【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20421-Q20440）

Q20421：

老師，我想請教下，一間冇盈利既公司，例如（1833）佢點解可以令到股價高上，而投資者又願意買呢隻股票？

龔成老師：

因為市場集中在佢將來的價值。

在企業估值的方法，不少都會考慮到將來的情況，例如現金流折現法，就是計算將來現金流，變成現在價值的總加。

這並不是考慮最近1年，而是1年、2年、3年，一直考慮。

就算企業這刻的現金流較少，只要將來的現金流較強，都會有一定的價值。

當然，愈是將來的現金流，不確定性愈高，就會令股價波動愈大。

------------------------------------------------

Q20422：

老師，自從睇左你嘅書（但未睇哂），我開始每月儲錢，而家28歲，月入20k，每月儲到8,000-10,000，而家儲左50k. 我有以下2個大方向想請教：

1. Hkd 5, 000供股＋買增值股，暫時打算hkd 2,500係盈富(2800)，hkd 2,500係比亞迪（1211），再每月買1手etf(3067)

2. 月供4000落儲蓄保險，（之後第2年開始年年派20,000），每月買1手3067，之後佢每年派息先再買股票。

真係多謝老師，如果唔係你嘅書，我好肯定我唔會每個月儲到8000-10000

龔成老師：

太好了！你已經踏上了正確的理財之路，保持知識與財富增長！

28歲，如果你可承受風險，可選（1），而（2）會較保守的（當然，如果你本身好怕風險，就（2））。

不過（1）的方案，現時比亞迪（1211）貴，建議你供其他，盈富（2800）+2845+3067都得，這個組合會較穩健。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q20423：

老師，弱弱一問我用富途牛牛投資如果想買收息股佢會點派息？

同埋3738（阜博集團）值得投資有潛質嗎？
thanks

龔成老師：

當你買入某股後，就要睇翻該股有無息派，以及除淨日幾時，這是一個介定有無息收的日子，如果這日或之後先買，就無法收該次的股息。

如果確定你有息後，就會在派息日派息，一般都是現金的，會直入你戶口，除非佢有「以股代息」，你就有權同佢講要股（但可能要你主動提出）。

阜博集團（3738）是較高風險類。

業務是線上視頻內容保護服務供應商，客戶包括七大全球電影公司、電視網絡公司及其他內容擁有者。

過往一直虧損，近年開始有錢賺，業務增長加快，不過，本身的獨特性不是好強，規模未算好大，因此，未見佢有好確定的優勢。

潛力度有的，不過就存有較有不確定性，這類股只適合小注投資。

------------------------------------------------

Q20424：

請教下：
27.4入左1818
7.7入左1448
長線投資，可以？

龔成老師：

招金礦業（1818）不過不失，佢主要從事勘探、開採及銷售黃金。

本身的資源有一定的價值，但盈利始終受國際黃金價格影響，因此本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

股價很大程度與黃金掛勾，由於人類對資源的渴求在長期不會停止，而資源是有限的，所以，長遠都會有上升的潛力，但中短期就會波動。

近期受惠於金價上升，此股升了不少，市盈率去較高水平，唔平。

此股唔係無質素，但只屬中等，不建議持有太多。

福壽園（1448）有質素有發展力。你可長線。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。
由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於此股業務好獨特，因此業務情況在年報上或資料上，未必能完全反映，雖然數據及資料上都顯示此股有質素，但往往要時間證實。

至於企當估值方面，市場對此股的評價亦不低，企業經常處略貴水平，$7是合理區頂，不能太過進取，以分注小注投資是一個策略。

管理層的野心很大，投資後不要升少少就快，要耐心持有，等長期更大的收成。

你有貨可持有，無問題，但就不要太急去加注。

------------------------------------------------

Q20425：

老師你好，我今年42歲，現時財政狀況如下：
本人及先生月入：$60000
年尾花紅：$10-12萬
樓按揭：餘12萬（快供完）
現金：45萬

MPF: 70萬，高風險為主
儲蓄保險：8年前實供9萬，現值12萬，擺多10年會收番20萬（唔知應否提早取出？）

自己人壽儲蓄：$6萬/年，尚要比多2年
自己危疾儲蓄：$1萬/年，比多10年
先生人壽儲蓄：$3萬/年，比多5年
股票：只有1000股匯豐，平均約58入，每月月供股票$4000

本人想財富增值，日後早少少退休，想請問：

1. 月供股價應否轉為2800？
2. 儲蓄保險應否提早取出？今年11月可取回12萬
2. 應該如何投資，可令財富穩定增值？

謝謝你的回覆

龔成老師︰

1） 匯控（0005）主要用來收息，增長能力好一般。建議你轉做盈富（2800），增值能力會較好。至於現有持股，由於唔算多，持有住都可以。

2） 其實"保險"只係理財中防守部份，買足夠保障就可以，增值應留比優質資產（如優質股、物業等）去做。但由於你們保單都就供完，甚至已供完，故唔建議去做變動。

3） 現時你成個資產組合中，股票比例明顯太少。建議你用"平穏增長股" + "潛力股"作組合，去創造一個增值平台。分配上，應用"平穏增長股"作為主力，再加一些"潛力股"。

現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時大市只是合理區，你現有45萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20426：

龔sir，你係成功過程中
點樣調整到蝕左錢個心態

有時蝕左錢就好想即刻追返
心急就亂，亂就好易出事

龔成老師：

我持有比亞迪（1211）12年，多年前由十幾二十蚊，見佢上到$88，其後見佢有$88跌近9成，去翻$12！

比亞迪當時已是我最大持股，由賺變蝕！

我的財富當然大幅貶值，我同自己講，過往的無辦法，最重要是將來，理性分析現時應該持有/加注/賣出，在投資世界，理性是最重要。

我上了一課，經歷財富的大起大跌，心理質素大幅提高。

記住，最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q20427：

男神，我同你報喜
我由2019年12月識你之後
就開始進行月供股票
到目前為止

盈富增值＋16.22%
港鐵增值＋12.18%
中銀增值＋3.47%
金沙增值＋55.16%一手手買
中間有小小炒賣
必瘦站增值＋104.41%
不過中生制藥就－14.85%
都係多謝你先 之前我只會將錢儲定期 一年有1-2萬蚊已經十分開心

而家唔止增值1-2萬蚊
真係好開心

您真係致富明燈
任勞任怨帶領大家財富自由 你真係超級無敵靚仔兼大善人
真心多謝你 ！

龔成老師︰

能夠幫到你，咁就好！

緊記月供係一個長線計劃，月供最少維持3年，並持有這些股票5年以上，才會有較理想效果。

當中會有升有跌，但係正常的。只要持股係有質素，中間股價波動係唔洗理，長線持有就得。

另外，唔好短炒，可能一次半次有賺到錢。但我之前做銀行、證券行咁多年，見證大量客短炒全部最終都係蝕錢，只有長線才能有錢賺。

長遠來說，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20428：

老師，有個情況想問你意見：

當年我媽退休時（我還未接觸股票），被他人說服用退休金買2628，仲要以高位（大約@33）買入共46手。買入後大跌，她也沒有止蝕（因她也不太懂股票）keep住到而家。

想問一下如何處理？（想幫佢好好咁manage一下佢既退休金）

現在賣出轉其他收息股？等回到某一水平才賣？還是keep住唔賣，就咁收息？謝謝

龔成老師︰

其實已退休人士，應集中係"收息股"身上。用佢產出架穏定現金流（即係股息），去支援退休生活開銷。

中國人壽（2628）近年賺錢能力弱左，質素只算中等（不是無質素）。但佢唔係收息股，唔適合你母親，就算持貨都不應太多。

你可以慢慢沽出（唔係一次過，要分段做），再建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時股價只是合理，未到平宜，因此換碼時宜分注。同時，可保留一部份作現金，等大跌市才動用。

最後，你要留意係創建這個收息組合時，唔好太集中係單一股票上。相同行業不可佔組合多於3成，而單一企業不要高過15%，否則會有過度集中風險。

------------------------------------------------

Q20429：

龔sir，想問平有教我們供股票既意思是否定期一手一手禁買入跟晤同既股價追上?

因為我之前入咗隻莎莎國際1.2 入的～ 這股都用供股形式去分段投資合理價嗎？

因為我之前以為供股個意思係張啲股票同一口價落三成本金跟住借七成 畀你股24個月禁供

這樣是否誤會咗你嘅意思

龔成老師：

我所講的是「月供股票」，要先同銀行登記，簡單來說，就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

如果你不想用上述月供，用「自行分注」都得，例如每1、2個月買入一手。

莎莎（0178）都有質素的，相信最差時期已過，你都可以久唔久入一注，但最近升左上去，又唔值得買入得太密，同時未必值得持有得太過多。你原有貨不持有，但就加注未必要加得太急。

------------------------------------------------

Q20430：

請問6837可以入貨嗎？之前d潛力股都未返到買入價。謝謝你

龔成老師：

海通證券（6837）業務有：證券及期貨經紀、資產管理、自營交易、投資銀行、直接投資、管理本部及其他分部、融資租賃、海外經營分部。

業務主要地是中國，近年的生意不算差，但增長力唔算強，同時盈利略有波動，始終行業都會受投資市場上落因素影響。

現價合理，但你預佢都會有波動風險，長線投資價值都有但不是高增長類。

------------------------------------------------

Q20431：

Hello,想問0175 同3993 前景如何

龔成老師︰

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

現時價位在合理區頂，甚至有少少貴，股價波動，有貨可長線。最好回少少，或這刻小注等跌再加。

洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較較分析。

另外，這股的股價較為波動，這股不是不能投資，但不建議大注。

------------------------------------------------

Q20432：

龔成老師你好！ 睇你專頁都有一段長時間，晌上年開始我入市以下股票：

0003-2100股 平均價$13.14
388-8股 平均價$382.65 （之前月供，上到$500後停供）
823-631股 平均價$65.94
1177-3000股 平均價 $9.4
2628-2000股 平均價 $16.42
3328-5000股 平均價 $4.75
8328-4000股 平均價$5.22

每月我大概可儲$14000，當中有$7000月供領展。
2628同3328 ，我打算升番d就平手或賺少少離場。 到時大概有5萬，再加我手上餘錢，合共8萬左右。

我有諗過以下想法，想問下老師的意見？

1/ 8328最近升左好多，請問值得高追1-2手嗎？
2/我睇中1789及3718，請問老師對此兩隻股票意見？
3/ 0003 現價好平，值得現在加注嗎？

謝謝老師

龔成老師︰

1） 信義儲電（8328）都有質素，但盈利上好波動，不宜持有太多，唔建議加注。

2） 愛康醫療（1789），以長遠業務分析，正面的。佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。不過，這股經常處於少少貴的水平。現時市盈率達40倍以上，投資時要考慮價格風險。

北控城市資源（3718）有質素的。佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。現價大約合理區頂位，不建議這刻太大注。

3） 煤氣（0003）現價係合理區中間，加小注可以。但緊記，個別企業唔好佔組合15%以上，否則會有過度集中風險。

另外，投資記住係用長線持有模式，讓優質股自然咁增值，而唔係做短炒。

現有持股中，中國人壽（2628）質素較中等，不宜持有太多。你可以將部份換至其他優質股，咁會較好。

而交行（3328）主要係收息，若你係年青至中年，由於佢無乜增長力，都唔適合你。

------------------------------------------------

Q20433：

龔成老師您好，本人是來自澳門的一位80後的家庭主婦。最近開始閱讀你的作品，希望從中可以學習到投資的知識，期望你不久的將來可以過來澳門開班。

目前有小小問題想請教一下你，本人大約在6年前自以爲懂投資的情況下，購買了以下股票，購買了之後就一直跌到現在

本人想放售然後入小米，但還是想聽聽龔成老師意見，應該繼續持有，還是怎樣，感謝你的解答

751--10,000股 （成本價$6.6）

1060--60,000股（成本價 $2.78）

1816--20,000股（成本價 $4.5）

龔成老師︰

創維集團（0751）從事電機、智能系統技術業務、智能電器業務等，中國及海外都有市場。

近年增長力唔算強，生意未見有擴展力，盈利有點波動，整體的品牌價值及銷售網絡，未算好強。長遠發展力只是一般。你預佢增長力唔算強，長遠算是不過不失。

如果佢只係佔你組合小部份，持有都可以。

阿里影業（1060），炒作較多，風險高。這企業到現時仍未有盈利，市場只憑佢前景去評估，其實這會有相當的風險，這類股最多只能小注。

中廣核電力（1816）主要從事發電及電力銷售，以及核電項目及非核清潔能源項目的建設、運營及管理。

佢主要於中國從事核能發電業務，包括運營及管理核電站、銷售電力、管理及監督核電站的工程建設，以及向工程公司提供相關技術及維修服務。

這企業發展平穩，但增長力不強，收息可以，但就唔好對股價有太大期望。

現時小米（1810）都有點貴，想換碼入貨，等佢回1成先會較好。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q20434：

希望龔sir可以審視一下我既理財妝況

背景： 26歲，未計雙糧花紅月入20k ，月儲12k,其中7k月供股票，現金儲4-5k

現時現金大約11萬，投資組合現值約32萬

現時月供 2800 - $2000
066. - $2000
788. - $1500
1177. -$1500
手持股票：
2800。2400@$27.3
066。 1100 @$44.2
788. 9750 @ $1.35
1177. 408 @ $7.3
178. 6000@ $2.21
1211. 204 @. $44
1212. 3000@ $8.24
1257. 3000@ $3.45
1928. 800@ $27.83
1972. 1200@ $21
2388. 1020@ $28.2

（1）. 股票組合係咪偏向平穩而唔夠進取？

（2）增持1212會唔會好過增持178？

（3）長遠來說，放走178/2388而換其他增長力較高既股票，得益會唔會更大？

（4）如果公司私有化，對股票持有人會有損失？

（5）. 新經濟股佔比係咪太少？現價太貴而不敢入市

（6） 我將家用交俾家母時，原來她一直都會將一少部分儲起，再若干年後（大約15-20年）送贈給我，
但問題係現金已經不斷貶值，如果我說服家母儲起既現金慢慢入手黃金會唔會更加好？

再次祝福龔sir工作順利！！

龔成老師︰

1） 以你年紀，平穏增長股和潛力股比例，大約各佔一半。所以，你月供配置，係可以。但持股比例，就偏保守。

2） 利福國際（1212）和莎莎（0178）其實都差唔多，大家都受經濟週期和疫情影響。但利福國際（1212）負債較多，風險高少少。

3） 莎莎（0178）都有質素，但近年係弱左，不過不是無質素，只要不過多貨就得。而中銀香港（2388）係有質素，可長線持有。

4） 要睇翻佢私有化個收購價，如果比你買入價低，會有財務上損失。同時，由於你不在持股，你將失去佢升值的得益。

5） 以你年紀計，係偏少，潛力股和平穏增長股各佔一半左右，會較理想。

現時部份新經濟股，有輕微過熱架情況。要若直接入，最好等回翻先好入市，或者用月供去儲貨都可以。

6） 黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多（<3%），而且持有的應該為實金。其餘最好投放在優質股，增值效果會較理想。

------------------------------------------------

Q20435：

龔sir～ 我係一個大學生最近先開始玩股票～ 依家手持01810 06993 03800

暫時感覺都唔錯 都問下有機會突破嗎？ 同埋都買左 01076 00438 想問下呢兩隻股既睇法～

因為都偏冷門小小，麻煩你

龔成老師︰

我唔知佢中短期會唔會有突破，但只要股票係優質，長線持有佢就會自然增長。

小米（1810）係優質潛力股，可長線持有。

藍月亮（6993）有質素，畢竟係新股，有一定不確定性，唔好持有太多。

保利協鑫能源（3800）質素只是一般。佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率不算高，小小注好了。

博華太平洋（1076）主要從事博彩及度假村業務，包括發展北馬里亞納群島聯邦塞班島綜合度假村。

集團生意一直下跌，連年持續虧損。而且，2018和19年核數師意見出現有小問題。

整體而言，此股無投資價值，賣出較好。

彩虹新能源（0438）主要從事太陽能光伏產業業務；生產和銷售發光材料和鋰電池正極材料；太陽能電池元件及其他配件交易。

此股盈利波動，賺錢能力唔高。加上佢負債係一個唔理想架水平，長線我建議你換碼至其他優質股較好。

你在選股能力和經驗上，都未算太理想。我建議你先學好選股和定平貴知識，再慢慢去投資。就算想現在投資，也先集中係一些大路股票，會較穏陣。

你可以睇我寫架"80後百萬富翁"、"財務自由行"和"股票勝經"，會幫助到你。

------------------------------------------------

Q20436：

啊Sir想請問一下我今年37歲。以下組合可以如何優化？太多銀行股同時蝕緊錢。
應止蝕轉其他潛力股嗎？

1. 煤氣x1,000@$16.94
2. 匯豐x400@$76.05
3. 港交所x200@$279.4
4. 騰訊x200@$463.4
5. 領置x200@$59.5
6. 中生製藥x4,000@$8.58
7. 比亞迪x500@$69.8
8. 小米x800@$25.3
9, 舜宇x200@$126.1
10. 中銀香港x500@$26.55
11. 雅生活x250@$37.5
12. 中國銀行x10,000@$4.72
13. 阿里巴巴x100@$176

龔成老師︰

你上述持有的，基本上都是有質素的，問題不算大。而你37歲，可以在當中作一些調整。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，應以增值為主。匯豐（0005）、中行（3988）只係收息，無乜增長力，唔適合持有太多。

其餘股票都適合，但你潛力股佔比重佔好高。佢地有增長潛力，但同時波動性都好高，所以最多只可以佔你組合4成左右。未來新資金，可以優先投資平穏增長股，令組合更平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

另外，潛力股可考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20437：

老師，我媽取25萬給我幫佢投資，我既諗法係用最低成本幫佢買入高息股以賺取股息，我睇了以下兩隻：

00808（50手）及03988 （50手），你覺得可以嗎？
謝謝

龔成老師：

上述兩隻都是有質素的股票，收息無問題，現價合理，可投資。

其實，持有2股有少少集中，你可以建立一個收息股的組合，目標是5%、6%的股息率的收息股，可以考慮加入以下股票（在當中選股）：

例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q20438：

老師，想問下你意見，（大概18歲時曾經問過風水師，佢話美容行業唔岩我）

賭場我已經做左十幾年，一直無起色，職場上明爭暗鬥令我很累，加上自身性格問題，做得唔開心就轉工

但以家開始年紀大，唔想捱夜，如果35歲先試學做美容，咩都從新頭開始，係咪太遲。

加上美容店都請勞工（有經驗），而我就無經驗，條路好似好難行。

龔成老師：

我從來不信命運，我只會信我自己。

如果你真心想試，就大膽去做，你這年齡仍是可改變的時期，你試完，如果唔得，都可以轉去賭場。

好多野我都唔試，永遠唔知結果的！

你美容從頭開始雖然有點遲，但如果方向正確，過5年後、10年後，仍可以有一翻作為，加油！

------------------------------------------------

Q20439：

老師，當我見我個倉每日跌2%，個心又不安了，究竟要點樣先可以培養到好嘅心態？

龔成老師：

我持有隻比亞迪（1211）已經有12年，試過由$88跌到$12，跌左9成！之後先慢慢上翻。

你要集中分析「企業長遠的價值」，唔好太理會中短期股價，同時，唔好集中一隻股，要建立「組合」。

記住，「企業」是重點，短期股價不是，要平常心，同埋唔短期股價波動，最好練唔好日日睇股價。

------------------------------------------------

Q20440：

老師，我想問中國生物製藥現價算合理嗎？

另外，騰訊的主要收入來自網絡遊戲，風險會否因此比阿里巴巴高？騰訊現時價格是否太高？

希望㰍sir能抽空解答。謝謝！

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

騰訊（0700）與阿里（9988）都有質素的，都可以長線投資，月供適合。騰訊雖然網絡遊戲佔了一定的比重收入，但佢最有價值的，就是「平台」，這亦是現世代好有發展的資產。

我地分析企業時，要思考那些是核心的企業價值。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價略貴，如投資要明白當中的風險，這刻在注碼上不過份大注，就可以投資這股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20401-Q20420）

Q20401：

你好龔sir， 有件事想同你分享，就係我終於開始創業啦

我係一位90後(女），幾年前考左個專業牌，可以自己接生意做啦

而且我都已經遞左辭職信，做埋今個月。

最令我開心既，就係今日接到第一單生意，賺7萬蚊，係我打工既2.8倍人工

一直以來，身邊既人都話我唔係創業既材料，包括算名先生、我個ex、佢地都話打工先岩我，話我人脈唔好，話我份人好靜，內向。即使我決定左創業，長輩都會同我講「依家經濟咁差，創業唔係咁好」

總之係有幾盤冷水淋過落嚟，如果俾著係以前既我，我會選擇相信佢地口中既「我」，同埋「認命」。因為我自己都覺得自己冇人脈，又內向，真係唔岩做生意。

不過近年來我接觸左好多唔同既資訊，開始接受「自己可以創造自己既未來」「我追求創業既路上係冇阻礙，唯一阻礙係自己」，而且每當我感到沮喪，我都會睇返呀sir既video「選擇做自己」「唔洗理其他人講咩」「要聽意見，都要聽一個成功人士既意見，唔好搵個根本唔識創業既人既意見」

老實說，以前份工唔係我鍾意做既事，但佢可以幫到我搵錢，我會繼續用 價值投資既方法，令我早日財務自由，同埋建立好事業，他日可以交俾其他人為我服務，成為我既被動式收入，咁我可以抽多d時間照顧我既未來家庭，花多d時間做運動，好好愛錫自己

龔成老師：

太好了！恭喜你！

我記得我辭去銀行工，出來做全職投資者，當時都好開心。

雖然驚，但明白方向正確，所以要踏出重要一步。

我相信你找到自己正確的方向，你一直在這方向努力就得。你講得正確，我地唔好理其他人，因為大部分人，都會對創業、做自己，會給你負面的評價。

其實，這世界真正成功的人只是少數，可以問一般人意見，我地不會得到最好的建議。

總之，做自己係最好的，我期待你不斷給我好消息，加油！

------------------------------------------------

Q20402：

睇成哥既書 知道你都係一個重視錢既人 想請教下成哥見到1211由2xx 蚊去番1xx 蚊 時金錢無左1部分， 會用咩心態去對待，好似成哥你千萬身家， 這個上落落差應有過百萬， 點樣先可以令自己心境平和d 去看待件事呢?

我都好想好似成哥咁財務自由，但眼見自己大部分既錢都靠人工儲到多，投資多數輸，令自己有感唔投資仲可以儲多d 錢，但同時明白確實輸通棖。

龔成老師：

比亞迪（1211）股價大上大落，因此一定要平常心面對股價，過往我經歷過佢由$88跌落$12。

我地要好平常心，唔好成日心掛掛股價，唔好成日睇股價，唔好成日計自己有幾多身家。

因為所謂的股價，只是這刻市場的二手成交價，如果我睇好的是企業5年後、10年後的價值，根本不用在意這刻的股價。

你可以觀察全球投資最賺錢的人，例如巴菲特，佢地都是長線持有，平常心對待短期股價，這一點你一定要做到。

如果你過往投資輸多贏少，不如用月供股票的模式，長期累積財富，會比較適合你。

------------------------------------------------

Q20403：

你好龔sir!有留意你分享唧。我想問現手上股票組合，吉利4000股31.6入嘉里物流1500股25.05入，信義光能4000股20.5入我是新手

還有小米2000股29·8入，3067入1600股21.28入藍月亮3000股17.6入我價太高入咗

希望老師可分柝一下嗎？可以長線投資。

現在投資大約40萬。如果老師有時間可以給我分柝一下。感謝您

還是沽出那一只股票
轉盈富基金好呢？

龔成老師：

現時你持有的，基本上都是有質素的股票，你可以長線投資，雖然部分股買入價少少貴，但只要你不是過份集中某一股，問題不大的。

不過，你組合潛力股類別較多，如果你本身年齡較大，又或風險承受能力不太高，可以考慮轉部分到較低風險的股票。

但如果你能承受風險，可以保持，但日後再有資金買入股票時，要建立更平衡的組合方我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20404：

龔成老師您好 想問一下爲何你那麽推薦盈富基金？

還有長期持有的定義是不是就算怎樣跌也不用理會？還是跌到一個低位賣出止損等趨勢回好在買入（這個動作維持長時間）？謝謝老師

龔成老師：

因為盈富（2800）這是一個「平衡組合的工具」，當中有55隻成份股，對股票組合有平衡作用。

盈富不是高增長的項目，但就我過往做了10年銀行及證券行的經驗，比起散戶自行選股（輸錢），投資盈富有基本的增值，反而是更好。

因此，可說是一個平穩增長的項目，因此適合大部分散戶的。

所謂長線持有，是指一個大方向，當中都有可能進行賣出的。

例如當盈富升到貴的水平，就可以部分賣出。

又或盈富質素明顯轉差，就算下跌都要賣出止蝕。

------------------------------------------------

Q20405：

成哥你好，請問你除左金莎，比亞迪，小米，必瘦站，福壽園之外仲持有邊啲股而又值得推介的呢？

我對你的股票分析能力非佩服亦好有信心，我目前有少量資金，想從你已持有的股票之中選擇一隻買入。

如果可以的話請告訴我等我可以參考一下。另外，你認為有邊一啲行業將來的盈利能力會比較高？感謝

龔成老師：

上述的股票，我都會長線持有。

另外，你可以考慮中生製藥（1177），當我地分析時，要用長期的眼光，不要停留在這刻的情況。

中生是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

另外，安碩恒生科技（3067），同樣有長線投資價值。你都可以考慮。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20406：

老師。本人30歲 想1年能儲到100萬
我月薪$40000

每個月能儲2萬
我應該 怎樣投資

現有10萬現金
我常常聽你講月供盈富基金 點解呢
請老師幫幫我理財

及現有300股呀里
1000股小米

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

現時你持有的股票，都是有質素的，可長線。

盈富（2800）這是一個「平衡組合的工具」，當中有52隻成份股，對股票組合有平衡作用。

盈富當然不是高增長的項目，但就我過往做了10年銀行及證券行的經驗，比起散戶自行選股（輸錢），投資盈富有基本的增值，反而是更好。

所以，我一般會叫網友，以盈富作中心，加上其他股，這就是一個穩中求勝的策略。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$10000。

你可以考慮盈富（2800）$4000。

另外再加幾隻（每隻$2000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20407：

感謝老師，平安好醫生賺緊唔少
老師瑞聲$35先係合理價中部？
現價合理頂？

龔成老師：

太好了！平安好醫生（1833）值得長期持有的！

瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別。

$35合理價中間，現價合理區中上，大約是，可以分注投資，長線持有。

------------------------------------------------

Q20408：

老師，我做緊中國鐵塔0788嘅企業評估表，當中有一啲數據有疑問，煩請賜教。

中國鐵塔嘅流動資產遠低於流動負債，但計埋非流動資產又遠勝於非流動負債，整體嚟講係正數，但分開嚟睇，佢算唔算係現金流低而影響營運呢？

我做到資產負債表分析嘅現金嗰一part，應該點樣去演繹呢？中國鐵塔算唔算係資產型企業？

龔成老師：

你說得正確，中國鐵塔（0788）的資動資產少過流動負債，因此這方面我地會扣左分。

我地會首先唔理非流動資產，只集中計算佢流動情況，以了解佢的流動性，這方面的確唔算好穩健。

但不代表這企業會倒閉，我地可以從另一角度分析，如果你睇郵佢過往的「流動資產淨值」，會見到佢每一年都是負數，即是與你現時見到的情況一樣，但你見佢多年來都無事，營運正常，反映佢的財務情況就算如此，也不會倒閉，這是由於佢的客是3大電訊商，現金流十分穩定，對佢來說流動性風險不高，你會見到佢的經營活動現金流保持理想正數。

因此，這不代表佢會有問題，只是我地從投資者角度分析，知道佢風險度高左。

另外，中國鐵塔算係資產型企業。

------------------------------------------------

Q20409：

龔sir 我看到新世界發展 市盈率是82 身為一間地產公司 82市盈率如此之早是什麼原因？ 看了財報也看不明白 是因為合了股的原因嗎？ 可以幫忙分析嗎

同時 我想最近有留意 愛康醫療和中遠海控 你認為兩只都是優質股嗎？

因為愛康醫療是做3d骨科的 相信長遠都是有發展的 加上他是首間中國商業化的品牌公司 有一定的護城河 也有定價力 因為身為病人和醫院角度 一定是買最好的 所以多貴也會買 這想法有問題嗎？

中遠海控 是因為我看到海豐國際跟他相比之下 似乎是低股了 加上拜盈上任 相信是會利好 中美關係又會緩和 長遠或中期內應該是不差的？

我投資中遠海控這種追落後的想法是有錯嗎？因為有些行業 往往是贏家全取

龔成老師：

新世界發展（0017）有兩個因素出現這情況。

第一，這類有「物業重估」因素的企業，你在分析市盈率時，要作出調整。

例如佢一年盈利$10億，而物業重估有$90億，就會令到佢盈利變成$100億，市盈率數字會變細左。

第二，因為疫情因素，企業中短期的盈利大跌，盈利數字變得好低，令到佢市盈率數字變大左，比起正常情況大左好多。

愛康醫療（1789），以長遠業務分析，正面的。

佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。

不過，這股經常處於少少貴的水平，投資時要考慮價格風險。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。預佢之後只能平穩增長，未必是高增長類，現價合理。

------------------------------------------------

Q20410：

龔sir,我見你提及1357，但我見佢呢3年既毛利同收益都減少緊，點解會覺得佢潛力既？
Zoe Lam
同埋見股東應佔溢利係連幾年負數，所以吾太明
謝謝老師

龔成老師：

美圖公司（1357）近幾年的虧損，正不斷收窄，你唔能夠單睇財務數據，要配合佢業務分析，佢過左最差時期，現時慢慢向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

------------------------------------------------

Q20411：

想問 VOO 同QQQ 咩價位會便宜?

我見呢兩隻由之前到宜家都一直上升，其實係咪之後下跌機會不大?

QQQ 同3067 相比，邊隻會優質啲?

龔成老師：

VOO現價已在合理區中上部至頂，要跌3成以上先算平。至於QQQ，已在合理區頂至略貴，要跌翻4成以上先算平。所以，如果投資，要用月供，或慢慢分注模式去入，唔好一次過入，就能避開風險。

無人知佢地會唔會跌的，我地只能從投資值博率角度考慮，平衡風險。

安碩恒生科技（3067）同樣可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

QQQ就美股，3067就中資股。我相信10年、20年後，中美都是全球最大的經濟體，因此都可以考慮，無話邊個一定較好。

------------------------------------------------

Q20412：

老師，楓葉教育近期盈利率下跌，負債率高企，但它是因為疫情影響，以致幼稚園倒閉、留學生下跌、夏令營取消。

我看這些因素都會因為疫情過去而慢慢重回正軌。

現在是不是一個投資的好時機？但負債率提升左咁多，我有D 15、16。

龔成老師：

楓葉教育（1317）不是無質素的，但教育類股票增長力比過往略有減慢，加上政策因素，成為不確定性，始終市場都會擔心之後不少有甚麼政策。

佢的賺錢能力，確的有影響。

睇翻近幾年，教育行業的政策，中國政府都有少少偏向收緊，無論在學費收費上及發展上。

由於市場擔心企業之後的增長力，令這股的股價較弱。因為佢過往曾經增長不差，但在政策風險下，最影響的不是現時的業績，而是之後的發展，令增長力減慢。

以一間平穩增長的企業來計，近期都算合理價中下部，但就唔建議投資太多，始終政策風險難估，但都算有質素的。

另外，再加上你上述所講的因素，都令佢中短期不利，不過，我地最重要是分析企業的長期情況。

整體來說，這股仍是有質素的，中短期會弱，長遠會好轉，但好轉後都不能預期是爆升類。現時股價合理，投資價值都有，但就要控制好注碼。

------------------------------------------------

Q20413：

老師，1 發覺尋找優質潛力股真的頗有難度，請問有冇更快及更有效的方法去搵？

2. 老師最近又有冇搵到新的潛力股可以參考一下？

龔成老師：

1）你可以睇《選股勝經》，有具體教你選股方法。

我地要比市場早一步去找到優質股，就要用自行選股的方法，例如股票班所教的5大選股法，我會利用這些方法，快速選「有可能成為潛力股」的股票，然後再在當中睇下邊D較有機會的，再深入分析。

選潛力股不易的，無話特快的方法，要花時間，但可以找到的。

2）有兩隻風險類潛力股：雷蛇（1337）、美圖公司（1357），見佢財務數據與發展正改善中，不過，仍有一定的風險，我仍然未能完全確定佢地的質素，只見發展已過左最差時期，這些股投資要控制注碼。

------------------------------------------------

Q20414：

老師，有事想請教你，我係一個行動力強的人，呢個性格有好有唔好，有時我決定買入一隻股票長期持有，諗好等佢回調後買入

自己亦會設想好合理價格，但當佢越升越有時就會忍唔住入，經常破壞自己設想好價格，我應該要如何能培養好耐性，可以遵守設定好嘅規則呢？謝謝

龔成老師：

你只要用紙筆寫低投資策略就得。

我在股票班裡，都會派一份6頁紙的「企業評估表」，當中除了要學生在買入股票前，要仔細分析企業外，亦要完整去填寫投資策略。

佢地要在買入股票前，填好「投資策略」，即是甚麼價入市，用怎樣的投資策略，月供？分注？一次過入？總投資金額多少？

你可以參考這些方法。

------------------------------------------------

Q20415：

龔sir，如果我想先睇你著作，應該睇邊本先？
<<80後百萬富翁>>? <<50優質潛力股>>? <<財務自由行>>?

另外，月供為:
2800 (盈富基金), $3000
2382 (舜宇光學), $2000
2318 (中國平安), $2500
388 (港交所), $2500
可以嗎？

龔成老師：

《80後百萬富翁》是最入門的，你可以睇這書先。

月供部分，有質素的，你可以進行，長期就得，就算部分股現價唔平，但長遠始終不面，你可以長線的。

最重要是長期，以及你每月仍有一定的現金剩。

------------------------------------------------

Q20416：

1211想買，但都是放棄，太高喇

如果長城汽車及吉利，邊一隻值博率較好？或應買邊一隻？

另外，點睇992
謝謝你，祝你身體健康！

龔成老師

你可以考慮吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

現時價位在合理區頂，甚至有少少貴，股價波動，有貨可長線。最好回少少，或這刻小注等跌再加。

另外，你亦可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

至於聯想集團（0992），都是有質素的企業，但增長力不算好強，產品的競爭大，如果講個人電腦市場，過往多年來價格都無乜上調。

近期因為疫情，需求大左，所以整體正面，發展力都提高左。

長遠都有發展的，始終有些業務都有增長力，整體是平穩增長型，但未必是高增長，現價合理區中上部。

長遠都是正面，但要睇疫情過後，真正的市場情況。算是平穩增長類，但不是高增長類。

------------------------------------------------

Q20417：

龔sir，最近的大上大落的環境令自己覺得組合升得太慢，想更取得更高回報，有小小想急追科技股。

大型科技港股可像只有9988在合理範圍，其他的都太瘋狂，但好多人都說升市莫摸頂，令我想為手上1/3的現金有所增值。提外一話，應怎樣為一個指數作出估值評估呢？

龔成老師：

高增長股當然是吸引的，特別是你會見到身邊可能有人，買這類股而大賺，但我地都不能無視風險，我20年前投資科網股，正正見到這情況，美股的納指，升到5000點當時歷史高位後，因科網股爆破，而跌翻去1000點，要過左15年後才上翻5000點水位。

你會見到大市是可以跌8成的！

我並不是說現時會出現這情況，但我地投資，一定要明白這點，所以，最好是建立平衡的組合，新經濟舊經濟股都有，新經濟股不能太過多。

不過，部分新經濟股的確有實力的，所以我地要從「質素」去分析，以分注模式去入，同時留一定的現金，你唔好用現金用得太快。

至於估值，新經濟股是難的，因為「預期因素」是核心，例如之後的銷售、盈利等，利用這作為基礎估值。但估值出來的數，不能盡信，只作參考。

------------------------------------------------

Q20418：

老師，以往MPF均選增長力高(高風險）基金，已經升了30％，現年44歲，是否應該先將部分／全部基金轉移到保本或低風險基金?

龔成老師：

強積金會以「年齡及個人的風險度」等因素，作為整個配置的大方向，年輕時進取，中年平衡，年長保守，這是大方向。

至於市況，可以作為小調節。

如果你過住100%集中在進取，現時你44歲，加上大市升左，你可以部分轉到較平衡的基金，但就不需要全部轉。

由於44歲仍有增長力，因此不用轉到保守，只要部分轉為平穩型類別就得

記住，強積金不會轉來轉去，而是長期的調整。

------------------------------------------------

Q20419：

龔sir 本人26 剛買左6百幾既樓 放租

預計4年後 再儲多120萬 加上家人可能會有150萬資金給予

到時想換同區一線900幾既樓 之後先再儲錢投資

定換800幾既樓 留有資金投資但咁好大幾會會 養車玩

投資角度邊個好？（單身 無家庭負擔 同家人住）
換左樓有機會自住

龔成老師：

最好當然是股樓平衡，物業是資產項，你當然可以持有，到日後換樓，如果用盡現金及借貸，而你又無股票，就是將所有財富都集中在一個物業，這就會出現集中風險。

比較好的做法，當然是物業、股票、現金都有，股票的增長力較快，流動性較強，你在財富配置上，有一定股票較好。

加上你日後可能自住，如果你全部資金都投資物業，你就再無資金利用股票增值。

當然，如果你日後換樓，好想轉$900萬，另一個方法，就是不要太急做這動做，令你做到時，可以留有部分現金及股票。

你26歲，是財富增長的黃金期，要好好把握，同時投資較有增長力的項目。

------------------------------------------------

Q20420：

龔sir, 有點概念的嘢想問。如果買入了某隻股票，但股價跌了例如多過5%甚至更多,其實係咪都無需要沽出，係點判斷是否需要沽呢？

但，驚唔驚升唔翻上來呢？

龔成老師：

我持有比亞迪（1211）12年，過往見過佢由$88跌到去$12，我都一直持有，有10年佢的股價都只是$40-$70，我只是一直持有，間中見佢跌得多加注，到近一年先大升。

如果你用跌5%就賣出，你會錯過了比亞迪、港交所（0388）、騰訊（0700）這些大升股。

我地最重要，不是睇短期股價，而是睇「企業的長期價值」「企業質素」。

只要企業有質素的，你就值得守，甚至加注，如果無質素，就算蝕都要盡快走。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。