穿越神鵰（下）
.
我哋拜堂成親，新婚第二朝，我一睜開眼，就見到阿花外露嘅鼻毛。
.
我一路著衫，一路嘆氣：「既然我哋都係夫妻，不如你除咗塊面具啦。」
.
阿花好困惑咁問：「乜嘢面具？」
.
「你仲扮嘢，有意思咩？」我知道「貞節」對宋朝女人幾咁重要，依加米已成炊，程英走唔甩，我都唔駛低聲下氣啦。
....
穿越神鵰（下）
.
我哋拜堂成親，新婚第二朝，我一睜開眼，就見到阿花外露嘅鼻毛。
.
我一路著衫，一路嘆氣：「既然我哋都係夫妻，不如你除咗塊面具啦。」
.
阿花好困惑咁問：「乜嘢面具？」
.
「你仲扮嘢，有意思咩？」我知道「貞節」對宋朝女人幾咁重要，依加米已成炊，程英走唔甩，我都唔駛低聲下氣啦。
. ，
阿花繼續問，好似完全聽唔明我嘅說話。
.
我心頭火起，喺佢條頸度亂摸，想搵出人皮面具嘅接口位。
.
但我不斷搵，甚至除埋佢件衫搵，都搵唔到一絲戴人皮面具嘅痕跡。
.
「你到底係邊個？」我心頭一冷。
.
阿花更加困惑：「我係阿花啊。」
.
「好啦喎，玩夠未？」我一巴掌刮埋去，原意只係試探，估唔到，真係喺阿花面上留低一個巴掌印。 . ，
阿花好委屈咁望住我，略為識武功嘅女人，都唔會俾我咁樣打。
.
我終於意識到，佢唔係《神鵰》中任何一個有名有姓嘅女角。
.
我穿越到《神鵰》世界，但呢個世界有好多人，當然亦有平民村姑，就好似睇電視有臨時演員咁。
.
阿花真係呢個世界嘅村姑，咁啱救咗我。
. ，
我唔係古代人，古代嘅拜堂成親，對我根本無任何約束力。
.
我完全可以離開呢度，繼續去搵小龍女，搵靚嘅女角。
.
但當我行出門口嗰一刻，我忍唔住回頭一望，阿花坐喺張床上，雙目含淚，令佢顯得更醜樣。
.
阿花眼裡有迷茫、傷痛同絕望，但佢無開口阻攔我。
. ，
我唔係古代人，但阿花係。
.
新婚丈夫第二日就消失，會令一個村姑，一世都翻唔到身。
.
我......心軟，作為一個男人，點可以咁唔負責任？
.
反正，呢個世界根本唔係真實嘅，我死後都會返去現實世界，不如我留喺度陪吓阿花。
. ，
從此，我成咗一個村夫。
.
穿越到《神鵰俠侶》，無追到小龍女，無見到郭襄，其實件事都幾可悲。
.
不過，阿花雖然醜樣，但睇得耐，我都習慣咗。
.
我同阿花一齊生活，日復一日，為口奔馳。
.
阿花無咩才華，亦唔會講咩驚天動地嘅說話，佢剩係識信任我同對我好。
.
唔知點解，我都愈嚟愈依賴佢，好似一定要有佢喺身邊先瞓得著。
. ，
有一晚，阿花同我講：「好彩嗰日我遇到你。」
.
我心裡面諗：其實我都覺得自己好好彩，或者，比追到小龍女更好彩。
.
但我笑一笑，無同佢講呢句說話。
.
或者，係因為我幾享受呢種高高在上，被老婆愛慕嘅感覺。
. ，
我以為呢種幸福至少可以持續半世，直到有一日，兵荒馬亂，蒙古兵殺到嚟。
.
我忽然記起，《神鵰俠侶》唔係一個和平嘅故事，有蒙古兵入侵。
.
故事裡面嘅主角，奮勇抗敵，為國為民。
.
而故事裡面，亦有太多無名無姓嘅平民，無力反抗，死得慘烈。
. ，
我帶住阿花逃亡，逃到......我哋都唔知自己去咗邊。
.
但我哋唔識武功，我哋無錢，我哋唔聰明，我哋只係世間最平凡嘅一對夫妻。
.
我哋跑吓跑吓，遇到一隊蒙古兵。
.
蒙古兵無解釋點解要殺我哋，或者以強凌弱從來唔需要理由。
.
總之，一把刀插向我心口嗰陣，阿花幫我擋咗一刀。
.
佢嘅血濺落我塊臉度，好暖，佢望住我，最後一笑。
.
無時間畀我哋生離死別，因為下一秒，就有另一把刀插落我度。
. ，
再醒番嗰陣，我坐喺書檯前，面前放住一本《神鵰俠侶》。
.
我坐咗好耐，好耐，直到本書都俾我嘅眼淚打濕。
.
我好想同阿花講，我都覺得自己好好彩，可以遇到你。
.
我揭咗一頁書，眼前再彈出嗰個框框：「是否要穿越到《神鵰俠侶》世界？」
.
我毫不猶豫咁點「是」。
. ，
但穿越嘅時間點係隨機，呢次，我遇到嘅唔再係「小龍女初出古墓」，更加唔知阿花喺邊。
.
我不斷搵，搵咗一世，搵唔到阿花。
.
我「死」後，出番現實世界，然後我再次穿越......
我穿越咗無數次，我見到小龍女郭襄程英陸無雙，但我無去接近佢哋，我只想搵阿花。
.
可惜，阿花只係《神鵰俠侶》一個無名無姓嘅村姑，根本無人識佢，我都唔知去邊度搵佢。
. ，
曾經有一次，我穿越嗰陣，再去番「小龍女初出古墓」嘅時間點。
.
我心中狂喜，即刻偷咗大媽個錢袋，再俾路人圍毆直至暈倒。
.
但唔知係我「暈」嘅時間唔啱，定係路人棄置我嘅地方唔啱，救我嘅唔係阿花，而係一個大夫。
.
我意識到，我遇到阿花，係無數個機緣巧合造成，我再穿越都無辦法重覆。
. ，
於是，我返嚟現實世界後，無再穿越去《神鵰》世界。
.
依加我寫緊一本書：「從前有個村姑，佢叫阿花，佢生得唔靚，靠幫人洗衫縫補維生......」
.
成本書，都係講阿花。
.
我希望成書後，我可以穿越入呢本書度，到時可以搵番阿花。
.
但到底，我可唔可以穿越去自己寫嘅書度？
我筆下嘅阿花，又係唔係我愛嘅阿花？
.
我都唔確定，但總要試一試。
. ，
每一個人，都曾經對自己會愛上嘅人有幻想，要靚要身材要舉世無雙。
.
而真正愛上一個人嗰陣，就係你意識到，呢啲條件都唔再重要，
.
有嘅話，係Bonus；無嘅話，有你就好。 . －完－
.
#短故 #短篇 #小說 #陳美濤 #廣東話 #粵語 #tomatochan #穿越神鵰
