【龔成問答信箱】（Q22141-22160）

Q22141：

老師你好，想請教一下。我手上有9股均價$600的騰訊。最近跌到得$4xx。我係咪應該止蝕再係4xx買入月供？咁我個價就可以貼市d。

定應該繼續供？我計過要平均返個價去4字頭都要買入超過一手先得。求指教，謝謝

龔成老師：

騰訊（0700）可以持有，你這樣止蝕再買翻，是無意思的，所謂「個價就可以貼市d」只是一個左手數與右手數的問題，你絕對唔好比「買入價」限制左你的投資策略。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22142：

想請教一下，新手,現持︰

中銀03988,8000股，平均買入2.8蚊
盈富基金2800，一手，買入28.42
越秀服務06626,二手，平均買入4.9

這樣的組合太保守嗎？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，算係一個偏保守的平穏增長組合。若你係中年人，或者投資取態較保守的人，這個組合係可以。

但若你係較年青，應以增值為主。中行(3988)只係收息股，增長力唔高，唔係咁適合。你可以用以下「平穏增長股」 + 「潛力股」，去取締中行。

如果你係偏年青，建議用潛力股，去增大翻個組合增長力。相反，你係近中年，可以用平穏增長股。

未來時間，你新投資都可以參考以下股票，再按你年紀和風險承受能力，去作出配置。

例如潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22143：

龔成老師你好，我同老公三十幾歲, 有2個小朋友。2019年賣樓, 搬番同屋企人一起係九龍住。

賣樓獲利約有300萬, 我地一半放入股票市場, 希望2-3年後可以買市區樓。

暫時買左以下股票, 想請問要唔要調整下? 同埋有咩股票推薦加入組合呢? 唔該哂!

匯控 (0005) @$40.48 有6400股
置富 (0778) @$9.12 有1000股
中銀 (3988) @$2.80 有160,000股
騰訊 (0700) @$610 有200股
潤泥 (1313) @8.66 有10000股

龔成老師︰

由於每個人都有「住」的需要，因此，長遠點都建議你買翻自住樓。

華潤水泥控股(1313)和騰訊 (0700)都有質素，但佢地波動性較大，你距離再買樓只有2-3年，時間唔算長，故不宜持有太多。現貨可持有，但就唔好再加注。

另外，你組合好集中係銀行股，咁會出現過度集中性風險。當銀行業有大問題時，你成個組合就會有重大影響。

因此，你要減持這2隻股票，令佢地比重，只佔組合2-3成。取回資金，可以分注買入以下股票。

若你想增長力高D(但風險都會較高)，可較集中平穏增長股。若你想較保守，可以集中係收息股。

收息股目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

到你置業前半年左右，你就要開始慢慢估貨。唔好等到要買樓一次過沽，因為無人知個陣時會係乜野價位。因此，你要慢慢沽出持貨，去平衡價格波動的風險。

------------------------------------------------

Q22144：

你好，如果扣除家用每月剩$13000（未扣其他日常開支），想開始投資有咩建議？暫時只係抽過ibond 冇其他投資。謝謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22145：

龔sir 你好,首先,真心好多謝你, 分享小小故事

本人18年創業失敗 , 負債30多萬,當時月入19000,每月還款15000,每日早餐食25元的燒味飯飽肚,中午不吃節省開支,晚餐再燒味飯 ,斷絕娛樂支出,

咬緊牙關渴望用最短的時間還清債務 終於在20年年初還清所有債務

在19年年尾,生活壓力無咁大的時候,購買了你的第一本書, 80後百期富翁 ,當中的心態對我影響好大,讓我確立財務目標,渴望掌控自己的未來 ,

21年年初更成為你倍升股的學生, 對財富之路的了解更多 ,真心再次多謝你

本人今年29歲 , 住公屋, 月入30000 ,現時每月存款18000, 現有資金60萬 ,預計2年內會存到人生第一個一百萬 ,思考未來計劃中

本人與父母同住公屋 , 由於父母年齡已過65歲,短期內不會被房署收回公屋 對未來置業計劃迷茫,未知方向,想你比小小意見

1)買私樓

與父母同住公屋 , 購買私樓出租, 家人作擔保人購買 500-600萬的私樓,做9成按揭 月供21000左右 , 放租大約可收回11000左右租金,

若有租戶的情況下實際每月支出大約一萬左右

2)綠表買居屋

把公屋交回,換購市區居屋 , 每月供款1萬8左右, 但就變成自住物業...雖然有升值空間,它日可出售套現, 但無法出租增加資金收入...

希望龔sir比比意見, 應該如何計畫 , 當有明確目標後,一定將會前進得更快更明確

最後再次祝你 身體健康 , 更早的達成你的目標, 然後開開心心住入你最早的目標

龔成老師︰

你唔需要太急考慮投資物業，現時租金回報率，唔算係好高。投資值博率計，先投資在股市，效益相信會較好。

你可以投資「平穏增長股」和「潛力股」。你每月5成儲蓄，即是用$9000做月供。其餘先儲起，用一邊月供一邊儲蓄的策略。

由於你已經上過股票班，投資上會有一定知識，潛力股可以佔組合約4-5成。但若你覺得，投資知識都未算掌握得太好，或者對這些股票唔係太熟識，可以調低個比重至2-3成。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到了你真係有實際需要，要去購買一間自住樓時候。我會較建議買居屋，雖然佢投資價值不及私樓，但由於佢樓價私樓平。變相你可以空多更多資金，去投資優質股。

當然，因為係自住樓，最重要都係睇你「長線」生活所需，同埋是否可以做到「供得起」。只要做到這2點，基本上就無問題。

而你分享的這個經歷，對很多投資者和創業者，都很有教育意義。好多人都唔識面對失敗，不懂如何走出和面對逆境，你是一個很好的正面教材。

但你要記住，要留住財富，除了「知識」外，「健康」都係好重要。所以，斷絕娛樂和不必要開支係可以，但盡量少做一些會影響健康的事。影響到健康，一切都會變得不值。

加油!

------------------------------------------------

Q22146：

龔sir,你好 今年27歲，現時持股狀況如下，大部分跟龔sir你推薦都升 但自己高位入了其他 變相冇賺冇蝕….請問6919應沽出嗎？

剛忍痛沽出[email protected] 放 出2手 當時買入價是32.5.

以下股票都是一手買入，現想進行月供股票$8000分散風險，$3000小米，$3000金莎，$2000盈富基金 請問組合可以嗎？

No. 數量 平均買入價
386 10手 3.354
590 2手 16.1
2800 3手 24.6
1928 3手 31.4

1972 2手 19.5
788 10手 1.757
1810 2手 1810
6049 1手 35.5
6919 10手 32.5

龔成老師︰

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

此股都有投資價值，但不宜太大注。若你持貨不多，可以守。

新東方在綫（1797）都有質素，但政策風險影響較大，不宜大注。

其實你持有股票，都係有投資價值。但較大問題係，你好多股票都係高位入貨。因此，我建議你暫時維持用月供投資，去減少你買貴貨的風險。

持股中，中石化(0386)增長力弱，以你年紀，不宜持有太多。你可以沽出部份，換至其他較有增長力的股票。

而月供方面，選股係可以，但我建議用指數基金做主力，資金分配轉為指數基金$3000、金沙(1928)和小米(1810)各$2500，咁會較好。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q22147：

老師：你好！有問題想請教你，首先自我介紹下，我同先生都是50幾歲，有一個仔和女，我做兼職每月3000元左右收入，先生每月約有18000元收入，

兒女還在讀書，每月交租12000元。現時有300萬現金，眼見資金越耒越少，心情難受，近排同先生開始學投資，

買了銀行安聯收益及增長基金（50萬）、純債卷（50萬）、農業股（50萬），請教我如何運用現有資金投資，目標是想草錢買層600萬左右樓住，

望老師能忙裡偷閑解答，萬分感謝！

龔成老師︰

雖然你地5X歲，但購買$600萬的物業，都可以做到按揭，當然成數未必高，以及年期未必長，因為你地現時月入不算多。

如果要累積多幾年錢先買樓，如5-10年，你地能按揭就更少，但如果現時短期內無法買樓，都無辦法，要慢慢儲錢進行。所以，我就當你地能按揭的金額好低或無按揭，去進行分析。

當然，當你地不斷儲錢時，都可以了解下樓市，不一定儲到足夠的數先開始，中間可以調整。

首先，大方向要累積到較大金額，我先以這個假設作分析。

若果係希望將300萬現金，增值去買600萬的物業，重點應放係增值之上。

但由於你和你先生，已經係50幾歲，都比較接近退休之年，係做銀行按揭上，會較困難。因此你需要累積更多資金，甚至係用全樓價作目標，去作準備。

以你年們年紀，投資選項上要保守少少。我建議你利用平穏增長股，作為增值平台。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只是合理區，你現有可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

若你將來子女畢業，開支無咁多的時候，每月若有空出的資金，建議你用這筆錢，去做月供股票，去加快你增值速度。

策略上，你每月先用5成儲蓄做月供。其餘先儲起，用一邊月供一邊儲蓄的策略。餘下一半儲蓄，就等出現大跌市時出手。

而你現時基金和股票，可以審視翻佢地增長力和質素，去決定是否持有。債券只係產品，主要係提供穏定現金流，無增長力。用於增值，就唔係咁適合。

我假設投資回報有8-10%（連股息再投資），你現時投資$300萬，10年後大約會增值至650-780萬。

但你唔好因為見已多於600萬，就覺得足夠。因為置業時，還有其他連帶成本(如稅、律師費、裝修等)。

再加上，到時已到你們退休之年，你們係需要額外一筆資金，去投資收息資產，為自己創造現金流，去支援你退休開銷。

假設你希望退休後，想每月有1萬蚊現金流收入，以股息率6%計，你就需要本金200萬。你可以用此作為參考，去計劃你未來10年投資大計。

------------------------------------------------

Q22148：

成哥，其實我真係想上你既股票班，但我又行動不便

坐車點對點我都得既
因為真係好想學點估值
而家蠻中中咁買股
好蠢

係咪上完堂
自己肯學會學識？

龔成老師：

完成課程後，你會掌握：
☆自己設定投資策略
☆掌握資金分配
☆低風險爭取合理回報方法
☆能分辨股票優劣
☆為企業優質度評分
☆懂得自行尋找優質股
☆掌握5種選股方法
☆掌握大市買入及沽出時機
☆能評估現股價處平或貴
☆掌握企業估值
☆懂得閱讀企業年報
☆懂得分析財務報表

如果你決心足夠，我相信你總會方法去到上堂的，我未搞澳門股票班前，每一期都有幾個澳門過去的同學，每次上次，由澳門來回香港，8堂如此，每次來回花的時間要4小時，我相信你花的時間，應該不用這麼多。

唔好比一些小問題，影響左你追求進步的心，加油！

------------------------------------------------

Q22149：

您好 龔老師：我初學投資購買股票 想請教您

有穩定工作 每月收入約$45000，租金$10000，還貸款$3750（尚有12期）、保險每月$1800

單親家庭 有1小孩（9歲）、請問我應如何投資好呢？

先謝謝解答

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀，應以增值為主，建議你用「平穏增長股」 + 「潛力股」作組合，去創造一個增值平台。

若你偏向較年青，潛力股可佔3-4成。但若你偏向中年，潛力股佔1-2成好了。到你有一定投資經驗，潛力股比重可以調升翻少少。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

策略上，現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22150：

老師你好,唔好意思我想問下1177, 9988 & 941邊隻股票投資較好。

另外想問下我本身用左10萬買左銀行投資plan要放15年。

另外股票方面現在941有2手,9988有1手。本身喺Manulife買左每月供基金下年11月到期,嗰份基金現時大約$200,000.想用多10萬投資,

唸緊買股票定係投資喺Manulife有隻收益及增長基金每月派息大約6-7%. Many thanks

龔成老師︰

你上述3隻股票，都係有質素。但以你38歲年紀，投資應以增值為主。

中生(1177)和阿里(9988)係潛力股，適合你，現價合理，可以分注入市。但中移動(0941)只係收息股，增長力欠奉，對你就未必太合適。

至於一隻基金是否值得投資，你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

以每月派息7%計，勉強算可以。但你要了解翻個派息是否保證，若非保證﹐長線計投資價質股，相信會較高值博率。

------------------------------------------------

Q22151：

老師我有一個難題唔知點做！我媽媽有一層45年舊樓一向放租，近年疫情長達十年租客唔租，因為多年無維修，現在打算大裝修再放租，其實我咁做啱唔啱，

定係有其他方法，保障我媽媽收入。希望老師能幫我分析一下。謝

龔成老師︰

其實你要考慮翻個物業長線投資價值，因為本身個樓齡都略大，長遠維修成本會增加，會有機會慢慢蠶食租金回報。

除非，係一些大型屋苑(特別係藍籌屋苑)，或者你相信裝修後，租金回報會唔錯，而且可以維持一段較長時間。

否則，你要計劃下將佢轉換成其他資產。個新資產，可以係收租物業、收息股或者其他收息產品，都係可以。

若你不打算再新置收租物業，你可以考慮以下收息資產，大致可將資金分成4部分，平衡去分配就可以。

第一部分投資收息股，你可以建立一個收息股組合，你可考慮港燈(2638)、香港電訊(6823)、工行(1398)、建行(0939)、置富(0778)、陽光(0435)等，大多有5%股息或以上(你可睇下我本《50穩健收息股》當中仲有好多)。

你可以用"分注"形式，慢慢儲貨。平均的投資這些股，除了可以得到穩健的收息收，同時可有效的分散風險。這些股票唔洗理佢股價波動，只要一直持有收息就可以。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。另外，你亦可投資銀行低風險類的產品，你可自行到銀行了解下，總之是「低風險，持續現金流」的。

第四，持有現金，這可以為你的後盾，以備不時之選。同時可以等投資機會。

------------------------------------------------

Q22152：

早晨你好，因為我不太懂投資，所以我想分散風險，打算分三筆錢，買入以有關三個板塊「電動汽車、醫藥、科技」的etf、指數或基金。

應該點買？有推薦嗎，或者哪裏可以找到？

龔成老師︰

若你對個別行業有信心，但又不懂從中選股，ETF會係一個唔錯選擇。

電動車行業，你可以用GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

醫藥方面，ＧＸ中國生科(2820)基金是被動ETF並旨在提供在扣除費用及開支前，與Solactive中國生物科技指數NTR(指數)表現緊密相關的投資回報。

而科技股，你可以考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

以上3隻基金，現價大約在合理區頂，至略貴水平。因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

雖然你現時只有約35歲，算係年青。但畢竟以上都是水桶1股票，風險會較高。緊記，最多只可以佔組合4-5成，否則風險就會偏高。

------------------------------------------------

Q22153：

想問有關月供股票事項

我現時月入3萬、1萬家用、現金儲蓄4000

月供股票
1810 $500
1177 $500
2318 $500
2800 $1000

有1手比亞迪 高位240入左

請問老師我月供組合有無問題？

我想月供金額再加大，另外想供12或16，有無任何建議？

月供股票由今年四月開始

龔成老師︰

你現時月供組合，無問題。至於加大月供，恆基(0012)和新地(0016)都可以，但前者會較有發展潛力。

而你現時25歲，很年青，我反而建議考慮供多隻潛力股，去提升個組合增長力，以下都是一些合適選擇。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

另外，你尚很年青，你應該把握沒有太多財務負擔的時候，努力去做增值。最好係每月投入，可以去到人工一半，就較理想。

------------------------------------------------

Q22154：

老師，想問你意見，我係38歲既孖b媽咪，仔女今年3歲，老公係公務員，老公月供梗941 $2500, 823 $2500 我之前問完你意見，

所以月供梗3067 $2000 6823 $2000, 今日出糧公司加左我大概14-15%人工，所以想利用加左既人工，月供多一隻股票，請問有個提議呢？

還是喺我原有既3067, 6823加大月供金額？

我之前曾經問過你，另外心水既月供股票有1211, 2845, 2382，但最後我揀左3067（因為潛力較大）同6823（因為有息）

求指教一下，謝謝老師！

老師，我最後同老公決定供多隻66港鐵$3000, 941 $2500, 823 $2500, 3067 $2000, 6823 $2000, 一齊每個月供$12000, 希望10年後儲到筆錢俾孖b讀書用

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲計，可以較偏重係增值方面。你現時月供股票，都可以。而新加入的港鐵（0066），都係合適的。

但香港電訊(6823)和中移動(0941)主要係收下息，增長力唔會好高，不宜月供太多。

你可以考慮將佢地月供金額減半，去供多一隻潛力股，增長力會較好。以下是一些合適選擇，供你參考。

潛力股可選阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

現時大市只在合理區，每月資金唔好盡用。要留有部份，等大跌市出現時，可以用來掃貨。

------------------------------------------------

Q22155：

龔sir 你好呀，我係你澳門fans 呀，有少少關於買樓嘅問題想問下你意見。最近同女朋友睇中左一個半新樓嘅單位，

入伙唔夠4年嘅私人樓（金峰名匯近路環）建築面積大概610呎，實用率7成3嘅開放式單位，管理費要2.7。我地都幾鍾意個單位同屋苑，

因為入面比較寧靜和配套設施都齊。我地計算過如果供25年的話大概每個月19000（我地兩個收入差少少5萬，）

但如果租哩個單位就大概8000租，我見疫情期間澳門租金跌左好多，而樓市就只係D大單位回調幅度比較多。我計完之後發覺租嘅價錢好似化算好多（平供樓一半有多）。

如果你係我地會先租再等樓市跌定係都會覺得哩一個係入市機會，還有如果美國加息樓價下跌空間你覺得多唔多呢，謝謝

龔成老師︰

表面上，你租金支出比供樓少近半。但實際上，你供樓金額當中，有一部份係用來還本金，其實等同於係度儲緊資產。

所以，你首先要睇翻個物業，長線有無投資價值。最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

同時，你再要審視其升值潛力，未來地區上、交通上、生活等等的配套發展，才去下一個結論，咁會較好。

另外，你再從自已長線生活需要，去睇下間物業係唔係適合。若2關都過到，而你長線又供得起，咁你去置業，係無問題。

記住，我地投資股市和買物業，都唔好用估走勢去進行，我地應用而一刻佢平貴和質素，去決定買賣策略，咁就可以。

至於美國加息，理論上係對樓市負面。但有多大影響，你要視乎佢加息的力度、時間、經濟情況、樓市供求等等因素。而一刻，較難有個明確結論。

------------------------------------------------

Q22156：

老師你好 我32歲，剛剛開始起步投資了，目前有30萬現金左右。用76.6 入了1手中電 28.7 入了1手盈富基金，淨24萬左右。

我打算分注入市 2-3個月後打算再去入1手中電 1手盈富基金

然後打算用8-10萬買儲蓄保險 分散投資

淨10萬現金做儲備

請問目前的策略可以嗎? 謝謝老師

龔成老師︰

以你32歲年紀，可以進取少少。中電(0002)增長力唔算太高，主要係收下息。現有1手可持有，就不要再加注。

你每2-3月入一手盈富(2800)，這個策略係可以。另外，我建議你加多隻潛力股，去提升組合增長力。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

但現少不少潛力股，都尚在偏貴水平。再加上你剛開始投資，未必太懂得選股，我建議你先用行業ETF做目標，佢地都係一籃子企業，較能分散風險。

安碩恒生科技(3067)、ＧＸ中國電車基金（2845）、三星FANG ETF（2814）現價都在合理區頂，你可以用2-3月入一次的模式，去儲貨。

至於"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

------------------------------------------------

Q22157：

龔成老師。 又係我，又打擾你

首先第一樣野要感謝你，就是因為看你的書開始理財，資產增值，最大的改變由以後的日日外食改為盡量自己煮，籍此省錢。

現在每個月如沒額外消費由每月存5000-6000 增加至8000-9000。當然我爸爸近來身體不好，那是另一筆支出。雖然在大家看來是小數目，不過感謝你，讓我定立目標為將來負責。

第二，有關2013微盟，我女朋友之前2月以近30蚊高位買入（約3手，佔股票1x%)。我現在稍為幫她看了2019-2020的報表。

期實他現金流算不錯，不過他現金流主要來自19年約8億及20年約10億的融資或可換股債券，而21年6月也有約3億的融資，

這部份我覺得公司太倚賴融資，現在大家看到這類saas 網上平台、網上商店、網上廣告等的潛力，可能問題不大，不過我是看到隱憂。

另外，雖然他還在消錢階段時，但已有小量的盈利，但他太倚賴騰信，有2x%營收來自與騰信有關的業務。

這兩點是我比較擔心的地方。如果是你，你認為這股在未來5年有能力去到30蚊的價位？你會如何處理這個投資失誤？

但已有小量盈利是指2019年情況

龔成老師︰

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。

營業額其實持續都有增長，2018和2020年較大虧損，主要係一些金融資產公平值變動所致，並唔係業務上出問題。

至於你所講，佢現金流較依賴融資，這個的確會令風險增加左。但由於佢都係一間尚在發展階層企業，需要投入較大研發資金，故要用到融資去支援開發，都係合理。

而騰訊(0700)佔其收入近20%，唔算話好多，過度集中性風險，唔算係好大。

我地分析微盟，主要考慮點會放係企業和行業長遠發展潛力，而唔係而一刻。當然你所講融資較多問題，和發展上的不確定性，會令風險高左。

但整體而言，此股都係有投資價值。但投資時，我地要控制注碼，去平衡翻當中風險。

由於此股有投資價值，雖然買貴左，都可以守。長遠企業發展，會令估值會慢慢上升，從而股價會回升。

但持有3手係比例上，有少少多，你可以考慮減持1手，去平衡風險。如果你唔想沽，你可以用新資金，去慢慢平衡翻個比例，都係可以。

------------------------------------------------

Q22158：

1830幾多才入市

2331可以考慮買嗎

山東黃金可以買入嗎

想重整股票組合。哪些值得投資

美股期權交易是否好大風險

龔成老師︰

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

所以，如果無貨，可考慮回少少，先小注，然後等跌多d先正式分注投資。

李寧（2331）有質素，佢係中國領先的體育品牌企業之一，擁有品牌行銷、研發、設計、製造、經銷及零售能力。

但現價偏貴，你要等佢有較大跌幅，才好開始小注入貨。

你組合中，大部份都有質素，可長線持有。

但留意，山東黃金（1787）盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。

這類企業都有一定的投資價值，但就不會太高。現價都合理，可分注入貨，但不宜持有太多。

中糧肉食(1610)、五菱汽車(0305)質素中等，不宜持有太多。

中國黃金國際(2099)無明顯投資價值，建議沽出。

美股，係有投資價值。但期權這類估走勢的工具，我就唔建議。你應該用翻正確投資方法，就去分析一間企業優劣，再用平貴向定買入策略，之後長線持有。

------------------------------------------------

Q22159：

龔sir, 我今年54歲，月供由1月2020年至現在，大約年半時間，股票之前組合︰

盈富基金$4000
港鐵 $2000
長江基建 $2000
金沙 $2000
中電$2000
港燈$2000
香港電訊 $2000

另外，分注買入
粵海 6000股
港交所 200股
煤氣 2000 股
六福3000 股
恆基 5000 股
置富 產業信托5000 股
中國鐵搭 2000股
小米 400 股

現時組合股票共現值HK90幾萬

很多年前月供盈富基金，大約有2100股，之後停咗，到之後認識你再重啟供股的路，現時都有正增長，好感激你，想問

1.現時組合是否太散？

2.我打算改變月供組合為

盈富基金$4000
長江基建 $2000
金沙 $2000
香港電訊 $2000
港燈 $1000
港交所 $1000
港鐵 $2000
中電$2000

希望這組合可以增加增長率，但是適合我否？

3. 另外，現在有現金大約60萬⋯⋯已經留咗20萬現金作急用（不動產），請問現時那隻股票可以值得分注買入呢？希望趁平價買入以上種類股票，麻煩幫幫忙

4. 另外，想問如果每月供$15000，六年後有沒有可能累積倒市值500萬股票？

真的感謝你幫忙，以上咁多問題希望你唔會介意，因為自從認識你之後真的財富增長速度比我之前以儲蓄的速度相差一截，在此多謝晒你

龔成老師︰

1) 唔算太散，都可以。

但緊記，現時大市只在合理區，每月資金唔好用晒去月供。最好留有部份，等大跌市出現時，可以用來掃貨。

2) 你將港燈(2638)月供資金，換成港交所(0388)係可以。

但以你54歲年紀，要開始為退休作出準備。港交所(0388)這類潛力股，唔可以持有太多，最多只可以佔組合1-2成。

而且，你成個股票組合，你按年慢慢向保守方向調整。慢慢加大收息股比重，到退休時，收息股最好係佔組合100%。

3) 以下股票，都在合理區。而且佢地都係較適合你年紀，未來應以這些股票，作增值目標。

但由於你本身已有一定持股，故我建議你現時40萬現金，等大市真係有較明顯回調，才慢慢出手。

平穩增值股︰、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

4) 我假設投資回報有8%（連股息再投資），你每月投資$15000，6年後大約只會增值至130萬。

但若用你實際情況，每月供$16000 + 現有資產130萬(持股90萬和現金40萬)，6年後係會增值至340萬。

如果要做到你6年後有500萬目標，就要將月供加大至$33000。若不相加大投資資金，就要將年期加長至9年，才可以做到。

------------------------------------------------

Q22160：

你好， 好想長期投資，好認同你嘅投資策略

本人背景，27歲 現有36萬 月入2萬，宜家有1801 一手 ，1772 一手，少量美股

請問有咩投資建議可以長期有回報？

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時27歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應以增值為主。信達生物（1801）和贛鋒鋰業（1772）都適合你，但信達生物不確定性較高，不要持有太多。

至於美股，你可以睇翻佢有無增長力和質素，去決定是否持有。

未來投資，你可以集中係「平穏增長股」和「潛力股」。你每月用5成儲蓄做月供，其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那36萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18521-Q18540）

Q18521：

老師，吾睇圖表分析！會否更容易輸
咁樣應該掂做才能避過股票輸？

滙控成收息股⋯⋯好可惜
作為那公司的職員⋯⋯公司生意的確比以前差左好多⋯⋯但我工作仍然忙碌嘅，冇停手

另外香港依家有好多虛擬銀行⋯⋯信得過嗎？那間比較好？聽聞定期有九釐

請問依家進入牛巿第幾期 ？
第二期尾？還是第三期

龔成老師：

睇圖本身就是錯！

所以，唔睇圖點樣賺錢，是另一個問題，但不會因為這個問題，而去做一件錯的事（睇圖）。

你要著重企業的價值分析，業務發展，匯豐（0005）的問題，就是業務，2008年開始，銀行業賺錢能力大減，我自己以前都做銀行，都從來唔買銀行股。

我地在投資上，應該建立一個組合，不能只集中某股，要平衡，同時選有質素的企業。

虛擬銀行，應該是信得過，但仍要觀察。

現時市場，如果講舊經濟股，是熊市，新經濟股，是牛二。現世代分析牛熊，已遠遠比過往的準確度減左。

建議你著重「企業」，不是大市。

------------------------------------------------

Q18522：

剛剛上完的課，想請教一下你認為投資心理質素最重要是什麼？

另外，如果太保守的我，會否有現金過多的問題，反而拉低回報率？

龔成老師：

就是對股市、股價的平常心，著重價值，不要理中短期股價。

我持有比亞迪（1211）12年，由$10升到$80，再跌翻$10，近年先慢慢上翻。見住自己有大賺變大蝕，我的著重點，即是「企業長遠價值」，不是股價。

你要睇股價睇得好平常，我成日收好多問題，網友會因為$100買入跌到$90就「好驚」，這就是心理因素。

你要好平常心面對股價上落。

另外，如果太保守，會拉低回報率，但我地投資，會「先想風險，後想回報」，所以你要在可接受風險情況下，去爭取回報。

------------------------------------------------

Q18523：

1408 濠江機電，值得投資嗎？

龔成老師：

這股貴貴地，以佢的業務來講，唔值現時這個價，加上新上市，唔太建議。

同埋上市後的上升，無乜實質因素支持，有點虛，因此現價唔建議買。

------------------------------------------------

Q18524：

另外想問問老師對3718 北控城市資源的看法初步分析。

1.雖然上市唔耐，但毛利率都高，以及母公司有優勢，有點像物管行業輕資產類別，市場對其板塊又不算熱炒，是否具投資價值？

2. 由於港股沒有類似，我參考美股WM的市盈率，發現市場其實對呢類係低估。現價是否合理？

龔成老師：

北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。

你預佢現價在合理區中上部，因此都有投資價值。

------------------------------------------------

Q18525：

老師，想了解一下錢搵錢係啲乜

龔成老師：

就是當你累積左一筆本金後，同做投資各種項目，之後這筆錢，就會不斷為你產生現金流，以及增值。例如你買入一層樓，物業多年來不斷升值，同時租金收入不斷增加。

又或你將資金投資潛力股，這潛力股升左幾倍，你完全唔需要理，這筆錢自幫你賺錢，而賺到的錢往往比你打工賺得多。

這就是利用錢，去賺更多錢，而這個錢搵錢的模式，並不受時間，體力限制，與你人搵錢是不同的。

------------------------------------------------

Q18526：

你好 想請問美股lvs 點睇？

龔成老師：

有質素，你可長線投資。

佢係全球最大的綜合度假村運營商,包括賭場、酒店、娛樂、餐飲、零售和會議中心運營。

佢擁有澳門威尼斯人、澳門金沙、倫敦金沙路泰、澳門四季酒店、澳門巴黎人、新加坡濱海灣金沙度假村、美國威尼斯人和拉斯維加斯宮等。

預計金沙將於2023年年中係新加坡開設第四座塔樓，佢現時約90%的EBITDA來自亞洲，佢d賭場業務產生約70%的銷售額。我相信亞洲的經濟回勇力度不差，對佢正面的。

不過，我始終無深入分析企業價值，因此未知佢這刻平貴度。

------------------------------------------------

Q18527：

Hello 本人月入約 100k, 供樓$12k。現月供以下股票共 18k，請問是否分散太多和投入太少？除月供港股外，同時每月買入美股 ETF 約 USD1000。

1. 16: $5000
2. 285: $3500
3. 388: $2000
4. 1211: $3500
5. 2318: $2000
6. 2800: $2000

Thank you!!!
請老師多給建議～

龔成老師：

又唔算散。

上述都是有質素的股票，基本上都值得長期持有，長期月供，無問題。

如果你資金可以，可考慮增加盈富（2800）的月供金額，以及如果你想令組合增長力提高，可以考慮加入華夏恒生科技ETF去月供。

至於買入美股ETF，可以，你保持進行就得。

另外，現時大市處合理區，可以一邊投資一邊留現金，而餘下現金的運用，就是等大跌市時出手。

------------------------------------------------

Q18528：

老師，比特幣值得投資嗎？

龔成老師：

比特幣，這是虛疑貨幣，我不太認識，所以沒有投資，亦無法比太多意見。因為我只會投資自己熟識的項目。

虛疑貨幣並沒有「實質價值」，但就有「交易價值」，當市場上接受的人愈多，佢的價值愈高，但如果無人接受，佢就會一文不值。

另外，當中亦存在著一定的投機價值，這部分愈多，價格就會愈波動，這就要更小心，因為當投機價值變成主導，這部分的價值變化可以十分大，可以在一夜消失。

簡單來說，由於比特幣無實質價值，長遠的價格，就會趨向佢的「交易價值」，你要分析，長遠係咪好多人用。

------------------------------------------------

Q18529：

9999網易算係優質股嗎？幾錢左右值得買入？唔該曬

關於買觀塘唐樓作為投資，收租金和等政府收購，呢方面你覺得值得投資嗎？

龔成老師：

網易（9999）有質素的。

先講講佢基本業務，佢創立於1997年，為用戶提供優質的內容和服務。以中文門戶網站起家，並推出了至今仍在發展的媒體及電子郵件服務。

2001年，戰略擴展到在線遊戲業務領域，根據App Annie的數據，按2019年iOS 及Google Play綜合用戶支出計算，集團現已成為全球第二大移動遊戲公司。

2006年， 推出有道業務，後已成為在紐交所上市的智能學習平台；2013年，推出音樂 流媒體平台網易雲音樂；2016年，開設電商平台嚴選，迅速成長為一家主流的自有品牌商品平台。

佢而家提供超過140款手遊和端遊，涵蓋遊戲類型廣泛。集團並內部孵化並發展出一系列創新且成功的業務，包括智能學習及其他業務，如音樂流媒體平台、自有品牌電商、互聯網媒體、電子郵件服務等。

整體上，佢業務有一定的優勢，以及仍有增長力。

不過，現時唔算平，同時市況波動，因此唔建議太進取，而小注投資是可以的。

至於觀塘唐樓，你要仔細睇佢的情況，包括呎價，維修費，樓齡，租金回報。唔好單憑「等收購」就買入，因為這個機會率無人知幾多，只能成為加分的理由，不能成為核心的理由。

觀塘本身是有發展的，但就要仔細分析物業質素與平貴。

------------------------------------------------

Q18530：

老師，喺一二戰既時候,價值投資者係點樣做？

龔成老師：

我相信有危有機，日本股神是川銀藏，就是把握了種種投資機會，你可以睇下佢的書，每次當市場睇淡時，佢買了好多本身有價值的企業，加上經濟慢慢好轉，企業就升好多。

------------------------------------------------

Q18531：

龔sir 想問下2809 宜家入會唔會太貴🙏🏻

龔成老師︰

GX中國潔能（2809），其目標為追蹤SOLACTIVE中國清潔能源指數NTR之表現。我未好深入了解，初步睇，都有D潛力，但風險會有少少高。

當中佔最多為"半導體產品與設備"股份，約組合4成，其次是逾2成的"獨立電力及可再生電力"。

此股由於包含了20隻不同類型股票，故估值並不易。頭10大股份中，除了信義光能（0968）外，其餘都在內地上市。

我自己對內地股票無特別研究，你可以睇翻這些股票本質和前景，去決定有無長線投資價值，我初步的結果就是有潛力，但價格相信較波動。

------------------------------------------------

Q18532：

老師你好，有幾個投資上嘅問題想請教你。

1. 我最近嘗試計算恒指平均複式回報率，但好似計錯。我睇老師嘅書指出過去10年恒指平均回報率大約10%，但我比較2019年平均同2009年平均做過計算，只係計到4.3% ，以下係我計數方法，唔知係咪我計算上岀錯。

2009恒指平均: 18106
2019恒指平均: 27581
(27581/18106)^(1/10)-1 =4.3%

2. 坊間聽唔小人討論溝貨，但我對呢樣野有d保留，以吓係我嘅一d睇發，希望老師比d意見。

我認為如果溝貨只係為左令帳面個買入價低d，好似無蝕錢咁，係完全無端義，甚至有d自欺欺人。

因為投資應該睇整個組合，而唔係個別股票，如果唔係優質股，而再加注入去等自己感覺好d，而家呢一刻好似蝕小d咁，咁不如買優質股好過啦，咁先可以真正抵消因買入非優質股造成的損失。

相反，若果購入的是優質股，可視為掃貨機會，但心態上，不應為了短期的帳面數目而”溝貨”

3. 另外想問關於1177前景，單從企業嚟睇，公司賺錢能力唔錯，每年都投於唔小資源到研發上，而且研發是有成效的，而且現金流一直保持正數，負債都沒有比例過高的情況。

另外企業旗下由製藥，研發，分銷，零售都有所涉獵，議價能力應該不俗。

至於行業前方面，首先中國開始面對人口老化問題，而且中國2000年後開始經濟起飛，人們比以前更加注重健康，這兩點都有利行業發展。

但同時，政府推岀帶量採購，國家醫保藥物目錄等，這些政策都令整個醫療行業的盈利能力有所下滑，雖然中生製藥在應對方面做得不錯，把握機會收購北京泰德，加強研發能力，盈利都有持續增長，但我留意到其實近兩年的毛利率和淨利率都已經有所下降(已除去收購的額外收益)。

我認為政府的政策影響是長遠的，想請問老師這些政策會否令中生質素下降，對其估值應否有所下降。

龔成老師：18533

1）你要加上股息，每年約有3%、4%回報。另外，由於計算的「點」不同，即是取數據的時間不同，因此有差別，所以，你預回報大約是8%-10%。

2）你理解正確。其實《80後百萬富翁》都有講過溝貨是錯誤的。

3）這些致府令賺錢能力略減，但這只是中短期情況，因為這同時會出現行業的整合，無質素的公司較難生存，餘下是有實力的企業，這長遠對中生（1177）有利。

------------------------------------------------

Q18533：

龔SIR，我想請教您有關市盈率(PE)的應用，根據您的經驗，如果我要用PE為阿里巴巴進行估值，與騰訊比較下(雖然我知道他們業務不太相同

但我認為他們在中國內地的不同領域屬科技股龍頭，市值又相差不太遠，所以嘗試從科技股份角度用市盈率進行比較)，兩者中何者較能承受較高PE?

以我個人分析，我認為騰訊在ROE、經營利潤率方面較阿里優勝(5年平均數據)，研發開支方面2者都佔了總收入>7% (5年數據)

最近2年阿里在盈利增速較快；
負債方面兩者應該無大問題/差距不太大 (如流動比率/利息覆蓋率/淨負債比率)；

現金流方面兩者都強勁(如自由現金流/經營現金流)，
但論及未來增長，阿里比騰訊稍勝一籌(如近年騰訊ROE有下跌趨勢/阿里近年收入增長速度較快/阿里在雲服務收入增長較快)

我個人結論為騰訊賺錢能力較強，阿里未來增長較快，所以不知何者應給予較高PE。(如上述簡單的分析有錯，還望指正)

龔成老師：

當運用市盈率進行分析時，利用行業比較時其中一個方法，盡量找一些業務較為接近的企業去比較。

另外，如果是一些業務增長力較高的企業，就要多用「預測」方面的數據，這才能有效推算，所以，當你見到佢市盈率較高時，不要立刻否則，而是多用預測數據去進一步分析。

要留意，由於騰訊（0700）與阿里（9988）部分業務仍在增長中，當我地進行分析時，有時會較為著重「業務」層面的分析，將來的發展情況，多過這刻的財務數據。

而在業務上，其實阿里發展中的業務，較騰訊更有增長力。

其實你上述的分析方向都正確。

如果當一間企業的增長力較快時，可以給予的市盈率都可以高d。

------------------------------------------------

Q18534：

龔成你好，我今年24歲，今日見到你post有關銷售工作的資訊，其實我睇過富爸爸書，都係推薦人做銷售，學銷售。

而我一向都好怕銷售，我很想突破，克服自己的恐懼，因為我的夢想是親自經營直至擁有一間自行運作並增長的公司，而經營公司必定需要學會銷售。

但我真的很害怕，害怕的程度高於想達成夢想的程度，我很想改變這個局面，想勇敢快樂地實踐夢想。

問題在於我身邊沒有朋友親人是銷售行業，但我又想開始和克服，我因中學成績不佳而且中五退學，又沒有什麼學歷。

我想真誠地問，我應該怎樣開始？意思係怎樣實質地實踐和怎樣調整自己的心靈。如果沒有學歷，又可嘗試由什麼銷售開始？非常感謝

龔成老師：

好簡單，你只要去「做」就得。

你愈怕那一件事，就愈去做，愈要去錯，做到你已經無怕的感覺為止。我多年前開始教股票班，我最初都怕當眾講野的，但試得多，到而家已無感覺，我公眾講野同我與朋友講野，基本上已無分別。

我強烈建議你去大公司試，佢地有很好的培訓系統，特別是一些銷售公司、理財公司等。

你要學習「錯誤」，你只是怕錯，但錯其實是無問題的。無人一開始識，你要不斷試。

------------------------------------------------

Q18535：

龔成，想問你隻510前景，之前高位持有左180萬股（平均價約0.3）但突然最近供股同改埋股票代號，應該點好？

已經蝕左5/6，其實佢最高位係徘徊係個幾但後來一直跌到毫幾...呢隻金融股仲會唔會有翻身一日？

求指點
希望龔Sir可以比少少專業意見我，thx!!

龔成老師：

這企業年年虧損，你持有一隻不斷蝕錢的生意，只會不斷貶值，賣出是最好的做法。

以過往的業務及經營情況，暫時見唔好有翻身，如果你心理上無法賣出全部，都建議你賣一半先。

------------------------------------------------

Q18536：

阿sir, 您好。我依家睇緊”財務自由行”，當中有一條數唔太明白，請指教:

“每月收租$20000，借貸$270萬，利率3%，若選擇供款年期為14年，每月的供款就會為$19700，即大約相等於租金。”

請問”$19700”係點樣計出嚟㗎？
唔該晒阿sir？

龔成老師：

這是在一些銀行提供的「按揭計算程式」裡面計出來的。

輸入相關數據就出得出答案。

------------------------------------------------

Q18537：

老師，我想問股價是否跟據供需而決定？點解有d 公司不斷有盈利增長，但唔派息例如巴菲特間公司，都會有人想買，同股價會升？

如果哩間公司嘅股票冇人買，即使盈利好強，股價都唔會升？投資初哥，問題愚蠢，唔好見怪

龔成老師：

短期股價基於市場情緒及買賣供求，長遠則由「企業價值」決定，如果你見有D公司盈利好強但無人買，兩個原因，第一，你分析時睇少左某些因素，第二，市場忽略，有機會是潛力股。

------------------------------------------------

Q18538：

龔sir, 感謝你嘅暢細意見，好開心咁快收到你嘅回覆。
現在知道同明白定息產品唔適合自己，不過已經供緊，是否需要取消，轉而投放資金去投資優質股？

另外，我已經買咗你寫嘅書，唯獨”財務自由行”同”選股勝經”未買到。希望可以上堂前可以睇完你講嘅兩本書。

龔成老師：

你35歲，又不是不能持有這些項目的，只是這些項目，不應佔你組合比例太多。

因此，你應該重新分析，自己整體的財務情況，如果你本身能承受風險，而你又覺得這些產品買得太多，就減部分。

如果本身佔比不多，其實繼續都可以的。

至於《財務自由行》同《選股勝經》，部分書店可能斷左貨，你不如同書店講訂貨。

------------------------------------------------

Q18539：

龔成，你好，想問下9923移卡，31/8 $57入左後插，兩日時間又彈返上黎，前幾日又再插，昨日今日又升
你會點睇呢隻股票？波幅都大
有冇機會再爆升？

佢業務我知道，有做功課。

唔明入左港股通後交投好似同先前差唔多咁？
我仲有股本15000元，你會建議撈京東嗎？
謝謝

龔成老師：

首先，唔好太理會中短期股價上落，另外，要多集中分析「企業的長期價值、質素」，同時，無人能預測中短期的股價走勢。

移卡（9923）是有風險，有潛力的類別。

首先，佢的業務為一站式支付服務，包括基於應用程序的支付服務及傳統支付服務，並支持逾500款發卡機構的移動應用程序，以支付為基礎的科技平台。

其中包括微信支付、支付寶或雲閃付，涵蓋了中國大多數的電子錢包。

另外，佢業務亦有科技賦能商業服務，即是提供商戶ＳａａＳ產品（包括實時庫存管理、消費者關係管理、智能訂單管理及全方位僱員管理）、營銷服務（包括量身定製的精準營銷及客戶忠誠度計劃電子工具），以及金融科技服務（包括助貸服務、委託貸款及保險轉介服務）等增值服務。

睇翻佢的財務數據，增長快速，但業務變數大，行業有不確定性，估值上比較難，這一定會令股價上落大，這刻仍唔平，投資值博率只是一般。

你預佢有潛力，同時有風險，如果控制注碼，都可以小注投資。

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

過往的財務數據，收入每年都是20%左右增長，2019年收入為5700億人民幣，已經有實質的盈利，2019年盈利為120億，初步以此推算，股價並不算平。當然，這股有一定的增長力，之後的市盈率會減。

從質素上，這股不差的，但估值上就不算平，如果買，都可以，但要控制注碼。這股可以長線投資的。

------------------------------------------------

Q18540：

你好，最近上緊你既股票班，令我有以下人生發展計劃，希望老師幫手睇睇是否可行及需要注意的地方🙏🏻

我計過自己既資產項目，澳洲層樓既租金收入同按揭支出已達平衡，可以放長線慢慢等正現金流。

另一方面我打算係香港搵多兩年錢後移民澳洲，到時手頭上會有約230萬現金，希望透過投資達每年回報6-8%，以供最基本生活(生存)之用，可以做到嗎？

另外，我會係當地盡力學習新技能及融入社會，希望提升生活品質。

雖然我知呢個問題可能有少少偏離投資理財，但移民真係一件人生重要事件，好想等諗清諗楚先做，所以希望老師有時間時可指點迷津，唔該晒

龔成老師：

如果你之前在當地生活過，覺得當地的環境能適應，餘下就是工作問題。

如果你能2年後，本身已有物業，加上在$230萬做配置，我相信你會更加穩陣，因為有一定現金流作保障。

你可以考慮收息股，現時不少都有6%-8%，我相信你現時儲收息股，就算有部分這刻股息一般，之後會慢慢向上。

投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜，因此買入時宜分注，同時不能用盡現金。

另外，你現時可以多d搜集當地的資料，例如你想做那一行，有無機會現時問多D這行業的情況，行內人的情況，認識多D居當地的香港人。資訊愈多，你就愈易做到正確的決定。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。