現在是凌晨4點， 啱啱返到屋企。 仲有唔夠16個鐘，就係毛記電視一歲大壽台慶嘅大日子。 頭先有位朋友喺會展現場同我講，話見到個舞台，再諗返起5年前我哋搬入富德樓時嘅畫面，就替我哋揀動。佢唔講我唔覺，一講我先醒起，係，又5年。如果由黑紙開始計，再到白卷、100毛、毛記，第7年了。遠嘅唔好講，只講一年前，十幾廿個同事，仙都唔仙下，乜都流雞過人，就咁開咗個電視台。多得同事們都出盡奶力嘔晒血咁搞，搞下搞下，又畀我哋捱到去1歲大壽。 有時要跳返出嚟先覺得夢幻：毛記台慶，將會真係喺個電視機播出嚟，播嗰個仲要係免﹣費﹣電﹣視﹣台。將會有可能有成家人一齊坐喺飯廳睇毛記電視嘅呢個畫面出現，又令我諗起一年前毛記開台時我寫嘅呢篇文章： xxxxxxxxxxxxxxxxxxxxxxxxxxxxxxxxxxxxx 《低能的毛記電視》林日曦 2014尾，當大台質素持續膠企，當亞洲CNN重病瀕死，當政府繼續戲弄王維基，我和拍檔三個人在公司互相提出了些低能問題： 「開電視台一定要申請牌照嗎？」 「動輒幾十億投資，開台是否有錢人的專利？」 「沒法得到電視牌照，沒法得到大氣頻譜，是否就沒有人收看？」 「如果是，為何又那麼少人收看擁有牌照的亞洲亞洲？」 「網上電視是否必死無疑？」 「當電視被置於網上時，電視節目長度還需要依從舊有常規而維持在半小時至一小時嗎？」 「只做短片可以被稱為電視台嗎？」 還有那種通常一被問出來就會偷走全場氣氛的終極問題：「其實甚麼是電視？」 不，我不是期待得出那種像「連續動態的圖像和聲音轉換為電子訊號，並通過各種渠道傳輸電子訊號，後再將電子訊號還原為圖像和聲音的技術，就為之電視」之類的答案，我所好奇的是，人類在心靈層面上對電視的認知共識，亦即「電視的意義」。像「甚麼是人生」、「人生的意義」一樣，當被問出來後，連我自己都覺得好低能。可往往就是這類低能問題，才是混沌中最需要被解答的問題。 甚麼是電視？曾經我們都很清楚答案：那是一個有趣的屏幕，裏頭發出一些令辛勞工作一整天回來的人感到放鬆的光，我們可以從中得到笑聲、眼淚和各種小常識的增長；它能帶出一些流行於城中的小熱潮，為同學間、同事間、朋友間在沉悶的生活中帶來茶餘飯後共同話題。 還有最卑微的一個基準：曾經，我們不會羞於承認自己是其觀眾。那才是真正的電視。 想到這兒，上述那些牌照不牌照，頻譜不頻譜，全都變得不那麼重要了。而我們亦都開始坐言起行，着手籌備香港第一個無牌……呀唔係……係毛牌電視台──「毛記電視」。 世界從來都是這樣運行的，想要改變現況，就要不恥於問出一些低能問題。六年前我跟拍檔同問：甚麼是雜誌？雜誌一定要很厚嗎？一頁雜誌又如何？最後我們創辦了一張一蚊雞雜誌《黑紙》。 還有從前從前，唔記得牛頓定喬布斯定黎胖子，曾經坐在蘋果樹下問：為甚麼個蘋果要跌爆我個頭？最後「地心吸力」被發現了。 越是低能的問題，背後所隱藏的秘密就越多。 毛記電視才剛開台不久，每天只有兩檔長達三分幾鐘的劣質節目，距離成功還有很長的路要走，但我慶幸我們又問出一些會被人恥笑的低能問題，然後一個蚊型電視台才有機會在今天誕生。 可能它還會比亞視更快執笠，誰知道呢，但或許有一天，它可以推動到某些電視行業的改變，看電視不再是老土娛樂，人們可以再次從電視中得到笑聲、眼淚和各種小常識的增長，亦不會羞於承認自己是電視觀眾，甚至是電視迷。 那樣的毛記電視，才是我們真正想辦到的。 在那一刻，當天那些被低估了的低能問題，才會正式換回來一個高能的答案。 xxxxxxxxxxxxxxxxxxxxxxxxxxxxxxxxxxxxx 最愛電視嘅，其實從來都係我哋呢啲已經唔睇電視嘅人。我哋唔係唔想睇，只係更加懷念嗰個曾經吸引、睇咗唔會扮冇睇嘅輝煌電視年代。 今晚毛記台慶會喺免費電視直播，收視相信都係得嗰三幾點，但呢三幾點，加上用app用網睇嘅觀眾，其實係代表緊一群麻煩嘅小眾，想話同人多勢眾嘅大眾講：其實我哋好簡單，一直以嚟，只係想呢個世界多啲選擇，等每個人都睇到啲自己鍾意睇嘅電視節目。 假如撞啱成家人都鍾意睇同一個節目，就會係個大Bonus，等我哋可以重拾往時成家人或者成班Friend一齊睇電視嘅樂趣。 希望今晚就係一個咁嘅節目，無需討好所有人，但總有一兩個家庭、三數班Friend，會因此而再次一齊聚集喺客廳，扭開部電視，一齊笑，一齊標眼屎。有咁樣樣嘅情況發生嘅話，我仲有我嗰班辛苦過我嘅同事，應該就會覺得瞓少咗呢幾個月，係值得嘅。 今晚見。