#每天為你讀一點書 S01E21 鹿港的下早時 feat. 阿愷之聲Voice of A-Kai
今天是禮拜天，但還不到可以趴趴走的時候，所以我拜託了一位在地青年來帶我們用耳朵逛鹿港。我們今天的導遊是王麒愷，土生土長的鹿港囝仔，到北部讀書後，又回到家鄉繼續為了鹿港的文化發展盡心盡力，同時，主持了一個非常有趣的全台語電台：阿愷之聲。

阿愷之聲跟其他的電台不一樣，因為全部都是純正的鹿港腔，我記得我幾年前剛認識阿愷的時候，他的台語還沒有這麼好，但現在聽他的台語，簡直是一種享受。

如果你沒有聽過我們的節目、如果你是文字派，今天這集我相信會顛覆你對podcast的想像，今天我們也特別檢附全部文字，歡迎大家點開，配一杯咖啡或者茶，閉上眼睛聽阿愷帶你走進鹿港的巷弄之間........
------
📖 鹿港的下早時 📖

逐家好，歡迎收聽阿愷仔之聲鹿港放送。
現在疫情，毋知影逐家過了好無？

阿愷仔想講，咱平常時除了好好的遵守政府的政策，也就是出門喙罨罨予好，轉厝酒精噴阿足，咱是毋是會使來想一寡，予家己對未來有希望的代誌。

咱來想，若疫情了後，欲來去佗走走仔？
無，來阮鹿港好無？

鹿港上舒適的時陣，我感覺是差不多入秋，也就是舊曆的八月十五彼陣仔。
彼咧時陣，鹿港遮的海風猶未遐爾囂掰，日頭佗親像溫柔的南管，淡薄仔，淡薄仔，照佇紅磚仔的巷仔內。

汝咁相信講？佇鹿港，袂感覺著時間咧行。
今仔日佇鹿港街頂雖然已經看袂著海，但是只要行一段路，佗會使轉去古早，也就是彼咧鬧熱的港口時代。

聽眾朋友，這馬綴阿愷仔來去下早時的海岸行行仔。

出發進前，咱先來去街尾的富貴堂，頭家才拄仔閣籠床掀開，佇濛霧當中，咱看著一粒佮一粒白拋拋的菜包，這菜包有包竹筍的，佮有包高麗菜的兩種，用料實在，這菜包我是按細漢食到大漢。欸欸，小等一咧啦，這菜包當燒，莫一嘴啄落，咱會使呢行呢慢慢仔食。

頭陣仔咧講的「街尾」，是阮鹿港大街的尾段。這大街的故事是講不盡，佇百規年前的港口時代，遮就是通臺灣上出名、上鬧熱的市街「不見天」。
咱這馬佇街尾的這條巷仔叫做「新興街」，前仔是鹿港重要的傢具街，恁呢行呢會看著有規間真雅氣的樓仔厝，這攏是往過的傢俱店，佇一甲子以前，鹿港有三分之一的人口攏咧做木，會使講是一個手工藝之都。

咱這馬看著的龍山寺，便是這個手工藝之都上驕傲的所在。
龍山寺，在地人予作觀音媽宮，是鹿港的閤港廟，意思就是通鹿港的人攏會來拜拜的所在。龍山寺的建築會使講是結合了每一个時代鹿港上好的工藝，按幼木、大木、石雕、彩繪到字畫等等，我捌聽有一位藝術家講，入去龍山寺內底，就親像一隻鳥仔飛入去一片樹林內，是一片大千世界。噓，較細聲咧，後殿當咧上經。

咱轉來坐咧戲台懸頂，吹著微微仔風，心內惦惦仔佮觀音媽來講一寡話。

續落來，咱行對杉行街。
杉仔是古早起厝重要的建材，遮捌是杉仔行結市的所在。佇杉行街，有一間秀面真古典的舊厝，遮是一間予作「書集喜室」的獨立冊店。
一入來店裡，恁會先聽著淡薄仔的melody（定定是陳昇的歌），續落來就會看著一位緣頭仔桑按內底行出來打招呼，這位就是冊店的主人，也是整理這間古厝的黃先。冊店的冊有一邊新仔一邊舊仔，因為頭家翁仔某一个學歷史學、一个學人類學，所以冊店的冊，主要攏是這類的較濟，「書集喜室」捌教我熟似世界的方式，對我來講，是現在鹿港智識的港口。

逐家若有閒，會使閣佇入去內底飲茶，感受這間舊厝樸實的風采。

按杉行街一直行去，咱會經過遮的角頭廟武澤宮，佇遮，嘛會鼻著巷仔內彼間手工做香的芳味，彼味，予人心情真安定。

鹿港廟濟、巷仔濟，廟咱咧講三步一細廟，五步一大廟，每一間廟代表是每一個無仝的角頭（遮咧講的角頭是「社區」的意思），通鹿港算算仔總共有二三十個角頭，會使講正鬧熱啦，恁有閒來綴一遍暗訪，恁逐家就知囉。

角頭佮角頭之間有歸落條巷仔相通，咱這馬行的這條巷仔予作金盛巷，金盛巷是咱頭陣仔咧講的鹿港大街的後壁尾（後壁巷的意思），前仔捌有一句話講：「鹿港人，上敢死，放屎換糯米；庄腳人，上介槌，提米換大肥。」意思就是講，往過農業時代，鎮外種田的會來到大街的後壁尾擔肥，轉去做肥料，因為好額人放的，較營養啦，過節的時陣會提糯米來答謝。

金盛巷真狹，彎過來閣彎過去，親像一隻紅磚仔色的鰻。
我進前攏佇遮咧學騎打速仔車，欸，autobike愈騎緊無難，騎慢騎穩，才是功夫。佇遮autobike打一速，khu-lá-tsih
（離合器）逐逐仔放開，引擎的聲佇巷仔內有夠結實的，穩穩仔，穩穩仔，直線七秒根本正簡單。

佇金盛巷逐欲倚菜市仔，會經過一間「力野茶陶所」。這間店真趣味，是兩位少女（阿思/米特）共同經營的空間，伊的專業是作瓷仔，有時陣閣會開課。這間店主要賣瓷仔兼賣茶，閣有一寡茶配，遮物件攏用伊做的瓷仔來裝，恁看著絕對會忍未條想欲翕相打卡。「力野茶陶所」也是一間古厝落去整理，經過阿斯佮米特用心佈置了後，整格氣氛雅氣，阿，熱天到啊，遮閣有涼仔通飲！

來到菜市仔，先𤆬恁來去一个秘密的所在。
這個所在的角頭名予做車埕，車埕前仔是南北二路來到鹿港街頂的停車場（這邊的車是牛車/馬車），所以這廓圍仔有真濟咧打鐵的工廠，咱這馬若去大賣場，停車場攏有一寡咧保養車的，意思是仝款的。

車埕的角頭廟玉渠宮，主神拜的是田都元帥，遮的人慣習稱呼秀公爺。秀公爺因為嘛是一個精通音樂戲曲的才子，所以真濟佇電視頂搬戲的演員、演奏音樂的樂手攏會來遮拜拜。現在咱所看著這間金光閃閃的玉渠宮差不多佇十年前翻修，會使講將秀工爺的故事，佮車埕的歷史攏囥入底廟宇的設計內底。欸，恁有發現廟門邊仔竟然毋是一對石獅，是一隻雞佮一隻狗，這是為啥咧？答案就予恁家己來揣。

鹿港菜市仔，也就是地方的第一菜市場，遮的歷史嘛真久囉。
這个早市除了買菜，遮規工攏有物件通食，是鹿港人的灶跤。

佇早市，有一攤咧排列的予做阿婆麻糬。這攤的麻糬真古早味，食起來Q軟閣續嘴，恁會當買做等路。

阿，行咧講咧嘛欲倚晝囉。恁腹肚枵未？
緊咧，咱行後車路斡中山路，來去阿愷仔心目中素食界的Michelin（米其林）三粒星的這間「林明堂素食麵」。恁看，中晝時攤頭已經排列閣按呢，來遮，就一定愛食一碗乾麵佮一碗豆包湯，內行仔講按呢予作「一組」。

這乾麵用料非常簡單，懸頂淋一寡滷了有夠芳的豆輪，最後閣摻一寡芹菜珠仔，阿，按呢佗有夠讚。喔，上厲害的佗愛食伊的豆包，遮豆包是逐工手工包欸，內底有包高麗菜、紅菜頭、香菇頭。豆包湯的湯頭咧，是用豆芽閣甘蔗頭落去炕，只有是甘甜美麗啦！

阿，食飽，欲啉涼仔無？
這咧時陣，咱轉來去菜市仔，彼攤阿愷仔自細漢到大漢啉的木瓜牛奶嘛開始絞囉。緊咧，絞一杯，大力欶落去，遮是全台灣上有誠意的木瓜牛奶，阿不過毋通囥相久，無會苦去。

聽眾朋友，毋知影恁有感受著鹿港的聲音佮氣味無？
上早時的鹿港，按清幽的街尾，到鬧熱的菜市仔，其實鹿港的一工千變萬化，親像海洋，袂堪得按算。

這段時間，逐家就愛保重。
阿愷仔之聲佇遮講鹿港予恁逐家聽。

疫情期間，咱空中相會。
疫情了後，咱鹿港面會。

感謝汝的收聽，勞力！

＊店家連結（按登場順序排列）：
富貴堂 菜包 https://www.facebook.com/lukangbuns
書集喜室 https://www.facebook.com/xishibookandtea
力野茶陶所 https://www.facebook.com/liiyaceramicteashop/
鹿港玉渠宮 田都元帥 https://www.facebook.com/yuchu7761120
阿婆麻糬舖 彰化縣鹿港鎮大明路9號
林明堂素食麵 彰化縣鹿港鎮介壽路三段66號
金龍木瓜牛奶
https://www.facebook.com/%E9%87%91%E9%BE%8D%E6%9C%A8%E7%93%9C%E7%89%9B%E5%A5%B6-191011070948466
-------

📙每天為你讀一點書 📙 👉️點開連結直接聽：
http://player.soundon.fm/p/f678abfe-5a08-4841-b81c-15943784ec24/episodes/530e29a9-4b9f-4e05-892d-f9418eccbf73
---------
由謝金魚主持、慈濟基金會獨家贊助
不論你在哪裡，我們都在這裡，每天九點，為你朗讀。
Sound On：
https://sndn.link/readforyou
Spotify：
https://open.spotify.com/show/0SwHu6Voc8eNV4trI8N0ZX
KKBOX：
https://podcast.kkbox.com/channel/KlHdUqx6AIr-Fdpprn
apple：
https://reurl.cc/a9vXVl
Google：
https://reurl.cc/zeWKpe

今天是世界母語日，來分享我為蔡雅菁臺語版《小王子》所寫的推薦序，應該很應景。
--

教「小王子」講臺語

彼工收著雅菁寄來的冊稿，予我真歡喜。世界有名聲的故事《小王子》，雅菁共伊翻譯做臺語文矣！

其實佇臺文界，無人聽過雅菁的名號。理由真簡單，因為伊佇翻譯《小王子》進前，根本毋捌寫過臺文作品。這完全是伊家己骨力、綿爛學習的成果。

欲教小王子講臺語進前，雅菁家己愛先學臺語。伊無蹛臺灣，佇伊彼搭無人會當佮伊講臺語，伊就用細漢使用母語的記持，共家己的話若揫索仔咧揫轉來：先讀《小王子》原文，才用伊家己的母語講一擺，閣用教育部的臺灣閩南語常用詞辭典揣出正字，按呢一字一字、一句一句，教小王子講臺語。

教小王子講臺語的過程，其實就是教家己講臺語，小王子佮翻譯者的形影敢若敆做伙矣。敢講毋是？《小王子》的故事，就是一直探險佮成長的旅途，佮已經予華語洗腦甲蓋徹底的咱這代，這陣才想欲共臺語抾轉來，又閣揣無「先的」通教，只好佇各種臺語字典和網路資源那做那學，實在足成的。

雅菁共冊稿寄予我的時，其實伊已經共小王子（嘛是伊家己）教臺語教甲真透機矣，毋過伊猶閣無放心，央我鬥審定用字。我嘛是不止仔家婆，對頭到尾斟酌共稿巡一擺。因為伊本來就逐字去查過，用字袂去重耽，我修改的攏是一寡語詞佮語法，若有淡薄仔「阿啄仔款」抑是「華語形」，就共伊建議修做較正港的講法。譬論「伊惦惦踮佇一山坪空的佮一山坪猶袂開的酒矸仔頭前」，這種遮爾長的語句，可能是對外國原文直接翻過來的，毋過咱臺語通常會共切做兩句講；有的詞我嘛刁工共伊替換一下，展出語言的多元佮活潑，本土味嘛較厚，「喘一口氣」我就改「歇喘」，「裝巧」（假影家己真聰明）我就改「假博」，「真細」我有的就共改做「細粒子」按呢。

雖然講九成以上，猶原是雅菁寫的，我干焦淡薄仔調整咧爾爾，毋過規本冊讀過巡過，嘛了真濟時間。就可比小王子共狐狸「教乖」，我了精神、下工夫佮「小王子」鬥陣、盤撋，去讀有伊的意思，才查字典去揀一个我感覺上適合的語詞去共鬥峇。到尾仔，《小王子》的文字有我的氣口，我嘛佇審定的過程中，查著誠濟媠氣的古早話，互相影響。莫怪講小王子教狐狸教到最後，兩个人攏需要對方，對方攏是獨一無二的。

臺語的復興，就是按呢的過程。這本《小王子》可能對你來講無好讀，有的字會予你頓蹬一下，有的詞可能從到今都毋捌聽過。毋過無要緊，沓沓仔你會感受著語言的媠，下愈濟工夫去讀、去聽，就愈會當體會語言的重要性——「你為著你的玫瑰所消磨的時間，才予你的玫瑰變甲遐爾重要。」

我向望各位朋友咧讀這本《小王子》的時，毋但欣賞故事的新奇趣味，嘛因為這本冊，予家己的臺文旅程開始起行，就親像咱可愛的小王子仝款。

✓ 我「才」無愛　(#我才不要)
✓ 下晡「才」會知　(#下午才會知道)
✓「才」閣講啦　(#再說啦)
✓ 有錢「才」來買　(#有錢再來買)
　
　
❝ HS01：【才】 ❞
　
試唸上方短句。臺語虛詞【才】(如圖有八個音)，你最常使用何音？（此虛詞意思為『才』或『再』）
　
( 以下看不懂可查 https://goo.gl/7Ky6ZH )
　
　
❍〈A〉【才】【tsiànn】[=正]
　
音例·A1〔 https://goo.gl/yHBwAm 〕：杉林仔是這幾冬仔乎，「才」(tsiànn) 這个……改良出來。
　
音例·A2〔 https://goo.gl/ugibja 〕：我彼个時陣佇加工區喔，1 個月「才」(tsiànn) 2000 捅箍爾。

　
❍〈B〉【才】【tsiah】(≈ㄐㄧㄚ)
　
音例·B1〔 https://goo.gl/TfbGtL 〕：人阮今年「才」(tsiah) 18 歲啦！
　
音例·B2〔 https://goo.gl/r6ytQZ 〕：像臺灣牛仝款，骨力咧耕作，「才」(tsiah) 會當贏回著咱人民的信任。

　
❍〈C〉【才】【tsah】(≈ㄗㄚ)
　
音例·C1〔 https://goo.gl/wnG3mz 〕：就是困難，「才」(tsah) 會出問題。
　
音例·C2〔 https://goo.gl/bNg7Uc 〕：真重要的問題，咱「才」(tsah) 閣繼續討論。

　
❍〈D〉【才】【tah】(≈ㄉㄚ)
　
音例·D1〔 https://goo.gl/q23BHw 〕：按呢將來乎，臺灣「才」(tah) 會愈進步。
　
音例·D2〔 https://goo.gl/pR2LQ4 〕：伊彼杉仔愛浸……愛浸水「才」(tah) 會𠕇、「才」(tah) 會勇啊，攏浸水啦，浸水較袂蛀蟲。伊彼浸咧，毋是欲予袂蛀蟲爾，閣兼彼皮會落起來。彼陣無 gá-suh，逐家攏去……去咧削彼杉仔皮轉來咧燃。

　
❍〈E〉【才】【thah】(≈ㄊㄚ)
　
音例·E1〔 https://goo.gl/LXXfjU 〕：推廣這个酪農事業，做了真誠成功，所以「才」(thah) 有今仔日咱攏會當食著這个營養品。
　
音例·E2〔 https://goo.gl/tvqUjX 〕：1 箍會當變 2 箍，2 箍會當變 4 箍，這「才」(thah) 是愛做的代誌乎。

　
❍〈F〉【才】【kah】(≈ㄍㄚ)
　
音例·F1〔 https://goo.gl/R72H6q 〕：進前講……哼，一定愛用噴藥仔「才」(kah) 會起來！啊 1 年、2 年 kuè [過去]，欸，無噴藥仔嘛是會起來，嘛是有通好收成。
　
音例·F2〔 https://goo.gl/25LhDF 〕：套袋了後差不多愛 45 工，「才」(kah) 會採收得。

　
❍〈G〉【才】【khah】(≈ㄎㄚ)
　
音例·G1〔 https://goo.gl/jueUEY 〕：我為國家效命，謼，20 冬、30 冬，啊有這个價值。𪜶(in)軍公教咧做是 20 外冬、30 外冬，「才」(khah) 退休呢！
　
音例·G2〔 https://goo.gl/q3RYmi 〕：林園敢今仔這个港，中芸港佮汕尾港，敢是今仔「才」(khah) 有的？啊 tsín [這陣] 是你市政府咧執政呢，你閣共這个物件……，你閣共抨予伊！

　
❍〈H〉【才】【hah】(≈ㄏㄚ)
　
音例·H1〔 https://goo.gl/A3iRVZ 〕：按呢「才」(hah) 是蹧躂骨力的人！
　
音例·H2〔 https://goo.gl/1gMme4 〕：甘蔗刜起來，「才」(hah) 用這个……小火車仔載去糖廠。
　
　
#HS01