【龔成問答信箱】（Q22621-Q22640）

Q22621：

老師， 你好！學生有數個疑問，

1. 你上堂曾講數隻房託ETF，
最佳是否 領展0823/陽光0435/
置富0778，那較佳？
還是有其他另一隻呢？
原因？

2. 另外 曾經聽你提到 你會減持水桶1 增持 水桶2，是嗎？為何？ 因年齡？

3. 課堂上 曾聽你多次提過小米1810，你是否認為佢會唔會同 比亞迪1211 一樣數年後 暴升呢？

祝健康！謝謝解答！

龔成老師：

1）領展（0823）、陽光（0435）、置富（0778）算是高質的，你可以考慮這幾隻，都值得投資，可成為投資組合的成員，現價都合理。

如果想增長多D，就領展，因為領展會不斷翻身物業，同時會買賣物業。如果想收息穩健D，就置富（0778），因為佢持有的物業，對象是民生類，受經濟影響相對較少。

其實，你可以睇翻課堂的筆記，買房託如同買樓收租，所以你要研究翻佢持有的物業，就知質素、風險、發展。

2）我當時表述的意思「當我日後年齡慢慢大，就會減持水桶1，增持水桶2」。

這不是今天，而是長遠，原因為財富配置，年輕食進取，年長就保守，所以當年齡慢慢大，就會調整，你可以睇翻第二堂的筆記。

3）小米（1810）有潛力的，我自己都有持貨，長遠正面，但能否象比亞迪（1211）股價升好多，就未知，我只可以話，企業價值前景正面。

佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂，小注分注可以，但唔好入得太急，預佢股價仍波動。$15以下才是便宜區，所以現價不是大手時候。

------------------------------------------------

Q22622：

老師，你在《財務自由行》一書講過財務死胡同，有沒有實質例子供參考?

龔成老師：

如果一個人不斷增加「負債」（即是每月持續消耗現金流的項目），如養車，就算加入工都無用，這就會進入每月無法儲錢的情況。相反，一個年輕人若一開始集中累積資產，慢慢就能做到錢搵錢的狀態（資產產生現金流，現金流買更多資產），最後會進入財務自由的狀態。

------------------------------------------------

Q22623：

龔sir你好 如果係65蚊持有滙豐應該點做
大約30000股……
好迷茫

龔成老師：

匯控（0005）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

相信長遠是收息股，但股價增長就有限。

這股都有投資價值的，但就未必值得佔組合比例太多，同時明白佢是收息股，增長力有限。

如果你本身目標是增值，就應該減部分轉其他。

如果這股佔你組合比例較多，都應該減部分，轉其他。

其實，你最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22624：

老師，有兩個問題想問….

1. 2382 我$145 有貨，想加注應該等咩位置加好？

2. 技術問題，我地如果分三注，理想係每注跌10%加注的，但第三注的10%， 會係第二注加注後總和的10%嗎？

例如我第一注$100， 第二注是$90，第三注會係$81（90*10%）？還是$85.5（95*10%）？

龔成老師︰

1) 舜宇光學科技（2382）現價偏貴，最好等佢回到1,2成，才考慮開始再小注儲貨。如果係月供，現價開始都可以。

2) 最好係用對上一注的價位，去下調10-15%，作為下一注投入的水平參考。

若以下調10%計，即係第一注$100， 第二注是$90，第三注會係$81（90*10%).....。當然，分注有很多方法，有時要到時再調整。

------------------------------------------------

Q22625：

龔sir! 有問題想請教。本人28歲，睇番自己投資組合，發覺潛力股佔左55％，所以想揀多隻平穩增長型去平衡番。我睇中左中國平安2318（組合裡無保險股），但我本身有月供緊平安好醫生1833。

基於佢地都系同一集團，我再買2318合宜嗎？會不會風險大左？但現時佢股價跌左又覺得係好時機買入。

同埋想問買保險股應該點分析行業呢？同銀行股類似嗎？有無特別事要注意？謝謝！

龔成老師︰

對年輕人來說，潛力股55%仍可以，不過當中都不能過份集中同類潛力股。

由於平保(2318)和平安好醫生(1833)係有關聯性，故投資比重不宜過多。

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

要分析保險股，其實都幾複雜，簡單會睇佢新業務發展、現有業務狀況。另外，由於佢用浮存金去投資，所以都要睇埋佢投資回報方面。

而且，平保(2318)唔係純保險股，除了壽險和財險這2個主要分部，佢仲有銀行、資產管理、證券等等。

若要認真估值，你係要每個行業咁去睇。除非估值經驗好豐富，否則要完整和準確分析，其實唔容易。

簡單而言，這股有長線投資價值，是平穩增長型。現價算係合理區中下位置，你現時入首注係可以。只要控制好平保比重，不超過組合15%，咁就無問題。

------------------------------------------------

Q22626：

Sir, 上緊進階班中, 但投資實戰上有些迷思.

1. 如收到1000元股息, 股票共投入30000元, 股數1000, 分析個人投資時, 一般會計入股息嗎? (即共$31000 / 1000 = 當平均買入價為 31元)

2. 今年5月時看好3918, 組合上想加入博彩及有寡頭壟斷股, 已設定金額及中途趺5-10%就會加注, 但至上月就買夠, 平均 7.5元, 點知現會再趺;

全世界因疫情暫未有轉好情況, 看來要等疫情好轉後, 這企業才會轉好, 這情況是否耐心等待?

另一角度看, 當時因市場氣氛吸引, 加上計算估值約6.86 – 10.29, 在此範圍內買入, 想知道投資上有沒有做錯?

再另一角度看, 現下跌差不多 30%, 亦不再看好那地方會那麼快復甦, 是否賣出較好, 再買入其他更優質股票? 因這樣一直持有, 可能要數年, 值博率不高.

Thank you Sir.

龔成老師︰

1) 唔會，只會視初期投入的$30000為買入成本。就算你用$1000股息再投資，假設買入了30股。這樣你買入成本，只會變成$30000和1030股，即平均買入價為$29.12。

2) 金界控股（3918）係有質素的，但始終新興市場，因此點都有風險。

佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

這股股價較為波動，不過都有長線投資的價值，分注投資可以。

你現時平均價，係合理水平，但你預佢中短期一定會好波動，但長線持有係可以。雖然有質素，但始終係市場新興，風險較高，在注碼上緊記不能投資得過多。

你計算合理價都接近，調低多10%會較好。

記住，我地是否持有一隻股票，係用佢質素做分析，而唔係睇佢買入價，你要改變這個"賺差價"的思維。

另外，我地投資唔好估走勢，只會用估值平貴去做決定。此股現價有一定值博率，照持有係可以，除非你持股佔組合較多，否則照守住先。

我地唔會知疫情幾時變好，都唔會知市場幾時會對佢重新估值，令佢真正價值得以反映。可能係明天，可能係幾年後，無人知。

但我地知道的客觀事實，就是其真實價值，未被反映出來。所以長線持有，才是較好做法。

------------------------------------------------

Q22627：

你好，想問吓1799公司前景如何，手上未有貨，幾錢可以入貨？

龔成老師：

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

------------------------------------------------

Q22628：

龔成你好， 這是我現時持有的股票，想問下你的意見。可以點樣優化我的股票組合？

0011
0435
0778
1177
1928
2800
8109
9888
9988

另外我應該再爭持9988嗎？ 因為佢係我既投資比例已佔很多，比起爭持9988，定應選擇投資點700 騰訊？

我是一個投資小白，感謝你讓我明白投資的重要性， 我都好想快點賺到我的第一個一百萬

*8109 係我十年前剛買股票聽人講的教訓，我只放係度提醒自己

龔成老師︰

你現時持有股票(除了8109)，都係有質素，若你係年青至中年人士，係合適的。恆生(0011)、陽光(0435)和置富(0435)增長力較弱，主要係收息，若你偏向年青，不建議持有太多。

另外，我地持股除左講質素外，都會考慮到平衡性。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時阿里(9988)佔比已經好重，不要再加注。至於騰訊(0700)現價在合理區中間，係可以入貨水平。

但由於你本身已有不少科技行業股票(9988, 9888)，再增持會令你太集中科技類，而造成風險。

如果你好想入騰訊(0700)，你可以考慮沽少少阿里(9988)，來換碼至騰訊，這樣會較穏當。

------------------------------------------------

Q22629：

想問什麼是平台股?

龔成老師︰

現時你聽到的平台股，相信都是指一些電商平台相關股份，例如阿里巴巴(9988)、騰訊(0700)、美團(3690)、滴滴出行等等。

由於近期中央出手打壓，令不少相關平台股都出現明顯下跌。

但我地作為理性投資者，係這個時候應該理性分析，到底中央係這些新政策裡面，有多大程度影響這些企業，而這些影響，又是否長線?

如果只係中短期影響，我地就唔洗過份在意。相反，如果係有較長線影響，特別係一些核心性問題，我地就要調整估值和注碼，甚至調整成個投資策略。

------------------------------------------------

Q22630：

龔sir，近排入左隻光大綠色，之後同一位前輩討論，該前輩都係信奉價值投資，而且徧保守。結果佢問左一堆關於光大綠色業務同收入嘅問題，

但我嘗試從公司資料，官網同年報都揾5到一d好有説服力嘅答案，令我懷疑自己係咪入錯貨，所以嚟請教龔sir你嘅意見。該前輩對光大綠色的質疑如下:

1. 佢讀書時都接觸過能源相關產業，都知道生物質能依回事，但按佢所認知，生物質能嘅效率很低，可5可以有效發電賣電營利都係問題，年報d數字，

業務描述可能只係個美好嘅故事，嚟氹投資者入局。

2. 佢話公司資料無詳細提及所有客戶資料同相關收入，感覺主要客戶只有地方政府，雖然環保係一個大方向，但由於政策會變，

地方政府未必肯長期燒錢維持d無實際作用嘅項目(特別指生物質綜合利用)。而間公司無咩其他主要客戶，萬一將來政策改變就會對公司營收造成極大影響。

3. 最後，佢提及中國雖然係農業大國，但趨勢相信係由農業轉變成農產品/食品加工業，因為利潤同發展較好。另外沙漠化加上碳中和相關政策會令植樹造林係大趨勢。

最後因農業改革同植樹造林會令生物質原材料不斷減少，因此對其業務長遠帶嚟負面影響。

喺度先謝過龔sir

龔成老師︰

1) 太科學上的知識，我都解答唔到。有時我地分析企業，未必能100%完全理解當中運作，因為我地無可能成位每一行業的專家。

但我地可以從一些數、表現、同行比較等，去大致得出佢架質素。雖然無法100%，但有時都可以找到一個，令人覺得相對穏當的答案。

睇翻佢過去多年，生物質綜合利用項目在營運收益上，都有一定增長。由於唔係1,2年，而係一個較長時間，我地會假設佢這個營運模式，係無問題。

2) 一般企業，都唔會完整列出所有客戶名單，係商業考量和私隠問題。但我地可以知道，2020年最大客戶係政府機構，佔營業額19%，頭5大客戶，則佔營業額43%，唔算過份集中。

好似光大綠色(1257)這類企業，以政府客戶為主導，其實係正常。當然內地政策變動，會為集團造成風險。但綠色能源和危廢處理，依然係大方向。

而且，集團在這方面，都有一定技術和優質，因此長線發展係正面。

但由於行業算係較新，加上政策風險問題，你會見佢市盈率係好低。某程度是反映，市場對佢營運模式，都尚有一定保留。因此，此股可以投資，但宜小注。

3) 你前輩的擔心，不無道理。但由於中國食物需求，依然未能做到100%自給自足，政府長遠都唔希望要依賴外國入口。故農業發展，相信會維持正面。

而且，集團除了生物質業務外，佢都努力發展危廢處理，去散收入來源，平衡風險。

整體而言，集團長線發展算正面，但風險略高，不宜大注投資。

------------------------------------------------

Q22631：

感謝龔sir回覆，但＃2845同＃3067暫時都未有息。。。＃3067已經有3000股了

對於小朋友來講，唔係應該搵啲高息股咩？我成日都唔明點解有人講，炒股唔係賺股息，點解呢？

不過我都會聽龔sir建議主力擺左2800度，學你話齋，小朋友有長時間增值。。。

但我個人黎計，出糧戶口有003 每月供緊$1000，都已經有2千幾股了，想轉供其他，我應該都會聽龔sir教供2845了，但2845太貴。都唔知供幾耐先會有一手

龔sir你講得啱，我個人好心急

龔成老師︰

首先，我地真正投資增值，唔係做炒股這些短線操作。而係長線持有一些優質企業，透過佢地成長，以達至財富增值目的。

至於你要做增值，定係賺股息，就要睇你現時所處的人生階段。若你係退休人，因為已經無收入，所以我地就應以收息為主，用意係透過股息和利息收入，去支援退休生活。

相反，好似你這些較年青人士，其實應以增長為主，努力去累積一筆資金。到退休時，就用這筆資金換成收息資產，去創造現金流。

GX中國電車(2845)和安碩恒生科技(3067)都係潛力股，由於這些公司都在高速發展，所以好少會派息，因為佢地會將賺到的錢，重新投入業務上發展，去爭取更大回報。

所以，你投資這類潛力股，目標唔會放係股息度，而係係佢增長能力度。

由於這類潛力股波動性好大，雖然長線會升，但中短期點都會有一定波動性。如果你年紀大，快要退休，或者可投資年期較短，就不太適合。

相反，小朋友有好長時間去投資，可以足夠等到企業將佢質素，全面反映係股價上，所以投資盈富(2800), 安碩恒生科技(3067), GX中國電車(2845)都係可以。

煤氣(0003)和GX中國電車(2845)都係有質素，後者增長潛力高，但風險都高，你要自己衡量。

雖然GX中國電車(2845)現價唔平，但月供可以拉平均個價，所以唔算大問題。反而我擔心你會自己去定平貴，或者可能見某股票無乜升，供一陣又停，轉來轉去。

因為月供其實係要你"定期定額"去供特定股票，長線去供先做到平均價格效果，講緊係至少3年以上，並持有5年。

雖然股價貴時，我地的確可以減少供款。但問題係，若果你判斷錯誤，好大機會你最終回報，會受到嚴重影響。如果你投資技巧唔高，只要隻股票有質素，我建議你不理價格，一直長線供，反而會對你最有利。

------------------------------------------------

Q22632：

龔成老師， 我最近有一個好苦惱的問題，看唔清，想聽聽你既專業意見。之前未必想係香港買樓，但考慮到來緊五年都係香港，所以都想買樓，住左三年升。

我最近見到個樓盤我好鐘意，亦都覺得好理想： 長沙灣the campton. 想買400呎左右或以上既都要9百至1000萬，首期需約二百萬左右。

但無可奈何，不計我股票資產。我和男朋友二人最多可以比到150萬左右。我打算放晒手頭上的股票，當做首期，我會沽清所有。而我一年大約可以儲到三十萬左右，

我覺得一下子用盡，後再儲錢，唔太難。 因為份工年年都有加人工，一個月約五萬左右，個人和家庭開支約兩萬。 你覺得賣晒所有股票值唔值？

因為我個人就唔係好想，因為當中長期hold 住，我知會有高回報，以下為我所有的股票。

小米 平均成本 $26.1 1200單位
安碩 平均成本 $14.37 500
煤氣 平均成本 $10.68 5738
地鐵 平均成本 $39.8 2500
完美 平均成本 $5.11 17000
太古 平均成本 $22.24 2000
港燈 平均成本 $8.05 7000
HSBC $81.4 400
恒生 $183.3 300
建行 $8.6 2000

如果我唔放股票既，你覺得我有無需要放左某啲佢，集中幾隻，因為依家感覺好散下～ 我知要分散投資～ 但好似分得太多

因為真係好鐘意果個物業，覺得地理位置都好好，好驚自己做左唔理性既野，所以想來問下你意見

十分感謝老師，已報進修班，因為唔想係現場透漏太多個人資料，所次message 你。

龔成老師︰

首先，要盡沽股票，去投入一個物業，會令成個組合偏晒係物業一方，造成風險，最好唔好咁做。

因為我地無人知，未來幾年樓時係唔係一定升得快過股市，如果係相反，你就會因為而個動作，而減弱左財富增值效率。

另外﹐你5年後都會移民，其實我唔太建議投資樓市，除非你個物業係會保留，用來之後放租，就另作別論。(不過個呎價唔平，租金回報率未必好理想，你要研究清楚。)

因為除左我講，唔知樓市定股市升得快之外，係香港每次做物業買賣，成本都好高昂。你一來一回，其實唔見左好多錢。

所以，如果你好鐘意，我建議你租住就算。餘下5年，好好用你的優質股，去進行增值，相信會較好。

若然你真係堅持要買的話，你可以優先沽出一些增長力無咁高的股票，包括港燈(2638)、匯控(0005)、恆生(0011)和建行(0939)。

其次就係佔比較重的完全醫療(1830)和煤氣(0003)，可以沽部份，其餘就長線持有。

如果你放棄置業，你現時投資組合，大致無問題。除了港燈(2638)、匯控(0005)、恆生(0011)和建行(0939)係收息股，增長力不高，以你31歲計，不宜持有太多。

另外，完美醫療(1830)佔比太重，建議沽少少，換至其他有增長力股票較好。

記住任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

------------------------------------------------

Q22633：

Hello 龔老師! 你好! 现手上有90%也是hold 股票，大多也是不差股票，不知賣出，或是作長期收息股吧？因本人年纪近50，是否該賣出30% 留下現金。现仍有工作，未退休。

謝謝给点意見!!

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

由於你已近退休之年，你要將開始審視手上股票，將一些較高風險的持股，慢慢轉成收息類股票(而唔係轉成現金)。

因為你退休時，就會靠收息資產(如收息股、年金、A級債券、收息產品等)創出的現金流，去支援你退休生活。

所以，你唔洗沽出持股換現金。純粹係睇翻你組合，有無調整投資選股的必要，咁就可以。

如果你尚有5年左右，才正式退休，你現時組合，可以持有一些平穏增長股和收息股。但若你只有1-2年就退休，收息股應佔大部份。

到退休時，收息股佔比應為100%。

------------------------------------------------

Q22634：

銀行股：工商 1398
地產股：恆基 12 領展 823 置富778
物管股：雅生活 3319
保險股：中國平安2318
公用股：電訊 6823 粵海270
醫療股：中生製藥1177
ETF:盈富 2800 安碩 3067

以上持股共30萬左右，單一股票不超過5萬元，另外還有20萬現金想投資，本人30歲，請問有沒有什麼建議和改進？

自上年follow 你的page後，已經買左你6本著作閱讀，十分欣賞年報勝經，這本書是我個人認為學習得最多的（可能是第一本看）好認同你的投資方法，謝謝你。

龔sir你好，多謝你的教導，每天睇你的專頁已成為習慣

龔成老師︰

先多謝你支持我的書和專頁，如果你對估值有興趣，可以睇埋《股票勝經》和《選股勝經》。

當然，最理想係上我股票班，因為課堂中會較具體教你點去運用不同方法選股和估值，而且絕大部份內容，在書中都無提及。如果你想認真學好投資，建議你抽時間來上堂。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你上述持股，都係有質素，可長線持有。但工行(1398)、置富(0778)、香港電訊(6823)都係收息股，增長力唔高，主要只係收下息。以你年紀，不宜持有太多。

現時大市只在合理水平，資金不宜盡用。建議你餘下20萬，等大跌市出現，才去掃貨。

另外，你可以考慮用每月儲蓄，去進行月供股票，去加快資產累積速度。

策略上，你每月5成儲蓄做月供。其餘先儲起，同樣都係等大跌市機會出現，才出手掃平貨。

你可以考慮一些優質的平穩增長股，再加潛力股。潛力股，可選：安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

------------------------------------------------

Q22635：

呀Sir您好呀 我係之前報過您投資班既學生。我想同你分享下宜家我既情況。

其實我宜家暫時係做緊啲短期兼職，同時做緊保險，收入不穩定，但好彩係搵到番黎既我都可以至少儲到6-7成，我平時冇乜駛費，又有記帳習慣，

之前大學幾年搵搵下，宜家有$200000現金，同一份$200000的儲蓄保險，黎緊希望繼續係保險呢行做好，如果真係唔得，先轉。

呀Sir，我真係好想好似你咁財務自由，上完您堂之後，都買左唔少股票

9988 @$203 1手
2638 @$7.83 1手
1928 @$27.6 1手
1810 @$28.7 1手
1448 @$7.45 1手

1177 @$6.95 1手
285 @ $40 1手
270 @11.12 1手
月供VOO @385.75 5股

我想請教呀Sir您 呢個組合 您覺得可以嗎？

我諗住港股暫時咁樣擺係到，長揸果啲股票，同時繼續月供VOO，長遠應該可慢慢致富

我今年23歲. 我同我自己講28歲我要有$100萬. 我真係希望可以做到. 呀Sir，根據我宜家呢份保險工作同買股票既情況. 您可唔可以指點迷津，比啲建議我？

唔該您多謝您呀Sir.

龔成老師︰

以你23歲年紀，這個組合係可以。但港燈(2638)係收息股，增長力唔會明顯，主要係收下息，你現貨可持有，但暫時唔建議你加注。

我假設投資回報有10%（連股息再投資），你現時投資組合約值10萬+20萬現金，5年後大約會增值至48萬。

如果想達至你的財務目標，你每月月供金額要有最少$8000，才會較大機會做到100萬目標。

月供方面，除了保持月供VOO外，你都可以考慮加入其他「平穏增長股」 + 「潛力股」作組合，去創造一個增值平台。

僎設你係月供$8000，你每月先用$4000做月供(連埋VOO計)，其餘$4000儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

潛力股︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

現時大市只是合理區，你現有20萬資金可以再投入多5-10萬，用"分注"形式，慢慢買貨。餘下資和每月所儲倒的資金，就等大市出現一定程度的下跌，才大力度掃貨，然後長線投資。

另外，係財富增值時，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而工作上，你應該才剛剛畢業，其實可以多作不同嘗試，慢慢去找到適合自己的路。保險都係一個值得一試的行業，你可以看看自己是否適合這份工作，加油!

------------------------------------------------

Q22636：

Sir!成手恆大中國，蝕到入肉。同版塊的融創中國8月11號除淨，唸緊換唔換馬！股息派成$2，好似好吸引！但問題現在內房版塊比政策打到咁，又驚中伏！

驚收完股價急插，因為融創都係3幾蚊炒上去。所以想聽下你意見。現在持恆大中國25萬股，均價$8.3

唔該呀sir，現在帳面虧損35%

龔成老師︰

你對派息運作，似乎有點誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

「派息日」，就係合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在此期間因買/沽貨，出現任何著數。

至於換不換碼，你要睇翻企業本身質素。

融創中國（1918）業務不差，有規模、品牌、銷售網絡，但同時有一定風險。

這股同中國恒大（3333）一樣，負債偏高。無事就無事，有事就似中國恒大（3333）咁大件事。(當然負債水平，恆大比融創高得更多。)

而且，近期中央有時會出打擊樓市政策，相信會對佢有一定的影響。此股都有投資價值，但只宜小注，可以，但都要明白風險。

至於中國恒大（3333），負債問題唔細。現時風險很高，你最多只可以小注持有。

若現時持股佔你組合好高，我建議沽出部份，換碼至其他類。

------------------------------------------------

Q22637：

龔先生你好，本人50歲，有一個約850萬物業已供完。強積金及基金約400萬 (中/高風險收益基金為主)。股票約120萬(中風險龍頭股為主)，另現金約200萬。

希望約五年後退休。全球放水估計未來通脹將會加劇，如何運用二百萬現金？有咩高見？

其餘嘅配置有冇問題？

另外想請教你對基金同股票有咩睇法？ 有啲朋友講，買基金不如自己買股票，唔使畀保險公司賺，又唔洗綁死咁多年。

龔成老師︰

由於你距離退休尚有5年，都可以進行適度增值，但選項就要相對保守。

其實基金，唔一定無投資價值。你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

另外，你現時基金風險水平，其實係有點高。因為係你退休時候，我地係會將這些有增長力資產，轉換成收息類資產，用來創造平穏現金流(如股息、利息收入)，去支援退休生活。

所以，建議你將高風險基金，部份換至一些風險較低基金或優質股。其實最簡單，就係買指數基金。

而現有資金，你可以將佢地投資一些「平穩增值股」+「收息股」。若你想進取少少，可以較集中「平穩增值股」。相反，則以收息股作為主力。

平穩增值股，例如長建（1038）、中銀（2388）、港鐵（0066）、恆基（0012）、粵海（0270）、領展(0823)。如果有投資美股，可投資VOO。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

大市現處於合理水平，那200萬資金，你可以多用50-80萬，以"分注"形式慢慢入貨。餘下一半就等大跌市機會出現，才大力度掃貨，並長線投資。

到你退休前一年，就慢慢將你增長類資產，換成收息類資產，去為退休創造一個收息組合，咁就可以。

------------------------------------------------

Q22638：

老師你好，我之前誤打誤撞買股票，輸咗好多錢，差不多輸咗有20萬 ，我而家對股票完全冇期望，但係手上仲有以下股票，

可唔可以俾啲意見我睇吓我手上股票應該要長期揸住定係沽出？

66號，共有835股 @46.536 （月供$1500）
788號，共有4000股 @2.084
823號，共有835股 @76.805 （月供$1500）
2800號，共有835股 @27.888 （月供$1500）
9988號200股 @188.72

龔成老師︰

你必先要了解翻，自己輸左20萬的原因。係買錯股、買貴貨、定係誤把短炒當投資? 你要了解清楚自己問題所在，避免將來再發生。

我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？即是你想設計一個怎樣的投資組合？長期、優質、平衡、適合你。

你現時持有股票，都係有質素，只係中國鐵塔(0788)買入價偏貴，但由於有質素，你照長線持有就可以。

這個組合，算係一個增長型配置，若你係年青至中年人士，這個組合係可以。

若你投資經驗不多，建議你先維持用月供方法去儲貨，以減低買貴貨的風險。另外，現時大市只係合理區，每月儲蓄唔好盡用，要留有部份，用來等大跌市機會。

------------------------------------------------

Q22639：

龔sir，想問下如何分辦股票的股價是便宜或贵？是否處於合理區？

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q22640：

你好成哥，我今年36歲，單身

最近想開始學投資增值，希望60歳可以有3-5萬現金流，想下個月開始買入以下5隻股票，（2007，3988，6823，0823，303）平均每月可投資$12000以上，你覺得可行嗎？

我目前收入$40000，但之前經歷生意失敗，輸咗幾百萬，所以冇乜積蓄，仲有你覺得我應該先儲首期買樓定收息增值好？謝謝

龔成老師︰

每個人都有自住需要，但現時香港樓唔平，大致在合理區頂至略貴。如果你係無買自住屋的迫切性，建議你先用優質股去增值，會較好。

若你希望60歳退休時，每月有3-5萬蚊現金流，以股息率6%計，你需要本金600-1000萬。

故你現時要做，就係透過一些有增長力股票(而非收息股)，去先累積起這筆財富。到足夠時，才慢慢換成收息股，去創造現金流，支援退休生活。

你上述提到的股票，都有質素，領展(0823)係合適。但中行(3988)、香港電訊(6823)、偉易達(0303)係收息股，增長力唔高，唔適合。

碧桂園(2007)，業務都算不差，但負債高，風險略高，雖然都可考慮，但不宜大注。

你現時無投資知識和經驗，對企業估值，點去定平貴未必會太了解。所以你最好先利用月供模式，去做增值，可以減低買貴貨風險，對你而言會較理想。

策略上，你可以投資「平穏增長股」和「潛力股」。你每月5成儲蓄，即是最少用$6000做月供。其餘先儲起，用一邊月供一邊儲蓄的策略。

選股上，你可以投資在平穏增長股，加少少潛力股。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

餘下的另一半現金，我地就等機會，當大市出現較大回調，就加大力度掃貨，然後作長線投資。

我假設投資回報有10%（連股息再投資），你每月投資$12000，24年後大約會增值至1300萬，故這樣安排相信很大機會達至你的財務目標。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22381-Q22400）

Q22381：

你好啊龔成老師，我現時係一個中五學生，我好希望可以得到你嘅幫助

我今年啱啱18歲，因為家庭環境問題，一直好想快啲賺多啲錢，因為咁我好快就踏上咗買賣股票，大半個月前我因為貪心，無經驗，

心急咁買咗美團嘅認購證，我好蠢咁擺咗成世人儲曬嘅錢落一隻股到（～35000），果陣頭兩日賺4000好開心，但第二日開始每日跌，跌二千，二千，三千幾，一萬幾，

跌到宜家我差唔多輸咗8成（～30000）我唔知點，

我心態好崩潰，好後悔自己貪心，明明畫圖分析咗佢跌，自己又唔肯走，仲覺得佢會升返，我宜家唔知點好，你可唔可以指導下我

龔成老師︰

首先，同學仔你對投資理念，存在一個好大誤解。你現時成個投資模式，都係同一般散戶一樣，犯上同樣，而且致命的錯誤。

其實我20年前，都做過同你一樣的事，短炒、炒孖展、炒衍生工具，輸左幾年我先識醒，後來發現全最賺錢的投資者、基金經理，只用一個方法「長線投資優質股，買股票就是買企業」，我就改變策略，長線投資，之後就賺多過輸。

你要好清晰一個投資"重點"，我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒股票或者輪證，去賺差價。因為短線股價會受市場氣氛、資金流向等，與企業質素不相關的事情影響。這些因素，我地係不能估計。

但長線，企業價值會係股價上展現出來。因此，優質股你買入後，長線持有，讓其自然增值，永遠都係最有效的財富增值方法。

我明白你家庭問題，需要盡快賺多D錢。但你要明白投資增值，係一件長線的事，你唔好預佢對你短期財務，有任何幫助。

全世界投資最叻，最賺錢的巴菲特，佢會唔會做短炒。佢只會叫大家，長線持有有質素股票，等佢地自然升值，達至財富增值效果。佢自己身體力行左幾10年，去證明這件事係行得通的。

所以，我建議你放棄短炒。現有的輪，就全數沽出，當買左個經驗。同時要認真去學好投資，之後才再出手。你可以睇我架《80後百萬富翁》、《財務自由行》和《股票勝經》，都適合你。

------------------------------------------------

Q22382：

老師 ，我現時的資產分佈如下

股票 36%
現金 23%
等跌市 41%

請問現時配置ok嗎？（因為我冇物業，所以比較簡單）

我現時總資產約85萬，首期都比唔起，所以冇諗過上車，只希望靠股票儲到多啲錢可以三年後移民

雖然有啲渺茫，因為我計過自己三人家庭，6年洗費都要2.5M。但移民係我短期目標，香港生活真係太壓迫了。

而且我曾經在英交流半年，我有信心可以適應嗰邊既生活。我每一日都會想像我喺英國冇咗姐姐、自己又冇工作能力又要湊住個（三年後六歲）囡搞唔搞得惦

答案係：未得

所以我比三年自己康復、去說服身邊既人我可以

請問老師你對移民英國有什麼看法呢？應該要有幾多錢先夠？

龔成老師︰

現時大市在合理區，股票佔比重，去到5-6成都係可以。你可以用分注形式，再慢慢加大翻股票佔比。

但若果你係好大機會在三年後移民，時間不算好長，我會建議投資選項上，要保守少少，以平穏增長股為主。

以下平穏增長股，都係有質素，現價都在合理水平，可慢慢分注。但緊記我地組合要平衡，個別企業和行業，不要佔組合15%和30%以上，以免出現過度集中性風險。

至於移民部份，每個人都有不同考量，有的為工作、有的為教育、有的為改生活模式。最重點，係你明白你目標係想點，而這個新地方，係未來長線係唔係可以做到，你心中所想，咁就可以。

但由於移民去新地方，好多野都要重新配置，所以資金係好重要。到時你要優先留有一定現金，去先處理好生活事宜，到一切都安定好，才好再諗投資。

在你打算移民前半年倒，你就要開始慢慢沽出股票套現，唔好等到要用才一次過沽，以免回報受價格波動影響。

至於要用多少錢，你要睇翻自已計劃，衣食住行各方面開支。因為每個人都有不同，單係住在不同英國城市，個租金和樓價，都可以有好大分別，故好難話要幾多才足夠。

所以，你要先計劃好，自己移民的落腳地。再去了解翻這個城市生活和住屋水平。由於這是個新地方，會有不少額外開支，故你要預鬆D。生活費用上，最少有半年儲備，才算理想。

------------------------------------------------

Q22383：

多謝你不斷提供正面資訊俾我哋，成日都覺得投資要盡早開始，自己本金唔大，成日睇住股價上上落落，短炒咗一段時間，真係輸多過贏 好後悔好後悔。

而家睇緊老師你出嘅書，龔老師啱啱聽你咁講，先增值後享受，有正如所講長線投資一定會有回報，我想問你個意見，我同先生月入大約四至五萬 ，正因為而家有兩個小朋友讀緊小學 開支好大 儲錢亦唔多

如果我手頭上有一間價值六百萬嘅樓居屋 係自住嘅 大概仲有一百六十萬未供完。因為短時間都升值咗好多 都算係人生第一桶金

你覺得能唔能夠賣出然後用二百萬至三百萬長線去投資 然後自己租樓住五至八年。咁到五年或者八年後 咁樣財富增值 係唔係一個好嘅選擇？

但如果最後升值唔多，有機會而家住緊嘅屋都會再升，但如果我唔用呢個機會 根本就冇辦法 拎到現金去投資

以上是我之前同你提及的方案

如果我真係賣出層樓，利用一百萬收息，例如電燈。一年都大概有70,000至80,000利息，咁樣可以蓋過租樓開支，然後剩返二百拎嚟投資，選擇一些有潛力的， 你覺得咁樣大概等幾年後收成，

我希望能夠右手上嘅300零萬，可以變到500幾萬 ，幾年之後再買返樓，目標希望可以買到600-700萬600呎新界私樓， 而且可以製造多啲現金流！

如果萬一有風險嘅話，咁就可能選擇買返一啲納米樓。

因為如果唔用呢個方法，我同先生每月嘅收入 就好似變成入不敷支，根本唔可以令資產再提高。

龔成老師︰

我自己唔係太建議你，沽出自住樓去投資。因為你會變成處於"沽空樓市"狀態。表面上，你計劃係可行。

但實際上，當個貸款息率上、租金持續向上、或者樓市升幅跑嬴股市，都會令你計劃失算。

我建議你自住樓部份不變，如果開支真係無任地方可以減少。你地睇下有無可能做些網上小生意﹐或做些兼職，去增加收入。最終可以做到，每月有一定資金，去做投資增值。

如果都係唔可行，你最後方法，就係去加按。現時仍處低息期，加按是沒有問題的。

但你要睇翻自己年齡，可承受的風險程度。40歲總負債大約可佔總資產7成，如果50歲就5成好了。

現時按息不高，將資金買入其他資產，創造更高的回報。但要新資產產生的利息回報，一定要比加按的利率高，這樣才值得做。

最好有比較明顯的息差回報，這樣才能抵銷加按後，加大負債為你所帶來的風險。因此，你加按前，最好先計劃如何分配新資金，如何平衡風險。

投資於股市時，相信中低風險會較合適，公用股、內銀股、收息股、房託等，都可考慮，策略為長期的增值及收息，期望股息回報大於加按利息，這樣就值得做。但絕不建議炒賣等方式投入股市。

同時，你要明白加按表面上無本生利，但實質有風險的，你負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。如果日後加息，又或你收息股的派息減少，都會令你得到的息差回報收窄，你的回報會減少。

若你覺得以上風險，都係你可以接受範圍，你才好加按。

另外，我地投資物業時，緊記唔好投資納米樓。因為佢呎寸太細，連一個基本家庭需要(約300呎)都做唔到，投資價值會係比其他較大樓盤，弱好多。

------------------------------------------------

Q22384：

龔老師，我有事想請教。我之前聽你教導每月月供股票，現約有約：

1）40萬股票
2）另有20萬基金
3）及約10萬現金

我想用林鄭plan買一層約500萬，209呎開放式住宅（20年樓）住宅作投資用途，但要將手上全部股票基金放曬。這樣會否太高風險？

請指點迷津，感激。

龔成老師︰

我地財富組合除左要有增長力和質素外，平衡性都好重要。若你盡沽優質股，去買物業，會令你組合偏晒去物業類，因而產生風險。

最理想係，買物業之餘，可以保留一定優質股作增值，才算平衡。除非你發現的物業，明顯係旬盤，現價又好有值博率，才好考慮。

再加上，現時整體租金回報率唔高，從投資角度，投資優質股會較好。

另外，係你將來購買投資物業時，緊記要買一些最少有300呎的單位(能滿足一個家庭需要的大細)。單位太細，其實投資價值會被打折扣。

------------------------------------------------

Q22385：

阿sir 之前8.15開始入3918，分段入，入到開始懷疑人生，而家平均買入價係7.16

每一次佢再跌我又睇一次佢既負債，現金流，財務數據，仲有佢既專營權，有冇咩壞消息，相信係短期，再入。不過而家話全球疫情會反彈，相信又要再跌。

想問下佢跌成咁我有冇miss左啲咩風險？新興市場，較受中國旅客人數影響，比澳門賭股有風險我都了解。

另外，我理解呢類股注碼不能去得太盡，而我入下入下都變成一隻持貨較多既股，但佢大平賣我又真係想再入，我既步署應該點調整好？

多謝阿sir，正當全城人妻都睇緊mirror，我老公就話，你又睇龔成（仲要無樣睇）@@我同佢講睇龔成係唔會導致我地婚姻破裂，相反係為左我地既將來努力😆

今晚進階班見

龔成老師︰

金界控股（3918）其實佢本質，無大變動。正如你所講，佢較大風險係新興市場，故一定不能大注。

雖然佢現價已經係合理區中下，好似好抵。但你過度加注，表面上拉低平均價，實際上係加大左成個組合，投放係高風險項目的資金，咁係唔理想。

如果佢已佔你一定比例(組合5-10%)，但停一停，再平都唔加注住。

現時佢一直跌，最大原因係疫情不明朗，特別係一些發展中國家。因此，你預佢中短期一定會好弱，但長線質素係依然存在，持有係無問題。

------------------------------------------------

Q22386：

龔sir, 你好。上完堂之後買了好多你的書，好有用，令到我更容易明白你的堂課。因為一直以來我好相信你加上你無論上堂及sms都好有心及好誠懇。

所以好想請教一下，你可以給意見我嗎？

現年60，計劃退休年齡想5年後，但唔想完全不工作及0工作收入，如果現在先學定開網店，待退休後的工作及生意，你認為可以嗎？

Facebook 見到有廣告講網店，但教學費大約要hkd8000好耽心能否學以致用，所以想聴下老師意見及有冇推介？

現仍在月供股票中，想加多1只3188，你點呢？

最近見152（有10000股）但跌好多，請問點解既？

見388, 700, 9988 跌中，如想入，請問合理價約幾多？好感恩遇到老師，感謝你的幫忙分析，辛苦晒也謝謝你。

龔成老師︰

我覺得可以，你可以把握退休前的5年，去學習和嘗試網店經營模式，去找出一個最適合你退休後營運的方法。

至於這些創業堂有無用，我就唔係好知。但你記住，「價值」最重要，「價格」是次要。

其實，只要你從你的興趣、強項、認識的事著手。例如你本身對某類產品很有興趣，你會在那裡買？如果你在網上買這產品，這個網站的模式如何？

你最初要有學習的對象，你先尋找一些自己認為不錯的商店，了解一下佢地的商業模式，最始好大型及小型都有，先以小型作學習對象，然後就試下佢地的模式，能否成為你創業的方向。

你最初創業，就係摸石過河，一路做，一路修正，然後再一步步發展。記住，最好唔好做得太雜，要專注在某一範疇，等人容易記得你。

另外，你可以睇一些創業書本，可以到坊間找找「XXX創業」之類的字眼就得，另外可睇有關猶太人生意經之類的書。但你要緊記，創業係唔易，好多事都係摸石過河，慢慢從經驗中修正。

而且，成功與否，最大關鍵位唔係你能力，而係你能否堅持。加油!

至於投資方面，近期大市氣氛較弱，故不股票都有明顯回落。但我地唔好用股價，去判斷一隻股票有無持有價值，我地要睇佢本質。

深圳國際（0152）本質無大變，你照持有收息就可以。

但華夏滬深三百(3188)、阿里(9988)、港交所(0388)、騰訊（0700）都係潛力股，唔係咁適合你年紀，如果係你女兒投資，咁就可以。

現價都在合理區中上至頂位，可分注。除了港交所(0388)較貴，要回多2,3成才好考慮。

------------------------------------------------

Q22387：

阿sir (1810)應該咩位入

老師 你另外個4本我都訂埋。可唔可以講一次我知 13本書個順序要點睇？

我宜家睇緊股票勝經

龔成老師︰

小米(1810)$24合理區頂。

但如果你現時完全無貨，現價入一小注先，都係可以。

你可以先睇我架《80後百萬富翁》、《財務自由行》和《股票勝經》，都適合初學者。

之後，如果你想了解多D有關企業估值，可以睇埋《選股勝經》和《年報勝經》。其餘幾本，你按自己興趣去睇就可以。

------------------------------------------------

Q22388：

龔老師你好我有個問題想請教你一下。有些股票係有股息分配，理論上是否我衹要在分紅之前一天，擁有該股票就有權分到每股的紅利?

如果是的話噉，每一個人衹要係分股息之前買入，賺股息之後賣出就可以賺到股息。

這個概念是否正確?

龔成老師︰

你對派息運作，似乎有點誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在此期間因買/沽貨，出現任何著數。

------------------------------------------------

Q22389：

謝謝老師。另外想請教一下微盟集團2013。我看見它2018 的總負債遠比總資產多？我不太看得懂發生了什麼事。是會計上的計算問題嗎？正常應該破產了吧? 謝謝

請問老師怎看6123圓通？

老師晚安，不好意思想問一下1070 TCL 股價現在是不是已回到合理區？

龔成老師︰

因為佢2019年才上市，在上市集資時獲得大量資金，故2019年資產比2018年明顯為多。由於2018年未上市，以一間開發中公司，總負債較多都係正常。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。只可以話，這類股小注持有不是不可，但要明白風險因素。

TCL電子（1070）全球最大的電視生產企業之一，其產品銷售遍及全球各主要市場。

集團本質不差的，業務穩定，生意不差，有持續的盈利，不過，過往的增長力就不算強。

負債偏高會係一個扣分的地方，以現時估值來說，可說是處合理區的範圍。

------------------------------------------------

Q22390：

我朋友一直叫我改玩美股代替港股，話港股已冇得買，但本身美股一d概念也沒有
請老師請教

龔成老師：

我地投資，最重要是建立一個優質股組合，中國、美國，都是往後20年最強的兩大經濟體，我地在當中選股，點都唔差。

所以，你可以考慮配合投資，不過，不要認為港股玩完。正如我在2003年，聽到大量分析話香港樓市玩先，人是好表面的，我地要睇長期。

正如我持有的比亞迪（1211），港股，都升左10倍，過往跌到最低時人人話無得玩，但多年後就大升。

------------------------------------------------

Q22391：

龔老師，你好～我今年35歲，女，與父母同住，有62萬做了定期，會2023年到期。而股票是在今年六月才開始投資股票，現在有18萬在股票上，而現金只有10萬。

其實已經有一年多沒有上班了，原因是被診斷出我的腦部有一個先天缺陷，雖然已經經過一年多時間的治療和復健，康復進度理想，但始終影響了我半邊身的活動能力，

無論平衡力、腿部活動、手指活動能力、閱讀、寫字、表達或迅速反應的能力都受到影響。

但好在我是在大公司內工作，他們都具有一定的社會責任，仍然保留職位空缺給我，如無意外我將會在下個月復工。但人工相信將會下降至等同一個剛畢業生，

因為我的工作能力已經不及從前⋯

我估計自己將來的工資會是12K-15k左右，同時，我一直需要每月有1萬元給家裏作供樓用途，因此在這情況下我無法累積新的現金。

所以希望請教一下你，在這情況下：

1）我可以如何更有效地滾存現有的資金？

2）而我現有的投資組合有需要作出調整嗎？

同時，非常期盼你能來澳門開班，讓我能夠學習如何有效地增值財富。我已經買了五本你的書籍，但礙於現在的讀寫障礙，需要很長時間慢慢的閱讀，

期盼疫情過後能夠出席你的課堂。

00388 - 100股 $462.2
00823 - 200股 $75.3
01810 - 800股 $26.55
01928 - 400股 $29.6

02382 - 100股 $234.4
02800 - 2000股 $28.6
02845 - 50股 $154.1
03067 - 400股 $15.365

感謝你的寶貴意見

龔成老師︰

1) 你現時股票，都係有質素和適合你年紀，你照長線持有。但由於你本身健康因素，我建議你現金部份，留來備用會較好。

如果現時生活上未能儲錢，就唔好勉強去增加投資。到你身體狀況轉好，或者財政上較鬆動，才再考慮。永遠我地都係生活和健康行先。

至於你62萬定期，由於佢息口唔會太高，你可以將佢用來投資。至於投資目標，以你年紀計，應該係潛力股和平穏增長股。

但如果你每月收入，都未必能支付你基本開支，而這個情況，你預期係較長線，你可以用這筆錢，去買入一些收息股，目標係5-6%，大約每月都可以幫你創造$2500-3100現金流，去舒緩你每月開支。

潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）

平穏增值股︰指數基金、港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

2) 暫時無需要，當然如果你有需要加強每月現金流，你可以將部份持股，換成收息股，都係無問題，緊記照顧好自已生活，永遠都比投資增值係優先。

至於澳門班，因為現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q22392：

龔成老師：我的港股處於蝕錢階段，想請教你我應該如何做。

以下是我的持股:

9988: 平均價250，持300股
941: 平均價47.8，持1000股
939:平均價6.15，持10000股
883:平均價8.76， 持6000股
700:平均價685.75，持300股

388:平均價544，持100股
11: 平均價152.58，持200股
1038:平均價45.03，持500股

其實我想買英國樓，但D現金係股票度。謝謝你的指教。

另外，我亦有買了108股Tesla( 平均價為666.7），手持大概400,000港元現金

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持股都有質素(港股和美股)，但有少少亂，不同種類股票都有。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

如果你係年青至中年，0941/0939/0011這類收息股，就不宜持有太多，因為始終增長力較弱。相反，你係近退休之年，你投資上就可以集中係這些收息股上。

另外，中海油(0883)係商品類股票，價格自主力能低，質素只算中等，不宜持有太多。

現時大市只在合理區，未算係好平宜。你現有40萬現金，建議先儲起，等大跌市出現時，才動用。

至於是否買英國樓，你可以睇翻你有無實際需要，若有實際需要，你可以分段沽出部份股票套現。

如果只係為左投資，你就要考慮翻佢回報率是否吸引。以過往港股長線波幅，都大約有8-10%(連股息再投資)。如果你覺得都有這個數，你對相關物業、法規、市場等又有一定認知，你都可以考慮。

------------------------------------------------

Q22393：

龔Sir，你好，我今年50歳，有自往物業，現金一千萬，請問現在買樓收租好嗎？樓咁貴，仍有升值潛力嗎？謝謝你

龔成老師︰

從投資角度計，現時租金回報率不高，投資在股市，值博率會較好。而且，你本身已有一間物業，我建議你先用優質股增值，從增值角度或資產平衡性計，都會較理想。

以你50歲，可以選擇一些「平穩增值股」作投資目標。

以現時大市合理區狀況，你可以用200-300萬，以分注形式，慢慢買入以下優質股。餘下資金，我地就等大跌市，才加大力度入貨。

但由於你資金都較多，長線你都應該再加持物業。但現時先用優質股增值，到將來樓市有明顯回調，或你在期間發現優質又平的旬盤，才再去加注物業市場。

------------------------------------------------

Q22394：

龔老師你好。我今年23歲，是一位大學生，每月大約有4000元港幣的收入請問我可以怎樣投資在30歲前達到100萬的資產？

還想請教老師，母親今年48歲，有45萬元的現金，請問可以怎樣投資？

感謝你！希望得到您的回覆

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時23歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。你每月5成儲蓄，即是用$2000做月供。其餘先儲起，用一邊月供一邊儲蓄的策略。

餘下的另一半現金，我地就等機會，當大市出現較大回調，就加大力度掃貨，然後作長線投資。

假設投資回報有10%（連股息再投資），你每月投資$4000，30歲時大約會增值至45萬。雖然好似同你目標，有好大落差。但你很年青，收入增長力較高，你可以慢慢加大月供金額，以達至一個可完成你目標的水平。

至於你媽媽，由於佢已經係中年人士，投資要比你保守，只宜集中係平穏增長股身上。

現時大市只是合理區，你現有45萬資金可以先投入10-20萬，用"分注"形式，慢慢買貨。餘下資金，就等大市出現一定程度的下跌，才大力度掃貨，然後長線投資。

------------------------------------------------

Q22395：

龔sir, 你好!想問一下 偉易達 (303) 用市盈率估值法 or 用股息率估值法 比較好?

我用客觀方式用市盈率估值法(用五年數據: 市盈=11.88 至16.42, EPS=$6) 計到合理範圍$72至$99, 我的計法對嗎?

謝謝回覆!

龔成老師︰

其實2個計法，都係可以，你可以互相配合，去得出一個較立體估算。

市盈率你可以拿長少少時間，用10年個計法，去找出市盈率合理範圍。而EPS係正確，大約係HKD6。

但你計算後，你會發現個合理範圍較窄，你記得要加入緩衝區，對相關估值進行調整。

若以股息率計，佢達9%。但由於佢股息較波動，加上企業質素唔算好高，大約算係合理區底部。

根據2種分析，此股現價大約在合理區較底至初步平宜區。如果你目標係收息為主，加基本增長，此股可投資，但不能太過大注。

緊記，我地估值法有好多種。最理想就係用不同估值法，去立體得出一個答案，咁會較為穏當。

------------------------------------------------

Q22396：

老師︰微盟 11.32入左
9666 57.25入左
2400 62.5入左
493 1.7有49000股
巴巴 276 入

應該止蝕定溝貨，謝謝

龔成老師︰

首先你要正確了解翻，加注這個概念。我地決定加注與否，要睇幾個因素。但記住，絕對並不會是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

你現有持股，大多有質素。但金科服務（9666）、微盟(2013)、心動公司(2400)不確定性較大，只宜小注。。

而且，你持大部份都係科技相關行業，有過度集中性風險(個別行業不應佔組合3成以上)，就算再平，都時不宜加注。

國美零售（0493），從過往分析，質素只是一般。

企業連續出現虧損，品牌價值遠不及從前，優勢不強，雖然正加強網上網售網絡。

唯一的賣點是創始人黃光裕回歸，可能帶公司變強，但發展仍有未知數，如果以這刻的業務、發展、現價，整體的投資價值唔算高。

當然黃生可能帶領公司變到好唔同，但這點真的無得計。以理性分析，這刻投資值博率，只是一般。

因此，你以上股票可持有。但考慮到組合平衡性問題，建議你新資金，優先投資在科技類以外股份(而非在現有股票加注)，去令組合更平衡，才是理想做法。

------------------------------------------------

Q22397：

龔老師，想請教一下投資策略，本人現時48歲，沒有物業，存款有100萬，另每月可供$5000。請問我該選什麼股，ETF, REITs 呢？香港或外國都可以，可以教我嗎？多謝

我的計劃是買
$30萬（2800）
$30萬（2638）
$20萬（0066）
$20萬（0002）

每月供
$2500 美國（VTI)
$2500 加拿大 （Riocan)
請指教

龔成老師︰

以你48歲計，都有一定財富增值需要，但進行時就要保守少少。

你現時月供計劃，其實都已經可以。但RIOCAN係專注於單一行業，有少少集中生風險，我建議更改為$3000 VTI和$2000 RIOCAN，咁會較好。

另外，現時大市未算平，每月要留有一定現金，去等大跌市機會出現。

至於直接買入選股，都係可以。但同樣現時港股只在合理區，你可以先用一半資金，分注咁慢慢儲貨。餘下一半，就等大市有明顯調整，才慢慢加大力度入市。

以下是一些都適合你年紀的股票，除了ETF和REITS外，我都比埋一些單一企業的優質股你作參考。

平穏增長股︰VOO、盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

------------------------------------------------

Q22398：

龔Sir你好，我追蹤咗你嘅FB一段時間，好多謝你無私付出。我第一次問問題，希望你可以撥冗回覆：

我$14入咗6000股微盟（2013），我有持貨能力，但考慮到騰訊和阿里合作平台的消息，是否會影響到微盟長遠的賺錢能力，還可以長期持有嗎？謝謝你。

龔成老師︰

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。

至於，騰訊和阿里合作消息，其實好多具體細節，我地都唔清楚，好難咁快判斷成件事，是好是壞。

只能說，此股中短期股價，一定會較波動。如果6000股佔你組合不多，你長線持有就可以。但若佔較大比重，你可以考慮沽出少少，去平衡一下風險。

------------------------------------------------

Q22399：

龔老師你好，你給予大家既意見好中肯，你寫既書都好有啟發性，多謝你分享咁多！

我自己最近有啲野念極都念吾明，所以想向你請教下啲睇法。6988樂享互動，營銷SaaS服務的定位，我覺得前景吾錯，公司有錢賺，但股價就未有反映出嚟！

我3.1入，現價2.6，我想知我係咪應該繼續持有？

麻煩老師解答，感謝老師！

龔成老師︰

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長，但佢估值一直都唔平，你買入價都算係偏貴水平。

就算現時回落，都係合理翻D，未算平。此股你預佢中短期，都係較波動。如果你持貨不算多，可以守住先，再觀察。

------------------------------------------------

Q22400：

Hi 老師，-我想問家人有20萬現金 在股票市場應該如何分配？

-現時有：

$2.4買入1萬股中國銀行，$13.5 買入3000股中國人壽 需繼續持有定沽出？

-佢地半退休狀態，希望將儲咁耐的現金流，變更多金錢。為未來退休做准備，謝謝你

龔成老師︰

若你家人已進入半退休狀態，穏定現金流去支援生活開支，會比財富增力為主要，所以配置上，會較以收息股為主。

中行(3988)係唔錯收息，可持有。中國人壽(2628)有增長力，但質素只係算中等，近年賺錢能明顯弱左，不宜持有咁多。

未來組合，建議一半用指數基金，可以為組合帶來股息之餘，都有平穏增長力。

另一半，就係收息股。目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時大市只係合理水平，現金佔比重大約3-5成，你可以再投入多少少資金，去分注入市。餘下資金，就等大跌市出現，才加大力度掃貨。

但留意一點，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22281-22300）

Q22281：

龔成老師你好，我現有[email protected]大概佔我45%既股票
呢排再跌因為其下衞星場鑽石娛樂場停運
長遠黎講係咪都唔需要太擔心?

而家再跌,應唔應該再吸納呢?
先多謝你既意見!

龔成老師：

對佢會有中短期不利，但長遠，仍是有質素的。澳博控股（0880）有質素的，雖然中短期有點弱，但長遠無問題，仍是一間不差的企業。不過，你單一股佔佔45%，是高風險！

你要在反彈時減持，去翻佔股票組合比例15%以下較穩健。

------------------------------------------------

Q22282：

老師，請問建設銀行仲值唔值得長揸？

我6.07買入，萬咗2萬股，打算收息，但佢最近不斷跌，，目前應該係繼續持有定止蝕？ 應唔應該趁依家低位再吸納？謝謝

龔成老師：

建行（0939）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。不過，初步已好轉，但不是高增長型。

而長遠，會慢慢穩定的，不過，增長力不強。

你有貨可持有，如果目標是收息，可持有。但如果你想增長，就未必適合。至於是否加注，要睇這股佔你組合比例多唔多，以及你的投資目標。

------------------------------------------------

Q22283：

請問522同6869, 285 那一隻值博率高的，6869已經就快52週低位，請問此刻價位是便宜區嗎？

請問2158醫渡科技幾錢可入，現價都是略貴嗎，幾錢為合理區，因上年都要3x ,現在已接近

請問1833同2158比較，邊隻優質的呢

龔成老師︰

唔好用"52週低位"這種短炒分析，去決定一隻股票平貴。我地應從佢質素、行業發展、財務狀況等，去做估值。

因為過去股價，未必有效反映今天狀，特別係企業本質已經有改變，或者行業已有一定變動。你用過去股價作評估，好易出問題。

現價值博率計，現時長飛光纖光纜（6869）會較高，算係合理區。但佢質素有少少質轉弱的情況，唔建議大注。

而質素上，比亞迪電子(0285)會較好，但現價偏貴，回到$40以下，才好考慮。

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

之前貴，現價算是略貴，最好回翻多D先考慮。

至於質素上，平安好醫生（1833）會好少少。現價算合理區頂位，最多只宜小注，或可以用月供去儲貨。

------------------------------------------------

Q22284：

老師，如果買樓，以下地區應該選那一區，我打算自住:

1. 荃灣區
2. 元朗YOHO series
3. 屯門瓏門
4. 將軍澳中心
5. 康城
6. 深水埗四小龍

Burget大约700-800萬, 想買較新樓齡, 地鐵上蓋/交通方便, 未來1-2年要BB, 所以希望有400-500呎, 以上選擇那區較好? 或另有建議嗎？

如考慮借按揭, 借幾多成會較好? 你建議男友將所有積蓄放晒落首期, 之後月供較輕鬆(但就冇$再做其他投資), 你建議借幾多成?

龔成老師︰

地區上，其實現時投資價值差唔多。但將軍澳這個典型的住宅區，雖然現時缺乏就業機會，投資價值較中等。

但未來交通配套會日漸完善，如將軍澳跨海連接路日後落成後有助改善交通，利用跨海連接路及將藍隧道，10分鐘便可到九龍區，會提高了這區的價值。

一般來說，市區的長遠價值會好D，荃灣區、四小龍算是這類。

但由於係自住樓，我建議你從生活角度做主要考慮。你要睇下邊個地區和單位，較配會你餘下幾年生活需要，又有一定投資價值(至少同大市同步)，就可以考慮。

現時按揭息口低，我建議盡借。用空出來資金，做投資增值，效果會較好。

------------------------------------------------

Q22285：

老師老師

7.8入1177
$28入1810
$44入左941

近日跌左我應再入D貨定唔理佢？？因我聽你講睇長線的

我仲有0001都係想長線收息的，現在佢又係跌左，其實現在咁嘅時世，應該點儲錢？？？唔通儲金？？

龔成老師︰

只要佢地長線投資價值不變，你照持有就可以。但是否加注，要睇佢平貴水平。

中生(1177)和中移動(0941)現價合理，但你已有貨，再等回多10-15%左右，才再加注會較好。

而小米(1810)現價依然略貴，回多1,2成才加注，值博率會高一點。

長和(0001)都有質素，但已經好大間，增長力唔會太高，但用來收息係無問題。現價算合理區中上部，可分注入貨。

但再提你一次，我地投資選股，會因應年紀和風險承受力去做決定。

中生(1177)和小米(1810)係潛力股，若你較年青，持有這類股票係可以。但若你較近退休，這類波動性大的股票，就不太合適。反而中移動(0941)這類收息股，會較適合。

而長和(0001)有平穏增長力，再加一定股息，基本上你是任何年紀，都可以考慮。

------------------------------------------------

Q22286：

1. 龔老師，收到你的回覆，好感動啊！我因為股市下跌好擔心提早退休的計劃受影響，心情極差。我這個人比較重感情，買香港寬頻，不買香港電訊，

是因為之前個女在那裡上班。太傻了，對嗎？現在，她剛轉工了，哈哈！

請問老師我現價應該加注嗎？我上次入了10000股。

我放工去港島可能太趕，請問上課地點會去九龍嗎？

2. 當然，退休後就不是問題。老師，我擔心的原因是公積金1半放股票，而且2成是2星期前才加碼的。其實，因為我從未投資，所以目前計劃是一半錢留俾基金經理繼續投資，

選均衡組合，其中一半全球股票，另外債卷等。一半由自己購入本港的收息股，當然分段購入，以候理想價格。

請問老師認為以上計劃可行嗎？基金經理JP Morgan, Fidelity 之類收費年息1.25%，你覺得我應該花這筆錢嗎？

靜候老師的寶貴意見。非常感謝！

龔成老師︰

1) 明白，但投資唔好太感情用事，我地真的要理性分析。可能你個女從工作角度，係一個好公司。但從投資角度，又可以能另一回事。

當然，香港寬頻（1310）投資價值都不差，你照保留用來收息，係無問題。現價合理，但若佢已佔你組合一定比重，就唔好加注住。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

至於上課地點，暫時都係香港島個邊，但我間中都會開星期六班的，通常一年開1、2次，星期六下午時間。

下次可能在今年年尾。你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

2) 其實你已快要退休的話，所以投資都應該係相對保守。股票上，我之前提過的收息股，係適合你的選擇。

基金方面，都係一些收息型保守基金會較好。但由於基金有一定管理費，所以我比較建議係自行買收息股。

如果你唔識選擇，你可以買一籃子收息股的ETF，X恒生高股息率（3110）。它是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合。

而債券，都係可以，但必須係一些A級債券，才好考慮。

------------------------------------------------

Q22287：

呀Sir～ 我沽出了0968～我相信佢係潛力股，我本人對太陽能發電有好大興趣，但佢價位太浮動，我年紀係大，但心智未夠定，所以用呢筆小資金準備購入一手2800

好彩得你鼓勵，我身邊有好多人都覺得女性一到左32歲就年紀好大，潛移默化都令我覺得到左呢個年紀又結唔成婚，事業又無起息好失敗⋯⋯但自從過左期之後

（好多凡人都定義女性過左30就是過期，所以我初頭都咁諗，所有野都想趕在這條線完成）過左期後，好多野都看開了，其實仲有好多路可以行……天無絕人之路，

(現在首要做的就是養活好自己同我屋企人）但我相信根據你的方法⋯⋯就算係無咩天份⋯⋯都可以從衣食住行裏找到優質股，當初就是睇中中電公用股的特質，係價位74左右買了，

令我生活質素改善了。現在都堅持番工帶飯，不知不覺都帶了十年飯，就算比人笑我寒酸也不怕，都好過貼錢買難受，係咁嘅時候都仲帶到歡樂比人……哈哈

好彩我樂天，仲練到我面皮厚左。我一定要努力，就算感情上我是個失敗者（其實係我問題，男方對我都算唔差，係我當時太任性，同比左太大壓力大家

我仲衰花心，同其他男性傾計，係我唔啱）能夠找到可以相守的人很難，大家一齊加油!

Sir ~ 我成功購入一手2800! 好野

Sir 的書成功入手你本80後。

龔成老師︰

現在已經是2021年，唔好再比D固有舊思想影響。好多事情，其實唔會因為年齡，而出現限制。有時個限制唔係人地比，而係你比自己。所以，放開點，好多事件自然可以做到。

同埋，有時我地做野，係為左對自己有個交代。所以，有時唔好太介意人地點睇，因為只有你自己，才最清楚自己做緊乜。

信義光能(0968)係有質素，但佢波動性係較大。若你風險承受力較弱，換成盈富(2800)都係可以。

就算再優質企業(包括2800)，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

至於感情，是一個需要終生學習的課題。過去的就過它過去，吸引經驗，保持正面，自然就會有好事來。

還有，多謝你支持我本書。睇完之後，你可以先睇埋《財務自由行》和《股票勝經》。因為這3本，會係較適合初學者。加油!

------------------------------------------------

Q22288：

我係澳門既粉絲呀！對你既課好感興趣，唔知你會唔會考慮開網課呢？

我都想問下老師呀，因為我係有私人因素一定要賣左依家既自住樓，咁我賣左之後假設我會拎100萬去投資，咁剩低既錢我係咪可以買番間細樓做自住樓呀？

但會唔會供唔到呀？因為我人工唔高，還是租住屋先？謝謝老師喔～

龔成老師︰

網上課程，我暫時唔會考慮。因為只前都試過有人盜錄，比較麻煩，所以暫時只會開辦實體課程。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

每個都有自主需要，由於你終極目標的物業(900萬)，相較你現沽出物業(480萬)係有一段隔離。你可以先買入較細物業自住，另一邊用優質股增值，再去細屋換大屋。

至於會不供唔起，你要睇翻你個新物業價錢。你比較年輕，人工未算好多。可能你要預留較多資金，去比首期。

當然，另一個方法就係先租屋，再用套現物業的資金，去投資優質股增值。但這個方法，會令你財富組合，偏重晒係股市，風險會略高。

我會較建議用細屋+優質股的增值，因為這個方法會較平衡。

但緊記，這個細屋係用來將來換大屋，所以必需有投資價值，最少要做到跟大市同步。而且個呎寸唔好太細，少於300呎的單位，最好不要考慮。

------------------------------------------------

Q22289：

老師想請教你，如果我層樓7年前以$340萬買近屯市附近約460呎單位，依家升值$580萬，呢層樓近兩年放租每月收租$11500

我最近諗過因為層樓舊了27年樓齡，想賣咗出去攞d錢換另一層一手樓，資產增值潛力會否高d?定係一賣一買所花嘅費用更唔化算？

計唔計意比些意見我作參考

龔成老師︰

27年樓唔算話十分舊，但主要擔心會係到30年，會出現需要樓宇大維修時，這個成本上的風險。

係香港做物業買賣，成本絕對唔細。除非你現有物業，真係好有問題，否則你應維持現狀，保持以租養樓會較好。

另外，我一直都唔係太建議讀者去買一手樓。因為好多時都有溢價。變相令你買貴左，影響長線回報。

------------------------------------------------

Q22290：

龔sir你好，我26歲的，岩岩上星期7月5才開始真正開戶投資，係一個新手，之前有供一份儲蓄保險（供5年，岩岩今年1月供完，大約30幾萬），

大約一個月一萬三 人工左右，現在開了一個富途牛牛（入左18500）玩港股，sofi（入左25000）玩美股

以下是我持有既股

富途牛牛(18500本）
00451 2000股 0.355入
01725 200股 41.0入
01771 2000股 3.45入
Io. 美金25股 1.83入

sofi（25000本）
voo 美金5股 400.78入
apple. 美金3股 142.81入
dis. 美金2股。173.66入

因為之前唔識，左買右買已經蝕咗3000左右，想問我現持有股的因有d都虧損緊，我需要止損沽空，重新制定方向嗎？

還是應該再等這些股升？因現在比較迷惘是否需要將全部股賣走，重新制定下才再買？感謝

龔成老師︰

我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

協鑫新能源（0451）、恒達科技控股(1725)、新豐泰集團(1771)唔係全無投資價值，但質素只算一般，而且風險會略高，長線不宜持有太多。

Ion Geophysical Corp (IO)為技術中心的公司，其業務主要為全球石油與天然氣行業，提供地球物理技術、服務和解決方案。

本身規模唔算大，而且過往股價都好波動。佢這去數年，一直處於未有盈利狀態，加上近年營業額持續倒退。

可能佢面臨一些不利情況，佢唔係完全無投資價值。但不確定性好大，投資時最多只可以少少注。

其餘股票，都係有筆素，你照持有就可以。

其實你除左選股上經驗不足，令到買入一些較弱的股票外。我見你買入價都好多時係偏貴，這反映你定平貴能力，都係有所不足。

因此，我建議你未來時間，先利用月供模式，去建立一個股票組合，以減低買貴貨風險。

你26歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰VOO、盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰QQQ、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

如果你對這些股票，未太了解。我建議你先供一些指定市場的ETF，美股可選VOO和QQQ(後者風險較高)，港股可用盈富(2800)。到你有一定經驗，才買入其他股票。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，"保險"只係理財中防守部份，買足夠保障就可以，增值可以留比優質資產(如優質股、物業等)去做。現有儲蓄保可持有，但唔建議再增加這方面的開支了。

------------------------------------------------

Q22291：

你好，龔sir：本人今年35歲，之前都只是持有現金，關注你的F&B和買了你二本書，今年才初次投資股票。

現金：2百萬

儲蓄保險：20年期已供11年，一次領取可領40萬

一層樓：月供8千，貸款剩約1百萬

每月收入：8萬，二夫妻二個小孩。公司退休金：累積左50萬。每月需供養双方父母，所以能存3萬左右

持有股票26萬：
27 @61.6 *1000
1177 @7.38*4000
[email protected]*1000
[email protected]*1000
[email protected]*1000

[email protected]*67 月供2千
[email protected]*1000
[email protected]*2000
[email protected]*300

目標，50歲財務自由。 打算再投資20萬股票，應該如何配置，感謝關注。

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

現時你已經有物業類資產，現有資金，可以較集中在優質股，去做財富增值。

你35歲，應以增值為主，建議你用「平穏增長股」 + 「潛力股」作組合，去創造一個增值平台。2者比例，大約各一半。若你投資經驗較淺，潛力股佔比要下調至2-3成。

你現時持有的股票，都係有質素，你照持有就可以。但當中融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，同時明白這一定會令股價較波動，自己最好控制注碼。

現在你每月可儲$30000，但只月供$80000，有點少。我建議先用5成儲蓄做月供(即$15000)，其餘先儲起，用一邊月供一邊儲蓄的策略。

現時大市只是合理區，你現有200萬資金，如果無特別用途，我建議用來投資增值。

你可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

至於"保險"，其實主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

------------------------------------------------

Q22292：

老師你好，我今年35 ,有17200 股滙豐係手，帳面都蝕緊40 萬，最近考慮緊要唔要放左一半或全部，等跌市再入其他做長線投資，如買其他想問有咩建議，謝謝，不勝感激。

龔成老師︰

你現時狀況，存在2個較核心問題。

首先，匯控(0005)都算係有質素，但佢只係收息股，增長力唔會明顯。

而當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你35歲年紀，應該先做好增值，而唔係儲收息股。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

因此，從資產配置角度，你係需要沽出部份匯控(0005)，將佢地換至其他增長股上。唔係佢質素有問題，而係佢唔適合你，同時佢佔你組合比例過重，而造成了不必要的風險。

以下是一些適合你的增長股，你可以沽出部份匯控(0005)，轉至這些股票身上。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、粵海(0270)

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

平穏增長股，現處於合理水平，可分注入市。現潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22293：

成哥你好，非常讚你的資產配置網上課程。學到很多，特別是買樓置業個chapter.想請教一吓操作。

現時我自己的生意前舖後居，所以住方面的租金己包括在租舖的租金內。打算5,6 年後再買一層自住物業。

非常深刻你講過用資產追資產，所以我最近買了一個出租物業325萬，做了7 成按揭。首期90萬左右，租金回報每月1萬2千。

利息方面可以只供息不供本。年利率1.95% ，定息2 年，之後視乎市場息率而定。打算前三個月交給經紀管理，當交學費學做業主。之後自己管理。

這收入要交税20%，末計每年維修之類雜費。請問這個操作時可行嗎？

風險上，我明白如果無人租和利率上升的話，可以會由 "資產"， 變成 "負債"。

買原因是同區差不多的單位要差不多350萬。這區租盤比較短缺所以放租能力尚算高。

想請問成哥有其他風險或地方要注意嗎？這供息不供本可行嗎？

謝謝！

龔成老師︰

其實物業只要有質素，都是資產。就算因為加息，或者無人租，令到你短期負現金流。但只要佢長線有升值能力，我地都會視之為資產類。

現時計，租金回報率算可以。但你要留意2個問題，首先你個按揭只係頭2年定息，之後個息口跟市場。但所謂跟市場，到底會係幾多? 會唔會令你月供大增，造成財務壓力。

到時如果大增，你要轉按，會唔會有大問題? 你要計清楚。

第二，你現睇翻個單位，呎寸會唔會太細。一般我建議投資物業，只好有300呎以上，即一個家庭的最低要求，咁個投資價值會較好。

------------------------------------------------

Q22294：

老師你好. 這幾年一直有關注你, 叫做小有所得. 亦很感謝你於2年前的回答

大學畢業快2年, 目前有26萬存款, 5000股 1177, 1600股 3067, 月入17k. 預計10月後月入23k

1. 本身計劃約2年半~5年後結婚, 現在白表單人身份抽中居屋. 由於基本肯定只會有粉嶺皇后山的300呎以下單位, 老師覺得應否袋住先?

a) 想買的理由是樓價近年升幅太誇張, 300萬的樓用了5年時間就變成近600萬... 如果私人市場繼續用此幅度上升. 再過3年說不定就完全負擔不到了

b) 不買的理由是皇后山居屋並不算太優質 (雖然相比之下真的便宜) 目前一刻並沒迫切需要, 如果樓價升幅不算誇張, 將來完全有能力用購買地點和大小較為理想的物業

c) 個人想法是現在先購入, 將來有需要時一定有地方住. 而有能力的時候可考慮換樓, 雖然失去短時間內買入更佳物業的機會, 但似乎較為保險

2. 想知道老師對2182天長集團有何看法? 上市後很快就能派息. GP較高, 現金一直維持高水平, 口罩業務得到政策支持. 但同時擔心

a) 為買新廠房而作出的借款會拖累公司發展,

b) 太依賴單一顧客,

c) 市場流通小, 股權有點集中.

謝謝老師的意見!

龔成老師︰

1) 香港長線樓市，我預都係會保持上升。你可以先買入此物業，用以資產追資產，去保持增值。

我地買居屋，都有一個好處，就係可以比市價較平的價錢，買入單位。從而空出較多資金，作投資增值。

但你要明白，這居屋單位，位置唔算吸引，投資價值一般。加上你將來轉手，你係要補回地價(除非賣翻比綠表或白居2)。而且，都有一定買賣成本。

到底係先購入居屋，定先用優質股增值，等遲些買較理想單位，其實無一個必然答案。

但現時從投資角度，股市會比樓市較有值博率。你可以從投資角度、未來收入估算、長線生活所需去作考量，估算出一個較適合自己的決定。

2) 天長集團(2182)我未仔細研究這間企業，有派息表面上係利好，但實際上，都要睇佢派息原因和長線政策。

此股派息因素，對我地判估佢投資價值，影響唔大。此企業規模細，盈利和股價都幾波動。

投資價值係有，但唔算十分高，而且都有一定風險。若你投資係可以，但不宜大注。

a) 用供貸買入廠房，唔一定壞事，只要佢產出價值較高，咁就可以。

b) 佢5大客戶佔收入近9成，主要客戶近6成，的確係有過度集中性風險。

c) 都算可以，未到話十分集中。如果你想知邊D企業有這問題，可以上證監會個"股權高度集中公布"網頁，裡面有列出相關企業。

------------------------------------------------

Q22295：

感謝你的回覆，我女友其實仲有一堆銀行股，不過他最近看了你的股票勝經，已知不能在銀行及科網再加碼，她現在每月月供5000，慢慢平衡返個組合。

不過我也留意到公平值變動，其實我不太明。（如進階班有講到我到時再學習）

另外，我真的覺得你太好，明明沒收我們咨詢費，但每次回應的質素很高，內容十分詳盡。

我希望你打造的品牌越來越有認受性。

龔成老師︰

多謝你支持，我希望可以透過這裡交流，去分享一些正確的投資觀念和知識。從以令一般散戶或者新投資者，可以有個更明確的方向。

其實公平值，我係初階都有講。主要係一些會計上數字(非真正現金收入)，好似物業類股票，你會最常見到。

每年當物業升/減值時，都會反映在公平值上，而這部份會計入盈利當中，令我們估值時出現偏差。

因此，我地去做估值時，要先排除這些數字，才可以得出一個貼近實況的結果。

------------------------------------------------

Q22296：

龔成老師，港交所新CEO攪重組，對港交所有咩影響？

你好龔成老師，請問晶片股中哪一隻相對穩陣小小值博較高？

早晨龔成老師，中國平安$73買，有冇買貴左？

龔成老師︰

港交所(0388)新政策，暫時唔見佢對集團優勢，造成重大改變，依然係一間好優質的企業。

如果晶片股，其實我較建議台積電(TSM)，佢係一間有質素架企業，在全球半導體業界有領先地位。

集團專注生產由客戶所設計的晶片，現時已經是全世界最大的專業積體電路製造服務公司。

如果你睇好半導體發展，可以月供，並長線持有。

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型。現價算係合理區中下間位置，分注投資就可以。

------------------------------------------------

Q22297：

老師你好，最近見中慨股因為反壟斷法都紛紛回調

As at而家︰
阿里： $196.5
騰訊： $527.3
美團： $285
小米：$26.35

老師覺得可以點部署？而家價位合理值得入嗎？

另外，啲內銀股都除哂淨，呢排睇緊建行同工行，現價分別係$5.57同$4.48，老師又覺得現價入手長揸好嗎？

唔該哂老師

龔成老師︰

中央近期推出不少政策，一眾大型企業股價，都因此而受壓。但我地分析時，重點都係會睇翻企業長線質素。

暫時未見，這些股票的長線盈利能力，有明顯變差，你有貨可照持有。除了小米(1810)要回多1,2成才算合理外，其他已在合理區較上部，若無貨，已可入小注。

建行(0939)和工行(1398)都在合理區，可以分注。但你年紀較年輕，這2隻都係收息，增長力麻麻，唔係太適合你。

------------------------------------------------

Q22298：

成哥有d人話錢小就唔好分散咁多投資，唔係就賺好小，咁長期唔賣，回報率一樣多，仲要冇咁集中風險，咁講岩唔岩。

如果我月供︰
1000巴巴
500小米
500中國平安
1000眾安
500金沙
500新鴻基
500中生製藥

會唔會太散?但我中意呢d組合。

同埋諗深一層，唔知仲投資舊經濟股有咩用，雖然仲有質素，用黎平衡組合，但我小錢直接全部潛力增長股咪仲好？

龔成老師︰

唔係因為資金少，就唔應該分散投資。只係資金少，會較難去做分散投資。任何情況，其實我地都要盡力做一個平衡的組合。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時月供組合中，股票都有質素。但眾安(6060)不確定性較高，我不太建議用來月供。

建議你將佢換成指數基金，去提升你組合的平衡性。

至於舊經濟股，雖然佢地增長潛力不及潛力股。但佢地勝在穏定性較高，唔似潛力股咁高風險。

你要明白風險高，不等於回報一定高，這是一個錯誤想法。如果成功，回報當然可觀。但由於佢波動性大，失敗時，損失也會較慘重。

所以，「潛力股」不宜持有過多，要平衡。若你係偏年青，可以佔5成。但若你較年長或投資經驗較少，要下調少少至3成左右。

------------------------------------------------

Q22299：

龔sir, 我有以下股票，我現在43歲，想問我的組合會否太多潛力股？我想增持平穩增長股，你有什麼建議？或者對我組合有何意見？

0823 領展 $60.58 有3手
1038 長建 $41.65 有1手
1177 中國生物製藥 $8.0 有I手
1810 小米 $25.7 有1手
1830 完美醫療$4.8 有8000股
6823 香港電訊$10.54 有1手

謝謝

龔成老師︰

以你43歲計，潛力股大約可以佔你組合3-4成，若你投資經驗較淺，只宜佔1-2成。

你現時潛力股比重，的確係有點高，但主要係完美醫療(1830)近年大升所致。你現時持股，不變都係可以。

但未來資金，要優先投入平穏增長股，去令組合平衡翻。

------------------------------------------------

Q22300：

你好龔成老師, 我32歲, 儲蓄有50萬 (其中有30萬剛剛做完一年定期), 月薪3萬5, 每個月用1萬2做月供股票, 儲1萬3,

有朋友提議我把剛完定期的30萬全部買中銀(2388)收息, 請問你覺得這樣可以嗎? 或者有沒有更好建議? 謝謝!

以下是我持有的月供股:

00823 (188股) @$75.6
00066 (306股) @$44.7
02800 (471股) @$28.52
00700 (7股) @$556.5

09988 (25股) @$205.0
01177 (847股) @$7.06
01928 (393股) @$31.35
02382 (33股) @$222.4

龔成老師︰

你現時月供組合，係可以。

但正如我之前所講，我地投資除了選股要有質素外，你都要留意組合平衡性。

個別行業唔好佔組合3成以上(我見你地產類問題，已經修正好)，但個股都不可以佔高於組合15%，否則都會出現過度集中性風險。

中銀香港(2388)係適合你，但不要30萬全數買佢，你要平衡分配在不同行業優質股上。

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【2021工商廣告時間】蘊揚聯合會計師事務所蔡佳瑜合夥會計師。會計工商服務。審計委任服務。帳務處理及稅務申報。移民業務(合法移民公司)
-
#蘊揚聯合會計師事務所 #蔡佳瑜 #會計師
-
關於蘊揚
揚聯合會計師事務所，由邱素慧及蔡府堅兩位執業經歷完整的會計師共同合組，以期為工商企業提供完善的專業服務。一直秉持著「同理心」的信念，一步一腳印的耕耘新竹、竹北、湖口等地區。除以合理的價格及提供良好的服務外，並持續提高客戶服務滿意度並增進相關專業技能，以期滿足客戶全方位之需求。
-
審計委任服務
非公開發行公司之財務報表審計
銀行融資簽證
稅務申報查核簽證
非營利事業組織之查核簽證
公司決算書表查核
資本額查核簽證
投資、合併、股價評估或收購之專案查核
其他專業查核，如內部控制評估、清算、破產、重整等查核
-
企業營運與財務規劃
財務報表分析、利潤規劃以及投資或合併計劃之編製。
各項投資專案可行性之研究與分析。
外僑及大陸來台投資、國內廠商對外投資之諮詢服務等。
企業整體及國內外之租稅規劃。
-
稅務諮詢服務
代理各層次之稅務行政及司法救濟工作，如申請復查、訴願、行政訴訟及申辯、答辯暨抗告等。
台灣地區、中國地區移轉訂價報告服務：移轉訂價報告之編制及諮詢、訂價策略之輔導。
租稅規劃，包括國內及國際間對個人、公司或社團之租稅規劃。
免稅之申請及建議。
營業稅、遺產稅及贈與稅之申報。
資產重估價之代理申請及簽證申報。
代撰有關稅務申請函件。
對外投資有關租稅問題之分析、研究及建議法令資訊服務，提供正確、即時、完整之商業稅務法令。

-
蘊揚聯合會計師事務所
專 線：《03》550-6196 (代表號)
傳 真：《03》550-7169
所 址：新竹縣竹北市成功五街63號三樓之2
官網：https://www.wewincpa.biz/


=

艾蛙聯合行銷有限公司【品牌簡介】
公司服務項目：
一、百位網紅發案：youtuber、ig客、部落客、直播主
二、團購經營：線上宣傳、線下收單
三、專案企劃：活動統籌與執行
四、品牌經銷：網路行銷與蝦皮購物銷售
五、個人業配接案：部落格、影片開箱
六、Fb精準廣告投放：提升來店數，有效締結訂單
公司官網：https://www.aiwamkt.com/
品牌Slogan：夢想始於行動

=
公司服務項目：品牌行銷策略、部落客行銷、粉絲團代操、品牌推廣、
團購經營、異業合作、Fb精準廣告投放、官網建構、網紅行銷、創業行銷講座
=

❤ 艾蛙的社群 / 歡迎追蹤 ❤

instagram：https://www.instagram.com/aiwa_hu/​
Facebook：https://www.facebook.com/aiwa.vs.dollar​
Youtube：https://www.youtube.com/c/AiwaHualwa1919​
My Blog：http://alwa1919.pixnet.net/blog​
Website：https://www.aiwamkt.com/​
My Shop：https://alwa1919.waca.ec/

記帳是理財很重要的一步，但為什麼總是難逃記帳失敗的經驗？
直到鼠發現了「滿月記帳法」🌕借用收支的週期順水推舟
讓我徹底脫離記帳的惡夢😇

►理財起手式上集 ⟪關注你的淨值-告別負身價⟫
https://youtu.be/W6Zq6dlolrE
►理財起手式下集 ⟪專為新手設計-滿月記帳法⟫
https://youtu.be/juLfUYkCVDI
►滿月記帳法的負債與支出差在哪裡？
https://youtu.be/hwH1oICuTYQ

【滿月記帳法】檔案下載連結：(完全免費公開/不用留資料)
http://bit.ly/2C6HJM8

這不是公司財報🤓拜託不要用專業的會計準則鞭打鼠please~

【更新補充一】
鼠在紅區和綠區都各自設計了二類，例如綠區的「資產/收入」紅區的「負債/支出」，其實二者應該是殊途同歸，只是目的不同。以紅區為例，負債著重的是「類別」，而消費支出著重的是「支付對象」，例如買衣服歸在同一"類"，但可能同一個月內在不同地方買了二件衣服，刷的是不同的卡，"支付對象"就是不同的銀行。
具體來說，多一個「支出欄位」目的是用來確認這個月的每一筆錢「支付出去」給誰，以及幾月幾號應該支付，用來提醒是否逾期。
而「類別」則是協助自己長期關注每項債務/資產的變化，例如分六期的手機已經繳到第幾期這樣，下個月除息會有多少股利入帳這樣🤓

【更新補充二】
很多人剛開始在使用滿月記帳都遇到「重複扣二次」的問題，其實這會關係到每個人自動轉帳扣繳的時間，有的人月初，有的人可能會在月中或月底，所以扣二次的狀況是無法避免的，因為就算設定在月初，還是會有人認為「重複扣到前一個月的錢」。
但不論月初記月中記還是月底記，這個月該出去的錢就是會出去，如果選擇在「還沒匯出去前」記帳，會讓自己感覺比較合理，那就選擇在錢還沒出去之前記。不過滿月記帳的核心精神是在瞭解自己「身價」以及「身價變化的趨勢」，我們並不試圖追求會計簿記等級的登載方式，真的！重點不在數字應該認列在哪一天，而是用最「輕便無負擔」的方法來瞭解自己的身價。
如果你還是覺得奇怪，另外一個折衷的辦法，就是多記幾次，例如月初、月中、月底都更新一次，或是每個週末都更新一次，甚至每天更新也可以，不論收入支出資產負債都同步更新，這樣你就會看到淨值出現規律的波動，月初很高、月中到月底很低，然後下個月初又很高、然後下個月中月底又很低這樣，或許會讓你比較安心。如果希還是望盡可能鉅細靡遺地記帳，並且符合各種收支進出原則，那滿月記帳法可能真的不太適合😂

=================更多FQ影片=================
夯翻鼠FQ ►ETF系列
【FQ11】ETF基礎篇-就是便當的一種https://youtu.be/HDz6xAbNQ70
【FQ12】ETF進階篇-槓桿型/反向型ETF https://youtu.be/y1WwEhg1fqk
【FQ15】0050 pk 0056選誰比較好？上集 https://youtu.be/I-D1GmzzRKc
【FQ16】0050 pk 0056選誰比較好？下集 https://youtu.be/UA_btOz4uho
【FQ17】從0056捕獲高股息不死鳥 https://youtu.be/hM3wemKQT-8
【FQ32】買反向ETF等黑天鵝？先聽鼠說完鬼故事再決定https://youtu.be/kKUjclzcurk
【FQ33】十大配息ETF排行～填息最快的不是0056 https://youtu.be/_j2HR9xUafY
【FQ37】0056最新成分股更新分析 新同學來了！

夯翻鼠FQ►台股基礎系列
【FQ30】股票怎麼買？600秒學完台股交易基礎 https://youtu.be/zEDJ7LBZO4M
【FQ31】股票1元不是你的1元～搞懂零股先從除權講起 https://youtu.be/R0NAdlmZ70s
【FQ2】存股一定打敗銀行定存？常被忽略的三個弱點和一個關鍵 https://youtu.be/kF6XomSRcUw
【FQ6】存股如何決定進場時機？2018台股萬點對新手的意義 https://youtu.be/9QxXoD3zTks
【FQ1】什麼是利率與殖利率？ https://youtu.be/yd3fZRrjzGM
【FQ4】存股怎麼選？新手秒懂的放山雞選股法(基礎篇) https://youtu.be/854HH85QCdU
【FQ5】台股殖利率排行前三名是他們⋯放山雞選股法(網站實作篇) https://youtu.be/cY0P5fh-d9o

夯翻鼠FQ►儲蓄系列
【FQ29】從0%到5%保本儲蓄工具PK～(定存/外幣/儲蓄險/貨幣基金) https://youtu.be/H53540h21rA
【FQ23】利率明明一樣 定儲利息贏定存的原因～(正港懶人投資) https://youtu.be/W7k1TntmInk
【FQ3】匯率霧傻傻？先換起來放？錢被銀行默默吃掉的三個秘密 https://youtu.be/U8wLmL6PKnI
【FQ28】匯率表有隱藏數字@@” 高利外幣定存前先注意這三個率～ https://youtu.be/07NBkJNiHqs
【FQ21】投資理財必學的升息&降息～(央行vs美國聯準會FED) https://youtu.be/E64cTPnojWc

夯翻鼠FQ►理財系列
【FQ9】告別負身價～鼠先教你畫這張圖(理財起手式) https://youtu.be/W6Zq6dlolrE
【FQ10】再也沒失敗的～滿月記帳法 https://youtu.be/juLfUYkCVDI
【FQ20】理財先理信用卡～循環利息和最低應角算給你看 https://youtu.be/15s-TAyOssg

夯翻鼠FQ►基金系列
【FQ18】新手買基金學什麼？這三個能力最值得 (粽子投資法) https://youtu.be/MI3YjuXlr3c
【FQ8】定期定額超過二年就GG？因為很少人注意這二隻Bug https://youtu.be/U_A95yWC2eI
【FQ19】覺得基金很難選？讓AI來吧~(推薦新手) https://youtu.be/uxYrR-TFTVo

夯翻鼠FQ►台股進階系列
【FQ14】參加除權息可節稅？2018稅改股利申報二擇一制https://youtu.be/DDNZACHMDog
【FQ13】大牛不爽領股利？股票除權息的各種股民～https://youtu.be/Huyej6CHgFs
【FQ7】2018二月全球股災～黑天鵝是機器人？ https://youtu.be/FlY7Ms53wyI
【FQ22】三大法人不是三個人啦XD～吻仔魚跟著鯨魚怎麼賺錢？ https://youtu.be/2XOI0ipIML8

夯翻鼠FQ►股國四面系列
【FQ24】要聽懂股票國語言先學金字塔這四面(基本/籌碼/技術/消息) https://youtu.be/4jRM4Zze7Ng
【FQ25】股票怎麼選？基本面先問這三題 (股本/EPS) https://youtu.be/9Oew02e5uqg
【FQ26】新手學基本面二大指標 評估企業賺錢能力(ROE/ROA) https://youtu.be/VnYdpRMU8Y0
【FQ27】股票估值的基本面三大指標～(本益比/股價淨值比/殖利率) https://youtu.be/yUUO7dtFInk
【FQ34】徹底搞懂技術線圖七大元素～先從各種K線開始https://youtu.be/V__cjhFm0L8
【FQ35】判斷股價強弱的關鍵~先學會看均線https://youtu.be/ti8m7rJmB3E

【不用花錢也可以贊助柴鼠】
https://youtu.be/DGV964Fks2s

【訂閱柴鼠也是一種鼓勵】
https://ppt.cc/fUrThx

【柴鼠兄弟相關頻道】
YouTube頻道 https://www.youtube.com/c/柴鼠兄弟ZRBros
FB粉絲頁 https://www.facebook.com/zrbros
IG https://www.instagram.com/zrbros/
bilibili https://space.bilibili.com/130090309
愛奇藝 http://tw.iqiyi.com/u/1421309132

【聯絡柴鼠】
e-mail：[email protected]

＃最直觀簡潔無負擔的記帳法
＃完全由鼠自行設計歡迎分享
＃記得設定密碼保護