［葬禮進行曲］你四十歲人，去過幾多次葬禮？

TLDR ：Always Go To Other People's Funerals — Otherwise, They Won't Come To Yours

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

1. 而家聲名極臭嘅朱利安尼，講過相當老派嘅人情世故嘢：婚禮呢，其實唔得閒真係未必要去，反正錦上添花，少你一個唔少。但葬禮，雪中送炭，務必要去支持遺屬，多你一個好多。況且，人可以唔結婚，結婚亦可以唔行禮，但總會死。死咗嘅，唔係完全無親友嘅，總會做啲嘢。當然明顯唔係佢發明呢套講法，佢只係在書講，我亦只係聽人講佢本書講

2. 況且葬禮，相當Flexible，流水席，幾時就到時間咪過去，見到遺屬講兩句，望下有冇識嘅人，喜歡嘅好快都走得。

3. 後生嘅朋友寫咗篇文（https://lkdin.io/3VOb），佢剛四十，即係後生我幾年。咁我呢幾年都冇去過葬禮（我記錯嘅請你報夢話我知），所以我四十時嘅數字，同而家一樣。朋友話三個或四個，咁我應該多過佢。你可以計下，去到你四十歲為止，去過幾多個葬禮。未夠嘅？「自己pro rata返」。「當然唔好計咩法治已死香港已死嗰啲一日去幾次嘅」

4. 當中，不存在咩「四十歲人應該去過幾多次葬禮」，正如我不打算研究「四十歲人應該打過幾次飛機／有過幾多性伴」之類。但背後，總會反映到啲嘢。雖然又話人老咗去嘅葬禮多咗，但照計四十歲呢，你同年啲朋友，一般都未死。你去嘅都係長輩之類，細細個都可以去。

5. 朋友話去得少，反映佢毒，冇乜朋友，同屋企人關係惡劣。可能都有啲關係。我都冇乜朋友，同屋企人關係都惡劣（但好似冇佢咁惡劣，真係人上有人）。但仲有好多因素影響，例如你有另一半嘅，往往就去多一倍。

6. 我試下數，我去過嘅葬禮，應該八個？有兩個我好似冇印象有去到，但照計我係有去的。然後寫完呢篇文我就會洗自己腦，十年後我就又變得肯定自己有去。人嘅記憶幾咁唔好可告！況且我地年代唔興「懷念爺爺」咁影響，好似暫時我都冇在殯儀館打過卡。（然後我查返手機app，原來係有！三次！都話記億唔可靠。咁其實殯儀館打卡冇乜嘢。冇人叫你在入面打嘛。）

7. 我父母好早生我，老母今年62，老豆64．兩個都唔食煙（老豆N年前食，戒咗好耐），所以根據大數法則，健在嘅機會比較大。咁你估到，八個之中佔咗四個嘅，就係阿爺阿麻，阿公阿婆，全數釘蓋，好合理。

8. 我嘗試排序，雖然未必太準。但，頭兩次應該最震憾，冇經驗嘛，況且細個（雖然都十歲以上），有啲驚的。

9. 第一個死嘅，係我阿公，我讀緊小學，四五年班咁上下？嗰時放學成日同老婆出去瑪嘉烈探病。應該係九龍大酒店？冇玩咩破地獄嗰啲，但都真係都仲係一回事，去足全程，同學校請假的。冇守夜，或者有人有但我冇份。阿公印象都多，細個在石圍角村，拎佢本不文集睇，佢又會帶我飲西茶，西多士冇餡嘅年代，幾咁美好。星期六佢睇賽馬，我就睇中間插播嘅大力水手，或者德國波。不過死嘅人太多，不能個個講好詳細

10. 之後係我阿爺，更加親近。冇錯係我出世時已經著咗草去台灣嗰個，堅稱自己冇收片但又走咗佬嗰個。但我有記憶時，佢已經返咗香港做返老正，當然亦唔見有乜錢（聽聞在台灣敗晒）。阿爺嘅感覺，就係唔係幾好老脾，但又唔係會打我嗰種，都係慈祥嘅。但又不過，我完全不能將佢同差佬扯上關係，雖然我一路都知，但總係覺得好似換咗另一個人。阿爺都算死得早，大約我中二三時死咗。嗰時佢臥病在床，我仲在側邊打機，真係不孝。記得佢死前健康當然更差，脾氣亦差，好多嘢唔食得，最記得成日要食田雞—唔係佢要食，係好似唔食得其他嘢。嗰時就開始知道死亡，可以揀真係長痛不如短痛，但邊度你揀？我唔相信阿公或阿爺咁選擇。當然佢地亦未去到話受好多痛苦，或者吊住好耐咁。阿爺最後死在大陸，唔知返去搵神醫定換腎定乜鬼。就係記得解穢酒食過「黃埔炒蛋」，記得阿麻好似幾風騷。唔知係因為照顧病人好累丫（咁阿爺病重時都真係好臭脾氣），定係拎咗唔少錢。冇錯，阿爺到底有幾錢遺產，去咗邊，都係大家扯貓尾，永遠冇真相，有人話根本冇，有人話去咗我阿麻度，有人話去咗我老豆度（應該都有啲），總之冇一仙去過我度。

11. 講咗咁耐先兩件，加快速度。見到嘛？阿公阿爺死先，佢地老婆反而擺耐好多。咁好合理，一來女人長命過男人，二來佢地娶老婆都揀後生，阿公更加係再娶，所以阿婆未咁快。由我中二定中三（1992？），打後十年，好似都冇再去過葬禮。阿婆幾時去架呢？慚愧，我都真係唔係好記得。細個當然都有啲感情，但後來阿婆已住老人院，咁大家知，慢慢就少深，我就更加少去 —唔好記嗰時我已經高中或者大學，有自己多姿多彩嘅生活，主要係溝下女做下愛咁，點都好玩過去老人院吧？你反對嘅，我同你交換。直到而家，我都唔記得阿婆幾時死，甚至唔記得我有冇去佢葬禮（希望阿婆唔好上嚟留言話：仆街仔！你死我都未死呀！），但合理地假設，應該總有出現下？當埘我同我老母關係未咁惡劣，佢叫我去我應該會去。不過又諗下，實情阿婆唔係佢親老母（都話再娶），至於我老母親母，我冇見過的，好早死咗。

12. 然後，又好似一輪高峰，嗰幾年去較多。我阿麻死咗，好似十年前多啲？留意佢最後就住在我而家住嘅地方，佢瞓廳（唔通我瞓？況且床架高，佢爬唔到）。事實佢臨終前幾年，都係同我一齊生活嘅。我係咪喪盡天良？都未完全係嘅。有時都會慚愧，冇陪佢多啲。佢健康尚好時，都試過我返工拎漏嘢佢拎去中環畀我（！），又或者我要帶女返屋企搞嘢時，醒一百蚊畀佢落去飲茶（唔係點？）。

13. 無論如何，當時已經有Facebook，亦係比較深刻嘅。當時係年尾，阿麻之前健康並唔特別差，即係長命病嗰啲當然有，但佢話唔舒服入醫院時，都仲係自己執嘢自己叫車。佢去醫院時我都探過下佢，都仲係幾健康。但話咁快。有一日我老母打嚟，就同我講，「你阿麻走咗啦」。我想講，我老母當時在屯門醫院返工，阿麻亦都住屯門醫院，我真係以為佢嘅走咗係出咗院，然後佢先話我知。當時我在公司，仲係十分搏命嘅分析員，我甚至諗緊使唔使放工先去，好似有上Facebook出post，甚至諗係咪要坐的士之類。無論如何最後就坐的士，去到叫做見佢最後一面（已香，但仲在床上，明啦）。

14. 往後嘅事，好多人都聽過。見完最後一面，不過係午飯時間咁上下？我返咗屋企瞓（分析員嗰時七點幾就返到公司，我係摸黑出門的）。然後？我去咗旺角。做乜？睇戲。同埃汾太睇戲。睇嗰套戲，叫做《3D娜塔莉的情人》，聲稱係全世界第一套3D韓片，條韓妹好靚，又好波，我都冇深究係咪整，有乜關係？

15. 我走咗去睇《3D娜坦莉的情人》（https://bityl.co/8Hsd），非常之卡繆，非常之《異鄉人》。我甚至應該係因為睇咗《異鄉人》先會咁。成件事我已經唔係好記得。我上一次寫文，係講「咁買咗飛丫嘛，唔通唔睇，點預到佢咁啱嗰日死」。但，我諗返件事唔係好合情理，首先嗰個年代，我好似仲唔多興網上買飛。之但係又不過，如果我唔係一早買咗飛，照計我唔會特登出旺角睇戲？Anyway同埃汾太睇完，就梗係上床啦。都話十分之《異鄉人》（正因如此，如果我冇買飛，點會特登出旺角？唔係叫埃汾太返屯門會簡單啲？留意我午飯已經返咗屯門）。第二日，我照樣七點半返到公司。冇能力的人嘛，唯有早返工。

16. 埃汾太當然都見過阿麻，食過好多次飯，當然都有去葬禮，不過遺憾阿麻冇機會見到我成婚。亦冇機會同我影畢業相。當然遺憾係佢嘅遺憾，我先唔理呢啲嘢。咁而結婚亦冇可能特登就阿麻，況且當時亦唔知佢就死，佢都唔知自己咁快死。但畢業相嘛，理論上可以就老人家嘅，不過事實上港大行畢業禮時我已去咗英國，英國行禮時我又返咗香港，而我又唔會唔係正日自己搵套衫同勞蘇影相咁

17. 第幾個？數完第四個。然後第五個，我老豆老婆（非我老母，但亦唔係「後母」，都冇一齊生活過，正如我老母老公我都唔會叫「後父」，佢出現時我都中七啦大佬），其實時序上早過我阿麻，但舖排上好似應講晒麻爺公婆先。實在件事有點複雜，我亦都唔係好想講。當然唔係死者嘅問題，又唔係我問題，係顧及下其他人感受。話說我老豆老母，在我阿爺死後就好似離咗婚，冇因果關係，但時間大約係咁。我老母再嫁但冇小朋友，我老豆再娶，生多咗件，所以我有個同父異母嘅妹，不過比較少提，亦唔係十分熟。但講時講，我老豆呢個再娶嘅對象，廿年前左右就死咗，自殺的，燒炭，成件事十分震憾。當時係我大學畢業後，去英國之前，我在老豆公司過下日晨（係佢返工嘅公司，唔係佢開間公司咁爽）。佢都有講另一半抑鬱症呀之類，然後事發當日我甚至係同佢一齊在公司的，不過冇同佢一齊返去破門，嗯，成件事都幾震憾，所以我都唔係好想講太多。佢嘅葬禮我有冇去？我估應該有吧？（我同死者關係並不差，反正都唔會成日見到，亦冇啲啲咩「你拆散咗我屋企」嘅憤恨，畢竟真係冇人拎支槍迫我老豆有婚外情的，對不？）

18. 第六個，我外母。同樣地，涉及其他未死嘅人不講太多。當時我已經結咗婚，當然係有去葬禮的。不過講真，結婚冇耐外母就去咗，一直都唔係太多交集，同外父就多啲。外交仲係好健康，日日炒股票，大家有心。

19. 第七八個，算唔算特別少少？第七個係恐龍，冇錯，就係叫恐龍。中學同學嘅大學同學，成班一齊玩，稱不上極之好朋友，但至少會私下傾計兩個人食飯咁。點死的？自殺。我仲記得佢在甚麼教堂定乜做後事，平日嘅夜晚，我仲要一半走咗出去同倫敦鬼定美國鬼conference call講港交所。嗰時嘅工作真係十分困身。真係搞搞下嘢在時鐘酒店 conference call又有，聽聞有人一路conference call一路被吹蕭（唔通幫人吹咩），無從證實，但唔係我。亡友好多金句，被其他朋友拎出嚟講，例如嗰句「呢啲我愛你呀會結婚呀，性行為嘅潤滑劑嚟啫，唔想講嘅咪去樓下買支KY，雖然凍啲但效果唔爭太遠」，好多人以為係佢創作，實情係我話佢，佢發揚光大的。

20. 如果我冇記錯，亡友好似細我兩年，副作用就係我在英國返嚟香港後，仲會借用佢啲大學戶口做各樣嘢，例如上呢個 data base搵工．我最記得，好似嗰時佢畢業我未搵到工，佢都有安撫我，同我講，「唔緊要，一個恐龍倒下，仲有竹萬萬隻恐龍」—講嘅係佢細佬仲讀緊大學。不過後來我冇用到恐龍二號，放心，我搵到工，佢都搵到，佢死時我都差不多離開金英了，好似2012年前後？

21. 多得電話，我都仲保留住同佢最後嘅message（當然唔知佢自殺），就係我推介完元朗嘅煲仔飯，佢覺得好正。就係咁。後來我都仲成日去，都會諗起佢，雖然我同佢冇一齊食過。

22. 最後一個，你可以話「最不重要」，但亦係性質上完全唔同。工作上嘅……前輩？唔係我本書鳴謝嗰幾個，但係嗰堆人。亦都係自殺，相當震驚。佢不算同我極熟絡（雖然我在倫敦出trip佢都打畀我有嘢搵我救火），亦唔算直接幫咗我極多嘢（咁當然都有啲）。但始終係個慈祥嘅長者，亦係業界有啲聲望嘅人。壇嘢都搞得幾大，俗啲講句，生前好友們幫佢風光大葬，算係極度榮哀？未致於好似「大時代」咁，但的確見到一啲猛人，甚至會同我講「佢都有提起你」。

23. 我記得應該係英國脫歐公投嗰年（冇錯，相入面嗰次，睇返日子正係公投之後嗰日），就係我最後一次去葬禮，就係呢位前輩。我嗰日不停心諗，到底葬禮係咩回事？係畀邊個睇（當然係畀生嘅人睇），係為咗表達大家對佢懷念？定係話畀大家知，第時你死咗大家都會咁對你？

24. 總之，都係嗰句，Always Go To Other People's Funerals — Otherwise, They Won't Come To Yours

25. 冇乜特別，都唔算寫得特別好，甚至差過我朋友，「都幾大鑊」，只係留個紀錄。另外，關於葬禮，寫過篇舊文，原來都未夠一年前。舊文就寫得幾好（https://fbook.cc/3Z0d）

26. 不過有個講法，一個人死兩次，最後一次有人提起佢地先係真正死。咁以上呢啲故人，我又幫佢地續一續命咁，個感覺好似泊車餵錶咁。以前仲有個紅色旗，十分有實感。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

#楊勇緯 加油，再3年奧運金牌ㄧ定是你💪

好文轉述：

【台柔道選手楊勇緯奪銀飲泣：不會停下腳步，我要奧運金牌！】

柔道選手楊勇緯於男子 60 公斤級決賽落敗，得到銀牌，這是中華台北代表隊於東京奧運的首面獎牌，也是台灣史上首面柔道獎牌。他在落敗後離開比賽時哭泣。

23 歲楊勇緯初次征戰奧運，於男子 60 公斤級決賽不敵里約奧運銅牌得主日本高藤直壽。決賽進行至加時 3 分 40 秒後，裁判判決兩人各拿 1 次指導（類似黃牌），楊勇緯因為滿 3 次指導而落敗。

賽後頒獎典禮，楊勇緯把銀牌拿到臉頰旁摩擦，對於首次出戰奧運就取得獎牌，楊勇緯賽後受訪時笑說：「#我不會因為這面銀牌就停下腳步，#因為我要的是奧運金牌！」

台灣總統蔡英文今晚亦在 facebook 發文恭賀楊勇緯締造台灣歷史新紀錄，她又指已撥電話給對方，「謝謝他的努力，期待他回國接受表揚」。蔡英文又恭喜日本高藤直壽獲金牌，「在奧運殿堂上，台日選手精采過招，世界頂尖的競技，實在讓人感動！」

楊勇緯是台灣原住民排灣族運動員，小學三年級就開始投入訓練，曾於 2017 年取得亞洲青年柔道錦標賽的 60公斤級金牌，他以排名第 11 獲得奧運資格。

(AP Photo/Jae C. Hong)

［一股兩名］YesAsia！元祖電商！回憶返晒嚟！

TLDR：小時侯，鄉愁是一枚小小的郵票，我在這頭，母親在那頭。長大後，鄉愁是一張窄窄的船票，我在這頭，新娘在那頭。後來啊，鄉愁是一方矮矮的墳墓，我在外頭，母親在裏頭。而現在，鄉愁是一灣淺淺的海峽，我在這頭，大陸在那頭。

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1700人訂！ 畀年費仲有85折
＝＝＝＝＝＝＝＝＝＝＝＝＝＝
1. 我就係留意埋啲冇人留意嘅嘢，咁先有獨家（＊）

2. 以前有個同事，花名叫做「吉吉」，因為佢叫做阿喆。幸好，自從有咗陶吉吉後，好多人都知呢個字讀「哲」。不過目測好多人都仲係叫佢陶吉吉，未必唔知係「哲」，但怕同人講去聽陶喆，人地以為你去聽陶傑，或者曹捷。正如我上次寫仙台（https://lkdin.io/3TPk），話我寫咗篇文講魯迅，都有人以為係佬訊。（我話：係呀，嗰條友抄咗佬訊個logo）

3. 其實應該話，「喆」「哲」根本就係同一個字，異寫。正如「碁」亦即係棋，不過好似圍棋專用，或者係ACER。有型啲咁解。

4. 而作為一個文青，我當然早就知道「喆」字。都唔係好深啫，金庸嘛，王重陽咪王喆，歲在甲子，陽者為吉，重陽咪喆（亦所以重陽係九月九）。

5. 至於呢間公司，我一路都以為係「喆麗」（請睇招股書），做乜變咗「哲麗」？而且我見好似係得aastock（巧似中資背景喎btw，因住拎晒你啲data，知道你睇過乜股票），同埋好少部份嘅大陸網站。

6. 但係咪關簡體字事？又似乎唔係。就我理解，簡體字都有個喆字。呢，之前盛傳呀Bill Gates件翻譯小三，咪正係「王喆」，大陸都有個歌手叫「王喆」。

7. 又，呢啲咁嘅問題呢，我唔知會唔會遲早搞到出法律問題。「所以都係要有common law」（＊＊）。你見啲文件全部都講，中文名嘅嘢，for identification only

8. 加埋簡體字就更煩，例如肖剛到底係姓肖定姓蕭，佢本人都未必知。更煩嘅，例如美團嘅蔡文胜，我到而家都唔知係蔡文勝定蔡文胜。因為繁體字版招股書都係寫佢係蔡文胜。

9. 最後都講返呢間「喆麗」，咩東東？正係Yes Asia！嘩，啲回億返晒嚟，我估四十幾歲嗰班人（即係我）就會識！元祖電商公司！（甚麼點點紅 博學堂嗰啲就香晒）

10. 第一個反應應該係：嘩，間嘢仲未死的？第二反應係，嘩，仲搞上市？

11. 唔失禮的，14億市值。收入又係十幾億港紙，舊年純利成億港紙，唔係啲假大空嘢。「王維基檔嘢半年計埋保就業都係賺1億咋」

12. Yes Asia做乜？知嘅自然知，我年代嘅人，識呢檔嘢，九成係上網搵啲港產片VCD，歌手CD，香港小說咁。正係咁嘅生意！

13. 事實公司今年24年，你見到了，都話第一代電商股，亦係我讀大學嘅年代，初接觸互聯網嘅年代，生存到今日仲上埋市，真係好嘢

14. 公司成立源起，就真係因為創辦人在美國唐人街買四大天王CD，發現好貴，然後覺得不如自己做。果然係解決痛點。最初只係都係拎唐人街啲貨上網賣，後來甚至繞過中介，直接同唱片公司拎！

15. 當然公司後來慢慢轉型（仲有人聽CD睇VCD睇書？），變成賣衫賣化妝品，但的確係賣香港CD VCD 同書起家的。又，仲有留意一樣嘢：CD VCD 書都可以數碼化，但化妝品同衫暫時都未得。見到分別冇？

16. 寫到呢度，想講係，呢種「思鄉」，亦係一門幾好嘅生意。當然唔多唔少會被互聯網鏟平，但仲係有啲嘢取代唔同。

17. 例如我寫過，我阿爺當年係差佬（死咗十世，你鍾意我畀個地址你起佢出嚟鞭屍都得），怕老廉（但佢堅持自己清白），著咗草去台灣。咁佢地成班友，在台灣，就真係好似「大時代」咁，去租TVB錄影帶睇，貴一貴都租。

18. 你笑佢？到我在英國讀書時，雖然我嘅懶係懶到連唐人街都唔去（我在Warwick，最近要去到Birmingham，都搞你粒幾鐘，我除咗飛髮外就好少去）。但，如果去開倫敦（咁有一排在嗰度返intern添），我都係去唐人街，食旺記（好撚好食，特別係同其他嘢比），然後買張小嫻買亦舒睇。（＊＊＊）

19. 然後又諗下，我而家Patreon讀者，居然都唔少係嚟自海外。冇正式統計，但有啲畀英鎊畀加紙澳紙嘅，就一定係海外。亦都有啲私下有同我傾計，日本嘅有，韓國有，去到芬蘭愛沙尼亞都仲有。而好明顯，我啲讀者應該全部都係香港人，我難以想像一個台灣人或大陸人或馬來西亞華人會睇我寫嘅文。

20. 一方面，固然亦係「思鄉」，我會講到香港嘅嘢，或者畀佢睇到廣東話嘅文。雖然你可以話大把人都有寫文，但，就係唔同。

21. 另一方面，亦係科技真偉大。你諗下，雖然金庸年代之類，寫文真係發達。但，你賣文賣唔到去芬蘭啦？但而家多得科技先進，我在香港寫文，甚至芬蘭嘅朋友都睇到。

22. 仲有？甚至有住加拿大嘅讀者請我食飯傾計。點請？咪佢幫我叫外賣（可惜只係UBEREAT，唔係女），然後佢在加拿大食，我在香港食，開個Zoom傾計。

23. 所以呢，都係應該感恩，感恩過郭感恩（＊＊＊＊）。當然我要投訴嘅，扯，我而家Patreon真係可以在邊度寫都得，我可以住兩個月日本，然後住兩個月韓國，又住兩個月越南，照樣寫文，爽到極。以前啲作家都未必有咁爽，至少仲要咩搵個Fax機交稿。

24. 可惜疫情關係，以上呢啲我諗咗好多年嘅嘢，理應可以實現，但就實現唔到。不過唔緊要，心存樂觀。

25. 多謝大家一直嘅支持。下半年仲有更多更精彩嘅嘢。

（＊）雖然獨家is overrated。N年前女朋友做記者，日思夜想就係做獨家（財經咋喎，唔係水門海南雞事件），當時我已經隱約覺得唔妥。然後你而家發現，獨家is overrated，creativity is overrated，唔係唔重要，但唔好過份強調。蘋果唔係第一間出智能電話，又唔係第一間賣平板，更唔係第一間賣MP3。但點解唔係潘蘇通松日MP3 Matsunichi變2萬億市值企業？寫文嘅嘢，光有idea冇用，仲要execution，當然好多時亦係寫得好不如寫得快，寫得快又不如有無限資源谷traffic（即係，用公司資源） — 而最重要係：加張靚女相，話知你莎士比亞加陶傑都即時收皮。愛恩斯坦話a picture is worth a thousand words嘛。你睇我都係冇樣賣冇波賣先要打咁多隻字，人地一個月就出幾十張相，我就打幾萬字咁咯。

（＊＊）日本又有common law啦，而未有中資股年代，東京先係亞洲金融中心咯。

（＊＊＊）點解係買張小嫻亦舒，唔係倪匡金庸陶傑？兩個原因。第一，keep your friends close and your enemies closer，要搞掂港女，先要了解港女。但第二，倪匡金庸陶傑甚至畢華流梁望峰嘅書，我早早已經睇晒。

（＊＊＊＊）有讀者同我反映，基本上一見到感恩，就知道我下一句係郭錦恩。但冇問題嘅，洛賓的軌蹟你都知道次次咁玩，但依然防唔到，依然好睇。

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1700人訂！ 畀年費仲有85折
＝＝＝＝＝＝＝＝＝＝＝＝＝＝

一聲鳥鳴，劃破長空。

拍翅下，見三圍六村環抱出屏山一貌。蜿蜒着的屏山文物徑，古木蒼翠，偶爾幾幢青磚土瓦明清建築老房子，石牆上的斑駁，在無聲歲月中落地生根，盤踞在石縫磚隙中，一身老氣，對照出旁邊高聳的新型村屋，卻又顯得特別驕矜。

那是一千年以前的事兒。渺渺時空，茫茫人海，都從中原南下，先在江西再往廣東後遷居於此，得豐盛水土，自稱「客家」，勤儉刻苦，莫失莫忘，且保留了中原古韻。

天真地以為能攀星摘月的七層古塔「聚星樓」，某年風災後只剩下三層，靜默地立在原地。古雅風流倒映在地下出現的一口古井，那一汪清澈冰涼的水中育有搖頭擺尾色彩斑斕的錦鯉，只是架在井面的鐵柵欄狠狠地破壞了錦鯉圖的美感。曾有不少文人進士，寒窗苦讀浪漫軼事的覲廷書室，門前一對蒼勁有力的端莊黑字「德澤流芳、祟山毓秀」，仍舊雋刻在硃砂紅木上，以書香墨魂冷眼河山變改、戰火無情和世事更易，正是千古江山，英雄無覓。


尋常巷陌中，那株開得姹紫嫣紅的簕杜鵑，一樹紫紅放肆任性的開在三層高的村屋前，然而再矚目也不及寫着「屏山盆菜」的大字招牌。

惜舊。一碟一碗皆有情
招牌底下昏黃的舊店裏，一時被兩邊一列長架上堆放着過千的碗碟所震懾，罎罐碗碟、沙煲罌罉，銅皮木製陶瓷，公雞、萬壽無疆、蟠龍翻雲、清花等花紋，有些是民國，甚至清朝時候製的，全是舊食具，也有盆菜、九大簋古盛器。短毛頭圓臉兒的店主鄧聯興(聯哥)，伸手把器笑謂：「全部都係呢條村好多家村屋拆嗰陣時丟嘅，我唔保留就冇㗎啦！」

聯哥是這盆菜店第三代傳人，也是屏山鄧氏的後人。隨時代變遷，圍村生活一點一滴改變了，舊東西正在消失中，他很想保留這裏的一事一物。碗碟叢中，電話猛烈又急促地響起，幾乎是從早到晚響不停，原來不少識途老馬惠顧過他，從此愛上那獨有的圍村客家風味，每年如燕歸來，都會在喜慶時節訂盆菜、九大簋。他拿起電話對客說︰「冇送貨㗎！對唔住！」


一般盆菜店為增生意，多設外送。聯哥寧願賺少些錢，卻堅持傳統，規定只可在鋪吃，或可訂在祠堂內的大地堂吃。「盆菜、九大簋屬於我哋圍村宴席菜，外送拎出去市區食，完全唔夾！要喺我哋條村食，咁先有風味！」他竭力保衛不單是一個失傳飲食，還有它的良美附景──

這天，就有村民大排筵席吃九大簋。「我有盆菜同九大簋，但九大簋佔咗生意嘅七八成。九大簋出面少做，係我至有！」聯哥、兒子Jeff、大廚及四五個女工，早在各有各活兒在忙，有的在巨型鑊前炒呀炒；有的將各款食物舀進銻盆，包上保溫錫紙；有的張羅執拾餐具和食物搬上貨車。眾人浩浩蕩蕩乘着車沿鄉村小路，直抵盛宴氛圍。

顯赫。祠堂寶地見昌盛
「九大簋，傳統喺祠堂食！」
頂着七百多年的歷史，鄧氏宗祠的雕樑畫棟，青磚紅瓦，在風霜刀劍下，仍汨汨細流着官宦世家一時的顯赫，鄧氏後人在此祭祖、慶祝節日喜事、父老子孫聚會等，無法撼動的熱鬧場面，記載着族人的昌盛，如一樹繁花。

繁花散落處，是這個過萬呎的大地堂前，擺好的二十多圍筵席，喜氣不言而喻。「通常我哋村民結婚、BB滿月、舊時新居入伙，同埋點丁燈，先會擺九大簋。傳統一圍枱人係雙數，所以要坐八仙枱。」八仙枱其實是四方枱，坐八個人，後期改為圓枱，人數再沒有規定。

開席了！祠堂門前的一根火苗，燃點藥引，數十萬台的紅衣鞭炮就措手不及在耳邊炸開，硝火及散開的紅衣頓時在空氣中飄飄而下，驚惶的心被期待開餐的興奮掩蓋。「喺祠堂擺酒近村屋，祠堂門前燒炮杖，村兄弟聽到炮杖聲，就知道開餐，走嚟食。」

上菜講次序，先來的是湯，其他出場不分先後，離不開雞鴨豬手冬菇……中間上子薑菠蘿，消滯去膩，最後才是小盆菜。「食到咁上下，主人家會逐枱敬酒，都係最長輩嗰個行先，譬如結婚，就由老爺奶奶率領。」

鄉情。添飯加菜作叮嚀
吃九大簋，味道其外，碗碗藏鄉情，像添菜，「主人家客氣啲，客人嚟到好似唔夠食，覺得唔好，會抽個裝食物嘅桶，譬如冬菇豬肉，睇吓邊啲唔夠，逐圍添加。」如有吃剩的菜，也會送給朋友親戚，充分如俗語說「又食又拎」般慷慨豪情。其他沒有請來的，主人家都會分給同巷，或隔離巷的鄉里，這份鄉土人情在城市裏，真正少見。

舊日請喜酒，取好事成雙，連餸菜也呈雙數，如「四簋」、「八簋」，但客家人認為九大簋的「九」與「久」同音，有長長久久之意頭，才有九缽。其實九大簋還有一款飯，加起來共十款，就是飯菜齊備，十全十美，人生的圓滿就捧在一手間，見證於觥籌交錯中。「以前唔係咁富有嘅，請食盆菜已經好好。係富貴人家，捨得使，先請九大簋，請最好嘅俾人食！」

昔時九大簋食材貴重，主人家一頓飯宴，揮擲千金萬丈豪氣。聯哥自小就見識有錢人排場，筵開百席是閒事，設流水席，大宴群親好友吃足三天三夜不足為奇，相比今天這樣的場面，當年盛況，由衷地帶點悲壯。

一碗。百菜百味筵席盛
「九大簋矜貴在每一樣餸都係獨立，唔似盆菜嘅食物混埋一齊，一菜一碗，比盆菜好食。」
簋，在古代是貴族放食物的器皿。他們客家人吃九大簋就用九個大簋放食物，後來簋經過演變，叫兩杉四缽。「杉，係大碟。缽，即係大湯碗。用碟同碗將餸分開嚟裝，唔好撈埋一齊。」

現時九大簋已全然以碗盛載，還因應時節調校不同菜式來宴客。「天冷天熱唔同，天熱煮清啲嘅好似梅子鴨，天冷煮南乳鴨，就濃啲。」口味的轉換，使人不易生厭。菜式獨立，百菜百味，使味蕾每次都有新衝擊，吃出其中的風味，這才是九大簋精緻之處。

近年在香港，大時大節吃盆菜愈演愈烈，愈趨普遍，但對吃九大簋，大眾多聞所未聞。

「做九大簋好少人識。譬如我同村都曾經有人做過，味道唔得，冇咗啦！美心啲大廚都嚟試食過，跟足啲餸推出，出晒報紙、電視，最後都係冇做。你唔係我哋圍村人，又唔係好似我做咗咁耐，係做唔到嗰種味！」聯哥帶點自豪說。
客家人靠山吃山，靠水吃水。九大簋菜式在不同村或會有差異，主要視乎村內有甚麼食材便用甚麼，如村有魚塘，便有淡水魚。或者宴席主人家的要求，捨得出錢的，便有山珍海錯。聯哥則身為屏山鄧族，傾盡識才，續承庥美。「我由細到大喺條村嘅九大簋大多都係呢九款，陳皮鴨湯、了酸豬手、黃酒雞、南乳鴨、炸門鱔、雞汁燴花菇、魚肉丸、子薑菠蘿、小盆菜，加埋雞鴨飯，總共十款。」

獨特。自家佳餚自家味
做九大簋，逐樣做，炆、炸、煮、燉、燴、滷、醃樣樣齊，比起盆菜，工夫多，利錢低，但聯哥廿多年來，仍恪遵一份客家人特色。其他人依循抄襲，卻做不到同樣的美味。他的九大簋味味是精品，首重用料精。「我哋嘅炆豬肉同了酸豬手，係用每朝劏嘅新鮮豬。」連炸門鱔都是新鮮即日捕，門鱔來價貴，外面會用較平宜的炸芋頭、炸花枝丸代替。「圍頭客家近海，舊時喺大埔東嘅海面有好多門鱔魚，所以我哋嘅九大簋一定有門鱔。」

再者，聯哥是元朗原居民，魚販和豬農必然將新鮮門鱔及本地新鮮豬先預留給他。而且坊間沒有多少人做九大簋，要煮出真正味道，他須用圍村傳統的獨有調味。「炆豬肉嘅麵豉醬，係用黃豆加麵粉自己整；黃酒雞嘅黃酒，用糯米同酒餅自己釀；子薑菠蘿嘅子薑，每年六七月啱時候用醋嚟醃，味道先正宗。」調味可說是做九大簋的靈魂，更重要還有手藝。

「煮九大簋，主角係做小盆菜嘅炆豬肉，豬肉炆得好，啲汁滲到入盆底嘅蘿蔔、豬皮同枝竹，成個盆菜都好味。」

他選腩肉和前胛，斬了件，燒熱巨鑊，下油，加入豬肉、香料、糖，之後加水。大灶火力猛，豬肉容易黐底，所以要揸起大鑊鏟不停攪動。一鑊豬肉，炆上一小時，來來回回翻廿多次。要懂得用力，不須太大力，順着力去剷。豬肉炒到六、七成熟，才下麵豉醬和南乳，既不黐底，醬料香味發揮得最好。他還有秘技，就是炆好的豬肉，不要趕着吃，攤放兩至三小時，更臻入味。

眾望所歸的炆豬肉，樣子紅彤彤，乾淨利落，不見有油水蔓延，鬆軟不油膩，吃時展露山賊氣質一口吃掉，入口的瞬間，豬皮帶點嚼勁，豬油與醬汁完美的邂逅，令嘴角上揚的味道，毋須言語，就有口水直流的魔性！

宗親。人人為我厚恩情
這無法停口的炆豬肉，手法技藝是傳承自聯哥父親，也是他人生的第一個大恩人。他父親以前在村裏務農，懂煮幾味撚手家鄉菜。遇有同村喜事要煮盆菜或九大簋，就會叫他來幫手。

「老竇完全係義務，永無托手踭，每次做完喜事，封番封利是仔，小小心意！唔會賺到錢。大家同村，你幫我、我幫你，人情味好好﹗」聯哥憶述說。聯哥十一歲起，就跟父親到祠堂煮九大簋，他充當小幫手，切菜起爐生火等。「我好鍾意做呢樣嘢，有得玩又有得食！」而父親負責掌勺，他看得多，慢慢學會了煮筵席菜。酒菜圍繞，鄉親為屏，長年累月浸淫在筵席的氣氛中，團聚的熱鬧、鄉里的恭親，種下對老鄉土深微綿邈的感情來。

九五年，其父因年邁而退休。「成條村都冇人做，我唔接手做，九大簋就會失傳！」他惟有繼承父親的衣缽，把手藝延續下去，也保留了當時碩果僅存的盆菜和九大簋。

「老竇係業餘，搵唔到食。我要開鋪，煮九大簋嚟做生意。」起初他的字號寂寂無名，三日打魚，兩日曬網，大拍烏蠅。同村的人知道他的難處，也念起他兩父子經常為村出心出力，都不時帶朋友回村，藉詞宴客，特意叫聯哥煮九大簋，讓他有生意可做。甚至容許他在富濃烈圍村色彩的祠堂擺席。

「最感激係同宗兄弟鄧達智，市區人先至認識我。」九五、九六年時著名時裝設計師鄧達智與傳媒、文化界，在圍村吃過聯哥煮的盆菜宴後，經過報道，盆菜開始廣受大眾認識，聯哥越見名氣，即使沒賣廣告，生意大旺。連明星周潤發、甄子丹、郭富城，政界唐英年、葉澍堃等名人都是常客。

人情，就是人人為我，我為人人，交心而生。「老竇教我，對鄉親要好，因為同村都係兄弟，自家人，有力出力，有心出心。」他對父親的教誨，仍刻記在心。像是每年清明拜山祭祖，他一切都以村事為先，年年為此都推卻不少大宗的九大簋生意，也幫族人煮山頭。只要村裏要他幫手，他從來都是義不容辭。

每朝六七點，天邊方呈魚肚白，沉睡的鄉村，巷弄後小門半掩，漆黑中廚房亮着一團燈光，冒出縷縷煙霧，傳出咔嚓咔嚓聲響。一個肥圓身影，汗涔涔地已提起鑊鏟，鏟挖着鑊中豬肉，繁忙的氣力活早就展開了。聯哥臉上仍含笑說︰「我幾乎日日都咁早，一直做到晚上六七點，十二三個鐘㗎！但一啲都唔辛苦！」
他奮力以煙火、菜甜、肉香，留住屬於圍村風味的九大簋，以食物的味道譜寫宗族和鄉村人情的記憶，透過節日、慶典，寄語一代又一代人的祝福，不忘祖、不忘根，如一根無形的絲線，把人與人拉近了。

撰文：孟惠良
攝影：陳秉謙、魯雋華

屏山傳統盆菜
地址：元朗屏山塘坊村36號(屏山文物徑路口)
電話：2617 8000
營業時間：11am-9pm
詳情： http://bit.ly/2UxOwEC

立即免費下載《飲食男女》App： http://onelink.to/etwapp
《飲食男女》網站： http://etw.hk
新店食評，名家食譜，一App睇晒！
立即免費下載飲食男女App： http://onelink.to/etwapp

即like《飲食男女》Facebook：http://www.facebook.com/eatandtravel

飲食男女網站：http://etw.hk

即刻Follow我哋Instagram，睇更多靚片靚相！
http://goo.gl/KwjNOE (@eat_travel_weekly)

工業大廈埋沒了清晨的淡雅，卻藏着了默默耕耘的人兒。

不聽早鶯嗯哼，但聞水聲淙淙，不見淨泉，只見一老三嫩，分散於雪白的場所內，用水洗擦着工具。這是一家臘腸製作工場，看上去倒不像，架生雖說不上簇新，但也沒有半點油膩污損，可見製作者的執着。驟眼看來，似乎是自家製作，窗前微胖的老人，抬頭綻露慈祥的笑臉，介紹自己叫「錦叔」，是旁邊的短髮女生「阿儀」及較瘦削男生「阿文」的爸爸，至於一旁的胖男生，則是這裏的員工「阿斌」。他們幾口子經營着一家凍肉店，招牌是自家製的臘腸。她說，傳統於人的腦海內，都有個印象﹑有些記憶﹑有份懷念，沒有了會很可惜，然而，如果可惜的感覺只有一瞬間，它，就真的會慢慢消失。故此，她決意傳承，延續溫馨的滋味。

最佳的馥郁

臘腸，無疑是一種傳統。除了是食物，也是舊陣時回到家中的撲鼻香氣，不帶奢華高貴，卻屬一種親切。此刻，整個工場，就瀰漫着這一股馨香。十一月，是吃臘腸的季節，也是周氏一家人最忙的時候。臘腸嘛，畢竟是季節性的食物，天氣涼的話，日日開工，三十多度的話，數天才開一次工。做臘腸普遍是七月尾開始，到過年就收爐，收爐了，他們就賣豬肉。


「借歪、借歪。」錦叔邊高喊，邊與阿文雙手秤起一大箱豬肉，放到砧板前，隨即把豬肉逐塊執到砧板上，切成小塊備用。阿儀終於洗乾淨所有工具，滿意地步至兩個男人身旁，把切好的豬肉倒入碎肉機內，重複幾次後，阿斌就來到這邊，把一大盤碎肉拿到水喉處清洗，再交由錦叔秤味。秤味即調味，把大量豬肉倒到醬油中醃製，錦叔邊攪拌着肉碎，邊解釋他們的臘腸比坊間的偏鹹，吃起來更香口，秘技就在於用自家的醬油做臘腸，「我哋由阿爺個代就開始自己曬豉油，不過而家要喺大陸曬啦，香港邊有咁大個工場畀你曬？」語畢，他把碎肉撈起，與瘦肉混合後，於紅色大膠盆內大力攪拌。兩代人嘛，思想上始終有點差異，有時候阿儀會看不過眼，怕老爸太辛苦，故一直提出用機器取代人手，她捂着額頭道：「佢好執着，非常執着，比我更執着。」既然有科技可以幫到人，為何仍然堅持最傳統的一套呢？故此，在她大力推動之下，工場添置了不少機器。只是，有些事情還是親手製作方好，例如灌腸。


說時遲那時快，他們一行四人已經站於崗位上，用腸衣包裹着肉餡，再打針疏風。然後就是紮結，對於紮結，錦叔堅持不能有繩尾外露，這是老一輩人的執意。然而，不是所有工序都能保持如初，曬臘腸便是這樣一回事。誰都知道，臘腸生曬過比較好，但如今全都在工廠製造，根本沒法子曬，只能用烘焙方法，用風機吹乾。烘過後即完成，成品要回味七天方能賣。阿儀不是不理解老爸的想法，她自己也喜歡炭火焙，但法例不容許，不變也不行，她嘆口氣：「除非你令嗰樣嘢消失，咁佢就可以喺歷史中永恆不變。」永恆不變的，從來只有變幻。

時針依舊轉動着，提醒時刻都在更新。中午十二時許，工場已經完成了當天的使命。做好清潔工作後，錦叔跟阿儀就回到店鋪工作。這是阿儀恆常的生活，對錦叔而言卻不然。以往，做臘腸這一個行業十分興盛，有十來二十檔，那年代很多人排隊買臘腸，比現在旺多了。他由早上六時起床，工作至晚上十二時方下班。說起來，錦叔做臘腸已經五十五年，六十年代，剛來香港沒機會讀書，惟有跟隨大哥做臘腸，一做就是十年。後來，他決定自立門戶，立名號為「恆安」，賣豬肉及臘味，一直鑽研改良臘腸的味道，結果，另一個十年又過去。做得好端端的，名堂開始響之時，政府突然說要拆工場，當時要另覓工場太難，於是他只好一味賣豬肉。停止生產臘腸的期間，他一直都感到技癢，又偷偷地研究。至二零零三年，有位食家朋友說服他重出江湖，見心癮到了，自己也捨不得這一行，「研究咗臘腸味道咁多年，希望自己再親手做，我真係鍾情於臘腸，係真㗎。」把心一橫，將小店改名為「家香」，捲起衣袖再做臘腸。

聽到店名，阿儀立即豎起耳朵，彷彿急着告訴大家，名字由她而來。她的記憶中，家裏每一頓飯，幾乎都有臘腸作菜，她形容：「好難有一種食物，只要煮一煲飯，放上飯面，打開飯煲，已經有一種香味，令你返到屋企有一種幸福嘅感覺。」少女時期，身在英國讀書，每次回港，她硬要帶着一大袋臘腸離開。對臘腸有親切感的最大原因，當然是吃久了有感情，自小吃臘腸到大，她最喜歡一味獨門住家菜——臘腸蒸雞蛋。剛好是午飯時間，她埋首於廚房做着與爸爸的午膳，「呢道菜我由細食到大，我成日介紹畀啲客聽，真係唔係好多人識得咁煮，但其實又簡單又好送飯。」她先將臘腸切粒，加入攪拌好的雞蛋及水，放入爐內蒸熟就可以。對她而言，即使是簡單的煮一煲飯，放兩孖臘腸，就很有回香港的感覺，猶如回家吃飯，一解鄉愁。炊煙輕輕晃於招牌前，這是家的香味，所以她將小店命名為「家香」。

最好的教誨

錦叔率先放下碗筷，捧着肚子走到店後方，拿出兩大束臘腸步出店外，勾掛於右方的網架上。這是剛好回味七天的臘腸，此時吃就最美味，要慢慢吃的話，最好不要超過三至四個月。一位大嬸來到店前，躊躇了一會兒。錦叔見狀，就上前解疑。他執起一條臘腸，教說挑選時最主要按它一下，如果新鮮製造的比較軟腍，帶乾身一點，表面不會過於油膩，肥肉要雪白，瘦肉夠大粒的話，臘腸會肥身一點，「我哋行內人叫四堆，三堆瘦一堆肥，咁就最靚啦。」大嬸準備掏錢之際，一名少女連跑帶跳地走來，悄悄話兩句，就把大嬸拉走了。錦叔無奈地苦笑，他知道時代變了，老一輩喜歡吃臘腸，年輕一代卻不太喜歡，也不得不接受。反倒女兒十分積極樂觀，洗完碗的阿儀步出店外，拿起一包凍肉，謂：「我哋要考慮年輕人點樣先會食臘腸，可以做啲乜呢？」於是，她想到了將食法簡單化，並加入年輕人喜歡的元素，就如她手上一包臘腸冬菇豬肉釀雞翼，不止這款，還有黑松露臘腸等古靈精怪的味道。質素能保持的話，錦叔也相當願意接受新嘗試，銷量倒是其次，重點是令更多人憶起傳統的味道之餘，又將其推廣予新一代，好讓這種傳統的味道能傳承下去，阿儀正正與老爸理念一致。

畢業後，她回到香港打過幾份工，五年前，還是決定回到小店幫忙。某程度上是一個共識，發現爸爸老了，她希望傳承父親的熱忱及心血，畢竟，沒有了這種味道，還是十分可惜。這不是一個輕鬆的決定，很多東西都需要搬﹑需要抬，骯髒兼辛苦。打從回到店子工作，身邊朋友最常聽到的，就是她又去看脊醫了，「但我唔驚，我喺街市長大，同我爸爸賣豬肉，所以真係冇所謂。」然而，這一行還是面臨式微，老一輩已經老了，他們認識的老行家都不幹了，年輕一輩沒人入行，原因很簡單，大陸賣的臘腸三十至四十多元有一斤，香港做的臘腸，成本都不止了，競爭大得多。雖然賺不了錢之餘，又換來周身骨痛，但錦叔始終是開心的，他嘛，興趣多於賺錢。

比其他行家幸運的是，有下一代的延續：「個女唔幫手嘅話，我都七十歲啦，梗係要退休。」他其實也計劃了做完今年就退休，交棒給女兒。令他如此放心，因為女兒曾經跟他講過，所有事情都可以變，世界都一直在變，但工作的態度不能變，如果工作態度變了，所有事情都會變歪，所以她製作的食物一定能入口才賣。他也教導女兒不要執着，人上有人，一定有人比你厲害，盡力就好，做這一行，就要敬這一行。二人似乎心領神會，合拍地一同轉身步進店內工作去。
身教，已經是最好的教誨﹑最美的傳承。

採訪：黃寶琳
攝影：胡浩賢、謝本華

家香食品
地址：元朗福德街46B地下
電話：2479 4777
營業時間：9am-7pm

===================================
立即Subscribe我哋YouTube頻道：http://bit.ly/2Mc1aZA (飲食男女)

新店食評，名家食譜，一App睇晒！
立即免費下載飲食男女App： http://onelink.to/etwapp

《飲食男女》Facebook：http://www.facebook.com/eatandtravel

飲食男女網站：http://etw.hk

Follow我哋Instagram，睇更多靚片靚相：http://bit.ly/2J4wWlC (@eat_travel_weekly)

自助餐及放題，向來是香港人至愛。眾多酒店及餐廳，都定時推出不同主題的自助餐，有些以抵食取勝，也有以獨特主題招徠，一次為大家搜羅。

1.Mr. Steak Buffet a la minute
開業十多年，但因為價錢抵，選擇多，人氣極盛，午市晚市都是全場爆滿。主打牛扒，餐廳由香港大型牛扒供應商經營，所以多以牛肉為主題，山形縣和牛、澳洲和牛等層出不窮。另一賣點是生蠔，即席開啟，多為美國蠔，蠔味略淡但也算新鮮。非常多客人來慶祝生日或周年紀念，因此只要顧客寫下句子，甜品師會寫在心形碟上，拍照一流。環境擠迫，海邊位景觀最好，但距離食物區頗遠，不少熟客都指明要坐在食物區對出的座位，方便拿取食物。分兩輪時段，7:30pm後貴了近$200，但多了不少菜式，較受歡迎。

地址：銅鑼灣告士打道280 號世界貿易中心六樓
電話：2881 5757
營業時間：星期一至日12nn-2:30pm，5pm-11pm
推介指數：3
詳情： http://bit.ly/2ApgGwh


收費﹕
星期一至五5pm-7pm：成人$418/位
星期六、日、公眾假期及前夕：成人$438/位
星期一至日7:30pm-10pm：成人$598/位
平均消費：$500

2.中西‧環
不時推出特色主題的自助餐，早前推出潮州自助餐，是首次有酒店以此為主題。最近就以老香港為主題，大廚把飛行棋，象棋，波子棋等童年回憶，製作成飛行棋馬卡龍、白朱古力慕絲蛋糕、士多啤梨慕絲蛋糕等甜品，非常搶眼。亦有懷舊小食攤位，即製棉花糖、雞蛋仔等街邊小吃。矜貴回本菜式不算太多，也有8款海鮮如麵包蟹，阿拉斯加長腳蟹及波士頓龍蝦。最抵讚是網上預訂有7折，價錢更便宜。

地址：西營盤干諾道西152號港島太平洋酒店1樓
電話：2131 5908
營業時間：星期一至日6:30am-9:30pm
推介指數：3
詳情： http://bit.ly/2A6mGYN


收費﹕
星期日至四6:15pm-9:30pm：成人$428
星期五六假期及前夕6:15pm-9:30pm：成人$468

3.The Place
以芝士做主題的自助餐，似乎很考慮胃納容量。不過如果是芝士迷，肯定兩眼放光。菜式選擇多，從前菜、主菜到甜品都以芝士貫穿，巴馬臣芝士車輪意大利燴飯、瑞士拉可雷特芝士、吉列芝士黑豚肉、什錦芝士焗薯仔和芝士拼盤、芒果瑞士芝士凍餅、芝士梳乎厘等菜式都有，口味多，花款齊。環境寬敞，空間感十足，就是價錢貴了一點，不過經折扣Apps Chope訂座有78折，可慳回一點。

地址：旺角上海街555號香港康得思酒店L樓層
電話：3552 3028
營業時間：星期一至日 6:30am-12mn
推介指數﹕3
詳情： http://bit.ly/2Od9hqm

收費﹕
星期日至四及假期6:30pm-9:45pm：成人$628
星期五六及假期前夕：成人$678

4.爐端金
放題店在香港數之不盡，但這間卻與眾不同，因為提供了酒店才有的即開生蠔，有日本、南非等來貨，另外也有藍青口、海蝦等海鮮，選擇多。刺身亦是強項，時令海魚如金目鯛、深海池魚、金線鯛、間八等不同品種天天供應，即叫即切，相當新鮮。居酒屋菜式如一夜干也不錯，平時在其他居酒屋吃，起碼要百多元一份，現在可以任食。酒鬼亦會愛上，因為有30多款葡萄酒、清酒、梅酒、啤酒供應，過一個醉生夢死的晚上。卷食如卷物、天婦羅、小食、炸物、黑松露鵝肝多士都有，水準就一般了。

地址：尖沙咀金馬倫道33號地下
電話：2628 0036
營業時間：星期一至日12nn-3:30pm，5:30pm-10:45pm
推介指數﹕3
詳情： http://bit.ly/2IXRo94

收費﹕
第一節時間：5:30pm–7:30pm
價錢：成人$468，小童/長者$298
第二節時間：7:45pm–10:45pm
價錢：成人$488，小童/長者$308

晚巿放題（星期五、六、日、假期及前夕）
第一節時間：5:30pm–7:30pm
價錢：成人$478，小童/長者$328
第二節時間：7:45pm–10:45pm
價錢：成人$498，小童/長者$348

5.無肉食
近年流行素食自助餐，全因這間3年前開業的素食自助餐廳，以新派裝修及超抵價錢打響名堂，至今人氣不減，於佐敦、旺角都開了分店。限時90分鐘，提供50多款素食，需先付款。菜式選擇多，不時有新口味提供，大熱芝士撻，菠蘿拔絲及泰式生菜包等都不是隨處提供的素食。最近還有胡椒菜湯、脆脆花生芽、韓式素炸雞（即椰菜花）等新菜式。種類及味道都比其他素食自助餐來得講究，味道好。百餘元可以任食，吃得過。

地址：北角堡壘街10-16號華曦大廈地下B鋪
電話：2528 2368
評分﹕3
詳情： http://bit.ly/2OW2iyw

收費：星期一至四6pm-10pm成人$108，星期五六日成人$138

編輯﹕楊志強

===================================
立即Subscribe我哋YouTube頻道：http://bit.ly/2Mc1aZA (飲食男女)

新店食評，名家食譜，一App睇晒！
立即免費下載飲食男女App： http://onelink.to/etwapp

《飲食男女》Facebook：http://www.facebook.com/eatandtravel

飲食男女網站：http://etw.hk

Follow我哋Instagram，睇更多靚片靚相：http://bit.ly/2J4wWlC (@eat_travel_weekly)