兩個星期時間，過得好快。 1）呢兩年嘅情況，加上只有一個鐘時差，今屆奧運，全城睇得特別投入。 2）支持香港隊，係無可能因為運動員勁，而係香港人嘅身份，正常不過。 經過呢兩年嘅洗禮，對香港人身份認同感越來越強烈，但係有啲藍絲運動員，好矛盾。 3）以往有好多香港人支持某國，但係今屆就有唔少人轉呔，變成捧某國嘅對家，就算支持都唔敢出聲，起碼喺我Facebook，真係無乜點見有朋友支持。 我識得好多人，以前捧中國女排，今屆齊齊食花生睇住佢哋出局。 4）香港隊先苦後甜，羽毛球手著黑衫俾建制派上綱上線，女子劍擊失準未能拿牌，男子組卻拿下廿五年來第一金，游泳屬於主要項目之一，何詩蓓一舉拿下兩面銀牌，真係諗都諗唔到，香港運動員可以在泳池上分一杯羹。 遲啲有無機會見到香港選手，踏上田徑頒獎台呢？ 5）以前香港乒乓球，主要係靠入藉兵支撐，我中學嗰代係陳丹蕾齊寶華，之後高禮澤李靜，都係來自大陸，今次女子團體賽拿銅牌嘅三人，全部香港土生土長，不過有個係藍㗎呢。 （教練李靜支持國安法，男子組黃鎮廷直頭幫過何君堯助選添啦。） 6）只此一屆空手道，劉慕裳的一面銅牌，足以名流青史。 7）李慧詩在速度賽，再一次得到銅牌，賽後訪問她好奇怪，點解傳媒會著眼佢年屆34？ 現代人比以前襟老，足球場上有C朗，伊巴，保方，仲有貨賣，三浦知良唔講啦。 不過點都應該係佢最後一次參加奧運喇。 8）如果蘇炳添喺十幾年前出現嘅話，應該會有好多香港人支持，全亞洲跑得最快嘅男人，兼且係講廣東話。 雖然佢做出嚟嘅時間，三十幾年前Ben Johnson已經做得到（不過後來被揭發食藥），但係已經好撚犀利。 9）姬菲芙過咗身廿幾年，佢喺漢城做出嚟嘅100米奧運紀錄，等到今屆先有人改寫，跑出牙買加三重彩。 10）意大利人成為男子100米飛人，對上一次由美國／中美洲以外嘅選手贏男子100米，已經要數到林子祥唱世運在莫斯科，超過60個國家杯葛嗰一屆。 11）英國跳水神童戴利，終於有金牌落袋。 12）巴西足球又攞金牌，愛華頓嘅李察利臣，喺決賽射失12碼。 13）唔再夢幻嘅美國籃球隊，都係攞到金牌。 14）大迫傑最後一戰，無功而還，第六名已經係亞洲第一。 15）三年後，巴黎接手，對上一次巴黎奧運，剛好相隔一百年。 16）話唔定，下屆我會同小寶喺巴黎睇現場。 17）英國去巴黎，好快啫，就算喺英國睇直播，都係一個小時時差。 18）下星期，英超開波了，過多一個月，馬季開鑼了。 19）呢兩個星期，難得大家都高興。 20）明天仍要繼續。

‧ 香港史上第一面奧運女子自由泳一百米獎牌得主 ‧ 香港史上第一面奧運女子自由泳二百米獎牌得主 ‧ 香港首位在一屆奧運奪兩面獎牌的運動員 ‧ 再次刷新亞洲女子自由泳一百米紀錄 ⠀ 真係「越戰越勇」超勁！ 香港人嘅驕傲！ 香港嘅泳壇天后！ 何詩蓓😍😍😍

【東奧香港第一銀】香港女飛魚何詩蓓，今早（28日）在東京奧運女子200米自由泳決賽中，以1分53秒92的破亞洲紀錄成績，奪得銀牌，成為香港游泳史上首位取得奧運銀牌的運動員。何詩蓓初出娘胎就離不開水，幾個月大已在泳池熟習水性，四歲時到南華會習泳，由小學開始參加比賽，成長期間屢次刷新香港以至亞洲紀錄。到今年二十三歲終於勇奪第一面奧運獎牌。 何詩蓓與前日贏得男子個人花劍奧運金牌的「劍神」張家朗同年，一九九七年十月三十一日生於香港，現時二十三歲。她是愛爾蘭及香港混血兒，父親是愛爾蘭人，母親是香港人，出生先取英文名Siobhan Bernadette Haughey，其後因Haughey讀音似「何」，又根據Siobhan Bernadette的字母發音，再取中文名「何詩蓓」。 雖然人們盛讚何詩蓓天賦異稟，但二〇一三年，十六歲的她深明努力比天分重要，其時她受訪時說過，「有天分的泳手有很多，但要有力與人在比賽中較量，一定要花時間去改良技術， 靠不斷練習去突破自己，天分可以幫到兩成，其餘八成就是靠本身努力。」其時她對自己要求很高，每星期練七日水，更不願放下學業，「每次考試成績，我都會要求自己每科達到75% 以上，但父母卻看得很開，沒有催逼，只有支持。」她在二〇一五年應考DSE，7科共取得35分，其後獲美國密芝根大學取錄，選擇修讀心理學，希望在退役後，可以成為兒童心理學家。 上屆里約奧運，何詩蓓出戰女子200米自由泳，16強止步。賽後，她表示，愛爾蘭泳隊屢向她招手，但她都一一拒絕，堅決為土生土長的香港而戰，「我很驕傲我可以代表香港參賽，雖然每年回愛爾蘭都會受到泳隊的邀請，隨時歡迎我代表愛爾蘭出戰，但香港是我出生和生長的地方，我覺得自己與香港有很強的連繫，所以我選擇了香港！」」 今屆東京奧運，何詩蓓出戰50米、100米和200米自由泳，及4×100公尺、4×200公尺自由泳接力等多項比賽項目，最終勢如破竹，在今早的200米自由泳中，以1分53秒92完成，獲得銀牌，並創下亞洲記錄。作為首位奪得奧運獎牌的香港游泳運動員，她希望和張家朗一起，以成績鼓勵其他香港運動員，「最想多謝香港同美國教練同埋屋企人，希望我同家朗呢兩塊獎牌可以推動香港運動員繼續努力，之後就到你哋，只要努力就可以有成績！我自己5年前（在里奧）游到準決賽，2017年世錦賽第5，2019年世錦賽第4，次次都差少少拎獎牌；而家終於游到喇，真係好開心！」何詩蓓賽後興奮地說。 #東奧 #東京奧運2021 #港隊 #游泳 #自由泳 #二百米自由泳 #破紀錄 #香港紀錄 #亞洲紀錄 #香港加油 #港隊加油 #香港 #運動員 #努力 #堅持 #奧運銀牌 #香港游泳史 #香港史上首面 #游泳獎牌 #SiobhanBernadetteHaughey #我就是我