《出Post唔夠Likes就要被人道毀滅》

8：30PM

「今日係社交網絡滅罪法實施一週年嘅日子，警察部門表示，去年嘅犯案率整體下降咗28%。」

新聞報道員繼續字正腔圓咁讀出新聞稿：「社交網絡滅罪係由祖國官方發起，經由本地政府成立專責小組同專家研究後，發現喺社交網絡上唔受歡迎嘅人會有人格缺陷，具有反社會傾向，絕對係潛伏喺人群中嘅危險份子。有見及此，政府喺上年立法規定，所有市民都必須實名申請一個社交網絡帳號，更新時間同次數不限，但每月獲取總讚好數唔夠3000，就要被人道毀滅。」

家明一邊開住電視，一邊憂慮地Refresh自己嘅社交網頁，佢望一眼牢牢套喺左手手腕上嘅電子環，喺透明藥劑下，青藍色如葉脈嘅靜脈清晰可見。

今日就係截數日，但電子環上顯示嘅Like數只有2717，即係話仲要有283個Likes先可以安然度過今個月，但係283並唔係一個小嘅數字⋯⋯

新聞繼續播出社交網絡滅罪法特輯，警務處處長被記者扑咪時表示：「社交網絡滅罪法可以話係一項非常成功嘅人口優化政策。」

「優化？」家明撳熄電視，長長呼咗一口氣，然後更新咗自己嘅Status：

「陳雲先生早在2009年已撰文狠批政府濫用『優化』一詞：

殖民地時期，雖然不言革命，但簡單的事情可以『處理』、『做好』、『辦妥』，制度可以『改良』、『改革』，公共服務可以『改善』，有把握一次改好的，可說『完善』⋯⋯不像回歸之後，大小事情都辦不好，幾乎全在『優化』之中⋯⋯『優化』是官場廢話的新品種。」

家明係一個中文老師，對於近年學生中文程度嘅滑落，佢既憤慨又氣餒。以往佢都係將自己嘅語文知識寫喺社交網絡，有時寫下書評影評，有時會指正報章雜誌嘅錯字同句式，開頭幾個月Like數都尚且安然渡過，但慢慢慢慢，每個月都只係僅僅夠數，今次係第一次面臨唔夠數嘅關口。

家明又再F5咗一次，啱啱嘅Status唔單止冇幫佢增加到Like數，Friend List仲少咗三個朋友。憂慮漸漸爬上心頭，佢用手背印走額角上嘅汗，然後決定去「名人榜」參考其他人嘅吸Like做法。

所謂嘅「名人榜」，即係每個月頭一百個最多Like數嘅人士，開頭大家都以為名人榜一定係啲歌手名人政要，但原來喺社交網絡嘅世代，佔據名人榜嘅都係以普通人居多，有人話Like數夠幾多幾多就直播自己食屎飲尿嘅實況，有人戴住GoPro同另一半親熱，男女視角各一款隨看倌喜好選擇，又有人Cap晒同事朋友甚至屋企人嘅對話出嚟大爆對方嘅私隱同秘密，所有你諗到同諗唔到嘅煽腥色話題，都可以喺名人榜度搵到。

Andy Warhol話每個人都有十五分鐘成名時間，可能係呢個世代嘅最佳注腳。

家明自問做唔出以上種種，而且佢並唔係想成為人哋口中嘅KOL，佢只係想要283個Likes去保命。

8：48PM

家明一口氣飲晒杯中嘅冰水，用力拍打兩邊面頰打醒精神後，佢決定轉去睇自己Friend List入面嘅朋友，或者普通人嘅做法會較為可取。

Gigi Upload咗一張喺曼谷酒店泳池嘅Bikini相，連Caption都唔使，已經有598個Likes。

家明望一望自己個樣，恐怕如果擺張自拍相，只會畀再多幾個朋友Unfriend。

既然此路不通，只好繼續Loop。

佢見到教PE嘅張Sir抱住一隻貓影相，寫住「我成為貓奴了！」，只係Post咗短短45分鐘，已經有成442個Likes。

佢明明記得張Sir以前講過自己有鼻敏感所以養唔到小動物，而且要照顧一隻寵物嘅起居飲食對佢一個大男人嚟講亦都好麻煩。

家明再仔細睇下Like咗呢個Post嘅人，發現絕大多數都係學校嘅女學生。

自從社交網絡滅罪法實行之後，人人都係好好先生，喺現實生活要盡量表現得熱情友善，同每一個人都保持良好嘅關係，咁樣喺網絡上多數都會得到多啲Likes。

正因為咁，幾乎所有佢認識嘅老師都好似變咗做服務性行業，學生有錯時唔會再出言指正，上課時亦唔再係以教授知識為主，而係要想方設法去討學生歡心。無疑張Sir喺呢方面做得相當成功。

家明開始後悔自己一直堅持嘅原則，佢以為自己只要有一技旁身，唔需要討好學生都可以喺呢間學校一直教落去。佢曾經相信文以載道，以為就算唔跟從譁眾取寵嘅議題，都可以靠住自己嘅專業知識每月賺到最基本嘅3000個Likes⋯⋯

佢嘆一口氣，決定將所謂嘅原則拋諸腦後，佢開始不斷派Like畀所有人，希望咁樣主動示好仍然為時未晚。

正當佢不斷撳Like咗十幾分鐘之後，突然電腦發出叮叮兩聲刺耳嘅警告──

由於偵測到不尋常的社交網絡行為，管理員將封鎖帳號兩小時。

家明目定口呆咁望住呢行警告字眼，無論佢撳咩掣，都整唔走呢個告示。

電子環上嘅時間已經去到下午8點58分，即係話，距離自己嘅死期，只係剩低三小時。

待續⋯⋯

第二集：https://is.gd/6vGOnd

＝＝＝＝＝＝＝＝＝＝＝＝＝＝＝＝＝＝

好耐冇寫故，鑑於之前個交友App鬼故差啲爛尾嘅關係，今次小的已經寫好結局先Post，聽晚出下集，希望多過283個人睇。

FB： 陳煩
IG：annoyingchan