今日行程，先去球場，再去馬場，跟住仲趕睇車路士對阿仙奴。

飛馬贏波，競技英雄贏馬，摩連奴都終於贏返場，今日好開心。

今晚又來開心分享，諗到咩就講：

1) 放假，通常我會食得好簡單，其中一樣我好鍾意食既，係湯麵。我好鍾意食麵，今日喺自己公司旗下「上海佬」食左碗好好味既嫩雞煨麵，然後出發去球場；

2) 有時候，當你只不過係想食一碗麵，然後你輕輕鬆鬆咁走入一間相熟食肆，食到你想要果種味道，呢個感覺，真係好幸福；

3) 唔知點解，今日食完碗麵，我有好滿足既感覺，充滿正能量，覺得今日一定會好好運氣！

4) 做一間食肆，係好多心血。我唔知大家有無去過上海佬，如果你未去過，去試下，我的誠意推介：薰蛋、醉枝豆、小籠包、上海佬炒蟹、雪菜炒年糕、青菜或嫩雞煨麵。

5) 入球場，好開心，原來，我係屬於球場的，搞波之前，我竟然從來不知道；睇場波，出一身汗，大叫大跳，真係好爽。呢個我，都係我，只係以前從來無機會流露呢一面，現場睇波，又係無法取代既體驗，好開心而家可以經常入球場睇波；

6) 今日daddy有入場，兩父女一齊睇波，呢種感覺好特別；細細個，我就因為佢既關係，「被睇波」同「被睇馬」．正所謂：不要不要假設我知道，一切一切也都是為我而做．．．

7) 而家我終於知道，有好多野，身教影響小朋友最深，所以，如果你係港足球迷，而你屋企又有個女，請你帶埋佢去睇波，因為你唔會知道，將來女兒怎樣發揮在她體內你的基因，話唔定，佢將來係女班主或足總女董事！

8) 今日首次搞球迷會入會counter，我又走埋去打下氣；今日好多球迷即場填表入會，攞埋入會禮物adidas紅色打氣tee。我知道有球迷好唔明白為何由黃變紅，我明白大家唔明白的地方，講真我都好唔慣，但我唔想長篇大論解釋行政上的理由，多謝球迷打氣支持和體諒，讓我們做好開季成績，稍後有機會我會再向大家解釋；

9) 入球場，見到香港隊隊長，撞到啫，撞到啫，無其他原因同意思既，隊長你個樣唔駛咁驚，定啲嚟；

10) 飛馬贏波，呢3分係今季第一個3分，意義好重大；球員好多都好年青，佢地需要成長，成長經驗之中，梗有做得好同做得唔好既地方，能夠比到機會佢地去比賽，呢個係佢地最壯濶既成長空間，希望大家支持佢地；

11) 由球場去馬場，我喺車度變身，我決定今季入球場盡情adidas / Y3 / Stella
MacCartney / Jeremy Scott，支持返支持飛馬既贊助商！多謝adidas出品好多堅靚既衫，由入球場到馬主廂房，我完全係feel very comfortable！

12) 馬都贏埋，我真係幸運。但我覺得幸運並唔係今日既運氣，而係我地可以擁有咁好質素，咁忠心馬既幸運；幸福不是必然，幸運亦不是必然，當中有好多因素；但如果要簡單講，就係：用心去做每一件事，你個心擺邊度，就會喺邊到得到回報，個天唔會永遠恰你；

13) 競技英雄今日贏得輕鬆，跑到最後200米時，我已經知道無馬追到佢，我仲有時間打開手袋攞手機影衝線相。呢匹馬好特別，好忠心．佢今年已經8歲，喺開季第一場比賽，以快過班際標準時間的紀錄贏馬，對手唔弱，而佢孭頂磅．．．你知道嗎？在這些數據之下，佢能夠贏出，係好難得，而且佢肯定係一匹好忠心既好馬；

14) 我成日去探馬，競技英雄好特別，佢本身好「魯粗」，對人好惡，馬房同事要喺佢個馬房出面寫住：「注意：此馬不照鼻、不抽血、不打針」，換句話講：「生人勿近」；

15) 但佢認得馬主，對我地好好，我可以摟住佢同佢玩，馬房同事都覺得好驚訝，但我同佢好似心靈相通咁，今日我知道佢會跑得好好，拉頭馬時我摸佢，佢條頸濕晒，但無喘氣，佢狀態好好，而且好鍾意比賽，贏馬佢都好開心！

16) 今日係冠忠巴士賽事日，喺馬場，我見到謝德謙，同埋成班冠忠南區球員，佢地西裝骨骨，好靚仔。我同謝德謙影相，我識佢好耐，從來未合作過，呢張係我同佢第一張合照，你睇下人地幾淡定 :p

17) 今晚去食飯，食肆經理來恭喜我飛馬贏波競技英雄贏馬，佢話：「我預備左甜品，就係羅生鍾意食既『菲林』（黑芝麻卷）同埋你鍾意食既『馬仔』，嘿嘿，『菲馬』吖嘛！」咦，真係得喎！好有心思！呢份祝福完全收到，多謝你！

18) 註：並不是自己公司旗下食肆，都話，做食肆，做得好，完全係心血，讚！

上週我打左篇貼文，請大家幫我去like飛馬個Page，飛馬Page多左2400個Likes，現在是8,353，衷心多謝大家，

但如果你仲未Like，今日請幫我按好嗎？目標10,000，這對我們找贊助很重要。

搜尋：飛馬足球隊Hong Kong Pegasus FC
www.facebook.com/hkpegasusfc

#hkpegasus #ilovefootball #racinghero #shanghailo #adidashk