⠀⠀⠀⠀⠀ ⠀⠀⠀⠀⠀ 阿李：真失禮，這陣，才寫批予你  彼工透早，我，袂輸是一張限時批  對臺北軍法處看守所雄雄送到臺東泰源感訓 千里路途，真是，兩三步就到位。泰源的土地 有日本時代種作咖啡的芳味，阮，兩百外人 攏佇遮討論：反共思想佮三民主義的意義 阿李：請共咱的幼囝講，阿爸去米國留學  暫時無法度見面，但是真緊就會轉去團圓  我會犧牲放風時間，踮櫳仔內增補、改訂  《新英文法》佮我的想法。絕望、無奈的時 我會想起：遠遠的所在，抑有人，一直咧等待 「國家至上 民族至上」 ⠀⠀⠀⠀⠀ （老師：我欲寫一張批予你——料想袂到這本《新英文法》增補、改訂 是你佇櫳仔內完成。是毋是逐工見面的 二十六个外國字母，已經比父母、某囝 閣卡熟似你的人？老師：臺東的日頭 是毋是蓋酷刑？風雨，是毋是真無情？深山林內的泰源，天氣，是毋是 定定會烏陰？心情，是毋是時常交懍恂？時間，一點一滴，漸漸烏焦瘦 親像你的面。抑你的眼神，純真、善良 但是你的艱苦罪過⋯⋯敢若身上彼領 殕色的囚衫，無聲無說兼無合軀⋯⋯） ⠀⠀⠀⠀⠀ 阿李：寄來綠島的藥品、相片佮你的掛念，攏總收著矣 不而過，我的思念，仝款遮爾狡怪，猶原醫袂好勢 昨暝，眠夢又閣幽幽仔疼，跤步愈來愈沉重的 海風，佇櫳仔外的樹跤躊躇規暗——到底  敢欲陪伴彼个空喙發癀的月娘，繼續孤單？ 阿李：寫予你的批，規定袂使超過二百字  千言萬語，總是，向望有一日—— 有一日會好天，日頭溫馴，風雨恬靜 咱，會當佇家己出版社的亭仔跤，讀冊、看花 看咱的囡仔咧覕相揣，看咱種佇故鄉的 希望，會當勻勻仔暴穎，沓沓仔發芽 「保密防諜 人人有責」 ⠀⠀⠀⠀⠀ （詩人：我欲寫一張批予你—— 問你：寫予二二八犧牲的同學彼首臺語詩  〈母親的悲願〉，是毋是，猶未唸出聲  就已經喉滇目箍紅。詩人，我欲寫一張批予你 問你：佇櫳仔內完成的彼本小說《南國故鄉》 明哲佮美智子，是毋是你佮某囝的化身？ 我欲寫一張批予你，親像鄉土不時呼喚你  我欲寫一張批予你，佇你講出「當做的已經攏做完矣」 詩人明哲，我欲寫一張批予你，問你：如何靠旗尾山的意志對抗唐山漚鬱熱的苦毒  安怎用海翁的氣勢展威島嶼海洋國家的志氣 佇彼當時——佇你再次坐監，空喙才拄拄堅疕 又閣無端予人控出血的時⋯⋯） ⠀⠀⠀⠀⠀ ⠀⠀⠀⠀⠀ #黃明峯 #寫予你的批