［細佬］好很長篇

終於，我細佬嫁咗(一時講錯😆) 終於娶咗個好老婆！婚禮當日，睇住佢行禮成個緊張仔，到拖住佢老婆傻笑禮成，我諗嗰一刻比起佢出show上台前緊張又興奮百倍！

而喺台下嘅我，就有一份莫明其妙嘅滾動，相信最大嘅原因係小弟人生第一次感受到，佢唔再係當年瞓喺我下格床，成日畀我整鬼佢嘅細佬。突然，我腦海入面嘅留聲機播起呢首歌：

“I will find my way, I want a different way. After the wind and rain, There'll be a brand new day
小時候受傷有人心疼失落有人安慰，現在遇到困難自己就要學會面對⋯⋯困難要用我的堅強和努力勇敢面對，現在用心去追，感覺就對⋯I find my way～”

Flashback突然回帶

2003年，一個悶熱嘅廣州晚上，一個北上無心求學嘅我，我打開大氣電波，無意間聽到呢首熱播新歌，RnB旋律加上一把清新嘅嗓音，有令人鑽入收音機嘅魔力，正正因為呢首My Way，張敬軒呢個名字就開始被人關注，無幾耐佢仲去埋香港發展添⋯

一支走音結他

有一年暑假，身為窮L嘅我，慣例返香港炒散幫補下，我一手揸住爛鬼鐵線木結他，一手拉住發嗅皮箧，迫三個鐘長途巴返屋企。一入門口，懶理畀阿媽震爆耳膜嘅威脅，我將所有行裝鳩擗，然後開雪櫃10秒KO一包雀巢檸檬茶，再入房睇下細佬妹搞緊乜。

果然，細佬都係機不離手，對眼黐實部gameboy遊戲機，我忍唔住將佢從比加超個世界召喚返嚟現實：「喂，有無媾到女呀？」雖然我咁問，但其實我都無，咁做大佬係要扮下野咖嘛😅

一講到女，佢似乎都有啲興趣，肯放低部機，見狀，我打蛇隨棍上，拎出支爛結他，表演起那純熟嘅基礎四個chord，佢睇到不知幾入神，我就話：「嗱⋯咁啲女女先會埋你身㗎嘛，堆bu堆？」

就係咁，佢一拎起支結他，就無放低過，仲不斷鑽研，後尾做埋全職樂手教結他搵食添呀！其實我從來都唔識彈結他，支結他仲走晒音添，哈哈😆

最令我感到奇妙嘅係，佢喺大學因爲玩音樂識到個靚女，家陣仲嫁埋畀人(sor又講錯) 娶埋人做老婆添呀！😎👏🏻

當年我點整鬼下格床嘅細佬？

話說每個星期日晚都會播龍珠Z，咁夜老竇實唔畀睇啦，但我作為一個稱職嘅百厭星，又點會難到老夫呢～

我會先扮瞓覺，一夠鐘就喺上格床跳落地面，企喺隔住大廳嘅玻璃門後面偷睇，每逢去廣告，即刻用輕功踩住書枱彈返上床，因為老竇例必入房睇下細佬有無跌被，而我就將喘氣聲盡力掩蓋！

如是者，我跳上跳落，細佬完全瞓唔著，結果佢幾歲人仔竟然識得報串，畀老竇剷到上天花板唯有死返去瞓啦，但我好唔憤氣，用腳踩轉床尾買餸車個車轆，發出啲奇怪鐵銹聲，於是又靈機一觸，同細佬講：「哎吔！有鬼呀⋯⋯」

我見佢驚驚地，就加多幾錢重：「唔洗怕，我識瞬間轉移！」佢話唔信，我一野跳落地面，大力拍佢屁股，嚇完佢又再踩住書枱彈返上去，咁又玩咗好耐。

結果？佢咪又報串囉，真係狗到爆，成日出絕招！

我整鬼佢嘅回憶太多，而佢報串嘅次數都數唔晒，有次佢怕畀人打，將阿媽收埋喺梳化後面嘅藤條飛咗落街，老竇搵唔到竟然第一個找我悔氣：「唔係你仲有邊個吖？！」就係咁我幫細佬又食一次死猫⋯

呢啲種種發生喺我同細佬之間嘅小回憶，曾經令我充滿發自內心嘅妒忌，但大個咗，想追都追不回，我慶幸有個曾經被我妒忌，又成日報串嘅細佬，無佢，而家邊有咁多野可以笑呀！

—————————
#人在港偽泰仔日記
#細佬係結他老師
#同時係皮革師
#可以參觀佢葵興studio

(歡迎查詢結他班及皮革品)
細佬ig: https://instagram.com/lykdennis