【龔成問答信箱】（Q22701-Q22720）

Q22701：

龔sir，見你1211多年，究竟係咩令你咁相信自己嘅眼光 就算佢當年由$88跌到$12，你都渣住唔放呢，點解你有咁強大嘅自信，我唔明？

龔成老師：

睇長遠價值，不是睇短期股價。

十幾年前，我已大量睇電動車行業資料，分析行業及技術發展，我見到電動車的最大問題，就是電池技術與配套。

如果這兩大因素解決，電動車一定能普及，因為佢比用油平好多，同時更環保。

然後，我分析電池技術與配套，這兩大因素，中國的配套在近10年間，不斷建設，例如充電設施等，在全球行得較多，多年前已相信，中國這方面的配套成熟，是遲早的事。

之後就是分析電池。

比亞迪（1211）本身就是造電池起家，之後再造車，是全球擁有較高電池技術的車企，其實佢的電動車，2007年已出產，當時已見到唔算差（雖然與市場化有距離），但佢過往的電池研發好強，因此可以推論，只要比時間佢，電池技術一定會提高，因此成功只是時間問題。

我地分析，一定要著重大方向，多年前，當其他人仍停留在「比亞迪的車會爆炸」，我就是分析，這個爆炸的原因是甚麼，是否核心因素，還是能解決的問題，我以「長遠的角度分析」，而不是這刻，我見到佢受短期不利消息，令股價大跌，就會增持，我從不擔心佢股價跌，因為我集中睇企業。

投資潛力企業，就是「這刻未成熟時買入，耐心持有，等企業成長」，所以，我地的分析點一定是長期。

------------------------------------------------

Q22702：

老師，有件事情想請教你。我每天工作8小時，所以有時候回家再看書就會因為太累而拖慢速度，所以我把書本都帶回公司看，但你知道很多人都冷眼看待，

但我不會理會別人的價值觀，因為我知道我在進一步走在正確的方向前進，而他們只是在正常的範圍內生存著，甘願做個普通人，但我不想只做個普通人。

不過有時候真心覺得自己很孤獨寂寞，仿佛被孤立無援，覺得沒有人會明白，所以我才要更加證明自己所走的路是正確的方向。

我相信你也有這個時候，請問你是如何走出陰霾的呢？請賜教，謝謝你！

龔成老師︰

其實有時候，這個世界只有自己，才會最清楚自己在做什麼。我地人生，最重要並不是要向別人交代，而是要向自己負責。

而且，你要做到別人做不到的成就，你就一定會做一些一般人不會做的事。

我建議你唔好介懷太多別人眼光，做正確的事，永遠都是正確的。

當然，我都唔建議過份極端，有時間中午也要跟同事聯誼一下，維持一個正常社交，都係同樣重要。

------------------------------------------------

Q22703：

老師,雖然未有機會親身上你的課（等港澳開關），但你在財務自由路上的確啟發了我許多，除了拜讀你的作品，也聽你的建議讀了窮爸爸富爸爸、巴菲特給股東的信等不同財務概念書本，

我做政府工，而且花費不大，本覺得生活不會太差，但發現即使努力工作，家庭成員和其他突發事件還是會有機會令自己陷入財務胡同，所以希望趁年輕(29歲)檢視我現時狀況，作出根本改變，

由於身邊長輩和朋友都沒有這種概念，實在不知道可以和誰討論，希望老師可以給點意見。

1. 去年買的澳門物業正在放租，但租金($13000)不能抵按揭和管理費($23000)，而且因而鎖住了首期和每月現金流，除著橫琴發展，我覺得澳門的物業未必會再大升，

我是否該在禁售期(3年)後賣出，套現作更進取的投資？自住方面預計2年後有需要，但可以租較便宜的唐樓($7000)

2. 老師一直強調企業的質素不變可不理升跌，一直持有，我在8年前已持有1128永利，當時永利皇宮開張在即，而且我在內工作，知道公司營運文化甚好，所以以$28.5買入，

後來一直跌，我在跌到約$14的時候放了一半，但沒想到現時可跌至$9，在我理解，這間企業的質素實在沒這麼差，但我即使繼續持有也不太可能升回$28，這種情況應如何應對？

其實和我購入匯豐的情況相若，持有10年(平均價$70) 但一直下跌，實在不明白優質企業長期持有的用意，又應在甚麼時候賣出？

3. 然後我在科技股熱炒時，以較高價購入，現在portfolio 已損失30%，家人說我不懂止蝕，但我本意為長期持有，但我以上的長期持有例子效果也不好，實在不肯定未來應如何步署。

4. 很多人羨慕作為公務員的薪高糧準，但穩定同樣扼殺了晉升，做兼職和做小生意等收入增加的機會，你會建議趁年輕闖一闖還是安穩收入配以投資呢?

最後，老師我明白你不想上網課是怕偷拍，但如果你委托可信之人在澳門租課室，用大屏幕做網課，同學照坐在課室，有助教監督，應就可避免此情況，也可不必受來往澳門之影響，

這只是一個建議，希望早日可見。

龔成老師︰

1) 你可以從2個角度去考慮，從投資方面睇，你現時物業支出，明顯比收入為多。但唔地唔會因為咁，就斷言話這個物業，無投資價值。

因為我地仲要考慮佢長線增長潛力，另外如果你係高成數按揭，都會令收入不抵支出。

不過，你現時收入和支出個落差都有點大，可能係你租金部份出問題。你要了解清楚，同區租金情況，係唔係都是這樣低。

另外，從自住角度，雖然你話2年後，可以先租較平唐樓。但你都要從長線角度去考量，講緊係你未來10-20年，你可能會組織家庭，對單位大小需求會有變化。

如果你現時放租物業，係可以滿足到你長線需要，其實你都可以考慮保留。中短期放租，長線收回己用。

2) 因為優質企業，長線佢會因為企業成長，慢慢令價值提升。但由於你買入價，其實好貴，完全偏離企業價值。所以，你預要較長時間，或者市況好熱，才有機會重回這個價位。

但畢竟此股有投資價值，我地係可以守。

你可能會問，咁不如放左，平D再入翻唔會更好咩。但問題係，我地投資唔會去"估走勢"，因為無人知你沽左後，係唔係一定跌，佢係可以之後一直升，那你就要用更高成本，才可以買回股票。

但好似匯控(0005)情況都類似，但匯控(0005)是收息股，增長力不高，本身就不適合你這個年紀，建議換碼至其他有增長力的優質股，會較好。

3) 由於你本身買入價高，所以現在有較大帳面虧損係正常。只要有質素，長線持有會係較好策略。

除非企業質素變差，或者大市又去到好狂熱，否則我地唔會沽出手上優質股。

你現時問題，唔係組合虧損無止蝕，因為你這些持股係有質素的話，真的不用沽，等佢長線升值就可以。但你要學好估值，以避免將來再買貴貨，否則長線回報會大打折扣。

在有能力估值前，最好投資方法，就係做月供，不理當時價值，定期定額地供款儲股票，就可以減低買貴貨風險。

4) 這個睇你個人志向，因為要做到富人，係有好多方法(可以睇我千萬富翁本書，會有較詳細解釋)。做生意，會係其中一個渠道。如果你係想向這個目標推進，把握年青去闖一闖，不是壞事。

但有些人會選擇利用投資，那你初期必先有一個基本收入，再用額外資金去投資，累積財富。到你有一定資金和經驗，可以考慮慢慢轉成一個全職投資者。

若你想行這條路，公務員工作，會係一個好好的平台，去支援你的目標。

所以，你要先定好目標，才決定下一步應該如何走上去。

另外，多謝你課堂營運上的建議，我會認真考慮，謝謝。但暫時，我都係較希望可以真人見面，因為可以更易跟學員互動溝通。希望疫情早點過去，可以早點和澳門朋友見面。

------------------------------------------------

Q22704：

老師 1117股價下跌了很多 我2.18入手的，共有40000股 需要斷捨離嗎，其實我對他們公司也有信心的

龔成老師：

現代牧業（1117）不是劣質，但政策及行業產品價格波動，都對佢有不利影響。

佢係中國採用大規模工業化散欄式乳牛畜牧業務模式的公司之一，所有標準化畜牧場乃以各個畜牧場。

按畜群大小計算，集團是中國最大的乳牛畜牧公司及最大的原料奶生產商。

整體都有質素的，不過行業變化大，原奶的價格令佢盈利較為波動，長線投資價值都有，但唔建議太大注，現時要睇你持貨%多唔多。如太多，減3分1至一半。如不多，暫時守住先。

------------------------------------------------

Q22705：

龔sir, 我在掙扎應否轉行從事保險業，如AIA. 我現從事酒店業，行業經驗達15年，現是部門經理（部門中最高級的職位），自覺好難會有更大的突破

掙扎點如下：
－我即將39歲
－沒保險業經驗，要由低做起
－怕收入不穩

還有，不確定保險業是否適合自己

龔成老師︰

其實你明白自己已經無突破位時，做改變係正確做法。

如果你無乜家庭負擔，要試！

保險業從業員，其實對年齡唔係睇咁重，反而人脈和溝通技巧，會係更重要。

雖然一開始要從低做起，但只要你係有能力，可以晉升得好快。

但當然，收入跟你銷售成績成正比，因此開始1,2年，可能收入會較不穏定，你要有心理準備。最好你儲有一定資金，作為背後後盾。

如果你怕不適合，你可以找一些保險業朋友，去了解多D。同時間，你睇下可唔可以，用兼職模式試下先。

------------------------------------------------

Q22706：

想問一下，我想幫小朋友的財富增值，月供盈富基金是否一個比較安全嘅選擇？除了盈富之外仲有冇其他選擇？

謝謝！

龔成老師︰

小朋友由於可投資時間長，策略上十分簡單。你可以儲盈富(2800)，佢係包括58間質素不錯上市公司股票的組合，有一定增長力。如果有投資美股，可考慮月供VOO。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上股票都係可以，但你明白當中風險。

------------------------------------------------

Q22707：

老師，您好！我有一個鄰居，大約10年前搬家了（估計賣掉自置物業）。

一直留在這屋苑租住，也搬4次了。我們的屋苑10年間升幅只5成，大約10年前值1千萬，現價1500萬。所以，我推斷就算大市繼續升，再住10年也是2千2百萬。但到時樓齡三十幾年。

買樓也是投資，我覺得繼續投資這個物業不太值得。

假如我仿效鄰居，過多幾年賣樓，用1500萬全買收息股，一年進帳75萬，一個月6萬。每月租樓3萬2，已經包括目前個個月要交的管理費，差餉，地租。

然後，有足夠的生活費。想到這個方案，我覺得更安心退休。當然，租其他地方可以更平宜，留在這裏感覺無降低生活質素，而且我們算平的。

老師，你認為這個方案可行嗎？

這是製造現金流的方法，如果，我適當投資，回報更不止75萬一年呢！

龔成老師︰

你所講的方法，係可行。但你要明白，香港樓市供求失衡，我預期樓價長線都會係升。你物業雖然到時係3X年樓齡，但唔算話好舊，只要其他條件係合理，依然有一定投資價值。

你可以睇翻自己情況，若不沽出物業，單靠現時資金所創造現金流，是否跟你未來退休生活所需，有好大落差。

如果較大，你沽出物業，買收息資產，去提升退休生活本錢，係可以。但你就要承受租金波動的風險，你要明白這點。

而這筆資金，你可以將佢分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、富豪產業（1881）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，以備不時之需。同時，若投資市場大跌，你也可以考慮買到更多的收息股，因股息率會進一步上升。

但如果你現有資金創造的現金流，其實同你退休生活所需接近，或者只係差少少。

你可以考慮係退休時，用現有物業去做逆按揭，創造額外現金流，去補足你落差部份。一來不用沽出物業(不用為市場租金變化擔心)，二來可以加大每月現金流。

但大前題係，你這個物業係無傳承給家人的需要。

------------------------------------------------

Q22708：

龔sir你好，之前問過992聯想，我發現琴日10號派左息。

每股派0.306 但我1萬股得2370，同埋點解派左息，股價冇跌反而上升7％，係因為上半年業積好，所以派完息，多左人入市？

龔成老師︰

今期聯想(0992)派息每股$0.24，以你10000股計，會獲得10000 X 0.24 = HKD2400。但銀行會收入手續費，所以會比HKD2400為少。

至於派息，係"除淨日"(而非派息日)會除下相關權益，故單純派息除淨這個動作，係會令股價下跌。

但每日股價，會受不同因素影響，故除淨日未必一定跌。而且，你所講係派息日，對股價更加無任何影響，因為派息日係唔會對股價進行調整。

你要明白中短期股價，可以因為好多原因而出現變動，但我地著眼點，都係要放翻係企業長線質素上。

佢大升，相信係因為集團預期方案服務業務集團(SSG)部份，未來增長理想，故令股價受到刺激。

現價算係合理區中上部，這股係平穩增長型，你唔好預佢高增長。主要係有平穏增長力，再加收下息。

------------------------------------------------

Q22709：

你好 龔sir。自從上次收到你回覆 已隨即改了月供組合。過了大半年時間，蝕既金額已收窄了很多，謝謝你。

原先我組合內有$2000騰信及$2000 阿里。但想剔除呢兩隻，把資金加大落1810，1211及0175，分佈如下：

2800-$5000
66-$3000
0823-$2000
2-$3000

3-$1000
2388-$1000
1810-$3000
0175-$3000

1211-$3000
0388-$2000
1177-$2000
3067 每月100股 ~2000

欲望日後能從股票收息獲被動收入每月至少一萬元。是否可行？

謝謝你。

龔成老師︰

現時比亞迪(1211)偏貴，不宜月供。或回翻D先小注月供。

如果你想月供新能車股票，你可以供住考慮GX中國電車（2845）先，這基金的目標是追蹤Solactive中國電動車指數NTR「相關指數」表現緊密相關的投資回報。

另外，現時大市只在合理區，每月儲蓄要留有部份，用來等大跌市出現，去入平貨。

如果你希望每月有1萬蚊現金流，以股息率6%計，你需要本金200萬。

你現時組合，係一個增長型配置。我假設投資回報有10%（連股息再投資），你每月投資$30000，5年後大就可以達成200萬目標。

但你現時只係40歲，依然有一定時間增值。建議你唔好咁快換成收息資產，比D有增長力股票，用更多時間升值，去爭取最佳升值效果。

------------------------------------------------

Q22710：

龔sir你好, 認識您太遲，我在投資路上浪費了許多時間，希望您可以給我現在的投資一些意見:

本人已28歲,目標: 10年內可以先買到細價樓投資或自住(600萬物業) ，同時不用賣出所有股票。因人工不高，保守估計未來八年都是2萬~3萬左右，

所以計劃要預多首期（可能要超過350萬）才可以過銀行審批及供得起。

現持有: 20萬股票, 20萬現金

[email protected] (17%)
[email protected] (19%)
[email protected] (15%)
[email protected] (8%)
[email protected] (24%)
[email protected] (5%)
[email protected] (4%)
1448@7 (7%)

今個月開始月供1810, 66, 1177 (各$2000), 3067就打算每兩三個月買入

同時每月另儲$3000等機會加注1810,1448,3319

1) 請問以上組合有沒有改善的地方? 計劃是長期持有。選擇2822而不是2800長遠有沒有問題?

2) 請問我可以達成以上目標嗎?

感謝您。

龔成老師︰

1) 南方Ａ５０（2822）目標為追蹤富時中國Ａ５０指數之表現，此股都係一個有質素的組合。但波動性會比盈富(2800)為高。

你現時組合，都有質素，但有3點想你留意翻。

首先﹐郵儲銀行(1658)只係收息股，增長力不高，用來增值不太適合。建議你沽出部份，換至其他有增長力股票。

第二，要注意個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

第三，你月供太偏重左係潛力股(1177,1810,3067)，佢地雖然有增長潛力，同時風險都較高，不宜持有過多。

以你年紀，我一般建議潛力股佔約5成，餘下應用以下平穏增長股。但如果你想加大組合增長潛力，維持現有比例都可以，但你要明白會有一定風險。

2) 假設投資回報有10%（連股息再投資），你每月投資$6000 + 現有40萬*(股票+現金)，10年後大約會增值至220萬。

如果要達至你350萬要求，月供要提升到$13000﹕其實以你收入，你每月儲蓄比例唔算多。你要努力去開源節流，找出不必要開支同時，睇下有無增加額外收入空間，例如兼職、網上小生意等，去助你達成目標。

------------------------------------------------

Q22711：

龔成你好，有關投資問題想請教你。最近有聽過一d複利息既做法，有以下問題

1.想問點樣分辨該股票是複利息定單利息

2.如真係想作為定時定額長期投資，VOO 盈富基金外，有冇其他建議。thanks

龔成老師︰

1) 其實股票本身，無分單利定複利。

複利息的意思，係你要將收到股息，再作投資，以達至將股息再增值的效果。

但有時股息金額唔多，我地好難即時再買一手股票去再投資。這時候，我地就會將佢儲起，等累積到一定金額時，才出手。

另外，複息效益唔一定係派息企業才有。有些企業不派息，但將賺到的盈利，重新投放在企業發展，都係有複利效應。

2) 以你不足30歲的年紀計，可以利用「平穏增長股」和「潛力股」作長期月供目標。

你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

緊記月供係一個長線計劃，月供最少維持3年，並持有這些股票5年以上，才會有較理想效果。

當然，可以的話，最好一直持有。因為，優質股持有時間越長，財富增值效果就會越理想。

------------------------------------------------

Q22712：

老師，請問美股有邊幾隻有潛力？

龔成老師︰

Apple（AAPL）、TESLA、Facebook等都係有潛力，但現價唔平，最好用月供儲貨。

如果你想投資美股，但對美股又唔係好認識，你可以先投資係佢的相關ETF。以下2隻股ETF，都係不錯的選擇。

當中，QQQ波動性會較高，要注要風險。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

------------------------------------------------

Q22713：

老師，而家危疾最新產品有多次賠償，同單次賠償，請問成哥有無研究過多次賠償是否好過單次賠償呢

謝謝意見

龔成老師︰

我無特別研究，因為不同公司產品可以好唔同。就算同一公司，不同危疾計劃，都可以好不一樣，其實好難去每間研究。

整單咁講，過往大部份危疾產品，都係賠完整個保障額，就會將保單完結。

但現時市場不少產品，係原來保障額全數賠清後，當你再遇到某些特定疾病，依然會作出一定程度賠償。(當然受有關條款限制)

只從次數計，永遠都係愈多愈好。

但保單保障其實係好複雜，每隻產品都可以好唔同。除了賠償次數外，其保障疾病範圍、不保事項、等候期、多次賠償的規定等，你都要注意。

買一份保險，有很多細節你係要知。我建議你找可靠的保險顧問，等佢比地意見你，會更理想。

------------------------------------------------

Q22714：

如果要現金用 ？

放270 得12-13元才放？
2638 放
11 小注等收息才放？
其他持有收息？

仲有人仔對美元 新高，投資人仔對港幣定期可取。

龔成老師︰

由於貨幣係可以無限量發行，所以唔係一個理想增值工具。除非你有實際用途，否則不宜持有太多外幣。而定期本身，純粹係收息產品，無增值能力。

你上述股票，都有長線投資價值。但若你急需套現，其實3隻都可以，現價平貴水平都差不多，放邊隻先都無所謂。

至於保留邊D股票，你睇自己投資取態和人生階段。2638和0011係收息股，無乜增長力，主要收下息，較適合近/已退休人士，或者好保守的投資者。

0270、0066、2800、0003則是平穏增長股，除了已退休人士，其他人都適合。

至於恆生(0011)，如果你想放，係無必要等派息後，因為派息前會除淨，扣除派息部份的權益，令股價下跌。故你派息前後沽貨，唔會有分別。

------------------------------------------------

Q22715：

我有買你書架，我知道草錢係第一步。

大師點睇558 力勁科技

點睇cfd

龔成老師︰

無錯，再精確D係要每月有一定儲蓄，才可以用這部份資金，去做財富增值。

力勁科技（0558）我無特別研究。

如果從過往業務情況分析，這企業投資價值，質素只是中等，唔算好值得投資。

另外，我地分析一間公司，唔好單從佢一年成績，就去下定論。睇翻佢過往多年，盈利都好波動。

再加上2020/03年度，個盈利得好少，只有320萬。若果用再早一年，即2019/03的1.9億作比較。假設佢2021/03年度真係有3億盈利，按年增長只係57%。

由於2020/03盈利個基數好細，所以才會出現升100倍咁誇張架升幅。

除非你明確了解這企業，知道企業出現左一些新的長期利好因素，否則，不宜投資。就算投資，都只宜小小注。

基礎產品的差價合約（CFD）是一種衍生工具，主要係估走勢去圖利。純粹賺蝕係基於市價走勢，合約唔會持有相關資產。

投資者只要交小量保證金﹐就可以進行交易。通過杠杆來倍大利潤，當你估中走勢，你可以倍大你獲利，若估錯，虧損都會力口倍，風險唔細，不建議投資。

同埋，我地投資唔應該用"估走勢"架方法去投資，正確方法應該係去理解企業長線質素和前景，再了解佢處於平定貴，之後去進行資金配置。

------------------------------------------------

Q22716：

941中移動和6電能，若以收息和股價穩定來講，邊只值得長期投資，謝謝你

龔成老師︰

中移動（0941）有質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

電能實業（0006）佢主要從事投資能源及公用事業相關業務，範圍包括火力及可再生能源發電，輸電和輸油，配電及配氣。

佢除左持有港燈（2638）外，亦有國際業務，如英國、澳洲、新西蘭、中國內地、泰國、荷蘭、葡萄牙、加拿大和美國等能源及公用事業相關業務。

2隻同是有質素的收息股，質素計差不多，以現價值博率計，中移動（0941）會較高。

但我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

另外，收息股本身增長力不高，主要係提供穏定現金流。若你係偏年青，應先重點做好增值部份，這類收息股，不適持有太多。

------------------------------------------------

Q22717：

龔老師你好 我是一名90後 收入大概每月3萬(未計租金)現有一層樓收租 現金大約有150萬 請問好唔好將層樓按揭再買多一層收租？

龔成老師︰

將層樓按揭再買多一層收租，係一個增值方法，但會令你負責水平增值。你現時算年青，負債水平較高，都係可以接受。但一定要明白當中的風險。

但較大問題是，你現時資產上，只有一個收租物業。若再加一個物業，你成個財富組合，就會嚴重偏向晒物業類。當地產市道出問題，你成個組合就會受到很大影響。

而且，以租金回報率計，投資物業值博率，比買優質股為低。從投資角度，買優質股值博率會較好。

因此，無論你最終是否增購一個收租物業，你都應先利用現有資金，去累積優質股。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有150萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22718：

好的，謝謝老師你的意見！！我打算沽出部份股票。

我本身買樓想自住，但考慮到移民，將來都想有被動收入，所以與家人商量，我決定買入細價單位，用收租，一來我唔會用盡所有錢，繼續有現金。二來我還可以保持部份股票。

但我唯一阻礙我行動力的是我本身住公屋，就算將來樓價跌，爆破，發生什麼事，我都有公屋可住。這一個心裏關口真的得難過。

但我知道若想脫貧，但繼續以這種方式來想，我只會永遠都擺脫不了，什麼事也做唔到～

謝謝老師。

龔成老師︰

我地人生目標，唔應該只係停留係一個公屋之內，要開闊些。

雖然，公屋基本上解決左好多香港人，一直最困擾的問題，就係住屋部份。但我地人生，應該不只如此。

你應該有更多東西想嘗試，更多願望相達成。所以，我地要努力為自己財富增值，去創造條件，令自己可以盡早為自己而活。

所以，你唔好安於現狀，要為自己財富增值定下目標，最少做到財務自由水平。

------------------------------------------------

Q22719：

龔成，你好! 你話財務自由多重要，可惜我這一刻仲未做到。老細突然間話移民，公司即將解散，我應該會面對失業了。

這一刻好徬徨無助，心頭壓住好流淚的衝動。我知道人是無情，但老細撇棄我們已成事實。

這一刻，徬徨無助都無用，好好想下自己前路如何，謝謝你

龔成老師︰

發生這樣突然的事，任何人都會手足無措。而且，因為工作表現以外原因而失業，難免會有點不甘。

但人生就是這樣，特別係現時咁不穏定環境，難免會出現這些預計之外的問題。

不過，我地唔好因為咁，就氣餒認輸。比少少時間，去平復自己心情，再想想如何重新上路。

改變會令人不安，但你要明白改變係相向，唔一定係向壞的一方面。如果在一般的環境，我地不會想突破，但面對這些環境，有可能是上天給你一個突破的機會。

只要你保持正面的心境去面對，相信很多事情都可以闖得過，加油！！！

------------------------------------------------

Q22720：

你好，老師，我follow你的fb已有1年，在這一年裡，我由完全唔識股票，之後開始買你的書，之後上你的股票班（現在上緊進階班），從而對投資的知識不斷累積。

我起初有跟老師推介買入港股，但自己收入本身低，投入的錢不算很多，只是投入左十萬左右。另外從身邊朋友開始認識美股，感覺投資美股增長力都不錯，又投資了8萬，

想問下我平時課堂學習的財務比率和估值方法適用於美股嗎？另外你有冇其他途徑/書本推介給我學習美股投資？

另外，我覺得投資組合只有股票，增長力比較慢，想加一些高風險的東西，例如期指和期權，但我又對這些不了解，想老師提供一些途徑/書本名稱，

讓我可以建立知識基礎和技巧，再投資。聽朋友說，這些都是只能用技術分析，對嗎？（但我記得老師講過不要用技術分析，那應該怎樣辦？

希望老師早日賜覆，感激不盡

龔成老師︰

其實我係課堂教授知識，係識用於不同地域的股票。當然，不同地方的市場、消費者文化、稅務等都會有分別，但大方向都係一樣，所以你可以照應用。

書本上，巴菲特、彼德林區等知名投資者的書，都係以美股為藍本，都有一定參考價值。

期指和期權，我就唔建議你加，這些工具基本上就係玩估走勢。所以，投資這類工具的人，都只會跟一般短炒投資者一樣，用技術分析。

而技術分析，是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

而且，我地投資最不應該做，就係估走勢。我地只會用平貴水平作考量，去決定投資策略。

所以，你唔好貪快，去用這些短炒工具。你要記住，財不入急門，你睇全球投資最賺錢架人，都唔會用短炒，只會做長線，你就應該明白邊個才是好方法。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21921-21940）

Q21921：

老師，上完最後一堂，多謝你既分享同教導。

我follow左你個page好耐，但都係今年先開始認真學投資理財，以前以為只要儲錢叻就ok.

自問儲錢唔算差(當然無老師勁), 以前一個月揾一萬左右都儲到7至8000左右，因為細個開始就想收租退休

(大學個時我靠幫人補習都儲到10萬畢業)不過總係儲唔到大錢，次次一儲到一筆仔，就會係無厘頭既情況就會用左

直至認真睇投資書，認真睇致富心理先發現原來我方法算ok, 但心態唔好

老師，尋晚你話俾個終極目標自己，我好認同。收租退休都仲係我終極目標，但係依家學識要set short term goals

話說我買左樓，唔係最理想既，但都係我心水地方之一。新界藍籌屋苑，希望會係我第一間有既樓，之後會再換大啲/買多層收租，希望一步一步向目標前進。

多謝你過去8堂授課。雖然我未明得晒，不過都照報左進階班！希望可以學多啲野！

暫時我都只係做緊月供，見次次你講親既優質股都偏貴。同埋啱啱買完樓要少少時間回氣，差不多差左袋。

不過我會留意多啲股票市場，等自己既投資唔好集中晒係層樓度，雖然依家有mortgage link account, 但我諗揀啱股票既回報會更高，更快可以幫我買第二層樓然後開始收租。

Sor for 太長氣

龔成老師︰

其實你未掌握晒，係正常。但只要你努力溫書，再去實踐。好多你唔明的知識，就會慢慢變得明白。

因課堂教你們的，只是一些知識、技巧和經驗分享。你必需要去實踐，去累積經驗，我教的知識才會有用。

你現時投資想法，大致都正確。由於你財富組合，偏重係物業類。現時你應用新資金，先集中投資優質股。而你未對平貴太有把握前，可維持月供模式去做。

而第二個物業，你唔洗太急，最好隔長少少時間，先再考慮，以減低週期性價格風險。

至於進階班，其實你掌握到初班的7成知識，你就應該應付到。如果你覺得自己未到7成，你就在此期間，比心機溫，為進階班好好準備。

進階班見!

------------------------------------------------

Q21922：

你好啊，想請教下因為計劃緊買樓。

1. 你覺得應該放哂全部股票去比多啲首期好，定係留返部分股票唔放之後比少啲首期較好？

2. 另外，如果諗住可能半年-2年內買樓，係咪唔應該再做月供？

因為我同男朋友現時月供我：$5000 / 男朋友：$8000

龔成老師︰

1) 現時按息不高，我建議你借多D，空出來資金，用來投資增值，效益會較高。

而且，我地投資都會講求一個組合平衡性。如果你買樓，而要盡固股票，令成個財富組合，完全偏晒去一邊，其實係唔理想。

2) 要視乎你月供資金，係唔係需要用來置業。如果不用，你維持月供係無問題。

若要動用，你就要睇有多久，才會動用。若只有半年至1年，最好就不要月供，直接現金持有。

如果長少少，可以去到2年，你都可以維持月供。但選股上，就唔可以太進取，盈富(2800)係可以。

但比亞迪(1211)和小米(1810)這類潛力股，波動性太大，我唔建議。

另外，你可以考慮收息股，佢地增長力不高，但勝在股價波動較細，又有一定股息，都值得你考慮。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

------------------------------------------------

Q21923：

老師，我係你股票班學生，上年上你堂，真係獲益良多，感謝你一直既分享，同發放正能量，令我覺得自己都有機會做到。

但可惜我剛上完堂，婚姻出現問題，呢半年我經歷情緒問題，好想自己慢慢放下件事，好想向前行

想為自己打算，要靠自己係香港置業，決定自己生活，但睇過好多小單位，一個人供真係好吃力，供得樓黎，又無多餘錢投資，令我覺得無希望一樣。

睇住自己之前建立既股票組合，阿里同中煙都跌好多，而令到心情更差，好似已經努力存資金，但覺得唔會達到財務目標一樣，好灰心。

想多謝你的正能量分享，有時令我覺得仲有希望。另一方面我對唔住你，發生件事後，我無好好溫習，可能課程內容已經俾反晒老師你了。

但我呢排情緒好轉，我亦打算抽時間溫習，希望會pick up 反。感謝

龔成老師︰

每個人一生中，難免都會經歷一些人生起跌。在不順境時，會覺得做什麼事都很困難，有一種無形的無力感。

但你要明白，這個世界，唔會永遠只係給你不如意的事。就好似大雨過後，你是總會看得到晴朗的藍天一樣。

你可以給自己一個時間，去慢慢調整自己心情。有需要時，你可以尋找專業人士意見(如社工、醫生)。之後，你再調整投資和置業計劃都未遲。

中煙國際香港(6055)和阿里巴巴(9988)都有質素，中短期波動總會有，但佢地質素無明顯變差，你照長持有就可以。

月供方面，如果你係用我之前建議，你就照進行，就可以。

記住，你要先照顧好自已，才進一步去計劃其他的事。只要我地要按部就班，一步步去處理眼前問題，總會找到方向。

------------------------------------------------

Q21924：

龔成老師，我最近買了一些股票，比亞迪1211，恆大汽車708，中國平安2318，信義光能968，中芯國際981，工商1398，粵海270，這些股可以長期持有嗎？需要set止蝕嗎？

另想問問中國有贊8083有潛力嗎？想買黎長線投資，值博率高嗎？

另完美醫療最近兩日回了不少，現價8蚊左右可買入嗎？還是等待合理價4～6蚊再買？

VESYNC 2148我12蚊買，依家跌到10蚊想問需要止蝕嗎？佢係小家電龍頭，但由於之前有部份股權有禁售期，黎緊18號解禁，我怕會再大跌，請問需要止蝕嗎？但看佢基本面是強的，唔該哂。

補充一下買價︰

比亞迪1211：$171｛佔比10%｝
恆大汽車708：$36・35｛佔比10%}
中國平安2318 ：$83 ｛佔比20%}
信義光能968 ：$13・93｛佔比10%｝
中芯國際981：$24・75，｛佔比10%｝
工商1398：$5・02｛佔比20%｝
粵海270：$11・5 ｛佔比10%｝
阿里巴巴9988：$217・8 ｛佔比10%｝

龔成老師︰

這些股票都有質素，係一個偏向進取的組合。若你係年青至中年人士，這個組合係可以。

但比亞迪(1211)現價係貴，現貨可持有，但加注最少等到$135以下，才好考慮。

另外，恆大汽車(0708)雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。投資時，必需控制注碼，不能太大注。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較大，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

完美醫療(1830)現價依然唔平，你最好等佢有明顯回調，才慢慢小注儲貨。

VESYNC（2148）有少少潛力的。佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

業務不算差，發展有潛力，但企業規模始終較細，業務未穩定，整體都有風險。若你只係小注，持有無問題，但就要明白當中的風險。

至於解禁，解禁唔代表股東一定沽貨。而且與企業質素無關，你係唔應該考慮。

------------------------------------------------

Q21925：

龔sir, 最近我睇完你一篇關於現金貶值的文章，這樣

你讚不讚成加按物業去做投資，例如股票、基金或年金？

龔成老師︰

現金長線都只會係貶值，我地今天借錢，明天雖然要回歸還同等金額的現金，但當中價值，其實已經係貶值了。

在現時低息環境，加按物業去投資，係可以考慮。

但大前題係你有無個明確的投資目標，可以確保你有效運用這筆資金，去增值自己的財富。優質股、基金或年金都可以考慮。前2者，你可以比較翻個回報，邊個較理想。

而年金，由於本身回報唔算十分高，若按息增加，有機會令你賺取的息差收窄，甚至消失，你要明白這個風險。

之後，我地就要因應你年紀，去睇翻自己現時負債水平，係唔係適合再加重負債。

若你係30歲，總負債相對總資產去到90%，都可以。但若年紀較大，到50歲時，就最多只可以50%。

------------------------------------------------

Q21926：

龔sir. 我現有的股票組合ok嗎？

恒生 16.97%
中國銀行 4.08%
領展 26.87%
中國人壽 11.28%
港鐵公司 15.38%
阿里巴巴 14.93%
小米 10.49%

月供組合ok? 已供1年

盈富基金 53.14% ($4000)
恆地地產 21.99% ($1000)想停供，供左1年都未供到一手...
小米 21.99% ($1500)
香港電訊 2.88%(供左1個月停供左，因為你說要先增值才再現金流)

想放左恆基轉投2800，想利用沽左既錢每月加大供2800月供金額到5000元，龔sir，請問你的睇法，謝謝

龔成老師︰

先講現有持股，質素上係可以。以你41歲年紀計，都適合你。

中國人壽(2628)質素只算中等，不宜持有太多。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

你現時恆生(0011)、港鐵(0066)和領展(0823)係超標，但由於佢地都質素，因此你不用沽出，只要利用新資金，去慢慢拉翻平衡，咁就可以。

月供方面，無問題。如果你想集中供盈富(2800)係可以，但唔建議沽恆基(0012)現貨，因為此股係有質素，碎股唔應該係你持有一隻股票與否的考量。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21927：

龔老師想請教一下，早前以26蚊入左2手 0241 阿里健康，今日跌到18蚊，請問如呢幾日以18蚊入番1至2手，呢隻股下半年，有無上升既潛力？

^_^感激不盡！

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

我唔知道佢下半年會升定跌，但以長線潛力計，這股有投資價值。但由於不確定性較高，這類股只建議小注持有，但你預佢股價上落大。

若你資金非常充裕，就算再加1,2手，都只係佔你組合比重好少，否則不建議加注。

------------------------------------------------

Q21928：

龔sir, 你好！ 有問題想請教你意見，本人43歲，而家住緊一層已供完既未補地價居屋，先生剛剛又買了一層新樓大約明年底可收樓，之後打算住新屋。問題是我層居屋可以點處理好呢？

我唔會補地價放租，亦唔想冒險放租。咁樣應唔應該賣左層樓佢呢？

層樓大約可放到450萬左右，加上我有130萬現金，可否用500萬買一啲收息股來用作生活費。理想係有每月2萬5，我今年開始冇做野，家中無小朋友，先生亦都唔想我再工作。

新樓方面先生可以自己供無問題及支付到大家既生活費。先生亦提出話如果賣左層樓之後10年股票收入會唔會追唔到通脹？

如果真係賣樓轉買股票請問邊啲會合適？（是否銀行股和公用股好）麻煩龔sir比啲意見我呀。唔該晒你。

龔成老師︰

你個情況，比較複雜。我一般會建議，最好將空置物業放租，避免浪費了收取現金流機會。

但你不考慮去補地價放租，我建議可以的話，你們先住居屋。新樓則放租出去，用以租養樓的策略。變相，你先生每月都可以空出一些資金，去用作生活開支。

如果你地都係希望賣樓，去買收息股，都可以。只要你選擇的股票係有質素，長線必然係跑嬴通漲。

但由於收息股作用，主要係提供穏定現金流，去支援你生活開支。因此，你唔好預佢有明顯增長力，只會係收下股息而已。

若你希望每月有2.5萬蚊現金流，以股息率6%計，你需要本金500萬，故你賣樓後，資金係足夠的。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

現時大市只在合理區，你可以先用一半資金，慢慢咁分注入市。餘下就等大跌市，才出手入平貨。

但你要緊記，唔好太集中係個別企業或行業，成個組合要平衡。相同行業不可佔組合多於30%，而單一企業不要高過15%，否則會有過度集中性風險。

------------------------------------------------

Q21929：

龔成老師，你好。手上有幾隻股我列為灰色股，已持有好幾年，已經跌到一個點，現在想重組下，我應該放哂佢，還是那些可以繼續持有，搏翻身？希望你可以給我意見，萬分感謝

1）1165,順風潔能，均價1.3,持有30000股
2）1848,中國飛機，均價9， 持2000股
3）6136康達環保，均價1.75,持23000股
4）1668華南城，均價1.65,持14000股
5）1800 中交建，均價7持6000股
6）1186中鐵建，均價7.6,持3500股
7）665海通，均價3.7,持30000股

希望你能抽空看一下

龔成老師︰

順風清潔能源(1165)睇唔到有明顯投資價值，你最好係沽出。

康達環保（6136）質素好一般，長線建議你換至其他優質股，會對你較有利。

華南城（1668）、中交建(1800)、中鐵建(1186)、海通國際（0665）質素只算不過不失，這些股唔建議持有太多。

中國飛機租賃（1848）本身質素不算差，但又未到好好，主要原因是負債太高。佢利用高槓杆的模式，進行飛機租賃等業務。

其實佢業務有獨特性，在行內有規模，有長線投資價值。

最大的風險來自佢高負債，佢業務原理是借錢，買飛機，再租出給飛機公司。

航空業不確定性較大，對佢有影響，加上佢利用槓杆，風險點都會有。不過，這只是中短期情況，長遠仍是不差的。

現貨可持有，但總投資注碼不能多。

我相信你投資，存在不少核心性問題，例如選股、定價、理財概念等等。

見你持有股票，不單係質素較弱，而且好多時都係買貴貨。你要明白，買股票就同買企業，你必需要了解企業架優勢，點賺錢、行情有無發展，財務狀況等。

唔好聽消息，或者只係知個號碼，就去投資。另外，你要學識點樣去做估值，點去定平貴。

唔好受大市氣氛，影響你判斷。大市好狂熱，人人買股票，你就要小心。因為個價好易被炒高晒，影響你長線回報。

在你再投資前，我建議你先睇我寫架《80後百萬富翁》、《財務自由行》和《股票勝經》，相信可以幫助到你，去認識正確的理財概念。

之後你再重新計劃，你往後投資之路。

------------------------------------------------

Q21930：

早晨龔成老師 我想問一問關於6666恆大物業 自從我係16.4入左4手之後就一直跌到依家 跌左差唔多一半

我買之前都有做功課見佢持現金比例都好高 賺錢能力又唔錯 見佢管理物業嘅面積都增加緊 但預計嚟到佢9.8配股 佢母公司3333恆大又出債務等壞消息

想請問老師對6666前景睇法點 現價算唔算平 同埋如果母公司出事對佢有幾大影響 唔該晒老師

龔成老師︰

恒大物業（6666）其實都有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

至於配售，暫時只係預測，而且2.7億佔已發行股數，係一個好少的比例，影響不大。我地投資與否，應集中翻係企業質素本身。

恆大(3333)和恒大物業（6666）是2間獨立公司，就算恆大(3333)出事，財務上都唔會直接影響到恒大物業（6666）。

但恒大物業（6666）不少收入，是來自母公司提供之物業。若母公司恆大(3333)出現債務問題，影響其物業發展速度，將有機會出現負面影響。

你買入價略貴，近期股價回調不少，但都只算係合理區頂部。若你持貨不多，可以守。但持貨較多，最好沽出部份，去平衡風險。

------------------------------------------------

Q21931：

老師，好鍾意你本新書，教左我一樣好重要的事，失敗係必然，有機會去錯係好事。。。。但我都想問一樣你無咁專的事，就係我到30歲先知自己過度活躍症加d亞斯保加。。。

越來越覺得自己好難打工，因為唔鍾意跟大隊，唔明老闆的暗示，無法一心二用，易得眾人，短期記憶差。。。。。。

但我睇野好通透，危急時好應變到，長期記憶好好，觀察力好強，數理好好，英文好＜＜＜其實都比較係這兩個病常見的特質

你所講那5條路，邊條你覺得我行好？

謝謝阿sir

龔成老師︰

首先，多謝你支持我的新書。

你的健康問題，可以先請教醫生意見。以我理解，係可以透過藥物和一些訓練去治療的。

至於5條路點選擇，其實好睇你個人意向、興趣和專長。你現時健康上的問題，我相信唔會明顯影響到你行任何一條路。

「經紀團隊」、「專家」你可試下。其實「生意」都可以，但你可以試左「經紀團隊」、「專家」先，在這兩個類別，有好多你這些無法明老板想甚麼的人，反而更成功。

其實，行這些路重點唔係你當下能力。而係你是否願意投放時間，將自己磨鍊成一位專家。

當中會經歷無數次失敗，你覺得自己有否能力堅持下去，才是成功與否的重點。

------------------------------------------------

Q21932：

龔sir，有財務上嘅嘢想你幫手分析

本人30歲，已婚，暫時未有子女，但將會計劃生小朋友，與太太收入共50k左右嘅穩定收入。

資產：

1）約100萬現金
2）60萬基金保險儲蓄
3）一隻價值約30萬手錶（非必要不會變賣）
4）一層300呎一房單位，價值500萬左右，位於新界元朗區，於2018年做9成按揭上會，月供15000左右

現時與太太居住於家人嘅住所，每個月會俾番$5000家人作租用

有2個問題：

1）我應該作出投資嗎？因為驚拎錢出嚟投資，將會有小朋友需要用錢時，擔心未能即時調動

2）我應唔應該賣咗現時擁有嘅物業，因為我想買番近少少自己現時住嘅地方，當初置業係一時衝動，現時想平手賣出現時物業，並以9成按揭買另一較大嘅物業。

龔sir，我應唔應該賣出現時嘅物業再買入另一較大，樓齡較舊嘅物業？求解答，好困擾

龔成老師︰

1) 現金長線只會一直貶值，不作投資，變相你的實際財富，其實一直在減少。當然，我地都要因應實際情況，去預留一些現金，作日常交易和應急之用。

所以，你要睇翻你自己人生規劃，去調整投資大計。若你短期內，例如1-2年就打算生小朋友，時間較短，故這部份資金，最好以現金儲起備用。

但餘下的資金，我建議你進行投資增值，咁會較好。

你現時財富組合，已經有物業類。將來投資，我會較建議用優質股進行增值，這樣財富組合平衡會較好。

以你30歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

大市現處於合理水平，那100萬資金(要先扣除，有需要預留的資金)，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

2) 至於換樓，你要先想清楚。因為香港買賣樓宇成本，其實唔細，一買一賣你當中會無左唔少錢。

作為自住樓，除非佢好唔適合你"長線"生活所需。或者投資價值好弱，否則我唔建議作出變動。

若你真係有實際需要，要轉換自住物業。你可以有2個方法，一個當然是沽出現貨，再換另一間。

另一個就係將而有物業放租，自己另租自住物業。這樣做，就可以保留你這個物業資產，同時也可以滿足你生活需要。

但大前題，係你這個物業要有投資價值，最少有能力跟大市同步，否則就無投資意義。

------------------------------------------------

Q21933：

你好，我買了2618（京東物流），現在我心態放寬，等盈富再跌，再入

京東9618 我也賺了少少時放了，把錢集中在剩下中

都是因為龔sir 建議，已留名你澳門班

龔成老師︰

京東物流（2618）都有質素的。

京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務，從倉儲到配送，從製造端到終端客戶，涵蓋普通和特殊物品。

根據一些調查報告，按總收入計，這企業係中國最大的一體化供應鏈物流服務商。

2018、2019 及 2020 年，京東物流營收分別為人民幣 379 億元、人民幣 498 億元和人民幣 734 億元。

京東物流於 2018、2019 及 2020 年產生的虧損淨額分別為人民幣 28 億元，人民幣 22 億元及人民幣 40 億元，不過，如果扣除一些非現金流的開支，又未算太差。

佢表示，上市集資所得，部分將用於升級和擴展該企業的物流網絡；部分將用於開發與供應鏈解決方案和物流服務相關的先進技術。

企業有優勢的，長遠發展正面，但中短期股價未必有好強的表現，這股都有投資價值，但現階段未必值得大額投資，小注投資係無問題。

至於沽出京東(9618)，若你係因為風險承受能力，而作出的調整，係可以。

但從財富增值角度，緊記優質股係一定要長線持有，才會有理想效果，唔好升少少就沽，目標要放遠少少。

希望疫情盡快受控，可以早點，可以回澳門跟大家見面，澳門班見!

------------------------------------------------

Q21934：

老師，買了你的書看，學到不少價值投資法。本身持有自住物業，打算月供股票計劃約行2年左右，我都比較保守，想上落較少+慢慢增長，以下組合可行嗎？

進行了約半年：

1）AIA $3000/月
2）HKEX $3000/月
3）建行 $3000/月

打算加：

4）新鴻基 或 領展 $3000/月

供完余下每月約$10000 cash flow作buffer，有其他投資推介嗎？

龔成老師︰

你現時打算月供的股票，都係有質素。當中港交所(0388)盈利較受大市波動影響，會係較高風險的一隻。但只要你長線持有，以上5隻都係無問題。

這個組合算係平穏增長型，若你係年青至中年人士，這個組合都係可以。

新地(0016)和領展(0823)都有質素，但增長潛力，領展會高少少。至於餘下$10000，我建議你先儲起，等大跌市機會，才出手掃平貨。

緊記月供係一個長線計劃，月供最少維持3年，並持有這些股票5年以上，才會有較理想效果。

你月供2年勉強都可以，但再優質的企業，都要時間去增長，所以你必需要用長線持有模式，去處理這些月供得來的股票，才會有好回報。

------------------------------------------------

Q21935：

龔sir你好，今次係第二次聯絡你，過去半年期間，我買晒你所有著作睇晒(除左買樓4部曲果本)，亦閱讀左好多巴菲特同凱恩斯講價值投資既書，叫做開始慢慢理解股票係乜野一回事

我背景今年34歲，月入只有約18k，加埋太太都係只有約30k，上年買左層6m新樓，月供約15k，今年年尾亦會多個新生命，本黎以為一世人就要供樓供到60歲退休，

但自從睇左龔sir既經歷同著作，我深深相信只要有無窮既意志力同不斷增加知識，一樣可以改變人生，就係呢團火令我將所有非必要既支出cut晒，

放工/放假亦搵多份part time增加收入去投資(雖然真係好攰)，所以我先多謝龔sir令我改變左人生態度!而我亦係呢幾個月開始建倉，詳情如下:

66@500 $45.75
175@1000 $24.75
270@2000 $13.16
1099@400 $17.7
1177@1000 $7.74

1928@400 $38.4
1972@200 $23.75
3067@200 $18.96
9988@100 $217.6

暫時仲有約$250k(全副身家)係morgate link

有幾個問題想請教龔sir:

1)你對我所持股票組合有無乜建議?如果我目標係以增長為主，有無邊隻應增持/減少?或加入邊隻股票?

2)現有組合算平衡嗎?

3)我理解龔sir所講，優質股如果股價下跌，反而有加注既機會，但有樣野唔明就係如果我買入一隻股後，股票從未跌穿買入價，咁應該如何去𧗾量加注與否呢?

因為對於資金唔多既小股民，如果只持有一兩手，財富增值一定有限，但如果高於買入價加注咪會拉低左回報囉?

4)我打算短期內最多只會動用多50k投入股票市場，因為要再增加收入/同儲蓄後先會再拎出黎投資，餘下200k就留低以備不時之需，

但現在是否未到時候?係咪應該留起呢50k，等大市有明顯回調先動用?

5)1810&1448我自己好想入，如果無貨幾錢入第一注好?還是起碼等到合理價先入貨?論增長力是否1810會比1448高?

再次多謝龔sir你改變左我人生觀!由於我現時做零售業，夾唔到時間上你堂，但我已決定過埋今年就轉工，希望到時可以夾到時間見到龔sir你真人

Thank you sir!

龔成老師︰

1) 你持有的股票都係有質素和增長力，是適合你的，你照持有就以。

2) 大致上都平衡，但留意一點，以你年紀，潛力股大約佔5成就好了。若你投資經驗較少，要再下調多1,2成。盡可能控制在這個範圍，以免組合中風險過高。

而且，你要隨著年紀增加，要慢慢將潛力股比重下調。去到50歲時，大約只宜佔2成。

3) 你要用買入價，作為入市標準。我地去制定入市策略時，應用企業平身估值平值，去做決定。只要在合理區，我地就可以有計畫地，慢慢分注入貨。但升越合理區，開始貴的時候，我地就要等時機。

若你可用注數不多，第一手是在合理區頂，我地另一注，最好等有較明顯回調，才出手。

若你注數較多，第一手是在合理區中間買入。但由於手上持貨不多，就算回升至合理區中上，你都可以再入小注，再增加持貨。

當然實際操作，我們除了可用注數外，都要考慮埋大市情況，此股質素和潛力等，去得出個最終方向。

你可以參考我<<股票勝經>> P.316-317 中的"金字塔式買入法"。我們分配資金模式，大致上就會用這個方法。

4) 這50K，我建議你儲起，因為現時大市只在合理區，不宜將全部可用資金入市。要留有部份，用來等大跌市機會。

5) 小米（1810）和福壽園（1448）都有好有質素的潛力股，增長潛力上，我會比小米高少少分數。

現價計，小米（1810）略貴，要回多1,2成才算合理。而福壽園（1448）算合理區頂至略貴，無貨先入一注都可以。

我的書本，只是給你一些投資知識、技巧和經驗。真正令你改變人生觀的，其實是你自己。

我有時都開星期六班，你可以留意。雖然你暫時夾唔到時間上堂，但唔好因為咁，就停左學習。要多睇財經新聞、年報、相關書籍，去提升自己技巧，長線投資才做得好，加油!

------------------------------------------------

Q21936：

龔成老師,你好: 上年才認識你, 開始爬文.

本人己是中年,現在份工已做了13年(有中年危機), 但一點都唔開心, 只是求生活, 月入3萬, 物業Mortage尚有300萬, 只有40-50萬現金,上年開始供股$4000 AIA & $4000 銀娛.

想請教:

1) 現在開始步會否太遲?

2) 如果想用儲蓄錢(40-50萬) 加碼在每月供股部份, 應該怎每月供幾多, 買邊隻比較安全?

3) 需要點做才有被動收入3萬達到財務自由?

每月可以儲多$2000現金

龔成老師︰

1) 現時起步雖然唔算係早，但只要你用正確方法和心態去投資增值，都可以做到一定效果出來。

2) 以中年人士而言，都有增值需要，但策略上要保守少少。你可以選擇一些「平穩增值股」，作為投資目標。

以現時大市合理區狀況，你手上50萬，我唔建議盡用。你大約可以20-25萬，分開3年，每個月加大$5500-7000去做月供。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

你可以從中選擇多2隻，更好方法，就是全數加入盈富(2800)，佢係包括55間質素不錯上市公司股票的組合，有助你平衡組合中的風險。到你有一定能力，才買其他我建議的股票。

餘下現金和每月多儲的$2000，就是等大跌市時才出手。如果你能在這段時間學好選股等技巧，到大跌市時就能把握機會，財富增值會更明顯。

3) 如果你希望每月有3萬蚊現金流，以股息率6%計，你需要本金600萬。

你要透過以上方法，去累積這筆資金。到有足夠數量時，就將佢換成收息資產，去創造現金流，支付你退休生活的開支。

我假設投資回報有10%（連股息再投資），你每月投資$10000 + 50萬本金，15年後大約會增值至590萬，故這樣安排相信很大機會達至你的財務自由目標。

------------------------------------------------

Q21937：

龔sir, 現為大學year3, 預計畢業後有20-25萬資產。暫為14萬資產，5萬由屋企人保管投資，2.5萬貴金屬， 4.7萬股票，其餘為現金。

今年內預計會再有5萬現金收入作為增長，暫時收入以補習教學為主，7-8、12為收入高峰。現為21歲，如果想5年內有100萬資產，應如何部署增加收入？

小妹在投資市場上曾入手港股1.06 元入手432及美股以64usd 入手Nio，而432已離開，仍手持nio, 但虧損波幅較大。

我可以承受中等風險的投資，但仍未搵到合適自己的投資組合

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時大學year3，相信是十分年青的年紀，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你應以增值為主。

貴金屬(如金銀、黃金)，主要係用來對沖突發性事件。佢本身唔會創造現金流，不宜持有太多。佔組合3%左右，其實就足夠，最好以實貨持有。

蔚來（nio）有質素的。佢係中國高端電動汽車市場運營，生產電動汽車，同時間佢發展緊自動駕駛，以及人工智慧等下一代技術的創新項目。

例如型號EP9、ES8、ES6、EC6，通過佢自己的銷售網路銷售汽車。長遠發展正面，前景就無問題，現貨可持有。

但你預佢之後的股價上落仍大，投資一定不能太大注。可長線的，注意風險。

盈大地產(0432)過去多年都出現虧損，加上負債不輕，睇唔倒佢有投資價值，不要再投資。

由於你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了。你相再保守點，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有25萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$8000 + 25萬本金，5年後大約會增值至100萬。你可以就著這個預算，去計劃你的理財方案。

當然，這個金額只係一個參考。你還很年青，負擔相對較少，應該盡力儲蓄去做增值，儲蓄比例最少要達至收入一半，才算理想。

------------------------------------------------

Q21938：

龔成老師你好，我今年32歲，月入$45,000，每月可儲$20,000至$30,000。

1. 目前持有股票：盈富基金2800 5000股@24.5、希慎興業0014 500股@29.5、粵海投資0270 2000股@12.08，以上是希望可以長揸收息。

2. 另外還持有：偉易達303 1300股@89.30、易大宗1733 12000股@0.78、中國銀行3988 20000股@3.29、碧桂園2007 10000股@14.57、明源雲909 1000股@60，

雖然部份都有息收，但股價一直上不回家鄉價，要不要考慮止蝕。

3. 現有$300,000現金，考慮再買入以下股票：金沙中國有限公司1928，國藥控股1099，阿里巴巴9988，銀河娛樂0027，京東集團9618，中國平安2318，

請問以上推介那一隻呢？建議買入價是多少？

麻煩晒

龔成老師︰

1) 你個財富增值概念，唔係太正確。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應先做好增值部份，而唔係去諗點收息。你現時持有股票，其實都有一定增長力，係平穏增長股類，都適合你，你長線持有就可以。

2) 你唔好用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你上述持股有質素，但偉易達(0303)、中國銀行(3988)只係收息股，增長力好一般。碧桂園(2007)負債水平好高，風險唔細。

而明源雲(0909)不確定性較高，這4隻股票，你都不宜持有太多。

至於易大宗（1733），此股投資價值不高。最大的問題，就是核數師意見，過往多年都出現「保留意見」，反映核數師認為佢盤數「有古怪」，有些問題，這類股，沽出較好。

3) 這6隻股票，都係有質素的增長股，都適合你。阿里巴巴(9988)和京東集團(9618)偏向潛力股類型，風險會較高﹐故要控制注碼。

現時這些股票，都在合理區，現價可以入1注。但由於未算平，故資金不要盡用，最好多等每回調10-15%，才再考慮加注。

------------------------------------------------

Q21939：

成哥你好，想問下你隻1024快手，我330入，依家大概回到去204，見佢業績都麻麻，請問可唔可以長線持有，定升返d轉其他。

另外本身個組合想入返d實業類，蒙牛乳業同農夫山泉，想問下咩價位入比較合理。

謝謝你抽空幫忙。

龔成老師︰

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展，你現貨可持有，但你預佢短期股仍會十分波動。

蒙牛乳業（2319）有質素。

佢於中國從事乳製品生產及經售業務，乃中國領先的乳製品生產商之一，以蒙牛為主要品牌提供多元化的產品，包括液體奶（乳飲料及酸奶）、冰淇淋及其他乳製品（如奶粉等）。

無論品牌、銷售網絡、發展，都不差，長遠正面。這股有長線投資價值，不過現價就唔算平，回翻10%先慢慢分注入，會較好。

農夫山泉（9633）有質素的。由於有一定的品牌價值，因此企業質素與發展正面，財務數據不差，生意與盈利都有理想增長。

不過上市不久，股價較波動，同時上市前數據可能執靚過，因此要注意風險度。現價合理區頂至略貴。

若想入貨，現價小注投資好了，這股適合長線的。

------------------------------------------------

Q21940：

您好龔成, 訂閱您Fb已多年, 以下有一問, 十分煩惱,未知閣下能否抽空賜教：

情況：媽有一個自住三房私人舊樓單位，樓齡32年, 估計如賣出約560萬。 因該樓舊需要夾錢換𨋢, 大約每戶比20萬, 暫時不知何時要付。

她已60+歲退休弄孫， 她除家用外無收入。我們３個子女現為搬出，但家姐租樓多年，有意和姊夫跟一細女回去同住，他們儲蓄20萬左右未夠錢買樓。

她有幾個選擇， 哪個是最好的財務安排?

１. 賣出，媽出首期比家姐買較新的樓， 家姐供樓 ，然後：

１Ａ： 4人（媽，姊，姊夫, 一細女即孫 ）同住, 可能繼續住元朗/轉去東涌/青衣。媽每月比少少租家姐當幫手供。或

１Ｂ： 自己另外買細單位自住，其餘投資／買股票做每月收入 （唧種可推薦給她這些退休人士而是比較高收入，低風險?）

3. 繼續自住, 家姐搬回, 每月給媽家用

或有其他選擇, 但現時未想到。

十分感謝！

龔成老師︰

其實係財務層面，這3個選項都係可以。反而我覺得，選擇邊個方法的重點，應該是你媽媽自己的想法。

因為香港一買一賣的成本較高，因此，未有明確目標前，（3）是較好。

當然，另外兩個方案其實都可考慮，最重要是你地成家人的意願，因為現時影響多人。進行（1）的方案時，要大家傾好各自的權益，清清楚楚是最重要，大家要「先小人，後君子」。

如果你媽媽，係想和你姐一家同住。若現有自住樓係配合到佢地長線生活所需，咁就可以。

除非有好大生活上問題，否則不建議換樓，因為香港買賣樓宇成本唔細，一來一回，會唔見好多錢。

若你媽媽不想同住，佢可以沽出現時物業，換一間較細自住屋。再將餘下資金，投資一些收息股，去為自己創造現金流，支援自己退休生活上的開支。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只係合理水平，資金不宜盡用，你可以先將部份，以分注形式買入上述股票。餘下資金，就等大跌市出現，才加大力度掃貨。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21861-Q21880）

Q21861：

老師你好，我係一個中小企東主，因疫情生意大跌，現準備申請sme loan，max可以借幾百萬，利息為2.75%，分8年還，頭18個月可以只還利息。

雖然資金可作實體業務發展，但有感現在市道都非常困難，所以想睇下老師有冇咩建議，可以係18個月後還款時己有足夠資金去還款，又或者點樣好好善用這筆貸款好呢？感謝

龔成老師︰

其實一門生意做得好，佢回報長線一定係會跑贏其他資產類別。

而且，通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

你要想清楚，資金借來做咩？怎樣具體進行財富增值？

不要為借而借。

股市，現時只是合理區，明顯未係有個最好時機，若現時用借貸去投資，風險係唔細。

就算你只係投資較穏定的收息股，去賺息差，我地都難保會出現賺息蝕價的情況。因此，你想用這個貸款，去進行賺息差的動作，我就較有保留。

現時疫情依然有一定不確定性，我建議你視乎自身經營情況，去決定借取相對金額的貸款，去過度這個較困難的時期，會較好。

------------------------------------------------

Q21862：

老師你好，之前有問過你問題，多謝你詳細分析，你之前有覆過我部分手持的股票一般質素的如下：

閱文集團中招股價55（已估）
雷蛇20手，平均2.6（已估）
通達集團2手，平價1.7

中國石油4手，平均4.81
中國鐵建5年前入，10手，平均16.2
海通國際4手，平均7.85

剩餘這些是否長痛不如短痛，忍痛估岀，換其他？謝謝

想重新來過，重整理財組合。

我係唔係應該愈早放棄上述d舊乳酪

龔成老師︰

通達集團（0698）、中國石油（0857）、海通國際（0665）、中國鐵建（1186）都是一般質素。

質素不致於話要即刻沽，但始終質素有限，唔建議你持有太多。你最好有反彈時，沽出部份，換至其他優質股會較好。

另外，我見你中鐵建(1186)買入價都幾貴，相信你是熱炒一帶一路時買入。

記住，我地盡可能都要避開一些熱炒話題行業。因為好多時，佢地都會被炒到好貴，就算係有質素，你太貴入，長線回報都會出問題，你要注意這點。

你組合不至於要推倒重來，但部份較一般股票，不宜持有太多，長線會影響你增長力。

中短期，可能你會見因為重整組合，而出現一些帳面虧損。但不要太在意，因為我地投資唔係1,2年，係一個超長線的計劃。

所以，你必須盡快修正好你的組合，重新向正確方向上路。長線回報，一定比你今日的虧損大得多。

記住，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21863：

成哥 我今年25歲 啱啱接觸股票 現持有1810 25.55 200股 / 6618 130 150股 / 3800 2.72 3000股。 每月收入17000，固定支出10000。 我可以點投資？

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

以你現時25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。你每月5成儲蓄，即是用$3500做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

餘下的另一半現金，我地就等機會，當大市出現較大回調，就加大力度掃貨，然後作長線投資。

至於你現時持股，小米(1810)和京東健康（6618）都有質素，你長線持有就可以。

保利協鑫能源(3800)就較為麻煩，佢現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

------------------------------------------------

Q21864：

成哥，我係一個新手，年頭開始follow咗你，亦睇完80後百萬富翁，將會開始睇財務自由行。

了解及入咗1830, 而家已經升咗100%. 多謝你嘅advice & sharing. 請問1830有潛質升值50倍或以上嗎？如果可以好似388咁就當然係最好。謝謝你。

PS. Set咗個目標比自己，希望一兩年內置業及五年內賺三百萬。努力！向目標出發！

龔成老師︰

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

你本身有貨，就長線持有，但這刻就不要心急加注。

佢會唔會升到50倍，暫時睇佢業務，唔係中短期可以去到50倍的爆升股類型。但此股都有質素和增長潛力，值得你長線持有。

另外，你要記住，好以完美醫療（1830）這類潛力股，增長潛力大，但不確定性都高。如預期一般發展，回報自然好。但不似預期的話，都會出現較大回調，故風險都唔細。

因此，你股票組合中，唔好過份持有潛力股，以免風險過大。我假設你係年青人，最多都係佔組合5成好了。若你投資經驗較淺，更要下調至3成以下，才算穏妥。

而你為自己將來定下目標，係一件好事。但若果你真係有需要1,2年內置業，投資策略就要調整。

因為1,2年唔係一個長時間，有機會出現波動。你用作置業個部份資金，投資時要保守D，以免影響你置業計劃。

------------------------------------------------

Q21865：

龔成 你好 ！
如何發掘有潛力嘅股票？

龔成老師：

買股票就是買企業，潛力股就是有長遠發展力的潛力企業。

要尋找潛力企業，過程比較複雜，而股票班，會教5種選股方法。

簡單來說，你要分析企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。

尋找一些有潛力發展的企業。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的發展、價值等。

------------------------------------------------

Q21866：

龔老師你好！我今年五十六歲，還有四年就退休。早年因要照顧家人沒有什麼儲蓄。

現在只有一層市值$830的出租私樓，仍然欠銀行$330萬，只有十多萬現金。

我現在每月可儲蓄$25,000, 租金收入（如果租客續租-現死約至2023年一月）$17,000。

我退休時應該有$650萬至$700萬Provident Fund。早年的MPF 現在戶口結餘有$41萬。有兩份保險，如果65歲退保應該有$100-120萬。

我退休後仍要照顧有認知障礙的年老母親，現在住公司宿舍，現有的私樓不打算自住，退休時希望買返一間不貴過$1,100萬的較大單位方便照顧母親及有地方安置工人。保守估計退休後每月駛費最少$3萬。

請問以我現時財務狀況，有冇可能60歲後靠現有的資產不再工作。多謝指教，希望早日回覆。

龔成老師：

物業現時的收租減供款，應該有正現金流的，因此這部分短期不用變動，你保持這方面的情況就得。

到2023年租客到期，你就睇自己的情況，可以轉另一私樓，但現時物業賣出後套現，現金約$500萬，與你目標物業$1100萬仍有距離，你要想想，要調整目標，還是動用退休金等。

現時你每月可儲$25000，一年就是$30萬，4年$120萬，就算考慮投資回報，可能滾存至$140萬-$170萬。

如果你每月想有$3萬現金流，假設投資一些5%回報，要穩健、有現金流的工具，你就要有$720萬才做到。

物業套現（$500萬），4年儲（$170萬），退休金（$730萬），保險（$100萬）。合共$1500萬。

但你目標物業為$1100萬，而產生現金流所需資產$720萬。

你到時擁有資產，與所需要的金額，有缺口，所以你要睇下，自己是否要改變目標，又或初期做一些兼職。

------------------------------------------------

Q21867：

龔sir您好：小女最近好迷惘，希望龔sir可以指教一下。現時持有幾隻股票都係坐艇當中，都唔係幾好意思講出黎，驚比人笑我買埋d垃圾股。

493國美零售，$2.43買入，現價$1.28
1499歐科雲鏈，$0.6買入，現價$0.39
769中國稀土，$1.3買入，現價$0.93
9988阿里巴巴，$256買入，現價$207
1211比亞迪，$185買入，現價$177.1

全部夾埋成本用了$55萬左右，現蝕$13萬，人生第一次投資股票，由2月份起左右買入，雖然一日未沽都仲未算輸，但坐艇坐到好心痛。

本人今年33歲，澳門人，月薪$4萬，唔計股票，可流動資金有百零萬存款，唔需要供物業，比$1萬家用屋企人，扣除所有開支一個月可以儲$15000。

之前一直好大洗無限制特定自己儲錢，洗剩幾多就儲幾多，今年想換樓但無本事先驚覺自己浪費左好多光陰。依家最大夢想係換新樓，好想改善居住環境。

希望龔sir可以指教一下我應該點分配投資好，好希望可以改善居住環境。

呢排因為呢d事情緒都好低落，求龔sir指教，感激！

龔成老師︰

投資失利，係每個投資人，都會必經的階段。最重要係，你有無從中學習到一些有用經驗，去提升自己將來的勝算。

首先，我想你明白2個正確的投資觀念。

我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

另外，唔好抱住唔放就無蝕架心態，咁係好危險。我相信你架想法係，我唔放住，總有一日會返回家鄉。但我話你知，唔係一定的。

因為若然你抱住架係一隻垃圾股，佢只會一路跌，唔會再升翻上去。反而你決斷些，盡快垃圾股清走，換成優質股，長線才會有反敗為勝的機會。

你現時持股中，國美零售(0493)和中國稀土(0769)質素較弱，長線換至其他優質股會較好。

歐科雲鏈（1499）無特別研究，佢屬較高風險類，要睇下你博唔博。過往持續虧損，見佢股價上落好大。只可以話，唔建議大注，自己衡量風險。

阿里巴巴(9988)和比亞迪(1211)有質素，你長線持有就可以了。

你現時33歲，可以投資「平穩增值股」+「潛力股」這類有增長力的股票，為置業累積本錢。你可以先用每月儲倒的一半資金投資，另一半就先儲起。

平穩增值股：盈富(2800)、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）。

潛力股：安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注(不多於3成)。

此期間，你要努力提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有100萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21868：

HELLO老師，剛讀完股票勝經，對股票開始有少少少許認識，所以我想為自己重新訂立一個投資組合去增值自己的財富，希望能聽取你的意見。

我29歲，可月儲大約$6000現金，現有以下資產：

1. 約12萬股票(買入時12萬, 現應沒有)
-高鑫零售(6808) 1000股 $9.95入
-阿里巴巴(9988) 200股 $264入
-心通醫療(2160) 1000股 $17入
-快手(1024) 100股 $397.4入

2. 儲蓄保險, 月儲$1500, 已儲7年, 3年後供完, 如果唔拎, 55歲有74萬

3. 上年買入445萬的物業, 供30年, 現負債345萬, 資產我佔一半 (用來投資, 不打算自住)

4. 現金$24000

因那4隻股票我都係無分析企業底下買的, 所以我好希望重新審視自己的投資組合, 我睇完股票勝經後, 我利用書中的股票篩選3步曲的第一步:

初步分析財務指標, 想初步嘗試睇睇自己持有的股票需唔需要止蝕, 見到心通醫療(2160), 快手(1024), 中芯國際(0981)數據都麻麻(我唔知有無計錯呢), 請問老師對呢幾隻股有甚麼意見嗎?

我知道投資最好投上市最少兩年的企業會較好, 但因當初就是犯了全世界都熱炒新股所以我又跟住去買的錯, 令當時高位買入了價值不高的企業…

我想能放60%在水桶1, 40%在水桶2(月供), 先增值後現金流, 但現在看來太大比重在那堆潛力股

如現所持有的股票可先繼續持有, 我再額外月供$3000於水桶2對整體會有幫助嗎? 但又怕可能2,3年內需要結婚、搬出來住等會需要現金。

先謝謝老師抽空解答

龔成老師︰

篩選3步曲的第一步，只係方便較初階投資者，從數千隻股票中，選取一些較有研究價值的股票，再進行分析。

但這個方法唔係完美，有機會部份優質股被篩走，但作為初級投資者，這個方法算係較有效率和準備性較高。

而且，這個只係第一步，就算當中數字不太理想，都唔代表佢無投資價值。你要再完成後2步，才會有個較完整的結果。

你現時持有的4隻股票，都係有質素，可長線持有。但微創心通醫療科技（2160）現時未有盈利，故不確定性較高，暫時唔好再加注。

另外，我地投資時，的確要盡量避開熱炒行業。因為佢地股價好多少被炒高，變相影響了你長線回報。

而且上不足2年的企業，由於數據不多，我地好難去判斷去佢的質素，所以要保守少少。唔係唔投資得，但要控制注碼，去平衡這個不確定性的風險。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

"保險"只係理財中防守部份，買足夠保障就可以，增值可以留比優質資產(如優質股、物業等)去做。你現時份保單，仲有3年就供完，我建議你供埋佢。

但未來時間，你資金集中翻利用優質股去做增值，長線效果一定較好。

你29歲，應以增值為主，建議你用「平穏增長股」 + 「潛力股」作組合，去創造一個增值平台。現在你每月先用5成儲蓄，即$3000做月供。其餘先儲起，用一邊月供一邊儲蓄的策略。

以你年紀，用60%在水桶1, 40%在水桶2，係可以。

但由於你投資知識不高，水桶1只宜小小注(不多於3成)。最好是你先提高投資知識，等到你有一定知識和經驗，才慢慢增加大水桶1比例(大約5-6成)。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

但若然你2,3年內，會有一些較重大實際開支要用，投資時可能要保守少少，水桶1比例要再下調多D。所以，你先計劃好自己未來人生規劃，才諗點去投資。

------------------------------------------------

Q21869：

老師請問時代天使質素可以嗎？老師唔好意思，最近有朋友推介左美股俾我，想問下你覺得以下股票的質素和現價合理嗎？

ATHM 汽車之家
MTLS materialise
CQQQ 中國科技指數ETF

感激你的回覆

龔成老師︰

時代天使科技（6699）有質素，長遠仍有發展力。

佢係中國的隱形矯治解決方案提供商。根據報告，市場份額4成。

這企業透過時代天使隱形矯治系統在整個隱形矯治過程中助力牙科醫生，其由關聯的三部分組成：數字化輔助案例評估支持及矯治方案設計服務；隱形矯治器指用於治療錯頜畸形的可移動、透明塑料材質牙套；雲服務平台iOrtho使牙科醫生可在整個治療過程中進行下達訂單。

佢目前銷售四種隱形矯治器，包括時代天使標準版、時代天使冠軍版、時代天使兒童版以及COMFOS。作為隱形矯治系統的核心，集團自研技術及數據平台，即masterForce、masterControl及masterEngine。

佢通過持有第二類醫療器械經營備案憑證的全資附屬公司向醫院及牙科診所直接銷售大部分服務及產品。客戶包括公立醫院、私營牙科診所及分銷商。

企業發展正面，過往的生意及盈利都有理想增長，不過，現時估值都唔平，要注意如果市場估值出現修正，股價可以出現下跌。

整體來說，企業發展正面，但現價就唔平，投資值博率只是中等。

ATHM 汽車之家、Materialise NV(MTLS)、CQQQ中國科技指數ETF，都有投資價值。

但CQQQ係潛力股類，波動性會較大，不宜持有過多。這些股票，現價合理中上，用分注或月供儲貨，會較理想。

------------------------------------------------

Q21870：

龔成老師你好，有以下問題想請教：本人現年46歲，現職公務員，月薪11萬。每月支出13000元，另外支付7000元作母親生活費。扣除薪俸稅，每個月約儲蓄約8萬元。

本人未婚，有自住物業，不用供款，樓價約750萬。

現金方面 [總額約77萬]：港幤35萬 (本地)，新加坡元7萬 (外地)

投資方面 [總額約126萬]：0008電盈 (60000股)、0405越秀房產 (78,000股)、0778 置富產業信託 (20000股)、0941中移動 (4,000股)、1398工商銀行 (15000股)、2638港燈 (30,000股)

強積金：目前267萬

保險 (已供完)：儲蓄壽險一份(110萬)現值42萬；儲蓄保險四份(＠15萬)＠現值10萬；危疾儲蓄 (24萬)現值4萬

自兩年前供完樓後，本人一直專心儲錢，想盡早達至財務自由、及退休。

本人現時的投資方面，盼望能給予意見。

期待回覆。

龔成老師︰

你現時成個財富組合中，已經有物業類，而且相較其他資產，都佔較大比重。因此，新資金我地會先集中翻係股票類，令財富組合較平衡。

持有的外幣，除非有實際用途，否則應轉回港紙好做增值。

"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，儲蓄保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想，你要自己平衡下。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你46歲，應以增值為主，建議你用「平穏增長股」 + 「潛力股」作組合，當中以作「平穏增長股」主力，去創造一個增值平台，為退休作準備。

你現時持股，都有質素。但問題是全部都是「收息股」。佢地主要係收下息，增長力好弱，不宜持有太多。以你年紀，最多佔股票組合2成好了(若你較保守，比重高D都可以﹐但成個組合增長力會慢左。)。

其餘收息股，建議你慢慢換碼至以下股票，去提升翻個組合的增長力。

現在你每月先用5成儲蓄，即$40,000做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合1-2成左右。若你係有一定經驗，你可以投資到約4成比重。

至於77萬現金和餘下的一半的儲蓄，我地就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

到你累積到一定資產，足夠你財務自由。你就可以將佢地，慢慢換成收息資產，去創造現金流，支援退休生活。

------------------------------------------------

Q21871：

龔成老師，首先要多謝你! 之前上完你的堂，獲益良多，明白投資唔可以過份集中，要平衡。

手上有新舊經濟股，即使新經濟股呢家回落返較合理水平，而舊經濟股又慢慢回升，所以整體回報吾會大上大落，甚至期待股價會再一步回落入貨.

近期檢視組合，發現地產股 (12，66，823)佔了整個組合約35%。 想問這3只股票之中，哪兩只較有潛力/值博率，因為現有的股票數目有些多。謝!

龔成老師︰

你現時想法正確，成個財富增值策略，最重要係「平衡性」。我地投資，其實係一個財富配置的動作。

你要去建立一個風險不高，適合自己年紀，長線又有增長力的財富組合。

現時你地產類佔35%，雖然超過我經常講的行業不要多於30%標準。但由於唔係超好多，而且港鐵(0066)只算係半隻地產股，故比重尚算可以，唔沽出都得。

至於潛力和質素，港鐵(0066)會較高。若計現價值博率，則是恒基地產(0012)較高。

------------------------------------------------

Q21872：

你好，我也是80后，单亲妈妈，有现金港币150万，股票

0788铁塔50000*1.1
6618京健1200*170/500*112
1810小2000*17./3000*29
1177中生5000*8.8
3067etf5000*16.7

现金人民币80万，合伙生意每个月分红港币3-6万，物业按揭贷款200万，每月供8000至8800，收租13000，自己租房8300，每月另开支3万。

因家庭原因2年内只有分红和房租收入且支出很多，2023年以后收入会多支出会减少。看了您的书后，我计划从6月开始月供，请问，2万至3.5万区间，取什么数合理？

0388 3000
0700 2000
1177. 3000
1211. 2000
1810. 3000
0027. 5000
2800. 5000

因我想带小朋友一起去上您的课。8月基础课还没有报名。万分感激。

每个月除了8千房租外，还需开支3万以上

这几年我一直只会用50万来炒股，所以上次请教您的时候说06618是半仓

龔成老師︰

若你每月能儲的資金較波動，你可以用一年平均數，去作為指標。

由於你未來2年，收支上會比較緊張，我建議你先預留最少半年開支，才開始投資計劃。月供部份﹐頭2年你都預一個較輕鬆的金額，會比較好。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供，其餘先儲起，用一邊月供一邊儲蓄的策略。

你現時選股都可以，但潛力股(0388, 0700, 1177, 1211, 1810)佔比太高，以你年紀最多佔4-5成好了。若你投資經驗較少，要再向下調整。

你可以將潛力股預算，加入盈富(2800)和銀娛(0027)，或者以下平穏增長股都可以。

現時大市只在合理區，現金佔組合大約3-5成就可以。當你扣除應急資金後，現金水平高於3-5成，你可以用分注模式買貨。

但你現時持貨，完全集中晒係潛力股。因此，這筆現時直接入貨的資金，應優先集中係平穏增長股，去平衡翻個風險會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

緊記，我地投資股票，係希望買入一些優質企業，透過佢自然增長，達至財富增值目的。絕對唔係"短炒"，一定係要用長線投資策略，才會有理想效果。

------------------------------------------------

Q21873：

老師 唔好意思呀我靜靜咁睇左你個page好耐 想投資但又唔敢亂咁入市

覺得1211，0285，2382，1810仲有排升 全部都想長線持有。但唔知幾時先入場好 有冇咩建議價位可以俾我做參考

龔成老師︰

你上述股票，都係有質素的潛力股，有長線投資價值。

但現時股價計，全部都唔平。比亞迪(1211)預佢回到$135才算開始合理翻少少，才可小注。

如果月供，最好回少少先開始，或者你小小注月供，就可考慮。

比亞迪電子(0285)、小米(1810)、舜宇光學科技（2382）全部都係略貴，要回多1,2成，才好開始分注入市。

但這3隻若你係諗住月供儲貨，現價開始係無問題。

由於「潛力股」係波動性較高股票，只適合年青至中年人士。而且，投資潛力股係需要一定經驗，如果你經驗較淺，可以先小注，大約佔組合3成左右。

若你係有一定經驗，你可以投資到約5成比重。

------------------------------------------------

Q21874：

老師,我們有選擇困難症,想問你月供股票的意見, 暫時每個月想供2萬, 年齡45至50歲, 希望平穩中，也能有理想的回報。

1. 3 - $3000
2. 12 or 16 better? - $2500
3. 66 $3000
4. 823 $2500
5. 2388 or 2318 better?$2000
6. 2800 $3000
7. 3067 $2000
8. 1177 or 2845 better?$2000

盼望老師能夠給我們意見(以上 第2，5，8点)， 整個月供組合可以嗎？

感激萬分

龔成老師︰

整體而言，你組合係可以。

但有一個較大問題，就係不少股票，都係跟地產相關，好似0012/0016、0823。另外，港鐵(0066)我地會當佢係半隻地產股。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

我建議你，將部份地產相關股份的月供預算，轉換至盈富(2800)，對你成個組合的平衡性，都會有利。

至於恆地(0012)定新地(0016)，前者係手持農地是全港最多的發展商，長遠發展潛力較高，但風險都會大少少。而新地，則預佢係較平穏發展。

中銀香港(2388)和平保(2318)，2隻都係有質素，前者係銀行業，後者係主力做保險。中銀行性質上，會令佢風險高少少。但整體而言，2隻都有質素，你可以睇翻自己較睇好邊個行業。

中生(1177)和GX中國電車（2845），前者係醫藥股，長線人口老性，加上人均收入上升，都對緊藥需求有增無減。

而2845這基金的，目標是追蹤Solactive中國電動車指數NTR「相關指數」表現緊密相關的投資回報。

如果你睇好電動車發展，可以月供2845。而且佢係一籃子的企業，相比1177，更有分散風險能力。

以上選項，如果你都係唔知點分好，最簡單就係將預算拆一半，2隻都供晒就可以。

最後提提你，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21875：

龔成老師你好，我25歲, 剛工作2-3年，上年開始買d股票，現有組合如下：

(股票) 名稱 股 平均買入股價
0011 恒生 400 126
0005 匯豐 1200 34.8
1810 小米 1000 27.5
9618 京東 100 286.6
9988 阿里 300 255
6600 賽生藥業 500 18.8
0823 領展 (每月買$4,000, 由上年$65開始買起)

平時亦有短炒 3690, 1024 等科技股 和 0883 中海油

(1) 以上股票是優質股嘛? 請問 9988 , 6600 (我係抽新股抽中的) 有無長楂必要?

(2) 我覺得我組合較多銀行股同新興科技股，但對其他行業認識不足，請問如果想長期穩健股的話，有甚麼選擇?

(3) 如果想60歲退休時左右每個月有$30,000-40,000收息, 到時股票投資額應有多少? 現有組合/只買股票可以嘛?

謝謝

龔成老師︰

短炒我見好多人都係蝕錢收場，股價中短期一定會有波動。而波動架原因可以同企業本質無關，只有長線股價才會反映企業質素，所以優質股一定要長線持有。

你見全球最賺錢架投資人巴菲特，都唔會做短炒，只會係做長線投資。所以，你要改變你投資方法，唔好再做短炒，並以長線投資優質股為目標，會對你較好。

1) 只要係有質素，而又適合你年紀的股票，我地都會長線持有。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你還很年青，才25歲，應先做好財富累積部份，故投資時應集中係有增長力的優質股身上。

阿里巴巴(9988)和賽生藥業（6600）都有質素和增長潛力，故你長線持有就可以。

但賽生藥業(6600)業務始終波動，不宜持有太多。

2) 恆生(0011)和匯控(0005)雖然都有質素，但只係收息股類，增長力不高。以你年紀，不宜持有太多，建議你將部份換至其他增長股，會較好。

而中海油(0883)只係商品類股票，對產品定價能力較弱，質素只係中等，不宜持有太多。其餘股票，都係適合你長線持有。

未來時間，你可以集中係「平穏增長股」 + 「潛力股」。

但由於潛力股會較波動，若你想投資長期穩健的股票，可以較集中係「平穏增長股」類。若你對以上股票或行業不太認識，你集中係盈富(2800)就可以。

同時間，我建議你用月供模式，去儲貨。因為初學者對企業估值，點去定平貴，未必會太了解。你先利用月供模式，去做增值，可以減低買貴貨風險，對你而言會較理想。

你每月先用5成儲蓄做月供。其餘先儲起，用一邊月供一邊儲蓄的策略。

餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

3) 如果你希望退休後每月有4萬蚊現金流，以股息率6%計，你需要本金800萬。

所以，你現時要努力累積這筆資金，為退休做準備。但我地投資時，唔會只集中係優質股，我地要講求成個財富組合平衡性，當中要包括不同資產類，好似股票、物業、車位等等。

但由於股票投資金額係較少，所以你初期可先用這個途徑開始。到有一定資金，才加入物業類，咁就可以。

我假設投資回報有10%（連股息再投資），你每月投資$5000，到退休時已可以增值至800萬以上，達至你的退休目標。

但你還很年青，我建議你盡量每月用一半人工，去做投資增值。好好把握年青優勢，令複息回報效果發揮到最大。

------------------------------------------------

Q21876：

龔sir:本人月收入九萬，妻子無收入，家庭支出六萬,可儲約三萬，現金120萬

物業
一居屋自住（未補地價）值七百萬 （已供完）
一外國物業值一百八十萬（未完成按偈一百三十萬）待出租

港股股票 約33萬

881 中升控股 881 一手共三萬
700 騰訊 一手共六萬
1801 信達生物共五萬
066 MTR 共四萬
1883 中信國際電訊共四萬
3067 科指ETF共三萬
3187三星房託共三萬

669 創科共三萬（月供三千）
2800盈富共一萬 (月供一千）
1299友邦共一萬(月供一千）
9988阿里爸爸共一萬（月供三千）

美股股票 +基金 （約十四萬）

TSM台積電 一萬
AAPL蘋果 兩萬
COIN Coinbase 一萬
貴金屬ETF 三萬
白銀ETF 三萬
基金四萬

澳洲基金（十二萬）

Bitcoin 兩萬

請問

1.你認為我持有的投資/股票組合需要改善嗎，例如友邦，創科好似已經pe 好高/好貴，另外每隻股票的質素也希望老師給點意見

2.需要再加多潛力股/平穩增長股嗎？

3.如希望每月有五萬現金流收入讓自己財務自由，應該作出怎樣調整/部署？

唔記得咗講我今年35歲，希望50歲前完成目標

龔成老師︰

1) 你現時持有股票，都係有質素。創科(0669)係貴，而友邦(1299)算係合理區中上部。

現價雖然唔平，但未到好貴。故現貨可持有，你照維持月供都無問題。

2) 你現時股票，都係有增長力。但不論月供，還是現有持貨，都係比較偏重左係潛力股(0881, 0700, 1801, 3067, 0669, 9988, TSM, AAPL, COIN)。

佢地雖然有增長潛力，同時風險都較高，不宜持有過多。

以你35歲計，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

另外，貴金屬、白銀這類資產，唔會創造現金流，唔建議持有太多。我地一般只會持有黃金或者白銀，去對沖一些突發性金融事件，大約佔組合3%左右，其實已經可以，最好以實貨持有。

至於基金，你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

而虛擬貨幣，我不是這方面的專家，所以我無太多意見。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

如果你分析到佢長遠的交易大，大家都持續關注，就有價值，就值得你投資。但畢竟佢波動性都好大，就算投資，也不宜佔組合太多。

3) 如果你希望15年後每月有5萬蚊現金流，以股息率6%計，你需要本金1000萬。

現時大市在合理區，你建議你每月用儲蓄一半，即$15000做月供。其餘先儲起，用一邊月供一邊儲蓄的策略。

而現有120萬資金可以再投入多30-50萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 現有資產180萬(所有股票、貴金屬、白銀、基金和比特幣)，15年後大約會增值至1800萬，故這樣安排相信很大機會達至你的財務目標。

------------------------------------------------

Q21877：

龔老師您好，麻煩你給我意見，現有股票組合都是高價買入，請問那些應該繼續守 那些應該止蝕離場還是溝貨？什麼價位放或溝貨？

00700@$660
01024@$357.3
[email protected]
03690@$433.8
09618@$395.23

現金流有7萬

萬分感激

龔成老師︰

首先，你唔好將個重點，放錯係買入價個度。我地持有一隻股票與否，關鍵位是企業質素、前景，不要被買入價影響。

買入價只是一個心理因素，如果企業核心因素未被影響，我地係唔需要理會。現時你持有股票，都係有質素，有長線投資價值。

至於溝貨，我就唔建議，因為這幾隻股票，現價都只算係合理區頂。而且當中藥明生物(2269)、美團(3690)本身不確定性都較高，只宜小注。

另外，你現時持股全部都係潛力股，佢地雖然有增長潛力，同時風險都較高，不宜持有過多。

就算你年青，潛力股可最多只宜佔組合約5成，餘下應用平穏增長股作組合。若你投資經驗較淺，潛力股比重，要再調至3成以下。到你學到一定投資知識，才慢慢調高。

如果你係近退休之齡，你些潛力股，是不適合你的。

未來時間，你就要加大翻平穏增長股部份，令組合更平衡。

現時大市只在合理區，現有7萬你可以先儲起，等大跌市才出手。

------------------------------------------------

Q21878：

收到 我有買阿sir啲書嚟睇啊
股票班要等我儲到錢先

啊Sir 睇唔睇好京東健康

龔成老師︰

好，在上股票班前，都要努力學習。

你可以先睇我架《80後百萬富翁》、《財務自由行》和《股票勝經》，都適合初學者。

之後，你有時間，可以再睇埋《選股勝經》和《年報勝經》，對你課堂掌握，會有幫助。

京東健康（6618）有質素，這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，暫時合理區頂至略貴，所以如投資，小注都可以。當然回翻1成更有值博率。

這股如本身有貨，可長線。

------------------------------------------------

Q21879：

潛力股都係可以持期持有？定係升到某個價位要放？我只有一手小米。

因為我岩岩先睇完大富翁，準備購入你其他書本

龔成老師︰

你現時手上只有小米(1810)，而且只有1手，你照長線持有就可以。

至於沽貨，我不會有明確的目標價。

我賣出基於下列幾個原因：由於我買入的是優質股，若買入後發現自己犯錯，這股不是優質股，又或這股核心的質素轉差，變成非優質股，這時無論賺蝕都會沽貨。

又或是市況過熱，市場處牛市三期的狂熱狀態，例如2015年的大時代狂熱時，我便會採用多沽少買的策略，但當時的市況未到極度狂熱，所以我亦只是沽出了一部分的貨。

此外，股價要是嚴重高估，例如市況狂熱，又或自身的原因令股價爆升，都有可能沽出。

若然你無法掌握到我上述所講的，可簡單用「升一倍、放一半」的原則，沽出後等同收回成本，餘下的貨就不用再理會，長期或永遠持有，因為這部分已經是淨賺。

當然，你小米(1810)只有1手，就用不上「升一倍、放一半」這個策略，所以你長線持有就可以。

如果你本身對投資認識不多，你可以先睇我寫架"80後百萬富翁"、"財務自由行"和"股票勝經"，會較為適合初學者。

------------------------------------------------

Q21880：

老師，我在考慮一個問題 就係假設我用300萬買左個車位放租，月租3000蚊 。一年3萬6。回報得1.2%，另外要租83年先回本。這樣的投資還算可行嗎

龔成老師︰

過往年代，車位一般都去到6%-8%的租金回報，但近年市場資金不斷追資產，連車位都不平。

近年「車位」價格近年雖然已回落不少，但整體上，只係合理區頂部。

若以你例子計，只有1.2%租金回報率，其實係不太理想。不單升值空間細，就連基本租金回報都不合格，唔係一個理想的投資目標。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。