［關於唱歌］喜歡唱歌，喜歡聽人唱歌。聽歌又好、睇show又好，自己始終係會比較偏心Vocal。Nina Simone話，人聲係最Organic的樂器，我覺得歌聲的確係最個性化同直率，一把好既聲音，勝過千言萬語。 👨🏻‍💻 現代音樂演化講求科技運用、唱歌都隨住音樂潮流演化發展了許多新既流行唱腔。但係無論時代點演化，最扣人心弦、最Timeless既流行音樂，始終係要有真感情、真實力，不然都只會淪為一時既熱潮和熱話。要過左十年、八年，人地都仲會聽、參考、Study、煲，仲係有feel，始終都係需要技術和情感兼備。 有時，聽到幾類人唱歌會覺得有啲可惜。 🔺「高音浮誇流」，現代人習慣速食、同埋部份YouTuber為咗吸引流量而則重高音/高難度技巧既教學，再加埋近年內地嗰啲歌唱比賽節目，好多人只係追求唱到高音、唱到所謂難既歌，個個都扯吼同埋尖叫。 無論教唱歌又好、或者做一啲小型歌唱比賽評判，好常見嘅係好多人揀好難嘅歌，然後自己應付唔到(或好勉強應付到😵‍💫），將所有嘅心機放喺最高嗰幾粒音度，誤會做到就等於唱到就係實力的表現。但係其實聽一首歌一個整體，並唔存在唱一句好聽就成首好聽，除咗高音仲有中低音域，咬字、拍子、音準等等… 🔺 第二種是「極端技術流」，呢種通常都係有技巧、甚至有學同練開，雖然咩都做得好好，但係偏偏你又唔係覺得好感動，因為過於着重技巧而忽略咗情感表達… 你聽佢唱歌只係睇一個表演、但係唔係聽一個故事，喺舞台上面好似只係為贏、競賽，但係你聽唔到佢自己同感情。 🔺最後一種係「情感豐富唱K流」，呢種好容易理解，就係佢真係好鍾意唱歌、好投入，但係偏偏各種基本功欠奉，亦都冇好好練習和修正自己嘅瑕疵，於是你會覺得佢好有誠意，但係又唔係真係感動到人。 自覺會自己會容易成為第二種，做得呢件事多、同埋耐，好容易會公式化去處理～ 所以係追求技巧嘅同時，成日都要想辦法保留對音樂的一份純粹和真摯。 近三五七年做幕後和製作的角色多了，演出方面的觸覺是比從前鈍了一點，但間中有空間的話，我也希望保留丁點演出面向嘅自己 （都幾難，好忙） ☺️ 也沒緊要吧，慶幸身邊有許多才華洋溢的年青人～ 有時在他們身上才感受到何謂純粹、初心、希望～ 希望嚟緊Passion Music有更多又高汁、又感動到大家嘅作品。🎵 （樂隊好快會有新歌，嘔心瀝血之作。還有嚟緊會訓練啲新徒弟呵呵呵，佢哋好得意遲啲介紹你地識） #passionmusic #eddiesir講經系列