【 對抗 No Pay Leave 全攻略！】

最近好多人都問，腦細逼大家放No Pay Leave (NPL) 點算好，我地決定制作呢個三步曲攻略，等大家懂得保障權益。

第一步︰要懂得拒絕NPL

除非你死心塌地想幫公司賣身賣命，否則僱主要求大家放取NPL時，作為僱員絕對有權拒絕，因為僱主有責任向月薪員工支付完整工資 （ 理據詳見︰http://bit.ly/37rHqaQ ）。

因此，當僱主用任何方式，包括電話、電郵、公司通告等方式要求員工放NPL時，我地就需要非常清晰地向僱主提出反對 （拒絕放取無薪假通知書範本︰http://bit.ly/IDontWantNPL ） 。

＊＊＊＊第二步＊＊＊＊

第二步：不要輕言放棄，爭取日後補償！

係嘅，依加有唔少僱主都話，唔放NPL就要裁員，大家手心又係肉手背又係肉，咁都有可能逼於無奈，無法拒絕無薪假安排，但係不代表我地要放棄所有權利，所以當你見到如果僱主要求你簽署一啲同意文件時，而呢啲文件上寫有「我願意放棄日後追討權利」時，你就要考慮清楚，大家可以考慮求助工會，團結同事與僱主協商日後「好景」時能以其他形式補償，並且進入第三步協商！

＊＊＊＊第三步＊＊＊＊

第三步︰商討條文

好多公司與員工安排無薪假，只派店長或分店經理通知無薪假安排，運行細節上並無任何跟進。然而進行無薪協議，是一項僱主僱員雙方同意的”協議”，因此假如雙方在放假安排，協議補償等重要議題並無文本證明，最後只會帶來更多”口同鼻拗”的爭議，因此，逼不得已黎到呢一步，我地會同大家分享幾個協議必需要留意嘅事項。

【法定假日】

－僱主如安排無薪假是跨越法定假日，需額外補回薪金或日後補假，因為－

－《僱傭條例》 第17條 【休息日的給予】 內已明確指出：僱員除有權享有法定假日、另定假日或代替假日外，尚有權享有休息日。因此假如無薪假橫跨法定假日，僱主需視當天為無薪假，並且把該假日在無薪假完結後補回。

【秘撈權】

－有些僱傭合約限制了員工兼職或從事其他職業的權利，僱員在被停工的同時，可以要求僱主放寬相關條款，以讓僱員可以從事其他崗位，賺取收入。

【補償】

－僱員可以爭取僱主書面承諾，當業務回復穩定，或盈利到達一定程度時，以特別津貼或花紅補償僱員無薪假的損失。

【期限】

－大家需要在協議中，與僱主協定無薪假的期限，例如是一個星期、兩個星期，千萬不要同意沒有限期的無薪假停工安排。

－因為僱傭條例保障僱員如被單方面停工四星期工作日數只得正常的一半 ／ 廿六星期工作日數只得正常三分一，僱員就可以行使停工引致變相解僱的權利，追討僱主代通知金及年資補償。

＊＊＊＊總結＊＊＊＊

以上，希望有助大家保障自己的權益，許多人都一定會講「老闆邊有咁好死同你傾咁多野」，坦白講，身單力薄，團結就是力量，組織工會永遠都唔會遲。

其他勞法Q&A:

抗疫期間，僱主想八折出糧可唔可以？ http://bit.ly/320eOnX

僱主可否要求僱員以放取年假方式停工／隔離？ http://bit.ly/2UXhocY

僱主係咪有權單方面要求停工或放無薪假？ http://bit.ly/37rHqaQ

求助熱線：27708668
Facebook Inbox: 職工盟(HKCTU)
TG: @hkctu

[節目更新][#白手黨]

「正能量最緊要」洗樓王創辦人Ray Wong

王嘉源先生，人稱阿Ray，「洗樓王」有限公司創辦人「http://www.flyerking.com.hk/」，公司發展迄今已逾二百人，每年盈利以百萬元計。阿Ray當日會考零分，賺錢之路崎嶇曲折不在話下，佢亦曾面臨人生低潮，頹廢左兩、三年。到底佢喺低潮點重新振作，再創立「洗樓王」呢？

阿Ray生於清貧家庭，會考零分自知升學渺茫，故一畢業已經去做地盤技工。有次喺酒店做維修，發現如果肯換批優質花灑喉，其實就唔使成日修補。所以阿Ray就代客採購，略賺零錢，算係第一份小事業。後來雖然都儲到一批客戶，例如幫茶餐廳訂購少量餐具，但老闆肯俾生意只係因為阿Ray成日來幫襯先畀佢做，生意模式並不持久，所以營運一段時間即告結業。

「由儉入奢易，由奢入儉難」
Ray之後輾轉都有做過寬頻、貨車司機等，後來轉做推銷電訊服務、電訊代理先初嚐「成功」：港府開放電訊業，由一變幾，各出奇謀，「翻單」、「爆數」一時朗朗上口。當時阿Ray二十出頭已經由普通代理成為多間電訊商「總代理」，仰賴「銷售技巧」，再教新同事，令團隊壯大。好多老闆見阿Ray搵生意十分厲害，都有繼續畀生意，令年紀輕輕嘅佢已經年薪百萬。可惜電訊業好景不常，公司政策改變，三幾個月間就將阿Ray的積蓄消耗盡，阿Ray 直言似「幻覺」一樣迅間由百萬年薪變做失業人仕。後來有一電訊商欲以月薪兩萬請阿Ray做銷售經理，當時意氣風發嘅阿Ray苦笑話兩萬其實只係夠用幾日。

曾經風光，著返制服，都唔係咁多人接受到，阿Ray當然唔例外，所以佢開始過自閉嘅生活並染上酗酒惡習，歷經數月。無奈上有高堂，下有妻堂，阿Ray醒覺唔可以終日遊手好閒，所以阿Ray就去夜總會做侍應——始終阿Ray學歷唔高，只可以做夜場月入八千幾的職位，閑時重可以淺嚐美酒，繼續麻醉自己。今日阿Ray回想，當時除左抵押幾乎所有家當之外，「糧尾」還要向朋友借錢周轉，生活毫無尊嚴可言。

「苦渡烏江，東山再起」
如是者又過了兩三年頹廢生活，阿Ray好迷惘，自覺一無是處，尤其曾經做過老闆，係夜場見到好多老闆傾生意，好豪氣，點解唔係自己呢？加上，因為做夜更關係，收工未天光、起身又入黑，終日過著不見光嘅日子。終於，阿Ray鼓起決心搵一份日間的工作。
可惜，畢竟阿Ray無咩學歷，重出江湖又係做返老本行，就係自僱街邊賣電話卡（小販），唔好睇賣電話卡只係百零百零蚊咁賺。阿Ray勤力摶殺，做左一排已經回本，更可以維持收入。但人紅自然有人「眼紅」，惹來他人投訴令食環經常巡視，幸好有一粉麵檔老闆支持佢，令佢可以寄居於檔口另一條冷清後巷先可繼續營業。

天無絕人之路，正當阿Ray幫電話卡業務印宣傳單張預備派發之後，對面街地產鋪就請佢順手派多一份，當時無咩鴻圖大計，但畢竟都有錢落袋，阿Ray當然答應照做。阿Ray笑言，當時係街見到途人就問兩個問題「要唔要幫你派傳單」、「想唔想派傳單」。雖然當時網上行銷剛剛興起，但阿Ray不以為然：「所有人都移居網上，無人做線下，咁即係我競爭較少。」「洗樓王」就係咁萌生。阿Ray透露，派傳單呢一個行業，每間都唔係做得好大，大家都有局限一兩區，又無諗過大搞。而阿Ray真正「起朵」，其實都係有次接到水務署Order派發「停水通知書」，阿Ray立即引為招牌：連「停水通知書」都係「洗樓王」派，實力自然毋需質疑啦。
經此一役「洗樓王」開始奠定其行業龍頭地位，現時生意每月數以百萬計，重有好多上巿企業公司客戶，阿Ray可謂垂範本地創業界，「白手」興家。低學歷，低資本、低技術仍然能打造年營業額以千萬計算的本土神話，邊個話香港人必定「成功需父幹」?

「書到用時方恨少」
有句說話阿Ray成日都提起：「力不到，不為財」，阿Ray自己學歷低、家境清貧，令佢好肯搏。加上背景都令佢做人好謙卑，特別係對住前輩。阿Ray坦言，自己都係咁走過來，經歷過時下青年問題，所以都覺得好明白佢地：以前「後生仔」覺得自己要養家、要積穀防饑，所以不惜返十幾個鐘工都在所不惜；不過反觀現時「後生仔」，好多時都會以娛樂、休閒為首要目標，對家庭承擔相對較少。而阿Ray好強調「讀書」係幾重要，不論係語文（英文）定係人脈，都一定比無讀書既人好，所以各位同學仔都要好好經營依兩樣野。

未來，「洗樓王」會鞏固香港、廣東、澳門等地業務，希望可以做到如速遞龍頭「順豐」咁，令到消費者一諗起「傳單」就諗起「洗樓王」。談到回饋社會，阿Ray現時每月舉辦免費「FBI中小企創業聚會」，每次有約二百人出席，由商界領袖分享經驗、心得予年輕創業者。現時已經舉辦逾半年，希望免費幫到後生仔創業，同埋令佢地得到更多既資源。

此外，阿Ray亦正籌組「單親之友」，希望以商界力量同方案幫助單親家庭解決一些社會問題。

Pt 1 of 4 --- 「正能量最緊要」洗樓王創辦人Ray Wong
https://youtu.be/-5qyrf5QA6c

Pt 2 of 4 --- 「由儉入奢易，由奢入儉難」
https://youtu.be/-PfKT_Gj1Ug

Pt 3 of 4 --- 「苦渡烏江，東山再起」
https://youtu.be/JgTGCXP917w

Pt 4 of 4 --- 「書到用時方恨少」
https://youtu.be/0T4ToZunvdQ