【龔成問答信箱】（Q21801-Q21820）

Q21801：

龔 Sir, 岩岩上完你的投資班，多謝你悉心既教導，真係獲益良多！

我上完堂之後有d問題想再請求下你

1. 想問下「盈利」同「股東應佔溢利」分別在於咩？因為我記得你講過佢地是不同的，尤其想自己計 EPS等等數據既時候應該點揀？

2. 另外見到有同學問你增長率既時候，你用左年度化增長率 (上堂時都唔見你講過）而唔你用複式增長率 (CAGR)去計，想問下應該咩時候用邊個？

因為增長率不同，有代表性盈利可以差好遠

e.g. 388
年度化增長率:
5年增長 (9.11-4.76)/4.76 = 91.4%
年度化增長率: 91.4%/5 = 18%

CAGR:
(9.11/4.76)^(1/4) -1 = 17.6%

感謝龔 Sir!!!!

龔成老師︰

1) 財報上「盈利」，多數係包含「股東應佔溢利」和「非股東權益」。前者，就係股東真正可分到的盈利部份，也是你用來計算EPS用的。

後者，係一些非集團可佔有的盈利部份，這部份會在集團盈利中除去。

2) 其實2者係一樣，個計算方法如下。

(9.11 / 4.76) ，再開方(5-1)，只後將答案再減1，就係得出個增長率+17.6%。

你見之前18%，只係我將小數位進左位，其實背後答案係一樣+17.6%。

------------------------------------------------

Q21802：

龔sir你好，我想請教一下你。我買股票已有一年多，但資產不是升值很多，甚麼很多資金都放在股票裏拿不出來。因此想問下你我而家的投資組合是否有問題：

0005 @800股 (36.28)
883 @4000股 (8.11)
1211 @500股 (192)
2013 @2000股 (12.6)

3800 @1000股 (3.65)
6618 @100股 (110)
9633 @600股 (66)
9988 @100股 (287)

我覺得我買ge股票都好散，每隻都買小小咁，如果我而家加注，應該買邊隻？另外，我亦考慮買一D收息股或儲蓄保險，有穩定的資產增長。

麻煩龔sir有時間可以比Ｄ意見我！感謝！

龔成老師︰

投資股票，就等同買入一間企業，就算再優質的企業，要時間去升值。1年只係一個短期的時間，你唔好預期會有明顯的效果。

我地係投資增值時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時持股，大部部都係有質素和增長力。若你係年青至中年人士，這些股票係合適。

但收息股(包括匯控 - 0005)類，就不宜持有太多，因為佢主要係收下息，增長力較弱，會拖慢你財富增值效果。

"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

中海油(0883)質素中等，不宜持有太多。

其次，我發現你好集中係潛力股類(除了0005, 0883, 3800外)，佢地雖然有增長潛力，同時風險都較高，不宜持有過多。

就算你偏向年青，潛力股都只可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你先要加大翻平穏增長股部份，令組合更平衡。

而持股中，保利協鑫能源(3800)係較麻煩一隻。現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

------------------------------------------------

Q21803：

呀sir! 其實我好認同您 投資係長線 唔係短炒 所以我將來投資果喲優質股 我都會長擺係到 如非必要都唔放

不過 我想問下呀sir 您之前提過升一倍放一半 但如果我只入左一手 放一半會出現碎股問題 甘係唔係代表其實我要係低位入兩手或以上？我用緊富途牛牛做買賣 佢又好似唔比賣一半

另外呀sir 您堂上講到話一隻股票 好似港交所（388）佢既質素甘高 甘佢股價一定長期向上 甘如果我宜家唔入市 將來佢升到好高（假設$600）

甘我係唔係會錯過宜家既入市時機？

同埋呀sir ，我上星期又買左喲新股票，暫時有：
9988@$203 一手
2638@$7.83 一手
VOO @377.04 兩手

我黎緊會繼續定期定額投資VOO 同埋留意大市 入呀sir您上面推薦既優質股 如果長遠甘做 係唔係一個好既投資策略？

唔該呀sir 因為黎緊畢業要搵野做 要係搵野做前學識投資 問既野比較多 唔好意思 唔該您呀sir

龔成老師︰

其實優質股，只要佢一直質素都無明顯變差，我地長線去持有，永遠都係最有利。

而升一倍放一半，主要係比一些較保守投資者，等佢地可以先收回成本。或者一些初學者，佢地未能完全掌握何為貴，才會用這個策略去沽貨。

至於港交所(0388)這類優質股，長線預期係會一直上升。但我地唔可以因為咁，就不理價值平貴，直接入貨。因為若然買貴左，雖然最終都會升，但成個回報就已經差好遠。

因此，我地都要緊守平貴原則，去有計劃地入市。如果你好驚真係會錯失入貨機會，你可以用月供儲貨，咁就可以。但當股價去到異常貴，好似之前比亞迪(1211)成本2XX，就會連月供，都不適用。

而我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你還未畢業，相信是一個年青人，你現時正值財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應該要進取少少，可以較集中「平穏增長股」和「潛力股」。港燈(2638)係收息股，增長力唔高，你不宜持有太多。

至於其餘2隻，都係適合。但長線計，我地唔好成個組合，只集中係2, 3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

將來你投身社會，可能會較忙。但唔好因為離開左學校，但忘記了學習。投資係需要持續學習，提升自己知識，才會做得好的。

------------------------------------------------

Q21804：

你好岩岩上完你第6堂, 好有沖動去用你條FORMULA去中銀網選股, 不過我好貪下, 會先唔用PE

自己篩完一堆搞左兩個鐘之後, 有隻見到好想問下你意見: 8137 - 洪橋集團

另外想問問，除咗你堂上教的公式，有冇一D網站/一條公式岩宜家用可以快搵到D一次性受疫情影響的股票？ 比如之前問你果隻大快活

就會因為PE/ROE問題而篩走左，甘可惜左反而

龔成老師︰

洪橋集團(8137)雖然過到大部份篩選準則，但你要留意佢過往股價都幾波動。

而且，市盈率都一直維持偏低水平，代表市場對佢睇法好一般。你再仔細睇，佢盈利其實主要來自一些公平值變動，唔係實際收入。

因此，佢投資價值，並不如表面睇咁高。

之後課堂，我會教你點睇年報，你就可以理解到，這隻股票箇中問題。

網站方面，暫時我見都係中銀個網會較好用。至於這個篩選並唔係完美，的確會有可能篩走一些優質股。也會好似8137，誤入一些投資價值一般的股票。

但這個已經算係較有效率方法，特別係對初學者，會較易掌握。

之後，你再配合基本面和仔細分析財務數據，已經好大機會，找到一些有價值的股票。

------------------------------------------------

Q21805：

龔sir，您好。我經常留意你的facebook，特別是龔成問答信箱。最近買樓問題很煩惱，可以請教一下您嗎？

本人33歲，先生(33歲)，育有一對年幼子女(幼稚園)，目前2人合共有現金200萬，先生月入5.4萬(5年後可加薪至8萬)，我是sales,平均每月3萬幾，沒有股票、物業。

現在同家人一齊住，大概還可以一齊住5年。之後搬出來，會請工人。我們現打算置業，有幾個唸法:

1. 直接買3房，但只可以買到30+樓齡的舊樓，八成按揭，只可即刻自住。(擔心舊樓不保值)

2. 唔理地區、大細，買400萬樓，5成按揭，放租，之後換樓(擔心之後樓價升，難換樓)

3. 買2房半新樓，八成按揭，即刻自住，有機會再換3房。(都係擔心難換樓)

目前呢5年沒有迫切住屋問題，只是先生錯過左兩次置業機會，擔心樓價再升難而置業，而且即使現在開始供樓，也要供到退休了。現在儲了一筆首期想盡快上車

現在未置業，每月開支約3萬。若置業後搬出來住+小朋友返學，每月開支大約7.5萬

最終目標有一套三房樓自住，有機會再置業作收租用途。請問龔sir我應該點做好

龔成老師︰

以你現時情況，用方法1和2都係可以。

至於3，我就唔係咁建議。因為好多時新樓都會有一定溢價，令你變相買貴左。

方法1，30+樓齡唔一直定無投資和升值潛力，但就好睇個物業本身質素、地區、交通配套、是否大型屋苑等。另外，你要留意佢幾時會做大維修，這個潛在成本，你必需要注意。

至於方法2，都係可以，先買一間較細屋，去以資產追資產，從而減低樓市波動，對你將來換大屋的風險。

但大前題，你這間細屋，都要有一定質素和升值能力，最少升幅能跟大市同步。之後，你再利用月供優質股，去累積更多資金。到有一定數量，就可以入市，以細屋換大屋。

由於這間是你自住屋，所以入市與否個重點位，係你是否"供得起"。只要你確保可以長線都"供得起"，而佢又符合你長線生活所需，咁就無問題。

最後，我建議你置業時候，要考慮埋個財富組合的平衡性，唔好過於偏重任何資產類。否則，會有過度集中性風險。

最好你係置業同時，一定要留一定優質股進行增值，成個組合才算平衡和健康。

------------------------------------------------

Q21806：

Hi 龔Sir, 我想問下美國有機會加息嗎? 如果加息對香港樓市有冇影響？ 謝謝

龔成老師︰

過去一段長時間，全球維持一個較低利率水平。但長遠計，息口必然會重新回升。

雖然，我地唔知幾時會發生這件事，但都要為這個情況，作好準備。

香港樓市現時處於合理區頂，但當出現加息，市民供樓成本上升，必然會直接影響入市資意欲，令樓價下跌。

但我認為香港樓，長期香港樓市，依然會維持向上，好難跌好多。

首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。

佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！

香港樓長期供應不足，需求正不斷累積，這將會令樓價保持向上，跌少少，又會升過。

------------------------------------------------

Q21807：

請問1029鐵貨前景如何？我多年前0.8買入，後來0.3又買，前後有十几萬股，近解套之際政策降温，又面临大股東賣股份……是福是祸，宜守定是宜走换一隻其他的股票呢？

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

鐵貨（1029）經營採礦業務，專注在俄羅斯遠東及中國東北地區開採、開發及經營工業商品項目。

佢擁有多個項目組合，著重於開發礦場、生產及加工鐵礦石及鈦鐵礦，過往業務只是一般，雖然都有生意，但盈利上落較大，有時出現虧損，投資價值唔算好高。

整體分析，只是一般般。賣出會較好。

------------------------------------------------

Q21808：

我有3個問題想請教老師：

1. 新手投資 + 加強儲蓄能力 想問我可以先睇老師邊啲既書藉，除咗實體書，會否有電子書可以係iPhone睇？

2. 關於投資盈富基金既平均買入價, 以下係我唔同時間唔同價位買入，但平均買入價一路上升，請問個原理係點樣，因為越買越貴就唔敢買..

$24.18x500
$27.42x500
$29.26x500
$28.2x500

3. 請問如何計算到宜時既股票屬於貴定平？

龔成老師：

1）你可以睇《80後百萬富翁》
《股票勝經》
《財務自由行》
之後再睇其他。

上述都是最入門及適合你的，另外，我部分書有電子書，如《股票勝經》
https://www.enrichculture.com/products/9789888395767

2）最重要睇長期的，月供往往要5年以上，最好都3年，因此你預需要因為短期的價格上落，影響左策略，只要大方向正確的就得，當然，如果我地評估到現價貴，就可能會減少金額或停止月供，但在一般情況，你保持月供就得。

3）要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21809：

龔成sir,想些問題想請你指敎！小弟剛出社會 有十幾萬美元在投資 我睇左好多關係財富嘅書籍 知道汽車其實係負債

因為會令你現金流出，但我最近對某品牌汽車感有興趣 ，想擁有自己嘅汽車 但我知佢係負債 唔應該擁有 但我真係好中意 每次見到架車 都好想要

但同時又知道唔應該擁有 每次心情都好忐忑 如果係你會點做令自己舒服啲

龔成老師︰

你要分清楚，何謂「想要」和「需要」。

「想要」純粹係你個人感覺，或者想滿足自己一些欲望。

「需要」係有一些客觀因素，你係要持有這個物件，以達成某些實際目的。

簡單咁講，如果你係自顧人士，開車接單送貨。「汽車」就係你生財工具，可以為你創造價值，唔係一個負債。

若你只係覺得鐘意、或者只係想用佢作消閒娛樂，無創造出實際價值，就係你負債。

我唔係話，你完全唔可以用錢，去做一些娛樂性消費，但我地要平衡。最好係先做投資增值，有空閒錢，再考慮消費，咁會較好。

你其實可以用一個方法，就是「定目標」。

例如完成了一個財務目標，例如有$20萬、$100萬等等，你就可以用買車去獎勵自己，這樣就可以平衡，同時令自己更有效追求目標。

我地運用財富的法則，「先增值，後現金流」。

------------------------------------------------

Q21810：

成哥，我本身有留意8473，因為睇佢符合轉主板條件，0.4買左佢，點知港交所轉例，改做盈利要三年8000萬，

而家跌左，我仲未賣，而家心情好灰。

其實我買之前都覺得佢唔係妖股，係靠實力既股票。我個人認為彌明生活百貨管理得好好，我自己作為男仔陪女朋友去呢間鋪都覺得佢好，

另外佢作為零售，在疫市黎講算係好強，加上佢籌備緊做美容院，我個人認為佢會有發展空間，雖然買貴左，但我認為可以繼續持有，呢種心態正確嗎?

我明明有睇你書，但我輸左俾人性

龔成老師︰

你用生活所見，去初步分析一隻股票，係正確。但記住，我地是否投資一隻股票，主要考慮佢長線企業質素。

而能否升主板，跟企業本質無關，雖然轉版能提高了市場價值，但在更多時間，只是炒作，因此，你唔應該作為考量點。而且，這些消息好易相關股份，成為炒作對象，令股價被不合理推高，要小心。

彌明生活百貨（8473）業務不過不失，發展能力中等，不是高增長的類別。

以佢現時的經營情況，算是合理價，但這股始終規模不大，加上近年的盈利有下跌情況，存有風險。投資係可以，但不建議太大注。

另外，政治相關因素，都會令這股波動，要明白股價風險，政治因素是好難預測的。如果你持有太多，宜減。

------------------------------------------------

Q21811：

首先多謝你之前的指導，另外想問1088中國神華及3339中國龍工前景如何，可長期持有嗎？

還有3658新希望服務，剛抽到一手，是優質股嗎？

龔成老師︰

中國神華(1088)始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望，主要係收息的。可長期持有，但不建議太大注。

中國龍工（3339）主要業務為製造及分銷輪式裝載機、壓路機、挖掘機、起重叉車及其他基建機器。佢的產品有出口至俄羅斯、中東、澳大利亞及非洲等地。

雖然近年生意不差，但以過去5年計，生意與盈利都有波動情況，這點不得不注意。而企業的賺錢能力算是中等。

以企業的質素來計只屬中等，現時不貴，股息率都算吸引，但業務波動是風險，因此投資不能大注。但長線基本上可以的。

新希望服務（3658）係中國綜合物業管理及民生服務運營商。

佢為住宅物業、商務物業及其他類別非住宅物業提供物業管理服務，亦向非業主提供增值服務（包括案場管理服務。現時在管樓面面積超過1000萬平方米，物業管理項目全部位於中國一線、新一線和二線城市。

近年企業發展不差，生意與盈利都有一定的增長，不過，企業規模始終不是好大，獨特性未算強，投資價值算是中等，未算好吸引。

你只係一手，唔算太多，可以長線持有。

------------------------------------------------

Q21812：

老師，想講吓投資以外的事。我今年29歲，本身在一間蚊型工程公司工作，人工比大學同學低幾個point。

不過最近老闆想移民，所以佢想我留低幫佢打理生意，等佢走咗之後生意可以繼續營運。(我原本想完成part time master degree 就揾工)本身公司响香港得3個員工，

啫係我，我上司同埋我同事。上司都有好大機會2年之後移民，之後就應該由我接手大部份公司業務。老闆將我人工加咗50%，

而且會有分紅(公司營利嘅某個百分比)同公司股份俾我地。我諗咗幾日，決定試吓留低，因為我覺得接手一盤生意機會唔係人人有，如果可以學習營運整間公司，

相信都係好難得嘅經驗。雖然老師嘅新書有提及只有辭職並全職創富才是財富增值的最佳方法，但我仍想嘗試一下營運這間公司。老師有何看法呢?

龔成老師︰

其實我覺得係一個唔錯的學習機會，你可以親手營運一盤生意之外，仲要唔係孤身作戰，而係有有經驗架人指點，我覺得有嘗試的價值。

我書中講全職創富，除了自己做生意外，都仲有其他幾個方法。所以，你都要睇翻，自己本身個大方向係點。

如果你係想向做生意方向發展，這個是一個唔錯的學習機會。

加上你現時29歲，最緊要試多D野，保持進步，從你長遠人生的角度，這次是很好的進步機會，會對你成長有用，加油！

------------------------------------------------

Q21813：

你好，我而家計劃緊置業結婚及提早退休

本人28歲 與另一半工作穩定，總月薪約50000，扣除開支及家用，每月可儲25000。

資產方面
- 2層內地二線城市收租物業，總市值約180萬，租金回報約2%。2013年以約40萬購入，預期該地區具長遠發展潛力，每年增值約8-10%，
近年內地樓市升勢強勁，正猶豫是否現時賣出一層套現。

- 港美 優質+潛力股票+主要指數ETF，總市值約40萬，科技類（eg科網、半導體、電動車）約佔40%；傳統金融、醫療、能源、消費品類約佔50-55%；
另外投資約5%黃金、白銀ETF+加密貨幣。持倉變動甚少，期望長期穩定增值10-15%。

- 已累積3年股票投資經驗。

- 現金約70萬（包括應急資金20萬）等大冧市掃平貨

- 負債約10萬

- 已購買足夠保障的危疾、醫療及人壽保險。

目標一：預期在5年內以首置、高成數按揭買入市值800萬內市區樓作結婚自住之用。

目標二：希望40歲前累積1000萬淨資產（當中包括1層香港自住物業）。

我可以用咩方法完成以上目標？
唔該成哥

龔成老師︰

首先，係開始投資計劃前，你要睇翻你負債部份。如果個息率係較高，你要先處理好，否則會拖低長線投資效果。

現時你持有2間內地物業，租金回報率只係一般。雖然你預期有增長力，但由於你計劃5年內要在香港置業，如果再加上這2間內地樓，你成個組合就會偏左係物業類，會有過度集中性風險。

若果你覺得這2個物業，長線升值能力會唔錯，你保留都可以。但往後新資金，要集中係股市，以免太偏中係單一資產類，因而造成風險。

現時你每月儲蓄和現有資金，可以用優質股去增值，為你中短期買入香港物業和長線退休，去作準備。

你可以投資「平穏增長股」和「潛力股」，去創造一個增值平台。你先用每月5成儲蓄，即是用$12500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，現有50萬現金和每月儲蓄，就等大跌市機會出現，才大力度掃貨，並長線投資。

我假設投資回報有10%（連股息再投資），你每月投資$25000 + 90萬資產(40萬股票和50萬現金)，若你在5年後買入物業(假設你會動用120萬)，到40歲時大約會增值至680萬。

再加上你3個物業，相信都有機會，可以達成1000萬的目標。

------------------------------------------------

Q21814：

現有9988, 700, 388, 有考慮1810, 其他要研究下，總是留不到现金？！

2382, 1177, 2845 可幾錢考慮買入

未有時間可上你堂，你那些書我應該睇呢？

龔成老師︰

你上述的持股，整體都係較有增長力。但你要明白，佢地增長潛力大之餘，不確定性都會較高。

若佢地發展理想，回報當然好。但當發展不似市場預期，股價就會有較大向下調整的壓力，你要主要這個風險。

現在舜宇光學科技（2382）、中生(1177)和GX中國電車(2845)，算係合理區頂至略貴水平。

你最好等佢地回多1成，才開始小注入貨，值博率會較高。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21815：

你好龔成老師，本人最近先開始投資屬於初哥。

現在持有以下股票：
700騰訊 $625 600股
300香港交易所 $459 400股
941 中國移動 $52.8 1500股
1177 中國生物製藥$7 3000股
1810小米 $24.5 400股

請問以上股票是否可以一直持有？

最近騰訊業績是否不大好？

這些股票您有什麼意見給我，可以在什麼地方注意，還請老師指點迷津。

龔成老師︰

你以上股票，都係有質素，但有2個問題，想你注意翻。

首先，你才29歲，應以增值為主。中國移動(0941)係收息股，增長力好一般，不適持有太多。

另外，你而家太偏重左係潛力股(0700,0388,1177,1810)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。但由於你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

至於現有持貨，由於優質，故不用沽出。只要用新資金，去慢慢拉平均個價，咁就可以。

騰訊（0700）發展正面的，業績都無重大問題。

只是近期中央打壓大型企業，令佢股價較波動。但相信政府，應該唔係想佢地做唔倒生意。只係希望加以規管，在可控和對整體經濟安全的條件，去賺錢。

此股有長線質素無大變，你記住我地投資一隻股票，係睇佢長線質素。一些中短期因素，如果無令佢長線質素轉差，就算股價出現波動，你都唔洗太在意，你照長線持有就可以。

------------------------------------------------

Q21816：

老師，我溫習緊notes，有d唔明

1) 388，823 屬於水桶幾？佢地係特殊例子，高派息率，但潛力較大

我這2隻都持有，比例應該怎樣配置？

2) 原本我一家打算去澳洲，但佢封關，無得入境。

為了移民，於是賣樓，但當時打算入籍澳洲後才買澳洲樓

所以去年10月賣出hk大單位，今年1月時買入hk細單位收租,大約每年2.7厘回報

手持hk 100萬用來買股票，亂咁買左d, 依加上左你既堂，想學習下點樣配置

另外，澳洲封關，現打算去UK, 原因為亞仔升學，因亞仔（小二）越來越討厭返學，亂做功課，成日欠交，但佢好聰明，無乜溫書都有85～100分，只是不適合被填鴨

如果去UK, 用hkd 100萬做首期，還是keep on買股票？

sorry寫得有d亂，因為原本去澳洲移民，依加轉UK...近日都好較心亂

龔成老師︰

1. 港交所(0388)係水桶1，而領展(0823)係水桶2。

一般水桶1，派息比率係應該偏低。因為這些企業，都尚在發展階段，需要保留較多盈利去作發展。

但港交所(0388)由於佢業務性質特別，本身行業又係有壟斷性，唔需要留太多盈利，都可以維持其優勢，因此佢派息比率會較高，係正常。

房托類根據規定，佢必須派出最少90%盈利作股息，因此我地會視為水桶3。但領展(0823)有點特別，佢有別於其他房托，只係用組合物業收租。

領展還會定期翻新有潛力物業，去提升佢價值，從而令租金有所增長。因此，我地會視為水桶2，有派息之餘，都有平穏增長能力的類別。

若你係中年人士，港交所這類水桶1，最多可佔組合40%，若你投資能力較一般，可以再下調。水涌2會作為力，再配以少少水涌3，就算得上係平衡。

2. 當你完成課程後，你可以因應自已能力、年紀和風險承受力，去試下配置。如果不懂定平貴，就先月供或分注。總之，唔好急住去投資，要量力而為。

再有唔問，就係INBOX再問我。

至於，100萬點樣用，我會比較偏向建議你用來在英國置業。

從投資角度，你應該考慮這筆資金的機會成本，投資係乜野地方，先可以將佢係合理風險之下，利潤最大化。

若以香港樓和香港股市做例子，現時租金回報率低，股市值博率較高，故資金應留係股市。

但由於你要移居異地，應該先以安頓好生活，減低不明朗因素為優先。加上英國普遍樓價，無香港咁貴，值博率都會較接近。

因此，如果你找到合符你長線生活需要的自住物業，又可以供得起，咁你置業先係可以。到你未來生活一切安定下來，有閒錢時，才再投資增值。

而一刻，你應該保留較多資金，去處理你英國新生活上的問題。優先從生活上考慮，投資放後少少，我相信會較好。

------------------------------------------------

Q21817：

龔兄(1)千萬富翁本書最尾詳解5條致富方法， 如果我唔跟次序去睇得唔得， 先睇股票後睇其他ok ?

(2) 你嘅書裏面提到有錢人經常運用財富系統[借]去創富, 假設我已經做曬自身風險評估，想問下如果我先買咗自己嘅信貸評級報告，

然後先去銀行或者財務公司，咁樣係咪好過佢哋主動去查我嘅信貸記錄(聽人講畀人主動查好似會對評級有影響) ? 其實喺銀行借同喺財務公司借邊度合適? 如何取捨?
感激解答

龔成老師︰

1) 實戰編，你可以先睇你目標的類型，係可以的。

但建議你最終係要睇晒，有助於你了解和幫自己定位，去計劃將來。

2) 以我所知，銀行定你自己去做評級報告，係唔會有分別。至於借銀行定財務公司，一般銀行利息會低D，而且會較方便。財務公司唔係唔得，但你要了解清楚是否持牌，和產品相關細節。

如果係整體成本較低，你都可以考慮。

通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

但現時大市只係合理區，明顯未係機會，若想用借貸投資，建議再等等。

------------------------------------------------

Q21818：

你好龔成老師，本人48歲，丈夫49歲，有250萬現金本身做定期存款多年，現在因為冇利息，希望賜教方法，唔想有風險或者超低風險，

有一層自住樓，（欠按揭80萬），有150 萬股票，有110萬銀行保本保險儲蓄，一層大陸順德細樓（已經付全數）50 萬，20萬基金（低風險），謝謝。

我是主婦，丈夫做生意，有一個三歲小朋友，自住樓約值700 萬。

股票包括 5，2018，3175，405，700，270，2888，1733，2318，1800，1833，6088，2314，6127，2845，2812，2820，2238，1658，1186，3800。

龔成老師︰

其實就算投資最穏健和保守的股票，都係會有風險，只會係多與少的分別。

若你係完全唔想承受任何風險，你可以投資定期，儲蓄保險、美國國庫債券、IBOND等低風險產品。但缺點係，佢地增派息率唔高。

以你現時年紀，應該都要做少少財富增長，才算理想。但若你真係唔想承受太多風險，只買上述產品都係可以。

如果你可以承受少少價格波動的風險，你可以將部份資金，投資「收息股」。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

大市現處於合理水平，那250萬資金，你可以先用多50-80萬，以"分注"形式慢慢入貨。餘下資金就等大跌市機會出現，才大力度掃貨，並長線投資。

至於你現有持股，其實好多波動性都好大。以你較保守的投資取態，佢地唔係咁適合你。

騰訊（0700）、平安好醫生(1833)、昭衍新藥(6127)、GX中國電車(2845)、三星中國龍網（2812）、ＧＸ中國生科(2820)都有質素，但係不確定性較大，股價預期會好波動，建議你不要持有太多，甚至將佢地全部換成收息股，或者一些適合你的產品。

平安(2318)、粵海(0270)、瑞聲(2018)、IT HON TENG（6088）、廣汽集團（2238）、中國鐵建(1186)係平穏增長型，波動性會細D，但風險會比收息股高。你自己再衡量下，是否持有，還是同樣換至其他地方。

Ｆ三星原油期（3175）我無對這基金有特別研究，佢係追蹤油價相關的指數。

中短期油價會好波動，風險高。但長遠計，油價唔會好似現時的低位水平。

因此不是無投資價值，但你最好仔細了解這基金和佢追蹤的指數先。同埋，一定唔可以大注。

易大宗(1733)、渣打(2888)投資價值不高，建議換至其他投資項目。

保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

餘下無提及的股票，都係收息股，若你可承受少少價格波動的風險，長線持有就可以。

最後，你要留意持股總數，以你資金收量，組合大約10-15隻股票好了。過多你會好難定時審視和管理，對你會不利。

------------------------------------------------

Q21819：

你好！龔成老師，本人38歲想請教一下如何調整現有投資組合，邊D適合長揸，邊D應該沽出/減持？

股票組合如下：

香港中華煤氣有限公司 (3) 3024股@ 17.30
思捷環球控股有限公司（330）600股@ 50.00
中國建設銀行股份有限公司—Ｈ股（939）3000股@ 8.00
金利豐金融集團有限公司（1031）4000股@ 6.00

工商銀行—Ｈ股（1398）4000股@ 7.00
醫渡科技（2158）1000股@ 65.15
京東健康（6618）50股@ 71.00
阿里巴巴－ＳＷ（9988）500股@ 250.00

另外如果想加入比亞迪電子（0285），吉利汽車 (175) ，阿里巴巴－ＳＷ（9988）作長線投資，現價可入嗎？謝謝老師

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應以增值為主。建行(0939)和工行(1398)只係收息股，增長力唔高，不宜持有太多。

思捷環球（0330）當多年前，環境改變令佢「生意持續下跌」，佢的質素已經改變，佢已經要進行止蝕的動作。

金利豐金融(1031)質素一般，建議慢慢換至其他優質股較好。

醫渡科技（2158）有潛力的，可長線。但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

你現貨可持有，但暫時唔好再加注了。

其餘持股，都係有質素和適合你年紀，長線持有就可以。

至於想再加入比亞迪電子（0285），吉利汽車 (175)，都係可以。比亞迪電子（0285）現價偏貴，回多1,2成才算合理區頂，才可開始小注。而比亞迪電子（0285）現價算合理區頂，無貨可先小注，到有明顯回調，才正式入貨。

阿里巴巴(9988)雖然現價合理，但由於佢已經佔你組合較高比重，個別企業不應佔組合15%以上，否則會有過度集中性風險，故你暫時不要再加注。

另外，你而家太偏重左係潛力股(2158, 6618, 9988, 0285, 0175)，佢地雖然有增長潛力，同時風險都較高，不宜持有過多。

你算年青，風險承受力較高，但潛力股也最多只宜佔組合約5成，餘下應集中係平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q21820：

你好，龔Sir, 很後悔不早點認識你的專頁，因為跟住你的投資方法，幾個月已經見到明顯的增長，真心感謝你願意將你的心得經驗不吝分享。

現有一問題在猶豫：（現37）6年前買了一份投資保本的保險供10年（還要供4年）因當時幫朋友無留意回報，現發現每年投入5萬，10年後多1萬，

而且供滿期後再放多5年先會多20萬，現在停供會蝕7萬，但因今年（最遲明年）會置業需要資金，請教阿Sir會如何安排？謝謝

龔成老師︰

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

因此，你要視乎翻你持有的投資保本的保險供，當中的特性，以及本身的預期回報，其中保險的作用。

從投資角度計，你保本保險回報，唔算理想。

同一筆資金，若利用優質股去增值，長線好大機會可以跑嬴這份保本計劃。

當然，你這計劃的好處，就係保本和較有保證回報。而投資股票，股價始終會有波動性，有一定風險。

但由於你係有實際置業需要，而資金又不足，那你只能選擇停供。

以你37歲，應先做好增值部份，我較建議先用優質股增值。但若你係好保守架投資者，買儲蓄保本保險，都係可以，但最好不要太多。因為佢會拖慢你財富增長步伐，你要明白這點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21161-Q21180）

Q21161：

你好，我今年29歲，上年買左樓，但發現買完樓供樓就就開始儲唔到錢。依家戶口剩番1萬，月薪33000，供樓17000。

想請問如果想要開始供股，我應該點擺放好？人到30覺得再甘落去都唔係辦法？希望可以比到意見，另外我都開始睇你既書，80後百萬富翁，多謝你

龔成老師：

其實你已置業，都是財富配置的一部分，只要你之後應該慢慢累積翻股票。

第一，你現時要留現金，因為你現金數目太少，同時你有物業，有負債，你一定要有一些備用現金在手的。因此唔好太急買股票。

第二，要提高收入，要錢滾錢，就要有本金，你現時無本金，如果想突破，就一定要提高你的收入，你29歲，是事業的黃金期，現時職位的提升，轉工，兼職，小生意等，總之想方法增加長遠收入。

第三，減少支出，如果每月現時無錢剩，為了有初期的本金，都要努力減少支出一段時間，令自己有本金。

第四，努力學投資及投資，你現時是財富累積的黃金期，要好好把握，到你有一定的現金數目後，就可以開始投資，月供股票都得，如果能承受風險，就供一些潛力股，如恆生科指ETF（3067），如果承受風險度只是一般，就投資一些平穩增長股。

------------------------------------------------

Q21162：

1.想問老師點睇460同3800呢2隻股，我分別持有呢2隻股票，但見佢細價股，唔上唔落甘，是否有質數可持有？

2.現有5萬可投資

A.以現在市況，應耐心靜候等大跌市

B.定1手手入股，我心水買3868/968/3319
但以我資金買既量不多

C.月供股票？每個月3000甘月供會比較好嗎
謝謝老師給予意見

龔成老師：

1）四環醫藥（0460）好翻D，相信無之前咁差。

不過這股，2015年、2016年，曾經出現了核數師有「保留意見」的情況，反映盤數有問題，小心這股。

我對投資這股有保留。

保利協鑫能源（3800）業務不穩，質素中等。不過不是無增長，是有危有機類。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率未算好高。

如果真的想投資，小小注好了。

2）你要留翻$2-3萬作備用現金及等投資機會，可利用$2萬去投資，如果你無太強投資能力，月供是較好的方法，建議你月供$3000。你可以考慮2800或3067。

------------------------------------------------

Q21163：

龔sir你好，有幾個問題：

1.388/1810/2382 那1隻做月供股票值博率會大的

2.另外想問968同1177的合理價應是？
謝謝老師回覆

龔成老師：

1）最好建立一個組合，這3隻都有質素，都可投資，月供長線無問題。

如果要選1隻，小米（1810）會較有潛力。

2）信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂，如果想入，要慢慢分注，但仍不是大注投資的時候。這股股價上落都大，要注意金額。

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

你預$5-$8合理區。

------------------------------------------------

Q21164：

龔Sir你好，請問3333 丶371、1818丶270邊隻好啲？

龔成老師：

都是有質素的，不過風險度不同。

粵海投資（0270）是較穩健的一隻，這股正面的，這企業有多個業務，同時都處於賺錢的狀態，整體不錯。加上最大的水務部分，更是香港東江水，即是不斷賺香港人錢。

佢係供港東江水部份，賺錢能力已經比以往弱左。係疫情下，內地工商用水需求會下跌，影響收入。而且，集團收入除了水資源外，還有其他好似物業投資、酒店、百貨等，在疫情下難免會受影響。

至於增加資本開支投入建設，如果能提升現有效能，就會對佢盈利有正面影響。整體而言，集團業務依然係算穩定，預期維持平穏發展，故有長遠投資價值。

此股現時在合理區，投資時要分注進行。

至於中國恒大（3333），就是上述增長力較高，但同時風險都是最高，佢業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，但如果只是小注，勉強可以，但都要明白風險。

------------------------------------------------

Q21165：

龔成老師，本人最近才學習股票，新手一名，最新關注到老師，亦很欣賞老師大方同用心分享，不知可否請教老師問題

本人持倉如下：
0288萬洲 持6500股，7.245買入、
1810 ，小米，持800股，26.35買入、
6993，藍月亮，1500股，12.82買入、
9988，阿里巴巴 200股，228買入

萬洲同藍月亮都大跌，不知應否繼續持有，怕會繼續跌，想請教老師會點處理？

或老師有其他建議給我嗎，十分感謝

龔成老師：

記住一個重要的投資概念，你最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

其實你持有的股票，都有質素，只要你買入價部分較貴，相信你未有企業估值能力，建議你日後多用月供或分注模式投資，不要一次過買入。

萬洲國際（0288）質素唔算差的，但潛力就不算強，只是平穩增值的類別。

有時你見肉價短期上落，都會對佢股價有短期影響，不過，我地分析時，唔好太著重中短期因素，例如短期的肉價格，以及供應等因素，都會對佢中短期有影響，但我地最緊要是分析企業的長期營運模式，發展，而這股正面的，可長線。

這企業過往的生意保持平穩，業務基本上是平穩的，只是因貿易等問題，令股價較為波動，成為這股的風險。

投資這股，可說是平穩增長，以及收下息咁，不要對股價太有期望。只要持貨不過多，可持有。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，除非你持貨太多，否則暫時可以守。

至於另外兩股，都是無問題的。

------------------------------------------------

Q21166：

我股票市場輸晒成副身家，買窩輪狂蝕，請問呢排買咩可以追返？

龔成老師：

財不入急門。

我20年前，都有投資衍生工具，玩左幾年，輸足幾年，之後長線投資，就開始不斷賺錢。

你之後買翻優質股，長線投資，慢慢累積翻財富，看似較慢，但卻正確。

你要做兩樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q21167：

謝謝老師，供了2年多月供股，賬面現時升了29%多，人生第一個20萬好開心，期待第一個百萬～
31個月時間

股號@平均股票/佔全部既比例（$供緊既股票）
0003@$14.5/9% ($1000 )
0027@$55/13.5% ($1500)
0823@$75/12% ($1000)
2388@$28.8/6% ($1000)
2800@$27/16%
2638@$7.5/4.5%
1177 @$7.2/10%
1211@$51/29%

Q1: 想增加潛力股的比例，但現時我供的潛力股已到略貴水平，怎辦辦？

Q2: 現時現金不多，5位數字，每月只能儲9千，有些股太貴已停月供，月供數量同金額應否增加？還是照樣每月供$4500?

龔成老師：

太好了！

保持這個大方向就得，這是一個好穩健的累積財富方法，期待你得到$100萬後再同我分享！

1）現時的選股，都是有質素的，可長線持有，如果你年齡不大，你可以繼續月供潛力股，但就選一些相對無咁貴的，例如恆生科指（3067）。

至於你現時月供的4隻股，都有質素，可以繼續進行月供。

2）如果你現時現金的比例，少過財富佔比3成，就應該儲下現金先。如果有3成以上，就可以考慮增加月供。

------------------------------------------------

Q21168：

龔 sir 你好，我這個投資組合有$80萬貨：12、27、66、270、345、823、968、1810、2800

再加每月月供股票 3000盈富，2000 MTR, 能否在8年後滾存夠二百萬，比囝囝去留學用。謝謝

龔成老師：

現時你持有的股票，都是有質素的，假設每年增長10%（要將股息再投資），$80萬預期會增長到$170萬。

至於現時月供，每月$5000，每年$6萬，假設增長8%，8年後預期滾存到$63萬。

即是總數會超過$200萬，相信能完成你的目標。

你現時只要持有原有的股票，以及保持月供就得。

如果想進一步提高財富，就可同時留翻一定的現金，如果出現大跌市就可以提握到入市機會，回報率進一步提高。

------------------------------------------------

Q21169：

老師你好想問下你對86有咩睇法？

龔成老師：

新鴻基公司（0086）佢香港的金融服務機構之一，分行及辦事處遍布香港、中國內地、澳門及新加坡。經營業務包括以下：
　　　　
融資業務：例如消費金融（如提供消費中小企及其他金融信貸）以及專業融資、按揭貸款等。

另外業務是投資業務：如投資管理、策略投資、集團管理及支援。

過往都有一定的生意，不算差，但增長力就不強，算是平穩增長，至於盈利，都不差的，但就有少少波動。這股都有長線投資價值，現價合理，質素都有，但不是最高，始終獨特性不強，行業競爭大，因此唔建議太大注投資。

------------------------------------------------

Q21170：

早晨龔Sir
請問你點睇以下股票？

中國國航（753）
佐丹奴國際（709）
莎莎國際（178）
如想3選1，會選哪？謝謝

龔成老師：

其實質素都有點接近，都有質素，但卻不是最高質類別，因此不建說過度投資。

莎莎（0178）會略好，佢仍有質素，但佢已經無過往年代般的賺錢能力，同時香港的零售市道有風險，都令這股近年的表現較一般。

這企業本身在行業有一定的地位，賺錢能力不差，但就會受經濟及零售市道影響，令股價較為波動。

其實股票班我都有講這股的估值，在過往10年，自由行較為黃金年代過左，所以從估值上，無之前咁高。

佢在行業的優勢仍在，但整體行業及零售市道，無過往咁強。長遠仍有質素，這刻處合理區，但投資注碼不能太大注，亦要有耐心先有收成。

之後的中國國航（0753）與佐丹奴國際（0709）差不多。

------------------------------------------------

Q21171：

成哥 想問下 啊里巴巴同中海油有無咩睇法
巴巴296入 坐佐成半年
中海油10.11入

龔成老師：

阿里（9988）你預要耐心守，但這股有質素的，只要你不是持貨過多，仍有得守。

因為佢將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區中上部，這股可長線。不過，中短期會波動。

你有貨可守，但未必要太急加注。

至於中國海洋石油（0883）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。因此，如果你持貨較多，建議上翻D就減部分。

------------------------------------------------

Q21172：

龔sir，不好意思又打擾你，想請教一下，因為3067及2845澳門銀行沒得月供，如果我每用買一手呢個方法可行嗎？

風險是否高了，如果將來升到一手好貴，甘我就沒得用固定金額買，要提高左成本

龔成老師：

其實月供的目的，就是將買入價平均，減少一次過在高位買入的風險，只要你做到類似的效果，其實已可以進行。

3067、2845，你都可以長期投資，每個月買入一手，或每2個月買入2手，可以的。如果日後股價升好多，一手費用大，就每2個月買入一手。

你可以這樣，長期儲貨。

但要留意，這都是潛力類別，風險會比一般類別較大的，因此，你唔能夠組合100%都是這類股。

------------------------------------------------

Q21173：

老師，為什麼那麼看好必瘦站？潛力好似無科技股那麼高？

龔成老師：

必瘦站（1830）因為長遠有發展，同時本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港鵯業務模式複製到其他海外地區，我見佢加強了發展其他地方，因此發展不差。

潛力度雖然不及科技類，但穩健度比科技類高（另外，不要盲目追科技類，雖然我自己都睇好，但有時可以好貴，回報都有機會負數）。

你預$4是合理區頂，這股有長線投資價值。

------------------------------------------------

Q21174：

6055 3000股@16.9
0788 20000股@1.17
1347 2000股@56.55

今年22歲，由於年紀細風險承受能力較高，所以想買一些增長力較高的股票，鐵塔雖然利好消息好多但股價依然每日都織布機咁其實增長力系米已經吾高？如果我放鐵塔轉入3800增長力會高d嗎？

中煙有機會上25嗎？

華虹呢幾日都跌緊 但又吾想溝貨 現買入價可守嗎？里昂之前評級最高85元 但60幾蚊同21蚊都有機構評級 想請教老師其實所謂的大行評級是用咩方式評？點解同一隻股票可以差咁遠？

謝謝老師

龔成老師：

中煙國際香港（6055）係中國煙草總公司的全資附屬公司，承擔中國煙草總公司國際業務的管理及運營工作。

中國煙草總公司為中國唯一根據國家煙草專賣制度從事煙草專賣品生產、銷售及進出口業務的實體。

業務上，的確有獨特性，不過，上市時熱炒，市場預期高增長，之後見到增長力不及預期。整體都有發展的，算是合理價。要上$25不是短期事。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。你可以轉其他，但保利協鑫能源（3800）風險高，這刻的投資值博率未算好高。

華虹半導體（1347）有潛力，可長線。你唔好著重短期股價，要睇「企業」。

至於大行，你當參考下好了，不要太過相信。

------------------------------------------------

Q21175：

龔 Sir, 可否說汽車股都是經濟敏感股？想聽下你對吉利前景的睇法，當然與1211比較，還有一段距離，再說大家個市埸定位也不同

龔成老師：

對，汽車股對經濟算是敏感，所以你見比亞迪（1211）這類汽車股，過往股價大上大落，再加上佢發展新能源，業務變數更大，業務與股價上落就更大。

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

------------------------------------------------

Q21176：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約十八萬，其中九萬現金，九萬股票。

我在前幾個月偶然留意到你fb page,覺得你教導好好，就開始買埋你幾本書睇，都由幾個月，前開始跟你的方法買股票，但我不能月供，所以每次都小注分階段買入股票，現時持有的股票如下：

水桶1:
1177 中生製藥 1000x$7.6 9.6%
3718 北控城市 8000x$1.6 11.7%
3067 安碩恒生 100x$16.3 2.0%
1448 福壽園 2000x$7.815 16.4%
3319 雅生活 250x$30.5 7.9%
2057 中通快遞 50x$239.4 13.0%

水桶2
823 領展 100x$66.6 7.6%
2800盈富 500x$30.08 16.0%

水桶3
778 置富 2000x$6.72 16.0%

快速增值：平穩發展：收息資產=61:23:16

問題1:這樣分水桶1/2/3，正確嗎？

問題2:以我現時情況，股票組合都大致可以嗎？我想把股票組合目標設為快速增值：平穩發展：收息資展=5:4:1，適合嗎？

問題3:我現時以動用我一半的資金，我計劃大跌市才再買入股票，正確嗎？

問題4:在現有組合新經濟股只佔2%，我都想入多啲，但現在這類股又好危險，是否應等大跌市才入？

問題5:我一直都想加一些水桶2的股票，如果2800/66/823每跌10%加一手可以嗎？應該先加
新經濟股，還是加平穩發展股先較好？
謝謝指導！

龔成老師︰

1） 你現時只有34歲，水桶3可以不用太多，可以集中在水桶2類別，而水桶1你去到6成，其實已經是上限，如果你本身投資實力並不好強，要減翻部分。當然，如果你有實力及經驗，就無問題。

2） 以你年紀，都有一定增長需要，這個比重係可以。

同時，要留意翻個別企業，唔好佔組合15%以上，否則會有過度集中風險。

持股中，中通快遞（2057）有質素。不過，始終新上市數據未必好準，要慢慢先見真章。暫時不宜持有太多，故不要加注了。

3） 留一半現金，等大跌市才加注，係正確。

4） 現時的確不少新經濟股係略貴，除左阿里巴巴（9988）和安碩恒生科技（3067）算合理區頂，可分注，其餘最好等回調。

5） 你現時組合有少少偏向水桶1，而且新經濟股都略貴，故先入舊經濟股會較好。

但留意，單一行業唔好佔組合3成以上。你組合中，有不少地產股（港鐵0066 - 都算半隻），這方面你要注意。

以下都是一些在合理水平的舊經濟股，你可以參考下。

盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、粵海（0270）。

------------------------------------------------

Q21177：

老師，請教下你，

1. 如果要你在700、1810、9988揀一隻現價買入的股票，你會揀邊隻？

2. 同埋241、1833、6618你又會揀邊隻？
麻煩晒你

3. 上次因為你指教而買入必瘦站而賺咗啲，多謝你先，我覺得如果低過4.5仲可以再加倉，你覺得呢？

龔成老師︰

1） 小米（1810）、阿里（9988）、騰訊（0700）都係有質素的潛力股，但業務上有點不同。單以值博率計，現時只有阿里（9988）在合理區頂，其餘都偏貴，故較值得投資。

2） 京東健康（6618）、平安好醫生（1833）和阿里健康（0241）都係有質素和潛力，但問題係佢地是有危有機的類別，雖然業務增長好快，但這刻仍處於燒銀紙的狀態中。

估值上好困難，因為無實質的盈利數據作為基礎，市場只是估估下。質素和值博率計，平安好醫生（1833）會較為佔優。這些企業都可投資，但只宜小注。

3） 必瘦站（1830）現價偏貴，回多1,2成才算合理區頂位。若你有貨係手，等佢回多2,3成才加倉，會較理想。

------------------------------------------------

Q21178：

你好呀老師，本人對1475日清有點期望，每年盈利公佈也是賺錢、又有新產品又開發新市場、亦有大行消息曾經睇好、公司亦是國際知名非常穩健。

為什麼股價始終向下，是不是有些什麼我忽略了 ？
謝謝

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

日清食品（1475）不差的，都算有質素。

佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

正如你所講，佢本身有品牌優勢。加上業務穩定，盈利都不差。但比較大的問題，整體增長力唔算高，發展潛力不算強，此股算係平穩增值類別，有長線投資價值，但不要對潛力有太大期望。

這股下跌了一年，其中一個原因是疫情令這股之前處貴水平，因為佢短期會因疫情而銷量增加，但當市道正常，股價就會回歸理性，所以由貴跌回合理區域。

現價算是合理區頂部，可分注入貨，同時要控制注碼。

------------------------------------------------

Q21179：

想問下老師，你認為呢幾隻股票前景如何
2666，2688，2333，2359

龔成老師︰

環球醫療（2666）、新奧能源（2688）質素和前景都有，但優質度只屬中等。現價合理，分注投資都可以。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

現價合理區頂，小注都得。如果想正式入貨，最好回少少先考慮。

而藥明康德（2359）都有d質素。

佢主要從事藥物研發平台業務。係藥物開發過程，主要分為藥物發現、臨床前開發、臨床研究及商業化生產共四個階段。

睇翻佢的資料，佢的服務對應各個階段，可分為以下四個分部：（１）中國區實驗室服務（２）合約生產組織（３）美國區實驗室服務（４）臨床研究服務。

佢的客戶包括美國、中國、歐洲及全球其他地區的製藥公司及及生物技術公司。

業務其實不差的，過往的生意與盈利增長理想。

當中最大的風險，就是市場估值，現時的市盈率過百倍，就算有增長力，都計都貴，股價上落一定會好大。市場現時對佢前景有好大期望，但如果增長力比市場略減，股價都會調整。

只可以話這企業有增長，同時有風險。

------------------------------------------------

Q21180：

龔SIR, 本人澳門人, 隨住follow你page一年左右, 加上買你ge書睇,學識好多野, 多謝你ge無私分享先.有2個問題想問,

1. 其實如果我28歲, 本金只有30萬左右, 應該投資最多幾多間企業會較適合同穩當?

2. 對於估值上有進步, 大致接受到, 但投資值博率除左思考企業內外因素外, 係米可以計出黎? 係要點計先合理?

龔成老師︰

1） 以你現時30萬計，組合中可以6-8隻股票左右。到你資金再增多時候，可以加多2-3隻，大致維持在10隻左右就可以。

你現時28歲，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

大市現處於合理水平，那30萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

2） 要計企業的價值，從而評估個值博率。過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

之後，再比對現時股價，去判斷出現時投資的話，值博率高唔高。

如果真係要深入計算，基本上要好仔細的研究企業，要分析好多財務數據用比率，先至有較完整的答案。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13701-Q13720）

Q13701：

成哥，我係你舊生，想問經營活動之現金流量長期是負數？造數？不宜投資？

另外，若融資活動之現金流量為正數，是否表示有收入，但睇其他企業一般都是負數，唔係好明。可否解釋一下，感謝!!

龔成老師：

正如我課堂所講，現金流量表是比較深的報表，並不易理解的，因為當中有較多會計上的概念，未正式學過較難明白。

但你初步的理解是正確的，若現金流的確弱，這反映佢生意部分的現金流，同時有弱左的情況，但不能立刻視為造數，只是生意現金流弱，我地會扣分，同時投資不宜大注。

至於融資活動正數，即是佢問人借錢令現金流增加，這反映佢負債多左。

至於你話一般企業，融資活動為負數。

「融資活動」，主要包左兩部分，第一是「借貸出入數」，第二是「股東資金出入數」。如果佢融資活動不斷負數，有可能是每年派股息，這是利好因素。

------------------------------------------------

Q13702：

成哥，最近看見太陽城有很多活動及計劃，例如發展越南到家村，收購菲律賓上市公司等，而在澳門亦是處於龍頭的地位，想問一下成哥對這股有什麼看法，謝謝

龔成老師：

太陽城集團（1383）有危有機，佢業務上不是全無優勢，但佢的財務數據並不理想，投資價值不高。因此，如投資這股，只是單純投資將來的項目，博佢有一定的發展。

這類股，風險較高，如睇好佢的項目，只建議小注投資好了。

------------------------------------------------

Q13703：

我想問埋788，其實佢一上市我幾睇好。但在你股票班所學的指標計計，其實佢的PE都好高下，加上唔係上左市好耐。

對於呢隻股，其實我想長線投資。但現價是否仍然貴得不合理？

抑或因為佢上市都未算好耐，唔可以咁樣睇？我加佢入月供，抑或一手一手分注買入，邊樣較好？
謝謝你，等你回覆

龔成老師：

中國鐵塔（0788）有質素的，只是近期有少少炒概念，所以這刻唔能夠太進取。

這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處好高水平，反映現時估值略貴。

由於這股有發展力，如你有貨，可長線。

但如這刻買入，就要自己衡量風險，同埋不要大注。小注分注慢慢入，可以。

------------------------------------------------

Q13704：

老師你好，上次你叫我看的股票勝經我已經看完了真是令我獲益良多

老師我發現某些股票的每股派息比每股盈利還多，請問這些企業背後的動機或目的是什麼？

先感謝老師解答

龔成老師：

你可以再睇我的其他書，得著會不少的。

一般的公司，都可以自己決定派多少息，只要現金足夠就得。例如佢今年賺$1億，但由於現金太多，所以決定派$3億的股息，這是可以的。

可能佢認為現金太多，在公司無特別用途，又或大股東好想收購，而大股東亦是管理層。又或者因為會計上的原因，例如折舊等因素，這現在情況（這可能是利好因素，詳細會在股票班講）。都有機會出現派息比率超過100%的情況。

------------------------------------------------

Q13705：

成哥，請問你點睇新樓XX的128呎單位？
九成樓按，十幾萬可以做業主
可以租到6千幾出去

龔成老師：

我一向對新樓都有保留，因為好易買貴貨，除非佢的發售價好近同區的二手市場價。所以，唔好單單比「好易上車」，就認為有投資價值或平。

至於太細的單位，我亦有保留，因為買樓最大的需求，就是結婚人士，即是佢地會想建立一個家庭，因此，300呎會是較基本的要求，要少也要250呎。

你要計翻租金回報率方面的回報是多少，比較翻同區，如果佢的回報率比同區較高，你才可以考慮。

------------------------------------------------

Q13706：

老師你好，我今年25 歲，之前有來信，也看了你大部分的作品，獲益良多。

現時工作收入暫時都是維持在25k左右，由於澳門月供股票比較貴，而自己亦可以一手一手咁買，所以打算每個月買一手盈富基金，而每隔三個月才買一手港鐵。

這樣一來做到平均成本法的效果，二來不用比手續等費用而自己可負擔得起。

即是1～3月各買一手盈富，4 月買一手港鐵，5～7 月各買一手盈富，如此類推。

這樣下來平均每月大概投資股票金額是15k左右，而同時可能大概花2～3k買儲蓄保險（充裕未來），剩下就暫時先草現金。

老師認為這樣部署如何？另外現時有500k該如何部署較好？感謝老師願意花上寶貴時間，祝一切順利。

龔成老師：

你上述的方法，可以進行。

我平時叫人做月供股票，最大的作用就是平均買入價，以達到分散風險的作用。如果澳門月供手續費較貴，你的確可以用其他方法的代替，只要做到「平均買入價」這個效果就得。

所以，你上述方法可以。另外，你要計一計，例如2、3年後，你組合的比例會如何，只要無集中情況就得，我相信上述是無問題的。

另外，你買儲蓄保險是可以的，因為防守性產品，都是理財的一部分，但你25歲，唔需要太多，現時已適合。

至於現時的$50萬，以你的年齡，建議投資平穩增值股及潛力股，前者會較多。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q13707：

你好老師，近期我同我的伴侶建立了一個明確的目標，就是在三年內（即我們40歲之時）退休。

目前，我們的情況如下：
- 3 層樓，一層自住（供緊），一層租出（供緊），另一層租出（供滿 - 租金當比家人家用）

- 200 萬股票，以穩健增長股為主，港股美股也有，整個 Portfolio 的平均息率約為 7%

- 100 萬現金

我們計算過，我們每個月的生活費（已減去自住的按揭）約 40000- 50000 元。

我們的目標是平均每個月再投入 10 萬元進我們的 Portfolio，預計在 2021 年農曆新年之時，總投入 150 萬，使我們的 Portfolio 為 450 萬。

我們希望再加少少槓桿，使可投入股票的金額達到 750 萬左右。以 7% 回報計，預計股息可達 52 萬左右。

去到這個階段，我們基本上可以停下來，達至 mini 財自。最終目標是希望 2-3 年後，樓市好轉，可以放出現在租出和供緊的那層，套現後可達至不用槓桿 >1000 本金投資，從而達至最終財自。

想問下老師，以上的計劃，有沒有一些盲點我們需要注意的呢？我最怕是有些東西我們計留了，或者一些 assumption 我們預計得過分樂觀，從而導致將來失了預算。

謝謝老師，我地真係好想快啲退休，贖回自己的時間。

龔成老師：

利用了槓杆，一定會加大了風險，不過，這不代表不能運用，只要你明白當中的風險就可以，加上你地仍年輕，可以承受到風險。

另外，都要睇你這幾年投資那些股票，如果穩健度較低，你就要注意翻當中的風險。

至於3年後，無人知樓市的真正情況，因此我不建議用「預期」的模式去設定計劃，因此計劃只能有一些方向性的情況。

另外，你3年後不一定要賣兩個物業，因為物業始終都是資產，有長期持有的價值，可以助你產生現金流，在你財富平衡中有一定的作用。

最後，財不入急門，所有野都要小心計算風險與回報，如果過急去睇回報，而無視了風險，這就會有問題。

------------------------------------------------

Q13708：

呀成, 我28歲, 近排買左樓, 因為咁樣我基本上用哂我之前儲落的錢, 我計過數之後減左供樓同以往一切開支後

宜家有CASH10萬(但我諗住係應急用)
另外每個月應該儲到3000-5000左右, 我想問下你意見應該點令D資產增值得好D?

以往因為想買樓過到MC所以唔敢借錢, 宜家買左樓之後除左照之前咁買優質股之外會唔會有多D option?

龔成老師：

你現時已持有物業，即是在財富比例中，物業已佔比較多，因此不宜再增加這類資產，而應該加強股票類資產。

我相信你以優質股為主較好。

另外，如果你想借貸投資，不是不可，但這刻不是最好時機，因為你本身已有一定的借貸，再借會增加了你的風險，這不是不可，但一定要確認「有明顯的投資機會」才會進行。

而這刻的投資市場，只是合理區，未到平宜區，因此未到最好的時機。

------------------------------------------------

Q13709：

龔成老師，06869長飛光纖光纜值得或騰訊長渣嗎？ 匯控買黎派息好嗎？
謝謝老師

龔成老師：

長飛光纖光纜（6869），質素比一年前，有轉弱的情況，但未算壞。

佢長遠的增長力仍在，因為全球光纖光纜市場，仍會保持向上，智能手機、互聯網、大數據等科技，成為了行業的推動力。

長飛光纖之前受惠三家國有電訊營運商發展網絡基礎，所以生意算是不差，但這亦令這公司出現風險。之前中移動的中標結果，佢排名唔算前，這反映市場競爭有所加劇，佢的賺錢能力有可能略有減弱。

整體上，質素仍在，但增長與賺錢能力就有就減弱，投資價值仍在，長線是無問題的，但不建議大注。

至於騰訊（0700），都適合長線投資，但現價在合理區中上部，加上增長力比過往略減，因此這刻雖然仍可投資，但不適合太大注。

至於匯豐（0005），你可以視這股為收息股，但就唔好對佢股價有太大的期望，如果你組合中，想有部分持有收息股，這股可以的。

------------------------------------------------

Q13710：

想問成哥 1112H&H同3799達利這兩隻股質素如何，見佢地估值開始吸引

龔成老師：

Ｈ＆Ｈ國際控股（1112）其實業務本質不差，增長理想，只是市場過往對佢有太高的期望，因此近年股價下跌，只是反映市場對佢的估值合理翻。

這股有質素，現價合理，但股價就有少少波動，要注意。

達利食品（3799）業務不差，生意穩定同有基本的增長，但增長力就不是快速的類別，以這刻的估值計，未算好吸引，只是合理區中上部。

------------------------------------------------

Q13711：

老師你好 以下有些投資問題想請教

本人現時正月供股票3000港鐵 2000煤氣 2000比亞迪 現在見大市回落不少 打算未來一年遂步一手一手買入其他心水股票 長線持有

為增加值搏率 提高長期回報 希望等待心水股票股價到達合理局下部或便宜區才入貨

所以希望老師可以略略計算和指出以下數隻股票的合理局下部或便宜區價位 等學生可以善用資金:

1. 1928金沙
2. 868信義玻璃
3. 1317楓葉教育
4. 3331 維達國際
5. 3918 金界控股
6. 2018 瑞聲科技
感激不盡！

龔成老師：

就整體大市來說，現時大多處合理區，未到平宜區，因此，建議你保持月供，同時留有一定的現金「等投資機會」，最多只能動用少少去買部分的貨。

金沙（1928）、金界（3918）現時在合理區中上部。

信義玻璃（0868）、楓葉教育（1317）則在合理區中下部。

維達國際（3331）、瑞聲科技（2018）合理區。

------------------------------------------------

Q13712：

老師，我地持有優質股，一般幾耐檢討一次，因為你話要長線投資？

龔成老師：

我地一般會半年檢討一次，如果出現股價大幅波動，又或一些重大消息，我地都會檢討。

記住，我地不是分析股價，而是分析企業的長期業務發展，有無一些核心性的改變。如果只是中短期的問題，我地就不會擔心。

------------------------------------------------

Q13713：

你好！最近拜讀梗你既書..對為自己爭取財務自由有更好既打算...！

想請教..我打算為自己做一個收支負債既表..分析自己既財務狀況...想問醫療保險,基金同強積金應該歸邊類？

龔成老師：

你可以參考我的書《財務自由行》，當中有詳細教你建立「個人收支表」，「個人資產負債表」，你可以保持每月做一次。

醫療保險，你可以睇翻當中有無現金價值，如果有現金價值的部分，每月就不是支出，而是一個「投資」，你只是將現金這個資產，轉為資產負債表中「保險」這個資產。因此不會在收支表反映。

但如果無現金價值，就是一個支出，你就要在收支出反映。

至於基金，是投資，因此不是資產。

而強積金，理論上，都是投資，原理同基金一樣。

------------------------------------------------

Q13714：

龔老師你好，本人今年29歲，有左bb，同老公有30萬積蓄，但月薪2個人加埋都係3萬蚊多少少，基本上每個月都儲唔到錢，但又想做少少投資。

想攞10萬岀來，想問買騰訊好，或供股(2800)盈富,每個月供1000左右，又或者同時進行會好d?

龔成老師：

由於小朋友的開支大，因此，建議你多留現金，因此不建議投資太多。

你要先計好各種所需開支，餘下的閒錢，才可以投資。

如果你$30萬中，$10萬是閒錢，你可以考慮投資盈富（2800）、恆基（0012）、港交所（0388），騰訊（0700）都可以投資，但這刻投資值博率不算高，因此不建議太大注。

以你的情況，我會比較建議月供股票，例如每月$5000，而不建議一次過用$10萬作投資。

------------------------------------------------

Q13715：

龔sir 我是澳門人 希望用自己層樓加按套現一百萬 息率大約2.25至2.5 然後將一百萬買入高息股 例如中石化有接近9厘息的股票 當中兩者息差能否抵銷呢？

如能 大若借15年 當股價下跌時 息率提高 而當股價升時赚價位差 15年過去后 我借的一百萬是否無成本 我的想法是否太簡單 可行嗎？當中有什麼考慮因素？

謝謝
補充一點：選股時会買入低殘而高息股票

龔成老師：

加按套現有危有機，你要自己衡量風險，因為當中的原理，其實是問銀行借多D錢。而利用借平息，投資較高息的項目，的確能創造息差，但我地就要小心賺息蝕價的情況。

因此，你這筆錢宜投資較低風險的股票，中石化（0386）是可以的，因為這股派息穩定，是不錯的股票，不過增長力就不強，同時股價有潛在的波動風險。

但你唔好全部投資這股，因為會有集中風險，最好是建立一個收息股組合，目標是股價穩定、業務穩定，股息率有平均6%的股票。

例如深高速（0548）、香港電訊（6823）、工行（1398）、置富（0778）、陽光（0435）、匯豐（0005）都可以。

另外就是「賺息蝕價」風險，投資收息股，有可能出現賺息蝕價，因為現時低息環境，你利用低息借錢，投資較高息的收息股，能賺到息差。不過，就有可能出現賺息蝕價的情況，因為這刻收息股只是處合理區，並不是平宜區。

因此，這刻做你上述動作的價值，值博率算是中等，但就不是高值博率。你要自己衡量風險，決定做唔做。

------------------------------------------------

Q13716：

龔成老師你好 我係社會工作左兩年多 上年開始接觸投資 但一直小注短炒為多 近期想重新部署做中長線投資

以下係而家持有既股票
1113 長實集團 $54 1000股
2388 中銀香港 均價$29.7 1000股
6098 碧桂園服務 均價$26.7 4000股
3383 雅居樂 $10.1 2000股
883 中國海洋石油 $12.68 2000股
288 萬洲國際 $6.66 3000股
2313申洲國際 $103 200股
2689 玖龍紙業 $8.15 5000股

(1) 如果重新部署，應如何改變以上組合？
(2) 2689是否不值得投資？
(3) 之後打算每月用$5000作月供，邊啲公司有增長潛力同埋應該點樣分配？
(4) 讚唔讚成做定期？

龔成老師：

首先，短炒根本無法助我地長期賺錢，因此一定要改，之後要以「投資優質股，長線」去進行。

1）你現時持有的，大部分都是有質素的股票，基本上都可以持有，無太大問題，長線就得。

2）玖龍紙業（2689）質素不過不失，雖然股本回報率高，但成本令佢盈利波動唔細，這一定會帶來風險。

玖瓏算是當中不差的一隻，但相信中短期較弱。這行業投資價值算是中等，因此不宜投資金額太大。

3）我建議你在組合中，加入一些ETF，例如盈富（2800），這會令你的組合更為平衡。你可以月供盈富，再加上一些優質，長期增長的綜合企業，例如恆基（0012）。

4）如果你年齡不太老，就不應做定期。因為我地進行人生財富累積，應該以「先增值，後現金流」作方法。

------------------------------------------------

Q13717：

成老師你好 想問問你對內地物管股長遠前景有咩睇法?如果用黎月供股票又適合嗎? 如果適合 邊一間公司值得買呢？

麻煩晒你解答我ge問題...
Thanks

龔成老師：

物管股這行業，是一個有投資價值的行業。

因為企業有持續的現金流，加上行業正處於增長期，前景正面，所以行業大多有投資價值，只是平貴的問題，因為現時在港上市的內地物管股，都有少少貴。

比較合理的，算是雅生活服務（3319），現價在合理區中上部，只要分注，都可以考慮這股。

------------------------------------------------

Q13718：

成哥 請問你認為1666
同3613邊隻高質啲值搏率高啲？

龔成老師：

同仁堂科技（1666）業務有少少下跌的情況，雖然質素仍在，但投資價值會開始而略減。

同仁堂國藥（3613）雖然市盈率比同仁堂科技高，但業務穩定，仍有增長力，投資價值會比較好，因此，我地會偏向選擇同仁堂國藥。

------------------------------------------------

Q13719：

龔成老師你好, 本人剛剛大學畢業,銀行有5萬現金,月入17000,目標1年後有50萬資產。

持有6手(788)@1.7中國鐵塔及以招股價買入1手(1337)雷蛇。

最近雷蛇想發展Fintech,你如何看雷蛇前景?請問應否加注雷蛇?如要加注合理價大概是多少?

龔成老師：

中國鐵塔（0788）有投資價值，你可以持有，但不建議太過訓身。若想一年將財富滾大至$50萬，你要用盡所有力量去儲蓄，並適當投資，要比市場早一步找到潛力股，建議你大幅增加選股、企業估值等方面的知識，才有機會做到。

至於雷蛇（1337），我只可以話有危有機，佢過往的業務以及佢往後的發展，都是一些新領域，當中有好大未知數，雖然可能好好景，但同樣有可能失敗，你要同時考慮風險。

通常我地只要投資一小部分資金去這類企業，因為投資不是「博」，而是在可承受風險的程度下，建立一個平衡的組合，爭取合理的回報。坦白講，這類股好難計算合理價，因為現金流的不確定性太大，只能話建議小注。

------------------------------------------------

Q13720：

龔成老師你好. 我今年47歲,女. 去年因身體關係需留家休息, 可能不會再工作. 我與丈夫有自置物業, 只需70多萬元可完全供滿, 我們隨時也可full pay,

但早年的利率低 (約2厘), 每月供約7千很輕鬆,所以不考慮一次full pay, 這樣做對嗎?

我現有資產如下:
股票:
00005 4000股
00066 6000股
00405 10000股
00388 1000股
00002 400股
東亞 4000股
債基 90萬 (每月被動收入約港元4400, 蝕價中)

有一層英國樓 月收租約9000港元
有港元100萬可作投資, 想作收息用, 請問有何建議, 謝謝老師!

我目標想每月有2萬被動收入, 有可能嗎?
thanks!

龔成老師：

現時仍處低息環境，因此不必要太快還錢，佢只要簡單投資收息股，但到5%、6%的股息回報，而現時按息約2%，已經可以賺了息差，因此，拉長還款期，不斷賺息差，反而是更好的策略。

所以，你不心急還錢，是正確的。

至於你現時的股票，都是有質素的，可以持有，但不建議再增持太多銀行股。

債券基金，有個投資有危有機的，因為我收到不少讀者來信，都表示有「賺息蝕價」的情況，所以要分析當中的質素，分析繼續持有與否。

英國樓，可以繼續持有。

上述的分配大致無問題，而你有$100萬，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、必瘦站（1830）、互太紡織（1382）等（記住，股價略波動，不能太過大注）。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。