_ 居家防疫的同時慶幸自己當初沒有將就著住鬼屋，這條走廊要不要這麼好拍🤣 Blazer & trousers/ @loveya.studio Bodysuit/ @zara Flip flop/ @charleskeith_tw #loveya #likeloveya #loveyaootd

我聽到人哋講我壞話（下） . 我搵最好嘅姐妹出嚟傾訴，我無講琳琳嘅事，我只係講發現身邊好多人都......唔係表面上咁鍾意我。 . 姐妹耐心安慰我，同我討論點樣應對，我終於覺得，原來人間都係有真情。 . 但我哋分開之後，我用「鬼耳通」聽到姐妹講：「唉，佢真係特別多事、特別麻煩，阻住晒我啲時間。」 . 我個心一涼，唔止咁，我仲發現，原來我阿媽都唔滿意我，覺得人哋個囡好啲，後悔當年無生多幾個...... . 一個月黑風高嘅晚上，失敗嘅我，割脈自殺。 . ， 我變咗鬼，我終於見到琳琳，佢望住我，眉目間有掩不住嘅快意。 . 咪住，琳琳唔係想我幫佢完成執念咩？點解我失敗咗，佢咁開心？ . 我忽然諗起，鬼片好多厲鬼都想殺人，佢哋未必可以傷害人嘅肉體，但就會用各種方法摧毀人嘅精神，令人自殺。 . 我質問佢：「你一開始就想殺我？」 . 「係你自己頂唔住啫。」 琳琳哈哈大笑：「人言可畏，又多一個人嘗試到我嘅痛苦啦。」 . ， 之後，新嘅租客搬入嚟，琳琳又去開人哋嘅「鬼耳通」。 . 我法力唔夠，連同人類溝通嘅能力都無，更加阻止唔到琳琳。 . 自殺嘅人一個接一個，租金愈嚟愈低，所以仍然有唔怕死嘅人搬入嚟。 . 除咗琳琳之外，呢間屋已經有四隻鬼，我哋偷偷商量點樣阻止佢害人。 . ， 琳琳嘅法力都有好多限制，佢唔可以離開呢間屋，只可以透過「鬼耳通」了解情況；人要喺呢間屋瞓七晚，琳琳先可以同佢溝通。 . 不過，琳琳似乎有一種法力，可以加強人嘅負面情緒，先會令咁多人自殺。 . 我哋一致認為，只要有一個完美嘅住客，無人講佢壞話，佢就唔會受影響而自殺，琳琳自然無辦法繼續害人。 . 但係，世間真係有咁完美嘅人？咁完美嘅人會淪落到住鬼屋？ . ， 然後，下一個租客出現咗，係一個叫大文嘅平凡男人。 . 琳琳依然用舊套路，同佢開「鬼耳通」，大文拍晒心口，話一定無人講佢壞話。 . 聽到呢度，我已經忍唔住嘆氣，唉，大文同「完美」完全扯唔上關係，點會無人鬧佢串佢。 . ， 琳琳奸笑住等，等咗一日、兩日、十日......大文無出過門口！ . 琳琳忍唔住問：「你唔駛返工咩？」 . 「唔駛啊。」大文解釋，佢父母死咗，留低一層樓， 佢就賣咗層樓，租咗呢間最平嘅鬼屋，其他錢用嚟生活。 . 琳琳就講：「坐食山空，駛晒啲錢之後點算？不如都係搵份工，或者進修吓。」 . 大文擺擺手：「到時先算啦，我唔鍾意返工，亦唔鍾意讀書。」 . ， 唔止咁，大文連買嘢都係網購，足不出戶，日日食玩瞓。 . 而且，佢打機都係打單機Game，亦唔會上論壇，因為佢唔鍾意同人溝通，覺得好麻煩。 . 因此，大文嘅「鬼耳通」完全無人講佢壞話，我懷疑除咗快遞員同業主外，無人知道大文嘅存在。 . 大文準時交租，業主自然唔會搵下一個租客，琳琳都無辦法再害人。 . ， 呢一刻，我先意識到，原來世上真係有「完全無人講佢壞話」嘅人。 . 只要你咩都唔做，就唔需要被點評「做得點」；只要無人發現你存在，就唔會有人否定你。 . 除咗Nobody之外，所有人都會被批評。 . 我再諗一諗，其實我都有背後講過人壞話， 人人說人，人人被說， . 呢個「孽」，如此公平。 . －完－ . #短故 #短篇 #小說 #陳美濤 #廣東話 #粵語 #tomatochan #我聽到人哋講我壞話

我聽到人哋講我壞話（上） . 今日，我搬入凶宅，原因當然係租金平。 . 據講，上一手租客係吊頸死嘅，而且陰魂不散。 . 我一個女仔都敢住凶宅，係咪特別大膽？一般啦，我相信世上有鬼。 . 不過我認為，鬼傷害人嘅方式，主要係精神攻擊，你有無見過一隻鬼，拎住大刀周街劈友？ . 所以，我睇咗幾十套鬼片，確定自己已經唔再驚午夜哭聲、牆上有血，先敢搬入嚟。 . ， 瞓咗六晚，風平浪靜。 . 第七晚，耳邊忽然響起一陣咽嗚聲：「我死得好慘啊！」 . 聽到呢把聲，我嘅感覺係......你終於出現啦。 . 我講出我喺舊報紙度查番嚟嘅資料：「你叫X琳琳，相貌娟好，意外毀容，因此患上抑鬱症，之後吊頸自殺。」 . ， 「嘩，你都做足功課喎。」琳琳把聲有啲驚訝。 . 我答：「要同你做室友，始終要了解吓你嘅。我有咩幫到你啊？」 . 我咁開門見山，琳琳都唔好意思再搞咩「牆壁流血」，佢直接講，佢喺呢間屋自殺，靈魂無辦法離開呢度。 . 琳琳希望我幫佢完成執念，從此佢就會做一隻安靜嘅女鬼，唔再打擾我嘅生活。 . ， 我諗一諗，住鬼屋嘅代價，就係可能會被鬼騷擾，所以鬼屋先特別平租。 . 如果琳琳唔騷擾我，我就可以無代價地租平屋； 即使業主想加租，都可以叫琳琳現身，令佢知道佢層樓仲係鬼屋。 . 呢個時候，琳琳開始講佢嘅故事。 . 琳琳生前係靚女，雖然有男朋友，但係琳琳有啲虛榮，所以對於異性嘅好處總係來者不拒，即係收好多兵。 . ， 其他女同事睇唔過眼，議論紛紛：「嘩，佢做咩無啦啦送部iPhone畀你，肯定有路啦。」 . 琳琳本來覺得，自己又無真係同啲兵發生咩關係，佢哋自願送禮啫，清者自清嘛。 . 點知，三人成虎，謠言傳到佢男友耳中，男友都開始質疑琳琳，然後係無盡嘅爭執。 . 佢哋分咗手，但分手後，男友又聽到一啲流言，話琳琳係搭上咗一個富二代，所以先同佢分手。 . ， 憤怒嘅男友狂性大發，將琳琳毀容。 . 男友自然要坐監，琳琳日夜痛哭，但事情仲未完結。 . 開始有傳言話：「如果佢係好女仔，點會有人毀佢容？肯定係佢做雞、做第三者！」 「雞，全部都係雞！」 . 人言可畏，琳琳終於受唔住，吊頸自殺。 . ， 我就問：「你想我點幫你？向唱你嘅人報仇？」 . 「唔係，事後我諗番，我的確有唔啱。我以前眼高於頂，對佢哋態度好差，而且又真係到處攞男人嘅著數。」 琳琳嘆氣：「我想做一個好人，唔再俾人唱。」 . 「但係你已經死咗。」我提醒佢。 . 琳琳講：「我希望你做個好人，我會幫你開『鬼耳通』，會聽到所有人喺背後鬧你嘅說話。 如果連續一個月無人喺背後鬧你，就當實現我嘅願望啦。」 . 我爽快應承，我自問人緣唔錯，相貌平平，無咩桃色糾紛，呢件事完全唔難丫。 . ， 第二日，照常返工，遇到幾個女同事，微笑打招呼。 . 但我行遠幾步，就聽到：「嘩，佢又著裙啊，係咪搏搵老細啊？」 「佢條象腿都搵到老細？老襯都搵唔到啦。」 . 我有啲心酸，平時同佢哋關係唔錯，估唔到佢哋背後咁講我，可能佢哋真係唔鍾意人哋著裙掛。 . ， 之後我就著長袖恤褲，仲要著灰色。 . 點知，公司門口個保安講：「唉，有啲女人真係唔識尊重自己，返工都著到成個尼姑咁，影響公司形象啊。」 . 更大打擊嘅係，女同事們依然鬧我：「佢係咪知自己樣衰，所以特登著得低調啲？」 「無用㗎喎，佢嘅樣衰就好似黑夜中嘅螢火蟲一樣，咁鮮明，咁出眾。」 . ， 我工作無咩成果，個客鬧我；我工作有啲成果，同事喺背後鬧我搏出位。 . 無論行街買嘢、舊同學聚會、朋友食飯，原來我總有嘢令大家不滿。 . 我情緒低落，哀求琳琳：「可唔可以熄咗『鬼耳通』？」 . 「開咗就熄唔到，或者你再努力吓，努力做好啲，咪無人話你唔好囉。」琳琳咁樣講。 . 待續... . #短故 #短篇 #小說 #陳美濤 #廣東話 #粵語 #tomatochan #我聽到人哋講我壞話