《記唔記得以前嘅「筆劃輸入法」，6字係代表啲咩？》

突然間，好掛住一個「問號」。

以前按鍵手機年代(差唔多10年前)，即係Nokia稱霸嘅年代，
我哋學識咗Send Msg（唔係3台冇朋友年代。）

嗰時手機入面好似得一種輸入法，就係筆劃。
數目字1-5，等於「橫、豎、撇、點、折」

講真，有時啲字你Q知咩筆劃咩。
所以除咗「橫、豎、撇、點、折」之外，有第6個選擇畀你，就係數目字6鍵，打出嚟會顯示一個「問號」。

問號即係「百搭」，幫你skip一個筆劃，
好似個「獵」字咁，當年我就係「撇折???????? 橫」咁打出嚟，
你大約知佢有幾多筆劃就搵得到。

呢個就係那些年嘅輸入法回憶。

Send Msg嘅瘋狂期係中學時期，啲MSG多數都9唔搭8，傻下傻下，
但我同「6鍵」一樣，勝在百搭；你身邊嘅人都好百搭。
一齊溫書又得，媾女又得、打麻雀又得，
理得佢屋企幾多家身幾多工人。
大家十幾歲，冇階級觀念。

喺嗰條百德新街，大家步伐一致，而往後？中學生邊有諗咁遠，就當係一個問號。

而家手機都唔同晒，百搭嘅問號已經少用、
當年十幾歲嘅ｏ靚仔都變咗廿幾勾。
廿幾勾嘅我哋，身上愈來愈少問號。

同一間學校出嚟，同一條百德新街成長嘅我哋，每人都行咗一條意想不到嘅路。

阿強份工多數恤衫西褲、明仔就型格行先、David份工粗重，最緊要耐用。

諗諗下，
就算我哋再行同一條街，都未必會入同一間鋪。

曾經百搭嘅我哋，今日佢注定係「橫」；我亦認定係「豎」。
都喺社會上無形間被定型。

究竟自己幾時脫離咗「百搭」？
問過好多朋友，每個人都係答「不知不覺間」。

似乎，社會最恐怖嘅，
唔係逼我哋轉變，而係不知不覺間令大家接受。

IG: cheungson88
*會慢慢Update短文上IG！