【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18801-Q18820）

Q18801：

龔sir你好，

1. 一直有個疑惑就係，應該幾時賣出優質股？例如1211，係咪應該不理波幅升到300蚊都唔賣？應該如何判斷？

2. 3033是追蹤科技股的ETF, 會有派息嗎？可以當2800一樣長期投資嗎？合理價怎計算？

3. 疫情關係，請問龔sir你幾時開網上課程？

龔成老師：

1）要賣出一隻優質股，在幾個情況下出現：

第一，已無經質素

第二，貴，現價比亞迪（1211）都貴，所以適度賣出都得。不過，無人知賣出後能否買得翻，所以我暫時唔賣。

第三，已經完成成長，我投資這潛力股，原理就是「投入資金等企業成長」，我就是等公司變到好大間，佢發展電動車，我就是等佢的車更普及，這就是我的收成期。

2）有少少，但投資這個潛力股類的ETF，重點是增值，不是派息。

可以長線。

你預現價合理區頂，跌2成會較合理。

3）我遲d，開一個有關於資產配置的網上課程。

至於股票班，由於內容太重要，暫時唔會。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q18802：

龔sir，我最近又去左土瓜灣同黃埔睇，睇中佢明年沙中線，你覺得呢區投資價值係咪相對高些？

最近睇到一間比較心儀近黃埔站就315呎 460萬 30年樓齡

如果新界天水圍 屯門新樓盤發展空間大唔大？唔該曬龔si

因為我地冇乜經驗同埋唔係太識分析樓市發展，就比較冇方向要買邊區

龔成老師：

土瓜灣同黃埔有地鐵後，投資價值提高左，可以作為長線投資的地區。

我地分析一個區份時，會睇左幾近商業區，交通方便程度，以及人口密度，加上將來的物業供應。

在質素上，土瓜灣同黃埔會較好，加上啟德的配套不斷成熟。至於天水圍、屯門，始終質素會弱少少，交通，以及長遠仍有一定的供應，因此整體只算是一般。

你要用「投資者」的角度去分析，交通方便，易出租的物業。

------------------------------------------------

Q18803：

龔 sir，原來follow左你 fb半年一直有睇你啲片同問你意見，由最初個本得50萬到依家90萬只係用左半年，而且學到好多其他人唔會提點你嘅嘢

今次問題係我25歲月入3萬，不過工作好大壓力，我應該點做？唔做？投資半年回報已經係我一年人工，幾多錢先可以做財務自由

龔成老師：

見到你財富有實質提高，太好了！之後要保持進步！

你25歲，是財富增長的黃金時期，要好好把握，盡你一切能力，儲錢，投資，提高知識。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

另外，唔好因為半年的投資成績要太過有自信，投資是長期戰。要保持知識增長。

同時，優質股最好長線投資，對長期財富較有利。

------------------------------------------------

Q18804：

請問你覺得疫情如果過去，本地 reits 會否升返去疫前水平？定香港已失去以前的優勢？( let say 2778 and 778)

你認為電能實業疫後可重返50蚊以上嗎？

龔成老師：

疫情過去後，好多舊經濟股都會上翻D，但未必一定能上到疫情前的水平，因為經濟始終回勇要一段時期。

香港房託，面對的主要是中短期問題，現價其實不少都在合理區中下部，因此都有投資價值。

至於電能（0006），因為有歐洲業務，相信中短期仍弱，由於歐洲本身的經濟弱，因此回勇時間更長，但慢慢會上翻去的。

------------------------------------------------

Q18805：

龔老師又係我呀，岩岩睇緊你本書講緊啲優質股，突然就想問下你點睇中芯國際（981）佢近期因為啲壞消息都跌左幾多下，不過我自己認為佢都有一隻優質股黎

所以想買入做長線既投線，想問下你既意見同埋現價識唔識合

另外，手持一萬股 6088、1.5萬股1762 2隻都係睇長線既回報 麻煩老師比啲意見

龔成老師：

我用整體性的角度分析，中芯國際（0981）業務本身有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算貴，加上之前熱炒過，股價大上大落，投資要注意風險。這股唔建議大注。

至於，FIT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，但預期長遠的增長力只是中等。現價合理。

另外隻萬咖壹聯（1762），則是不過不失。

佢幫助企業與中國智能手機用戶建立聯繫，向尋求移動廣告、網絡視頻產品分發及遊戲聯運服務的行業客戶提供安卓內容分發服務。

集團專有的平台，設有數據挖掘、數據分析及場景分析等技術，以定位於智能手機用戶，並通過智能手機製造商自帶移動應用程序及用戶界面發佈行業客戶的個性化、實時及基於場景的內容。

不過，業務就較為波動，過往雖然有增長，但近年的中期業績出現生意與盈利下跌的情況。業務波動。

這類股有危有機，可能有潛力，但只能小注投資。這刻的投資值博率，只可以話屬中等。

------------------------------------------------

Q18806：

老師 你好！ 我媽媽手上有50萬現金

請問老師有什麼投資產品可建議 是否放在有息股票？ 有邊隻可作推介？

龔成老師：

佢可以考慮投資平穩增長股，加上收息股。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

可以將$50萬，分注投資在上述股（當然，你可以選部分）。慢慢分注入。唔好心急用盡現金，可以用一年時間入。同時，要留有一部分現金，不用能盡。

------------------------------------------------

Q18807：

龔Sir, 剛報讀咗你課程，多多指教

想問下你响5年買樓4部曲提到2822同3140，想問而家買入呢個價算唔算高呀? 謝謝你

龔成老師：

你可以投資盈富（2800）、南方Ａ５０（2822），現價都算合理，不過，唔好一次過入，要分注模式投資，原理是慢慢儲貨。

另外，領航標普五百（3140），有可能退出香港市場，我之前有出過片，你可睇睇。暫時唔好投資住，要睇佢發展。

你可以考慮安碩恒生科技（3067），這都是有質素的基金，不過現價已在合理區頂，因此投資，要慢慢分注去入，不要大注。

我會建議你具體的投資策略，等上完堂先，這樣你會掌握得更好。

股票班見！

------------------------------------------------

Q18808：

老師，我係股票班舊生，有以下問題，有勞了！

1：老師，想問下，假設未有益利既股票，如果用ev/ebitda得唔得？，即係例如saas呢類咁

2：老師，想問物管估值果方面，盈利預測下年應該加幾多好，今年計下年既話，每年20％增長算唔算太高?

3：承上題第2題，老師，想假設d比較冇咁強既物管，好似2168同3662咁，呢類應該比預測盈利要比低幾多？

4：老師，想問一個行業既市盈率高低應該點去介定，假設有部份高既去到60，低既得十幾，有d就廿幾三十，如果遇到偏差咁大既情況應該點做

5：老師，想問假設我用下年毛利增長％套用落當pe用得唔得，即係假設每年增長有30％，比30pe佢咁計得唔得？假設得既話，30％增長應該用黎介定上限定下限好

6：老師，想問你係點計1833個估值 ，因為佢負盈利，好似用咩都唔岩咁 ，係唔係只可以用現金折現計？

7：老師，想問中美咁既關係，你覺得1928之後拎賭牌會唔會有危險

8：老師，我想問6049如果以佢既經營情況，有冇可能上番80以上 ，我見物管類，佢都算跌得最多

9：老師，想問點解某d股票，盈利每年有增長，但估值方面，需要每年向下調，呢個問題上網都搵唔到答案😂
thanks

龔成老師：

1）如果佢未有盈利，但已經有正數的ebitda，這樣就可以用這個方法，作為其中一個估值的方法。不過，這方法一般會較多應用在折舊較大的企業，因此，要睇翻該企業，是否初期的投資金額較大，而每年都有一定的數目要折舊。

2）你要睇翻佢的情況，每間企業不同的，例如你分析翻，佢過往的生意增長力，同時生意增長的原因，是因為母公司支持，還是大環境，你要對過往情況了解，利用過往合理推算將來，不是亂估的。

3）除行業情況外，最重要睇翻佢自身情況，要分析翻佢過往及將來的發展。

4）市場會考慮翻這行業的獨特性、賺錢能力、風險度、增長力等，要分析並不容易。所以你可以用行業平均數據作為參考。

5）並不是咁簡單的。

當然，兩隻會有關係，但推論會較為複雜，只可以話，增長較高，當然可以有較高市盈率。

6）用現金流折現法，考慮預測市盈率的估值等，估值的難度高，因此，就算有最終的估值數，都不能完全盡信。

7）金沙（1928），暫時睇，風險不高。當然，政治可以有任何風險。

8）保利物業（6049）都有質素的。

佢係中國的物業管理服務綜合商，主要提供以下三項服務：（1）物業管理服務（2）社區增值服務（3）非業主增值服務：主要向物業開發商提供案場協助服務。

生意與盈利都有理想增長，現金流不差，本身有質素。但市場有時對這類股有少少熱，股價較波動，加上規模不算好大，因此都有風險。

優質度有的，如本身有貨可持有，但如想入就最好小注。

9）有好多可能性。第一，股價之前已超前反映，昭是之前高估左。第二，市場以「將來」為分析核心，當今年的「將來」，比一年前想象的「將來」，無咁強，股價就可能會向下。第三，分析企業有好多因素的，例如佢負債增加左，都會影響左估值。

------------------------------------------------

Q18809：

Sir ,有D嘢唔明，好多人都話明年股市會大霖; 要減股票總％?減20％?

龔成老師：

唔好信。

真正的股災，是無人能預測的，好多人都講的股災，就不是真正的股災。

我唔知會否大跌，但跟據我20年的經驗，無人能預測到的。

你用翻長期的財富配置，持有優質股，咁就得。

------------------------------------------------

Q18810：

請問龔sir的長期持有投票
是否從巴菲特學的？

龔成老師：

對！

我20年前，是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

十幾年前開始學巴菲特方法，長線投資，每星期逼自己用6小時研究一間企業，逼自己寫分析報告。算是十幾年，贏多輸少。

------------------------------------------------

Q18811：

龔sir，在經濟一週看到一篇關於月供股票的文章，談及以下內容，當中說的是可靠的嗎？

但當組合賬面上升了30%-40%回報，達到一早擬定的止賺水平時，市場可能漸漸出現亢奮狀態，股價慢慢脫離自己可承受的範圍，此時應考慮全部出售，鎖定利潤。

此時手上的金錢已經多出了30%-40%，等待恒生指數市盈率重回12倍以下，再重新啓動此月供股票計劃，日後的複合利益力量就更大。

龔成老師：

我多年前，做銀行，有客供港交所（0388），同我講話只入不出，當年$1X開始供，我唔知佢供左幾多年，有無停，但我相信佢賺左幾百萬。

我記得當年，由$1X升到$20，已是當年的歷史新高，當時有人話已亢奮，其他客都賣，但愈賣愈升，股價一直向上，無跌過。

如果你上述所講的方法，相信連$5萬都賺唔到。

我地一定要分析企業質素，增長力，有質素的股票，是值得超長線投資的。

------------------------------------------------

Q18812：

成哥早晨，電池業務應該會係之後十年嘅大勢所趨，除咗比亞迪之外，請問你點睇1772同埋819？

另外我有月供緊2800，2388，1038，1928。我啲擔心1928，因為如果疫情真係成為風土病的話，酒店業嘅前景仲keep唔keep到...

事關我見到就算澳門0感柒，又通咗關，但都係無遊客。唔知成哥你點睇？

龔成老師：

贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正或入，始終行業有一定的變化。

至於另外隻天能動力（0819）有質素的，同時業務仍在增長中，不過，增長力由過往的高增長，轉為平穩增長。

佢主要係中國從事研發、生產和銷售新能源鋰動力電池、特殊用途鉛動力電池、電動自行車鉛動力電池；廢舊電池回收處理；以及智慧能源解決方案業務。

佢業務都正面的，但盈利就比較波動，因為幾年前曾出現過虧損，這是扣分的地方。近幾年已無這問題，見佢生意同盈利都有理想增長。

不過，這股業務始終有潛在波動，股價上落大，現價仍算合理，但不能大注。

金沙（1928）仍有質素的，疫情只是中短期問題，現時內地客去澳門無之前咁方便，但疫情過去，又會回到正常，你不用擔心。這股長遠仍正面的。

------------------------------------------------

Q18813：

你好龔sir，我已經供緊

2800（$8000）
1211（$3000）
9988（$3000）
1928（$3000）

現在考慮再供多一隻，考慮緊1177（$3000）或者12（$3000）。

請問龔sir 有咩高見，可以指點我？
謝謝

龔成老師：

上述的股票，你可以長期月供，如果擔心比亞迪（1211）有少少貴，就減金額。

至於加入一隻新的，要睇你想組合的增長力較高，定較平穩，中生（1177）潛力股，現價可月供，但風險會高D。恆基（0012）就較穩健。睇下你投資目標。

------------------------------------------------

Q18814：

你好，龔成老師。我今年23歲，目標30歲前置業（打算買大約800萬的樓），現時流動現金、股票、基金及保險總值大約40萬。

我有以下三個問題。

1. 假如我將每月能夠儲蓄的$17000，把$9000作月供股票，把$5000買多一份新的儲蓄保險，儲5年。

10年後（33歲)可以選擇取回全部本金及紅利 或 選擇不取回並繼續滾存，最後把剩下的$3000作現金儲備，請問以上理財規劃配置合適嗎？

2. 你認為置富（778）、東航（670)前景發展如何？

3. 你認為現時的內銀股發展如何，我假如投資股票作中長線（5年），我應該首選那隻內銀股？

非常感謝你的時間及教導！

龔成老師：

1）你投資儲蓄保險，不是不可，但不建議太多。

我地理財，攻守兼備是正確的，但同時，你年輕，應該加強增值方面。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，這類儲蓄保險，在理財中有防守作用，但就不用多。如果你到期後，仍想有一部分作防守，可以繼續滾存。

2）置富（0778）正面的，中短期較弱，但長遠無問題，現價合理，都有長線投資價值。

至於東航（0670），其實航空企業的賺錢能力唔強，加上風險高，因為好受油價、對沖等因素影響，東航長遠仍會面對這情況。

雖然本身都有一些業務上的質素，但企業長期價值增長有限，行業有風險。因此投資價值未算好高。

3）你應該選「平穩增長股」，因為你年輕，同時你有5-7年時間累積財富，因此不用太保守。而內銀只是收息股，增長力不強。

------------------------------------------------

Q18815：

你好老師，我今年24歲，因為疫情關係收入唔係好穩定 所以現金唔多。

之前一路月供緊盈富基金$1000同領展$1500 依個月先開始供阿里巴巴同港交所 想問會唔會太遲？

另外想問我呢個年紀月供啲咩潛力股好？同資金唔多有咩潛力股票可以買？

thank you辛苦老師了

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你原有的股，可繼續供。

至於加入一些潛力股，可以，但金額這刻唔建議太多，因為始終唔平，但如果你這類股在組合完全無貨，就月供少少合額。

你可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q18816：

龔sir你好，今年我20歲係一個00後，一考完DSE就出黎做嘢，宜家做緊咖啡師，一個月得13000，給得家用同給其他嘅興趣班

一個月得翻4000自己用，唔好講儲錢自己用都差少少，我想改變現狀，睇到你嘅班我好上去上堂，但時間全部都唔啱

我想問一下有冇其他嘅班，或者網上教學我都可以架，我寫咁多係因為想龔sir睇到我嘅誠意

龔成老師：

現時你年輕，可以把握機會學多些野，暫時可以好好做咖啡師，再慢慢想進一步的發展，唔能夠永遠停在$13000，中短期就無問題。

這刻，我會建議你大量閱讀投資書，因為時間較彈性，這是最好的。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第8版）
《80後2百萬富翁》（第4版）
《80後3百萬富翁》（第2版）
《財務自由行》（第6版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（第1版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第1版）

另外，我有可能在下年，開一個有關於資產配置的網上課程。

至於股票班，由於內容太重要，暫時唔會。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q18817：

老師，持有不小美金，但市面美金儲蓄保單要lock3至5年，流動性低，想買 美元etf,有冇建議及推介

龔成老師：

最簡單的方法，就是投資一些指數基金，例如VOO，就是追蹤標普500指數，如果可以承受風險，就可考慮QQQ，是追蹤納指的。

你可以以分注的模式，慢慢去入VOO，都是一個不差的財富配置。

------------------------------------------------

Q18818：

老師，我想請教下 我想係3年內做到財務自由 月入只有17000 流動現金只有10萬 現時同家人住公屋 供養母親 早前有買過股票 亂打亂撞都總算有賺 現時持有小米2手 現時輸緊 等回升在放

我用哂10萬現金去抽螞蟻集團都未必中到 我見人地買牛熊證 我又唔識 唔清楚。上網搵過下資料 但係都毫無頭緒

龔成老師：

財不人急門，你想財務自由，這當然是一個好目標，但都要用合理的方法，一步步進行，而不是盲目去衝。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，你現時應集中投資平穩增長股+潛力股，令財富增值。

但要留意，這不是炒賣，而是累積，是長線投資。

至於牛熊證，不要投資，輸多贏少的。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

同時，我強烈建議你增加投資知識，有知識就可以提高回報，你可睇《股票勝經》或上堂等。

月供股票方面，你可以考慮月供$5000。

盈富（2800）$2000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q18819：

你好，請問我第一次工月供股票現在揀什麼好優質股目標用年？感謝你嘅分享

龔成老師：

咁樣我簡單解釋下先，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

如果你無乜投資經驗，會建議你供盈富（2800）。

------------------------------------------------

Q18820：

sir..我9月失左業
我宜家好迷茫

我可以點樣去草多啲錢
我流動資金得2萬左右

我係咪要繼續腳踏實地搵份工
我唔識買即日個啲買入賣出既股票
我可以點做

有咩書可以幫我一把

龔成老師：

人生總有起跌的，最重要是低谷時，仍保持正向心態。

你這刻，最重要是令自己有穩定的收入，因此「找工作」是你這刻要做的事。

短炒買買賣賣，無法賺錢的，我過往做銀行、證券行10年，見果D短炒的客，就是輸得最多的一群！

理財要一步步，先有收入，再有儲蓄，有一定現金後，剩下資金投資，令財富增值。

你可睇：

《80後百萬富翁》
《股票勝經》
《財務自由行》

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18561-Q18580）

Q18561：

老師，我係進階班學生，想問下隻京東健康如何以數據分析呢?

網上資料如2019年市銷率，京東健康目標估值1560億港元，市銷率14.4倍；阿里健康25.8倍；平安好醫生22.3倍。所以數字上京東賺錢能力較強?

而營業額阿里又高過平安好醫生。我想知點解你會覺得平安好醫生較平衡。因為數據上佢又似三個中表現最差。

但如課堂你提過平安好醫生係市場先行者，同時擁有大數據庫, 這刻未賺錢因為支出資金投放於業務發展，所以有爆發潛力？請問分析時重點你會放在那幾點呢？謝謝

龔成老師：

其實要正式分析招股書，就有更多資料可以睇到，財務數據，發展等。

你利用市銷率去比較，都是其中一個估值的方向，不過，如果上述數字假設能反映出這3間公司的合理價值，反而代表市認為場京東健康賺錢能力及增長力，未必及另外兩間公司。

市銷率數字較低，的確代表較平，但我地分析時，要思考「為甚麼市場覺得佢比另外兩間公司較平？」

因此，一定要重點分析佢的業務，比較大家的經營模式那個較賺錢，以及增長力那個較強，如果大家都是接近，而京東健康較平，就反映佢的投資值博率較高。

至於你比較營業額，見到阿里（0241）又高過平安好醫生（1833），其實在這個行業，最重要是「長遠的潛力」，因為那間公司的業務較好，最好長遠吸引客戶，就能成為贏家，而這刻的數據未必是最重點。

在業務上整體來說，平安好醫生會較強的，當然，佢同阿里都會成為勝利者，只是平安各方較平衡。

------------------------------------------------

Q18562：

你好龔老師。想問吓：

1. 而家我月供港鐵金沙各二千同埋中生小米各三千都差唔多有兩年，而家個市升到咁就唔需要停一停留返多啲現金等機會呢？

2. 最近買左1337出既電競滑鼠要成千蚊，佢算唔算一間可以播種既公司呢？

3. 其實你做左股票分析咁耐，講真有冇人叫你收聲？

謝謝

龔成老師：

1）有些升得較多的，已經升過了合理區的，如小米（1810）、中生（1177），你可以減金額或停一停，餘下就保持進行。

適當儲下現金都是重要的。

2）雷蛇（1337）有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

3）我成日叫人唔好短炒，加上搶左某d多行家生意，同時有時會講某些問題上市公司，叫人小心老千股，我相信已得罪左好多人。

試過有上市公司直接比電郵我，反擊我的文章，不過就無叫我收聲。過往試過寫專欄，編輯唔比我登某些對某上市公司不利的文，怕得罰人。

其實直接叫我收聲的，就唔多，但我知出面已有人，暗中打擊我，例如在不同討論區等派打手唱衰我。不過唔緊要，我做好自己就得，有智慧的網友會知是打手，無智慧的網友，我都無辦法。

------------------------------------------------

Q18563：

你好，龔成老師！我係超級投資新手，之前從未買過股票！因為第一無興趣，第二，我自己無尼方面既認知，完全[0]概念，亦聽過好多人炒賣都輸多，所以更加吾敢掂同接觸，驚輸哂D$！

但我都深明靠打工無岀路，所以決定儲錢買磚頭較為實際，8年前我開始迫自己儲錢，最終係4年前成功置業一層細價樓 (現在仍然持有)，首期不多，做高成數按揭，因此租金吾夠cover供款，每月要補貼幾千蚊屬負現金流!

真的認識得老師你太遲，相逢恨晚！我在今年年頭才留意到你的貼文同文章，覺得你所講既野非常貼地，加上我本身都係80後，亦係公屋出身，所以感覺更加大，因為大家年紀相若，見到你甘成功，我都好想仿效你，就算一半都好，好想好想可以財務自由！

幾個月前，我開始買你嘅書睇(本人從中學畢業之後也沒有閱讀的習慣，可以話係厭惡)，我都唔敢相信自己會睇書！

但我明白唔改變自己，吾去增值自己增加投資知識，係無可能達致財務自由！所以我迫自己睇你既書學股票，希望做到股樓並行，因工作關係，一直就不到時間去上你股票班堂，唯有睇書學習住先！

疫情關係，被迫停工前後足足3個月，收入大減所以暫時未入市！好後悔錯過咗之前好多入市良機(前幾年既大牛市同今年三月見底既熊市反彈)，唯有急起直追，靜靜再等待機會！

而且我覺得現在個市好難入，好多新經濟股都好貴，你介紹嘅潛力股都倍升左好多，所以我唔知從何入手好！
希望你可以俾少少意見我，指點迷津

多謝你推介好書同你所寫的實用書籍，獲益良多

亦好佩服阿Sir你每日都耐心回答網友問題，有問必答！我一定繼續支持你

龔成老師：

第一，你要了解自己的財政、風險承受程度、投資目標等。

然後就設計一個長遠的財富比例方向，例如潛力股比例，平穩增長股比例，如果你投資知識、經濟唔多，就唔太建議投資潛力股，又唔只投資少少就算。

這刻，我會建議你先投資優質，平穩增長類股票。

第二，你如果收入不穩，中短期有風險，就應該多留現金，我地投資要攻守兼備，你做好防守先，之後先進攻，投資只能動用「閒錢」。

例如你擁有$20萬，可能要留$8萬作備用。餘下$12萬投資，而這$12萬並不是一次過買入，而是分注進行，同時要留一定的現金。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q18564：

你好呀成老師，我係最近先開始學投資既新手，而家二十七歲，最近開始追讀你既文章 我自己整左一個投資組合想請教一下老師

現持有
9988 阿里巴巴2手 @279.5=$55900
388 港交所 1手 @380=$38000
3331 維達國際 2手@25.5 =$51000
778. 置富產業 1手 @6.81 =$6810
410 SOHO中國3手@2.47=$3705
Total cost= around 150k
可上資金=400k

現時的投資粗合會否缺乏平穩增長型股票和太高風險嗎？

手上的股票和價位適合長遠地持有嗎？如果想增加平穩收息嘅股票應該加入那一種股票？Thanks a lot

龔成老師：

現時持有的股票，基本上無太大問題，你可以長線持有風險唔算高。

你27歲，其實唔需要加入太多收息股。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

27歲這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以好好利用持有的$40萬，但這刻大市未平，因此不能一次過用，要分注，同時留現金。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18565：

老師你好，屋企人好耐之前買咗以下股票，想問係咪應該止蝕轉去其他收息或有潛力股？想請教應該點部署？

806 （$7.06 買入）
2600 （$5.75 買入）
604 （$3.6 買入）
665 （$5.7 買入）

龔成老師：

首先你地要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

惠理集團（0806）質素中等，這股唔建議持有太多。

中國鋁業（2600）質素一般般，長遠宜賣出，可以等有反彈時賣出。

深圳控股（0604）可持有。

海通國際（0665）質素中等，這股唔建議持有太多。

之後將資金轉去盈富（2800），亦可考慮：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q18566：

龔sir，本人今年36歲，收入尚算穩定正識$22000
Pt $3000-6000，沒有積蓄，一家三口
租屋$8000，扣除所有開支機本上入不敷支。

負債30多萬，仲要還多3，4年。
手持788 152000股
136 32000股
1762 4000股

買股票經驗1-2年，都係學人炒炒賣賣，都輸左20多萬，成日都想追返。

自從一生第一次投資學人炒仙股輸左15萬，我都有諗我輸左係咩地方度。直至有一次係屋企搵到你第一本出嘅書80後百萬富翁，先開始去了解金錢係咩，可謂資產，可謂儲蓄，係思維上開始有所改變，先多謝你對我的啟發！

只可惜自己賭仔性格，成日都想搵快錢，所以一路都係輸多贏少。

我好想脫離現狀，有時候都會覺得好累，所以想請教你，我應該如重整我的理財。
請指點迷津

龔成老師：

理財要一步步，不能急，你最缺的就是耐性，你要學正確的理財方法。

首先，心態上唔好成日想「追翻輸的錢」，理財要合理，要一步步。另外，要明白投資方向，唔好再炒炒賣賣，要做好配置。同一隻股唔能夠太集中。

由於你現時有負債，因此唔能夠太進取，加上你有家庭，有負擔，理財上要小心。

你這刻要做的，就是收支平衡，這是重要的第一步。

除增加收入外，控制減出都重要。

第二，你要持有基本的現金，你唔能夠完全無現金。

中國鐵塔（0788）有質素，但太集中。

恒騰網絡（0136）有危有機類。

現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，會爆得好勁，但失敗，會跌得好勁。因此，長線投資不是不可，但唔建議你持有太多。

萬咖壹聯（1762）不過不失。

佢幫助企業與中國智能手機用戶建立聯繫，向尋求移動廣告、網絡視頻產品分發及遊戲聯運服務的行業客戶提供安卓內容分發服務。

集團專有的平台，設有數據挖掘、數據分析及場景分析等技術，以定位於智能手機用戶，並通過智能手機製造商自帶移動應用程序及用戶界面發佈行業客戶的個性化、實時及基於場景的內容。

不過，業務就較為波動，過往雖然有增長，但近年的中期業績出現生意與盈利下跌的情況。業務波動。

這類股有危有機，可能有潛力，但唔建議你持有太多。

------------------------------------------------

Q18567：

龔成老師你好 近一年於股市因不了解衍生工具加上貪心想賺取急財

輸了全部資產接近30% 請問應該如何調節和建立心態呢？ 可以如何回本...

另外想問 我早前在高位@$26買了小米的認購證（三月到期） 請問建議擺多一陣等佢升番嗎？ 現時已蝕5-60%

龔成老師：

我20年前，都是短炒者，玩衍生工具，用左幾年，輸足幾年，之後長線投資，就開始不斷賺錢。

之後做銀行同證券行，見大部分輸錢的客，就是玩衍生工具的一群！這是我10年見到的情況，這是行內的秘密，根本大家都衍生工具一定輸，但業界一定唔會講！

這是好多投資者都會經歷的一課，發行商食價多到你唔信，有人會醒，有人唔識醒。

你要立刻停止再玩衍生工具！

下一步，就是好好學習，正確的理財、投資方法，明白理財是一價長期配置的過程，並不是炒賣。

------------------------------------------------

Q18568：

Hello 龔Sir，我係一個大學生，呢兩個月先開始接觸股票，想問一啲基本問題同意見

1. 我宜家做PT有$3000左右一個月，我打算開始月供盈富2000同港交所1000，請問咁嘅組合有冇問題？

2. 我本身仲有儲到幾萬蚊，打算用2萬投資，我會有咩選擇或者選股技巧？同埋普遍長期投資係幾耐叫長期？因為見到好多人短炒，但自己試過好似唔work...

麻煩晒你呀！Sorry問嘅問題可能好無謂

同埋想問埋月供要去到咩情況會選擇停供同放？麻煩晒！

龔成老師：

1）可以，這些都是有質素的股，你可以長期進行月供。但建議你手上點都要有基本現金，唔能夠100%股票。

2）短炒無用的，我20年前試過，你用長線投資，原理就是將現金轉為真財富，長期持有。

我會建議你留基本的現金，等到大市有較大下跌先用，唔好太心急。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

3）如果該股一直都有質素，有增長力，可以長線，甚至永遠持有。

月供股票一般5年以上。

如果這股已貴，又或對你組合佔比已夠，就可以停。到倍升，明顯貴時，可考慮賣。

------------------------------------------------

Q18569：

你好，本人今年43歲，持有以下的股票，有些已經持貨多年，一直不捨得沽。由於好擔心滙豐持續下跌，勁心痛，我是否應該沽出一部分，再重新作投資？

0005 買入$72.5 持 4000股
945 買入$252 持 700股
2628 買入$35.8 持 2000股
6886 買入$24.8 持 400股

由於經常坐艇，所以盡量不夠膽買細股。我有點想將部分沽後入盈富或電能，你認為值得嗎？希望你能指點一下，感謝

龔成老師：

基本上，你上述持有的所有股票，都是金融保險證券類，當中都有一定的相關性。

我地理財，要設計一個適合自己，優質股，以及平衡的組合，同一股不能過多15%，同一行業不能多過30%，雖然嚴格來算上述不是同一行業，但對金融與投資市場的相關性高，因此，合共佔比去到40%已是上限。

你賣出部分持股，轉其他，是大方向。轉盈富（2800）及電能（0006）是可以的。

這是大方向。

問題是如何轉，因為你最大問題是匯豐（0005），而這股近期股價較弱，這刻賣出未必是最好時機，相信已中短期仍一般，但如果見到有反彈時，其實應減少少先，然後等到過1、2年，經濟好翻D後，再減部分，目的是令這股佔你合比例，去翻合適水平。

------------------------------------------------

Q18570：

龔Sir你好，你嘅書我已經買左好幾本，遲下會再上埋你啲堂，因為你徹底改變左我人生。

今年三十五歲，跟隨你嘅指導，數年前由一個月光族變成今天都叫做有三十五萬現金同二十五萬股票嘅廢中，老實講對比起你，屋邨大變成千萬人士，中產家庭出生嘅我真係自愧不如。

情況如下:

現時收入四萬左右，可儲兩萬，月供一萬至萬二左右，視乎大市再改動個別股票月供金額-
1. 中電 1000
2. 中煤 500
3. 港鐵 1000
4. 港交所 500
5. 阿里巴巴 1000
6. 騰訊 1000
7. 越秀REITS 500
8. 冠君REITS 500
9. 宏利 500
10. 匯控 500
11. 恆生銀行500
12. 銀娛1000
13. 比亞迪1000
14. 盈富 500
15. 恆生ETF 500
16. 長建 1000
17. 電能 500

若想在四十歲擁150萬，該如何處理?
請龔Sir繼續引導!

Thanks so much Mr Kung!
永遠感激你的小弟上

龔成老師：

第一，你持貨太散，隻數太多，這會出現管理上的困難，我地買入股票，要經過仔細研究，買入價要持續檢討，你持有太多管理較難，要調整翻。

第二，你唔應該投資太多收息股。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你35歲，應該以「增值」為主。

上述很多銀行股都只是收息股，無乜增長力，可停。部分公用股雖然有質素，但同樣未必適合你這刻，可停。

另外，我會建議你加大盈富（2800）金額。

同時你這年齡，加多少少潛力股都可以，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），你可從中選股，但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q18571：

龔老師你好！
40歲， 女性，單身，月薪$33K， 沒有物業。

上年才接觸股票，一直都係向保險公司買儲蓄保險，儲蓄基金一筆過基金同MPF自願性供款

現有資產：

股票:
HSBC(00005) 4800股 （平均$62入）
領展(00823) 900股 （平均 85入）
阿里巴巴(09988) 100股 （180入）

保險：

Plan 1: 月供保險（人壽+ 醫療+少少儲蓄成份）
Plan 2: 月供保險（人壽+危疾+ 少少儲蓄成份）

基金投資：

Plan 3 ：一筆過基金，東歐基金買2013年用$80K買一手， 但到宜家都仲蝕緊， 我應唔應該放咗佢或轉買其他基金？

Plan 4: 之前月供額外強積金計劃，已有$90K (現在沒有再供，放係等價格上升，由2018年停供一路放要宜家都有25-30%升幅）

Plan 5: 一份剛剛供完的純儲蓄保險：全數供了$130K (要放多三年才開始break even ）

Plan 6: 另外有一份月供$5000 純儲蓄保險，仲要供多四年，供完都要放多幾年才會break even , 之後才收息。

Plan 7: 一份要供30年的基金plan : 2006年開始月供$1800， 大約仲有16年才供斷。呢份單由2008年開始一直都蝕，直到今年才有升幅， 應該退保攞返出來嗎？

現金:

外幣戶口： $150K
港幣：$500K

扣除必須開支同現在仲要借的保險同儲蓄計劃，我大約可以額外攞多$9000儲蓄

目標：

好想買樓 （好想擁有自己的小天地）
三年內將所有資產總和增加3倍，可行嗎？會否不切實際
希望每用被動收入有$30000

我應否終止plan 3, plan 4 同plan 7 ，然後買股票嗎？

我已買了你的股票勝經，還有什麼書可以介紹？

謝謝你抽空閱讀我的提問。
一位讀者敬上

龔成老師：

我地理財，要攻守兼備，要建立一個平衡的財富配置，同時，你現時年齡財富仍有增長力，可投資一些平穩增長型的工具。

你上述買了大多保險儲蓄計劃，其實應該調整翻。

另外，匯豐（0005）只是收息股，以你年齡不應太多，同時你唔應該同一隻股票，太過集中。

首先，你要想清楚自己是否買樓，目標是幾時買，起碼有大約的方向，因為這個計劃，會影響你之後的配置。

如果你打算1、2年內買，你就要開始準備現金，賣出部分保險儲蓄計劃，持有現金，等機會買樓，同時唔好在這段時間買入太多股票。

相反，如果你打算3年後才買樓，你現時就要投資翻一些股票，目標是平穩增長股，等你財富有基本增值。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

另外，你可以睇《80後百萬富翁》《財務自由行》，之後再睇其他。

------------------------------------------------

Q18572：

Hello~成哥~想問下你意見呀!
我27歲,手頭上有以下股票,
（1） 303-偉易達/2手/$51
（2） 857-中國石油/1手/$3.41
（3） 788-中國鐵塔/1手/$1.6
（4） 405-越秀房託/2手/$3.62
（5） 1830-必瘦站/2手/$2.47
（6） 152-深圳國際/1手/$12.66

請問成哥,我D股票係咪優質股呀?算係水桶幾呀?可長線嗎?

我現在可用現金有5萬,應唔應該加注係呢幾隻股到呀?

定投資其他好呢?我有留意阿里同小米~但現價有點高~可入嗎?

唔該成哥!!!!

龔成老師︰

水桶1︰(3)。而阿里（9988）、小米（1810）都是
水桶2︰(2)(5)(6)
水桶3︰(1)(4)

上述都是有質素的。

我地選擇投資邊個水桶時，會因應自已架年紀。如果你年青，應集中在一些有增長力股（水桶1和2）。相反，你將近退休，但應該集中一些收息類股份（水桶3）。

你可以因應翻自已年紀，去慢慢調節。

阿里巴巴（9988）和小米（1810）現價計都係偏貴，要回2成多才算合理區，到時才用分注模式去入貨會較好。

------------------------------------------------

Q18573：

成哥你好

1）請問638，你點睇。。我係你舊生，跟你教我知識同點分識同上網篩選，搵到依隻，問你意見如果

2）638，成交量超低，有時係無，跟好定唔好？

3）如上，有638既貨，但市場又零成交，甘有貨係身放唔放到貨出去架？

唔該成哥。

龔成老師︰

1） 建溢集團（0638）主要從事設計、製造及銷售電器及電子產品、摩打驅動產品、其他製造業務，以及房地產發展。

佢都有一定業務，但睇翻佢過往幾年，盈利都幾波動。再加上負債上再有點偏高，都係會被扣分架地方。

整體而言，質素只是中等。

2） 若成交不多，代表股票流動性低。買賣差價一般會較高，影響到你利潤。

3） 如果成交量零，唔一定代表你放唔倒。有機會只係"買家最高買入價"和"賣家最低賣出價"依然有差距，所以未能成交。只要你賣出價，能配合倒買家出價要求，咁就會成交倒。

但此股成交量好低，加上市值唔大，個價好易會出現較大波動。唔建議持有太多此股，同時你要明白當中風險。

------------------------------------------------

Q18574：

老師你好，想問下香港電訊（6823）為何股價跌了咁多？

我在11.64價位買入作收息用途，但見最近股價跌到10.40之下，有點擔心，請老師指點一下，謝謝。

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

香港電訊（6823）在2020年中期盈利出現下跌，由於疫情關係令各國實施的旅遊限制及其他預防措施，導致漫遊收益大幅下跌。

但這個只會係中短線影響，長期業務穩定，加上用100%派息的政策，雖然增長力不強，但類收息，這股絕對不錯。

暫時睇唔倒佢長線質素有大改變，長線持有無問題。

------------------------------------------------

Q18575：

老師 想問下8153法諾集團 我$0.25 買入160000股
應該止蝕嗎？

呢隻股算唔算是炒股？
感謝你耐心回答我們

龔成老師︰

法諾集團（8153）主要於中國從事提供數字電視廣播和廣告服務；提供按揭貸款及短期貸款；證券投資及買賣。

見佢之前出現過"四合一"、"十合一"，係典型財技股。

過去多年，核數師意見都係"不表示意見"，代表佢盤數好大機會有問題，我建議你盡快沽出較好。

------------------------------------------------

Q18576：

你好龔sir，閱讀過你的著作後獲益良多，對財富管理有了基本的概念，非常感謝！

我今年25歲，持有一層7.2M的新樓 （借銀行4M，每月還14.5k），下年年尾才收樓，所以每個月只能騰出8000-10000作儲蓄投資。下年收樓後放租，應該可以騰出15000-18000作儲蓄投資。層樓將來會收回自住，現在和父母同住。

另外
- 180k cash放在高息戶口 （H按）
- 150k 放在股票
- 由於工作性質，人工雖然穩定，但不會上漲，一定跑輸通脹的。
- 我可以承擔中度的風險。

1） 以我的情況，你認為只買平穩增值股可以在50歲前達到財務自由嗎? （我暫時的財務自由目標是30k一個月）

連利息，年回報有10%的可能性有大?

2） 我預計租金回報率有2.66%，利息cap是2.35%，但扣除雜費後每個月仍然是負1k現金流，你看好康城區的發展及其租金升幅嗎？

需不需要換樓提高回報率呢？

以現時的政策，幾多年後買第二層物業較好，還是買股票的回報率會更好呢？

3） 現持有
兩手2800 （25.04買入，佔倉17%）
兩手1928 （34.3買入，佔倉18%）
一手823 （62.85買入，佔倉5%）
一手9988 （267.8買入，佔倉18%）
兩手1137 （9.64買入，佔倉14%）
美股 （佔倉13%）

非常感激和佩服你為我們解答疑難，改變到很多人的生命，在此祝你生活愉快，身體健康!

龔成老師︰

1） 以你年紀計，係財富增長架黃金時期，唔應該咁保守。你應用"平穏增長股" + "潛力股"，去做一個的組合。現在你每月儲到的錢，可以5成去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、粵海（0270）、領展（0823）、希慎（0014）、太古地產（1972）或潛力股︰比亞迪（1211），中生（1177）或福壽園（1448）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

如果想退50歲有3萬現金流，以5%股息率計，需要720萬資金。

以恆指過去年平均回報10%計（連股息再投資），你每月投資$15000，25年後大約會增值至1700萬，故這樣安排相信很大機會達至你的財務目標。

2）坦白講，當區大多供應，投資價值不算高，不過，我唔建議轉來轉去，因為香港買賣物業成本高，你照持有先，反正啟德發展會增加就業機會，加上將軍澳區有新路出九龍，因此並不是完全負面。

另外，第二間物業，最好跟今年相隔5-8年左右，會較理想。除非中間出現很吸引價錢，否則相隔些時間，會較為穏當。

3） 這個組合可以，但留意翻香港電視（1137）業務雖有前景，但有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。疫情過後的增長力會否減慢？另外就是估值方面，我都好難講這刻的估值，只能話唔算平。你可以持有，但唔好太大比重。

------------------------------------------------

Q18577：

老師，本人30歲，月入2萬，平時都有儲錢習慣$5000左右，前排先開始研究股票，最近買左80後百萬富翁，令我對資料產生興趣。

1.問了解下月入股票可以減少風險，但同我係合理位置/低位買貨有咩分別？

2.優質股票我當有10手，佢高位時我放一半或2/3，等佢回落我再入貨，不過最少擁有1手就可以？

3.本人有1810 $19.45 三手，1928 $34.55 一手，應該放定留？

4.點解睇一隻股票既合理位置？
多謝老師指點

龔成老師：

1）例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

因為你自行買入，未必知這刻是否合理，事後睇可能是高位，如果用月供的策略，就可以減少一次過在高位買入的風險。

2）都可以，但不建議賣出太多，因為你永遠唔知佢個價會唔會跌翻落去，因此，我一般只建議賣出一半。

3）都是優質股，可持有。唔需要理中短期股價波動。

4）要知合理價，就要計企業的價值，但過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q18578：

龔成先生你好,係上年好早時間唔小心入左少少股一隻叫00996 嘉年華國際，估價已去到0.01所以不能出售，近兩日有新聞話會再重組

但新聞內容唔係太明白，我
地小股民有啲咩要注意？？thank

龔成老師：

初步睇佢的通告，將會進行25股合1股，因為現時股價太低根本無法進行買賣，佢合股就可以令股價增加，從而可以買賣。

舉例說，你現時持有10000股，現時股價0.01。

佢合股後你會變成持有400股，而股價會上升至0.25。當然如果佢現時的實質價值低於0.01，到時的價值都會少過0.25。

------------------------------------------------

Q18579：

HELLO 龔成,朋友介紹我睇你的PAGE, 發現很有啟發性, 有一些問題想你俾下意見請教一下, 多謝!

我依家36歲, 月入$42K, 每月可儲約$13K. 兩年前因搞小生意損手失掉約30萬積蓄.

之後重新再儲錢, 依家每月供緊 $2K (0003) 同 $2K (0006)供左差不多兩年. 再有2手823. 現金大概有8萬
想問, 月供的組合可以嘛?

還是要加碼/換其他組合
亦想早日儲到100萬去為屋企裝修, 組織小家庭等.感謝!

龔成老師：

以你的年齡，其實可以投資高少少增長力的股票。

你現時月供，領展（0823）無問題，但另外兩隻都只是收息股，增長力不強。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，你之後可以將資金，月供盈富（2800）及其他較有少少增長力的股。

------------------------------------------------

Q18580：

老師 1076 呢隻仙股我留意左好耐 佢已經系0.01價位好耐 但每日既成交量都好多 系咩原因？

龔成老師：

唔清楚，博華太平洋（1076）無研究過，但佢年年虧損，投資價值不高。

你永遠唔知成交多的原因是有人收貨，還是造假像。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。