你部分15%幾隻股的比例，去到10%，會較好。

因為你不少選股，都有相同類別的情況，例如相同是電訊，相同是房託，長建（1038）與電能（0006）關連性都高。

PLAN A以收息股作為主力，再加入風險較低的Ibond作平衡。而且，整體回報都明顯較PLAN B為高。

當然，PLAN B都有佢好處，就係回報係更有保證。因為始終收息股都係股票，會有一定不確定存在。

你可以在風險承受能力和回報之間，取個平衡，去決定用邊個計劃。

------------------------------------------------

Q21792：

成哥，我今年一月碩士畢業，過多幾個月就黎25，一d工作經驗都無。因為讀書讀得太多，現在覺得早我兩年出黎做嘢d人好似都好好。

我自己見mt第二輪failed左， 覺得好失敗25歲已經輸俾人地同年齡好多。雖然上左你股票班投資有斬獲，但事業上確是0。

突然覺得自己全部都係0，係社會廢物。好想消失係呢個地球。我應該點算。

龔成老師︰

你現在才事業剛起步，一切由零開始，是正常的。

加上現時市道較差，未必可以短間內找到心儀的工作，但唔好咁快放棄。

同時間，如果未能找到合適工作，都唔代表無野做。你可以做些兼職，有收入之餘，可以獲得工作經驗，如果同你本科有關，咁就更好。

另外，你可以有時間，去借書返來進修其他知識。把握現在空閒，去上些有用課程。

保持個人積極態度，無論對你本身或者見工，都百利而無一害。

另外，我建議你加強一些讀書以外的技巧，例如溝通、領導、處事等。記住，無人生來就是廢物，只是你未找到自己的真正價值而已，加油！

------------------------------------------------

Q21793：

龔sir你好，我睇左你本5年買樓4部曲，想請教你

我27歲，老公30歲。2人月入大約$43000。已問銀行話我同老公收入及職業可買530萬樓下的樓按9成都冇問題。

我同老公睇緊灣仔區樓，我地睇左十幾間樓，有間心水單棟樓，賣445萬，中銀估價430萬，匯豐估400萬。開放式實用207尺，間屋四正，但42年樓。打算用首置按9成收租

樓的詳細：

好處：
間格實用四方，多窗
高層（非頂層）向東，景觀開揚有山有公園望，光猛
落樓30秒即到地鐵站（囍匯旁近合和中心)
旺中帶靜，樓下條街唔嘈（唔係對正大馬路及叮叮路）
裝修企理四正，再油油就ok
冇任何滲水情況
廁所乾濕分隔整齊
平路入大廈唔洗行樓梯級
管理費唔貴，平其他單橦樓$400-$500
外牆及大堂已大維修，來緊換升降機都唔洗業主比錢，大廈有盈餘200萬及政府津貼50萬

唯一唔好處：
42年樓齡，現在可按30年，但將來放好難放。

主要想買樓收租，現在租金下降，但都位置方便都應該放到$11000-12000。感覺間樓幾好，就算老左冇地方住係到住都唔差。

我們目標係400萬/under 400成交，都係我地budget內。灣仔20-40年樓齡較貴，而且有啲太近街市。所以比較心宜這物業，只是擔心樓齡老，但灣仔區的樓都係比較老，我需要擔心之後難放售嗎？

我們仲要睇其他樓，希望發現荀盤。感謝sir解答，謝謝！

現在我們同朋友一齊夾租新界私樓3房單位，兩人租樓支出共6300。如冇意外未來5年都會同朋友一齊住慳錢。

另外因為我未來大約5年後可能會quit現在full time社工的工作，想自己做塔羅諮詢師+part time 社工，所以襯現在工作穩定，想先上車然後遲啲放心追夢。

兩個都第一次買樓，希望將來可換大屋/再買多層。這個上車盤可取嗎？

龔成老師︰

若能做到你預期租金回報$11000-12000，租金回報率，勉強算係可以。

雖然位置係唔錯，但始終係偏舊，相再轉手較難。而且維護成本，可能都唔少。再加上，實用面積太細，連一個基本家庭生活的尺寸(約300尺)，都未到，都係扣分位。

我明白你策略係先細屋，後大屋。但要這策略成功，其中一個重點位，就係個細屋必需有一定增值能力，至少同大市同步。

你現時灣仔這個納米尺寸的單位，能否做到，我較有保留。

如果你未找到合適單位，其實你都可以用優質股，去先做住增值。加上你未來5年住屋問題，都算解決左。

除非你真係找到租金回報率理想、單位又有質素、價格都可以，才出手置業。否則，你唔需要急於一時。

------------------------------------------------

Q21794：

Sir 早晨，我上佐3堂睇埋80後的百萬富翁，開始有d投資既概念，想幫我媽媽買入水桶3既股票，發現佢原來係好多年前開佐個股票戶口，

當中有1102環能國際同埋1150米蘭站，但一直無理到d股票，雖然佢好彩當時都有買到d水桶3既股票，但原來而家呢2隻股票已經供過好次股或者係合股，

佢手上既貨變哂碎股，量唔多既，分別係500股同2000股，但而家賣又賣唔出，可以點做？

同埋我都想問個問題，劣質股係唔係可以跌破0股價或者負數？如果會，甘會點架？股東會唔會被逼補倉架？麻煩哂你

龔成老師︰

首先，持股數量多與少，係唔係碎股唔重要。我地是否持有一隻股票，最重要係睇質素。

環能國際(1102)年年虧損，無投資價值。

加上核數師意見，每年都是「保留意見」，代表盤數有機會有問題，建議盡快沽出。

米蘭站（1150）質素不太好。

佢每年的生意持續下跌，加上年年虧損，投資價值不高，建議沽出。

劣質股係可以跌到個價好細，但唔會跌破$0或者負數，所以唔會有補倉情況。

你所講的補倉，多數是一些槓桿性投資(例如︰用孖展買賣)，才會出現。一般去買正股，係唔會出現咁架情況。

------------------------------------------------

Q21795：

請問9888百度2021Q1業績公佈後最新PE9和預期PE4是怎樣理解？

有時見到靜態市盈率及TTM，又是怎樣。

龔成老師︰

我地一般會成日講的市盈率PE，就係「靜態市盈率」。
[計算︰現時市值，除去最近一年的總純利]

而「市盈率TTM」，係表達現時總市值，相對過去4個季度的純利。[計算︰現時市值，除去最近4個季度總純利]

由於年度數據，只會一年更新一次。故用季度作比對，數據會相對較新，會比較貼近現況。

若「市盈率TTM」比「靜態市盈率」細，你可以理解為，佢近季度盈利能力係有上升。但緊記，我地投資要分析長線和整體，唔好單用這個數字，就下結論。

至於「動態市盈率」，主要係預估本年全年純利。
[計算︰現時市值，除去預測本年度全年總純利。]

由於只係一個預測數字，只宜作參考。

------------------------------------------------

Q21796：

龔老師，你好。本人31歲，月入1萬5。月光族。手上無存款，年供2萬儲蓄，月供1100人壽醫療。卡數負2萬。

無家庭負擔，每月俾3000家用。自己搬出來跟男友同住5年，算普通生活不用負擔。

本身十分在意外表，定期會做facial, 已經維持13年。戶口一有錢就會一筆過買treatment ＆美容針。每月平均有2000在護膚品。

近期開始留意老師專頁，覺得自己真係井地蛙，原來大家都可以咁有錢。希望以後可以開始投資，但無方向，唔知老師有無好介紹。

雖然有睇到有相似個案分享，但大家都有積蓄... 我一無所有，所以好迷茫。原本有2萬5工作，因為疫情辭退之後，只能搵返1萬5，之前試過有輕生想法，覺得自己30歲人好失敗。

想問下開股票戶口？我應該開邊間？本身自己只有匯豐出糧戶口，但朋友分享話citi bank股票戶口比較好？

龔成老師︰

現時礙於大環境欠佳，其實好多事情都未必可以控制得到。但相信長線，疫情會過去，生活與工作都會慢慢重回正軌。現時艱苦，只係一時，唔好氣餒。

而且，有時這些不利的環境，反而可以激發我地的潛能，造就你的成功。

其實，要做財富增值，唔一定係本身好高人工，或者已有一大筆資金，才可以做到好效果。其實只要你每月有一筆閒錢，可以定期做投資增值，已經係可以。

因為你尚算年青，能進行資產增值時間較長，複息效果會較佳。只要你好好把握時間，努力學習正確投資方法，和每月努力儲錢，相信都可以做到不錯效果。

只要你這刻努力，做好理財，定目標，好肯定你過5年後，會比過半同齡人的財富更加多！

投資戶口，你可以係銀行或證券行開都得，只要佢費用合理，又方便你自己，咁就可以。

你現時還很年輕，儲蓄保險這類產品，不建議持有太多。雖然風險較細，但增長力不高，會拖慢你財富增值步伐，你要自己平衡下。

另外，你要想方法，令自己每月能空出一筆資金，作投資增值之用。

你可以考慮做兼職、做網上小生意，去增加收入。同時間，要睇翻日常生活，有無乜野不必要開支，係可以減少。

到你每月都可以空出一筆資金，就可以進行月供股票，去為自己財富增值。

你31歲，建議你用「平穏增長股」 + 「潛力股」的組合。現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21797：

啊sir ，我是你的忠實讀者。我希望40歲可以做到有被動收入，不至於退休但可以財富增值。

我初學買股票，而因為老師的書。暫時都有小小的回報，大感謝！

但因為手頭上的股票感覺上太多，之前覺得樣樣都會升，就愈買愈多，有d賺有d蝕。

最近想重整一下，希望可以老師指點指點

手頭上月供︰
2800,2823,788

其他嘅就係︰
1997 ($28蚊入)
1928 ($27蚊入)
2845 (平均 $135入)
286 ($41.8入)
522 ($100入)
2388 ($22.5入)
293 (疫情時膽粗粗6.15入)

以上有好大部分都係因為老師嘅分享而有小賺，感謝

另外有一部分就蝕︰
1810 (平均28.5)
0606 (平均 64)

仲有一堆美股︰
APPL, TSLA, NNDM, ARKK, ARKF
美股收息指數
VYM, SPLG

我知道老師集中講港股，可否指點一下迷津，如何重整一下。

感謝

龔成老師︰

你現時股票數量有點多，而且都偏雜亂。長線最好集中翻10隻左右，會較容易管理。

另外，你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

而且，唔好見個市越升，就越買，咁係好危險。因為市況狂熱時，不少股票個價，都會被炒高，你好易會買貴貨。

如果你對點定平貴，唔係太有信心，未來投資可以集中用月供方法，去減少這方面的風險。

港股中，你持股大部份都有質素，可長線持有。

但愛帝宮(0286)質素較一般，長線換至其他優質，相信會較好。

國泰（0293）同樣質素只是一般。其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。你想持有都得，但不宜太多。

至於0606，我估你係打錯股票編號，應該是想說眾安（6060）。佢業務都有發展力的，但業務仍有不確定性。

初步睇，企業有發展力的，不過風險同時存在，因此唔建議太大注投資，這股都可長線持有的。

至於美股，同樣大致上都係有質素。但留意Nano Dimension Ltd (NNDM)，初步睇佢業務都有吸引力，但暫時未做到收支平衡，風險會較高。投資與否，要自己衡量。

而月供方面，你現時組合已經可以。安碩Ａ５０（2823）和盈富(2800)係一籃子優質企業，較有風險分散能力，分配上，用這2隻做重心會較好。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21798：

你好,本人今年40歲, 1家4口, 家庭收入$50,000, 有3層物業 (合共約$2300萬, 己不用供款), 但由於都係細單位, 所以另外租住一間大物業, 暫時收租夠交租同埋夠交小朋友學費。

本人考慮8-10年退休, 想問應如何打算。本人有100萬亞洲債券基金,有約4厘, 另月供約$2萬股票(包括2800, 823, 9988, 388, 2, 1299)

謝謝解答!

龔成老師︰

你現時應透過累積優質資產，去幫自已財富增值。到你退休時，再轉換成收息資產，去創造穏定的現金流，以支援自己的退休生活。

物業都係其中一種優質資產類，除左有升值潛力外，都能提供穏定現金(租金)，所以係合適的。

但我地財富組合除左要有增長力和質素外，平衡性都好重要。你現時資產明顯係偏重於物業類，長線你應加入一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

現時你月供組合的股票，都係有質素和適合你。當中阿里巴巴(9988)和港交所(0388)係潛力股，以你年紀，大約佔組合4成好了，否則風險性會過高。

若你投資經驗較一般，或者承受風險能力較弱，再要將比重下調多少少。

現時大市只在合理區，每月資金唔好盡用。最好留有部份，等大跌市出現時，可以用來掃貨。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些債券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q21799：

老師，你覺得綠置居買唔買得過呀？近排鑽石山綠置居有點兒想抽。但投資價值是否比不上居屋？

而且你本書話黃大仙區投資價值不太高

龔成老師︰

綠置居投資價值會稍遜於居屋，但由於佢定價會比居屋低，故都有投資價值。

今次鑽石山綠置居，位置在鑽石山港鐵站附近，交通十分便利，故有一定吸引力。

雖然黃大仙區，本身人口老化，區內人均收入低，較難撐起樓價，故投資價值不高。但若作為自住樓，都有一定價值。因為佢定價較居屋低，能節省一筆資金，可以用作其他投資之用。

因此，只要佢適合你生活需要，而且有供得起，其實買都係可以。

------------------------------------------------

Q21800：

龔sir,我有些關於前途的問題想問，我現年33歲，現職學校合約文員，月薪萬幾，每次續約會多幾百元的升幅，這份工的優點是返工地點近屋企，

而且放工時間準時和放得早，但近日經過思考後我的目標是將來想財務自由，有自住樓，成為全職投資者，那麼我是否應為了得到穩定收入而投考政府文職公務員，

如果想成為全職投資者條路應怎樣走，謝謝老師答覆

龔成老師︰

我地可以透過投資和累積優質資產，去達至財富自由目標。

但大前題係你要有資金，最少每個月都可以有一筆閒錢，可以用作投資增值。

若你已經有個明確目標，係想做到財務自由，而現有工作收入又較難做到，你就時候作出改變，努力去提升自己收入，為財富增值創造基本條件。

到你每月有一定閒錢，就可以開月供優質股，去累積財富。之後，到有一定資金，就可以加入物業類。當資金累積到足夠數量，你就可以換成收息資產，去創造現金流，支援財務自由生活。

而要做到全職投資者，投資對你而言，不單要係興趣，而且更要成為你強項。若你現時對投資無乜了解，你就要先由一個「基本知識投資者」，慢慢開始提升自己。

你要花大量時間，努力去看相關書籍、睇年報聞、睇新、、上課程，去學習如何分析一隻股票。

到你累積到分析50間企業和長期實戰經驗，你就可以變成一個「有實力的投資者」，以算有做全職投資者的基本條件。

但要突破至最高層次的「真正專業投資者」，已經不單是投資知識的問題，因為要突破，就要擁有很強的分析力、很強的眼光、很強的心理質素。這些要更長時去磨鍊，才會做到。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19541-Q19560）

Q19541：

想請教一下，你成日叫人買2800，3067，有咩好？現價貴嗎？需要等回d才入嗎？
這是ETF嗎？

我見佢地又唔係高息股，增長又好似好平穩咁，3067好似未派過股息，點解要選呢2隻呢？求解答，謝謝

龔成老師：

ETF，就是交易所買賣基金，盈富（2800）、恆生科技ETF（3067），就是。

現時盈富合理，但3067就少少貴，不過3067就較有增長力。

盈富有基本派息及平穩增長能力。
3067，目的不是收息，是增值，這是一個潛力股組合。

如果想收息，可考慮ＧＸ恒生高股息率（3110），是一個主攻收息股的基金，股息率約5%。

由於ETF是一個組合，有多隻股票，對於無乜選股能力的投資者，這是一個很好的選擇。所以我一般都以這為核心建議。

至於投資那一隻，怎樣配置，就要睇你本身的風險承受能力及投資目標。

------------------------------------------------

Q19542：

龔成老師，您好。本人是70後，單身，每月收入$35000。由於年少時有很重家庭負擔，儲蓄不多。現時手上沒有物業

現金只有30萬，MPF由今個月開始自願供款$8000 （$4800環球股票 / $3200 盈富基金）。每月仍有$8000可運用

應如何投資，預備退休生活呢？自知起步很遲，但遲到好過無到。希望老師指點一下。謝謝。祝聖誕快樂!

龔成老師︰

現時起步雖然不早，但相距退休都有時間，可為財富進行增值。

策略上，你可以投資"平穏增長股"，作為增值之用 。你先用每月5成儲到的錢做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

至於MPF，你想分散地區性風險，投資環球股票都可以。但追蹤恆指MPF，其實你可以直接用月供盈富（2800）來做，成本上應該會較少。

現時大市只是合理區，你現有30萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q19543：

龔成老師你好，我是近期才接觸你的facebook。我趁著假期，不斷看你寫的東西。只是看Facebook的內容，也令我感懊悔。只恨十年前我未懂這理財概念。

現在希望你能就我的背景，給我一個方向和投資的建議。

我四十歲，月入$70000。扣除每月給父母的家用（$20000）、供自住物業及日常水電煤（$10000）、養車（$3000），另外每月供年金（$5000）、
醫保、危疾及人壽保險約（$2500）、每月可儲蓄$20000。

這一年未能去旅遊，故現時最大的消費就是交稅，每年15%工資。

我年少時身邊人沒有投資令財富增值的概念。最精明的決定是十八歲時買了一份人壽儲蓄保險及廿多歲時購入現時的自住物業。

可惜股票令我不斷損失。十年前一筆十多萬的現金，聽長輩説買了渣打，但現在價值大跌五倍；近兩年再有一筆儲蓄，聽長輩說買了匯豐，現在跌了一半，買中銀，也跌了三份一。

這些銀行股現在仍然持有。到上星期買了少量京東健康，平安夜便大跌。

這幾天靜下來，突然想到人到中年，生活開始轉舵，令我不斷反思要痛定思痛，重新學習理財。我會繼續閱讀你的文章，但也希望得到你的回覆。謝謝你的耐心。

龔成老師︰

現在開始唔算好遲，只要學好正確投資理財知識，依然可以做到唔錯增值效果。

銀行股增長力相比過去10年多前，已經弱左好多。渣打（2888）和匯控（0005）增長力都只係一般，唔適合你用來做財富增值。同時，同一行業唔應該佔響比多過30%。

而中銀香港（2388）和京東健康（6618）係有質素，可持有。但京東健康不確定性較高，只宜小注。

另外，年金這類產品，係做財富增值時，都不宜有太多。你可以考慮調整下個金額，空出更多資金用來投資優質股。

以你現時人生階段計，應以"增值"作為重點。你先用每月5成儲到的錢做月供，其餘先儲起，用一邊月供一邊儲蓄的策略。

選股上，主力放在平穏增長股，再加一些潛力股。

平穏增長股︰盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、長建（1038）、長建（1038）、粵海（0270）、領展（0823）

潛力股︰港交所（0388），中生（1177）、福壽園（1448）、華夏恒生科技（3088）、阿里（9988）、騰訊（0700）。

而儲下的另一半現金就等機會，當大市出現較大回調，就加大力度掃貨，然後作長線投資。

------------------------------------------------

Q19544：

老師！有事想同你分享同請教...我運動人出生，由細到大都無耐性睇書！我今日先第一次完完整整睇完一本書！係50優質潛力股，兩部分都好好睇！獲益不少！

睇完我抽左幾隻想你比啲意見...

我想主力收息加小小增長，

1. 你覺得領展，陽光，長建，現價邊隻好？

2. 係咪領展（$68.9）合理區中間，陽光（$3.72）同長建（$39.9）就合理區中下？

3.福壽園同必瘦站係咪福壽園會更優質？我等佢$7 開始儲貨。先謝謝老師

龔成老師︰

1） 領展（0823）和長建（1038）會較適合，以股息率計，長建有逾6%，已經有投資價值。而領展最好等約5%，才分注入貨。

2） 領展（0823）現價在合理區中上，而陽光（0435）和長建（1038）則在中下部位置。

3） 2者都唔差，但整體潛力和質素計，兩隻都有質素有潛力，現價計，1448在略略貴，可以小注入貨。1830就合理區中上部至頂位。

------------------------------------------------

Q19545：

龔成老師，我想投資地產類股票，我見你都推介咗好幾隻，請問那隻現價比較抵買呢？

12，435，778，823，1972。
Thank you.

同埋2013 可以揸長線嗎？現價合理嗎？幾錢入才合理？

龔成老師︰

現時這些股票都在合理區較底位置，可分注入市。但領展（0823）和太古地產（1972）等到有5%息才入貨，會較理想。

但留意，置富（0778）和陽光（0435）增長力好一般，如果你係年青至中年人士，就唔適合你。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

長遠業務上係有一定潛力，但盈利和股價上佢都幾波動。此股可投資，但只宜小注。

------------------------------------------------

Q19546：

龔sir你好，有幾個問題

1. 想請教因為見你好多次提及如果投資潛力股風險大, 而且只適合有投資知識同經驗既人. 但係你推介左好多潛力股, 例如9988,

其實你都覺得呢D 公司都好有前景, 之後佢都一定會大升, 我只要按你既合理價買入係咪就已經唔存在風險大呢個問題?

2. 現持有以下股票, 以下股票
1手 270 粵海
1手 9988 阿里
1手 2800 盈富
1手 1177 生物
1手 1448 福壽
1手 1398 工行
1手 3067 ETF
4手 1382 互太紡織 （平圴價$9, 幾年前入已虧損左好多）
1手 1800 中交建 （$10, 幾年前入已虧損左好多）

3. 因為我投資知識同經驗都好低, 但係如果靜係投資平穩增值股, 未必滿足到我3年內獲利60萬既目標,

現時我希望用多10萬資金作投資, 咁其實我應唔應該將資金放多D 落你推介既潛力股, 定係都係主要平穩增值股?

4. 另外, 我以上股票組合, 係太進取定係太保守?
謝謝龔sir

龔成老師︰

1） 按合理價買入，可以減少風險之餘，也令潛在長線回報增加。

但唔係代表唔存在風險，因為佢地增長潛力係高，但不確定性同樣大。前景和潛力就算高，都唔代表每一隻優質股最終會大升。所以，我經常叫人唔好集中晒係1,2隻，要分散多幾隻唔同行業優質股，就係其中一個原因。

要投資此類潛力股，除了你本身要有一定投資經驗外，人生階段都係一個考量。如果你係較年長人士，這些波動性高架股票，就不宜持有太多。

2） 這些股票都有質素，除了中交建（1800）質素較一般。

當中工行（1398）和互太（1382）主要係收息，無乜增長力，如果你係較年輕，就不宜持有太多。

3） 我地投資係講求在合理風險下，爭取最大回報。

當你投資知識不足，能投資時間又唔長，但要得到一個好高架回報，成件事只會令你處身險境。

記住，財不入急門，3年係一個中短期時間，較大機會出現波動，影響回報，建議投資計劃最少5年以上。

4） 你組合都算係有增長力，未來你可以用月供一些平穏增長股和潛力股，去增大財富。若你係年輕，可以用"平穏增長股" + "潛力股"。如你己近中年，"潛力股"比重要減少些。

你每月儲到的錢，可以5成去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或潛力股︰比亞迪（1211），中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q19547：

你好，想問下336華寶國際值得長期持有嗎？現價合理嗎？如果不合理，大概什麼價位合理

同埋想問埋關於我男朋友既情況😄因為佢冇乜理財概念，所以佢依家35歲，都係草得10萬蚊到。我諗住幫佢投資股票，我叫佢每個月強制性草1萬，雙糧既時候可以2萬，大概一年14萬。你成日話先增值後現金流，所以我諗住會買得積極進取啲。

我打算係以下選3-4隻股票長線投資：

1928 金沙（不確定現價是否合理）
1448 福壽園
1810 小米（現價太貴了）
285 比亞迪電子
241 阿里健康
6993 藍月亮
9988 阿里巴巴（現價好像合理，但短期應該不太穩定）

老師，你覺得可以嗎？上述的股票，我相信是有增長性的，但會否太進取？

另外，他之前買了一手$29 中芯國際，回升小小就放？還是繼續持有？其實都係一手，影響不大。謝謝🙏

仲有968 同868 信義系列😆不過現價都貴
我應該會選3隻股黎入

龔成老師︰

華寶國際（0336）主要在中國從事研究及發展、生產、分銷及銷售食用香精香料、煙草薄片、新材料及日用香精香料。

業務不差的，但現價己略貴，回多1,2成才算合理區。但企業質素不是好高之列，投資價值中等。

上述股票當中，金沙（1928）、福壽園（1448）、小米（1810）、比亞迪電子（0285）、阿里巴巴（9988）都可以，這幾隻會係相對有質素。但小米和比亞迪電子都偏貴，都要回多3,4成才算合理水平。

建議你男朋友投資"平穏增長股" 和 "潛力股"﹐去建立一個增值平台。先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q19548：

hello, 老師，本人28歲，月入4萬5左右，儲蓄大約有50萬，之前50萬做左定期，另外有5萬元買左貝萊德中國債券基金A6元對沖

另外又剛入左3手抽ibond，之前也買左為期10年供左5年的儲蓄保險，大約供左10萬元，有份住院保都大幾約供左10萬，今年亦開始買扣稅年金

在日後希望可以穩陣慢慢增進收入，應該買咩好? 本人之前係中銀做以上投資，儲蓄。唔該老師

龔成老師︰

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

定期，儲蓄保險、IBOND這類產品不宜持有太多，集中翻用優質股去做增值，會較理想。

現時你可以投資「平穩增值股」+「潛力股」，現在你每月5成儲蓄，去做月供，其餘先儲起，用一邊月供一邊儲蓄的策略。

平穏增長股︰盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）。

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可先用25萬分注入貨。而餘下現金，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

另外，想你留意翻債券基金。坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q19549：

Hello 龔成老師，我而家30歲但仲係月光族一名，現時手頭上持有以下股票:

2628 中國人壽 （1000股 $33買入）
2013 微盟 （1000股 $11.7買入）
1518 新世紀醫療 （500股 $9.5買入）
1711 歐化 （10000股 $1.7買入）
6618 京東健康 （100股 $173買入）
1833 平安好醫生 （100股 $54.8買入）
3309 希瑪眼科 （2000股 $12買入）

6060 眾安 （100股 $93買入）
1119 創夢天地 （400股 $9買入）
799 IGG （1000股 $10買入）
1691 JS環球生活 （500股 $11買入）
3033 南方恒生科技 （400股 $8買入）

我希望喺3年內將資產增值到30萬，想問下應該繼續持有定改變投資組合。

另外，應否買入阿里巴巴同美團作長線投資。謝謝！

龔成老師︰

你現時組合市值不足15萬，要3年內升值一倍，不是易事。因為我地講緊合理回報係一年10-15%，而要達至你目標需要年增長30%。

我建議你調整好投資策略，去爭取一個長線的理想回報，咁會對你最好。

現時持股中，除了南方恒生科技（3033），其餘（包括美團3690）分別因質素較弱或不確定性高，都不宜持有太多。唔係話佢地唔值得投資，但因為有一定風險，只宜小注。

未來時間，你新資金可以投入以下股票，都適合你。建議長線持有，最少5年會較好。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

現時大市只在合理區，資金唔好盡用。最好新資金留有部份，等大跌市出現時，可以用來掃貨。

------------------------------------------------

Q19550：

老師你好，我今年31歲已婚但未有小朋友，之前一路安於打工，唔識儲錢和投資。今年年中因為機緣巧合，
開始左自已嘅生意。月入大約70-80K, 目標下年可以達到$100K.

2021年第一個訂下的目標已經做到，就係報讀你嘅初級班，跟住就係開始月供股票。

每月開始如下：
5000 年金
5000 家用
10000 儲蓄（家庭備用現金）
3500 管理費
15000- 20000家庭每月開支

現有股票:
9988 x300 x $280 average price
1810 x 800 x$24 average price
3033 x 1400 x $7.65

計劃月供股票:

1810 x $4000
9988 x $4000
2382 x $4000
1299x $4000
另每外留現金 $10000-15000
分注入 3067 和等待時機入其他潛力股。

另外家庭備用現金有大約$300K , 可每月月供2800x $10000

請問我的投資策略如何？
多謝你的意見

龔成老師︰

年金這類產品，用作財富增值唔係咁適合。不過，如果你想有一部分資金，是較低風險，就可以。

現時你月供股票，太集中在潛力股（除了友邦1299係較平穏），加上你本身全部持股都係潛力型，組合會太波動。建議你將其中一隻，換成為盈富基金（2800），咁個組合會平衡D。

另外，你家庭備用現金中，可先扣除半年開支，餘下的都可用作投資。現時大市處於合理水平，可先用一半買優質股。餘下一半，就同你每月儲倒資金，一齊等大跌市機會。

同埋如果你已報股票班，我會建議你等上左堂，先有更具體的投資策略，這樣會較好。遲D見！

------------------------------------------------

Q19551：

你好，龔老師，我想了解錦欣生殖，業務獨特，是否有投資價值呢？過往我見網民都有查詢，但你都沒有特別詳細分析

你是否不同意投資此股？如果值得，現價14.86是否貴？合理價值應該是？

龔成老師︰

錦欣生殖（1951）本質不差的，長遠有增長力。

佢主要係中國及美國，透過合約安排從事經營及管理輔助生殖醫療機構，以提供輔助生殖服務、管理服務，以及輔助醫療服務。

佢的自有輔助生殖醫療機構，包括位於中國的成都西囡婦科醫院及深圳中山泌尿外科醫院，以及位於美國加利福尼亞州的３間ＨＲＣ　Ｍｅｄｉｃａｌ手術中心以及ＮｅｘＧｅｎｏｍｉｃｓ　ＰＧＳ實驗室。

佢過往的財務數據不差，生意與盈利都有不差的增長。

不過，佢上市年期不算長，加上佢現時市值去到$350億以上，就算佢盈利增長快速，相信佢接下來幾年，每年盈利都只會有幾億，以這作假設推算，佢現時的估值都幾貴。

如果你見佢有明顯回落，才小注投資，咁會較穏當。

------------------------------------------------

Q19552：

你好龔成老師我係股票新手，最近買咗《80後》同《股票聖經》正在努力閱讀中, 極度後悔而家先買嚟睇！

因手頭資金不太多所以現時主要買call put 牛熊短炒多，之前全部都係揸正股，但自從一次call賺咗十萬之後就全部轉call put,

但好景不常，最近股市令之前賺嘅都蝕返 ;（

現手頭上有

3690 call：11315（剩餘日數為39日）
9988call：26035（剩餘日數為39日）
1211 （牛證）52170
700（牛證）53873

以上全部都唔係低價位入，想請教一下而家咁多負面消息，是否應該立即止蝕放哂佢然後轉put?

龔成老師︰

「短炒」不是正確的投資方法，而衍生工具亦好難玩，這都是經驗之談。首先，你要改變你整個投資模式。

因為你現時係用緊以「預期市況」模式，去進行投資。我在18歲開始買股票，頭幾年同你一樣，估個市會升就call，估佢跌就put，但幾年來，輸多贏少。

後來我發現，有錢人唔會咁樣投資的，於是我無再咁樣玩。

我建議你將這些衍生工具賣出，將資金重新投入優質股，並長線持有，咁才會對你最有利。

你要學懂，建立一個長期的「組合」，都是適合你的優質股。

------------------------------------------------

Q19553：

老師你好，以下是我的股票分布， 請問水桶1 是否要加大？

水桶1 （30%）
1177 月供$2k
1448 月供$2k
3067$1k

水桶2 （ 55.5%）
0823 2 手 （已持）$65再加二手
0002 一手 （ 已持）
0027 月供$2k
金沙 2 手（ 大約$32入）

水桶3 （ 17.5%）
基金3 厘回報 $20000 一年
0778 2手（ 大約$7 入）

2 我有興趣買少少黃金， 請問建議哪一隻黃金EFT?
02840，03081，83168 ，選一隻月供一千合適嗎？

明白你的建議 收息股 我現歲未必識合， 如果拿走 0778， 是否可投資多一隻畀水桶1 ？6823 現價太貴 想回少少先開始月供
*2383 先岩

龔成老師︰

當我地選擇投資項目時，應參照自已人生階段。年輕時，可以用"平穏增長股-水桶2" 和 "潛力股-水桶1"，去到比例各一半都可以。

到中年"潛力股"比重要減少，到近退休應集中在"收息股-水桶3"上。

就算你係年輕人都好，現時月供水桶1比重都過高（最好小桶1,2各一半）。雖然佢係有較大增長潛力，但同時風險都唔細。

我最好跟上述指引，按自己年紀調整翻個比重，咁會較好。

黃金是貴金屬，有「終極貨幣」之稱，是人類自古以來的貨幣，有持有價值。由於現金長期必然貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多（<3%），而且持有的應該為實金。

至於ＴＯＭ集團（2383），主要從事提供科技平台及投資之電子商貿、移動互聯網及社交網絡，以及媒體業務之出版業務及廣告服務。

集團依然處於燒銀紙狀態，佢唔係話完全無質素，但而一刻好難估值，也不知佢何時才有真正盈利。就算投資，也只宜好小注。

------------------------------------------------

Q19554：

龔sir你好，9月上完你堂之後入市，整體升左兩成感覺好開心，跟住就加大左注碼，依家個市開始回返

就開始出現散戶式恐懼，懷疑自己買錯野，所以想請阿sir幫手睇下個倉，我今年37歲，月入約57k，月儲30k，希望達成被動收入30k提早退休：

小米600股 買入價23.68
港鐵500股 買入價38.9
金沙400股 買入價27.55
領展200股 買入價61.58
舜宇100股 買入價149.9
海爾600股 買入價25.47

中生3000股 買入價7.67
平安好醫生500股 買入價86.5
六福1000股 買入價20.44
福壽園3000股 買入價7.82
必瘦站8000股 買入價3.46
阿里巴巴300股 買入價241.27
謝謝老師

龔成老師︰

你要記住，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你以上持有股票都有質素，但有少少偏重左係潛力股。你可以將"平穏增長股"架比例慢慢加大翻，咁個組合就會平衡些。

整體來說，你的組合都優質，無大問題。

你這個年齡，財富仍有增長力，你用「平穩增長股」+「潛力股」模式進行，正確。

------------------------------------------------

Q19555：

阿Sir, 你好拜讀你的書令我獲益良多，以下有些問題希望可以解答：

1. 石藥1093 ，係$23 買入後一直下跌， 明白因帶量採購風險影響醫藥股， 但分析過年報後， 1093 業績不差，問題係邊呢？ 之後要如何操作？

2. 月供股票每年所得股息要如何處理先可達到複利息投資呢？謝謝

龔成老師︰

1） 石藥（1093）是很有質素的股票，同時有增長力，不過，行業本質有風險，加上近年的政策風險，都令佢股價甚為波動。

這股長線質素無變，因為你本身買入價略貴，而且出現過2次送紅股，都令股價按比例下調。現價計，是一個較合理水平。此股有質素，你長線持有就可以。

2） "股息"要儲起，到一定數量，就再去買優質股，這才會做到複利息效果。

------------------------------------------------

Q19556：

龔SIR，我打算2021年開始每2至3個月用一手手買的模式去儲優質股呀，因為計過問過澳門銀行月供手續費真的不太化算

我自己想供幾隻，但計返手續費等都唔抵，諗住直情用每月有餘的錢儲起2-3個月咁樣一手手儲貨啦。

1） 盈富（2800） 是我首選，不過睇落好難先會趺到$23用一手手買，但我不想月供（因月供手續費問題）
如我2-3個月買一手盈富，會唔會令到自己係貴位買入都唔知?

2） 另外提到我有$30萬的現金短期未有用途，先留起5成，想動用$15萬去投資分注，我計劃咗個股票組合％比例，想請教一下：

$7.5萬（平穩增值股）50%
銀娛（0027）入1手
領展（823）入2手

$7.5萬（潛力股） 50%
安碩恒生科技（3067）分注入，不過想了解一下如果股價係幾多代表貴位? 就不要入注先? 合理區是多少錢？

3） 另外我持有２手平安好醫生（1833）﹑１手京東健康（6618），同埋１手阿里（9988）。我覺得太集中了，
我想找機會放一隻，投資落3067或者1448 呢兩隻的其中一隻，其他潛力股都好貴唔敢入手，如果我放一隻你建議我放邊隻？
1448的合理區是不是$7以下可投資?

4） 我屋企人有5萬現金的閒錢放銀行沒有特別用途，想幫佢買一些股票，雖然資金不多，但都想投資股票代替放在銀行

佢60歲未退休，有自己事業，咁5萬應該買晒收息股（例如陽光/工行呢D）還是都買D平穩增值股呢?

謝謝~~

龔成老師︰

1） 簡單來說，月供股票就是你每月將現金，買入某一隻或多隻股票，慢慢咁樣儲貨。月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

其實一手手買都可以做到以上效果，你現金只要平均地慢慢投入股市（例如定好每2個的1號，就不論價格都入一手盈富。）就可以。2個方法都可以，一手手買更節省了銀行月供收費，但你必需確保自已可以有自律性地進行。

2） 如果你係年輕，這個計劃可以。若你偏向中年，潛力股比重要減少D。

安碩恒生科技（3067）大約在合理區頂部，己可以分注入貨，但同時要控制注碼。

3） 福壽園（1448）現在是合理區頂部，可以入首注。而你持股當中，平安好醫生（1833）和京東健康（6618）有潛力，但不確定性都好高，只宜小注。你可以沽出一手平安好醫生，換至其他潛力股。

安碩恒生科技（3067）、中生（1177）、阿里（9988）都在合理區頂，都係可入首注的範圍。

4） 以你家人年紀，我建議以收息股為主。如果真係好想增值，可小注盈富（2800）。

收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

------------------------------------------------

Q19557：

老師， 小弟手持6手1167 （15.2入），3手2131（8.36入），1手268（27.6入），我見呢排都keep跌，請問呢幾隻我應該止蝕定係繼續持有。
股票新手

龔成老師︰

加科思（1167）為一間臨床階段製藥公司，主要從事創新腫瘤療法。

此股剛剛上市，數據唔多。加上佢本身未有盈利，令到估值更難。此股都有投資價值，若佔你組合比重唔高，可以守。

云想科技（2131）主營線上合約廣告服務，佢業務上都有可投資地方。但由於佢上市不久，現時數字只能參考，因為好多新股都要過一段時間才見真章，故投資時要保守些。

佢2019年盈利只有7000萬，市值郤超過50億，明顯現時係唔平。若持貨佔組合比重唔多，可持有。

金蝶國際（0268）本質是不差的，算係潛力股。你買入價偏貴，但此股有質素和潛力，可以守。

------------------------------------------------

Q19558：

龔成老師你好！我現在讀緊大學既金融科，如果未來都想做投資分析或者股票相關嘅工作。除左學校學嘅嘢之外，再學啲咩知識裝備自己會比較好？

龔成老師：

睇多D書，有關投資類別的書，同埋一定要每日睇財經新聞。

另外，你可以睇企業年報，上港交所有得下載的，如果你打算日後做分析有關的工作，這是重要的學習過程。《年報勝經》有教你點分析年報的。

------------------------------------------------

Q19559：

龔成老師你好，現在每天都會看你的facebook和書藉，我很希望在做一件將來會驕傲的事情，希望在本月內可以買一點股票

你認為有哪些股票的價位目前比較好的可以現在買入的？

當然我會持續學習，在未來日子有足夠的分析能力自行選股

個人較喜歡收租股，地產股，當然對其他優質企業也感興趣，我目前有20萬左右現金可以投資，謝謝老師，平安幸福

龔成老師：

你唔好另集中一隻股，要建立一個長期的組合。

你可以考慮盈富（2800）、恆基（0012）、港鐵（0066）、領展（0823）都得。

如果想增長力高少少，可考慮：安碩恆生科技ETF（3067）不過風險度較高，如果投資知識不多就不要這刻投資。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19560：

呀sir你好…我係新手…岩岩接觸股票2個月…已經買左你大部份書…學緊…會玩多幾個月股票認識多左先再報你既course…想事半工倍…

我27歲…月薪21K…依家玩美股Ark 系列同電動車多…因入場費平跟同事玩住先…

打算2021年開始…認真地用每月新收入既一萬左右…平均地月購你係50優質股 +50收息股 + 50值博股入面介紹既股票…前2者已經各睇岩幾隻！ 多謝你…

但值博股真係5知揀乜好～你可唔可以重點推介幾個俾我呀？雖然有書在手…但都係冇乜方向…唔知揀邊樣好～又唔想淨係因為邊樣價錢平就揀邊樣…

最後…其實我有8萬蚊cash (現金流)…一直做定期…因爲舊錢唔蝕得…但定期真係太低息…想要多小小小小回報都好～

我想問 我應該買d 中低風險嘅債券基金(富途牛牛依家認購同贖回費都唔使錢…0手續費)？

定分批買入你一路推介開既平穩增值/收息股？

請問邊樣 風險比較低？多謝曬你！

龔成老師：

其實，你最重要建立一個「平衡」，適合你的組合，每個人風險承受程度不同，你要建立一個適合你的比例。要長期的配置。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你27歲，潛力股比例可較多，不過，潛力股都要求你有一定的投資知識，如果你投資經驗未夠一年，就不能過多，遲D先慢慢增加。

平穩增長股：你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

至於債券基金，一般都會出現賺息蝕價，唔建議。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。