【龔成問答信箱】（Q21801-Q21820）

Q21801：

龔 Sir, 岩岩上完你的投資班，多謝你悉心既教導，真係獲益良多！

我上完堂之後有d問題想再請求下你

1. 想問下「盈利」同「股東應佔溢利」分別在於咩？因為我記得你講過佢地是不同的，尤其想自己計 EPS等等數據既時候應該點揀？

2. 另外見到有同學問你增長率既時候，你用左年度化增長率 (上堂時都唔見你講過）而唔你用複式增長率 (CAGR)去計，想問下應該咩時候用邊個？

因為增長率不同，有代表性盈利可以差好遠

e.g. 388
年度化增長率:
5年增長 (9.11-4.76)/4.76 = 91.4%
年度化增長率: 91.4%/5 = 18%

CAGR:
(9.11/4.76)^(1/4) -1 = 17.6%

感謝龔 Sir!!!!

龔成老師︰

1) 財報上「盈利」，多數係包含「股東應佔溢利」和「非股東權益」。前者，就係股東真正可分到的盈利部份，也是你用來計算EPS用的。

後者，係一些非集團可佔有的盈利部份，這部份會在集團盈利中除去。

2) 其實2者係一樣，個計算方法如下。

(9.11 / 4.76) ，再開方(5-1)，只後將答案再減1，就係得出個增長率+17.6%。

你見之前18%，只係我將小數位進左位，其實背後答案係一樣+17.6%。

------------------------------------------------

Q21802：

龔sir你好，我想請教一下你。我買股票已有一年多，但資產不是升值很多，甚麼很多資金都放在股票裏拿不出來。因此想問下你我而家的投資組合是否有問題：

0005 @800股 (36.28)
883 @4000股 (8.11)
1211 @500股 (192)
2013 @2000股 (12.6)

3800 @1000股 (3.65)
6618 @100股 (110)
9633 @600股 (66)
9988 @100股 (287)

我覺得我買ge股票都好散，每隻都買小小咁，如果我而家加注，應該買邊隻？另外，我亦考慮買一D收息股或儲蓄保險，有穩定的資產增長。

麻煩龔sir有時間可以比Ｄ意見我！感謝！

龔成老師︰

投資股票，就等同買入一間企業，就算再優質的企業，要時間去升值。1年只係一個短期的時間，你唔好預期會有明顯的效果。

我地係投資增值時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時持股，大部部都係有質素和增長力。若你係年青至中年人士，這些股票係合適。

但收息股(包括匯控 - 0005)類，就不宜持有太多，因為佢主要係收下息，增長力較弱，會拖慢你財富增值效果。

"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

中海油(0883)質素中等，不宜持有太多。

其次，我發現你好集中係潛力股類(除了0005, 0883, 3800外)，佢地雖然有增長潛力，同時風險都較高，不宜持有過多。

就算你偏向年青，潛力股都只可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你先要加大翻平穏增長股部份，令組合更平衡。

而持股中，保利協鑫能源(3800)係較麻煩一隻。現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

------------------------------------------------

Q21803：

呀sir! 其實我好認同您 投資係長線 唔係短炒 所以我將來投資果喲優質股 我都會長擺係到 如非必要都唔放

不過 我想問下呀sir 您之前提過升一倍放一半 但如果我只入左一手 放一半會出現碎股問題 甘係唔係代表其實我要係低位入兩手或以上？我用緊富途牛牛做買賣 佢又好似唔比賣一半

另外呀sir 您堂上講到話一隻股票 好似港交所（388）佢既質素甘高 甘佢股價一定長期向上 甘如果我宜家唔入市 將來佢升到好高（假設$600）

甘我係唔係會錯過宜家既入市時機？

同埋呀sir ，我上星期又買左喲新股票，暫時有：
9988@$203 一手
2638@$7.83 一手
VOO @377.04 兩手

我黎緊會繼續定期定額投資VOO 同埋留意大市 入呀sir您上面推薦既優質股 如果長遠甘做 係唔係一個好既投資策略？

唔該呀sir 因為黎緊畢業要搵野做 要係搵野做前學識投資 問既野比較多 唔好意思 唔該您呀sir

龔成老師︰

其實優質股，只要佢一直質素都無明顯變差，我地長線去持有，永遠都係最有利。

而升一倍放一半，主要係比一些較保守投資者，等佢地可以先收回成本。或者一些初學者，佢地未能完全掌握何為貴，才會用這個策略去沽貨。

至於港交所(0388)這類優質股，長線預期係會一直上升。但我地唔可以因為咁，就不理價值平貴，直接入貨。因為若然買貴左，雖然最終都會升，但成個回報就已經差好遠。

因此，我地都要緊守平貴原則，去有計劃地入市。如果你好驚真係會錯失入貨機會，你可以用月供儲貨，咁就可以。但當股價去到異常貴，好似之前比亞迪(1211)成本2XX，就會連月供，都不適用。

而我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你還未畢業，相信是一個年青人，你現時正值財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應該要進取少少，可以較集中「平穏增長股」和「潛力股」。港燈(2638)係收息股，增長力唔高，你不宜持有太多。

至於其餘2隻，都係適合。但長線計，我地唔好成個組合，只集中係2, 3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

將來你投身社會，可能會較忙。但唔好因為離開左學校，但忘記了學習。投資係需要持續學習，提升自己知識，才會做得好的。

------------------------------------------------

Q21804：

你好岩岩上完你第6堂, 好有沖動去用你條FORMULA去中銀網選股, 不過我好貪下, 會先唔用PE

自己篩完一堆搞左兩個鐘之後, 有隻見到好想問下你意見: 8137 - 洪橋集團

另外想問問，除咗你堂上教的公式，有冇一D網站/一條公式岩宜家用可以快搵到D一次性受疫情影響的股票？ 比如之前問你果隻大快活

就會因為PE/ROE問題而篩走左，甘可惜左反而

龔成老師︰

洪橋集團(8137)雖然過到大部份篩選準則，但你要留意佢過往股價都幾波動。

而且，市盈率都一直維持偏低水平，代表市場對佢睇法好一般。你再仔細睇，佢盈利其實主要來自一些公平值變動，唔係實際收入。

因此，佢投資價值，並不如表面睇咁高。

之後課堂，我會教你點睇年報，你就可以理解到，這隻股票箇中問題。

網站方面，暫時我見都係中銀個網會較好用。至於這個篩選並唔係完美，的確會有可能篩走一些優質股。也會好似8137，誤入一些投資價值一般的股票。

但這個已經算係較有效率方法，特別係對初學者，會較易掌握。

之後，你再配合基本面和仔細分析財務數據，已經好大機會，找到一些有價值的股票。

------------------------------------------------

Q21805：

龔sir，您好。我經常留意你的facebook，特別是龔成問答信箱。最近買樓問題很煩惱，可以請教一下您嗎？

本人33歲，先生(33歲)，育有一對年幼子女(幼稚園)，目前2人合共有現金200萬，先生月入5.4萬(5年後可加薪至8萬)，我是sales,平均每月3萬幾，沒有股票、物業。

現在同家人一齊住，大概還可以一齊住5年。之後搬出來，會請工人。我們現打算置業，有幾個唸法:

1. 直接買3房，但只可以買到30+樓齡的舊樓，八成按揭，只可即刻自住。(擔心舊樓不保值)

2. 唔理地區、大細，買400萬樓，5成按揭，放租，之後換樓(擔心之後樓價升，難換樓)

3. 買2房半新樓，八成按揭，即刻自住，有機會再換3房。(都係擔心難換樓)

目前呢5年沒有迫切住屋問題，只是先生錯過左兩次置業機會，擔心樓價再升難而置業，而且即使現在開始供樓，也要供到退休了。現在儲了一筆首期想盡快上車

現在未置業，每月開支約3萬。若置業後搬出來住+小朋友返學，每月開支大約7.5萬

最終目標有一套三房樓自住，有機會再置業作收租用途。請問龔sir我應該點做好

龔成老師︰

以你現時情況，用方法1和2都係可以。

至於3，我就唔係咁建議。因為好多時新樓都會有一定溢價，令你變相買貴左。

方法1，30+樓齡唔一直定無投資和升值潛力，但就好睇個物業本身質素、地區、交通配套、是否大型屋苑等。另外，你要留意佢幾時會做大維修，這個潛在成本，你必需要注意。

至於方法2，都係可以，先買一間較細屋，去以資產追資產，從而減低樓市波動，對你將來換大屋的風險。

但大前題，你這間細屋，都要有一定質素和升值能力，最少升幅能跟大市同步。之後，你再利用月供優質股，去累積更多資金。到有一定數量，就可以入市，以細屋換大屋。

由於這間是你自住屋，所以入市與否個重點位，係你是否"供得起"。只要你確保可以長線都"供得起"，而佢又符合你長線生活所需，咁就無問題。

最後，我建議你置業時候，要考慮埋個財富組合的平衡性，唔好過於偏重任何資產類。否則，會有過度集中性風險。

最好你係置業同時，一定要留一定優質股進行增值，成個組合才算平衡和健康。

------------------------------------------------

Q21806：

Hi 龔Sir, 我想問下美國有機會加息嗎? 如果加息對香港樓市有冇影響？ 謝謝

龔成老師︰

過去一段長時間，全球維持一個較低利率水平。但長遠計，息口必然會重新回升。

雖然，我地唔知幾時會發生這件事，但都要為這個情況，作好準備。

香港樓市現時處於合理區頂，但當出現加息，市民供樓成本上升，必然會直接影響入市資意欲，令樓價下跌。

但我認為香港樓，長期香港樓市，依然會維持向上，好難跌好多。

首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。

佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！

香港樓長期供應不足，需求正不斷累積，這將會令樓價保持向上，跌少少，又會升過。

------------------------------------------------

Q21807：

請問1029鐵貨前景如何？我多年前0.8買入，後來0.3又買，前後有十几萬股，近解套之際政策降温，又面临大股東賣股份……是福是祸，宜守定是宜走换一隻其他的股票呢？

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

鐵貨（1029）經營採礦業務，專注在俄羅斯遠東及中國東北地區開採、開發及經營工業商品項目。

佢擁有多個項目組合，著重於開發礦場、生產及加工鐵礦石及鈦鐵礦，過往業務只是一般，雖然都有生意，但盈利上落較大，有時出現虧損，投資價值唔算好高。

整體分析，只是一般般。賣出會較好。

------------------------------------------------

Q21808：

我有3個問題想請教老師：

1. 新手投資 + 加強儲蓄能力 想問我可以先睇老師邊啲既書藉，除咗實體書，會否有電子書可以係iPhone睇？

2. 關於投資盈富基金既平均買入價, 以下係我唔同時間唔同價位買入，但平均買入價一路上升，請問個原理係點樣，因為越買越貴就唔敢買..

$24.18x500
$27.42x500
$29.26x500
$28.2x500

3. 請問如何計算到宜時既股票屬於貴定平？

龔成老師：

1）你可以睇《80後百萬富翁》
《股票勝經》
《財務自由行》
之後再睇其他。

上述都是最入門及適合你的，另外，我部分書有電子書，如《股票勝經》
https://www.enrichculture.com/products/9789888395767

2）最重要睇長期的，月供往往要5年以上，最好都3年，因此你預需要因為短期的價格上落，影響左策略，只要大方向正確的就得，當然，如果我地評估到現價貴，就可能會減少金額或停止月供，但在一般情況，你保持月供就得。

3）要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21809：

龔成sir,想些問題想請你指敎！小弟剛出社會 有十幾萬美元在投資 我睇左好多關係財富嘅書籍 知道汽車其實係負債

因為會令你現金流出，但我最近對某品牌汽車感有興趣 ，想擁有自己嘅汽車 但我知佢係負債 唔應該擁有 但我真係好中意 每次見到架車 都好想要

但同時又知道唔應該擁有 每次心情都好忐忑 如果係你會點做令自己舒服啲

龔成老師︰

你要分清楚，何謂「想要」和「需要」。

「想要」純粹係你個人感覺，或者想滿足自己一些欲望。

「需要」係有一些客觀因素，你係要持有這個物件，以達成某些實際目的。

簡單咁講，如果你係自顧人士，開車接單送貨。「汽車」就係你生財工具，可以為你創造價值，唔係一個負債。

若你只係覺得鐘意、或者只係想用佢作消閒娛樂，無創造出實際價值，就係你負債。

我唔係話，你完全唔可以用錢，去做一些娛樂性消費，但我地要平衡。最好係先做投資增值，有空閒錢，再考慮消費，咁會較好。

你其實可以用一個方法，就是「定目標」。

例如完成了一個財務目標，例如有$20萬、$100萬等等，你就可以用買車去獎勵自己，這樣就可以平衡，同時令自己更有效追求目標。

我地運用財富的法則，「先增值，後現金流」。

------------------------------------------------

Q21810：

成哥，我本身有留意8473，因為睇佢符合轉主板條件，0.4買左佢，點知港交所轉例，改做盈利要三年8000萬，

而家跌左，我仲未賣，而家心情好灰。

其實我買之前都覺得佢唔係妖股，係靠實力既股票。我個人認為彌明生活百貨管理得好好，我自己作為男仔陪女朋友去呢間鋪都覺得佢好，

另外佢作為零售，在疫市黎講算係好強，加上佢籌備緊做美容院，我個人認為佢會有發展空間，雖然買貴左，但我認為可以繼續持有，呢種心態正確嗎?

我明明有睇你書，但我輸左俾人性

龔成老師︰

你用生活所見，去初步分析一隻股票，係正確。但記住，我地是否投資一隻股票，主要考慮佢長線企業質素。

而能否升主板，跟企業本質無關，雖然轉版能提高了市場價值，但在更多時間，只是炒作，因此，你唔應該作為考量點。而且，這些消息好易相關股份，成為炒作對象，令股價被不合理推高，要小心。

彌明生活百貨（8473）業務不過不失，發展能力中等，不是高增長的類別。

以佢現時的經營情況，算是合理價，但這股始終規模不大，加上近年的盈利有下跌情況，存有風險。投資係可以，但不建議太大注。

另外，政治相關因素，都會令這股波動，要明白股價風險，政治因素是好難預測的。如果你持有太多，宜減。

------------------------------------------------

Q21811：

首先多謝你之前的指導，另外想問1088中國神華及3339中國龍工前景如何，可長期持有嗎？

還有3658新希望服務，剛抽到一手，是優質股嗎？

龔成老師︰

中國神華(1088)始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望，主要係收息的。可長期持有，但不建議太大注。

中國龍工（3339）主要業務為製造及分銷輪式裝載機、壓路機、挖掘機、起重叉車及其他基建機器。佢的產品有出口至俄羅斯、中東、澳大利亞及非洲等地。

雖然近年生意不差，但以過去5年計，生意與盈利都有波動情況，這點不得不注意。而企業的賺錢能力算是中等。

以企業的質素來計只屬中等，現時不貴，股息率都算吸引，但業務波動是風險，因此投資不能大注。但長線基本上可以的。

新希望服務（3658）係中國綜合物業管理及民生服務運營商。

佢為住宅物業、商務物業及其他類別非住宅物業提供物業管理服務，亦向非業主提供增值服務（包括案場管理服務。現時在管樓面面積超過1000萬平方米，物業管理項目全部位於中國一線、新一線和二線城市。

近年企業發展不差，生意與盈利都有一定的增長，不過，企業規模始終不是好大，獨特性未算強，投資價值算是中等，未算好吸引。

你只係一手，唔算太多，可以長線持有。

------------------------------------------------

Q21812：

老師，想講吓投資以外的事。我今年29歲，本身在一間蚊型工程公司工作，人工比大學同學低幾個point。

不過最近老闆想移民，所以佢想我留低幫佢打理生意，等佢走咗之後生意可以繼續營運。(我原本想完成part time master degree 就揾工)本身公司响香港得3個員工，

啫係我，我上司同埋我同事。上司都有好大機會2年之後移民，之後就應該由我接手大部份公司業務。老闆將我人工加咗50%，

而且會有分紅(公司營利嘅某個百分比)同公司股份俾我地。我諗咗幾日，決定試吓留低，因為我覺得接手一盤生意機會唔係人人有，如果可以學習營運整間公司，

相信都係好難得嘅經驗。雖然老師嘅新書有提及只有辭職並全職創富才是財富增值的最佳方法，但我仍想嘗試一下營運這間公司。老師有何看法呢?

龔成老師︰

其實我覺得係一個唔錯的學習機會，你可以親手營運一盤生意之外，仲要唔係孤身作戰，而係有有經驗架人指點，我覺得有嘗試的價值。

我書中講全職創富，除了自己做生意外，都仲有其他幾個方法。所以，你都要睇翻，自己本身個大方向係點。

如果你係想向做生意方向發展，這個是一個唔錯的學習機會。

加上你現時29歲，最緊要試多D野，保持進步，從你長遠人生的角度，這次是很好的進步機會，會對你成長有用，加油！

------------------------------------------------

Q21813：

你好，我而家計劃緊置業結婚及提早退休

本人28歲 與另一半工作穩定，總月薪約50000，扣除開支及家用，每月可儲25000。

資產方面
- 2層內地二線城市收租物業，總市值約180萬，租金回報約2%。2013年以約40萬購入，預期該地區具長遠發展潛力，每年增值約8-10%，
近年內地樓市升勢強勁，正猶豫是否現時賣出一層套現。

- 港美 優質+潛力股票+主要指數ETF，總市值約40萬，科技類（eg科網、半導體、電動車）約佔40%；傳統金融、醫療、能源、消費品類約佔50-55%；
另外投資約5%黃金、白銀ETF+加密貨幣。持倉變動甚少，期望長期穩定增值10-15%。

- 已累積3年股票投資經驗。

- 現金約70萬（包括應急資金20萬）等大冧市掃平貨

- 負債約10萬

- 已購買足夠保障的危疾、醫療及人壽保險。

目標一：預期在5年內以首置、高成數按揭買入市值800萬內市區樓作結婚自住之用。

目標二：希望40歲前累積1000萬淨資產（當中包括1層香港自住物業）。

我可以用咩方法完成以上目標？
唔該成哥

龔成老師︰

首先，係開始投資計劃前，你要睇翻你負債部份。如果個息率係較高，你要先處理好，否則會拖低長線投資效果。

現時你持有2間內地物業，租金回報率只係一般。雖然你預期有增長力，但由於你計劃5年內要在香港置業，如果再加上這2間內地樓，你成個組合就會偏左係物業類，會有過度集中性風險。

若果你覺得這2個物業，長線升值能力會唔錯，你保留都可以。但往後新資金，要集中係股市，以免太偏中係單一資產類，因而造成風險。

現時你每月儲蓄和現有資金，可以用優質股去增值，為你中短期買入香港物業和長線退休，去作準備。

你可以投資「平穏增長股」和「潛力股」，去創造一個增值平台。你先用每月5成儲蓄，即是用$12500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，現有50萬現金和每月儲蓄，就等大跌市機會出現，才大力度掃貨，並長線投資。

我假設投資回報有10%（連股息再投資），你每月投資$25000 + 90萬資產(40萬股票和50萬現金)，若你在5年後買入物業(假設你會動用120萬)，到40歲時大約會增值至680萬。

再加上你3個物業，相信都有機會，可以達成1000萬的目標。

------------------------------------------------

Q21814：

現有9988, 700, 388, 有考慮1810, 其他要研究下，總是留不到现金？！

2382, 1177, 2845 可幾錢考慮買入

未有時間可上你堂，你那些書我應該睇呢？

龔成老師︰

你上述的持股，整體都係較有增長力。但你要明白，佢地增長潛力大之餘，不確定性都會較高。

若佢地發展理想，回報當然好。但當發展不似市場預期，股價就會有較大向下調整的壓力，你要主要這個風險。

現在舜宇光學科技（2382）、中生(1177)和GX中國電車(2845)，算係合理區頂至略貴水平。

你最好等佢地回多1成，才開始小注入貨，值博率會較高。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21815：

你好龔成老師，本人最近先開始投資屬於初哥。

現在持有以下股票：
700騰訊 $625 600股
300香港交易所 $459 400股
941 中國移動 $52.8 1500股
1177 中國生物製藥$7 3000股
1810小米 $24.5 400股

請問以上股票是否可以一直持有？

最近騰訊業績是否不大好？

這些股票您有什麼意見給我，可以在什麼地方注意，還請老師指點迷津。

龔成老師︰

你以上股票，都係有質素，但有2個問題，想你注意翻。

首先，你才29歲，應以增值為主。中國移動(0941)係收息股，增長力好一般，不適持有太多。

另外，你而家太偏重左係潛力股(0700,0388,1177,1810)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。但由於你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

至於現有持貨，由於優質，故不用沽出。只要用新資金，去慢慢拉平均個價，咁就可以。

騰訊（0700）發展正面的，業績都無重大問題。

只是近期中央打壓大型企業，令佢股價較波動。但相信政府，應該唔係想佢地做唔倒生意。只係希望加以規管，在可控和對整體經濟安全的條件，去賺錢。

此股有長線質素無大變，你記住我地投資一隻股票，係睇佢長線質素。一些中短期因素，如果無令佢長線質素轉差，就算股價出現波動，你都唔洗太在意，你照長線持有就可以。

------------------------------------------------

Q21816：

老師，我溫習緊notes，有d唔明

1) 388，823 屬於水桶幾？佢地係特殊例子，高派息率，但潛力較大

我這2隻都持有，比例應該怎樣配置？

2) 原本我一家打算去澳洲，但佢封關，無得入境。

為了移民，於是賣樓，但當時打算入籍澳洲後才買澳洲樓

所以去年10月賣出hk大單位，今年1月時買入hk細單位收租,大約每年2.7厘回報

手持hk 100萬用來買股票，亂咁買左d, 依加上左你既堂，想學習下點樣配置

另外，澳洲封關，現打算去UK, 原因為亞仔升學，因亞仔（小二）越來越討厭返學，亂做功課，成日欠交，但佢好聰明，無乜溫書都有85～100分，只是不適合被填鴨

如果去UK, 用hkd 100萬做首期，還是keep on買股票？

sorry寫得有d亂，因為原本去澳洲移民，依加轉UK...近日都好較心亂

龔成老師︰

1. 港交所(0388)係水桶1，而領展(0823)係水桶2。

一般水桶1，派息比率係應該偏低。因為這些企業，都尚在發展階段，需要保留較多盈利去作發展。

但港交所(0388)由於佢業務性質特別，本身行業又係有壟斷性，唔需要留太多盈利，都可以維持其優勢，因此佢派息比率會較高，係正常。

房托類根據規定，佢必須派出最少90%盈利作股息，因此我地會視為水桶3。但領展(0823)有點特別，佢有別於其他房托，只係用組合物業收租。

領展還會定期翻新有潛力物業，去提升佢價值，從而令租金有所增長。因此，我地會視為水桶2，有派息之餘，都有平穏增長能力的類別。

若你係中年人士，港交所這類水桶1，最多可佔組合40%，若你投資能力較一般，可以再下調。水涌2會作為力，再配以少少水涌3，就算得上係平衡。

2. 當你完成課程後，你可以因應自已能力、年紀和風險承受力，去試下配置。如果不懂定平貴，就先月供或分注。總之，唔好急住去投資，要量力而為。

再有唔問，就係INBOX再問我。

至於，100萬點樣用，我會比較偏向建議你用來在英國置業。

從投資角度，你應該考慮這筆資金的機會成本，投資係乜野地方，先可以將佢係合理風險之下，利潤最大化。

若以香港樓和香港股市做例子，現時租金回報率低，股市值博率較高，故資金應留係股市。

但由於你要移居異地，應該先以安頓好生活，減低不明朗因素為優先。加上英國普遍樓價，無香港咁貴，值博率都會較接近。

因此，如果你找到合符你長線生活需要的自住物業，又可以供得起，咁你置業先係可以。到你未來生活一切安定下來，有閒錢時，才再投資增值。

而一刻，你應該保留較多資金，去處理你英國新生活上的問題。優先從生活上考慮，投資放後少少，我相信會較好。

------------------------------------------------

Q21817：

龔兄(1)千萬富翁本書最尾詳解5條致富方法， 如果我唔跟次序去睇得唔得， 先睇股票後睇其他ok ?

(2) 你嘅書裏面提到有錢人經常運用財富系統[借]去創富, 假設我已經做曬自身風險評估，想問下如果我先買咗自己嘅信貸評級報告，

然後先去銀行或者財務公司，咁樣係咪好過佢哋主動去查我嘅信貸記錄(聽人講畀人主動查好似會對評級有影響) ? 其實喺銀行借同喺財務公司借邊度合適? 如何取捨?
感激解答

龔成老師︰

1) 實戰編，你可以先睇你目標的類型，係可以的。

但建議你最終係要睇晒，有助於你了解和幫自己定位，去計劃將來。

2) 以我所知，銀行定你自己去做評級報告，係唔會有分別。至於借銀行定財務公司，一般銀行利息會低D，而且會較方便。財務公司唔係唔得，但你要了解清楚是否持牌，和產品相關細節。

如果係整體成本較低，你都可以考慮。

通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

但現時大市只係合理區，明顯未係機會，若想用借貸投資，建議再等等。

------------------------------------------------

Q21818：

你好龔成老師，本人48歲，丈夫49歲，有250萬現金本身做定期存款多年，現在因為冇利息，希望賜教方法，唔想有風險或者超低風險，

有一層自住樓，（欠按揭80萬），有150 萬股票，有110萬銀行保本保險儲蓄，一層大陸順德細樓（已經付全數）50 萬，20萬基金（低風險），謝謝。

我是主婦，丈夫做生意，有一個三歲小朋友，自住樓約值700 萬。

股票包括 5，2018，3175，405，700，270，2888，1733，2318，1800，1833，6088，2314，6127，2845，2812，2820，2238，1658，1186，3800。

龔成老師︰

其實就算投資最穏健和保守的股票，都係會有風險，只會係多與少的分別。

若你係完全唔想承受任何風險，你可以投資定期，儲蓄保險、美國國庫債券、IBOND等低風險產品。但缺點係，佢地增派息率唔高。

以你現時年紀，應該都要做少少財富增長，才算理想。但若你真係唔想承受太多風險，只買上述產品都係可以。

如果你可以承受少少價格波動的風險，你可以將部份資金，投資「收息股」。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

大市現處於合理水平，那250萬資金，你可以先用多50-80萬，以"分注"形式慢慢入貨。餘下資金就等大跌市機會出現，才大力度掃貨，並長線投資。

至於你現有持股，其實好多波動性都好大。以你較保守的投資取態，佢地唔係咁適合你。

騰訊（0700）、平安好醫生(1833)、昭衍新藥(6127)、GX中國電車(2845)、三星中國龍網（2812）、ＧＸ中國生科(2820)都有質素，但係不確定性較大，股價預期會好波動，建議你不要持有太多，甚至將佢地全部換成收息股，或者一些適合你的產品。

平安(2318)、粵海(0270)、瑞聲(2018)、IT HON TENG（6088）、廣汽集團（2238）、中國鐵建(1186)係平穏增長型，波動性會細D，但風險會比收息股高。你自己再衡量下，是否持有，還是同樣換至其他地方。

Ｆ三星原油期（3175）我無對這基金有特別研究，佢係追蹤油價相關的指數。

中短期油價會好波動，風險高。但長遠計，油價唔會好似現時的低位水平。

因此不是無投資價值，但你最好仔細了解這基金和佢追蹤的指數先。同埋，一定唔可以大注。

易大宗(1733)、渣打(2888)投資價值不高，建議換至其他投資項目。

保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

餘下無提及的股票，都係收息股，若你可承受少少價格波動的風險，長線持有就可以。

最後，你要留意持股總數，以你資金收量，組合大約10-15隻股票好了。過多你會好難定時審視和管理，對你會不利。

------------------------------------------------

Q21819：

你好！龔成老師，本人38歲想請教一下如何調整現有投資組合，邊D適合長揸，邊D應該沽出/減持？

股票組合如下：

香港中華煤氣有限公司 (3) 3024股@ 17.30
思捷環球控股有限公司（330）600股@ 50.00
中國建設銀行股份有限公司—Ｈ股（939）3000股@ 8.00
金利豐金融集團有限公司（1031）4000股@ 6.00

工商銀行—Ｈ股（1398）4000股@ 7.00
醫渡科技（2158）1000股@ 65.15
京東健康（6618）50股@ 71.00
阿里巴巴－ＳＷ（9988）500股@ 250.00

另外如果想加入比亞迪電子（0285），吉利汽車 (175) ，阿里巴巴－ＳＷ（9988）作長線投資，現價可入嗎？謝謝老師

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應以增值為主。建行(0939)和工行(1398)只係收息股，增長力唔高，不宜持有太多。

思捷環球（0330）當多年前，環境改變令佢「生意持續下跌」，佢的質素已經改變，佢已經要進行止蝕的動作。

金利豐金融(1031)質素一般，建議慢慢換至其他優質股較好。

醫渡科技（2158）有潛力的，可長線。但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

你現貨可持有，但暫時唔好再加注了。

其餘持股，都係有質素和適合你年紀，長線持有就可以。

至於想再加入比亞迪電子（0285），吉利汽車 (175)，都係可以。比亞迪電子（0285）現價偏貴，回多1,2成才算合理區頂，才可開始小注。而比亞迪電子（0285）現價算合理區頂，無貨可先小注，到有明顯回調，才正式入貨。

阿里巴巴(9988)雖然現價合理，但由於佢已經佔你組合較高比重，個別企業不應佔組合15%以上，否則會有過度集中性風險，故你暫時不要再加注。

另外，你而家太偏重左係潛力股(2158, 6618, 9988, 0285, 0175)，佢地雖然有增長潛力，同時風險都較高，不宜持有過多。

你算年青，風險承受力較高，但潛力股也最多只宜佔組合約5成，餘下應集中係平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q21820：

你好，龔Sir, 很後悔不早點認識你的專頁，因為跟住你的投資方法，幾個月已經見到明顯的增長，真心感謝你願意將你的心得經驗不吝分享。

現有一問題在猶豫：（現37）6年前買了一份投資保本的保險供10年（還要供4年）因當時幫朋友無留意回報，現發現每年投入5萬，10年後多1萬，

而且供滿期後再放多5年先會多20萬，現在停供會蝕7萬，但因今年（最遲明年）會置業需要資金，請教阿Sir會如何安排？謝謝

龔成老師︰

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

因此，你要視乎翻你持有的投資保本的保險供，當中的特性，以及本身的預期回報，其中保險的作用。

從投資角度計，你保本保險回報，唔算理想。

同一筆資金，若利用優質股去增值，長線好大機會可以跑嬴這份保本計劃。

當然，你這計劃的好處，就係保本和較有保證回報。而投資股票，股價始終會有波動性，有一定風險。

但由於你係有實際置業需要，而資金又不足，那你只能選擇停供。

以你37歲，應先做好增值部份，我較建議先用優質股增值。但若你係好保守架投資者，買儲蓄保本保險，都係可以，但最好不要太多。因為佢會拖慢你財富增長步伐，你要明白這點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21721-Q21740）

Q21721：

龔sir,你好
想請教下如何有效咁儲錢

我人工只有17000
分期還緊卡數，
找完數每個月只剩下3000蚊

每個月都清，儲唔到錢
如何可以處理現況，或增值儲錢方法？

沒有任何投資經驗
謝謝

龔成老師：

第一，你要定目標，如果無目標，就無動力去做。不用太誇張，但就要適合自己，例如一年儲$50000，5年儲$50萬等。

第二，減少用信用卡。

第三，習慣每天記低花了多少錢，不是要求你不花錢，而是要知。

第四，分清想要同需要。

第五，如果你本身自控能力較弱，可參加銀行、保險公司，月供基金、月供儲錢、月供股票等計劃。

就算每月只供$2000，長遠都能累少成多的。

你可以睇我的書《80後百萬富翁》，適合你的。

------------------------------------------------

Q21722：

龔成老師，老公最近係書局睇到你既書，買了回來，覺得好大啓發同鼓勵，謝謝你！

我地剛結婚，而家有地方住，但因長遠想有小朋友所以想地方大啲，諗緊買樓，想請教一下你的意見：

老公同佢屋企大概有350萬首期，我自己就大概有80萬資金，我地一年前開始睇樓，但因為疫情反覆加上老公轉工，一直未决定到點買同買咩，而呢段時間樓巿都升了不少；

老公黎緊7月會返新工，我地呢排都睇緊樓；

你覺得我地應該進取啲買9xx萬既樓，定保守啲老公買7xx萬的，我自己則另外搵細價樓（如500萬下）投資？

另外因為老公7月先返新工，你覺得係咪應等到下半年先買？不過近來樓巿交投暢旺，下半年會否要更貴？

抱歉問了很多問題，謝謝你！

龔成老師︰

由於你地現時有地方住，距離你實際需要目標新屋，其實都有一定時間去準備，所以唔需要急。

目標係"9XX萬的自住物業"，定係"7XX萬的自住物業 + 5XX萬收租樓"，我會偏向前者。

我地做決定時，要考慮成個財富組合的配置，如果你係"自住物業 + 收租樓"，你成個組合會偏左係物業類。

當樓市出大問題時，你成個財富組合，會有嚴重影響。這不是價格，或者配搭上考慮，要係講成個財富組合的平衡性。

因此，你應該係置業之餘，都要同時留有一定股票，進行財富增值，成個財富組合才算健康。

由於有一定時間去準備，你可以先用一半資金，去投資優質股作增值。

你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只在合理區，你可以先用一半資，分注買入上述股票。餘下一半，我地就等機會，當大市出現較大回調，就加大力度掃貨。

此期間，若你發現合適單位，價格又唔錯，而且你們有信心，長線都係「供得起」，就可以考慮動用這筆資金入市。

------------------------------------------------

Q21723：

龔成老師你好：我就尼26歲，女，月入扣除強積金供款約$40000，每月俾父母家用共$10000

月供$2000儲蓄保險，供左1年，仲要供多4年

月供2份住院保險共$3300，供10-15年後可全數本金取回$515000

銀行存款約港幣$60萬，另有價值共$13萬的外滙

有一份現值$115000的派息基金，每月約派息$670

想投資一個$250萬的為於大角咀的新工廠大廈單位，你認為好不好？只係比較擔心樓價會跌。

如果唔好，你認為投資咩最好？月供股票？

你覺得依家適唔適合買樓？

同埋我已經幫父母買哂醫保，將來即使有健康問題都不太擔心醫療費用，我亦暫時未有結婚念頭。

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你26歲年紀計，你應該先做好增值部份。

"保險"只係理財中防守部份，買足夠保障就可以，增值可以留比優質資產(如優質股、物業等)去做。

現有儲蓄保險，你可以保留，但未來唔建議再投資太多這類儲蓄產品，因為會拖低你財富增長力。

13萬的外滙，你可以睇翻有無實際用途，如果無，你可以換回港幣去投資。

至於基金，暫時派息率都可以。但要了解清楚，這個派息率是否保證。同時，你個基金會唔會出現"賺息蝕價"的情況，才決定是否持有。

其實工廈，近年的回報率不高，投資價值只屬中等。投資與否，你應睇翻佢租金回報率，來作決定。

另外，近期興起的在家工作模式，有機會影響到工廈、寫字樓等的潛在需求。影響有大，係一個未知之數，但會多左一個潛在風險。

現時從投資角度出發，整體上投資股市，相對投資樓市，值博率會係較高。

當然，如果你這個工廈，係肯定租金回報率較高，又有升值潛力，其實都可考慮。

否則，我建議你月供和現有資金，去投資優質股，咁會較好。

策略上，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那60萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q21724：

龔sir你好，以前無意中發現你的專頁，就一直keep住follow，最近幾個月將你的所有書都買曬返屋企了，之後要逐本睇曬佢~

因為我對理財投資係完全零認識，所以我亦買曬全套的富爸爸窮爸爸，唸住睇曬先再睇你的書，起碼有d底先，再睇投資類畫會好d。

見到你都會有解答讀者的一些問題，就睇下我會唔會咁好彩，你會見到我message~

本人29歲，以前係做會展, event類工作的，都唔知好彩定唔好彩，2年前轉行做了department admin, 一過試用期就疫症，

眼見好多同行都失業或者停薪留職無工開，我唸我都算好彩。。。但呢個位係死位，無人工加無職升，除非跟大圍每年幾幾％，如果唔係都唔會有調整0

。好多熟d的director 都同我講，有得走就好走，呢個係死位。。 同埋覺得呢份工真係唔適合我，做左2年都係覺得好辛苦，好頹，

甚至1年前因工作而抑鬱而差d自尋短見，d人成日羨慕我份工咁hea唔洗做福利又好，但我真係覺得好辛苦，無成就感，無嘢係我負責的感覺好唔鐘意，

如果我係有家庭或等退休，咁呢份係絕世好工。。。有試過搵工，但依家個market好似無咩地方請人。。 同埋最驚係，再遲d 過慣退休生活，會出唔返去。。

連我男朋友都話我似足佢退休ge阿媽。。因為我日日真係唔洗用腦，唔洗點做嘢，返去坐。。。同埋連自己都覺得，真係蠢左。。。哥下先恐怖。。

以下係本人財務訊息：

資產：
現金：月光族，銀行永遠只keep有3000現金
儲蓄保險 100,000 (一筆過，不用供，現每年收息，約4％)

收入：18k (1k公積金，實可支配現金17k)

支出：
保險：2,000
固定費用：1,000
家用：3,000

儲蓄：
定期: 1200
月供基金 (富蘭克林科技基金): 1200

負債：40,000 (信用卡分期, 每月還3,000)

以前只要儲到錢，就會用黎去旅行去，所以依家基本上都無咩儲到錢，自覺出年已29＋1。。先發現財政狀況實在可怕，但感到唔知點算好。。。。

因為現時財政係負債緊，亦唔敢轉工。。。因為依家有醫療福利，交通津貼，食飯津貼。。 但真係好辛苦，好驚自己會抑鬱落去。。但又唔敢辭職。。

希望參考下龔sir你的意見。謝謝。

龔成老師︰

基本上，我99%留言都會回覆，想盡量珍惜大家互動溝通機會。但由於近排比較多讀者發問，所以最少都要好幾日，先至可以回應到。

睇完你的留意，我覺得你係一個成熟的人，很會為自己長遠作打算。

我相信你對前途，已經係有一個想法。只是礙於現時疫情，再加上現有債務上負擔，令你唔敢去改變現狀。這一點，係完全可以理解。

的確，現時求職市場唔係咁理想，你而一刻去作出改變，風險會唔細。但我地唔係無野可以做，你可以想清楚，自己未來10年、20年的路。

我地唔係要而一刻，立即全面去改變。但我地可以為未來去準備和舖路，等待時機出現，我地就可以更有效率和本錢地，作出行動。

例如，你要學什麼野技能，才可以做到心目中的理想工作。你可以先去讀相關課程，甚至去做這類型工作的兼職、問下這方面有經驗架朋友，去一步步行近自己目標。

記住，我地係要睇長線，只係對長線發展有利，短期可能人工較低架工作機會，我地都應該要考慮。

至於你財富增值方面，你要先處理好信用咭負債部份，因為佢利息好高，會拖垮你投資回報。

同時，你要努力去審視自已開支，睇下有無地方可以節省，盡力每月空出一點資金，去做月供股票，去進行財富增值。

另外，"保險"只係理財中防守部份，買足夠保障就可以，增值可以留比優質資產(如優質股、物業等)去做。

已一筆過交付的儲蓄保，你可以保留。但未來唔好再投放太多資金在儲蓄保險，因為會減弱你財富增值能力。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

定期這類定息產品，無乜增長力，唔適合你。

基金你可持有，但必需了解當中持股(最少要了解10大持股)，是否優質和有增長潛力。

投資策略上，你可以在處理好咭數後，投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

書本上，你可以先睇我寫架"80後百萬富翁"、"財務自由行"和"股票勝經"，會較適合你這類的初學者。

記住，世上沒有問題解決不了，只要你不放棄，總會在不同地方，找到一條適合你自己的出路，加油。

------------------------------------------------

Q21725：

老師你好，近日睇完你新作，同埋睇左好多有關吸引力法則既書。我知道要盡快行動！

我根據自己既專業成立左一個專頁，目的系分享，希望做第一步。唔知老師有冇咩提議呢？

因為專頁會叫你俾錢做宣傳，想問下老師一開始整專頁時有冇咁做呢？

龔成老師︰

其實整專頁，同做生意一樣。

除左你要比人睇到你的專業外，這個專頁對讀者有無創造價值，令讀者可以從中獲益。

另外，你要突出你個專頁獨特之處，跟其他競爭對手，有什麼不同，為什麼要睇你，唔睇其他人。

你從讀者方向去想，怎樣才會造成雙嬴，人流就會自然增多。

我最初無特別比錢做宣傳的，之後就有。

你最初可以透過身邊人去做宣傳，叫佢地幫手，同時初期你可以問翻身邊人意見，睇下點樣先較受歡迎。你要找市場歡迎的，不是自己盲目比資訊出去。

------------------------------------------------

Q21726：

龔sir，一直有留意你嘅文章，有東西想請教。本人37歲，月入10萬左右，扣除各方開支，月儲2萬左右（其中1萬會預留交稅）。現想找方法投資，希望60歲退休每月有3萬蚊息收下。

1. 想過月供股票，但亦有聽過，其實月供股票到最尾係會輸錢/回報十分低。比如說，2015年到2020年，如月2800，其實際回報只低於3％。如果係咁，有乜方法建議呢？

2. 如月供股票可很，想請教有關組合及操作方式。
謝謝

龔成老師：

1）月供股票是一個穩陣的方法，但的確不是最高回報的方法，但我一向會建議初階者先月供，因為初階者根本無法把握買賣時機及企業估值，如果做錯決定，就會有負回報。

因此，我建議你每做月供，每月$1萬，同時學投資知識，到了有一定的投資知識，就不用月供。

至於選股，最初你可以選ETF，如2800、3067，到你有一定的投資知識，就可自行選股。

2）簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF，如盈富。

------------------------------------------------

Q21727：

老師你好，首先多謝你，我跟你價值投資法，購入6隻股票，只有一隻9988未賺錢，不過我會strong hold！

今次有幾個問題想問，我覺得電動車係黎緊大趨勢，想問你有無電動車股推介？之前你推介過的2845好似現價略貴？

另外請問吉利汽車現價處於合理區嗎？
謝謝

龔成老師：

現時電動車的佔比仍好少，而這是大方向，因此仍有一定的潛力。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區中上部，股價波動，有貨可長線。如果現價入貨，小注都得。

------------------------------------------------

Q21728：

龔成老師，多謝你回覆，我係依幾個月入左少量股票如下:

3067~600股@18.24
1177~4000股@7.905
0066~500股@43.7
0014~1000股@29.2
2800~545股 (月供)
0027~43股 (月供)

現正打算月供3000蚊0027，3000蚊1810，請問會唔會太散亂？

本人年紀30中，另外打算再投資多10萬蚊落股票，請問點樣配置會比較好？謝謝你無私分享

龔成老師：

唔會亂，你上述持有的，都是有質素的股票，同時隻數不過多，你預一般組合，10隻股票都可以的，反而過份集中一隻股，會出現集中風險。

上述都是有質素的股票，可長線持有。

而你的年齡，可投資潛力股+平穩增長股，如果你有實力，潛力股可較多，若實力不足，潛力股不宜過半

你月供的兩隻股，無問題，可以長期進行，當然，如果想組合更加平衡，就加入ETF，如盈富（2800）、恆生科指ETF（3067）。

至於$10萬，你要留有一定的現金，餘下可考慮盈富（2800）、恆生科指ETF（3067）、港鐵（0066）、中國電車基金（2845）。

------------------------------------------------

Q21729：

龔Sir您好：經過了3個多月的新手學習(不斷睇你的FB和讀你的書)，慢慢有了基本的投資概念，現時手頭上有的股票：

銀河 71.35x27股
比亞迪電子 45.1x43股
領展 68.6x100股
比亞迪 208.6x9股

舜宇光學 181.4x10股
盈富 29.4394x163股
GX中國電車 114x50股
安碩 18.8619x2400股

老師，請問安碩會否過於集中，而其他又太零散呢？有什麼建議可以給我嗎？

龔成老師：

你持有的股票，基本上都是有質素的，但就有幾個問題。

第一，部分股價在貴的價位買入，反映你未有企業價值概念，建議你加強這方面的學習，同時，在未掌握前，多用分注、月供等這類方法，將買入價平均，能有效減少你一次過在高位買入的風險。

第二，潛力股都佔了一定比例，潛力股長遠當然對我地財富有較好回報，但同時要求你的投資實力較高，因此，暫時潛力股比例，不宜過多。

第三，你部分有集中行業風險情況，例如電動車及手機相關，佔了一定的比例，你日後要注意翻。

至於你所講的安碩集中情況，問題不大。而整個組合不算散。

你要同時留有現金，唔好太快去一次過買入太多股票，慢慢立一個長遠平衡的組合。

------------------------------------------------

Q21730：

成哥你好，有個有關失業貸款嘅問題想問你，希望可以得到解答

小弟今年廿中，雖然我而家失業但我之前都儲左筆錢可以應付到一段時間嘅生活，最近政府出左個失業貸款年利率1%好似幾吸引咁，可以分6年還錢，如果我申請到失業貸款再將呢筆錢放落股票市場會唔會係一個明智嘅方法？

如果我拎呢筆錢拎黎買美股voo（因為呢筆錢係借所以揀呢個風險最低嘅黎投資），根據數據一年平均都有1x%嘅增長

變左我可以將呢筆錢去增加我嘅現金流/總資產，而且在預定還款期末或之前還清全部貸款和利息後。

龔成老師：

唔建議。

其實你這樣即是借貸投資，雖然利息低，但始終借貸投資都是有風險的，加上你本身無收入，如果投資不幸出現損失，對你的影響會好大。

美股VOO，近年回報的確不差，但你不能以這數據去推算往後都不錯，現時美股唔平，如果出現較大調整，對你不利。

另外，借貸投資只合高階投資者，因此如果實力未到最強，暫時就不要動用。

同時，借貸投資只會在市況好平，及恐慌期才會動用，而這刻，並不算。

------------------------------------------------

Q21731：

龔Sir之前抽中一手百度50股，但一直跌，点算好

仲有阿里巴巴$271買入300股，都係咁跌，点算好

麻煩龔sir有時間回覆，感謝

龔成老師︰

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

百度在規模和質素上係有，但你預佢中短期會較波動。現貨若佔組合不多，唔需要太過擔心，一直持有就可以。

阿里巴巴(9988)近期面對內地監管可能收緊，風險度增加左，令佢出現波動。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左。你買入價係略貴，但唔算好多，現貨可長線持有。

------------------------------------------------

Q21732：

阿sir 你好，參考左你之前嘅意見，最近開始左月供股票，加上上緊股票班中，上你堂好開心，學好多野，整理左自己嘅投資組合：

基本資料27歲，月薪$4萬，現時每月儲蓄2萬（因上股票班時你建議最好儲蓄人工嘅一半，就唯有慳啲）現有15萬現金，及10萬股票，希望3年後100萬，目標買樓。

月供股票$8000:
盈富基金：$3000
領展 ：$2000
阿里巴巴：$2000

之前買左：
盈富基金： $ 24.3 ，1500
海吉亞： $65 ,800
東京健康：$157， 300

希望阿sir 可比少少意見，謝謝！

龔成老師：

現時你方向正確，你27歲，是累積財富的黃金期，所以努力儲蓄，把握機會投資增值，絕對有價值的。

我相信你要3年後完成目標，絕對有可能。

但要留意，由於你打算3年買樓，因此投資時間唔算好長，你最好不要100%投資潛力類企業（因為這些公司增長需時）。

另外，到你接近買樓的6-12個月，就要開始賣股票，為資金作出準備，因此，你其實投資的年期唔算長。

現時你持有的，其實都是有質素的股票，海吉亞醫療（6078）以腫瘤科為主的醫療機構，主要在中國經營醫院業務、第三方放療業務和醫院托管業務。

此股上市不久，故很難估值，而且要時間才可以慢慢見倒真章。

2019年盈利約0.4億，但市值去到300億。初步睇佢股價在一個十分高水平，所以風險不少。如果投資，小注好了。

其實現時組合無乜問題，最重要是你之後的配置，要考慮翻我上述所講，因為買樓的因素，而不要太過進取。

------------------------------------------------

Q21733：

您好，本人年41歲，月入25000元 + 兼職 12000元至 13500元 （未扣除MPF）。月供股票：港燈2000元．盈富基金6000元、港鐵2000元及恆基 4000元，由去年12月開始月供，加上其他股票，合共超過170000元。

另外持有現金480000元，每月可儲蓄超過一半。內地有物業，正等待通關後出售後可得到大約100萬港元。

由於本人和丈夫在香港沒有物業，居所是奶奶提供，其實沒有迫切自住需要，究竟我拿著資金，應該置業放租 / 投資？ 還是繼續投資股票 / 收息股票?

丈夫他53歲，也有100多萬現金，他最近改變主意，覺得沒有下一代，買房子日後無人繼承，不如手持現金? 但我又不認同，覺得是投資工具嘛，或是購買車位也可以考慮。

龔成老師：

其實你最重要的，就是財富的配置，物業、股票、銀行產品、現金等，都是配置的其中一部分。

由於你地無自住需要，因此，物業對你地來說，是一個投資工具，雖然可作為財富配置的其中一部分，不過，如果以現時香港樓的投資值博率計，只是一般。

不是無投資價值，但如果從長遠的增長力來說，投資股票會較好。

因此，這刻可以先投資股票，令財富增值，但不代表不能投資物業，若然樓市出現下跌，有一定的投資吸引力，都可以考慮。

另外，我地進行財富配置，—平衡都是一個因素，因此你若果股票比例較多，而你有較多資金想投資物業，這方向其實都可以，但就不一定好急去進行。

------------------------------------------------

Q21734：

你好呀，龔成老師，我想買隻高息股，考慮緊中石化、中海油、農業銀行、中國電力，請問可以比啲意見我邊隻比較前景/增長力，現價入唔入得過？

謝謝

龔成老師：

其實上述的，都是可考慮的收息股，我會建議你建立一個組合，唔好單考慮一隻。

中國電力（2380）、中石化（0386）、農行（1288）都可以的。現價合理的。

另外，你可以可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q21735：

你好,龔成老師
本人今年28歲，上個月剛開始月供股票
$2000 恆基
$2000 盈富
$2000 騰訊

另外，有基金$50000
上年ibond 3手
儲蓄保險供左$100000
住院保供左$100000
儲蓄約有$500000
月入$50000

今個月開始見到股價回落，尤其騰訊，之前見股價跌，我又諗緊入唔入，但我其實本身已經月供緊

我應該加入咩股票月供好，但諗過港燈收息都好
唔該老師

龔成老師：

你現時持有太多防守性工具，以28歲來說，未必好適合。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

在理財上，當然要攻守兼備，但守的部分，其實不用太多，你ibond、現金都太多，而保險如果有需要，則無問題。

騰訊（0700）有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價合理區頂，小注或月供可以。你唔好買入得太急，保持月供就得，除非有更大回落，先考慮一手手去加注。

至於港燈（2638），並不是對你最理想的投資。

由於你投資知識不算高，建議你加大月供至$20000一個月，但暫時就不用一手手去買入股票。

除了上述原有的股票，可加大金額去供外，你同時可以加入優質的平穩增長股，及潛力股，去長期月供。

------------------------------------------------

Q21736：

老師，我又有野想請教你了
本身12.9 入左一手00270
想問依隻是否適合月供？

我見佢現在價位長期處於11個幾，我地揀月供係咪要揀依d無咁大上大落既股票？

但我有追開你fb ,我諗住月供1211 ，每月2000蚊，但見佢股價又上返150蚊 ，想問而家開唔開始月供好？

我現在32歲，有一個小朋友，穩定工作
以下是我的投資組合

00978 20000股
00005 2400股
00012 3000股
01816 30000股

00548 6000股
01038 1000股
00939 7000股
00435 10000股

00386 10000股
02689 2000股
00006 500股
00270 2000股
00175 1000股
00778 2000股

我想加d潛力股，所以已set好下個月開始月供1211，每月2000蚊，想問埋現在可否月供阿里1000蚊？ 唔該晒老師

龔成老師：

月供股票，最重要是供一些「優質股」，不用刻意供一些無大上大落的，粵海（0270）、比亞迪（1211）你都可以供，至於供那一隻，就要睇翻你自己的風險承受能力，以及投資配置。

記住，月供是長期的，是一個持續儲貨的狀態，因此不用理短期股價。

比亞迪只要你月供金額不過多，都可以供的。至於阿里（9988），都可月供的。

至於你現時持有的股票，大部分都是有質素的，但增長力的確不強。你可以加入一些潛力股，最簡單是分注投資：安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

至於現時持有，增長力較低的股，如一些收息類股，其實可以減部分。

------------------------------------------------

Q21737：

你好龔sir，我同太太現時30歲，共月入$6萬，餘下儲蓄都用作月供股票。已購入一自住物業，按揭還款尚欠$693萬，每月大約還$24500。持有現金$110萬，另持有大約$30萬股票，詳細持貨如下:

心通醫療 2000股x$15.26
金沙中國 800股x$32.8
完美醫療 8000股x$2.86
阿里巴巴100股x$216.8
水發興業能源 6000股x$3.44

萬國數據200股x$81.8
福壽園2000股x$7.43
富力地產1200股x$9.6
同仁堂2000股x$5.46
比亞迪111股x$80
平安好醫生100股x$87.5

另外月供緊以下股票每隻$3000，現時持有:

銀河447股x$60
領展403股x$66.2
中生3347股x$7.38
盈富997股x$27

我有以下問題想請教:

1. 負債比率是否過高？應唔應該加快還款？

2. 下個目標係想買第二個物業收租，但如何係高負債下做到？

3. 股票組合是否太分散？有冇咩要執？

4. 110萬現金現時存放在mortgage link，應如何使用？

5. 如果想10年內財務自由有可能嗎？現時有咩可以做？

唔好意思問題比較多，多謝你耐心解答

龔成老師：

1）要睇你物業價值。

除非你較高位買物業，否則，以你現時的整個財務情況計，應該問題不大，你30歲，可承受風險，同時現時低息環境，你還錢不一定有利。

2）如果太急買第二個物業，就會令你過度集中在物業比例，以及令你負債太高。所以，暫時建議你以股票等資產去累積財富，到你有一定的股票比例，到時再將部分轉去物業，就較平衡。

如果要做高負債，其實唔建議，如果真的要做，就要同另一人名買樓及有足夠的收入做按揭。

3）勉強可以，建議你唔好太心急買一些上市不久的股票，除非有較大的獨特性及優質度。

現時月供的，可保持進行。

4）可以將其中$30萬-$50萬，投資優質股，善用現金，以你的年齡，其實可投資一定的潛力股比例。

5）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以加入一些潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q21738：

龔Sir你好，本人38歲，已婚，有兩個小朋友，一個4歲，一個快1歲。 每月家庭收入8萬幾，開支大約4~5萬，現金200萬，定期 50萬，另持有以下股票：

2800 x 2500股 ($25)
1299 x 200股 ($79.5)
2638 x 6000股 ($7.9)
3918 x 4000股 ($8)
3067 x 300股 ($15.92)

近半年睇你facebook 後開始知道投資的重要性，過往都係持有現金/做定期。

希望55歲退休，到時每月能夠有4~5萬生活費。請問以我而家既狀況有機會/ 點先可以達到？係咪需要放多d 資金去投資？如果係，請問咩投資組合適合？

開始明白投資心態的重要性，有基本會計知識，不過投資上就係初哥，請問邊本書適合睇？

而家習慣每日起身睇你專頁，漸漸被您既正能量感染，感謝您！

龔Sir, 另外，仲想幫兩個小朋友做投資，請問係咪應該月供2800?

謝謝您


龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲去計，應先努力做好增值部份。定期這類定息產品，不適合你年紀。

另外，持股中的港燈(2638)是收息股，增長力好弱﹐都不宜持有太多。

未來投資，你可以集中在「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。到你有一定投資經驗﹐潛力股比重才慢慢調升至約3-5成。

現時大市只是合理區，你現有250萬資金可以先投入約50-80萬，用"分注"形式，慢慢買貨。餘下資金和每月所儲倒的資金，就等大市出現較大調整，才慢慢大力度掃貨，然後長線投資。

如果你希望55歲退休後，每月有5萬蚊現金流，以股息率6%計，你需要本金1,000萬。

我假設投資回報有10%（連股息再投資），你每月投資$30000 + 250萬本金，14年後大約會增值至1900萬，故相信以上安排，很大機會達至你的財務目標。

書本上，我建議你先我寫架"80後百萬富翁"、"財務自由行"和"股票勝經"，會適合初學者。

而小朋友增值部份，由於佢地還很年幼，可增值時間較長，故計劃上會相對簡單。

你可以幫佢地儲盈富(2800)，佢係包括55間質素不錯上市公司股票的組合，有一定增長力。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上2隻股票都係可以，但你明白當中風險。

------------------------------------------------

Q21739：

男神，我去咗國外先留意到你既專頁，想報你啲班都無機會住，書又買唔到，而家只可以叫朋友買完寄比我

我想問吓，我有一百萬現金，應該點分配可以做到目標五年翻五倍？

仲有想問吓你對中國鐵塔同埋中國移動有咩睇法？ 好似見你比較少提呢兩隻

我中國鐵塔$2入咗， 去到2.2無放就擺到而家

請指教指教

龔成老師︰

我地做財富增值，一般希望做到架合理回報，係每年增長10-15%。你現時這個目標五年翻五倍，用股票投資去做，風險會好大，較難達到。

如果你無其他增值方法，建議你按部就班，透過月供和買入優質股，去為自已資產作增值。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。雖然你買入價偏貴，但此股有質素，你可以守。這股長遠仍算有發展力，不過，潛力度比過往略減，要回到你買入價，相信要點耐性。

中移動（0941）都質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，較適合年長或好守的投資者。這股有長線投資價值﹐現價合理，可以分注。。

------------------------------------------------

Q21740：

你好, 龔 sir, 我係你既學生, 想問下關於睇年報既問題, 岩岩睇2800(盈富基金)既年報, 有小小問題想問:

1. 點樣分析盈富基金? (我見佢唔會有市盈率/ 市賬率呢類資訊)

2. 呢類基金係用咩方式黎做估值

3. 見佢全年係虧損, 咁會唔會影響對佢既估值?

4. 係年報 P.19 (投資淨(虧損)/收益呢部份, (未變現投資收益之變動) - 意思係咪即係手持而未賣出之股票既市價減去購入價之賬面上既利潤?

5. 另外, 龔 sir, 我岩岩嘗試做 303(VTECH) 既分析, 但我搵唔到相關行業既競爭對手做比較, 咁我係咪只可以用返佢過往數據黎做分析?

感激回答!!

龔成老師︰

1) 盈富基金(2800)就係追蹤恆指，所以你用大市水平，去評估佢平貴就可以。

以往市盈率大約10倍開始平，但由於近期成份股加入不少新經濟股，故要上調少少，大約13.5倍開始算平。

2) ETF你可以用返佢追蹤的指數，去參考平貴。好似盈富基金(2800)，你就要睇恆指水平。

當你分析時，你不應集中分析盈富的報表，而是分析恆生指數，了解恆指平貴，又或以盈富頭10大持股，去計算這些企業的估值，從而計算翻恆指平貴（當然，這只是一個參考方法。

3) 佢係一籃子的企業，分析時唔可以好似一般企業咁，睇個損益表。這類ETF，你直接用佢相對指數，去做估值就可以。

盈富報表所顯示的，只是一些會計上報表問題，你不用分析。

4) 你可以簡單理解為，佢組合中持有或已賣出的股票價值變動。但我地分析盈富基金(2800)價值時，這個不是重點。

5) 如果無直接競爭對手，可以作比對。我地就用佢過去數據來分析，但你都要留意，大環境有無改變。如果無大變，過去數據才有參考價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19221-Q19240）

Q19221：

老師你好，我對投資冇咩概念但有keep 住睇你的分享，我平時要照顧小朋友好少時間睇書，我想問你話長揸股票賺錢，我想知係賺佢既收息嗎？ 會有股票冇得收息？

如果我長揸10年後，升左好多，之後呢？ 唔賣出點賺到錢？ 唔好意思問咁多問題

龔成老師：

新手多問題是正常的，而我建議你睇《股票勝經》，適合你的。花少少時間，慢慢睇。

我地買股票，就是買企業，企業賺錢，就有機會派息，佢可以選擇派或唔派。當企業有盈利時，佢可以選擇將盈利再投資，又或分享給股東作派息。

我地會分析該股過往的派息情況，如果佢本身業務穩定，如港燈（2638），而佢所用的派息政策都是持續派息，就可以確保你買入後，之後的收息都不差。

至於你問持有10年，其實最重要是財富增值，不是現金，你留停在「要賣出，賺現金，先算賺錢」，但真相是，現金貶值，資產升值，你持有優質股才是真財富。

另外，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如你10年內以增值為主，之後進行財富配置，轉為收息股，著重現金流，這都是策略。

------------------------------------------------

Q19222：

龔Sir 我係你股票班既學生，我28歲、身家6成係股票4成現金，有關於資產既問題想問下你意見：

1）你本書財務自由行-債券嗰一課講過年輕人唔建議賺息差，因為債券係不會增長既產品。

但而家既低息環境，證券行如IB可以做到1.08%息率槓桿，你建議係我呢個歲數攞幾多%錢去以孖展買債券、賺息差嗎？（假設我搵到穩陣既債券，息口有5.XX%左右）

2） 同朋友夾錢搵層樓租10年，然後再以劏房形式租出去，至少要3年先回本，年回報有20厘，你覺得值得嗎係我呢個歲數？

3） 近排好多電動車股如1211有配股既動作，配股價假設真如消息所講嘅$187.6，可唔可以咁樣斷定呢個係佢嘅合理價？

定係呢個會係其中一個理由去上調係股票班學到嘅估值？

4）1211 配股係咪利好？因為佢係籌集資金再投資再發展？

5）我係坊間買左個DCF估值excel, 但即使用係已有盈利嘅公司, 得出黎嘅估值有啲都好離地, 點解會咁？

6）年尾有咩方法紀錄/計算自己既股票年回報，尤其是係long term既股票如比亞廸，係2018年尾$45,
2019年$40, 2020年$200, 萬一2021年尾係$150，咁下年就係負年回報？有冇個簡單好d既方法？

Thanks 龔Sir

龔成老師︰

1） 首先，你這個年紀係財富增值黃金時期，債券這產品不是優質資產之餘，增長力也唔理想。建議你集中係有增長力架優質股，長線一定會較有利。

而且，我唔建議用孖展這種槓桿模式去做投資，風險太高了。

2） 不要一面倒睇好這類項目，劏房的確會有較高回報，但要處理的麻煩事都較多，租客的質素，對物業的損壞風險，這都是不確定性。當然，我不是完全反對，但市場是公平的，這類項目回報較高，反映風險較高。

另外，合資投資要好小心，好景時大家都無事，當市況差時，就會有分歧。

3） 合理價係用佢本身質素、行業前景，財務狀況等去評定，配股價跟這些因素無關。配股價只考慮「這刻市場能接受到的價」。

同時，企業質素唔會因配股而改變，故此唔會成為上調佢估值的理由。

4） 比亞迪（1211）配股，估計係用於加大營運資金、償還債務等用途，屬中等，未算好利好，但都不是差。

5） DCF本身較適合用於一些平穏發展，現金流穏定架公司，如果現金流變化較大，就未必適合。我唔係好清楚你個EXCEL運作，所以比唔倒實質意見你。

6） 其實我唔會咁去計住，因為中短期再好架股票，都會出現波動。你反而係要定期審視佢架質素，到底有無大轉變，只要無變就無問題。

比亞迪（1211）現時未到佢全面爆發期，你要再預多幾年，等新能車較全面普及，才會真正反映佢較真實價值。

------------------------------------------------

Q19223：

呀sir，我想定個目標係3年內草到100萬，每月草到大約1萬，我應該點樣進行配置？

因為大部份潛力股小注分注後都上哂去，無辦法進行加注。希望呀sir你可以比d意見我。

現時持有股票

12 29@1000
590 16.7@1000
788 1.5@20000
1093 7.7@2000
1177 7.8@2000
1686 5.8@2000
1810 14.6@600
1830 2.4@8000
1928 28.7@1600
2382 113.7@100
9988 251@100

龔成老師：

上述都是有質素的股雲，方向正確，基本上無問題，可以長期持有。

如果要3年內累積$100萬，除左靠原有股票去進行滾存外，你每月都要努力投入資金，投資優質股，每月$10000可以投資平穩增長股，加部分潛力股。

平穩增長股，如盈富（2800）及其他，至於潛力股，由於不少現時都唔平，可以較考慮的，就是安碩恒生科技（3067）可長線，另外，舜宇光學科技（2382）、中生（1177）都可考慮，但要注意股價波動。

記住，唔好太急用盡現金，因為現價唔算平，要慢慢用，耐心等機會。

------------------------------------------------

Q19224：

老師你好，想問吓中國電信會唔會有得升，我喺佢2.75嘅時候賣出, 2.4又入返

仲有我想問吓，我依家係19歲嘅學生未有收入,有冇啲咩方法可以令我個本金滾大啲？或者有冇啲乜嘢要注意

龔成老師：

中國電信（0728）長遠會慢慢上翻，不過，這股並不是高增長類，只是收息類，因此唔好對股價有太大期望。

而你19歲，這類股未必最適合你投資。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時要增加收入，可考慮做兼職、做下小生意都得。

同時，要努力學投資，只要你有知識，到你將來正式工作有收入，財富增長會好明顯。

------------------------------------------------

Q19225：

老師你好，我係投資新手，現時有份穩定嘅工作，想學下投資，想問問 我有留意到你經常講到盈富基金，如果我有一萬蚊作為本，要如何運用？謝謝

自己都有去銀行查詢，銀行方面表示，瑞銀中國債券基金都值得新手入手，你認為如何？

龔成老師：

盈富（2800）會較穩健，如果你想增長，能承受風險，就安碩恒生科技（3067），不過價格會較波動。

至於上述的債券基金，我無研究，你要留意一點，「債券基金」跟「債券」有所不同，債券基金坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

所以，你投資前，要問清楚風險。

------------------------------------------------

Q19226：

老師，早兩日終於鼓起勇氣落堂後問你問題，我就係問點樣唔心急買股票個個人

多謝老師悉心教導，我而家先知合理區，便宜區買左貨個種穩陣。我之前試過高追比亞迪，最後跌得好快，蝕本走左，反觀其他領展，恒基係低位買真係慢慢升上去！

明白到點解同一隻股票有人買會賺大錢，有人會蝕錢，就係因為心理質素唔夠好，無耐性，我要痴張大紙貼係屋企，耐性，好價錢好時機同優質股先好入手！唔好急，要冷靜！

感謝老師

龔成老師：

對，你已經掌握到一個好重要的投資技巧：心理因素、耐性。

要令自己唔好一時衝動入左貨，你可以用我課程比你的「企業評估表」，由於要填6頁紙先可以買股票，因此，你每次買股票前，都會確定自己好了解該股，同時這股已確定優質。

當你每次買股票前都填這表，就可以令你好冷靜先入市。

------------------------------------------------

Q19227：

龔老師，你好。我今年42歲，月入約5萬。一直沒有投資，直至近月工作可能被辭退，相信未來幾年找工作不易，也不會有現在的收入，覺得十分有危機，才開始想到要學投資。

屋已住40年，是父親的，相信未來二十年內會拆卸要搬，又是一個危機。我不懂買賣投資樓宇，只知要儲錢。

四五年前，因同事提議而儲蓄人民幣，起初利息較高，每次存入港幣2萬，每半年自動滾存，前後總數約三十至四十萬港幣，後來沒有理會，在今年年初人民幣貶值前一天全數轉回港幣。

因為不同時期存款，我不知如何計算才是，轉回港幣時，人民幣對港元對換率應已上升，但我想應該有賺吧。

最近英磅七天定期儲蓄利率十厘，應該做定期？

沒有任何投資，但一直慢慢儲蓄，現有現金約四百萬，打算學月供投票。我也想財務自由，但如果要買屋，看似沒可能財務自由?

其實我甚麼也不懂，連哪裡開戶如何開戶也不知道。但是生活危機太多，看時勢錢會好快大幅貶值，我必須開始做點投資，要做點資料搜集才開始。請問有甚麼組合建議嗎？

龔成老師：

你最大的問題，是知識，你理財方面有點亂，在正式進行理財前，我會建議你睇3本書先：

《80後百萬富翁》
《股票勝經》
《財務自由行》

你要明白，理財是一個「財富配置」的過程，你要建立一個平衡，以及會長線持有的組合，同時當中要有質素，有增長力。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時的年齡，可以投資平穩增長股，但由於你未有知識，唔建議你心急做。

這刻你可以做的，就是月供盈富（2800）$10000，同時增加知識，過半年等你有知識與經驗後，再慢慢配置餘下的資金。

------------------------------------------------

Q19228：

成哥，我都問你之前講個隻3067，我見佢係etf，我想問我投資呢d etf通常要留意d咩？

因為我見你講既通常要睇5年既年報或其他資訊，但呢隻係岩岩上無耐

咁我洗唔洗留意佢幾年既年報先買？佢既合理價位係大約幾多？Thank you

龔成老師：

安碩恒生科技（3067），你唔洗等幾年，這基金可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

因為佢所追蹤的指數，及當中股票，基本上已知當中的情況，因此唔需要再等多幾年。

不過，現價都唔平，大約在合理區頂，因此，這刻不能大注投資。

最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19229：

龔Sir, 我未睇過你的著作，如果要開始應該由邊一本開始比較好啲呢？

我是一個70尾出生的，只有5萬元可以作投資，月入3萬左右，可以每月用$3000作月供投資，謝謝

龔成老師：

你可首先睇：

《80後百萬富翁》
《股票勝經》
《財務自由行》

之後再睇其他。

如果投資金額不多，就不要心急動用現金，暫時月供股票先。等你有較多資金及知識之後先慢慢動用現金更好。

現時月供盈富（2800）$3000，可以，以你的年齡適合的。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這年齡，適合投資平穩增長類股，盈富適合你的。

------------------------------------------------

Q19230：

成哥，有d 生活上既請教，我自問工作上好多時講野唔足夠信心，但我覺得你成日講野都好有說服力同信心，好想請教下點苦練先可以好似你講野咁醒目。

龔成老師：

其實我20年前，無是一個無乜信心，成日放棄的人。

我是因為睇左好多正面書，然後改變左唔少。所以，我建議你多睇書。

另外，做運動，定目標（但定左就一定要做到）。另外，我會寫「成功日記」，每天記錄自己完成左，感到成功的事。

我相信你做上述的事，半年後已經好唔同。

------------------------------------------------

Q19231：

老師你好，請問你會唔會建議我地買美股？因為身邊好多朋友買美股都有賺，佢地話美股係大牛市，普遍都係向上，但港股唔係，我自己又唔識美股，老師有冇邊隻推介？

龔成老師：

港股美股，只是當中找到優質公司，就是可投資，因此你可以考慮，最重要是「優質公司」「你熟識」

由於近年美股的升幅不錯，因此多左人投資美股，多左人認為美股較好，但我地唔好因為這些中短期的表現，就認為美股較好。

以中國及美國長遠的經濟發展計，兩者都是不錯的，你可以進行一個配置，長期持有。

最簡單是考慮美股的ETF：VOO、QQQ

------------------------------------------------

Q19232：

成哥 你好，又係我，疫苗產生令到金價今年高價回落，我覺得現月供貼近金價的股票適合嗎，防止另一波黑天鵝（例如另一波疫情）

到時達到避險作用，我這樣想可以嗎；另外山東黃金是比較貼近金價的股票嗎？

龔成老師：

你唔需要作太多中短期的分析，最重要是建立一個長期的組合，著重「配置」「長期」。

黃金可作為組合的其中一部分，但不用太多。

山東黃金（1787）主要於中國從事黃金採礦及加工，以及銷售黃金產品。

佢係於中國合共控制及經營十幾座礦山，大部分位於山東省，並於中國擁有多個選礦設施及冶煉及精煉設施；當中，持有一定數量的黃金。

佢雖然有一定的資產價值，個都要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

------------------------------------------------

Q19233：

感謝龔Sir!你的課堂帶給我滿滿的價值

最後一堂你喺最後環節的分享，令我也想起自己小時後都有類似經歷。

那時，我雖有自己的房間，但房內的所有傢俬/窗簾的顏色/款式也不能自己決定（仲有衣著也不能自己買，興趣也是），想添啲心中的傢俱，便被父親責罵，叫我「以後自己有錢先自己買，而家住我地方就無權話事」之類的。

於是那時青少年的我便發誓以後要賺錢買一套真正自己的房子，然後便可自由了。但以前的我好討厭商業，雖然很想要錢，但對錢可能也有少少仇恨吧（因家人成日講錢）

到了廿歲，認識了一些朋友，佢哋同我講要定目標，例如30歲前要達到咩目標，那時我便替自己決定了3個目標（有屋有車有100萬現金），然後努力做老師講既事情，買股票，打份穩定的工, 每月至少把人工的一半儲起（別人年年去旅行日日出街吃，我就帶飯，旅行少去）。

雖然中途因為跟家人炒494而輸掉了大半年的人工，同埋喺2x歲因為家人反對我買樓而錯過了2009年的置業機會，但總算在33歲達成了（感恩有家人資助部分首期，雖然內心感覺不是100%靠自己努力而達到，當然間中亦會有說話聽）。

達到了目標，卻因婚姻不如意而不開心（也是投資錯誤，如果一早認識老師專頁便好了），而且因沒有明確下一人生目標而迷惘... 唔知自己想點。

2018年接觸了老師的面書和書籍，2019年接觸了一些正向教育，我開始重新思考自己的人生，也因發現另一半既不良嗜好止蝕了不如意的婚姻，踏入單親媽媽系列。

此時人生跌進谷底，投資路上亦浮浮沉沉（去年上左趨勢投資的課程，因貪開始炒炒賣賣，初時賺錢很開心，但喺今年3月炒輸股票和期指，共輸了6位數。

BTW周遭的人也勸我放棄1211，我結果忍不住放了，如果回頭望當然相當後悔，所以學好基本面和保持耐性真的很重要）。

最後決定放下自己，認真學習價值投資學懂自己做分析，同埋要改變自己心態，改變自己思維（真係好似你有一篇分享話有啲有錢人唔識分配自己資產，我因借貸多左一筆資金，但一時間亂投資亂炒賣，唔識管理自己資產加上貪快導致得不償失）。

雖然而家都有炒賣賺外快，但一定要留一筆資金是長線投資專用，而且根據老師意見把組合集中一點，買賣前一定要先睇股票的基本面。

另外，老師喺《財務自由行》同埋老師所推介的《財富金鎖匙》所講既金錢概念/吸引力法則對我影響至深，講起金錢原來我哋有99%人的金錢概念也是錯的（包括我家人），而想成功便要跟已經成功的人學習。

老師課堂講既「唔好放棄」，有如幫我打左支強心針！

我會把老師教的知識學以致用，好好運用書中的吸引力，投資自己腦袋之餘，並不斷擴展自己的朋友圈，希望認識有正能量的同道中人之餘，也以身作則教導兒子正確的金錢觀和人生觀

龔成老師：

加油呀！每個人都有唔同的經歷，但我會好好利用每一段經歷，去幫自己成長。

我1999前開始買股票，頭幾年都是輸多贏少，就是輸得多，所以先決心學投資。

我希望你可以記得過往的錯誤，令到自己在之後行翻正確的路，這點好重要。

我相信你的家庭負擔都唔少，相信你都好努力，我相信你的小朋友都會以你為學習對象。加油呀！

------------------------------------------------

Q19234：

阿sir 你好，我先提供背景資料，今年36歲，讀書不成。2003年沙士開始工作，當年雖然人工很低 6,500，但物價算平，每月我都將所有錢，月供股票一隻工商銀行，隨著每年加薪，到我約28歲時，約月供股票了約 400,000 + 現金。

決定 2012年買了一層 200萬屯門細價樓 借140萬 供20年。但是當時沒有能力即時入住。所以先放租了3年。並專登找了份新工，長駐國內廠包食住，希望節省費用。最後2015年回港自住組織家庭。但是已經沒有多餘錢投資。

由細到大教育自己一分耕耘一分收獲，可惜婚姻感情出了問題，我2019年加按層樓，借多了150萬給前度作為生活費。現在變成供 30年的樓奴。

我宜家身心都好苦惱，工作不順利但無法辭職，人工連花紅28000。希望了解應該怎樣做才能盡快財務自由？

當時2019年決定：

1. 一份儲蓄保險，每年70,000 x 15年，最後可以取 150萬。

2. 層樓改為放租，月淨收 $9,000，現在返回家與兩位老人家暫住，但我好想有私人空間。

今年2020年睇完阿Sir分析再決定：

3. 月供 $5000 盈富基金、$1000 領展

後來2020年疫情，多了私人時間留意阿Sir的教學，與我當年做法甚類似。相信請教你意見幫到我。本身我不認識股票年報，所以買了阿Sir三本電子書。《50優質潛力股》《股票勝經》《年報勝經》。希望可以有多餘資金報讀阿Sir課程。

我今次想問阿sir意見，目前樓價約500萬，扣除借貸有淨150-200萬，我應該現時放棄層樓，直接改投資房拓嗎？

還是維持擁有層樓，但將層樓轉名給父母，我自己重回首置物業的優惠，等機會再入市買多層樓嗎？

龔成老師：

你現時已有物業，其實不用太急去增持物業，因為唔想你的資產過度集中在物業類別。

現時物業收租，對理財來說是最好的。

而賣出物業，你會無左一層「將來可能自住」的樓，因此，不建議賣出。

最好的方法，是保持現有狀態，你將物業出租，你有淨租金收入，如果日後你有自住需要，到時再搬翻入去。

這刻，你最重要是努力儲蓄，及投資，以你的年齡，仍是財富增長的時期，因此，盡力儲蓄，而及做到投資就得，這方向對你最好。

你努力睇書增加知識，以及之後上堂，之後做好財富配置，你36歲仍是一個理財的財富增長年齡，財富仍有增長力。

------------------------------------------------

Q19235：

老師，我計劃在兩年內買樓。請問我現在的450萬現金應如何配置？另外每月還有5萬儲蓄，又應如何安排以增值？

之前一直不懂投資增值，常常只存現金。直至認識老師的Facebook page 才開始知道自己的現金不斷貶值, 浪費很多時間帶來的複息效應。

美國的無限量QE, 資產价值不斷飆升，真的令我不敢再拿着現金，錯失投資機會而令日後退休金不足。煩請老師教教我如何是好！謝謝！

應否在學習買樓期間(對買樓0 認識) 暫時買住一些REITs (例如， 823, 778)，或6823 和 2638 增住值一年先呢？

龔成老師：

如果你將在2年內買樓，在配置上應該留現金較多，流動性要強，就算投資股票也不能太多。因為你不知你想買樓時，股市情況如何，同時，無人知樓市會否忽然下跌，如果下跌而你又有足夠資金，就能把握機會。

建議你有一半以上持有現金。

餘下的，可投資穩健類股，收息型都適合。

盈富（2800）、港鐵（0066）、房託、香港電訊（6823）、港燈（2638），你都可以投資。但唔需要入太多，除非大市出現較大型的調整。

------------------------------------------------

Q19236：

龔成老師，想問下有啲借股票收益計畫可以參加嗎？

龔成老師：

即是同證券行定立協議，將你手頭上的股票借出，你可以從中收取利息的。具體的情況，你要向證券行了解下。

這個動作你本身一定要長線投資，不打算短期賣出股票，才可以借出股票。

至於風險，則是你忽然想賣出時無得出貨。又或該企業及大環境轉差，股價持續下跌，你想賣都無得賣。要等協議取回股票先得。

------------------------------------------------

Q19237：

Hi 可唔可以講下2314同2689

龔成老師：

理文造紙（2314）主要從事生產及貿易原紙、木漿及衛生紙產品。本質不算差，但又唔算係好好。

過往的生意，雖然都有增長，但不算強，同時近年有回落情況，現價合理的，投資價值都算有，但又唔值得投資太多。

整體的投資價值，可算是中等，買入收下息都可以，但就唔好對股價有太大期望。

玖龍紙業（2689）質素不過不失，雖然股本回報不算差，但成本令佢盈利波動唔細，這一定會帶來風險。

相信中短期較一般。這行業投資價值算是中等，因此不宜投資金額太大。都有長線投資的價值，現價合理，但增長力不算強。

兩隻裡面，玖龍紙業的質會較好。

------------------------------------------------

Q19238：

老師，你好，本人今年22，有份副業，在疫情中搵緊長工，依家先做緊PT，每個月約可儲$8000-10000

請問會建議投資初階者點去開始？

去閱讀你那一本書會較有幫助？

我可承受風險的，請問就潛力股而言會較推薦識幾款，另外想增長投資資識可以點做？

龔成老師：

如果現時收入不穩，就不用太急投資，可以先儲較多現金，同時提握機會增加知識先。

當然，如果你認為現金已足夠，都可以進行投資，你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$5000。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

你可以睇《股票勝經》，相信較適合你。

------------------------------------------------

Q19239：

龔成老師，請問我現時持有941及823，分別於$70 及$95左右買入，佔了約40-50%的投資

我應繼續持有還是及早換碼呢？

龔成老師：

這兩股本身不是無質素，不過你買入價太高，加上佔比有點多。

第一，唔好再加注，單一股票佔你組合太多會出現集中性風險。

兩股都可以守，但你預中移動（0941）要上翻去不易，至於領展（0823）上翻去的機會較大。如果你本身想收息，就可持有中移動，如果想財富增長，就可等佢升多少少後轉其他更有增長力的股。

------------------------------------------------

Q19240：

龔sir ，想問下9997康基定853微創比較優質

853回番3成可到合理頂嗎？

龔成老師：

康基（9997）睇翻佢的資料，佢係中國最大的國內微創外科手術器械及配件(MISIA)平台。

根據資料，按銷售收入計，2019年中國MISIA市場規模達到人民幣185億元，集團在國內廠商中排名第 一，在所有廠商（包括國際和國內廠商）中排名第四，所佔市場份額為2.7%。

根據資料，2019年銷量計，集團在中MISIA市場的多個細分領域，包括一次性套 管穿刺器、高分子結紮夾、第三類一次性電凝鉗以及重複性套管穿刺器和鉗中亦排名 第一。

佢不是無質素，不過由上市開始一直都唔平，所以之前貴，現價仍未平。算是合理區頂。

微創醫療（0853）業務有增長力，但估值難，現價貴。

佢業務主要專注於治療血管疾病及病變的微創介入產品。亦銷售極其細小的顱內支架、用於促進腦血管血液流量的靈活支架以及外科手術中使用的覆膜支架。

前景是有的，本身業務都增長快速，相信長遠不差。問題主要是估值，市盈率高，但增長快，如果更準確的估值，應該用較多「預測」去進行。但這企業要預測發展並不容易。

佢之後的生意增加，慢慢成本減，當然會令佢盈利有理想增長，市場就是預期這情況，所以比佢一個好高的市盈率。

初步分析，現價並不便宜，但有潛力。質素比康基略好，如果跌翻2、3成，算是合理區頂（不過，這股估值難，所以較難完成確定）。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。