因為之前係網上分享過有關性小眾嘅議題，今日受邀請去學校做有關性別身分認同嘅分享，係開準備會議之前，老師問我有無咩話題想特別探討，或者想係咩角度去切入今次嘅話題，我先諗起其實以我對自己嘅性別認同、性傾向同過往嘅交往經歷，我都係一個so-called「直女」，作為一個分享者身分其實好似有啲尷尬，而唔少人都會問我點解對呢個議題特別感興趣，暫時嚟講我只係諗到身邊好多朋友都係性小眾嘅一部份，見過佢地受到不公平嘅待遇甚至連基本嘅人權都得唔到嘅時候，同理心難免作祟，慢慢越睇越多資料就越踩越深到依家可以做埋分享。 而係近排，有朋友同我傾開睇新聞，發覺好多新聞我都係後知後覺（平時網絡上好多搞笑片段同討論區潮文唔係佢講我根本聽都未聽過），問我點解唔會想知道個世界每日發生緊咩事㗎咩，我當下答佢唔係唔關心，但係唔會特別想知，所以無刻意去搵嚟睇。佢話我好奇怪，關於性小眾同平權嘅嘢咁上心，點解其他新聞就可以咁無所謂，然後經過一番爭論之後，發覺到自己嘅同理心好窄，正正中了傅佩榮解讀老子「其出彌遠、其知彌少」的說法：一個人不斷去追尋某樣東西，越走越遠，越走越深，該興趣和知識就越來越集中，然後他所關注其他事物的範圍就越來越狹窄。專，係咪一定係好？當知識係無限，人嘅關心同能力嘅有限嘅時候，精力應該如何去分配？ 我暫時未諗到答案，而的確好多嘢我地唔需要作為當局者（得益者/受害人）先可以或者有權去關心，所以我被指出問題後，又無力抗辯，代表我不再無知，為咗正視呢個問題，依家實行緊養成每日至少都要睇一次即時要聞嘅習慣，而咁有心睇到呢行字嘅你地，代表你地都不再無知，不妨企後一步睇下自己有無因為太專注一樣嘢而忽略咗身邊發生嘅事，做一個短期嘅小改變都係一個不錯嘅選擇 :)