【龔成問答信箱】（Q22621-Q22640）

Q22621：

老師， 你好！學生有數個疑問，

1. 你上堂曾講數隻房託ETF，
最佳是否 領展0823/陽光0435/
置富0778，那較佳？
還是有其他另一隻呢？
原因？

2. 另外 曾經聽你提到 你會減持水桶1 增持 水桶2，是嗎？為何？ 因年齡？

3. 課堂上 曾聽你多次提過小米1810，你是否認為佢會唔會同 比亞迪1211 一樣數年後 暴升呢？

祝健康！謝謝解答！

龔成老師：

1）領展（0823）、陽光（0435）、置富（0778）算是高質的，你可以考慮這幾隻，都值得投資，可成為投資組合的成員，現價都合理。

如果想增長多D，就領展，因為領展會不斷翻身物業，同時會買賣物業。如果想收息穩健D，就置富（0778），因為佢持有的物業，對象是民生類，受經濟影響相對較少。

其實，你可以睇翻課堂的筆記，買房託如同買樓收租，所以你要研究翻佢持有的物業，就知質素、風險、發展。

2）我當時表述的意思「當我日後年齡慢慢大，就會減持水桶1，增持水桶2」。

這不是今天，而是長遠，原因為財富配置，年輕食進取，年長就保守，所以當年齡慢慢大，就會調整，你可以睇翻第二堂的筆記。

3）小米（1810）有潛力的，我自己都有持貨，長遠正面，但能否象比亞迪（1211）股價升好多，就未知，我只可以話，企業價值前景正面。

佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂，小注分注可以，但唔好入得太急，預佢股價仍波動。$15以下才是便宜區，所以現價不是大手時候。

------------------------------------------------

Q22622：

老師，你在《財務自由行》一書講過財務死胡同，有沒有實質例子供參考?

龔成老師：

如果一個人不斷增加「負債」（即是每月持續消耗現金流的項目），如養車，就算加入工都無用，這就會進入每月無法儲錢的情況。相反，一個年輕人若一開始集中累積資產，慢慢就能做到錢搵錢的狀態（資產產生現金流，現金流買更多資產），最後會進入財務自由的狀態。

------------------------------------------------

Q22623：

龔sir你好 如果係65蚊持有滙豐應該點做
大約30000股……
好迷茫

龔成老師：

匯控（0005）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

相信長遠是收息股，但股價增長就有限。

這股都有投資價值的，但就未必值得佔組合比例太多，同時明白佢是收息股，增長力有限。

如果你本身目標是增值，就應該減部分轉其他。

如果這股佔你組合比例較多，都應該減部分，轉其他。

其實，你最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22624：

老師，有兩個問題想問….

1. 2382 我$145 有貨，想加注應該等咩位置加好？

2. 技術問題，我地如果分三注，理想係每注跌10%加注的，但第三注的10%， 會係第二注加注後總和的10%嗎？

例如我第一注$100， 第二注是$90，第三注會係$81（90*10%）？還是$85.5（95*10%）？

龔成老師︰

1) 舜宇光學科技（2382）現價偏貴，最好等佢回到1,2成，才考慮開始再小注儲貨。如果係月供，現價開始都可以。

2) 最好係用對上一注的價位，去下調10-15%，作為下一注投入的水平參考。

若以下調10%計，即係第一注$100， 第二注是$90，第三注會係$81（90*10%).....。當然，分注有很多方法，有時要到時再調整。

------------------------------------------------

Q22625：

龔sir! 有問題想請教。本人28歲，睇番自己投資組合，發覺潛力股佔左55％，所以想揀多隻平穩增長型去平衡番。我睇中左中國平安2318（組合裡無保險股），但我本身有月供緊平安好醫生1833。

基於佢地都系同一集團，我再買2318合宜嗎？會不會風險大左？但現時佢股價跌左又覺得係好時機買入。

同埋想問買保險股應該點分析行業呢？同銀行股類似嗎？有無特別事要注意？謝謝！

龔成老師︰

對年輕人來說，潛力股55%仍可以，不過當中都不能過份集中同類潛力股。

由於平保(2318)和平安好醫生(1833)係有關聯性，故投資比重不宜過多。

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

要分析保險股，其實都幾複雜，簡單會睇佢新業務發展、現有業務狀況。另外，由於佢用浮存金去投資，所以都要睇埋佢投資回報方面。

而且，平保(2318)唔係純保險股，除了壽險和財險這2個主要分部，佢仲有銀行、資產管理、證券等等。

若要認真估值，你係要每個行業咁去睇。除非估值經驗好豐富，否則要完整和準確分析，其實唔容易。

簡單而言，這股有長線投資價值，是平穩增長型。現價算係合理區中下位置，你現時入首注係可以。只要控制好平保比重，不超過組合15%，咁就無問題。

------------------------------------------------

Q22626：

Sir, 上緊進階班中, 但投資實戰上有些迷思.

1. 如收到1000元股息, 股票共投入30000元, 股數1000, 分析個人投資時, 一般會計入股息嗎? (即共$31000 / 1000 = 當平均買入價為 31元)

2. 今年5月時看好3918, 組合上想加入博彩及有寡頭壟斷股, 已設定金額及中途趺5-10%就會加注, 但至上月就買夠, 平均 7.5元, 點知現會再趺;

全世界因疫情暫未有轉好情況, 看來要等疫情好轉後, 這企業才會轉好, 這情況是否耐心等待?

另一角度看, 當時因市場氣氛吸引, 加上計算估值約6.86 – 10.29, 在此範圍內買入, 想知道投資上有沒有做錯?

再另一角度看, 現下跌差不多 30%, 亦不再看好那地方會那麼快復甦, 是否賣出較好, 再買入其他更優質股票? 因這樣一直持有, 可能要數年, 值博率不高.

Thank you Sir.

龔成老師︰

1) 唔會，只會視初期投入的$30000為買入成本。就算你用$1000股息再投資，假設買入了30股。這樣你買入成本，只會變成$30000和1030股，即平均買入價為$29.12。

2) 金界控股（3918）係有質素的，但始終新興市場，因此點都有風險。

佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

這股股價較為波動，不過都有長線投資的價值，分注投資可以。

你現時平均價，係合理水平，但你預佢中短期一定會好波動，但長線持有係可以。雖然有質素，但始終係市場新興，風險較高，在注碼上緊記不能投資得過多。

你計算合理價都接近，調低多10%會較好。

記住，我地是否持有一隻股票，係用佢質素做分析，而唔係睇佢買入價，你要改變這個"賺差價"的思維。

另外，我地投資唔好估走勢，只會用估值平貴去做決定。此股現價有一定值博率，照持有係可以，除非你持股佔組合較多，否則照守住先。

我地唔會知疫情幾時變好，都唔會知市場幾時會對佢重新估值，令佢真正價值得以反映。可能係明天，可能係幾年後，無人知。

但我地知道的客觀事實，就是其真實價值，未被反映出來。所以長線持有，才是較好做法。

------------------------------------------------

Q22627：

你好，想問吓1799公司前景如何，手上未有貨，幾錢可以入貨？

龔成老師：

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

------------------------------------------------

Q22628：

龔成你好， 這是我現時持有的股票，想問下你的意見。可以點樣優化我的股票組合？

0011
0435
0778
1177
1928
2800
8109
9888
9988

另外我應該再爭持9988嗎？ 因為佢係我既投資比例已佔很多，比起爭持9988，定應選擇投資點700 騰訊？

我是一個投資小白，感謝你讓我明白投資的重要性， 我都好想快點賺到我的第一個一百萬

*8109 係我十年前剛買股票聽人講的教訓，我只放係度提醒自己

龔成老師︰

你現時持有股票(除了8109)，都係有質素，若你係年青至中年人士，係合適的。恆生(0011)、陽光(0435)和置富(0435)增長力較弱，主要係收息，若你偏向年青，不建議持有太多。

另外，我地持股除左講質素外，都會考慮到平衡性。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時阿里(9988)佔比已經好重，不要再加注。至於騰訊(0700)現價在合理區中間，係可以入貨水平。

但由於你本身已有不少科技行業股票(9988, 9888)，再增持會令你太集中科技類，而造成風險。

如果你好想入騰訊(0700)，你可以考慮沽少少阿里(9988)，來換碼至騰訊，這樣會較穏當。

------------------------------------------------

Q22629：

想問什麼是平台股?

龔成老師︰

現時你聽到的平台股，相信都是指一些電商平台相關股份，例如阿里巴巴(9988)、騰訊(0700)、美團(3690)、滴滴出行等等。

由於近期中央出手打壓，令不少相關平台股都出現明顯下跌。

但我地作為理性投資者，係這個時候應該理性分析，到底中央係這些新政策裡面，有多大程度影響這些企業，而這些影響，又是否長線?

如果只係中短期影響，我地就唔洗過份在意。相反，如果係有較長線影響，特別係一些核心性問題，我地就要調整估值和注碼，甚至調整成個投資策略。

------------------------------------------------

Q22630：

龔sir，近排入左隻光大綠色，之後同一位前輩討論，該前輩都係信奉價值投資，而且徧保守。結果佢問左一堆關於光大綠色業務同收入嘅問題，

但我嘗試從公司資料，官網同年報都揾5到一d好有説服力嘅答案，令我懷疑自己係咪入錯貨，所以嚟請教龔sir你嘅意見。該前輩對光大綠色的質疑如下:

1. 佢讀書時都接觸過能源相關產業，都知道生物質能依回事，但按佢所認知，生物質能嘅效率很低，可5可以有效發電賣電營利都係問題，年報d數字，

業務描述可能只係個美好嘅故事，嚟氹投資者入局。

2. 佢話公司資料無詳細提及所有客戶資料同相關收入，感覺主要客戶只有地方政府，雖然環保係一個大方向，但由於政策會變，

地方政府未必肯長期燒錢維持d無實際作用嘅項目(特別指生物質綜合利用)。而間公司無咩其他主要客戶，萬一將來政策改變就會對公司營收造成極大影響。

3. 最後，佢提及中國雖然係農業大國，但趨勢相信係由農業轉變成農產品/食品加工業，因為利潤同發展較好。另外沙漠化加上碳中和相關政策會令植樹造林係大趨勢。

最後因農業改革同植樹造林會令生物質原材料不斷減少，因此對其業務長遠帶嚟負面影響。

喺度先謝過龔sir

龔成老師︰

1) 太科學上的知識，我都解答唔到。有時我地分析企業，未必能100%完全理解當中運作，因為我地無可能成位每一行業的專家。

但我地可以從一些數、表現、同行比較等，去大致得出佢架質素。雖然無法100%，但有時都可以找到一個，令人覺得相對穏當的答案。

睇翻佢過去多年，生物質綜合利用項目在營運收益上，都有一定增長。由於唔係1,2年，而係一個較長時間，我地會假設佢這個營運模式，係無問題。

2) 一般企業，都唔會完整列出所有客戶名單，係商業考量和私隠問題。但我地可以知道，2020年最大客戶係政府機構，佔營業額19%，頭5大客戶，則佔營業額43%，唔算過份集中。

好似光大綠色(1257)這類企業，以政府客戶為主導，其實係正常。當然內地政策變動，會為集團造成風險。但綠色能源和危廢處理，依然係大方向。

而且，集團在這方面，都有一定技術和優質，因此長線發展係正面。

但由於行業算係較新，加上政策風險問題，你會見佢市盈率係好低。某程度是反映，市場對佢營運模式，都尚有一定保留。因此，此股可以投資，但宜小注。

3) 你前輩的擔心，不無道理。但由於中國食物需求，依然未能做到100%自給自足，政府長遠都唔希望要依賴外國入口。故農業發展，相信會維持正面。

而且，集團除了生物質業務外，佢都努力發展危廢處理，去散收入來源，平衡風險。

整體而言，集團長線發展算正面，但風險略高，不宜大注投資。

------------------------------------------------

Q22631：

感謝龔sir回覆，但＃2845同＃3067暫時都未有息。。。＃3067已經有3000股了

對於小朋友來講，唔係應該搵啲高息股咩？我成日都唔明點解有人講，炒股唔係賺股息，點解呢？

不過我都會聽龔sir建議主力擺左2800度，學你話齋，小朋友有長時間增值。。。

但我個人黎計，出糧戶口有003 每月供緊$1000，都已經有2千幾股了，想轉供其他，我應該都會聽龔sir教供2845了，但2845太貴。都唔知供幾耐先會有一手

龔sir你講得啱，我個人好心急

龔成老師︰

首先，我地真正投資增值，唔係做炒股這些短線操作。而係長線持有一些優質企業，透過佢地成長，以達至財富增值目的。

至於你要做增值，定係賺股息，就要睇你現時所處的人生階段。若你係退休人，因為已經無收入，所以我地就應以收息為主，用意係透過股息和利息收入，去支援退休生活。

相反，好似你這些較年青人士，其實應以增長為主，努力去累積一筆資金。到退休時，就用這筆資金換成收息資產，去創造現金流。

GX中國電車(2845)和安碩恒生科技(3067)都係潛力股，由於這些公司都在高速發展，所以好少會派息，因為佢地會將賺到的錢，重新投入業務上發展，去爭取更大回報。

所以，你投資這類潛力股，目標唔會放係股息度，而係係佢增長能力度。

由於這類潛力股波動性好大，雖然長線會升，但中短期點都會有一定波動性。如果你年紀大，快要退休，或者可投資年期較短，就不太適合。

相反，小朋友有好長時間去投資，可以足夠等到企業將佢質素，全面反映係股價上，所以投資盈富(2800), 安碩恒生科技(3067), GX中國電車(2845)都係可以。

煤氣(0003)和GX中國電車(2845)都係有質素，後者增長潛力高，但風險都高，你要自己衡量。

雖然GX中國電車(2845)現價唔平，但月供可以拉平均個價，所以唔算大問題。反而我擔心你會自己去定平貴，或者可能見某股票無乜升，供一陣又停，轉來轉去。

因為月供其實係要你"定期定額"去供特定股票，長線去供先做到平均價格效果，講緊係至少3年以上，並持有5年。

雖然股價貴時，我地的確可以減少供款。但問題係，若果你判斷錯誤，好大機會你最終回報，會受到嚴重影響。如果你投資技巧唔高，只要隻股票有質素，我建議你不理價格，一直長線供，反而會對你最有利。

------------------------------------------------

Q22632：

龔成老師， 我最近有一個好苦惱的問題，看唔清，想聽聽你既專業意見。之前未必想係香港買樓，但考慮到來緊五年都係香港，所以都想買樓，住左三年升。

我最近見到個樓盤我好鐘意，亦都覺得好理想： 長沙灣the campton. 想買400呎左右或以上既都要9百至1000萬，首期需約二百萬左右。

但無可奈何，不計我股票資產。我和男朋友二人最多可以比到150萬左右。我打算放晒手頭上的股票，當做首期，我會沽清所有。而我一年大約可以儲到三十萬左右，

我覺得一下子用盡，後再儲錢，唔太難。 因為份工年年都有加人工，一個月約五萬左右，個人和家庭開支約兩萬。 你覺得賣晒所有股票值唔值？

因為我個人就唔係好想，因為當中長期hold 住，我知會有高回報，以下為我所有的股票。

小米 平均成本 $26.1 1200單位
安碩 平均成本 $14.37 500
煤氣 平均成本 $10.68 5738
地鐵 平均成本 $39.8 2500
完美 平均成本 $5.11 17000
太古 平均成本 $22.24 2000
港燈 平均成本 $8.05 7000
HSBC $81.4 400
恒生 $183.3 300
建行 $8.6 2000

如果我唔放股票既，你覺得我有無需要放左某啲佢，集中幾隻，因為依家感覺好散下～ 我知要分散投資～ 但好似分得太多

因為真係好鐘意果個物業，覺得地理位置都好好，好驚自己做左唔理性既野，所以想來問下你意見

十分感謝老師，已報進修班，因為唔想係現場透漏太多個人資料，所次message 你。

龔成老師︰

首先，要盡沽股票，去投入一個物業，會令成個組合偏晒係物業一方，造成風險，最好唔好咁做。

因為我地無人知，未來幾年樓時係唔係一定升得快過股市，如果係相反，你就會因為而個動作，而減弱左財富增值效率。

另外﹐你5年後都會移民，其實我唔太建議投資樓市，除非你個物業係會保留，用來之後放租，就另作別論。(不過個呎價唔平，租金回報率未必好理想，你要研究清楚。)

因為除左我講，唔知樓市定股市升得快之外，係香港每次做物業買賣，成本都好高昂。你一來一回，其實唔見左好多錢。

所以，如果你好鐘意，我建議你租住就算。餘下5年，好好用你的優質股，去進行增值，相信會較好。

若然你真係堅持要買的話，你可以優先沽出一些增長力無咁高的股票，包括港燈(2638)、匯控(0005)、恆生(0011)和建行(0939)。

其次就係佔比較重的完全醫療(1830)和煤氣(0003)，可以沽部份，其餘就長線持有。

如果你放棄置業，你現時投資組合，大致無問題。除了港燈(2638)、匯控(0005)、恆生(0011)和建行(0939)係收息股，增長力不高，以你31歲計，不宜持有太多。

另外，完美醫療(1830)佔比太重，建議沽少少，換至其他有增長力股票較好。

記住任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

------------------------------------------------

Q22633：

Hello 龔老師! 你好! 现手上有90%也是hold 股票，大多也是不差股票，不知賣出，或是作長期收息股吧？因本人年纪近50，是否該賣出30% 留下現金。现仍有工作，未退休。

謝謝给点意見!!

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

由於你已近退休之年，你要將開始審視手上股票，將一些較高風險的持股，慢慢轉成收息類股票(而唔係轉成現金)。

因為你退休時，就會靠收息資產(如收息股、年金、A級債券、收息產品等)創出的現金流，去支援你退休生活。

所以，你唔洗沽出持股換現金。純粹係睇翻你組合，有無調整投資選股的必要，咁就可以。

如果你尚有5年左右，才正式退休，你現時組合，可以持有一些平穏增長股和收息股。但若你只有1-2年就退休，收息股應佔大部份。

到退休時，收息股佔比應為100%。

------------------------------------------------

Q22634：

銀行股：工商 1398
地產股：恆基 12 領展 823 置富778
物管股：雅生活 3319
保險股：中國平安2318
公用股：電訊 6823 粵海270
醫療股：中生製藥1177
ETF:盈富 2800 安碩 3067

以上持股共30萬左右，單一股票不超過5萬元，另外還有20萬現金想投資，本人30歲，請問有沒有什麼建議和改進？

自上年follow 你的page後，已經買左你6本著作閱讀，十分欣賞年報勝經，這本書是我個人認為學習得最多的（可能是第一本看）好認同你的投資方法，謝謝你。

龔sir你好，多謝你的教導，每天睇你的專頁已成為習慣

龔成老師︰

先多謝你支持我的書和專頁，如果你對估值有興趣，可以睇埋《股票勝經》和《選股勝經》。

當然，最理想係上我股票班，因為課堂中會較具體教你點去運用不同方法選股和估值，而且絕大部份內容，在書中都無提及。如果你想認真學好投資，建議你抽時間來上堂。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你上述持股，都係有質素，可長線持有。但工行(1398)、置富(0778)、香港電訊(6823)都係收息股，增長力唔高，主要只係收下息。以你年紀，不宜持有太多。

現時大市只在合理水平，資金不宜盡用。建議你餘下20萬，等大跌市出現，才去掃貨。

另外，你可以考慮用每月儲蓄，去進行月供股票，去加快資產累積速度。

策略上，你每月5成儲蓄做月供。其餘先儲起，同樣都係等大跌市機會出現，才出手掃平貨。

你可以考慮一些優質的平穩增長股，再加潛力股。潛力股，可選：安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

------------------------------------------------

Q22635：

呀Sir您好呀 我係之前報過您投資班既學生。我想同你分享下宜家我既情況。

其實我宜家暫時係做緊啲短期兼職，同時做緊保險，收入不穩定，但好彩係搵到番黎既我都可以至少儲到6-7成，我平時冇乜駛費，又有記帳習慣，

之前大學幾年搵搵下，宜家有$200000現金，同一份$200000的儲蓄保險，黎緊希望繼續係保險呢行做好，如果真係唔得，先轉。

呀Sir，我真係好想好似你咁財務自由，上完您堂之後，都買左唔少股票

9988 @$203 1手
2638 @$7.83 1手
1928 @$27.6 1手
1810 @$28.7 1手
1448 @$7.45 1手

1177 @$6.95 1手
285 @ $40 1手
270 @11.12 1手
月供VOO @385.75 5股

我想請教呀Sir您 呢個組合 您覺得可以嗎？

我諗住港股暫時咁樣擺係到，長揸果啲股票，同時繼續月供VOO，長遠應該可慢慢致富

我今年23歲. 我同我自己講28歲我要有$100萬. 我真係希望可以做到. 呀Sir，根據我宜家呢份保險工作同買股票既情況. 您可唔可以指點迷津，比啲建議我？

唔該您多謝您呀Sir.

龔成老師︰

以你23歲年紀，這個組合係可以。但港燈(2638)係收息股，增長力唔會明顯，主要係收下息，你現貨可持有，但暫時唔建議你加注。

我假設投資回報有10%（連股息再投資），你現時投資組合約值10萬+20萬現金，5年後大約會增值至48萬。

如果想達至你的財務目標，你每月月供金額要有最少$8000，才會較大機會做到100萬目標。

月供方面，除了保持月供VOO外，你都可以考慮加入其他「平穏增長股」 + 「潛力股」作組合，去創造一個增值平台。

僎設你係月供$8000，你每月先用$4000做月供(連埋VOO計)，其餘$4000儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

潛力股︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

現時大市只是合理區，你現有20萬資金可以再投入多5-10萬，用"分注"形式，慢慢買貨。餘下資和每月所儲倒的資金，就等大市出現一定程度的下跌，才大力度掃貨，然後長線投資。

另外，係財富增值時，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而工作上，你應該才剛剛畢業，其實可以多作不同嘗試，慢慢去找到適合自己的路。保險都係一個值得一試的行業，你可以看看自己是否適合這份工作，加油!

------------------------------------------------

Q22636：

Sir!成手恆大中國，蝕到入肉。同版塊的融創中國8月11號除淨，唸緊換唔換馬！股息派成$2，好似好吸引！但問題現在內房版塊比政策打到咁，又驚中伏！

驚收完股價急插，因為融創都係3幾蚊炒上去。所以想聽下你意見。現在持恆大中國25萬股，均價$8.3

唔該呀sir，現在帳面虧損35%

龔成老師︰

你對派息運作，似乎有點誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

「派息日」，就係合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在此期間因買/沽貨，出現任何著數。

至於換不換碼，你要睇翻企業本身質素。

融創中國（1918）業務不差，有規模、品牌、銷售網絡，但同時有一定風險。

這股同中國恒大（3333）一樣，負債偏高。無事就無事，有事就似中國恒大（3333）咁大件事。(當然負債水平，恆大比融創高得更多。)

而且，近期中央有時會出打擊樓市政策，相信會對佢有一定的影響。此股都有投資價值，但只宜小注，可以，但都要明白風險。

至於中國恒大（3333），負債問題唔細。現時風險很高，你最多只可以小注持有。

若現時持股佔你組合好高，我建議沽出部份，換碼至其他類。

------------------------------------------------

Q22637：

龔先生你好，本人50歲，有一個約850萬物業已供完。強積金及基金約400萬 (中/高風險收益基金為主)。股票約120萬(中風險龍頭股為主)，另現金約200萬。

希望約五年後退休。全球放水估計未來通脹將會加劇，如何運用二百萬現金？有咩高見？

其餘嘅配置有冇問題？

另外想請教你對基金同股票有咩睇法？ 有啲朋友講，買基金不如自己買股票，唔使畀保險公司賺，又唔洗綁死咁多年。

龔成老師︰

由於你距離退休尚有5年，都可以進行適度增值，但選項就要相對保守。

其實基金，唔一定無投資價值。你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

另外，你現時基金風險水平，其實係有點高。因為係你退休時候，我地係會將這些有增長力資產，轉換成收息類資產，用來創造平穏現金流(如股息、利息收入)，去支援退休生活。

所以，建議你將高風險基金，部份換至一些風險較低基金或優質股。其實最簡單，就係買指數基金。

而現有資金，你可以將佢地投資一些「平穩增值股」+「收息股」。若你想進取少少，可以較集中「平穩增值股」。相反，則以收息股作為主力。

平穩增值股，例如長建（1038）、中銀（2388）、港鐵（0066）、恆基（0012）、粵海（0270）、領展(0823)。如果有投資美股，可投資VOO。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

大市現處於合理水平，那200萬資金，你可以多用50-80萬，以"分注"形式慢慢入貨。餘下一半就等大跌市機會出現，才大力度掃貨，並長線投資。

到你退休前一年，就慢慢將你增長類資產，換成收息類資產，去為退休創造一個收息組合，咁就可以。

------------------------------------------------

Q22638：

老師你好，我之前誤打誤撞買股票，輸咗好多錢，差不多輸咗有20萬 ，我而家對股票完全冇期望，但係手上仲有以下股票，

可唔可以俾啲意見我睇吓我手上股票應該要長期揸住定係沽出？

66號，共有835股 @46.536 （月供$1500）
788號，共有4000股 @2.084
823號，共有835股 @76.805 （月供$1500）
2800號，共有835股 @27.888 （月供$1500）
9988號200股 @188.72

龔成老師︰

你必先要了解翻，自己輸左20萬的原因。係買錯股、買貴貨、定係誤把短炒當投資? 你要了解清楚自己問題所在，避免將來再發生。

我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？即是你想設計一個怎樣的投資組合？長期、優質、平衡、適合你。

你現時持有股票，都係有質素，只係中國鐵塔(0788)買入價偏貴，但由於有質素，你照長線持有就可以。

這個組合，算係一個增長型配置，若你係年青至中年人士，這個組合係可以。

若你投資經驗不多，建議你先維持用月供方法去儲貨，以減低買貴貨的風險。另外，現時大市只係合理區，每月儲蓄唔好盡用，要留有部份，用來等大跌市機會。

------------------------------------------------

Q22639：

龔sir，想問下如何分辦股票的股價是便宜或贵？是否處於合理區？

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q22640：

你好成哥，我今年36歲，單身

最近想開始學投資增值，希望60歳可以有3-5萬現金流，想下個月開始買入以下5隻股票，（2007，3988，6823，0823，303）平均每月可投資$12000以上，你覺得可行嗎？

我目前收入$40000，但之前經歷生意失敗，輸咗幾百萬，所以冇乜積蓄，仲有你覺得我應該先儲首期買樓定收息增值好？謝謝

龔成老師︰

每個人都有自住需要，但現時香港樓唔平，大致在合理區頂至略貴。如果你係無買自住屋的迫切性，建議你先用優質股去增值，會較好。

若你希望60歳退休時，每月有3-5萬蚊現金流，以股息率6%計，你需要本金600-1000萬。

故你現時要做，就係透過一些有增長力股票(而非收息股)，去先累積起這筆財富。到足夠時，才慢慢換成收息股，去創造現金流，支援退休生活。

你上述提到的股票，都有質素，領展(0823)係合適。但中行(3988)、香港電訊(6823)、偉易達(0303)係收息股，增長力唔高，唔適合。

碧桂園(2007)，業務都算不差，但負債高，風險略高，雖然都可考慮，但不宜大注。

你現時無投資知識和經驗，對企業估值，點去定平貴未必會太了解。所以你最好先利用月供模式，去做增值，可以減低買貴貨風險，對你而言會較理想。

策略上，你可以投資「平穏增長股」和「潛力股」。你每月5成儲蓄，即是最少用$6000做月供。其餘先儲起，用一邊月供一邊儲蓄的策略。

選股上，你可以投資在平穏增長股，加少少潛力股。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

餘下的另一半現金，我地就等機會，當大市出現較大回調，就加大力度掃貨，然後作長線投資。

我假設投資回報有10%（連股息再投資），你每月投資$12000，24年後大約會增值至1300萬，故這樣安排相信很大機會達至你的財務目標。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19681-Q19700）

Q19681：

龔成老師，多謝你一路以黎堅持日日過錢落我地呢d忠實讀者嘅袋

自從follow 左你之後就keep住追睇你嘅文章！真係學到好多野！

我今年 30歲

記得你教過如果投資金額 100萬樓下就 5-10 隻股已經夠

我大約由上年 10月開始買股票
預左大約同而家差唔多（尚餘大約 $4萬可入貨）嘅金額投資

我而家暫時入左 7隻，組合未完全形成
幾乎全部都有等到你提及過可入手嘅價位先行動
想問下你對我嘅組合有無咩意見？

66 1000股 $38.35
2018 500 $42.5
2800 500 $24.24
3032 600 $7.567
3088 400 $9.55
3319 250 $32
9988 100 $230

現在嘅組合我希望再進行以下動作
可以比d意見嗎

1. 入手 1833（目標價 $85）

2. 9988 跌穿 $200 再入多手拉返平均買入價去到 $215 左右

3. 有機會會因為以下股票去到呢d價位而再調多d savings去投資：1830（$2）/ 1448（<$7）/1177（$5.85）

4. 66 同 2800 進行以股代息（但本人嘅股票戶口係致富，佢地有股息再投資計畫，想問效果係咪一樣？）

5. 一開始同時買入 3032 加 3088 係因為覺得2隻都好似買得過就一次過入曬

想問係咪應該等 3067 去到目標價就放曬呢兩隻去買 3067？因為手續費呢兩隻加埋係咪好貴？謝謝！

龔成老師︰

現時組合都可以，但港鐵（0066）比重上有少少偏高，未來再入貨時要留意。個別股票最好維持在15%以內，個別行業則不要大於3成。

1） 平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算是合理區中上部至頂位。

2） 這個位置加注可以，但由於你總資產唔多，不停加注會令比重過高。所以加完這注，就唔好再加住。

3） 這些價格，都是合理區中至頂部，在這個位置開始入貨係可以。但留意你上述不少都是潛力股，你集中加注落這些潛力股，會令你組合風險過高。

以你年紀"平穏增長股"和"潛力股"各一半，會較穏當。

4） 如果佢係直接將你股息，再投資落同一股票，基本上係一樣。但證券行有機會收入額外費用，你要自已留意。

5） 恆生科技（3032）、安碩恒生科技（3067）和華夏恒生科技（3088），都是追蹤恆生科技指數的ETF。

我地睇翻個管理費和誤差率，都係以安碩恒生科技（3067）較理想。但留意由於3隻股份都係初上市，誤差率只係一個估算，實際可以唔同，你要明白有這個風險。

長線計，你可以轉去集中儲3067。轉換時，只要係同時間進行買和賣就可以。

------------------------------------------------

Q19682：

成哥，最近我在檢討自己過去2年的投資，2019年主要輸hsbc 約2萬，2020年主要輸baba 約1萬

我明白資產比起現金更重要，但如果棖面 1年望落去是輸多，我是否要檢討我的股票要留還是要轉碼？

想請教成哥你望住比亞迪天天大上大落 會唔會有心情上落？還是我如果相信企業價值，應該有耐性用長達幾年時間去觀望？

龔成老師：

如果不是每天要答讀者問題，我可以一個月唔理股價的，因為，我地應該著重「企業長遠發展」，而不是每天股價。

我買入比亞迪（1211）12年，多年都是只入不出，過往試過由$88跌到得翻$12，當時已經是我的最大持股，你可以代入我的角色，賬面無左9成！

但我同自己講，最重要睇長線，長遠企業價值，而不是短期股價，當時得到的結論，就是這股長遠質素無變，但中短期業務仍弱，只要我以長線角度分析，不用理這刻股價就無問題，當時我做的是「加注」！

所以，你最重要分析「企業價值」，長遠的情況，核心因素。

------------------------------------------------

Q19683：

龔成老師，有咩細股值得月供嗎?
02826 有前景嗎？

龔成老師︰

ＧＸ中國雲算（2826）之投資目標為追蹤中國雲端運算指數ＮＴＲ之表現。

是高增長的行業類別，我自己都睇好的，加上投資這基金比單一股票，有更大的風險分散能力，可以作長線投資和月供，但預佢價格上落會較高。

月供比較適合用一些最高質素股票去做，暫時細價股無理想目標。

------------------------------------------------

Q19684：

老師你好，我係投資新手，我睇中左隻6823用作收息用，打算買5手，我已經喺10.04買左1手，你成日建議大家要分注入，我之前無買過股票，所以見到6823跌穿10蚊又心大心細想入多手。

其實分注有無話個股價跌幾多％，可以再入，唔該晒！

龔成老師︰

香港電訊（6823）的業務穩定，盈利穩定，加上用100%派息的政策，雖然增長力不強，但用來收息，這股絕對不錯。

"分注"主要睇你資金可分成多少份，一般每注相隔10-15%左右。

另一個方法，係按時間，例如每2、3個月就入一手（不論當時價格高低），直至資金用完。

------------------------------------------------

Q19685：

龔成老師你好，我今年30歲，經朋友介紹下接觸你的專頁並於上年3月開始學習投資。現持貨如下

1211 @50 $44
27 @1000 $51
9988 @200 $232
303 @200 $46
1177 @1000 $6.75
另月供$2000 1448 @380 $7.89

想知道現時配置如何可以更進取？

如有流動資金5萬，現階段可保留現金還是再選多一隻股月供？

你對於811有咩睇法呢？
謝謝你！

龔成老師︰

你年紀雖然可以承受較高風險，但組合中己有很大比重在潛力股上（1211、9988、1177、1448），已經太過進取。

未來你應慢慢將組合比重，調節至"平穏增長股"和"潛力股"各一半，會較好。而月供分面，建議你都抽$1000去供一隻"平穏增長股"。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）

現市大市在合理區，流動資金5萬留來等大跌市機會。

偉易達（0303）增長力唔強，主要係收下息，唔好再加注。

新華文軒（0811）在內地從事圖書、報刊、音像製品及數字產品等出版物的編輯和出版。

初步睇佢都有投資價值，但你唔好預佢係爆升類，長線只會係平穏增長。現價在合理區，可分注入貨。

------------------------------------------------

Q19686：

龔sir 午安 請問bc科技 863 此類股份值得去投資嗎 前景如何

龔成老師︰

BC 科技（0863）主要在中國內地從事提供廣告及商業園區管理服務。另外，於香港從事數字資產平台及區塊鏈相關技術業務。

除左商業園區管理服務收入較穏定外，其他分部都十分波動。過去集團一直處於虧損狀度，唔係咁理想。

我唔會話佢完全無潛力，但現時情況，若要投資就只宜好小注咁博下。同時你要明白，投資此股風險唔細。

------------------------------------------------

Q19687：

龔sir，你好，近一年開始follow你的FB改變左我既投資理財觀念

我今年三十歲，我同男朋友月入大約四萬，早年因為我貪心，借左一筆錢投資，不過輸哂，依家每個月要還七千，仲要還兩年。

我同男朋友計劃結婚，但唔諗住生小朋友，睇左你FB分析過後，我地兩人合供股8000蚊

700@4000
2382@2000
1177@2000

我有一樣野諗唔明白

你既股票勝經提到，我地應該要擁有優質股先係最好既資產。

咁如果幾年後，我應係租樓住繼續供股，定係賣左d股票套現去買樓呢？

到時退休後，如果冇左收入，我地既資產係咪可以夠我地俾埋租金呢？

所以我一直都唔知應唔應該要買樓？
最後想再次感謝你啟發倒我。

龔成老師︰

由於現金長線只會貶值，所以我地要透過"優質資產"，去做財富增值。

"優質資產"不單係指有質素的股票，物業、生意、的士牌等等，都係屬於優質資產。

當我地開始時，由於資金唔多，所以最容易做到財富累積架方法，就係投資"股票"。

當到你財富累積到一定金額，就可以買入細價樓，最後換成你心目中架DREAM HOUSE。這個過程和策略，在我新書《5年買樓4步曲》有詳細解釋，你可以睇下。

最好能做到「股樓並行」這策略。

另外，我想你留意多2件事。首先，你年紀雖然係增值的黃金時間，但月供都唔可以集中晒係潛力股。

你現時組合中，3隻都係潛力股，增長潛力大，但風險同樣高。你應該係"平穏增長股"和"潛力股"比重，各佔一半，才算平衡。

現時大市只在合理區，每月資金唔好盡用。最好留有部份，等大跌市出現時，可以用來掃平貨。

平穏增長股︰盈富（2800）、銀娛（0027）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）

第二，若果你現時未清的貸款，利息係好高，最好先還清貸款，才開始投資計劃。

------------------------------------------------

Q19688：

老師。6855亞盛醫藥終於快到買入價40.85。等了一年。
如到買入價應該解套還是繼續持有好？

有一隻藥可能會在今年上市

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

亞盛醫藥（6855）這類新上市時間唔長架股票，風險較高。另外這股最大的問題，是未有正式的盈利。

佢主要從事生物製藥業務，核心治療領域包括癌症、ＨＢＶ及衰老相關疾病。到目前，佢共有8款候選藥物進入臨床開發，正在進行28項臨床試驗和21個在全球範圍內提交的ＩＮＤ（試驗性新藥）。

企業不能話無潛力，但不確定性實在太高，是較高風險的類別，有危有機，只可以話，如睇好佢的產品將來市場發展，而現時佢佔你組合比重又唔多，可以守住先，再觀察。

------------------------------------------------

Q19689：

老師， 你曾經推介過的1448， 現在可合理入嗎？

龔成老師︰

福壽園主要在中國從事殯儀及相關業務，主要可分為3 個範疇：殯儀服務、墓地出售、墓園維護服務。

以收益及地理覆蓋範圍計算，福壽園是中國最大的殯葬服務商。福壽園是首批進入中國殯葬服務業的私營企業，以企業化經營殯儀業務，主要針對較為高端的市場，並有一定品牌。

由於此股有一定質素，所以長期處於偏貴水平。現價計都仲係略貴，$7左右算係合理區頂部，這時才分注入貨，會較理想。

------------------------------------------------

Q19690：

你好龔sir，我手持2018瑞聲科技 1000股，$122買入，已持貨2年以上，我見最近1177回到合理區，是否應該賣出2018轉買1177？

因剛轉工作，沒有太多資金，剛時不想再將資金投入股票市場，以此方式轉換是否合適？

龔成老師：

其實瑞聲科技（2018）本身都有質素，佢有一定的規模與技術，長遠發展正面，不過，佢增長力不是好強，只能視為平穩增長類別。

現價合理，而你當時買入價為貴，由於只是平穩增長類，因此較難上翻去。

如果你想組合有較高增長力，的確可以考慮轉其他。

中生（1177）有潛力，現價合理區中上部，如果你真的想轉，可以等佢再落多少少先做這動作。

另外，你預留現金是適合的。

------------------------------------------------

Q19691：

您好，我本身係草根出身，因為細個屋企債務問題，成日俾人逼遷，所以好想擁有自己物業。

我2010年畢業，用地獄式儲錢方法，2014年成功上左車。

但係之後因為要供樓，根本無可能再好似之前咁儲到咁多錢，感覺好似係瓶頸，無辦法再增加累積財富，頹廢左3年做月光族。最近睇到您既fb同書，突然間覺得唔可以再咁落去，好想問下您意見應如何走落去突破瓶頸。

我今年32歲，月入$37000，擁有一個自住嘉湖山莊3房單位（尚欠約280萬，月供約$12000），一隻約30萬既每月收息債券基金（每月收約$700），擁有少量股票，包括

匯豐（1手$45入）、
友邦（1手$19.68入）、
財險（2手$13.86入）、
渣打（4手$61.8入） 、
領展（1手$69入）

正著手2021年1月開始供股
$2000 騰訊
$2000 盈富基金
$1000 領展
手頭上有可投資現金約$15萬
我依家應該做咩好？

龔成老師︰

其實當你供樓時，都是進行財富累積，當然，我會建議盡力做到股樓並行，而不是每月供樓無錢剩。

當我地投資增值，會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。匯控（0005）和收息基金都是以收息為主，增長力欠奉，唔建議持有。另外，見你組合有好多銀行與保險類股票，其實集中在金融相關，你宜進行調整。

你現時最新月供組合，適合你。現時大市在合理區，現金和股票最好各一半，因此15萬先儲起，等大跌市出現，才加大力度掃貨。

而你現時要做有2件事，首先努力增加自己投資知識，睇書、新聞、上課程。到出現大跌市，相信可以令你增值做得更好。

另外，睇翻自己開支用左係邊，以你收入和供樓狀況，月供比例唔應該咁少。你應盡量空出資金，在這個年紀做好財富增值，咁會對你最有利。

------------------------------------------------

Q19692：

sir,1652 可否長揸

龔成老師：

福森藥業（1652）佢從於中國事研發、生產及銷售多種用以治療感冒及發熱、心血管疾病及貧血的中成藥及西藥產品，核心產品為雙黃連類感冒藥。

佢生產、推廣及銷售福森品牌的幾十種藥品。產品組合分為：

（１）雙黃連類感冒藥，包括雙黃連口服液及雙黃連注射液，及（２）其他中成藥及西藥產品，如複方硫酸亞鐵顆粒及鹽酸氟桂利嗪膠囊。

業務不過不失，但見唔到有好強的獨特性，同時企業規模較少，有風險。

這刻未見有好高的投資值博率，投資價值一般般。

------------------------------------------------

Q19693：

老師，我想問下3998波司登有質素嗎？因為已入手12000股多年

可以長期持有嗎？

龔成老師：

波司登（3998）主要在中國從事品牌羽絨服產品、貼牌加工產品及非羽絨服產品的研究、設計及開發、原材料採購、外包生產、營銷及分銷。

品牌與規模不差，在一定的業務質素，生意有增長力，盈利都不差。這股有長線投資價值。

不過股價上落就較大，現價都算合理，都有可線投資，但不是高速增長類型。

------------------------------------------------

Q19694：

龔成sir你好，
想請教一下我的情況

我同我先生39歲，都係自由身創業，疫情下大家都受影響...

收入大減，同時而家都用緊積蓄來生活（包括租樓租office)

本來想抽居屋上車（因有政府做擔保可以借到高成數按揭），但可惜抽唔到～～

同時都明白抽居屋唔容易，所以如果可以，想滾大舊錢，如果可以比到多啲首期既話，就可以買到私樓......唔洗無了期咁等......

現有積蓄約$150萬，應該如何分配會比較好，同埋適合買邊幾隻股票。感謝！

龔成老師：

由於你地現時收入受影響，因此在投資上，唔好太進取，要留一定的現金。到之後收入正常先加大投資。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你的年齡，可投資「平穩增長股」小注「潛力股」。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股可考慮：安碩恆生科技ETF（3067）。

3067這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19695：

老師我係你學生，想請教688估值:

PE: 5年取3年:6.621-6.8
EPS(5年平均): 3.844
合理股價:6.621X3.844X1.2-6.8X3.844X1.2
股價合理範圍: 27.49-34.50

美國列中國海外母公司黑名單及明年所有美國公司要賣中所有中國企業股票，這是短期因素，但長遠並不會影響688基本賺錢能力。

那麼，現價在17元以下是價值便宜區，但短期仍要承受股價下跌風險?

688現在是買入機會？

想問老師，以你所知，688的質素是否有負面地轉變？

龔成老師：

你在估值時要留意，佢的盈利包左物業重估因素，所以你要調整翻先得。

另外，中央有打擊樓市的政策，中短期仍會對佢不利，因此估值時都要保守翻少少。你要調低翻估值。

中國海外發展（0688）不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。

可以視這股為平穩型的企業，現價合理。當然中短期可能因樓市一般而股價一般，但長遠，仍是可以的。

------------------------------------------------

Q19696：

老師，我已記錄了兩個月自己每日的支出，整了個開支記錄表，真的發現自己有好多唔應該洗錢既地方，依家買嘢想清楚「需要」先買。我覺得真係很好的一個習慣。

還有因為認識了你，我改變了好多之前唔好的心態，同埋依家個人好正能量！我覺得你應該多一個花名是「心靈雞湯大師」呀！

龔成老師：

記錄自己的支出好重要，我每日都會寫低開支，同時每月月尾，都會做個人收支表及個人資產負債表，對理財好有作用。

大家加油！保持進步！

------------------------------------------------

Q19697：

銀娛$59左右，可入注了嗎？還是有機會等佢跌多5-8%先？因為一手都成5萬幾6萬。

領展都係升緊，現價約$71，可入首注了嗎？

福壽園我諗住等佢$7以下入注！

龔成老師：

銀娛（0027）有質素，現價合理，你分注投資就得，可長線。

如果你資金不多，怕一次過入，可考慮月供。

領展（0823）合理價，可分注投資。

福壽園（1448）等$7以下。

------------------------------------------------

Q19698：

龔SIR!
1. 請問3067每月固定買2手這個模式分注吸納, 可以嗎?

2. 港鐵0066, 現在無貨係手, 幾錢入場較好? 見佢不停升緊, 打算每季買一手不斷儲貨, 之後長線持有, 可以嗎?

龔成老師：

1）可以。這方法可進行。安碩恒生科技（3067）可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

2）現價仍在合理區，小注投資，等跌再加。

你每季入貨都得。

------------------------------------------------

Q19699：

龔成老師你好！本人今年44歲，因疫情關係現在待業，亦因為這個原因所以每天也有留意股市、財經、新聞行情！

心思思想入市但不知從何入手！知道你有出好多書比新手，請問那一本適合我，我應從那一本開始看起？

龔成老師：

記住，你現時待業，風險承受能力會較低，財富分配宜保守少少，留一定的現金，真的閒錢才可投資。心態上，唔好一心想靠進取投資去心急有回報。

不如我建議你做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q19700：

Hi老師，請問除左你推薦既書之外，仲有冇其他關於成功，致富呢類型既書推薦睇

龔成老師：

以下是我認為適合初學者睇的書，部分要到圖書館找的：

《我十一歲，就很有錢》
《經濟蕭條中，七年賺$1500萬》
《富爸爸，窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18901-Q18920）

Q18901：

成哥你好 我最近被老細解僱 解僱的原因唔係我做錯事 是因為我覺得有件事唔合理就同老細話真心話 可能老細覺得我頂到佢而將我解僱 覺得好唔公平

平時我好勤勞做野 我依家可以怎 好迷茫係哩個疫情下 突然冇左工作

本來念著可以邊返工 邊創業 創業是我的目標 依家咁 我都無知怎好 依家突然停左落黎資金也不夠多到可以放膽去創業

龔成老師：

老闆都是一個人，每個人都有死穴，正確的說話並不一定是適合的說話。

可能公司原本都想減少人手，有時當有機會，就會行這一步，你唔好將「自己是否有問題」太過上心。最重要是想想之後的路。

有時上天好得意，表面上給我地一個難關，但棍其實想我地突破。我過往都有經歷人生高低，低谷時當然唔開心，但而家睇翻，我人生有幾次突破，都是來自低谷的。

一件事已經發生，你無得改變，反而應想想點利用。

你一向都想創業，這刻就是機會，是你一生中最難得的機會，可以比你盡全力去創業。唔好將「做生意就要資金」視為等號。你現時每天24小時要做的野，就是想無本/少本的創業方法。

當想到方法後，就要大膽去做。加油！

------------------------------------------------

Q18902：

您好！龔sir，好多謝你！

我都是80後，我在2016年買了你的《80後2百萬富翁》，讓我對投資股票致富有一種從新認識。之後一直關注你FB 的無私問答，學習很多你的理財概念，多謝你！

直到2018年9月 終於有機會報讀你的【投資倍升股課程】，我好開心，我放晒手頭上的所有股票，當中有的輸很多，但因為你教的知識，只投資優質企業，我開始從新部署投資，而家我真的成為2 百萬富翁了。

不過，好可惜，我沒有按照原來計畫進行，否則資產會更多，我當時沽出所有股票，從新部署的資金是$1.08M，原計畫是這樣分配的：

1.1448 $5 投入$10萬
2.1177 $5 投入$10萬
3.1211 $35 投入$70 萬

可是在2019年初 1177 納入藍籌後，跌到$5 以下我不敢入，在升到$9.8 入了5萬股。而1211 我又心急在$46.4入了1 萬股，但其後跌到$35 樓下，我又不敢加注入貨。現在檢討自己當時的計劃點解唔去執行，是目標不明確而且亦都沒有耐性。

今年10 月我再報讀你的【倍升股進階班】，眼見1211 升了很多，在升到$150 之前，我沒有太理會的，因為用你教的估值方法，我大概計算1211 在$60 幾是平宜、在$148 是合理、在$236 是貴的。可是她實在升得太急，去到$180-$200，我實在膽心。不過聽你在課堂上分享後，我又不理會中短期的升跌了，就等待她成長。

進階班過後，我現在計劃未來10年的倍升股，暫時安排60萬資金在科技、雲端、新能源和美容行業，在留意美國和中國的企業：計算機：600588 用友網絡，氫燃料電池：Bloom Energy（BE.US)、688339 億華通，美容：Yatsen 逸仙電商（YSG.US)，以後想再請教你。

不好意思，講的太長，真心的多謝你！
好期待你本《80後千萬富翁》，我都要做千萬富翁！

龔成老師：

其實你擁有一定的選股、分析企業質素、計算企業價值的能力，這方面問題不大。你留意的10年版塊，都是有潛力的。

不過，你在心理質素上，過往仍有部分與散戶一樣，這一定要進步，你要多閱讀巴菲特的書，他的心理質素好強，完定全全將「股價」放在一邊唔理。

你要學會唔睇股價，睇「企業」。如果你要睇大錢一定要在心理質素上提高。你其實已明白方向，但執行上就是出問題。

我會建議你用課堂提供的「企業評估表」，填好投資策略後，要跟著做，例如當股價跌時，唔好驚，要睇當時寫低的方法去入貨。

入貨後，如果股價大升，要跟著當時寫低的方法去持有。

再次恭喜你成為2百萬富翁，期待盡快在千萬富翁俱樂部與你見面！加油！

------------------------------------------------

Q18903：

老師為什麼近期1873跌得咁利害，想知道個原因，找尋這方面不是太精，我以加應該繼續持有還是放好？

龔成老師：

維亞生物（1873）雖然業務有發展，但佢本身有一定風險。所以，只要市場預期變化，或出現一些好與壞的消息，都會令佢股價上落較大。加上佢上市後升左好多，回翻D都正常。

佢主要就臨床前藥物開發提供基於結構的藥物發現服務，例如基因到蛋白質（Ｇ２Ｐ）及基因到結構（Ｇ２Ｓ）。

睇翻佢主要客戶，主要包括位於美國、中國、歐洲等地的製藥及生物科技公司。

生意都有不差的增長，但毛利變化大，企業賺錢能力仍有不確定性，以估值計，現價唔算平。

業務是有發展的，但仍有好多不確定性，因此，如果你持貨太多，宜減少少。如不算多，就持有先。

------------------------------------------------

Q18904：

你好大師，想問問波音的行情 現持有270股

龔成老師：

波音公司（NYSE: BA）是美國知名開發、生產和銷售飛機和相關產品公司。近期疫期，令航空相關類股份大跌。

航空業本質有風險，不過，這股有獨特性，因此，質素算是中上。基本因素無問題的，本質強，有技術，但現時一定對佢有影響，而影響有多大，就要睇肺炎持續的情況。

你先睇下現時持股比例佔財富組合是否過多，如果佔比不過多，可以持有。

------------------------------------------------

Q18905：

Hi 老師，而家中國鐵塔係咪算合理甚至平了
同埋雷蛇既升幅係因為業續好左嗎，定係另有原因？

龔成老師：

中國鐵塔（0788）增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

但如這刻買入，分注入可以的。

雷蛇（1337），業務有好轉情況，虧損有所收窄，加上之前多次進行回購，都利好左股價。

但要留意，雖然可以有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

------------------------------------------------

Q18906：

老師，福壽園我5.7 平均價入左貨之前
一直都想增持 但佢長期 7.5 up

今年做過估值 $6.25 - $7
但佢好硬正

中生製藥都有幾手
除此之外 ～ 仲有咩水桶一既股 可以入呀

龔成老師：

福壽園（1448）我都有類似情況，之前入左後上升，想加注都無機會入。

有時無計，我地都要平衡風險與回報，唔好太過高追，現價略略貴，如果無貨就可小注，如果本身有貨，就等回翻D先。或最多小小注加注。

至於中生（1177）都可長線的。

不少潛力股都上左好多，現價唔平，唔好太心急。

舜宇光學（2382）都有D潛力的，現價合理區中上部，算是無咁貴的一隻。

另外，你可考慮安碩恒生科技（3067），因為是一個組合，風險度減低左。但現O價在合理區頂，建議月供，唔好大手入。

------------------------------------------------

Q18907：

老師，其實係呢度好想多謝你：你財務自由既經歷真係令我相信自己有一日都會做到，令我開始研究巴菲特同蒙格既投資概念

對投資認識愈深，愈知道打工無意義，因為真正致富之路不是靠「加」的。

但我現階段又無辦法唔打工，日日返工都要面對人事關係同受氣；投資致富又急唔來。想請教如何可以調節自己心態，最後達成財務自由？

龔成老師：

好！你最重要是保持進步，我由18歲開始，狂睇投資書，相信自己可以擁有財富，最後一步步完成目標。

我自己都經歷了一段時間，一邊打工，一邊並行發展其他項目，例如花時間研究股票、做生意等。其實你慢慢會見到自己的財富上升，信心會因此而建立，最重要是「堅持」！

我相信只要你保持進步，都可以做到的！

------------------------------------------------

Q18908：

經常留意龔老師你評論股票合理價值同現價 有時都會相差頗多 例如比亞迪你有提過合理價在4x 咁請問係唔係因為隻股票已被炒起

有可能回到合理價 應該到合理價先部署呢？ 但好似回到合理價等可能性又不大

龔成老師：

合理價是一價區，你預過往比亞迪（1211），$40-$80為合理，$40以下平。當企業價值向上，估值都會上升，例如業務與盈利等，實質向上，就會令企業價值增長，合理區的範圍就會提高。

至於股價大升，我地就要小心分析，是價值提高？還是炒起？因為兩個答案都有可能的。

至於比亞迪，我相信就算價值提高，都唔建議太$100以上去追。我地只有耐心等佢下跌，如果真的好想入，就最多等回翻D去進行月供。

------------------------------------------------

Q18909：

你好呀，成哥。３年前報讀左你既課程，亦持有左比亞迪３年。

中間上上落落，都未放貨。過去３年，雖然未曾成功到之前定立既２年２００萬既目標，不過都算係慢慢地向１００萬進發。

而希望可以係２０２１年完結前成功到達人生第１個１００萬，得到最低既入場票。可以向彩務自由進發。
亦都定立左未來１０年財務自由既目標。

投資路上係孤獨既，雖然不停向身邊既人分享理財既概念，但係發現原來真係冇咩人會同自己一樣會跳出貧窮既框架。令到懷疑自己。

係反思既同時，亦希望可以行快２步，達到了財務自由。雖然係冇SHORT CUT。

岩岩由做左６年既公司，跳到去新環境，算係跳出左Comfort zone，唔知自己既決定係岩係錯。舊公司發展唔錯，但自己明顯做到滑啞了。新公司亦未知係咩情況，所以有ｄ迷茫了。

另外亦想發展副業，開一間ONLINE Shop，雖然唔算係被動收入，不過都叫做可以增加收入，增加買股票既成本，當然如果可以取代正職係最好啦！好讓自己可以投放更多時間係自己身上。就係前期需要投入一ｄ資金。你認為呢？

雖然財務自由既路上有好多困難，但至少有你既成功例子。

再次多謝你既教導，以及花時間睇我既抒發同故事！

龔成老師：

你能夠一直持有比亞迪（1211），實在太好！這是你應得的回報，香港人無耐性，無「種樹」的概念。我地投資，又或建立事業，都要有「種樹」的概念。

財務自由並不容易，但可以一步步做到，我都只是由月入$1萬開始。

至於ONLINE Shop，你可以投入適量資金，但不用太多，市場好多時都是試出來的，你投入資金，如果擊中市場，反映其實會好明顯的，你到時先加大投入。這方面可以好有發展的，加油！

------------------------------------------------

Q18910：

龔sir , 話說睇完你Ｄ書之後，明白左長線投資既概念，但原來實際執行上又發現左問題想分享並向你請教。

首先，我係4月買入人生第一隻股票2800，＄23.45。之後係5月國安法消息個日買入2手823 ，＄60。我對自己呢兩次行動都覺得合理。不過到左8月底，我受朋友影響以52.5高位買入6060...係10月頭又以3.9買入1415。我覺得自己係8,10月所做既決定係吾理智，但點解都買左係因為覺得吾抵...

因為我記得4,5月既時候700只係＄360，9988係＄170，1211係＄38，285係＄14,15，3690係＄70，1810係＄10仲有好多好多優質股都屬便宜，但自己冇把握到...反而自己持有既升幅只有幾%...我想問你自己有冇錯過呢Ｄ機會而後悔？

係近日，我重新睇多次巴菲特同你既書，重新確立長期持有既方針，我自己亦開始分析手持既公司。2800,823都冇問題，但6060同1415我分析完有問題想問。

先講6060，佢係互聯網保險，股東包括螞蟻，平安同騰信，毛利之前三年都係虧損，2020半年先開始賺錢，不過ROE 係負數，其實吾應該買入，而合理價大約係得＄15？我竟然以52.5買入...

至於1415，佢係Apple 相機供應商，毛利最近5年都穩定，現金流持續上升，負債率下降，不過ROE 比較低，吾過10%，而且市值只有35億，但我計過佢個合理價係＄5，＄4係便宜？所以我覺得3.9入係冇問題？呢個公司係被低估？

辛苦龔sir 了！

龔成老師：

我自1999年開始買股票，頭幾年，經常都有你的經歷，贏少少就賣出優質股，但之後卻大升，之後持有無質素的股，又死都唔止蝕。

其實，學習要過程的，你已經不斷進步，但好多野要你經歷過先得。

我現時，平均一年只買1、2隻股票，就是想自己「分析得較準」才出手，買入後，長線持有。

你要學懂睇得準這概念，唔好太心急投資，買入及賣出都是。

眾安（6060），業務都有發展力的，但業務仍有不確定性。佢最近開始由虧轉盈，反映之前的投資開始有收成，暫時睇是正面的，但之後的發展仍有未知，這一定會令股價波動。市場考慮到佢的增長力，所以比佢較高估值，你要分析，佢「將來」的情況，因此，你買入價雖然貴，但之後就要睇佢將來發展。

至於高偉電子（1415）本質算是不過不失，其實幾年前熱炒，令這股升至過熱水平，之後市場發現行業的增長並不是高增長，只是平穩增長，所以股價都有調整。

因此，有時都會出現市場估值過高的情況，都要留意這點。

這股盈利都幾波動，增長力是有的。但整體質素算是中等，潛力度有少少的。不過，現價已過了合理區頂，要注意風險。

------------------------------------------------

Q18911：

龔 sir, 你好，我是你的讀者，我有齊你的書。

想問下，我月供 823, 66, 12 一段時間，是數年，如果3隻中，想只選擇長供 1 或2隻，應如何選擇? 謝謝你 !

想聽下你對 3690, 9618 美團和京東的看法。 已升了很多，考慮月供。謝謝你

另外，多謝你推介 1211, 我月供了幾年，之前已經賣出一部分，繼續月供

龔成老師︰

你這個組合，有一個較大架問題，就係集中左係地產股（港鐵0066都算半隻）。

單一行業唔應該超過組合3成，否則一出問題，你整個組合就會受到過大打擊。

港鐵（0066）可保留，另外2隻最好2選1。之後，再加入其他類別股票，去平衡翻個組合會較好。

美團點評（3690）都有質素，佢業務巨大，同時增長快，不過，佢仍是有危有機的股票。

業務較新興，過往一直處於燒銀紙階段。至2019年，才開始有少量盈利，我比較怕這類企業。這類企業波動性太高，不宜月供，直接投資也只可小注。

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。

過往的財務數據，收入每年都是20%左右增長，2019年收入為5700億人民幣，已經有實質的盈利，用佢2019年盈利為120億作初步推算，現價唔平。當然，這股有一定的增長力，之後的市盈率會減。

如果你要月供，都可以。但此股波動性較高，不宜佔比重過多。

比亞迪（1211）已經貴，你可以停一停個月供，或減月供金額。

------------------------------------------------

Q18912：

龔sir你好，本人今年25歲，工作年資2年，公司做搞活動的，疫情前經常出差，工作多，風光時候人工連出差津貼加埋加班錢每月最高可以30K，即使淡季都有27K一個月。

疫情下工作量大減，所幸自己有個良心老板，仍然支付基本人工，現時收工都有25K。

以前收入多，懶得計算自己支出，糧尾有錢剩都不會理會，疫情下收入少了，自己連續幾個月都「月月清」。

今年4月終於開始紀錄支出，發現自己入不敷支，支出大有兩個原因：

1. 家庭開支佔了收入超過一半
- 本人與父母同住，除家用外，水電媒差餉都要我負責，政府補貼用盡後，雜費貴了很多
- 同家人交代後，現時減了家用，家庭開支現佔收入3成

2. 無謂個人帳單太多
- 我本身有太多訂閱，現取消了絕大部分
- 現時個人必需帳單只用幾百元左右，但去年出意外受傷，現時仍要覆診，扣除保險後每月仍要付約$1500，但康復進度良好，覆診次數持續減少，相信年底醫療費用可減至每月$400

本人7月可以買美股，每月投放$10000，幾個月來賺超過15%，股票屬長期投資。

但問題來了，因為本人理想30歲時創業，所以現在要存錢作本金創業。現時可動用現金約13萬，但之前參加了一間英國FinTech公司眾籌投資，實際可用資金約10萬。

按現時的資金分配，假設未來5年收入和基本支出不變，每月要存到$1000都有困難，所以我心中有幾個方案增加現金流，想聽聽你意見：

1. 減少每月投資
- 每月$10000可能過多，理性上我應該減少投資
- 你認為我應該減多少？

2. 副業
- 我打算重操大學時的故業，接freelance工作，但收入不會穩定
- 我有興趣開網店，但又擔心業績不佳最終得不償失

我理想目標每月存至少$5000（其後存款目標逐步增加），同時又不大幅減少投資
龔sir，你對我的情況有咩建議？

最後，你對期權有咩睇法？你會唔會建議我試下去倍大獲利機會？

龔成老師︰

首先，投資部份資金，其實不宜減少。反而你應該盡力令自已可以儲更多錢，去做投資增值。

我自已本身對美股無特別去研究，你要睇翻你投資架美股，是否有質素和增長力，才決定是否維持下去。

至於副業方面，無論freelance、網店，我覺得你都可以去試。

有些網上生意未必一定要成本好高，你可以從自已專長或者興趣著手。開頭業績未必會理想，但當你開始掌握架時候，就可能會有理想架收入。

由於你現時主力供美股，我建議你將10萬和每月將部份金額投資港股，去分散風險。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、港交所（0388）、長建（1038）、領展（0823）、希慎（0014）、太古地產（1972）或潛力股︰比亞迪（1211），中生（1177）、福壽園（1448）、安碩恒生科技（3067）、阿里（9988）、騰訊（0700）。

現時大市只是合理區較底位置，你現有10萬資金可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨。

而"期權"這類工具，我就唔建議你去用。因為投資從來都係睇質素，唔係去估走勢。

------------------------------------------------

Q18913：

老師你好
請問經過D次疫情或其他因素
影響基本面後

如以下股票只能選兩隻長期月供
請問可以選那兩隻呢?
2388,66,1038,012
感謝老師解答

龔成老師：

上述的4隻股，基本面無太大改變，長遠仍有質素的。港鐵（0066）、恆基（0012）完全不用擔心，只是中短期弱，長遠無問題。

至於長建（1038），因為歐洲因素，回勇要較長時期，始終歐洲經濟弱，但長建不是無質素的。

中銀香港（2388）有質素，不過銀行業的賺錢能力，已比過往年代減少左。

------------------------------------------------

Q18914：

現價的士牌 龔sir點睇

龔成老師：

合理價。

的士牌是投資工具的一種，投資者可利用借貨，付首期購入的士牌，然後收取每月穩定的租金收入，原理與買樓收租一樣。

按揭成數高、管理不難、買賣成本低、限制少，所以都是一個不差的投資工具。

不過，近年出現的叫車程式，對佢有一定的影響。相信長遠，的士牌的增長有限，只是一個平穩及收息的工具，前景只是中等。

如果你資金較多，作為財富配置的其中一部分，可以。但如果本身資金唔算多，就等跌多D先考慮。

------------------------------------------------

Q18915：

老師，如果按一般正常水平嘅生活要求，增值財富到咩水平先足夠進入現金流嘅狀態？

如近年想部署現金流模式應該如果投資？
thanks

龔成老師：

每個人的情況不同，首先，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

例如你財富已滾存到$400萬，投資一些6%的收息工具，一年收息$24萬，每月平均收息$20000，如果你每月$20000是足夠的話，這數就是你目標財富數目。

------------------------------------------------

Q18916：

龔成老師你好，我剛嘗試學投資，朋友推介我follow你學習！我啱啱出社會，對投資概念唔多，自己有上網搵YouTube教學了解咗下一啲股票股市用詞，但都係唔清楚一開始應該點實際行動。

自己家境貧窮關係唔好，讀書又一大筆學債，現時月入萬令，讀書時期part time完全存唔到錢，都用哂係生活所需。

好想可以俾自己一個好啲嘅生活。請問你有冇建議我應該第一步點做><？

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

我希望你能夠每月供到$2000，慢慢累積財富。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q18917：

龔成老師你好，請問你點睇黃金，京信通信2342.HK，而家值唔值得買，有無機會升，謝謝你。

龔成老師：

黃金，我自己都有投資。方法好簡單，你不是睇升跌，而是「財富組合的配置」，現金永遠貶值，黃金總有一定的價值，因此可以在組合中，佔比一部分，長線持有。

但由於無現金流，因此又唔值得持有太多。1%-3%已夠。

京信通信（2342）主要從事研究、開發、製造及銷售無線電訊網絡優化系統設備、提供相關工程服務，以及提供電信服務及相關增值服務。

現時5G的發展，都會對佢有利，但這股規模唔算好大，因此又未算最強之列。但由於規模細，當企業發展時，潛力較可較大。

質素都算有的，但就不算好強，整體上都有投資的價值。不過睇翻佢最近的業績，又唔算好勁。

此股唔值得太大比重，投資時要注意注碼。

------------------------------------------------

Q18918：

龔sir, 你好！我追看了你的專頁好一段時間，穫益良多，謝謝你！

1）眼見很多潛力股股價已上升不少，我想問一下當有大IPO 如螞蟻上巿時，很多大戶/基金/散戶會從現有股票抽走現金去抽IPO，令現有巿場上的股票價格下跌，是否應該藉這時候吸納一些潛力股？

2）另外想問下你對 1772 贛鋒鋰業的看法。

謝謝！

龔成老師：

1）有可能，因為佢地會做配置，就算上市後，這些咁大型的股，基金都一定要持有部分貨，可能就要賣其他股去買入，平衡翻整個組合。

但其他股會唔會因此而下跌，未知，如果下跌，可以買翻D。不過，你都要計合理價值。

2）贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正或入，始終行業有一定的變化。

------------------------------------------------

Q18919：

老師，我6060，47入，9923，50.7入，9988，227.8入，1833，99.7入，354，5.8入，應該點部署好，以上可以長線持有嗎？謝謝龔老師

龔成老師：

你要留意翻，你組合集中在潛力股類別，這會有較大的風險。

雖然上述股票，不少都有質素，但你最好平衡翻個組合，加翻D平穩增長股類別。眾安（6060），移卡（9923）風險度相對高少少。其他則可長線。

現時大市整體算是合理區，因此，你都要持有一定的現金，等機會投資。

------------------------------------------------

Q18920：

你好呀,龔老師,想問一問3隻股票:

1337(2.08)買入
1415(5.91)買入
6998(31.75)買入

呢3隻你覺得值唔值得長線持有???

龔成老師：

雷蛇（1337）雖然可以有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

高偉電子（1415）本質算是不過不失，其實幾年前熱炒，令這股升至過熱水平，之後市場發現行業的增長並不是高增長，只是平穩增長，所以股價都有調整。

因此，有時都會出現市場估值過高的情況，都要留意這點。

這股盈利都幾波動，增長力是有的。但整體質素算是中等，潛力度有少少的。不過，現價已過了合理區頂，要注意風險。

嘉和生物藥（6998）都有潛力的，不過風險就有少少高。

佢係中國一間生物製藥公司，專注於腫瘤及自身免疫藥物的研發及商業化。

睇翻佢資料，佢正在開發的藥物產品管線包括4款晚期腫瘤的主要候選藥物，因此整體企業不是無潛力的，見佢生意增長快，不過燒銀紙中，有危有機類。

如果成功，股價可以上好多，但失敗，都可以跌好多，這股你預上落大，睇下你博唔博，如果小注投資，當博下，不是不可，但要明白風險較高。

睇翻佢資料，佢專注係腫瘤，以及自身免疫藥物的研發及商業化。

目前佢有十多項臨床試驗正進行，預計在未來12至18個月內，將分別向國家藥品監督管理局提交兩項新藥上市申請(NDA)，以及向國家藥監局及美國食品藥品監督管理局提交四項臨床研究用新藥申請(IND)。

業務發展力是有的，但業務風險存在，因此，這股唔建議大注投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

《送廿萬撐小店(8)》送200份「 腸粉/燒賣/牛肉球 - 三寶」《一記》 (每份約30 - 每張單限3份)

提名人: Kerry Choi
原因: 老闆係個3x歲的後生仔，佢好勤力，凡事親力親為。廚房、送外賣、樓面都係佢。最重要係佢的食物出品都好好。最近訂咗佢新年的自家製花生糕，超好食。值得支持和推薦！????
店名: 一記 (老闆: 江仔（Ben))
地址: 長沙灣福華街588號A舖
營業時間: 7am 至 4pm (年初十開工)
Tel: 6107 9986
無條件送出: 200份「腸粉/燒賣/牛肉球 - 三寶」(每份約＄30 - 每張單限3份) 或類似價格食品

送完即止，留意Facebook《李根興創業之友》通告。

食完，Whatsapp 收據至 90361143 (最好有QR Code)。 我用 payme/Alipay/FPS 或銀行戶口轉數給你。 (有時由於單據眾多，我們盡量一星期內轉數給你! 我助手可能太忙，但我唔會欠你。)

逆市生意難做，大家多多去支持小店啦!

Note:

(1) 歡迎提名你心目中的「用心經營」小店 (whatsapp 9036 1143)，不問政見/年紀/種族/派系，只講創業精神。我會親自到場幫他宣傳。

(2) 更歡迎你支持我$100，讓我繼續雪球越滾越大，送小店產品出街。Payme/Alipay/FPS to 97453555 或 bank in (1) Citibank 戶口 250-390 10935983 或 (2) 中銀 012 878 2 0106664 Lee XXX XX XXX Hing 或 (3) 我老婆 HSBC 戶口 178 399986 833 Pang XXX XXX Rita。Paypal to edwinlee@bwfund.com 也可。我一定會自己再貼錢送凸佢! 如有剩餘金額我會全數捐款給我 brother-in-law (Derrick Pang) 創立的 Lifewire.hk 慈善組織，幫助患有罕見疾病的兒童。

《送廿萬撐小店》2020年1月24日 update

【累積送出產品: 8項合共金額$39680】送出其他小店產品包括:

(1) 皇茶(老闆:Jessica，提名人:李根興)，旺角登打士街71號地舖。送100杯招牌東方美人芝士奶蓋配粉紅玫瑰茶，每杯＄36。每張單限3杯。(Status: 仲有約80杯)
(2) TC Cafe (老闆: 湯生/芳姐，提名人:李根興), 太子長沙灣道21至25號長豐商業大廈地下B2舖。送200件芝士蛋糕，每件＄19。每張單限5件。(Status: 仲有約150件)
(3) Supine 漢堡包店 (提名人 Evon Elsie)， 石門京瑞廣場一期2樓210舖。送50個巨人漢堡包，每個＄76。每張單限3個。(Status: 仲有約30個)
(4) 5C Plus 台灣手抓餅專門店(提名人:陳宜棒)，上水街新祥街1號地下D舖。送100個台式手抓餅，每個約＄35，每張單限3個。(Status: 仲有約95個)
(5) 羊城餅家(老闆:劉生，提名人:Ken Ip)，長沙灣元州街501號舖。送出1000個招牌黃金蛋撻，每個＄5，每張單限10個 (或類似價格食品)。(Status: 仲有990個)
(6) 明發小食魚肉湯碗仔翅豆腐花專門店(老闆:李太，提名人: Gibson Cheung)，深水埗基隆街239號舖，送出300碗招牌「手打生菜魚肉湯」或「馳名碗仔翅」或兩溝 。每碗約＄23 - 每張單限5碗。(Status: 仲有約280碗)
(7) 好運燒臘飯店 (老闆: 鄺羨予（予仔)，提名人: Tive 丘漢偉)，筲箕灣金華街21號地舖，送出60斤「蜜汁叉燒」。每斤＄118 - 每張單限1斤(或類似價格食品)。 (Status: 剛開始)
(8) 一記 (老闆: 江仔（Ben))，提名人 Kerry Choi, 長沙灣福華街588號A舖，送出200份「腸粉/燒賣/牛肉球 - 三寶」(每份約＄30 - 每張單限3份) 或類似價格食品 (Status: 剛開始)

送完即止，留意Facebook《李根興創業之友》通告。

食完，記住 Whatsapp 收據至 90361143 就有錢收。

#送廿萬撐小店，#送200份三寶，#一記

李根興創業之友 https://www.facebook.com/EdwinNetwork/

李根興商舖之友 https://www.facebook.com/edwinprimeshop/

李根興 youtube 商舖創業及投資分享https://www.youtube.com/channel/UCEN66AnLghXESgCDIsz-3Nw

《送廿萬撐小店(7)》送60斤「蜜汁叉燒」《好運燒臘飯店》 (每斤＄118 - 每張單限1斤)

提名人: Tive 丘漢偉
原因: 每星期免費派飯給有需要長者。 (下次派飯日期: 2020年1月31日下午5時)
店名: 好運燒臘飯店 (老闆: 鄺羨予（予仔))
地址: 筲箕灣金華街21號地舖
營業時間: 7:30am 至 8pm
Tel: 2866 2618
無條件送出: 60斤「蜜汁叉燒」(每斤＄118 - 每張單限1斤) 或類似價格食品

送完即止，留意Facebook《李根興創業之友》通告。

食完，Whatsapp 收據至 90361143 (最好有QR Code)。 我用 payme/Alipay/FPS 或銀行戶口轉數給你。 (有時由於單據眾多，我們盡量一星期內轉數給你! 我助手可能太忙，但我唔會欠你。)

逆市生意難做，大家多多去支持小店啦!

Note:

(1) 歡迎提名你心目中的「用心經營」小店 (whatsapp 9036 1143)，不問政見/年紀/種族/派系，只講創業精神。我會親自到場幫他宣傳。

(2) 更歡迎你支持我$100，讓我繼續雪球越滾越大，送小店產品出街。Payme/Alipay/FPS to 97453555 或 bank in 我 Citibank 戶口 250-390 10935983 Lee XXX XX XXX Hing 或我老婆 HSBC 戶口 178 399986 833 Pang XXX XXX Rita。Paypal to edwinlee@bwfund.com 也可。我一定會自己再貼錢送凸佢! 如有剩餘金額我會全數捐款給我 brother-in-law (Derrick Pang) 創立的 Lifewire.hk 慈善組織，幫助患有罕見疾病的兒童。

#撐小店， #送300碗魚肉碗仔翅

《送廿萬撐小店》2020年1月23日 update

【累積送出產品: 7項合共金額$33680】送出其他小店產品包括:

(1) 皇茶(老闆:Jessica，提名人:李根興)，旺角登打士街71號地舖。送100杯招牌東方美人芝士奶蓋配粉紅玫瑰茶，每杯＄36。每張單限3杯。(Status: 仲有約80杯)
(2) TC Cafe (老闆: 湯生/芳姐，提名人:李根興), 太子長沙灣道21至25號長豐商業大廈地下B2舖。送200件芝士蛋糕，每件＄19。每張單限5件。(Status: 仲有約150件)
(3) Supine 漢堡包店 (提名人 Evon Elsie)， 石門京瑞廣場一期2樓210舖。送50個巨人漢堡包，每個＄76。每張單限3個。(Status: 仲有約30個)
(4) 5C Plus 台灣手抓餅專門店(提名人:陳宜棒)，上水街新祥街1號地下D舖。送100個台式手抓餅，每個約＄35，每張單限3個。(Status: 仲有約95個)
(5) 羊城餅家(老闆:劉生，提名人:Ken Ip)，長沙灣元州街501號舖。送出1000個招牌黃金蛋撻，每個＄5，每張單限10個 (或類似價格食品)。(Status: 仲有990個)
(6) 明發小食魚肉湯碗仔翅豆腐花專門店(老闆:李太，提名人: Gibson Cheung)，深水埗基隆街239號舖，送出300碗招牌「手打生菜魚肉湯」或「馳名碗仔翅」或兩溝 。每碗約＄23 - 每張單限5碗。(Status: 仲有約280碗)
(7) 好運燒臘飯店 (老闆: 鄺羨予（予仔)，提名人: Tive 丘漢偉)，筲箕灣金華街21號地舖，送出60斤「蜜汁叉燒」。每斤＄118 - 每張單限1斤(或類似價格食品)。 (Status: 剛開始)

送完即止，留意Facebook《李根興創業之友》通告。

食完，Whatsapp 收據至 90361143 (最好有QR Code)。 我會用 payme/Alipay/FPS 或銀行戶口轉數給你。 (有時由於單據眾多，我們盡量一星期內轉數給你! 我助手可能太忙，但我唔會欠你。)

逆市生意難做，大家多多去支持小店啦!

Note:

(1) 歡迎提名你心目中的「用心經營」小店 (whatsapp 9036 1143)，不問政見/年紀/種族/派系，只講創業精神。我會親自到場幫他宣傳。

(2) 更歡迎你支持我$100，讓我繼續雪球越滾越大，送小店產品出街。Payme/Alipay/FPS to 97453555 或 bank in 我 Citibank 戶口 250-390 10935983 Lee XXX XX XXX Hing 或我老婆 HSBC 戶口 178 399986 833 Pang XXX XXX Rita。Paypal to edwinlee@bwfund.com 也可。我一定會自己再貼錢送凸佢! 如有剩餘金額我會全數捐款給我 brother-in-law (Derrick Pang) 創立的 Lifewire.hk 慈善組織，幫助患有罕見疾病的兒童。

#送廿萬撐小店，#送60斤蜜汁叉燒，#好運燒臘飯店

李根興創業之友 https://www.facebook.com/EdwinNetwork/

李根興商舖之友 https://www.facebook.com/edwinprimeshop/

李根興 youtube 商舖創業及投資分享https://www.youtube.com/channel/UCEN66AnLghXESgCDIsz-3Nw