【龔成問答信箱】（Q21401-Q21420）

Q21401：

龔SIR你好!首先要感謝老師教懂我如何選擇一隻好的企業。

自從成為你學生後，我的成績確實有增長，雖然仍未到目標，但確實前進中。多謝老師既教導。

但近期估值課題上有一個疑問，就是「預測市盈率與自行計算市盈率之間的決擇?」

以創科實業為例。根據過往十年數據，利用堂上所學。
合理市盈率應是21.88-23.12,
平均最新5年EPS是2.41。

因為我發現它每年EPS都有增長，自己計算大約是11.5%至29.8%不等(平均數是17.7%)

所以，我打算利用2.41X1.177= 2.84 作為有代表EPS
所以，合理估值應是2.84X21.88- 2.84X23.12再+/-10%，即是55.9-72。

根據自己計算範圍55.9-72 明顯與現時大市有一大距離。此時，再發現中銀既預測市盈率是36。如果用 預測市盈率計算2.84X36=102.24，那麼合理區 再+/-10%，即是92-112.46。則比較接近大市。

因此，我想請教老師2個問題
1.遇到這個情況，應該如何決擇?還是我的計算出左問題?
2.預測市盈率是市場給予的，是否較自己計算的市盈率更重要呢?

知道老師忙碌，問題唔急的，感謝老師的指導。

龔成老師：

你在計算估值時，不能公式化，要「意義化」，你先要了解創科（0669），佢過往的業務情況，品牌、發展，為甚麼過往的營業額有這樣的增長，點解盈利會這樣，是市場不斷擴展，產品的類別增加，定加價，還是其他原因。

你要睇翻5年年報，有具體了解後才有答案。

然後，你要分析這企業之後面對的經營環境，如果市場環境對佢有利，這樣增長就可持續，而你推算EPS時，不能只用平均數，這是一個入門的方法，你要更正確推算，之後的盈利怎樣。

如果你用我第五堂教你參考機構評級的方法，你會見到大行預期盈利接下來幾年平均為0.6美元，即是港幣$4、$5，你就要小心分析，你用2.84 作為有代表EPS，是否保守左，大行點解估到$4，背後咩原因。

你要了解企業之後的情況，從而找出答案。

另外，你在衡量佢市盈率時，如果企業無一些核心的改變，你照用過往的較好，然後再加少少自行的調整。

------------------------------------------------

Q21402：

阿Sir，我自己計咗幾隻股合理價，可唔可以麻煩你幫我睇吓我嘅計法啱唔啱：

新地（16）
行業市盈率 ：6.26-10.5
過往五年平均每股盈利 : 14.8
新地市盈率 : 7-11
合理價: 103.6-162.8 (好似個range 好闊🤔）

雅生活（3319)
行業市盈率 ：27.5-41
過往五年平均每股盈利 : 1.042

雅生活只搵到近三年市盈率，有一些股票如352，1895甚至找不到市盈率資

領展 （823)
行業市盈率 ：5.5-13.18

過往五年平均每股盈利 : 11.63
新地市盈率 : 6-10
合理價: 69.78-116.3 (好似個range 好闊🤔）

龔成老師：

新鴻基地產（0016），要留意，佢這類地產企業，每年的盈利都有物業重估，因此盈利及過往市盈率數據，都要調整翻，所以，計算過程有點複雜的。

你預新地現價合理區中間。

雅生活（3319），當你進行行業比較時，盡量找一些營運模式、規模等接近的，同時，會參考佢自己過往的市盈率。而這股不會比到太高市盈率的，去到30已是太高，20倍會較有代表性，再以這為基礎這行調整。

至於盈利方向，由於佢盈利增長中，因此盈利數字不應只用平均數，要調整。所以，你預現價為合理區中上部。

至於領展（0823），由於每年的盈利都有物業重估，以及先年的市盈率都會因為物業重估因素令盈利變左，所以市盈率的參考價值都減左，因此，你要調整翻先能夠分析得到。你預現價合理區中間至中上。

------------------------------------------------

Q21403：

龔老師 你好 最近見你也對樓市有研究 ，真心想請教 唔想再走冤枉路

現時有一層 216 呎 長沙灣樓
樓齡 1年 （但已過3年 樓花期買）
出租（死約） 10500
按揭連管理費 16000每月
買入時 499 萬 想放570 萬

想要連租約放售 如理想價 570 還完按揭 有170 萬左右

想跟你 學習 股價 覺得已前投資 cash flow 唔靚 供得好辛苦

有家庭 BB 出世 支出更大 同太太 （她都有follow 你Facebook)商量後 現時 層樓 每月都是支出多 不如賣左層樓 所得錢 跟你腳踏實地 投資股票 3-5 再買過一層

不知龔老師可否比意見 ？
謝謝你 祝生活愉快 身體健康

龔成老師：

從宏觀的財富角度分析，你這個動作，就是賣出現有的收租樓，將資金轉成股票，利用股票增值，再在3-5年買買入另一收租樓。

這個動作的考慮點，就是利用股票的增長，高過利用現有物業的增長。

在理論上，這類面積較細的樓，投資價值的確不算強，因為以一個基本家庭來說，去到250呎以上會較合理，因此，長遠增長力不及一般物業。

加上現時股市的平貴度較樓市平，所以在理論上，資金投入股市增長，會好過原有物業。

不過，所有事情都無絕對的，無人能準確預測到樓市，如果樓市在這幾年的升幅比股市多，你的計劃就會出問題，這是風險所在。

另外，香港買賣物業的成本貴，你一賣，日後再買，這是有成本，你都要考慮這因素。

因此，從方向上，這計劃是可以（因為投資不同資產的值博率與回報等概念），但實際上，你會面對上述所講的風險，你自己衡量是否承受。因為始終投資股票，都會有價格波動風險，穩健度比樓市差。

------------------------------------------------

Q21404：

老師想問下，我現在快20歲，有19000元現金，1000股煤氣，500股盈富、500股嘉里同400股小米。

煤氣 大概10元多買入，盈富大概25元入,小米22.8入，嘉里24.48入

龔成老師：

上述的股票，都有質素，無問題可以長線持有。

現金19000，由於不算多，所以持有就得。

小米（1810）我都有貨，雖然股價波動，但正面的，只要你不是持貨過量就得。

盈富（2800）可長線。

嘉里物流（0636）這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

其實現價處合理區頂，以長線投資的角度，有值博率的，可分注。

至於0003，有質素，但你19歲，未必最適合你。

其實煤氣（0003）仍是有質素的股票，但增長力弱左，而佢改為20送1，反映增長力可能減少左，但不算差。

香港業務不強，但中國部分不差，中短期雖然較一般，但見佢的長遠發展力仍在，但就要耐心點。

由於佢一向都穩定派「相同股息」，在這情況下，反映派息的增長會少左。但整體來說，這企業仍是有質素的。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

------------------------------------------------

Q21405：

老師想問下你 我睇你本股票勝經

用入面既方法計出3838 PEG 和3838的初步分析財務指標5年數據

得出的PEG 由2016-2020 五年間都是0.0x 低過合理價1很多

是因為每股益利增長很大的原因嗎？而這股每股益利增長咁大的原因是因爲澱粉價格而非純盈利嗎？這些指標對於此股有代表性嗎？還是我計錯數了？
請指教

龔成老師：

要留意，PEG只是一個輔助的估值工具，並不能成為企業估值的核心。同時，PEG只適用於高增長類企業，而這股增長力不強，生意增長不高，以及盈利未見有明顯增長，因此，並不適用。

中國澱粉（3838）主要從事製造及銷售玉米澱粉、賴氨酸、澱粉糖、變性澱粉、玉米製副產品及玉米深加工產品。

近年的生意都有增長，不過盈利就唔算強，同時有少少波動，反映佢都受成本等因素影響，產品價格自主力唔強。

整體企業質素，唔算高，但未算劣質。

現價雖然合理，但投資值博率唔高。

------------------------------------------------

Q21406：

你好 , 老師, 想請教你一些投資意見？

1. 如想用$10000投資月供股票計劃, 現階段應如何分配？ 當中想要有潛力股，但1211 已好高價位, 應買嗎？

還是有其他股比較適合？ 應該集中買兩三隻 ，還是分散買好？

2. 目標滾存100萬, 應以5年為期？ 如果想3年為期,每同投資幾多及如何分配比較適合？
thanks

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和取態，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

至於你所講比亞迪(1211)都係有質素，勉強小小注月供好了。

而我地創建一個財富組合，除了要有質素股票外，平衡性都係好重要。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

但盈富(2800)就不受此限，因為它是一個包含55間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

所以，如果你組合有盈富(2800)，再只加1,2隻都無問題(只要這1,2隻，不超過以上比重限制)。但若無，你最好係加多幾隻，令組合更平衡。

2) 不同年期，組合都唔會有太大不同。但若年期較長，部份高風險的股票，可能你就要慢慢減個比重，換成較穏定的優質股。

我假設投資回報有10%（連股息再投資），你要每月投資$14000，5年後才會較大機會增值至100萬。

如果年期縮短為3年，就要最少每月$25000。但由於3年唔算長時間，會有機會出現波動，令你最終回報的不確定性增加，你要知這個風險。

------------------------------------------------

Q21407：

老師：您好！我想問6993前景如何？我16.92買，而家跌到落11蚊，應該看長線還是止蝕？

另2883同問，我10.7買。
謝謝

龔成老師︰

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，但你買入價係上市時較熱炒階段，現時回調只是回到較合理水平，不過現價依然唔平，只算是合理區頂。

若你持貨不多，你長線持係有可以。但較貨較多的話，只宜沽出部份，去平衡風險。

中海油田服務（2883）質素中等，未算強。

佢係中國近海市場最具規模的綜合型油田服務供應商。

佢的服務貫穿海上石油及天然氣勘探，開發及生產的各個階段。業務分為物探勘察服務、鑽井服務、油田技術服務及船舶服務。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資。若持貨不多，可以守。如持貨較多，則應該在反彈時，沽出一部份，去減低風險。

我見你2隻股票都有買貴貨情況，若你對點判斷平貴無乜概念。我建議你再投資時，改用月供，或者分注入貨模式，去平衡這個買貴貨風險。

同時間，努力學習投資，如何選優質股、定平貴等相關知識。對你長線投資發展，會有好正面的幫助。

------------------------------------------------

Q21408：

龔 sir ~ 小女子暫時手上得5萬港幣可買股票, 想高回報 ( 即是高風險啦 ), 是否跟著以下3067、9988、700、388、1810、2382、1177、1448, 便可以 ?

目前目標 ~ 每月儲 一萬港幣, 5年要有 100萬, 用來買私樓的首期。

請指教
暫時有 3067 有1000股 是蟹貨。

亞厘爸爸有700股, 其中200股是蟹貨。
1177 有 2000股, 亦是蟹貨。

是否再加貨 ?
還是買其他 ?
謝謝你

龔成老師︰

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

唔可以單單集中晒係「潛力股」身上，佢雖然有增長潛力，同時風險都較高。

但風險高，不等如回報一定高，這是一個錯誤想法。如果成功，回報當然可觀。但由於佢波動性大，失敗時，損失也會較慘重。

所以，「潛力股」不宜持有過多，要平衡。若你係偏年青，可以佔5成。但若你較年長或投資經驗較少，要下調少少至3成左右。

你現時組合中股票，都有質素。雖然股票上係虧損，但只是中短期問題，你可以守。

由於你阿里巴巴(9988)佔比好高，個別股票不要佔組合15%以上，所以，你暫時唔好再加注。

將來時間，除了潛力股，你都要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

現時大市在合理區，每月先用$5000做月供，餘下$5000和5萬現金，就等大跌市才動用。

以大市過去年平均回報10%計（連股息再投資），你每月投資$10000再加上你現有20萬持股，5年後大約增值至100萬，能達成目標機會頗大。

------------------------------------------------

Q21409：

你好呀 龔老師，我啱啱先開始接觸投資，上年12月頭開左個富途牛牛戶口，然後聽朋友介紹下，我買嘅第一隻股票就係6618京東健康，果輪升得好勁然後就賺左d。

於是我喺高位就直接入多d貨，結果冇耐就一直跌，中間再溝過貨，依家已經蝕緊差唔多40%。

其實呢幾個月都有唔少朋友叫我走，我就係有d唔甘心所以一直擺，不過見到個虧蝕愈來愈多果陣都有啲擔心。

所以想問下老師你意見，我應唔應該del apps繼續擺落去？定係應該依家就止蝕離場？

龔成老師︰

京東健康（6618）係有質素，但問題是你投資知識不足，令到成個策略出左問題。

首先，京東健康雖然有質素，但由於新上市，估值難，不確定性大。本身就不應該持有太多。

另外，我地決定加注與否，要睇幾個因素，記住，並不是以「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

你明顯只是想盲目去「拉低平均價」，但完全無考慮成個組合配置和風險。

由於此股波動性風險大，你再入雖然真係會拉低左個平均價。但變相令佢佔你總資產比例又提升左，即係你同時拉高了自已的風險比重。

以你現時情況，若京東健康佔你組合比重較高，建議你沽出部份，先去平衡翻個風險。

此外，你在再投資前，建議你努力學好正確投資理念、資產配置、股票估計等知識，才開始會較好。

------------------------------------------------

Q21410：

老師，我今年應付完DSE會過嚟報讀你嘅課程學下估值，我係從我老竇推介先開始睇你嘅書（跟住就開始留意你平時facebook 同YouTube）

明白到金錢永遠貶值，銀行嘅體系對我哋有咩影響，同埋長線投資嘅威力。我今年年初開咗證券戶口，想你對我嘅投資組合俾啲意見： 我宜家手頭上有

兩手1810（24.35)
嚟緊小米造車可行性大嗎？
一手9666（63.25）

4月開始供1928（每月1000），每月會儲500現金，因為我阿爸都同我講可以學下你咁樣地獄式慳錢雖然我依家比起你嗰陣真係算儲得少

另外有18000現金係咪應該繼續儲等更好嘅機會？（考完試會再做兼職加大儲錢金額，想問吓到時應唔應該再月供其他？例如港交所？因為佢有壟斷優勢）

另外我想再問吓，舊年如果新經濟股炒得好犀利將好多企業嘅發展前景無限放大，估值過高，但係成日都係講話會回歸企業價值

咁老師你會點樣處理，如果面對估值過高係咪會減持，等佢回歸企業價值再買入？

最後，好多謝老師平時無私嘅分享，比起好多坊間嘅「專家」睇得出你嘅回應係好用心，好明白投資唔可以心急你嘅分享亦令到我踩少咗好多氹

例如唔會心急然後將啲錢去玩啲唔熟悉嘅衍生工具同埋做短炒。

龔成老師：

好，最重要是保持學習！

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂位至略貴，小注分注可以，但唔好入得太急，預佢股價仍波動。回多10%更有投資值博率。

佢將會造車的，但成功與否就未知，但我相信佢正面的，不過股價就可能有點波動。

至於金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

至於你月供股票，金沙（1928）可以，而你年輕，可以加入一些潛力企業去供，例如小米都得。港交所（0388）都可以。

至於現金$18000，由於金額唔算好多，因此暫時留現金先，等跌市先考慮動用。

至於企業價值，首先，新經濟股估值難，所以在投資會相對控制注碼，若果到貴的時候，有機會減持的。但如果好高質，就唔會賣晒，因為你唔知賣左後，能否買得翻。

在理論上，股價長遠會回歸合理價，但如果一間企業價值增長得好快，股價就算這刻貴，都未必跌。

加油！你年輕，只要能擁有投資知識，長遠財富會不差的。

------------------------------------------------

Q21411：

老師你好！
現在持有

6618京東健康 500股 $180
9633農夫山泉2000股 $55
305 五菱汽車20000股 $2.57
175吉利汽車1000股 $33
6993藍月亮1000股 $16.9

9666金科服務500股 $73.5
2013微盟集團2000股18.62
1833平安好醫生100股 $133
1772贛鋒鋰業200股 $101

我高追左以上股票、大部分坐緊艇。好彩小米$16.5仍然持有。

1.以上的股票會否升返上去？

2.以上的股票有冇要放棄？

3.組合可否俾意見？
多謝老師

龔成老師：

基本上，你持有的組合不是無質素，但我見到你投資的，大多是之前較熱炒或焦點股，又或是新經濟類股，這會令你的組合風險較高，要注意翻。

五菱汽車（0305）、金科服務（9666）、微盟集團（2013）、平安好醫生（1833）、贛鋒鋰業（1772）雖然都有質素，但股價上落略高，同時行業仍有變化，因此，唔建議持有過多，不過你如果計翻佔組合%不過量，其實無問題。

整體上，你持有整個組合，基本上都可以守，質素是有的，相信是你未能掌握平貴，在貴的價位買入。你要計下佔組合比例，如果單一股票佔比不過多，就守住先。

你應該在之後，加入一些較為穩健類的股票，平衡翻個組合。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21412：

你好龔成老師，我係你的澳門粉絲，一直有Follow你Facebook，期待你黎澳門開班

我38歲，已婚，有一個3歲小朋友，我從事保險行業，收入還不是太穩定，暫不需要供樓。

以家有如下資產：

銀行及儲蓄：
20萬現金放銀行作現金流
40萬收緊3%利息的每月理財產品
50萬派息基金，收緊6.5%利息（本金會有浮動）

月供股票：（今年3月份才開始供）
盈富（2800）：月供2000
金沙（1928）：月供1000
比亞迪（1211）：月供1000
港交所（388）：月供1000
騰訊（00700）：月供1000

股票：
吉利（175）：1000股@28.8
領展（823）：100股@73.5
長江（1038）：500股@41.4
小米（1810）：200股@27.5
泰格醫藥（3347）：300股@165
美團（3690）：300股396
阿里（9988）：200股241.6

想可以做到最大化的財富增值，聽過老師話選擇優質股長線持有的概念，但因為以家手持的好多都係跌，心有擔心。希望龔成老師百忙之中幫我分析一下合理嗎？需要做些什麼調整較適合？會唔會持有太多種類？十分感激

還有一個問題想問
聽人講可以買銀行股來代替銀行定期收息，亦相對其他股票風險較低，你建議嗎？耐心等待老師回答

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

其實你現時持有的，基本上都是有質素的，只是你在貴的價位買入，如果你未有捕捉時機，以及企業估值分析的能力，就建議你用月供或慢慢分注的模式投資，會較適合你的。

現時你現金在保守類產品較多，股票就較少，可以慢慢提高股票比例，以你的年齡，財富仍有增長力，加大比例可以的，只要不要太集中在潛力股類別就得。

現時月供的股票，都可以。只要長期進行就得，比亞迪（1211）現價略貴，勉強可以供，但就不要再加大金額。

至於持股方面，都有質素的，泰格醫藥（3347）佢係中國的綜合生物製藥研發服務提供商，主要經營臨床試驗技術服務，例如提供臨床試驗運作服務，包括藥物及醫療器械臨床研究，業務發展都唔差，同時都有一定的規模。

生意與盈利都有理想增長，賺錢能力唔差，不過上市時間唔長，數據的參考價值會減。

質素都有，長遠發展正面的，不過股價潛在波動較大，加上上市時間唔算長，唔建議投資太多。唔建議你加注。

至於美團（3690）有質素，但股價略為波動，業務有變數，你現時持有比例已差不多，不要加注，原有貨就持有。

至於其他持股，基本上無問題的。

你現時的現金$20萬，暫時可持現金，等機會。

反而每月應加大投資股票，例如加大月供，可同時加入平穩增長股及潛力股去月供。平穩增長股如盈富（2800），潛力股如恆生科指ETF（3067）都得。

至於銀行股同銀行收息，是兩回事，銀行股的股息會較高，但就有風險，你要因應自己的風險承受程度，以及投資目標，去決定。

------------------------------------------------

Q21413：

老師 想問物業股哪一個增長力最強 值得投資？873、6666、6098、3319？

龔成老師：

碧桂園服務（6098）及恒大物業（6666）的增長力，算是較強，當然，風險度會高少少。

先講恒大物業，有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

不過，現價少少貴，如小注投資持有都可以的。

碧桂園服務（6098）由碧桂園（2007）分拆上市，主要於中國提供物業管理服務等服務。

例如包括保安、清潔、綠化等，物業管理組合涵蓋住宅物業、商業物業、寫字樓、多功能綜合樓、政府及其他公共設施、產業園、高速公路服務站、公園及學校。

佢無論在業務本質、規模、品牌、財務數據、前景，都是理想的，反映這企業有一定的質素。加上有一定的現金流，背景發展等，投資價值絕對有，相信這企業的前景不差，有長線投資的價值。

但要留意，行業有時會有較大的炒作，股價上落大，要注意風險，而整體是有長線投資價值的，這股不少時間都在合理區頂至略貴的水平，投資唔好太大注，要慢慢分注入。

------------------------------------------------

Q21414：

我想請教一下⋯ 我之前錯誤地購買了6123 平均價8.8 有6000
最近股價都在$5 徘徊⋯

我應該點做？
繼續持有還是沽貨止蝕好？

龔成老師：

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。只可以話，這類股小注持有不是不可，但要明白風險因素。

如果持貨較多，可以考慮減少少，餘下就守，這股不是無質素，但相信你買入時炒作較多。

------------------------------------------------

Q21415：

老師，想問問根據分段買入優質股的方法，咁什麼時間應沽出部份股票獲利呢？以前一直大都只懂買入股份後多年沒有理會以致錯過獲利機會（例如：滙控）

是否要密切留意市況，例如什麼時候會出現牛三而進行沽貨呢？

龔成老師：

首先，我地只買入優質股。

另外，要衡量現時的平貴，自己組合情況、現金，去設定適當的投資策略。

如果升到貴的水平，可考慮賣部分，但如果企業優質，我會建議點都有一定的貨在手，不要盡賣。

另外，當大市處狂熱期，例如牛三全民皆股時期，就同樣可考慮賣出。

你之前的投資經歷，如果忽視了兩點，第一，你無計平貴，可能錯過了貴賣出時機。第二，匯豐（0005）及其他銀行股，都有一個情況，就是賺錢能力，比過往年代弱左，我過往都在銀行工作的，好明白佢地的賺錢能力，已不及從前。

當見到一間企業的質素及增長力下跌時，投資者都有可能作出賣出的動作。

------------------------------------------------

Q21416：

你好成哥，首先感謝你一直熱心解答我地問題，咁多年來除左教識我投資的正確觀念之外，亦都令我培養到一個波瀾不驚既心理質素。

想問下譚仔準備上市，你點睇佢既投資價值？

本人由細食譚仔食到大，對呢間公司有情意結，而且覺得佢連鎖化之後係管理同marketing都有進步，手上亦無類似版塊的股票，想問下值唔值得投資？

龔成老師：

初步分析，譚仔有質素的。

佢有品牌，有規模，以及有穩定的顧客，現金流強，整體不差的。不過，香港飲食業競爭大，同時入行不難，對是對佢扣分的地方，加上香港人好貪新鮮，因此佢都不能一定話品牌永遠穩固。

睇翻佢資料，譚仔及三哥品牌擁有超過二十年歷史，合共經營148間餐廳，包括覆蓋港九新界18區的72間譚仔餐廳及72間三哥餐廳、中國內地深圳的1間譚仔餐廳及新加坡的3間三哥餐廳。

根據2019年的餐廳數目，調查機構歐睿將譚仔列為香港亞洲粉麵專門店的第1位。

假設顧客每光顧譚仔100元的生意，食材成本佔22.9元；有31.1元是員工；約23是租金及折舊，扣除其他開支後，譚仔的純利仍有19.7元，扣除所得稅開支後，亦有17.8元的淨利潤，以香港經營食店來說，是高利潤的（不過，數據都是上市前的數據，所以不排除會執靚盤數上市）。

整體上，這企業都有質素，但不能定為最高質類，同時，增長力不能說是好強，這股如控制注碼，都可投資的。

------------------------------------------------

Q21417：

阿sir, 昨日我經過黃竹坑地鐵站，影左幾張樓盤上，立刻有兩個女門神企我左右隔離
有個仲追住塞咭片
黃竹坑地鐵上蓋

我覺得呢度最有投資價值
因為正頭喺地鐵隔離
而且除地鐵外其他交通都方便
附近都多野食

景我唔知望唔望到海
阿sir你有錢不如買下

我想買但冇錢
我喺黃竹坑做野睇住佢變
發展潛力好高

而且仲要喺南區
不過先睇埋佢開售呎價先

問左至少30000

龔成老師：

《5年買樓4部曲》都有講，黃竹坑係我其中一個睇好的地區，長遠一定有價值，不過，新樓的確好貴，唔會考慮，其實果度都有少量二受樓的，都可考慮。

我自己都是南區大，都見證當區發展，地鐵站，兩個站能金鐘，加上南區密度較低，工廈變商廈，價值一定有。

但我對新樓興趣不大，因為一般都有溢價。

------------------------------------------------

Q21418：

Ah sir，想再問下我現時持有3.43粒Bitcoin，現市值約160萬，計劃呢2-3個月內賣出一半或全部，套回現金後應該點樣部署投資？

我想5-8年內儲到1000萬移民，會唔會aim太高？

我30歲，現金大概10萬，有15萬喺投資收息保險基金(收每月約$900息)，約有20萬錢喺股票。

做零售生意已4-5年，銷售額穩定但唔算太高，每月七除八扣約賺2-3萬。

另外有份半職收入約15000(但計劃做到9月就會quit)，有個牌可隨時入返行。

但我負債較高，連公司借貸約仍有100萬未還清，每月大概還緊3-4萬。

我理財能力好弱，成日唔識點計好啲錢。

多謝你耐心回答

龔成老師︰

如果你要5-8年內，透過股票將資金翻幾倍，其實係好難。

假設投資回報有10%（連股息再投資），若你每月投資$10000 + 100萬本金，8年後大約會增值至350萬。這個回報程度，會相對合理。

在進行投資增值前，你要先審視負債部份。如果你負債利率係太高，我建議你先還清相關債務，才開始投資。因為高債息，係會好影響你長線回報。

收息保險基金，回報都有7%以上，勉強算係可以。但你要留意，這個回報率是否保證，將來係唔係一直維持到。

另外，Bitcoin本質來說，這是人為創造出來的，絕對不是「資產」，有沒有真正的價值。不過，佢可能有交易價值，但這個價值有多少，無人知。

所以結論就是，佢的波動會十分大，而你現時好集中在這項目，這會有好大風險，因此從整個財富的配置角度，宜減持。

將來贖回Bitcoin後，這些資金可以投資一些增長型股票。同時，你若每月有閒錢，都建議你用來月供優質股。

但潛力股波動性和風險會較高，若你係投資經驗較少，最多只可佔3成。到較大經驗，才升至5成左右。

現時大市在合理區，現金和股票比例，最好各一半。你每月閒置資金，可以先用一半做月供，其餘儲起。

將來有新資，如贖回Bitcoin後資金，都可按這個比例配置，去慢慢分注入貨，並長線持有。

但緊記，你做生意可能需要較多流動資金，作配置時，要先考慮生意部份。因為佢係你主要收入，必需排在其他投資項目之前，去優先處理。

------------------------------------------------

Q21419：

阿sir，近排開始了解債券，唔知阿sir有冇投資債券？

我見銀行可以買內房或其他公司的債券，自己研究左，想買雅居樂的內房債，出資和貸款5:5，利率大約有6-7%，你了解風險高嗎？

有些內房債(佳兆業)可以做到有11%，但有點怕所以唔考慮，怕佢違約。

之前睇左你的片，每月存1萬，5年可滾到100萬，真係好西利。

我計過下，要每年平均有10%回報先做到，請問當時你係投資咩？月供股票嗎？每年有10%回報都幾難

龔成老師︰

債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書。

我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

而且內房負債偏高，係一直都存在的問題，所以投資這行業的債券，係有一定風險。你要睇翻每間公司，佢現時的財務情況，以及該債券的評級，違約的風險。如果評級A，都可考慮，去到B級，就要小心。

而我自己無買債券，主要透過有優質股，好似比亞迪(1211)、金沙(1928)、中生(1177)等等，在合理，甚至平宜區時儲貨，之後長線持有，才累積到的成果。

當然，我組合未必每年都有10%增長。但我地投資係長線，當你拉長用多年來計，就會得出這個回報。

------------------------------------------------

Q21420：

我見你話「同一行業不能高過3成、同一股票不能高過15% 」，點計？(股票投資總額)計算, 是嗎?

龔成老師：

在股票組合內的比例，同一個行業，不宜多過30%，而同一隻股票，佔比不能高過15%。

方法是以長期的平均股價計算，例如過往一年的平均股價，再乘以你持股的數目，以每一隻股票你擁有的市值計。

不過，你唔需要執著每一個%，大約數就得，不用一過少少%就立刻賣出，因為這只是一個指引的參考大方向。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20541-20560）

Q20541：

龔sir, 你好.. 有野樣唔太明，好似你講優質股月供，如港交所、騰訊、比亞迪咁.. 如果不停月供，當佢股價不斷上升時，其實都會成本價高咗.. 咗不停咁做.. 唔會愈來愈高？

感覺唔著數
請教請教..

龔成老師：

我地最重要是睇平貴，如果一隻優質股，佢現價未貴，而長遠有增長力，就值得我地用月供或分注模式，不斷收貨，當然，都要留意佔組合比例不能過多。

我地最著重長遠的企業價值，因此會以平貴作買入策略，例如$20以下是合理，就算過往平均價是$5，而這刻股價$18，都可以適當投資，的確，這會控高了平均價，但如果這股長遠能去到$100，現價投資就值得。

你唔好比過往的買入價限死左自己，當你分析這刻$18時，如果佢長遠能上到$100，就算你眼見佢由$5上到$18，你這刻都值得買入。

------------------------------------------------

Q20542：

Sir,早晨，有件事想跟你分享。

我媽的銀行Link到我email（詳情不贅述）。幾天前我收到通知她買了8125，於是查看一下，發覺市價細、核數師曾經辭職、五年內4年虧損，仲要係建築界，完全中了上堂你所說的妖股。

於是立刻叫她放了，前日一早放了，然後昨天就暴瀉8成，真係好好彩，但亦夠嚇死人。深感上堂所學好有用。當然我已經千叮萬囑媽媽不要再買呢類投機股，希望她得到教訓。再次多謝你。

龔成老師：

太好了！

這股的確中了上堂所講的問題股因素。好彩你能見到佢買了咩股，今次真的好彩！

我相信你媽已清楚投資「優質企業」的道理，希望能之後能投資一些穩健股。你能夠活學活用，十分好！

------------------------------------------------

Q20543：

龔Sir，想請教下本人31歲，剛失業。有20萬現金，30萬股票，15萬外幣儲蓄。 丈夫每月月入2萬5，現供樓每月用1萬2千蚊，每月可儲5000左右。

本人現時有短炒股票，以每日平均賺千多月左右為目標，資金有一直增強。但最近大市好似唔太穩定，開始有擔心，對短炒信心愈低。

希望可以請教老師，如果希望未來十年可以有100萬增長，最終目標買多層樓收租，可以點投資？

現有股票

AIA(1299) 61蚊買
吉利（175）10.6買
微盟（2013）6.5買
京東（6618）149買
金沙（1928）27買
領展（823）55，65，66.7都有買入
匯豐（5）55蚊買入
雷蛇（1337）5.37買入
長江基建（1038）38買入

以上股票應否先止賺？

多謝老師先，留意你的page好耐，覺得你的價值觀同想法都很好。希望之後有機會能上你的課！

龔成老師：

第一，你現時失業，宜保守少少，留一定的現金，投資股票不宜太進取。

第二，我20年前，都是短炒者，炒左幾年，輸足幾年，之後長線投資，就開始不斷賺錢。

我好後悔當時浪費左幾年去學短炒，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒。

所以，我強烈建議你不要再短炒。

至於你現時的股票，基本上都有質素的，你可以長線。其實，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

微盟（2013）、雷蛇（1337）有潛力，但都有風險，不建議持有太多。匯豐（0005）只是收息，增長力不強，未必適合你年齡，如果股價上翻可轉其他。

現時你失業，宜保守D。

當之後正常翻，就可以加大投入，如果每月能投資$5000，連同你原有的資產，10年後預期能滾存$150萬以上。

------------------------------------------------

Q20544：

龔成老師，本人40多歲，大約有現金$200萬，尚欠銀行供樓貸款大約$60萬。請問：

1. 應該先還清銀行貸款還是用$60萬來投資？因現在供樓利息低；

2. 如用來投資股票，有什麼建議？比例如何？本人只有005一隻股票。謝謝！

龔成老師：

現時低息，你唔需要咁急去還錢，就算投資收息股得到6%回報，你都比還息著數。

如果你按揭有高息戶，只要存於該戶，已能對消部分的利息支出。

相信你是少少保守的類別，同時投資知識未必好多，建議你投資平穩增長股。你可以先投資$50萬，分注買入，餘下等有更多知識先投資。

你可以考慮盈富（2800）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

匯豐（0005）只是收息股，未必最適合你，不過你都可以持有，只要不加注就得。

------------------------------------------------

Q20545：

老師
我成日睇你啲post
真係好鼓勵到人
多謝你成日提醒我地要提早計劃
我18歲開始出社會工作
就知道先苦後甜呢個道理
所以一直都有草錢
但幾年前睇完你既書
即刻行動月供股票
依家終於有明顯回報
多謝你老師
我一定會繼續努力
向目標進發

龔成老師：

加油，我都是由零開始，慢慢累積財富，我成功以「儲蓄加投資」，穩步累積財富目標，我相信大家都可以。

這是長期戰，保持知識與財富的增長，加油！

------------------------------------------------

Q20546：

龔sir您好, 近期留意緊中國水務（855）同北控城市資源（3718）2隻股票，我見2隻ROE都唔差

同埋呢2隻都跟國策行，行業入門唔易，相對少啲競爭，所以我考慮中。

龔成老師：

中國水務（0855）集團主要在中國從事供水、污水處理及排水之經營及建設服務；固廢危廢業務；環境衛生和水環境治理服務；物業開發及物業投資。

業務發展不差，過往的生意與盈利都有增長，不過就不是高增長。

整體都有質素的，現價合理，都可長線。

北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區頂位。不建議這刻太大注。

如果講潛力度，北控城市資源較好，但就要注意股價波動。

------------------------------------------------

Q20547：

老師你好，我今年26歲。

2019年年中開始跟隨你專頁月供股票，每個月月供$6000，分別是：
$2000 恒地 （0012）
$2000 盈富 （2800）
$2000 比亞迪 （1211）

由於現時人工加了，又有見自己年紀應該能夠承受較高風險，和現時比亞迪價錢偏貴，因此希望每月月供金額增加$2000並轉為以下組合：
$2000 恒地 （0012）
$2000 港鐵 （0066）
$2000 小米（1810）
$1000 中生 （1177）
$1000 中國鐵塔 （0788）

這個組合的考慮是盡量投資不同行業，並選擇一些未來有機會發展的股票。

請問我這個組合會否太散太亂？應該如何改善？

另外，現時比亞迪的價格偏貴，應否沽出所持的比亞迪？還是應該繼續持有？十分感激

龔成老師：

你原有的貨，都是有質素的，可以長線持有。

至於新的月供，你停比亞迪（1211）可以。原有貨不用賣。

由於你年輕，其實可多少少增長力，中國鐵塔（0788）可以轉為安碩恒生科技（3067），無論在平衡度，以及增長力，都會較好。如果銀行無得月供，就自行每2個月入1、2手。

至於其餘幾隻月供的，無問題，可進行。

------------------------------------------------

Q20548：

龔sir，小弟從半年前就已經日日留意你的Facebook ，其中貼文、網友的留言、你的回覆，都全部過目，還有購買了你的5本名作，真的獲益良多，謝謝你，期待你來澳門開班，必定報名。

係呢半年時間，都聽從你既指引、你既推介去選股，目前已累積了30萬左右的股票資產，回報率大概有15%，但是隨著我不斷將現金去投入股票市場，心理出現了壓力，好驚冇啦啦黎一個股災

咩都冇哂，但我是明白持有愈多資產是愈好的，但始終克服不到這個心理壓力，請問應該如何去克服呢？

還有因不斷去看你的名作，留意你的Facebook 專頁，所以得知老師你已經持有緊比亞迪、小米、金沙、福壽園、必瘦站、中國生物藥制。除了上述幾隻，老師還有其他股票是也有持有的嗎？

另外還想問問必瘦站是水桶幾呢？謝謝

謝謝老師

龔成老師：

你擔心股災令你咩都冇哂，反映你的心理質素未夠強，正確的投資知識仍未夠，以及投資經驗不足。

你要記住，我地買股票就是買入企業，股價只是所謂的成交價，只要企業質素無變，就算股價下跌，你都不用擔心。你要盡力由「股價概念」，轉為「企業概念」，這才是真正明白投資。

正如我持有比亞迪（1211）12年，股價由十幾二十上到$88，再跌到$12，回大賺變蝕，我如果著重「股價」，相信一早對佢失望，但我著眼於「長遠的企業價值」，我等佢電動車普及，這要多年後的事，而這刻股價與佢多年後可以無關，因此，如果我被當刻股價影響，就無法睇清佢將來的價值。

建議你唔好成日計自己賺蝕幾多，唔好成日睇股價，放多D時間睇企業價值。

必瘦站（1830）是水桶1-2之間。

這幾隻已經是我的核心組合。

------------------------------------------------

Q20549：

老師，請問安聯環球人工智能股票基金 - AT/累積/港元投資得過嗎？現時我買入了10萬元

1709 我幾年前0.65入了少少，前幾個星期3.25放了，現時見佢有升到4蚊，如果我再入反ok嗎？感謝

龔成老師：

安聯環球人工智能股票基金我無研究，但我相信是一個投資人工智能主題的基金。人工智能長遠有發展，是值得長線投資的類別，不過現價相信都唔平，所以投資時最好控制注碼，或以分注慢慢收貨的模式進行投資。買入後長線。

至於德林控股（1709）主要從事服裝產品銷售及提供供應鏈管理總體解決方案；財務顧問及證券經紀服務；以及提供權益質押融資服務及借貸服務。

業務較為波動，盈利不穩，有時會出現虧損，加上有時會有炒作，風險較高。這股要較小心。唔建議你追翻。

------------------------------------------------

Q20550：

你好 龔sir
想問下你美股SPCE 維珍銀河
值得投資嗎？

龔成老師：

維珍銀河（SPCE）是有危有機類，潛力高，但風險高。

佢係一間總部位於美國的航空太空公司，為個人及研究人員開創載人航太事業，亦都係先進航空航天車輛的製造商。

佢利用其專有和可重複使用的技術，並得到維珍品牌客戶體驗的支援，正在開發一個空間飛行系統。

長遠發展有潛力，但不確定性都好大，要睇下風險承受能力。

如果能承受風險，小注不是不可的。

------------------------------------------------

Q20551：

龔Sir, 想問下 除淨日之後 放左只股票， 係味都當計有利息收？

例如： 之前已買左某股票，1/5除淨日，20/5派息，我係10/5放左呢只股票，那麼我係20/5都會收到利息，對吧？

龔成老師：

你會收到股息的。其實，只要在「除淨日前一日，你戶日有貨」，佢就會派息。

------------------------------------------------

Q20552：

龔Sir ！小朋友今年4歲，打算將佢每年的利是錢（大約$2000-$3000）

唔做月供，直接一手手買3067幫佢儲蓄長線可行嗎？

龔成老師：

可以，但唔建議100%投資3067，最好部分投資盈富（2800），你可以久不久買一手，這樣會較為平衡。

------------------------------------------------

Q20553：

龔成老師，你好，我來自澳門，一直有關注你的投資訊息，亦一直心存疑問，今天終於鼓起勇氣發信來問你，希望你有時間為我解答。

看了你的資訊後，才發現以往自己一直的心態和投資概念是非常弱和徹底錯誤的。

我一路買股票都是執平貨的心理，看那個股票跌了便入，而完全不懂去認真理解該公司的背景。

但我有一點還是不太明白，你說都要持有有質素的股票，而且股票是需要長線投資，只要認定一隻優質股票，便要一直長期持有。

但是，例如我已經將手上用來投資的金額，用了大概八九成去買優質股，我也不在他高位的時候沽，就算有相當可觀的回報的時候也不沽出。

那我手上豈非幾年都已經沒有再有多餘靈話的錢去投資其他？

我現在持有
0027*6@58
388*2@$456
305*4@$3.68 （好苦惱我應該要止蝕嗎？）
9988*2@$232
2840*50@$1366

請問我這個投資組合正確嗎？還需要有什麼加入或者取捨？萬分感激

龔成老師︰

我地投資股票，係希望買入一些優質企業，透過佢自然增長，達至財富增值目的。

但我地係唔係會永遠唔沽出，咁又唔係。

我沽出基於下列幾個原因：由於我買入的是優質股，若買入後發現自己犯錯，這股不是優質股，又或這股核心的質素轉差，變成非優質股，這時無論賺蝕都會沽貨。

又或是市況過熱，市場處牛市三期的狂熱狀態，例如2015年的大時代狂熱時，我便會採用多沽少買的策略，但當時的市況未到極度狂熱，所以我亦只是沽出了一部分的貨。此外，股價要是嚴重高估，例如市況狂熱，又或自身的原因令股價爆升，都有可能沽出。

若然你無法掌握到我上述所講的，可簡單用「升一倍、放一半」的原則，沽出後等同收回成本，餘下的貨就不用再理會，長期或永遠持有，因為這部分已經是淨賺。

五菱汽車（0305）在內地從事汽車零部件、發動機及專用汽車之製造及銷售業務。近期款新能源車「五菱宏光MINIEV」已較平民價出售，令銷售打嬴TESLA之餘，增長算理想。

但我地分析時，唔可以只用咁短時間，就去決定一間企業品牌。這個平價車模式，可否能為佢持續增長，依然係一個問號。

以佢過去幾年，最高單年純利都不足2億，但現時市值郤超過80億，己經係唔平。此股唔係無投資價值，但不宜持有太多。

另外，黃金主要係用來應對突發金融事件，唔洗多，大約組合3%就可以，而且以實金持有會較好。

其餘股票都有質素和增長力，可以長線持有。

------------------------------------------------

Q20554：

呀sir 你好 請問仲可以買80後百萬富翁呢本書嗎？ 我琴日行誠品 佢話你出千萬富翁 ，所以百萬富翁無晒，請問有冇方法可以購買到 ，感謝

我沒有看百萬富翁，可否直接跳級睇千萬富翁嗎？會否吸收唔到 ？ 謝謝

龔成老師：

《80後百萬富翁》剛剛加印了，坊間有貨的，你問多幾間，或訂貨就得。

而《80後百萬富翁》與《80後千萬富翁》是兩本不同的書，建議你先睇《80後百萬富翁》。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

------------------------------------------------

Q20555：

老師，想問6823嘅

想問下我可唔可以為長遠收息而重注(約八十萬)呢隻股票身上？ (見現價抵買同埋想揀一啲波幅較細嘅股票)

同#8 比較, 邊一隻值得投資？

你書同facebook嘅分析對我真係好有用，多謝你!

龔成老師：

香港電訊（6823）是不差的收息股，業務穩定，派息穩定，收息無問題，不過增長力就不強。

你可以投資，不過，不能過度集中。

因為單一股票一定風險，我地應建立一個「組合」，令風險分散。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜，因此買入時宜分注，同時不能用盡現金。

------------------------------------------------

Q20556：

你好，之前見你出過片，話加息會令股市向下，其實我唔太明，可唔可以講多少少？

龔成老師：

如果現時無風險利率為1%，收息股的股息率回報是4%

當加息發生：

無風險利率我當佢上到3%，如果投資收息股的股息率回報仍只有4%，你會買嗎？我買無風險工具的回報都有3%，我要面對風險得到4%？

所以，收息股的市場要求回報率就會上升，例如上到5%、6%，這有兩個可能性，第一，股價下跌，第二，股息增加。

當然，背後有很多複雜的因果關係與運作，你明有上述的大方向就得。

------------------------------------------------

Q20557：

龔sir，我是你上年股票班的學生，多謝老師教導，上年將資金分段入市，現已賺了幾倍學費。

我在上年買入3033， $7.80。現已升到$10.50，我想加注，但又不知如何估值，（上年才上市）,不知幾錢才是貴，請問應如何做？謝謝老師。

龔成老師：

由於這是一個基金，我地在估值時會較難，其中一個方法，就是分析這基金的10大持股，睇翻佢地現時的平貴，去初步推算一個基金的價值。

現時大約略貴，如果回翻1成，會近翻D合理區。

如果你現金好多，就現價開始，慢慢分注買入。

如果現金比例合理，就算跌多1成先考慮。

------------------------------------------------

Q20558：

早晨,想你給予意見:

我幾年前高位買左隻656
18元，然後12溝貨，希望可以回本賣左佢

現在大市大升時，佢又沒有跟著大巿升，恐怕大市回落時，12元都沒有機會走

究竟應該怎樣做？
唔該

龔成老師：

最重要是分析企業本質，唔好比自己的買入價心理限制。

復星國際（0656）業務有研發、生產、銷售及買賣醫藥及健康產品，以及提供醫療服務及健康管理。

另外，佢亦有旅遊及休閒、時尚及體驗式產品、保險、銀行及其他金融業務；投資及資產管理；以及物業開發及運營業務。業務多元化。

這企業業務不算差，但盈利有點波動，盈利有時會大跌，影響了企業價值。

這股都有投資價值，但增長力就不算好強。

你可以守，但唔好再加注，同時佢要上翻$18不是短期事。

------------------------------------------------

Q20559：

老師，您好呀！多謝您上次嘅回答！
由於我唔係香港，所以唔可以嚟上堂。但係我會買你嘅書睇，希望你可以推介一下邊本比較合適！

另外，其實我約10年前開始投資，中間有賺有蝕，因為出出入入。睇咗你個 posts 之後，我都有再跟你推介嘅投票去買吓。

(1) 以下係我嘅股資組合，本人 39 歲，想知道邊隻要放棄，不值得長期持有。我想增長得快啲！

818 3.98 x 6,000
1 85.95 x 500
386 6.23 x 6,000
405 5.30 x 5,000
939 6.90 x 4,000
1288 21.10 x 1,200
548 7.17 x 2,000
700 474.40 x 100
823 67.00 x 200
1928 34.25 x 400

(2) 我仲有 $10萬，仲可慮邊股票呢? 都係想增長嘅。由於唔係香港, 所以做唔到月供股票。謝謝！

龔成老師：

你可以睇《股票勝經》，這是最入門的。

1）我地最重要睇企業質素，不是買入價。

高陽科技（0818）質素雖然有，但股價上落大，不宜持有太多。

至於0386、0405、0939、1288、0548，都是收息股，這些股不是不可投資，因為都有質素，但你39歲，其實財富仍有增長力，收息股比例不用太多。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

你這年齡，可投資「平穩增長股」。

2）你可以自行分注買入：盈富（2800）、港鐵（0066）、平安（2318）、希慎（0014）等，你可以了解下這些股票，然後從中選股。

再慢慢分注加入：安碩恆生科技ETF（3067）。

長遠建立一個平衡的組合。記住，同時要留有一定的現金在手。

------------------------------------------------

Q20560：

老師你好
我係股票班既同學，現時22歲
希望你review下我既投資計劃

而家每月會儲6000
其中2000現金
另外4000月供
1. 0027 銀河 2000每月
2. 1177中生製藥 2000每月

現時持有以下股票
1. 1手 1211比亞迪
2. 3手 1928金沙
3. 3手 2800盈富

月供計劃既進行左3個月
揀呢2隻係因為我睇重佢地潛力較多
更多發展空間
銀娛未來會有新計劃發展

相信繼牌不成問題
中生制藥則有不同藥品既專利
雖然旗下新買入既供應商有隱憂
但係政府支持下應該冇問題

我既問題如下：
1. 現時投資組合如何

2. 會否持有太多博彩業既股票

3. 暫時有冇值得留意既潛力股 除左1448福壽園

4.係計算價格範圍時係咪等同計算公司價值

因為我睇巴菲特既書話價值有計算方法但都只係一個範圍而且每人都唔同。感謝

龔成老師：

1）都是有質素的股票，但就比較集中在數隻股（可能你剛剛建立組合不久，如果長遠，應該建立一個更多元化的組合）。

整體問題不大，都是有質素，可長線的。

2）少少。所以長遠要調整翻個比例。你不用賣出現有股，只要長遠你要計算，行業%要慢慢減翻。

3）現時真的好多潛力股都唔平。小米（1810）都可留意，但最好回多少少。另外，3067都可長線的，不過投資時要慢慢分注買入。

4）正是。

企業價值，只是一個概念，當中有主觀成份，同時可以用多種估值方法，去計算的。而我平時講的合理範圍，就是計算出來的企業價值，這只是一個參考數。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20481-Q20500）

Q20481：

老師，我整嘢食都有啲天份，自家製XXXX都人人皆讚。

我有一個想法，想開拓自己的另一事業，如網上賣以上的産品，我應該從邊方面入手呢？請老師指點迷津

龔成老師：

當然可以。

你最重要是找到自己產品的獨特性，因為市場上已經有你這些產品，你怎樣令人記得你，買你產品？

你不要同你比做到最好，而是要有「自己的特色」，這是最重要的。

建議你「集中開發」某些產品。不要雜，要專。

另外，你要想想怎樣將產品「市場化」，一個好食的產品，不等如好賣，想想麥當勞，當中的包要造其實無難度，但就無人有佢咁賺錢。

另一點，你要建立宣傳及銷售網絡，網上是一個方向，你可以開始自己的網上銷售，可利用不同的方法宣傳，例如教人整野食，怎樣用你的產品等。

你其實可以從身邊人著手，慢慢擴大銷售網絡。

「銷售網絡」是最難的一步，你未必會好快見到效果，但就要多想方法怎樣做好。加油！

------------------------------------------------

Q20482：

老師您好，今年30，工作穩定持有一個自住物業。本身唔太鐘意短炒所以比較少接觸股票，由上年開始留意你的fb才開始嘗試投資。

本身已穩定月供3000盈富同每月少量買入3067。

現預留20萬現金希望再投資增長比較高的潛力股，計劃10萬以月供股票形式每月供
阿里3000、港交所2000

另外10萬預留大跌市再入貨，請問方向同配置正確嗎？

另上年已經睇好比亞迪，但當時初試投資比較保守最後決定供盈富基金。想問如果以而家價位再係上面的組合分出位置月供比亞迪會唔會已經唔太適合 / 應該去到邊個價位先再入手會比較理想？

感謝，祝身體健康。

龔成老師：

你持有盈富（2800）及3067，方向正確，長線持有就得。

你月供阿里（9988）、港交所（0388），可以，這兩隻都是有增長力的股，適合你年齡。只要長期進行就得。

再預留$10萬等跌市入貨，可以。

至於比亞迪（1211），潛力股，但現價貴，擔心你買貴左，可以等回翻少少先小注，又或者考慮：GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q20483：

龔成老師，你好。本身無乜股票同投資概念，最近先有緣睇到你既fb page，想問返你其下既書for我哩個情況應該睇邊本先？

同埋想問點睇個價值唔值得入？我見你話可買盈富個d,但其實而家3x 我係咪要等佢低返d先買定其實都可分批入手？謝謝

龔成老師：

你可首先睇：

《80後百萬富翁》
《股票勝經》
《財務自由行》

之後再睇其他。這幾本都是適合初學者的。

至於盈富（2800），現價未算貴，但當然比之前上左唔少，所以，可以用月供，或者分注投資的策略，只要同時留到現金就得。

或者你可以現價小注買入先，等跌先加注。

------------------------------------------------

Q20484：

龔Sir好，請問可以評價一下我現時持有的股票組合嗎？該止賺止蝕還是持有？謝謝您的幫忙

175、305、941、1810、2333、6666、6690

龔成老師：

上述的股票，基本上都有質素的，問題不大。

五菱汽車（0305）質素算中等，不建議持有太過多。

雖然潛力度有的，但同時都有風險。

近期款新能源車「五菱宏光MINIEV」已較平民價出售，令銷售打嬴TESLA之餘，增長也算理想。

但我地分析時，唔可以只用咁短時間，就去決定一間企業品牌。這個平價車模式，可否能為佢持續增長，依然係一個問號。

以佢過去幾年，最高單年純利都不足2億，但現時市值好高，已經係唔平。近期此股急升了不時，此刻投資有一定風險。

如果以長遠角度分析，佢主要業務為於中國從事汽車零部件、發動機及專用汽車之製造及銷售業務。為中國商用微車發動機及汽車零部件之領導製造商，製造設施設於柳州及青島。

最近有中國品牌電動車大賣，而五菱汽車有做供應所以在當中有利益，因此都有潛力度，但真實的市場情況仍要觀察。

另外一個問題，你持有多隻與車企，你要留意集中風險。

至於恒大物業（6666）其實都有質素，不建議持有太多，因為負債交。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

但負債高始終有風險，同時令股價上落較大。

------------------------------------------------

Q20485：

老師你好..我認識你是透過FB, 看完你幾個post 同YouTube video 覺得你説話很像我爸爸，不知道為什麼他說話我就是不聴，外人說的就好像很有道理。廢話少講吧！

我有兩件事唔知點解決，若你有空，可以給我小小意見
。

背景：我是一個單親媽媽40 歲，在航空公司工作，疫情之前年薪over $100 萬，也算是中產，屋企及孩子所以支出也是我負責。

因為這個疫情，航空公司工作近乎停頓而我也差不多1年三個月沒有收入...這段時間也是靠積蓄過活，不過我相信疫情過後，旅行社必有光境。

在這段時間我付出25萬與朋友創業，這行業不是我專長，所以我唔知怎樣做...原因是舖頭，開張差不多三個月一單生意都冇

因為支金有限我們又不知怎樣做宣傳，怕浪費了而不見成效，舖頭每月開支大約$30000，老師你可以比點意見我怎樣走出這個困境？謝謝

龔成老師：

其實初次創業，應該做一些自己較認識，以及較了解市場的類別，要見到有市場先去開鋪，不能開左舖先知當地有無市場。

現時的情況，你怎樣找到市場，你要了解翻，現時你所賣的產品，有無市場？市場在那裡？你怎樣將客戶引到你的店裡。

首先，你盡快了解同行成功的例子，他們是怎樣運作的，他佢的地點怎樣引到客，還是他們有一批固定的客。

可能你店舖的地點，人流並不是你的客源，也有可能是你地店舖的吸引度不足，建議你找一個做過生意的朋友，上去你舖睇下，睇下有那些問題。我相信一定有些核心問題，你要盡快處理。

有時不一定是宣傳問題，你仔細了解市場先睇下點行下一步。

------------------------------------------------

Q20486：

龔老師你好，半年前開始追蹤你專頁，多謝你灌輸正確投資概念。半年來我跟隨你建議的方法開始建立自己的股票投資組合。

在最近開始在朋友身邊聽到有債券基金年息有6-10厘，並每月派息。最近更發現有朋友按樓400萬來購買這些基金。

本人一直心存疑問，這樣還需要上班嗎...所以我也不太相信也沒理會。但昨晚太太問我關於賣出ibond事情，一問之下發現她有購買這些債券基金之意。

所以今次突然請教龔Sir, 這些基金到底是什麼東東？為什麼會有那麼吸引的利息。謝謝！

龔成老師：

利用加按物業，得到資金，投資這些高息基金，的確能創造息差，因為現時按息低，大約是2%，加按得到資金，然後投資高息基金，例如高息基金有10%，就能創造8%的息差回報，提高了每月的現金流。

當然，所有事情都有風險的，而我地最重要是明白當中的利弊。

首先，「債券基金」跟「債券」有所不同，債券基金坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

債券是到期收翻本金的，債券基金則不是，價格可以上落的，即是有「賺息蝕價」的可能。所以，當息率去到10%，反映基金投資了不少垃圾債券，風險自然更高。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

這點好睇基金經理及市況，如果市況不利，價格可大跌。

第三，加按物業，以槓杆去放大回報，以平息借貸去賺取息差。低息環境時間題不大，但如果日後進入加息週期，不止借貸成本增加，同時債券價格往往在加息期下跌，雙從打擊下，要小心。當然，若然加息步伐不快，息差利潤就可觀。

如你決定投資債券基金，必需理解當中風險和仔細分析。

我並不是說這些基金有問題，而是你要明白當中的風險，利弊。

------------------------------------------------

Q20487：

261gba集團可以买入吗?

龔成老師：

ＧＢＡ集團（0261）主要從事物業發展及金融業務，生意持續下跌，年年虧損，投資價值很低。

不要以為股價1仙可以無得跌，佢可以利用合股，將股價變大，到時可以再跌。

------------------------------------------------

Q20488：

龔sir, 我有朋友未買過股票， 佢對美股有少少研究， 想買啲優質美股e.g. 蘋果，迪士尼。

但問題係，美國無限qe, 而家美股日日升， 我朋友懷疑個市值遠超企業內在價值，因此現時不適合買入。

但佢又驚 唔知要等到幾時個市先會跌， 佢知道長渣現金 只會不們貶值。

龔sir覺得， 無限qe下 ，美股會形成泡沫嗎? 但又好似冇咩原因會令佢出現熊市，再者，龔sir認為現時美股仲可入市嗎? Thx！

龔成老師：

蘋果，迪士尼都是有質素的股票，當然現價唔算平，可以用分注投資的模式進行。

我唔建議100%現金等，最好是買入基本的貨後，再等跌先正式買入。

其實，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

至於泡沫，現時新經濟股的確有少少熱，所以我地投資時要明白這風險，但無人知幾時升跌，佢可以再上的。我地最重要是睇「企業長遠發展」，中短期股價走勢，就不要太多分析。

------------------------------------------------

Q20489：

老師你好!我最近煩惱緊一件事，希望能聽聽你的寶貴意見。

我和老婆2人現住在一間未補地價的居屋，每月供款13000，樓齡22年，因未補地價所以有一些限制，例如不能二按、不能隨便轉名和再過幾年就好好好難賣出去(因銀行今年都只批17年按揭了

樓齡越大銀行就越少按揭的，因為政府吾做擔保人，白居二或綠表人士要拎四成首期先可以買即超過200萬，拎得出的都去買私樓吾會買咁高樓齡的居屋了)，所以我們現時有三個想法，但吾知個最可行:

現時層樓未補地價市值500萬，300萬時購入，月供13000，2人收入48000

1.賣出去扣除銀行按揭後有250萬現金流，拿200萬做首期再借銀行500萬買一間700萬左右的樓，月供大約21000左右。餘下50萬用在裝修、印花稅、律師費、經紀佣金等費用上

2.直接補回現住單位的地價，向銀行供多200萬，現時地價大約200-220萬(未核實但是這個範圍)，咁就省回時間、裝修、印花稅、律師費、經紀佣金等，現時欠銀行250萬再加200萬即欠450萬。

3.維持現狀，每月供款13000，儲備多些現金流投資股票，但層樓N年後就賣吾出去銀行都吾做二按，如果日後移民都吾可以變動為資產，因未補地價要暗盤先可以租，政府最新政策只可以租一半

即兩間房的未補地價居屋可以放租一間房出去，但實際無咩人咁做的。坊間都有財務公司會借錢俾未補地價的居屋但息好高而且還款期好短，所以吾會考慮。

我同老婆都33歳了，準備要小朋友，有穏定工作，疫情對我們無任何影響，現時就煩惱樓，如果揀1換樓，計過條數其實都無賺的

因都系要孭住咁多債，住的單位面積一樣無變到，仲要浪費時間重新裝修過，我現時間屋其實新裝修4年咋，投咗40萬落去，但換樓就可以多個選擇，揀吾同的私樓或已補地價居屋，我哋都偏向揀返同區。如果揀2，補地價200萬真系貴!

好多人話吾值，寧願額外儲200萬買其他單位收租，我計返我買入價加現加補地價即500萬買入這單位，自住的話又吾覺好貴，但都明白朋友的說話。如果揀3，維持現狀生活就會輕鬆好多，無咩負擔

但吾知道將來會發生咩事，吾補地價又有點擔心年紀大後想移民或搬去其他區都無能力，因為層樓賣吾出去。

我哋都吾知點好，好煩惱，12月上完你的投資股票班後，就很想問你的了，每次上堂時間都很緊湊，未能親自問你，落堂後已過10:30，我住得遠所以都無留低請教你，依家真的諗吾到邊個方案好，唯有打擾你的寶貴時間了。謝謝你!

龔成老師：

以你現時的情況，（3）是最好的。

因為你地打算自住，（1）的投資價值及財富增值雖然較高，但對你地較吃力，同時如果你地純自住，就不用行（1）一步，因為現時的物業都有相同作用。

至於（2），不是不可，但不用太急做，除非你認為這刻樓市好平，但我相位香港樓就算長遠向上，都不是過往倍升模式，所以不急於進行。

所以，暫時就以（3）為主軸。

因為你打算有小朋友，變數較多，這刻先以（3）是較好，同時你在這段時間努力儲蓄、財富增值，日後如果資金足夠，先再考慮是否行（2）。

我覺得你這刻先做好這刻的財富增值，準備好小朋友方面的支出等，之後再睇情況進行下一步。

------------------------------------------------

Q20490：

亞Sir，好高興認識你。喺理財同埋正能量方面跟你學嘢真係獲益良多。

今日唔問你關於股票嘅問題，因為遲d會上你既股票班。

反而我想問亞Sir你睇咁多書，你有冇一張「推介書單」，無論係正向思想或者你覺得好既書我都想知。

P.S. 你所有既書我已經買哂
而家睇咗大概一半

龔成老師：

以下是我認為適合初學者睇的書：

《我十一歲，就很有錢》
《經濟蕭條中，七年賺$1500萬》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

（當然，仲有我的書，哈）

------------------------------------------------

Q20491：

你好龔sir，我今年28歲，無投資經驗，手頭有二十萬現金。想問若果以下投資方法好唔好？

銀娛 一手
盈富、領展及港鐵各月供兩千

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你計劃持有的股，及月供的，可進行。

對於投資能力未強的投資者，盈富是很好的工具。

另外，你都可以小注投資安碩恆生科技ETF（3067），但就要明白波動性比上述會高左，同時風險大左，你要自己決定是否投資。你的年齡可以投資較有增長力的，但同時要明白有風險。

現時大市處合理區，可以一邊投資一邊留現金，建議你要留$10萬現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20492：

龔成sir你好，上次詳細問你問題已經差唔多過左兩年，現時30歲，呢兩年我一直月供盈富$5000，累績14萬，成效覺得幾好，會繼續。

另外有留意最近你介紹的安碩3067，上個月都開始進行一手手咁買，儲股票。

現有手頭上既股票有：
領展
金沙
中生
盈富
安碩
阿里巴巴

睇到現時股價狂熱，唔敢亂入貨，之前領展同中生就係較高位入左，不過以上都係你介紹既優質股，所以會繼續持有。

請問龔成sir以上股票組合仲可以增加邊類股票？或者應該點樣再調整？除左盈富同安碩，其他股票需要等大跌市先再適合入貨嗎？

另外黎緊今年準備新上市既股票你認為邊隻會比較有質素可以少注抽？我比較關注滴滴出行上市，請問龔成sir點睇？

多謝你既分享，令我哋學識唔好亂炒股票，雖然我一開始資金有限，miss左你一直睇好既比亞迪，不過我相信繼續學習就會有能力做百萬富翁。再次感謝

龔成老師：

你現時持有的，都是有質素的股票，你保持持有就得。加上上述不少都是舊經濟類別，無過熱情況。

如果其他股票想入貨，領展（0823）、金沙（1928）仍合理，只要控制注碼可以，而阿里（9988）$250以下合理，你本身有貨，可以等這個位再落多少少加注。

其實你上述的方向正確，保持增加優質股就得，而新經濟類股，就要控制注碼去增持。

至於新股，你可以留意一些獨特性較強的，較難被取代，以及無乜對手的。滴滴出行我相信有投資價值，不過要到時分析先知。

------------------------------------------------

Q20493：

龔成老師, 之前問過你一些股票問題. 前陣子公司大裁員亦得到龔成老師一些提点.

今次有一些投資方向想請教老師. 因為前陣子大裁員關係, 想起自己供了 20 年的 pfund. 20年裡只看過它一次.

幸運的是原來一直揀了高風險投資. 現有大約85 萬. 但由於航空業仍然不景氣, 心怕再有另一次裁員, 又怕世界經濟不穩,

怕如果自己的 pfund 继續放在 high risk, 萬一跌價, 公司又裁員, 怕原有的 85 萬也沒有. (如果公司像以前的稳陣, 我不怕短期的跌價).

所以我正在考慮是否应該將大部分投資轉到中或低风險, 以確保可保本？

但又有朋友說投資市場仍然處於高回報位置. 所以不知怎樣選擇. 之前亦已向老師提及自己年記不輕, 再可以出外我闖的机會不下....

想老師給予一些意見. 謝謝你.

龔成老師：

其實，強積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。

只要按你的年齡，長線配置就得。我自踏入社會工作後，一直都是100%恆指，無變過，根本唔需要理會。

你工作了20年，我相信你是時候，將資金轉到「中等風險」的類別，加上你強積金應該上升了一定數，這時候轉都是時機。

你可以將部分或全部，轉到「平穩型」的類別。但你又不用太保守，因為你未到退休時期。

------------------------------------------------

Q20494：

2018年年底上完老師的堂後開始月供股票如下：
#2800～$12000
#0066～$5000
#0003～$3000（供了兩年，剛停供）
#0002～$3000（供了兩年，剛停供）
#1211～$2000（供了兩年，剛停供）
（多謝阿Sir！！！）

#1398～$2000（供了1年，停供）
#0012～$2000（供了1年，停供）
另有幾手#2638

剛開始月供：
#3067～每月買2手
#9988～$3000
#1177～$3000

想問：

1、希望5年後能每月產生$20000現金流，配置合適嗎？欠收息股？#778什麼價位可入？

2、應如何理解#0003？因派股所以價位會低咗？要繼續月供嗎？

3、#0012、#1398 於2019年一直跌，有D失望，要止蝕？

4. 當年月供 #1211，都係當幫兒子儲蓄，結果⋯⋯他大賺，我則只賺5%。應如何有效投資優質潜力股？

謝謝老師用心分析、慷慨分享！

龔成老師︰

比亞迪（1211）你的持貨，可長線。另外，等佢落翻多D先啟動翻月供。

1） 如果你希望5年後每月有2萬蚊現金流，以股息率5%計，你需要本金480萬。

現時組合合適，由於你需要係增值，收息股的增值效果好一般，唔建議加入。

以恆指過去年平均回報10%計（連股息再投資），你每月投資$20000，5年後只會增值至約150萬。如果要達至你的財務目標，月供金額就需要增大或供更長時間。

現時大市只在合理區，資金唔好盡用。最好留有部份，等大跌市出現時，可以用來掃貨。

2） 煤氣（0003）是優質股，業務理想，可以保持月供。

以往10送1只是數字遊戲，你唔會有真實得益。因為送股後會除淨的，令股價向下調整，每股權益減少，因此前後根本是一樣。

我舉一個例，如果有隻股1送1，之前股價$100，除淨後會自然變成$50，你財富係唔會因為咁而增加左1倍。

3） 唔好因為中短期股價波動，就去沽貨。我地持有一隻股票與否，關鍵位是企業質素、前景，不要被股價變動所影響。

2隻股票都有質素，但工行（1398）收息為主，唔適合你。

4） 潜力股增長力係高，同時風險都係大。而且每隻去到真正爆發時間，都可以好唔同。

係做資產配置時，我地組合唔可以只顧長潛力，咁會太高風險。我地要加入一些"平穏增長股"，去平衡個組合。你按現時月供計劃去做，已經可以。

------------------------------------------------

Q20495：

龔sir，另外，我見你好推薦月供3067安碩恒生科技，我初接觸股票吾太清楚點樣月供，係應該每月投入固定金額還是每月買入固定股數？

而家開始做月供算吾算高位？
係每月隨機時間買入？謝謝回覆

龔成老師：

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入安碩恒生科技（3067），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF，如3067。

不過，我見好多銀行都無得供3067，或者你可以自行分注去買，例如每隔2個月，入1、2手。

3067現價略貴，但都可以小注，慢慢收貨。

------------------------------------------------

Q20496：

龔成老師，你好，有少少問題想請教一下你，謝謝！
我想問你平常提及需要長線投資優質股，咁幾時先可以走？

現在股票暢旺，可能一兩個月已急升30-40%咁唔走又驚佢跌返落去，走咗又驚買唔返，咁應該點作決策？謝謝指教

龔成老師：

如果股價去到貴的水平，你賣部分是可以的。

不過，建議點都有D貨是「長線持有」。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你賣出優質後，持有「貶值的現金」，怎樣增值？

可能你會認為，賣出等跌再買，是最好的策略，但無人知會唔會跌。

如果你停留在「要賣出」的概念，你就捉不到騰訊（0700）、港交所（0388）升100倍的回報！

------------------------------------------------

Q20497：

你好龔成老師，現為全職媽媽，沒有積蓄，所以想學投資，準備儲蓄去投資，打算為快1歲囡囡的儲備，我都買了你的書學習中

但對投資完全沒有概念，請問如想佢長線穩定的投資應該買什麼呢？

現有幾萬，希望能買一些穩定派息或長遠能有一筆投資儲蓄留給囡囡，謝謝

龔成老師：

你可以考慮ETF，即是交易所買賣基金，由於當中已包了多隻質素不差的股票，因此，對投資新手來說，是一個很好的選擇。

如果你想平穩增長，可以考慮盈富（2800）。如果你想收息，可考慮高息基金（3110）。

你可以用月供股票的模式進行，原理就是儲股，每月投入，慢慢累積，我相信最適合你。

所謂的月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF，如盈富。

------------------------------------------------

Q20498：

你好，我囡囡依家20個月，本身冇買儲蓄保，佢加加埋埋有八萬，想運用呢八萬做投資增值，請問阿sir有咩建議？謝謝你！

龔成老師：

首先，你要留有一定的現金，有家庭負擔，要留有一定的防守性資金，我地理財，要「穩中求勝」。

餘下先考慮增值。

最簡單你可以考慮盈富（2800）。

另外再加1、2隻：港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）。

如果不懂選股，投資盈富是最適合的。

------------------------------------------------

Q20499：

龔sir你好，想問如果我買中國移動 PCCW 港鐵呢3隻股票，呢個組合o唔ok？

龔成老師：

可以，中移動（0941）、港鐵（0066）有質素，可投資，現價合理。

至於電盈（0008），雖然業務算穩定，但由於負債較多，因為不是無風險。

這股作為收息股，可以，但增長力不強，同時負債多有風險，不建議大手投資。

------------------------------------------------

Q20500：

你好，龔sir。有問題想請教你。先前發現屋企欠人錢，拎左一部分去還，而家戶口得番10k左右。

因為咁，上年12月開始擺20K/年 係儲蓄保險到 (供5年)，我想開始買股票(唔買應該買唔到)！我應唔應該就咁買唔月供，你先前講既盈富？

另外我需要做其他部署嗎？例如搵多份part time?
目標: 今年想儲番20萬

龔成老師：

我地理財，要平衡，儲蓄保險是防守性工具，你可持有，但不用太多。

餘下的要進攻，你投資股票是可以的。

但由於你現時現金不多，建議你先有基本的現金，然後再開始月供股票。

月供盈富（2800）或其他優質股都得，如果想有較高增長力，就考慮3067（但佔比不宜太多）。

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。