［羅賓漢行動］今次我地有新客仔，荃灣的Focus Optical 匯澄眼鏡。

說到匯澄眼鏡店，其實老闆駿少同我私底下係朋友，大學二年時已經認識佢，連佢當年眼鏡舖開店時，店名也有問我意見。我總覺得時間是最好的試金石，都認識十年有多，我認識的他很講義氣也很可靠，黎到今日要幫佢推廣，我當然義不容辭。

說到他的眼鏡店，老實說我也真的未見過一間眼鏡店可以如此驚濤駭浪，一開業就俾同行封殺，拎唔到貨又拎唔到鏡。其實霸權呢樣野，個個行業都有，你後生仔不知深淺踩落去，人地梗係唔同你客氣，後尾係打盡人情牌先偷偷地拎到貨。

話說我平時幫客做推廣，點都會做返個文字採訪，但呢個文字採訪，做到我真係嘔血，因為基本上係冇sound-bite可言架!

「你間眼鏡舖有咩特色呢？」

「冇咩特色架，不過我地服務好好，好俾心機去幫個客驗眼。」

服務好係乜野特色？俾心機幫個客驗眼是基本吧？配好對方的眼鏡岩度數也是應份的啊，這是常識而不是特色啊！原本我差點就想婊佢，但諗一諗，算啦，今時今日食雞冇雞味、食魚冇魚味，香港地幾多服務行業都冇服務？唯獨一定有嘅係服務費囉。由於我的一念之仁，所以就放過左佢，由佢用「服務好」作為特色。

「咁不如講下你啲客？有冇啲咩好爆嘅故仔可以分享下？」我決定在爆血管前放棄糾正他的市場定位。

「太爆會唔會唔係咁好呀？同埋客人私隱我唔講得架。」

「你唔爆有L人睇呀？做宣傳做黎冇人睇，變洪欣架！依家個個創業故事，一係就前banker律師棄高薪創業追夢，一係就假到爆的愛心爆棚幫到人好開心，你咁平實邊有人睇架？！」好吧，我承認我唔係一個好專業的account manager，你明唔明呀？整整十五分鐘竟然都好平實、好正經，一丁點的花巧野都冇，做marketing點可能唔燥？你呃我都話下咩見到荃灣基層受到連鎖店壓榨之類，所以受到道德感召想黎幫人用合理價錢配眼鏡。再唔係話自己早兩年發生意外，突然間在病床上聽到上主的感召之類的都得架，我肯定有智障會信呢啲故仔。

「咁好啦，不如講下你客源係邊一類最多？」根據我的經驗，通常問客源就可以問到佢店舖的特色，做老闆的可能自己都唔知自己有咩做得好，但幸好的是，市場會告訴你有什麼特別暢銷，那就是你的強項和特色了。

「我啲客好兩極架，一係就廿零三十歲的七、八十後，佢地鍾意我呢度有啲唔同嘅貨，我地除左有大路貨之外，亦都會入日本限量版手造眼鏡。另外，都有一班老人客。」

「這個不就是賣點嗎？我幫你寫一下。另外，能夠解釋一下為什麼會有老人客的？」我＿你，日本手造眼鏡架咪就係特色囉，搞咁耐原來有非主流貨，你話我嘔唔嘔血？

「其實依家冇乜人知可以用醫療券配眼鏡，起碼好多後生唔知，知道就會帶佢地呀爸呀媽黎。」我隔著電腦也感受到他的那種天然呆，視光師係咪個個都係咁？

「真是的，這個切入點不就很好了嗎？我的讀者都是20-40歲為主，如果佢地住附近，可以叫佢地父母或者呀爺呀嫲黎驗眼兼配眼鏡，反正醫療券係政府嘅，唔用都係益左政府，大家平時交咁多稅，唔係唔用盡佢呀嘛？慷他人之慨的事情，應該要大力推廣，你一早同我講呢一點咪好囉！」

就係咁，我就做完左呢個樸實無華、用心服務的匯澄眼鏡的推廣採訪。我想，或許視光呢行其實又真係冇乜特別野值得講，價格合理、檢驗用心、出來的鏡片度數準確，就是大家需要的服務了，難道又真的需要什麼故事去包裝嗎？

對了，為了配合這間很樸實的眼鏡店，所以我也和匯澄眼鏡做了一個簡單直接的優惠：只要你跟他們說你是「人妻先生／Kevin的讀者」，所有眼鏡和太陽眼鏡在原有折扣上，會再有九折，優惠期到11月30日為止，大家如果在荃灣附近工作或居住，你或者爸爸媽媽想配眼鏡，找我朋友就是了，如果佢服務唔好嘅話同我講，我幫你打佢手板。

地址：荃灣南豐中心3樓305E號鋪（KFC對面）

#值得一提我呢個視光師朋友望落唔錯
#唱歌好聽
#搵佢配眼鏡係養眼嘅
#唔買都可以黎睇下
#認真講佢啲眼鏡貨係靚嘅
#匯澄眼鏡
#一諗到要幫佢做digital_advisory真係想死
#又唔爆又唔wow
#不如一槍打死我