【 花姐ERROR遊 】 電視節目奇妙之處，在於能夠於短時間內，完全扭轉觀眾對於一個人、一個組合的既有印象，最近例子必然是人氣高企的《花姐ERROR遊》，百分百受惠者肯肯定是「八両金」吳保錡。興許是參加《Good Night Show全民造星》形象出問題，那個前短後長的金毛Look實在趕客，惹人「犯罪」 —— 有想樁他兩鑊的衝動，所以我最初也驚訝為何花姐會選他入圍「搞笑男團」ERROR，但看過《花姐ERROR遊》，我明白了（換了髮型當然也有幫助）！今時今日，網絡瓦解傳統，想造星，再不能標榜拒人千里的所謂星味，而是要夠真夠晒瞓身，入屋率急升，未必立即大紅，但起碼讓人記住。第五集「竟然有金菇呀你鹵味，你係就加多嚿豆腐啦！」裏，攝製隊來到茨城縣著名景點 —— 日本本州最長步道橋，龍神大吊橋取景，並開展第五場大戰「龍神大足橋」，基本上花姐未選擇ERROR誰人出戰之前，保錡望住靚景，已嚇到呆咗，結果未出發征戰前的那一段，見到他那面如死灰的樣子，如行刑前遊街般走路，我一路睇一路笑，但去到見證他站在飛蹤出口先猶豫，後腳軟，大聲叫：「多謝花姐，多謝你畀機會我入到ViuTV，令我嘅夢想可以進發，同埋我真係好鍾意張家輝，希望有機會拍到佢啲戲！喂，可唔可以唔跳呀？我刻服唔到呀！」最終他淚流滿面，因為慚愧，亦因內疚，有如小寶寶一邊擦眼淚一邊抽泣，我竟然有點眼濕濕 ⋯⋯ 嚟嚟嚟，乖，唔好喊，等哥哥攬下你，大概是這一刻，我成為保錡的Fans了。早在節目出街前，已聽過ViuTV中人跟我說：「有導演話《花姐ERROR》，保錡出奇地好笑，仲要真係笑到拎住部Cam唔可以Hand-held，要用腳架！」當下聽到這個評語，真心懷疑，睇過幾集之後，我信了，他是那種鱷魚頭老襯底的人，睇外表齖齖齰齰，其實超純情的小伙子，為了實踐自己的藝人夢，做到綜藝節目，他豁出去（正正是當今很多香港藝人欠缺的心態，過份顧及形象，令觀眾感到沒趣！）所以他明明不能吃辣，卻惟快不破將那些地獄勁爆辣拉麵倒落肚（我笑到喊呀呢集！），他口齒好像有點不清，但鏡頭似乎幾喜歡他，令他在幕前總是很容易的帶來喜感（像用電筆整蠱花姐又係好笑到癲！），我覺得保錡是一個很有潛力做搞笑藝人的新晉藝人，而有《花姐ERROR遊》這個節目作為起點，難能可貴，假如明年我還有力氣籌辦「2019香港電視大獎」，競爭最激烈的新人獎，我一定率先提名他入圍。又，負責旁白的 #麥可暉，VO質素極高（由助理編導SR負責配的「辣到佢哋反艇」一樣高質！），想特意畀個叻佢！要做一個好笑的電視節目太難，《花姐ERROR》遊是2019年第一季的必睇本地自製節目推介第一位，睇完之後再去瞓，發個好夢。 （21022019） #游大東影視筆記 #yautaitung #screencap @viutv @samm0123 #花姐error遊 #error #hkig #hk #游大東 #保錡 #193 #梁業 #deegor @mirror.weare #全民造星