我老公係同性戀（上） . 我今日結婚，在場所有人都好滿意，除咗男女主角之外。 . 我同阿正交換一個無奈嘅眼神，接受大家嘅祝福。 . 只有我哋知道，呢場婚姻係假嘅。 . ， 其實，我愛嘅男人叫朗飛，用我阿媽嘅說話嚟形容，就係一個MK仔，染金毛低學歷冇前途打散工……樣樣嘢都令阿媽唔滿意。 . 喺我眼中，朗飛當然冇咁差，佢只係安貧樂道，對生活質素冇咩要求，但對我好真心。 . 後來，朗飛染番黑個頭，搵咗份全職侍應嘅工，但都冇辦法達到我阿媽嘅要求。 . 阿媽仲威脅我，如果我唔同朗飛分手，就同我斷絕母女關係，搞到我苦不堪言。 . ， 我上討論區訴苦，抱怨阿媽，然後就識咗阿正，大家同病相憐。 . 佢高大英俊，高薪厚職，係父母嘅驕傲，偏偏私底下，佢係一個同性戀者。 . 「我讀中學嗰陣，發現自己對個男同學有少少好感，返屋企同老豆講起。結果嗰年暑假，佢哋送我返鄉下，參加『偏差行為教育營』，我俾營長電擊，一路電一路問我知錯未……」阿正咁樣講。 . 我安慰佢：「咁你依加都大個仔，佢哋冇可能再捉你去電擊。」 . 阿正嘆氣：「唉，但老豆又有心臟病，我語氣重少少都驚激死佢，點敢出櫃啊？依加佢哋仲催我結婚……」 . ， 我哋漸漸發現，對方無論家世、外表、職業，都係父母眼中嘅理想女婿同新抱，就有咗假結婚嘅念頭。 . 阿正買咗層樓，作為「新婚」嘅居所。 . 當父母上嚟探我哋，我就會預先走入去，扮到同阿正好恩愛咁。 . 事實上，我同朗飛租咗隔離間屋，繼續同居，而阿正都成日帶佢男朋友返屋企過夜。 . ， 兩對情侶，各自生活，終於唔駛再應付父母無休止嘅情緒勒索，唔駛再面對三姑六婆表面關心，實質八卦嘅眼神，我同阿正都鬆一口氣。 . 我都好感激朗飛，佢為咗唔令我難做，居然同意我嫁畀第個男人。 . 易求無價寶，難得有情郎，就係呢個意思。 . ， 但感情嘅嘢，往往都有意外發生。 . 婚後兩年，我同朗飛分咗手。 . 朗飛曾經為我付出好多，但呢一刻佢唔再愛我，或者係人心易變，或者佢唔再願意同我偷偷摸摸咁生活，或者咩都有啲，總之佢離開咗我。 . ， 絕望之際，我拎起手機，居然發現冇一個親友可以畀我傾訴。 . 因為喺所有人眼中，我嘅另一半係阿正，我哋有一段合襯而美滿嘅婚姻。 . 唯一知道真相嘅，係阿正。 . 淚流滿面嘅我，衝入阿正屋企。 . ， 嗰晚，阿正嘅男朋友唔喺度，我喊咗好耐，飲咗好多酒，然後就醉咗。 . 醒番嗰陣……唔好誤會，我嘅底衫褲都好整齊，阿正用熱毛巾幫我擦緊臉。 . 望住佢溫柔而專注嘅神情，我個心突然有一絲悸動，我諗，啱啱失戀嘅我，實在太脆弱。 . ， 朗風走咗之後，我一個人住，又怕黑又怕昆蟲，成日都要麻煩阿正，加上一個人承擔租金又好貴。 . 阿正屋企本來就有兩間房，商量過後，我乾脆搬咗去阿正屋企，當然係分房瞓。 . 我同阿正朝夕相對，我每次訴苦，佢都好有耐性咁聽我講。 . 唔知幾時開始，我發現，我愛上咗阿正。 . ， 我望住阿正同佢男朋友入房，嫉妒好似蛇一樣撕咬我嘅心。 . 我想同阿正一齊，我想佢同男朋友分手，我想佢愛我。 . 我同自己講，法律上，我先係佢老婆，老公愛老婆天經地義。 . 而且所有親友都覺得我哋好襯，我哋相愛嘅話，一定會好幸福。 . ， 點樣令阿正愛上我？佢雖然對我幾溫柔，但我完全感受到，佢只不過當我係好朋友，盡力關心我。 . 而且，阿正個老豆年紀愈嚟愈大，對阿正嘅掌控力都愈嚟愈弱，萬一阿正發現咗我對佢嘅企圖，會唔會想同我離婚？ . 所以，我要先掩飾自己嘅愛，再增強阿正維繫呢段婚姻嘅必要性。 . ， 我同阿正講：「我想生個小朋友。」 . 阿正呆一呆。 . 「我阿媽係咁逼我，佢話我三十幾歲啦，再唔生就嚟唔切，冇仔女嘅人生就冇意義，佢會死不瞑目……」 . 一講到「被父母壓迫」，阿正頓時充滿共鳴，好理解我嘅心情。 . 我又問佢：「你係獨子，你老豆冇迫你生仔咩？上次飲茶，佢問咗我幾次啦喎。」 . ， 阿正嘆氣：「我之前有諗過，等你同朗風生咗仔女，可以歸落我名下。但又覺得對朗風好唔公平，所以唔敢開口，依加你哋分咗手……」 . 我衝口而出：「咁你同我生囉。」 . 「吓？」阿正嚇到成個彈起。 . 待續... . #短故 #短篇 #小說 #陳美濤 #廣東話 #粵語 #tomatochan #我老公係同性戀

你有無愛過我（下） . 我想睇南南嘅記憶。 . 但只有死人嘅記憶，先可以變成影片，用最誠實嘅姿態擺喺我面前。 . 於是，我搵人殺咗南南。 . 無人懷疑我，因為搵凶手總會以動機出發。 . 假如結婚後我死咗，大家就會懷疑，係南南貪圖我嘅遺產；但依加死嘅係南南，我哋恩恩愛愛，絕對無嘈交，仲籌備緊結婚。 . ， 南南嘅父母手足無措，我就一力承擔南南嘅喪禮，亦拎到佢嘅記憶。 . 南南嘅記憶中，其他女人都係匆匆閃過，睇嚟佢對之前嘅戀情印象唔深。 . 然後，我喺影片中出現，但我面目模糊，影像最清晰嘅，係我個名牌手袋同我部車，好似黑夜中嘅螢火蟲一樣，閃閃發光。 . 同我約會後，南南自言自語：「我一定要搵個有錢老婆，我唔想捱啦！」 . 然後南南瘋狂地追求我、求婚成功，佢好開心，計劃緊點樣享受富貴人生...... . ， 大家明白未？男人幾唔可靠，可以表面愛我，其實愛其他人；可以表面愛我個人，其實愛我嘅錢。 . 好彩我睇咗南南嘅記憶，如果唔係，都唔知婚後南南會唔會害死我，謀我副身家。 . 又一段失敗嘅戀愛，過咗好耐，我先從傷痛中走出嚟，鼓起勇氣投入下一段愛情。 . 新男友北北對我好好，但我都係無乜信心......大家明啦。 . ， 於是北北死咗，我睇佢嘅記憶，佢又無咩背叛我嘅地方，但佢記憶中關於我嘅片段唔多，睇嚟佢都唔係特別鍾意我。 . 下一個係西西，其實我睇西西嘅記憶前，都無抱住太大期望。 . 估唔到，西西對我一往情深，記憶中大部份都係我嘅身影，佢仲喺背後為我做咗好多嘢。 . 我好感動，我想攬住西西大喊，話我終於搵到愛我嘅男人。 . 但西西，已經變成一具冰冷嘅屍體。 . ， 我既後悔又迷茫，愛情係咪一道無解嘅方程？ . 我好想知道對方係咪真心愛我，但總要等對方死後，先可以睇到記憶。 . 我想靜思三日三夜，但我仲有嘢必須要做，例如錄口供。 . 三個男友接連死去，已經引起警方嘅懷疑，呢次都無確實證據，所以錄完口供就放咗我，但我知道，呢種事唔可以再重覆啦。 . ， 咁我點樣搵愛情？我去咗提取記憶嗰間公司，問佢哋有無辦法可以提取到活人嘅記憶。 . 經理搖搖頭：「一來現有嘅技術，要抽取大量腦細胞，一定會令人死亡；二來活人嘅記憶係私隱......」 . 我喊住講晒我嘅經歷，只隱去搵殺手嗰部份，話三個男友都係意外身亡。 . 經理好明白我嘅感受，佢話：「人心難測，人最擅長自欺欺人，如果唔係睇記憶，有時，自己都唔知自己最愛係邊個。」 . ， 經理可能只係隨口安慰我，但我呆咗，如果愛情嘅終極答案就藏於記憶中，咁我我應該睇嘅，係自己嘅記憶。 . 我傾家蕩產，最終，呢間公司願意提供，一種為我而設嘅祕密服務：活人取記憶。 . 即係喺我在生時，取走我嘅腦細胞，馬上將記憶影片化，播畀我睇。 . ， 腦係無痛覺嘅，只有肌肉、硬腦膜有痛覺，可以用局部麻醉。 . 隨住大腦逐漸被取出，我嘅身體部份會逐漸失去知覺，痛覺、觸覺、位置覺漸漸消失，但我可能仲睇到嘢，我就可以睇我嘅記憶。 . 直到我失去視覺、失去思考能力，至死方休。 . 我寫好遺書，準備睇我嘅記憶。 . ， 我嘅記憶裡有好多阿東，阿東對我好、阿東同我結婚......每一個片段我都記得清清楚楚，直至發現阿東愛嘅係Shirley。 . 跟住呢？跟住我應該見到南南、北北、西西，但我記憶中嘅南北西面目模糊，反而阿東嘅片段不斷穿插。 . 原來，無論我同邊個一齊，我愛嘅一直係阿東。 . ， 喺失去意識前，我恍然大悟，原來，我唔係真心想知道南北西愛唔愛我，只係阿東嘅陰影一直纏繞住我。 . 我以為我搵緊答案，但其實我早就有答案：我愛嘅人，唔愛我。 . 之後，我不斷睇其他人嘅記憶，只係想搵一種肯定，但就算有人真心愛我，佢始終唔係我深愛嘅阿東。 . ， 我哋成日問，到底要揀我愛嘅人，定揀愛我嘅人？ . 但事實上，我哋根本無得揀。 . 可以令你朝思暮想，令你心如刀割，影響你一舉一動嘅， . 永遠都係你愛嘅人。 . －完－ . #短故 #短篇 #小說 #陳美濤 #廣東話 #粵語 #tomatochan #你有無愛過我

你有無愛過我（上） . 我老公阿東，今年三十五歲，佢撞車死咗。 . 我啱啱認完屍，失魂落魄咁坐埋一邊，祕書就去咗幫我搞手續、安排喪禮。 . 祕書同我講：「吳太，依加殯儀都有好多增值服務......」 . 「你搞啦，錢唔係問題，佢要走得風風光光。」我擺擺手，唔想理呢啲嘢。 . ， 祕書強調：「但係，呢個服務有啲特別。」 . 我個祕書從來都唔會無的放矢，我接過佢手上嘅單張，單張上寫住「記憶提取服務」。 . 只要死亡時間在四十八小時內，公司可以提取死者嘅腦組織，將記憶製成影片，當然收費不菲。 . 「阿東嘅記憶......」我諗起我哋甜蜜嘅過去，馬上同祕書講，要買呢個服務。 . ， 喺阿東嘅喪禮前，我收到影片，無我想像中咁長。 . 據講，人嘅記憶有限，你都無可能記得晒，由細到大嘅所有事。 . 所以，留喺記憶中嘅，都係最深刻嘅片段。 . 我開始睇片，睇住阿東嘅父母帶佢去遊樂場、第一次上台領獎、成績唔好匿喺廁所喊...... . 去到佢讀大學，初戀，坦白講我有少少嫉妒，但畫面好快就跳到分手嗰一幕。 . ， 畫面突然變得清晰，場景係一間畫廊，畫廊內有一個著白裙嘅女仔。 . 阿東問個女仔：「Shirley，我......留意咗你好耐，我哋可唔可以做個朋友？」 . Shirley隨口敷衍咗幾句。 . 然後，接連跳咗幾個畫面，全部都係阿東向Shirley搭訕，但Shirley表現冷漠，明顯對阿東無興趣。 . ， 我個心愈嚟愈酸，過咗一陣，終於見到我出場。 . 但係，Shirley嘅片段不斷出現，偶爾先有幾個關於我嘅片段。 . 阿東對住隻狗，喃喃自語：「呢個世界係咁㗎啦，我鍾意嘅人，唔鍾意我。無辦法啦，我都要結婚㗎，佢......對我幾好。」 . 阿東口中「對我幾好」嘅，明顯係我。 . ， 之後我哋結婚，但婚後，阿東嘅記憶依然有Shirley。 . 佢無再同Shirley搭訕，只係佢一得閒，就會特登去畫廊附近兜吓，遠遠望吓Shirley。 . 阿東停留嘅時間太短，我從來都唔覺得佢嘅行蹤有可疑。 . 關於我嘅片段，連畫面都比Shirley模糊。 . ， 影片結束。 . 晴天霹靂，我比接到阿東嘅死訊時更震撼，阿東從來都無愛過我？ . 佢同我結婚、佢行為上無背叛我，但佢記憶中最深刻嘅，係一個從來都得唔到嘅冷漠女人。 . ， 我再次翻睇片中同畫廊相關嘅片段，記低細節，祕書好快幫我搵間畫廊出嚟。 . 我去到畫廊，果然見到Shirley。 . 我馬上用情敵式嘅挑剔目光打量Shirley，佢個嘴太大、頸太長......我覺得我靚過佢囉，但阿東心目中嘅女神，係佢。 . Shirley見我望住佢，就問：「小姐，有咩幫到你？」 . ， 我拎出阿東嘅相，問佢認唔認得，Shirley點頭，我就話阿東係我老公，佢啱啱過咗身。 . Shirley答：「節哀順變。」 . 佢神情沉靜，眼裡無任何哀痛，好明顯，阿東喺佢心目中，只係一個有少少印象嘅陌生人。 . 我唔知講咩好，我討厭佢、我嫉妒佢，但我搵唔到指責佢嘅理由。 . ， 阿東，點解你唔好好愛我，偏偏要掛住一個完全唔鍾意你嘅女人？到底我有咩不如佢？ . 可惜阿東已經答我唔到。 . 阿東嘅喪禮順利舉行，我嘅日子依然要過。 . ， 後來，我識咗一個新男友，佢叫南南。 . 南南對我好好，我心裡暗暗比較過，佢比阿東對我更好。 . 經歷過阿東嘅挫折，我對南南嘅感情總係有啲唔信任。 . 我搵過私家偵探跟南南，佢嘅行為完全無異常，亦都無停喺咩地方偷窺第個女人咁。 . ， 南南向我求婚，我應承咗。 . 但我哋籌備婚禮嘅時候，我個心都忍唔住諗，其實南南係唔係真心愛我？ . 雖然佢行為無可疑，但佢可能心裡面愛第個女人，係白月光係硃砂痣，只係因為某啲原因一齊唔到，所以搵我做替身...... . 呢個念頭日日夜夜喺我腦海中盤旋，好似惡魔一樣蠶食我嘅心靈。 . 待續... . #短故 #短篇 #小說 #陳美濤 #廣東話 #粵語 #tomatochan #你有無愛過我