我上到西鐵站，已見到很多黑衣人，到達朗屏站，人潮已相當墟冚。我跟著「守護孩子」義工隊出發，沿途的行人天橋上，見到很多呼籲「不破壞、不指罵、不起扛、不暴力」的大橫額、海報，四處張貼提示，著大家不要入村，派地圖教大家怎樣走，示威者互相提醒克制，出發不過幾分鐘時間，我已經好感動。

走了一段時間，一如以往，氣氛和平友愛，有樓上居民倒水，引發年青人起哄，這時中年的男人女人著大家，不要理會，繼續向前行，他們就是要我們不走出來，我們這麼多人一起向前走，向他們說，我們不怕。我每次遊行看見民眾都是非常理性和平、守望相助，很高質素的公民，而為甚麼後來總發展成流血衝突，去問問低質素的政府和警隊吧！

義工隊收到訊息，元朗圖書館附近有年青人被警方留難，我們趕快到場瞭解，那時見不到警察，見到幾個年輕人圍在一起，我們上前查問一下，隊長是社工，展示身份後，一個女孩子告訴我們，警方如何截查充供他們的物資，那都是醫療急救用品，她邊說邊涙如雨下，聲音顫抖地告訴我們，那些急救用品不是屬於他們的，是大家努力籌集回來，再交給他們運送，她自責自己不能完成任務，資源白白失去了。我看著女孩稚氣的臉龐、一雙涙眼、慌張而內疚的神情，好難過。社工安慰，你們已經做得好好，是我們大人們做得不好，保護不到你們，其實更多的安慰說話我已經難過得聽不進去了。

過了一會，氣氛開始緊張，大量防暴警察在前邊走過，警車的長長車龍駛過，我們嘗試走回市民聚集的地方，沿途不斷見到警察呼喝市民，很多街坊裝扮的中年男女，非常生氣激動，不停大聲回敬警察，「你哋同黑社會勾結呀」「香港警察，知法犯法；香港警察，狗屎垃圾」，指罵聲此起彼落，其中一位中年男人，以非常響亮的聲音十分激動地嚷：「你哋係唔啱㗎！你哋咁做係唔啱㗎！你哋由得壞人打市民！你哋係唔啱㗎」，那種對錯執著的指控，在街角迴盪。

在大馬路，警察已設立防線，他們全副武裝，但市民一貫平靜，很大的對比，而且我發現有相當多的中老年人，有的甚至一般街坊打扮，他們紛紛在街頭議政，我細心聆聽，「有賊唔拉拉市民」「我哋市民係唔X滿意呢個政府㗎喇」「助紂為虐，不知所謂」以及一大堆一大堆粗囗，有的甚至教授策略，「慢慢嚟，定啲嚟，我哋冇武器㗎，佢哋衝咩呀，警察進你就退，警察退你就進」，他們都不是黑衣年輕人，他們是街坊是市民是伯伯是師奶，他們痛心責罵，指出對政權的不滿，這就是民意。

有位伯伯說，他第一次參與，怎知道原來年輕人咁鬼齊心咁鬼落力，大表欣賞，然後他呼籲大家，「今日好齊心，宜家返屋企食飯喇」。其實示威活動這樣子走進民居的地方，讓很多街坊鄰里親眼看見示威者的齊心努力，也看見警察的推進以及情緒失控的一面，似乎這個影響力不容小覷。

警方開始清場，年輕人著大家離開，我在大馬路留守到各人都開始離去，我也和炎回家喇，有年青小伙子呼籲「下次再嚟呀」，我笑了，夾雜著無奈與欣慰與希望與時局諷刺的微笑。

回到家，發現南邊圍又有事端，警察甚至進入西鐵站暴打市民。細心閱讀新聞，原來今天：催淚彈射上老人院、向著記者發射催淚彈、有人頭中槍、制服並粗暴對待社工、車上發現中聯辦官員的賬單與大量器武，還有各段讓人超級氣憤的短片。

想起今天遇到的各人，他們的聲音，他們的堅持，看來，大家應該會「下次再嚟」。

運動至今其實發生左好多事，大家見步行步嘅抗爭方式好多花款，我地既然行左咁多步，係時候了解一下各個抗爭方式帶來的效果，並且嘗試整理一下部份的抗爭所帶來的成效吧：

首先，係各種遊行的抗爭方式。基本上係耗費人力成本最高的抗爭方式，亦唔能夠每日都做，呢個係佢最大嘅問題。但係，大家有冇留意到一樣野，其實呢種18區遍地開花式的遊行，並唔係和理非咁簡單，佢係可以有感召敵對陣營的可能——屯門公園趕走大媽一役，大家發現藍絲都隱約出現變節，那怕在各個紅底的媒體裡，都唔再跟主旋律去鬧廢青（這部份是因為鍵盤戰士成功滲透了他們的媒體去輕輕帶風向），這是建制媒體始料不及的。換句話說，只要往後18區的遍地開花活動，能夠同時包括到淺藍絲的利益時，我們就能感召對方變節，當然，這不會一下子將他們拉成淺黃，但起碼可以讓他們有一個想法：其實黃屍都衰唔晒，咁呢粒種子就可以慢慢發芽，終有一日可以將他們由淺藍拉做中立派。很可笑吧？我們之前成日話地獄最炙熱的位置是留給在重要時刻選擇中立的人，但技術上，只要拉走一個淺藍，對方就會被削弱一點。

另一方面，遍地開花的遊行有另一個意想不到的作用——它將警察瘋狂的一面暴露在一眾街坊的眼前。大家在中環在灣仔抗爭，其實住在屯門的師奶係感受不到多少的，如果佢地睇CCTVB新聞仲會覺得廢青搞事，警察很可憐。但好似早兩日咁，有個師奶同呀叔去旺角飲，飲完俾班警渣兇過呢？佢地就會有另一番體會了。你要知道師奶最鍾意就係講人是非同埋睇戲，有六國大封相唔睇才不是師奶，以警察好似high大左咁情緒失控，佢地一定會忍唔住去兇啲師奶，然後呢？然後班師奶就會不停咁唱佢地。你要記住，社運最難搞就係呢啲政治冷感嘅師奶，但如果我地可以借警察之力，去兇醒呢班被建制變左做羊廿二年嘅師奶，此消彼長，這數字就很可觀了。

所以，遊行抗爭係可以做，做之餘仲可以順手解埋兩條副本任務：找出共同利益感化藍絲、借黑警兇醒啲羊。

呢一場係公關戰，而所謂的公關，並唔係講緊同警隊鬥公關，而係向更多的市民做公關。

除了遊行抗爭呢波公關戰，另一方面就係資源戰。

打仗係要錢的，尤其是感謝港獨之父689的教導，佢每日都恥與為伍蘋果，搞到肥佬黎冇廣告好頭癢。如果無佢每日出文提大家要玩抵制紅色媒體廣告商呢招，我地仲每日都傻傻地不斷咁叫罷睇CCTVB，然後罷睇十幾年都仲繼續罷睇緊。既然係咁，就唔好罷睇，反而大家要金睛火眼咁睇——見到有咩廣告商，就去佢啲社交媒體facebook度瘋狂派嬲，係呀，你無睇錯，我叫你派嬲就ok，留言就睇你得唔得閒啦。點解？好簡單，因為marketing要交report架，你留言鬧佢，佢block或刪除左你就唔需要計算你在報告之內，甚至佢可能交個留言總數上去，仲可以話今次個活動好有noise。但如果係嬲嬲icon呢？咁佢就無得呃，呢個世界冇得delete嬲架，一定要原個like同嬲數咁交晒上去。然後，搵．相．熟．的．媒．體．報．導．公．關．災．難。

你記住，大家出黎都係打份工，無人想爆隻鑊出黎，online俾人鬧都算了，如果上埋media，我倒想看看隔離PR呀姐會唔會擸刀砍你marketing花開富貴。只要無利可圖，對方就會唔肯落廣告了。

我知，你會話咁到時候會有紅色資本黎賣廣告倒水俾佢架。係架，你睇返上兩段我講咩——呢場係資源戰。紅色資本當初唔喺佢度賣廣告當然係商業考量，佢地一定係認為呢個媒體唔係一個有效嘅媒體先唔會落。咁就更好，迫佢地燒銀紙去用一個無效嘅媒體，幫人放血最開心，資源戰除了搶人資源外，燒人資源也是個好方法。所謂紅色資本，就算再紅，佢始終都係資本，每一個marketing都有自己的預算，爆左就乜都做唔到架啦。當佢地揼水救CCTVB的時候，我們才施施然去「追捧」其他紅色媒體，到時佢救得邊一個？Be water, my friend.

而除了一般廣告外，更重要嘅係「追捧」紅色媒體嘅活動，而當中商場show呢一啲食水極深嘅活動，係必須要「事事關心」。marketing sponsor個活動出黎，其中一個原因都係想俾高層揸住枝咪巧威威咁上台講兩句過下癮咁解（正如點解死都要買塊billboard在自己公司樓下俾老闆睇）所謂高層嘛，都是貪生怕死之輩，依家隨時可以半小時內集結一兩千人「追星」，你估佢地個個係林鄭見到兩百萬人上街都唔怕死咩？你試下叫你老闆上台，而台下有兩千人對住佢唱sing hallelujah to the lord？佢唔駛見到國旗都失禁呀！你第二日真係唔駛返工了。而正如我上一篇文講過，由於大家都係打份工，唔需要同你搏命，所以只要大家睇住紅色媒體有啲咩活動，然後幫佢開event、大家瘋狂click出席，佢見到個數夠大就唔會同你搏，自然會取消個活動。我地出click，佢出銀紙，最緊要燒佢資源。

萬一如果對方真係迎難以上呢？loop返上去遊行抗爭的玩法，唔好犯法唔好衝突唔好死，有示威者就會有警察，到時唔需要我地出手，警察會自己拆左廣告商個活動，亦會在一眾街坊面前發癲，天口熱商場最多人涼冷氣，咪等警察兇下啲街坊、兇醒啲羊囉。

其實，重點係無一個抗爭方式係獨立運作的，大家可以試下自由組合，不停咁loop出一個套路，全方位360度攻勢，對方就好難見招拆招。作為一個抗爭者，與其看哲古華拉少年日記，還不如多讀《孫子兵法》，你讀完《九地》篇就不會走去圍將軍澳，甚至你會發現對日常生活以至工作都會有很不錯的影響。

延伸閱讀《孫子兵法》附白話翻譯：
http://www.cos.url.tw/sunzi/w_sunzi.htm

#圍將軍澳好易被將軍
#不受傷不被捕
#唔好死
#寫完呢篇到我要抖一抖
#唔好問我張圖發生咩事
#我一向都癡線架啦
#你點可能預我正正常常寫晒篇文
#我師奶仔發開口夢架ja