【Kongner編輯室】
瘋子愷：教局向家長施壓 望實行全面洗腦？

反修例運動持續至今，各界人士都好中意話係因為香港教育制度嘅問題而導致到示威活動一直持續，所以教育局責無旁貸。咁喺面對住各方嘅施壓嘅時候，教育局局長楊潤雄近日又出來發表咗一啲有趣嘅言論，話教育局要開始教埋家長點教子女咁話喎。

詳情請參閱：https://news.mingpao.com/pns/%E8%A6%81%E8%81%9E/article/20191013/s00001/1570903508887/%E6%95%99%E5%B1%80%E6%9C%AA%E4%BE%86%E9%87%8D%E9%BB%9E%E5%B7%A5%E4%BD%9C-%E6%A5%8A%E6%BD%A4%E9%9B%84-%E5%B9%AB%E5%AE%B6%E9%95%B7%E6%95%99%E5%AD%90%E5%A5%B3

嗱，楊潤雄喺訪問入面就指出，除左學校教育，社會同家庭教育都好重要。其實呢句嘢係好合理嘅。社會學入面有一個概念叫做「社教化」(Socialization)。呢個其實係好普通嘅一個概念，講嘅就係人一出世因為唔係電磁爐嘅關係，係唔會自己熄（自己識），所以就會好似一張白紙咁咩都要人教，上至價值觀，下至衣食住行，樣樣都係靠人教。而人去接受學習嘅地方就包括家庭、學校、教會、政府、各種媒體等等。由於「社教化」嘅目的主要係令一個人學習如何係社會上生存，因此喺我哋嘅腦海入面要建立嘅就係一套適應社會嘅常規(Norms)。舉個例，「尊師重道」、「搭車要比錢」、甚至「共產黨好恐怖㗎」等等都係呢個社會運作嘅「規則」，所以常規就一定係有所謂嘅「規矩」，要令到人可以習慣喺呢種社會嘅「規距」中生活，而同時呢個方向其實都已經係一種意識形態嘅灌輸。總言之，學習服從呢種「規矩」就係等於一個人不知不覺受到呢種意識形態限制住，呢方面本人好耐之前出嘅一條關於社會科學嘅片都有講過嫁喇，喺度就唔再講太多。

(Link: https://youtu.be/_DgcgnCgT_I)

好喇，咁講返楊潤雄局長講嘅嘢先。一個人一出世，最初被灌輸意識形態嘅地方就係家庭呢個社會組織(Social Organization)，而當小朋友到達左一定年齡，就會被送去學校繼續「社教化」呢樣嘢，家庭與學校之間互相配合。

以上係一個十分普遍嘅情況，但楊潤雄局長嘅言論入面最得意果樣嘢就係講教育局嚟緊嘅重要任務係「教育家長」，重講到明話要教家長教仔。哈哈，佢呢句真係無得頂，因為阿楊局長咁講，除左顯示出佢果種死都要跟隨政府嘅果套不可一世，死唔認錯嘅特徵之外，重帶出左兩個比較有趣嘅問題。

首先，對於楊局長來講，佢明顯認為呢個社會一直以來嘅「社教化」功能已經失效，佢唔再相信學生嘅常規(Norms)可以透過學校、教育制度以外嘅地方建立同吸收。簡單啲講嘅就係，佢開衡地圖炮咁講話所有香港家長都係廢嘅！呢個咁具前瞻性嘅諗法真係出乎本人意料之外。

其次，承接上面果點，家庭嘅「社教化」功能被忽視，甚至連家長點教仔都要你話事嘅話，姐係等於意識形態嘅灌輸過程就會變到極為單一。試諗下，教育局作為一個政府部門，佢哋希望灌輸嘅價值觀自必然就等於有利於政府同權貴維持利益嘅價值觀。因此，當一個「社教化」過程真係變到完全由當權者決定，失去左家庭同其他媒體嘅演繹的話，至少喺接受高等教育之前，學生嘅思維就完全唔會出現其他可能性。所以嚟到呢度，本人可以肯定，呢個政府真係想推行全面洗腦教育，所有對與錯都只有跟隨當權者一套論述，不論家長還是學生，都只能永遠喺思想上被束縛，永遠淪為無批判思想嘅行屍走肉。

不過，講就天下無敵，做就唔知點啦。佢講到咁重要，本人又真係好想知佢會用咩手法去「教家長」，要知道大部分學校見家長重驚過見鬼，究竟有咩學校會陪你教育局癲，又可以用咩方法洗家長腦呢？本人都好期待。不過如果你做唔到又要吹到咁大，就唔好怪人笑教育局全體仝人好似局長你咁廢喇。

（本欄逢周一、四更新。敬希讀者垂注）

---------------------------------------------------------------------
HappyKongner 招稿喇！！！

我哋嚟緊會喺逢星期五加設 「Kongner投稿區」 ，俾廣大Kongner 弟兄姊妹能夠有發表佢哋意見嘅地方，亦都可以鼓勵大家多啲運用自己嘅闡述能力。
有興趣嘅朋友歡迎直接Facebook Send Message 俾我哋，又或者Email 去 happykongner@gmail.com 同我哋傾都得。
期待收到大家嘅鴻文大作！

納稿標準：合乎邏輯，文句通順，言之成理即可，不過編輯部同事比較嚴謹，大家自己小心。