【#名人與名事系列︱#尼古拉斯溫頓】 《舒特拉的名單》講述德國商人舒特拉喺二戰期間拯救超過1100名猶太人，電影感動好多人。而喺英國亦有另一名「舒特拉」，佢就係尼古拉斯・溫頓。 . 尼古拉斯・溫頓 (Nicholas Winton) 嘅父母係德國猶太人，佢本姓為猶太姓氏Wertheim。後來父母移民去英國，溫頓就喺1909年5月19日英國倫敦出生，姓氏亦改為Winton。成年後佢曾到德國同法國當地銀行工作，並喺法國取得銀行業相關學歷，後來就返去倫敦證券交易所做交易員。 . 喺1938年，第二次世界大戰前夕，溫頓嘅朋友——英國捷克斯洛伐克難民委員會成員Martin Blake希望溫頓可以去布拉格幫忙拯救當地猶太難民，於是溫頓就前往捷克幫忙，並且喺所住嘅酒店嘅餐廳，獨自設立辦事處幫助難民。 . 正喺1938年11月，英國下議院批准新措施，准許17歲以下難民進入英國，不過條件係喺英國搵到地方居住，同要要繳付50英鎊作保證金表明之後會返回原來嘅國家。由於當時全家人都要得到簽證係好困難，所以好多父母都去溫頓嘅辦事處，希望溫頓可以幫佢地嘅子女得到簽證。溫頓喺布拉格逗留三星期後，就返到英國日頭返工，夜晚去為猶太兒童難民籌集保證金同準備許可文件。 . 喺1939年3月至9月，二戰爆發前，溫頓安排咗7班火車，去捷克接走669名兒童難民。然後抵達英國後，溫頓為呢669名小朋友尋找收留佢地嘅地方。本來佢仲安排咗最後一班火車喺1939年9月1日離開布拉格，呢班火車坐咗250名小朋友，係人數最多嘅一批。不過因為德國封鎖邊境，火車唔能夠出發，呢班小朋友大部分亦因而喺戰爭喪命，只有兩人倖免於難。 . 雖然溫頓成功救咗669名兒童，但佢冇四圍宣揚，反而保密。直至50年後，佢妻子發現咗溫頓整理好嘅行動細節，同被拯救嘅兒童難民嘅資料，於是聯絡唔同嘅人，最後喺1988年英國廣播公司BBC製作電視特輯「That's Life」，佢嘅故事先至為人所知。節目中，佢被邀請作為觀眾，就係解說緊佢嘅成就時，主持人問有冇人因為溫頓而獲救，在場二十幾個人企起身，圍住溫頓為佢獻上鼓掌。另外，英女皇就喺2003年授予爵士爵位，捷克總統更喺2014年為佢授予最高榮譽嘅勳章——白獅勳章。直到2015年7月1日嘅清早，溫頓因呼吸衰竭而離世，享壽106歲。 - 尾段提到BBC特輯「That's Life」嘅片段：https://goo.gl/onnmmx - #Beginneros #冷知識 #winton #舒特拉的名單 ------------------ ◆ 每日分享知識、每月提供課程 ◆ Beginneros網站：https://www.beginneros.com/ ◆ Youtube：https://goo.gl/OEJrGt ◆ 冷知識投稿：http://goo.gl/zEYS3q