【龔成問答信箱】（Q19301-Q19320）

Q19301：

龔老師，本人都將近半百，持有#128好幾年，並佔本人大部份份額。想沽出又怕資金重投舊經濟股，一直持有又浪費機會成本。請問閣下有何高見，謝謝你！

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

安寧控股（0128）質素不太好，這股多年都出現虧損，企業價值不斷向下，長期持有的作用不大，你應該賣出。

長遠來講，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q19302：

老師，見到你經常慷慨咁回答投資理財問題，雖然我都搵過保險理財顧問做過理財規劃，但係最後佢哋都一定會sell產品兼意見不中肯。

想咗好耐都係覺得請教你可能會有更好的得著。

我同老公2人月入約11萬左右。
假設有一個月花紅約月入12萬。保守當11萬嚟計數。

負債: 共406萬
香港樓 估值840萬 (負276萬)
海外樓 估值210萬 (負130萬)
海外樓將來退休時用。

每月扣除所有支出後只儲得2萬
其中1萬月供股票
匯豐 (月供超過10年)
現市值50萬 每月4000
中銀＆煤氣＆中電 (月供已3年)
現市值20萬 每月各2000

現金大約有200萬
按揭高息戶口多按咗100萬只擺咗係度唔敢打筆錢主意

1) 如果想10~15年內財務自由及每月想有6萬被動收入，可以如何部署股票投資?

2) 現時租緊樓$19K, 自己層樓收租$21.5K 連埋物業稅係打和。

因為租樓的居住環境比較好。
老師覺得與其每個月白白俾19K，我們還可以考慮自己再買樓嗎？(無資金又擔心負債太高)

3)理財規劃顧問推銷的產品老師又如何看待?

4) 由於沒有小朋友，2人每年需要交15萬稅，可扣稅自願性強積金供款/可扣稅年金(回報低)，老師又點睇? 還是應該集中學習投資股票?

真心多謝老師的寶貴時間回答我的問題先

龔成老師：

1）當我地進行人生財富累積，會運用「先增值，後現金流」作方法，初期應投資較多增值類資產，而較年長的，則應投資較多保守類項目，這樣對整體財富增長最有效果。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這刻可以投資平穩增長類的股票，原本投資的股票可持有，但不少都是收息股，增長力不強，其實這刻財富仍有增長，到退休前才轉翻收息股都得。

如果到時要在$60000被動收入，你到時可利用物業收租、收租股、債券（到時先投資），及其他收息類工具。

而這刻，就好好利用股票去增長。

你可以月供盈富（2800），另外，加少少安碩恒生科技（3067）去月供，都可以，因為你組合增長力不足。

2）以你現時的財富分配，已有一定的物業比例，如果再增加，例財富%會過多。暫時保持現狀，相信較好。

3）其實都有價值的，但最重要是投資「適合」你的項目，因為在財富配置上，我地要講求平衡，物業、股票、理財產品，你都可以適當持有。

4）最重要睇你的需要，如果你認為強積金回報較你自己投資好，就可考慮。又或你認為年金長遠適合你，就可以考慮。這才是分析的核心，至於扣稅，只是加分位。

------------------------------------------------

Q19303：

你好！在3年前這個時候，第一次向您請教。過去3年用50萬在不同時期買入股票及Ibond；同時亦開始月供2800，都差不多3年了。另外手上還有30萬現金可作投資，每月可儲$10,000，期望下一個3年可增加70萬資產。

問題一：現在的組合平均每月現金流$1,700，離當時目標$2000到$3000還差一點。至於總資產，明顯比買入價低，可以話過去一年失望之處。其實您認為這個組合是否不足，甚至算得上差？

問題二：因為問題一，所以發覺組合內太多舊經濟股，有考慮過當2800供滿3年時(預計到時佔總資產近40%)停供讓它自然收息，然後改供恒指科技指數ETF。這個做法會不會太一刀切?

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你要睇翻自己在那一個階段，如果想集中現金流，可以在之後加強股息高的股票，如香港電訊（6823）、置富（0778）等。

同時，你唔好太著重一年的賺蝕，要睇長期。

2）如果你想增值，上述組合的確無潛力股，全部都是平穩增長股+收息股，所以在配置上的確有問題。

因此，你可以月供安碩恒生科技（3067），可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

至於月供多與少，就要睇你各類股票想佔組合的比例。

------------------------------------------------

Q19304：

阿sir，我想講多謝，你既課程好值，內容真係可以用一世，我之前都有上過其他類別課程，但唔會可以課堂前後有咁多時間俾學生問問題，我地上3個鐘堂，但你就頭尾留守4-5個鐘

第8堂最後你又竟然留email俾大家，我係完全估唔到的，其他課程都唔會咁做，但你會繼續照顧學生，就好似之前你派功課俾舊生一樣。

進階班見~

龔成老師：

我相信知識是用來分享的，有時對我來講，花多1、2個鐘其實無乜野，但對學生來講，就可以影響好巨大。

因此，盡力而為啦！記得多溫書、睇年報、用課堂的「企業評估表」！

------------------------------------------------

Q19305：

自己本身有渣車，每月租停車場$2700，如果我將130萬買個車位自用，可以慳番$2700。這樣有投資價值嗎？

亞Sir,咁咪要樓價回落先有值博率，但樓價好似唔識回落呀！

龔成老師：

你可以計計，$2700X12，除以$130萬，這是車位的租金回報率，大約2.5%。

如果你將資金投資收息股，假設建立一個5%的股息組合，$130萬，每月收息為$5400，你將資金用作交租仍有現金流。

因此，除非你預期該車位有升值的能力，否則，現時在較低租金回報率的情況下，車位的投資價值只是一般，投資值博率未算高。

至於物業市場，你預香港樓，中短期會因經濟差而向下，但都唔好預佢大跌，而長遠，由於需求始終大，所以慢慢會上翻，不過就不是大升模式。

------------------------------------------------

Q19306：

龔sir 您好！我是澳門讀者，以下係我基本資料:

- 33歲, 未婚, 同父母住
- 月入2萬4, 各類支出扣減後(包括保險及飯錢)每月約剩1萬
- 現有17萬存款, 15萬儲蓄投資保險, 約11萬股票
- 股票包括: 金沙-400股, 阿里巴巴-300股, F三星原油期-8000股, 暫時全部都賺緊

澳門供股的話, 每一隻股票手續費為50, 由於份工比較忙, 無時間日日睇住個巿, 考慮緊供1-2隻股票
我心目中考慮的包括: 華夏恒生科技、港交所、阿里巴巴、騰訊、中國軟件國際

每月想囉出黎5000-8000供股, 如果以供2隻計算, 手續費為100, 總手續費就壓在2%以下

其實我想再進取啲, 應該如何選擇及分配供股的部分?
另外想我想請教, 如何計算大巿(恆指)幾多點先算合理區? 以現時約26000左右, 合理區的中間定係頂部?

希望疫情快啲過去, 等龔sir過黎澳門開堂, 或者開線上課程!

龔成老師：

你這個年齡，的確可以承受到風險，現時的現金就唔需要心急動用，至於每個月的$8000，就可以做月供股票。

最平衡的做法，是月供盈富（2800）$4000，加上安碩恒生科技（3067）$4000。這樣對手續費，以及財富組合平衡角度都較好。如果你真的想進取D，就集中一隻供3067。

當然，你都可以供個股，但要留意個股佔組合比例唔應該太多。

同時，現有的$17萬，作用是等個股大跌時把握機會，你上述所選的股票都可以。恆指現價是合理的。

疫情過後，一定會過澳門，到時見！

------------------------------------------------

Q19307：

龔老師：若用市賬率估值，下列股票之合理價買入，是否合理？

置富（0778）
合理價：10-11元

領展（823）
77元至81元

中電（0002）
75-79

香港電訊（6823）
9-10

龔成老師：

置富（0778）你的估值要調低翻2、3成。至於其他股票，大致都可以，但最好合理區的範圈闊翻D。

同埋你要留意，利用市賬率做估值，要考慮最新的情況而進行調整，唔能夠程式般套用。

同時，這只是估值方法的其中一種，我地進行企業估值時，應該同時運用多種方法，配合使用，得到的估值就會更加立體。

------------------------------------------------

Q19308：

你好老師， 本人39歲，已看了大半你的大富翁致富藍圖，開竅了，真的謝謝你，希望不是太晚。

有問題關於外幣，書裡第五章p.147，想看看你意見。
剛轉工作到台灣，以後會以台幣為收入。看到書中p147裡提及：

先借取利率較低，有貶值前提的貨幣，然後兌換成另一貨幣，將資金投資於另一個國家的資產，而該國貨幣擁一定的升值潛力，其後到資產增值後賣出

再對成最初借貸的貨幣作償還本金及利息，過程如同資產創造與轉換一樣。

想請問對比起港幣，台幣是否利率較低有貶值？
如果是，我應否借取台幣來繼續投資我在香港的月供股票？

如果不是， 我可以怎樣繼續投資我在香港的月供股票？
因為收入幣值改變，我又應該怎樣計劃我的財富資產？
萬分感謝老師的指點

龔成老師：

你的方向不是不可，但投資值博率未能稱為很高，因為要確定台幣下跌，港幣（即美元）上升，而這是長期性的，這方法才可運作成功。

至於台幣，我都未能確定長遠會否貶值，美國經濟增長力度會較台灣好，但同時美元大量印銀紙，因此美元本身是貶值的，問題是經濟向好因素，而及其他外幣貶值的因素，都造成複雜的問題。

因此，上述方法，未能肯定有著數，因此值博率未算高。同時這是較進取的方法。

比較穩健的做法，就是你工作後，將資金轉回港幣，月供港股，盈富（2800）、安碩恒生科技（3067）都可以。長期進行就得。

------------------------------------------------

Q19309：

老師，我有層樓已經供了3年過了銀行的死期，之前樓價195萬126尺買，借銀行60萬，月供4000,收租7500/月

我看見依家樓價可以賣出250萬，想換間大點的，300萬樓下的，這樣適合嗎？

龔成老師：

方向不是不可，因為你能增加財富組合中資產的數量，同時，可以轉成較有質素的物業。

不過，你$250萬樓，轉成300萬樓，差別少，其實當中的交易成本高，因為當中一買一賣有較多雜費，我唔太建議換樓時有太少的變化，寧願你儲多少少資金，一次過軜去$400萬樓，會較好。

------------------------------------------------

Q19310：

龔老師請問: 美股價值投資高嗎？

龔成老師：

我相信在20年後，美國、中國將會是全部最強的經濟體，因此兩個國家當中的企業，都有投資價值，你可以建立一個平衡組合，同時持有，可以。

同埋我地最重要，是睇「企業」，只要優質企業，就可以投資，這不限於國家。

------------------------------------------------

Q19311：

龔Sir你好,想請教一下,現在部署入粵海投資,澳優, 中海物業是否可行。仲有隻深圳國際

見它們的估值都偏低
多謝建議

龔成老師：

粵海投資（0270）澳優（1717）都在合理區，可分注投資。都有長線投資價值的。但就未算是偏低。

至於中海物業（2669）不差的，佢係2015年由中國海外發展（0688）分拆上市。

佢主要於中國內地、香港及澳門從事物業管理業務（如保安、維修及保養、清潔及綠化、為物業發展商提供交付前服務等。

現金流不差，增長力都有，但就不是好高增長，是平穩增長類。現時在合理區中上部，分注投資都可，這股都可以長線。

至於深圳國際（0152）合理價，都可以考慮，但這股不是高增長類，以收息為主。

------------------------------------------------

Q19312：

老師你好，我最近追緊你的《5年買樓4部曲》，資料同分析都好詳盡，真係好正！

我已經唔係90/00後，80後的我其實已經行緊你寫的第1步，做2份工去努力儲錢，已經儲左100萬左右。

現在真係好想實踐第2步，但係做住2份工+照顧孩子，實在無辦法去上你的實體班。

老師，你會唔會考慮可以現場zoom/視像教學/錄製短片之類，等我地呢類學生都可以報名。

等你好消息

龔成老師：

好！你保持向目標行就得。

$100萬是一個不差的初期資金，作為錢滾錢的基礎會好理想，你之後要加強投資知識，從書中及課程增加都得。

我遲d，會開一個有關於資產配置的網上課程。

至於股票班，由於內容太重要，暫時唔會。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q19313：

首先，要多謝您咁認真答我

1) 其實我都知我太集中金融相關，但係我本身正職份工好忙，所以當初開始買股票個時就集中一個板塊，係留意相關消息既時候比較易manage d 如果需要調整，應如何著手？

2) 係投資心理狀況上，我都覺得自己好難take balance
如果我keep住留意新聞，我就好有衝動不斷trade in/out，結果多數係執少少就放，或者蟹左，甚至有時會影響我番工，因為成日心掛掛，但係我一唔睇，又真係唔睇幾個月，好多時會錯過好多入市既良機
我應該點做？

3) 其實我都對您個課程有興趣，但係weekday 7點灣仔對我好有難度，我本身係機場番工，6點半收到工已經算係早。會唔會有機會遲d有weekend class?

龔成老師：

1）你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），但這基金較高風險，要分注，慢慢投資。

2）利用月供，或每隔一段時間先入一次，這是最好的。唔好以為成日睇住個市會捉到低位，根據我過往做10年銀行與證券行的經驗，日日睇住個市的散戶，是輸得最多的一群。

你要學長線投資，所有賺大錢的投資者都是長線的。

3）我間中都會開星期六班的，通常一年開1、2次，星期六下午時間。

下次在今年4月。

你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

------------------------------------------------

Q19314：

龔sir，我係你學生，請問（利息覆蓋率）名字是否等如（利息盈利率）？

我在中銀網找（利息盈利率），名字後跟了個（X），系咩意思呢？另外，例如相中，福壽園的（利息盈利率）是86.071，個數好大，佢系米%黎架？

我嘗試自己計公式（EBIT除 利息），但查過好多網頁，都找不到（EBIT）, 另外，（利息）在哪裡找到？

龔成老師：

（利息覆蓋率）等如（利息盈利率）。

你見到數目大，是正常，因為當一間公司無也利息支出，就會出現這數，因為這公式的原理是比較賺錢與利息，如果利息好少，出來的數就會好大，這是好正常。

（X）就是倍的意思。

你記住，5停倍以上合格，數字愈大愈好。

至於EBIT，財經網站未必有提供的，你可以自己計算翻，除股東應佔溢利，加翻利息、稅項，就是EBIT。

不過，我地在分析利息覆蓋率時，一般都唔會自己計，直接睇財經網站就得。

------------------------------------------------

Q19315：

老師，我見你講過黃金應該以配置模式？例如佔組合3%，咩意思？

龔成老師：

所謂的「配置」，就是並非買賣，不是賺差價，是買入後「持有」，成為財富組合的一部分。

例如目標是佔財富的3%，如果你現時有$100萬，你應該有$3萬是黃金，當你財富增加至$200萬，你就要將黃金增加至$6萬。

當然，不用成日轉，大約就得。

------------------------------------------------

Q19316：

阿sir，我想問，係咪所有新上市公司都係水桶一， 即使內地業務幾成熟都好。

例如舉個例子，愛奇藝，內地好紅，好多用家。但係佢都算係水桶一，唔算水桶二？

愛奇藝只不過係一個例子，當然佢好似未喺香港上市，我想問佢係屬於水桶幾？

其實我係想問Bilibili，好多消息話佢會喺香港上市，我知道係內地好紅

無論佢業務幾成熟都好，新上市就一定係水桶一？

龔成老師︰

新上市唔一定係水桶1，佢屬於那個層次的水桶，其實係睇佢業務發展狀況、穏定性、潛力等等因素。

但問題係，我地分析新上市企業合理價時，除了了解行業發展、佢本身業務狀況外，都要參考過往財務數據。

但新股都唔會有太多這方面的可靠資訊，令成個分析唔完整。所以就算你覺得佢基本面好好，但我地係投資時，都要比較保守，唔可以太取，去平衡翻參考數據不足這個風險。

至於內地視頻平台嗶哩嗶哩（BILIBILI）傳聞會在港上市，但由於未落實，也沒有相關上市文件和上市價，暫時好難評論佢投資價值。但相信是有潛力的，不過就要睇到時平與貴。

------------------------------------------------

Q19317：

老師你好，京東健康 市價在阿里健康及平安好醫生中間 ，但銷售額就在他們之上，京東健康 我有兩手在招股價 值得長線持有嗎

值得加入你50隻潛力股之一嗎？

因為我買左電子版

Q2.之前老師曾經有提過平安好醫生是潛力股 但現在很少見你推薦給大家？

龔成老師：

京東健康（6618）與阿里健康（0241）的模式較近。與平安好醫生（1833）都算同行。3隻都有質素，長遠都正面，但估值好難，因為現時無太大的盈利基礎，市場只能以不同的角度去進行分析，當中亦較多預期的因素。

京東健康其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，同時暫時略貴，所以如投資，最好回翻D，$100以下較有值博率。如本身有貨，可長線。

簡單來講，京東健康都可成為優質股的其中一員。

平安好醫生（1833），質素無變，長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，初步分析，$100以上是貴的價位，$100以下開始為合理區頂。

------------------------------------------------

Q19318：

龔sir你好，請問若果通脹時，可以點應對？如何避險？需要預留較多現金嗎？

龔成老師：

通脹即是現金愈來愈不值錢，當然不要持有現金。

你最重要就是建立一個財富組合，當中要持有真資產，例如物業、車位、優質生意、優質股等，長期持有就得。

其實你好難因應短期的通賬去做投資，但我地知道長期現金一定貶值，因此長遠計，唔應該持有現金，應該持有資產。

------------------------------------------------

Q19319：

你好，我打算去做月供股票 (盈富基金) 但我發覺 MPF account 今年回報幾好, 所以做月供股票 還是做MPF自願性供款好呢？

另外1177 6.75 入咗 可以keep嗎？
Thanks

龔成老師：

你唔好只睇短期回報，整個財富累積是長期的，強積金是一個長期的投資，你要先確定，長期的回報，是否理想，是否能跑贏大市，如果不能跑贏大市，將資金投資大市，例如盈富（2800）策略會更好。

所以，你先從長期角度分析先。

中生（1177）出左業績，比預期差，所以股價都有所回落，都是正常市場情況。

不過，又唔需要太過著重短期業務，一間企業中短期業務總有變化，都好正常，最重要是睇長期。這刻長期分析，又未算差，整體質素無變，長遠仍是有發展的。當然，仍要多觀察之後的業績，先有更立體的情況，但暫時見唔到核心改變。

佢由之前的貴，去翻現價合理區中上部，現價又未到大手時機，相信中短期仍波動，要有心理準備，但長遠無問題的。

------------------------------------------------

Q19320：

老師，想分享少少野，我上了初階班之後，發現課程真的物超所值～你善於把一些複雜的概念精簡化，我也按照筆記分析了一些股票。

現時我在購買之前，最少也知道自己「買些什麼」，同時，也真的沒有蝕錢……哈哈。感謝您

龔成老師：

好呀！

投資知識好重要，我地從來不是亂買股，而是有策略地進行投資，建立一個優質股、平衡、適合自己的組合，長期持有。

同時在選股上，小心進行，所以你見我股票班有教5種選股方法。

你現時已有投資基本功，之後要多分析企業，多用「企業評估表」，保持進行，財富一定能長期保持增長。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

由今日開始, 【點止冧巴咁簡單】會喺印刷版有得睇喇......仲唔嗱嗱聲去買份蘋果日報

點止冧巴咁簡單｜吼港交所殺重牛急跌掃貨（古天后）

港交所（388）噚日公佈第3季純利按年增長52%至33億元，大致符合預期，核心收入表現甚至勝於預期。現金收入按年增長98%，多得互聯互通機制，北向及南向日均成交額創紀錄新高，分別按年增長2.03倍及1.83倍。債券通交易量按年增長36%；而牛熊證及衍生工具大受歡迎，衍生產品收入上升10%。

港交所嘅核心收入表現強勁，按年及按季分別上升40%及21%，多得期內交易額上升帶動交易及結算費增加。港交所份業績咁靚仔，預料市場或調高其估值。雖然有分析指拜登入主白宮後，中美關係緩和，喺美國上市嘅中概股唔使急急腳返香港上市，但港交所修改咗《上市規則》，「同股不同權」嘅科網公司亦可以喺港股上市，中科企可以透過港股市場吸多啲水，何樂而不為。而港交所引領原本喺美國掛牌嘅「中概股」來港第二上市，順手將港股打造為「東方納斯達克」。

古天后則認為就算拜登上台，唔代表即時跟中國搭晒膞頭做老友，而中概股為避免潛在風險，「離美赴港」嘅誘因仍然存在。因應科網股喺港股數目增加，恒指公司今年7月底推出恒生科技指數，市場更容易量化在港掛牌科網股嘅表現。而呢個科技指數嘅相關衍生工具將陸續登場，有助進一步帶動成交，點計條數做獨市生意嘅港交所都立於不敗之地。

不過呢兩日科網股暴跌，市場擔心港股玩完，港交所就無運行，其實都係高位有資金套利換馬，冇乜大不了。睇返港交所噚日跌近4%，去到365元水平。如果望望牛熊證分布圖，重牛區喺350至365呢個範圍，若然大戶為咗殺港交所肥牛跌到350元，仲唔仆到掃港交所？？大部份大行目標價400樓上，360上車一成水位夠晒和味。

古天后
#300likes30shares #古天后 #點止冧巴咁簡單 #蘋果日報
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。

依家我嘅聊天室已經停止免費試用, 直接課金入來聊天室啦：https://bit.ly/2BmeAhZ
立即下載秒投：https://link.stockviva.com/L9J41qUp01
對聊天室有任何疑問，可以直接聯絡秒投小編：電郵 cs@stockviva.com
注意：本人僅在 "秒投App" 及其網站內開設聊天室，本人並沒有與其他網站，或以外的平台，開設過任何通訊群組，亦沒有任何所謂的「私人whatsapp 群組」「Telegram 群組」等等，為保障大家利益，切勿加入任何類似群組。

【盤房來料】新經濟股震盪提供上車機會

歐美地區疫情大幅反彈，歐洲德國同法國再封城，英國收緊限聚令，美國伊利諾伊州亦下令芝加哥關閉室內用餐；而疫苖又冇進展，最快可能要到明年1月先可以推出市場，市場擔心經濟隨時再陷入停擺，歐美股市隔晚插水。道指跌943點，連同標指跟納指齊齊跌逾3%。不過今次有別於3月份大跌市，雖然金價同油價都要跌，但債市無乜大礙，反映投資者只係趁下周美國總統大選前，先沽貨鎖定利潤，畢竟美股自今年3月低位反彈再逼近高位，納指更再創新高，新經濟股累計升幅更驚人，喺有食唔食，罪大惡極原則下，埋單計數好正常。

阿Man早喺9月開局已預告嚟緊9月至11月初，美國大選前個市都係反覆難玩，唔再好似4月至8月咁順風順水坐住贏，要減倉輕裝上陣兼靈活走位，做好風險管理慎防大市隨時出現震盪。早有準備嘅炒家，眼見隔晚美股咁款亦瞓得安樂，結果今日港股表現又唔算太差，暫時仍能穩守20日線(24354)，只係再失10日線(24609)及50日線(24535)啫。恒指低開418點，最多跌450點見24258點半日低位，創10月16日以嚟低位。其後A股倒升，帶動港股低位反彈，收復20日線，跌幅收窄至211點，見半日高位24497點，可惜未能重上50日線。恒指中午報收24478點，跌229點；國指半日跌77點，報收9886點；恒科指半日跌47點，收報7609點。

話咗舊經濟股靠唔住，今日輪到保險股拖低大市，友邦(01299)跌1.9%；平保(02318)跌2%；國壽(02628)公布完季績，半日挫3.6%。大笨象(00005)威咗一兩日，今日又落番去32水平，話咗35元都難上，更何況要回到暫停派息前嘅四五十水平。幾時都係新經濟股夠活力，今早雖然大部份科技股都顯著低開，但ATMX開市無耐已由低位反彈，噚日創新高後嘅騰訊(00700)雖然早段曾低見587.5元，但要彈番十蚊好easy，跌幅由2.2%收窄至半日僅跌0.5%。而噚日北水力掃嘅美團(03690)跌近2%又見買盤吸納，半日倒升0.2%；阿里(09988)則守300元大關，半日回吐1.6%；小米(01810)跌3%後，半日倒升0.2%，睇嚟背後又係有北水發功。

阿里股價落到300樓下已見買盤積極買入，當然係因為螞蟻集團(06688)招股反應熱烈，成功分拆亦令阿里水漲船高。除咗阿里受惠新股上市，睇番今日啲物管股竟然逆市靠穩其至上升，唔知係咪明日有物管股新力軍上市，而阿Man都會留意合景悠活(03913)明日上市後有冇得諗。雖然現有上市物管股調整唔少，但呢個板塊上面累積咗唔少蟹貨，主要係有資出累計升幅較大嘅物管股，換馬認購新丁，加上新丁無蟹貨，大戶要炒上更得心應手。

物管股新丁合景悠活值得關注

阿Man關注合景悠活係因為公司IPO引入多名實力雄厚嘅基石投資者，股東陣容星光熠熠，鑽石級數嘅基石投資者陣容鼎盛，相信跟合景悠活母公司合景泰富(01813) 係實力雄厚嘅內房股有關。合景泰富擁有豐厚嘅土地儲備及持續拓展住宅及商業物業組合，為合景悠活可持續發展奠定穩固基礎。而合景悠活一直專注大灣區發展，重點布局中國經濟發達嘅四大核心區域：粵港澳大灣區、長三角地區、環渤海經濟圈、中西部地區及海南。集團透過策略投資及收購擴展業務，進一步多元化其服務組合及拓展業務版圖，包括於2019年收購罡昱企業。相對其他同業，合景悠活毛利率增長穩定，亦較同業為高，集團未來一方面將進一步開拓多元化增值服務，積極發展毛利率較高嘅社區增值服務；另一方面持續升級集團嘅智能系統，以進一步提升營運效率及成本控制，明日掛牌值得關注。

麥狄文
#300likes30shares #麥狄文 #盤房來料 #信報網
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。

加入古天后聊天室，享受朝八晚八答股服務，睇最新心水貼士：https://link.stockviva.com/ntodoCj7Iab
課金聊天室：https://bit.ly/31nwXNo
立即下載秒投：https://link.stockviva.com/L9J41qUp01
對聊天室有任何疑問，可以直接聯絡秒投小編：電郵 cs@stockviva.com
注意：本人僅在 "秒投App" 及其網站內開設聊天室，本人並沒有與其他網站，或以外的平台，開設過任何通訊群組，亦沒有任何所謂的「私人whatsapp 群組」「Telegram 群組」等等，為保障大家利益，切勿加入任何類似群組。