阿叔我噚晚出城睇黃秋生先生主演嘅《仲夏夜之夢》， 去睇之前確係有啲劣。 須知道…《仲夏夜之夢》係莎劇，雖然莎劇已經係算通俗，但人哋個通俗係幾百年前嘅俗，始終都係冇我咁俗。 加上阿叔我不嬲都早瞓，我劣我睇睇下真係會瞓著。 但最劣係咩呀？係劣我會打埋鼻鼾，到時真係劣出灣仔。 通常睇完啲唔啱睇嘅嘢，講少句就可以了； 但你見我打咁多廢話就知，最後冇事，好睇，失眠。 聽佢哋台上講，仲有幾場有啲飛，去睇下啦你班俗人。 導演甄詠蓓同演員們喺翻譯對白上適當地落咗啲貼返香港地嘅貼地料，啲位準到爆，全場都識笑嘅，拉高咗個商業層次；但同時又非常克制咁原汁保留返原劇本啲精句，又多媒體又互動又咩又剩咁，又將個藝術層次拉返高… 總之呢個改編夠雅俗共賞，作為扮下嘢睇莎劇入門，係好機會，等你唔洗飛倫敦入皇家歌劇院然後聽英文聽到瞓著七出國際之餘，又可以等你喺啲囡囡面前扮晒嘢話：oh我最like shakespeare garr喇，特別係嗰齣《a midsummer night's dream》真係好funny garr。 謝謝wasabi好介紹。 非廣告，但都廣一廣告話你知。 黃秋生、甄詠蓓 同張珮華 嘅神戲劇場《仲夏夜之夢》仲有幾場仲有啲飛： http://www.hkticketing.com/events/WCAMIDS0916