睇新聞，知道教育電視大樓回收在即；同日返港台開工，別有一番感受。 同港台合作已經好幾年，期間有唔止一個人問我：「點解你keep住開佢哋工嘅？」 . 提問者中，不乏同行。你就當我小人之心啦，言下之意，有時多多少少會聞到「開佢哋工又唔係賺得多」嘅味道。坦白講，平時出去拍個廣告、寫下fb同ig 業配文、又或者自己製作公司接個project，收入可以係喺港台嘅幾倍到幾十倍；係囉，既然係咁，點解要做呢？ 兩個字：開心。 大家千祈咪誤會，我絕對冇資格自命清高，我係好X鍾意錢嘅，只不過鍾意得嚟咁啱又保留咗幾毫子頭巾氣。用錢嚟衡量所有嘢嘅價值唔太適合我嘅脾性，我慶幸自己仲有能力去做一啲選擇；根據自己嘅喜好去選擇，呢件事，實在痛快。 點解開心呢？呢幾年嚟合作過嘅港台同事，全部專業認真，熱誠好玩；喺極極極有限嘅資源之下，大家走多一步，互相補位，製作出嚟嘅節目質素有目共睹；我主持過嘅節目入面，由《快樂從心開始》到《全民動起來》，先後攞過本地甚至國際電視奬項；主持之外，又不停畀我試新嘢，做下演員又做下嘉賓；唔講我自己，從觀眾角度睇，港台嘅新聞時事節目做成點，大家有眼見。 我經常講嘅一句說話，無論咩行業咩範疇都好，要多元先至叫健康；唔支持港台唔係問題，但係到有一日社會再容唔落港台，呢個，就係大問題；講緊嘅，係一間節目經常排欣賞指數三甲、公信力民調名列前茅嘅公營電視台。 作為一個從事幕前工作嘅人，我撐港台嘅方式係只要可以幫到手，就盡量做；作為觀眾嘅又可以做啲乜？除咗講句加油之外，你仲可以睇多啲佢哋嘅出品，like晒佢哋節目嘅page；大家手上有嘅，係電話，係電腦，仲有遙控。 選擇，痛快。 #撐港台 #香港電台 #RTHK