［忽然一周：匯市篇］講明，不一定期專欄呀下，甚至有冇第二期都唔知。

從來唔信咩五窮六絶，但五月嘅主題當然係淡，仲有貿易戰。方便起見我由月頭計起（因為侵侵週末出推，我唔知計出前嘅星期五定出後嘅星期一好，懶）

人民幣急跌，預期之中啦。無論係主動（貨幣戰？貶值增加出口競爭力抵消關稅影響？）定被動（避險，資金走入美金），都唔令人意外。但其他貨幣呢？

以下呢個係彭博的圖，月頭至今所有外幣（相對於美金）嘅表現，很好。貨幣係所謂嘅Expanded major。只用Major就好似連韓圜都唔見，用Asian又會冇咗其他洲份。

同你睇下圖，睇下有乜得意嘢。

首先都好多人估到，升得最多嘅係日圓。唔見得因為貿易戰漁人得利（望下韓圜？）。主要都係因為避險。但凡大家京京，啲資金都係去晒買美金，美債（其實可能同一樣嘢），黃金（開始少啲），仲有日圓。仲有，第四位嘅，瑞士法郎，一樣都係避險貨幣。

人心虛怯，西瓜大邊，信美國佬，因為打得，好合理。資金一驚去晒美金美債，簡單易明。黃金，大家都知，世界通行，冇得印出嚟。但，做乜日圓瑞郎會係避險貨幣？好多人日日聽，但從來唔問點解。

其實，我都唔係好知。一個講法話日圓有大量嘅carry trade，好多人借嚟炒其他嘢，因為低息—但而家好多貨幣都低息喎。況且，瑞郎就唔低息啦？不過瑞士法郎係避險，就比較有理據。你諗下瑞士嘅歷史，中立國，瑞士央行亦都係比較獨立，比較正路，同埋印銀紙相當克制嘅（唔係唔印，只係冇咁狼）。

另外，留意第十位嘅，秘魯蘇 Sol。我都唔知係乜，冇去過。重點係乜？重點係，排第十嗰隻已經係跌，即係根本得九隻貨幣對美金係升，包埋quasi美金嘅港幣，同埋美金自己

In case 邊個咁好學又鍾意搞事嘅，會問做乜有USD，自己對自己唔係零咩？識得問嗰個應該幾醒。答案係：Total return，包埋息。美金存十日都有啲啲息。

跌得最多嘅，土耳其里拉。一向都係大波幅，況且近期玩DQ伊斯坦堡市長，立立亂，尤幸本人去嗰期就係匯率比較穩定嗰期（本人當年去拉脫維亞，換完錢，佢一晚貶值一成，佢老味）。
跌第二多嘅，瑞典克郎，寫過了。http://bit.ly/2vRhPb6　瑞典克朗跌至十幾年新低。同係北歐而唔用歐元嘅挪威都差不多。但同係北歐一樣唔用歐元嘅丹麥克朗就在十大升幅，實在冇咁簡單。

南美幾隻貨幣，最惡名昭彰嘅阿根廷披索，違約多過捧世界盃，好少少嘅墨西哥披索（聽過龍舌蘭危機冇？Tequila 是也），仲有哥倫比亞智利，都係有乜依稀就齊齊走頭嘅貨幣。

另外，紐紙澳紙當然成熟好多，但貿易戰梗係跌。因為主宰澳紙紐紙嘅最大因素，係大陸。是真的，特別係澳紙。鐵礦石嘛。

本頁成日講嘅韓圜（畀大家發現咗本人其實都幾鍾意去韓國），其實一早已經兩年幾三年新低，反而呢個月跌幅未算好大。有趣嘅係，明明只係隔離國家，兩個都係美國盟友，中國敵人，但啲走勢極唔同。而獨立嚟講，韓圜啲波幅相當之大。咁固然日本經濟規模大好多，但其實韓國經濟規模已經差不多係世界十大（嚇死未？），同俄羅斯差不多（係咪好誇呢？），大過西班牙澳洲之類—但貨幣嘅波幅，堪比其他東南亞，甚至南美國家，神奇。有機會再寫

有關秘魯Sol又補多句：嚴格嚟講，秘魯呢隻貨幣嘅名嚟自拉丁文。但應該唔少人都知，西班牙文嘅Sol 係太陽（飲啤酒咪知）。秘魯對上一隻貨幣叫做Inti，印加帝國嘅太陽神。唔好以為好耐之前呀，講緊係1985-1991嘅事。就梗係因為惡性通脹啦。85年之前？又係惡性通脹咯。咁85年之前用乜貨幣？都係Sol，所以就有新蘇同舊蘇，好似新台幣咁，但慢慢地就冇人再講新台幣啦。

最後講多句，唔知太陽神Inti係乜？睇波咪知。阿根廷烏拉圭國旗上面個太陽，有樣的，就係Inti。反而而家嘅秘魯旗冇咗Inti

[平行時空360-361] 希債危機的出路︰「冰島模式」可行嗎？（上篇＋下篇）

對不少人而言，希臘債務「危機」早已不是危機，因為那幾乎是不可能解決的問題，將永恆地存在。既然是永恆的存在，任何結局都早已被消化，也就談不上「危機」了。然而不少希臘領袖還是不信宿命，扭盡六壬，負隅頑抗，博弈論高手齊普拉斯又宣布解散國會，重新大選，又進入新一場博弈。由於一切換湯不換藥，在可見將來，恐怕類似方程式還會不斷出現。

究竟有沒有一勞永逸的解決方案？除了退出歐元區、或讓債權國皇恩浩蕩地宣布債務一筆勾銷，不時有學者提出可效法「冰島模式」。冰島在2008年出現嚴重信貸危機，全國近乎破產，當時氣氛之萎靡，與今日希臘不遑多樣。但冰島政府果斷讓銀行破產、並作「一次性」債務違約，結果輕身上路，今天已得重生。2011年，第一波「歐豬國家」債務問題爆發時，諾貝爾經濟學家斯蒂格利茨(Joseph E. Stigliz)和克魯明(Paul Krugman)曾倡議歐豬國家效法「冰島模式」，認為這比接受國際貨幣基金會（IMF）及歐盟無休止的援助（和債務）更可取。

制度篇

然而，「冰島模式」一直被過份簡化，以為重點就是「一次性債務違約」及銀行破產，而忽略了冰島的獨特國情，這卻是冰島和希臘不能直接類比的關鍵。

根本問題是冰島不是歐元區及歐盟成員，至今擁有自己的貨幣及財金政策，只是「歐洲自由貿易協會」（EFTA）成員，而這是一個鬆散聯盟，其他成員只有列支敦士登一類小國。希臘加入歐元區後，卻完全受制於歐元區制度。冰島發生信貸危機後，冰島央行即時實施匯價管制，包括以外匯拍賣形式，控制冰島克朗對歐元匯價波動；進行實際資本管制，將近90億美元的資本留在冰島銀行體系；甚至拒絕承擔海外存戶及投資者的損失。反觀希臘在使用歐元的一刻，已失去貨幣主權，自己甚麼大手術也做不了，因為歐洲共同市場的「四個基本自由」(Four Freedoms)包括「資本的自由流動」，一旦實施外匯及資本管制，即等同違反歐盟條約。何況假如希臘真的選擇脫歐，央行要即時重設主權貨幣對歐元及其他國際主要貨幣匯價，即使如何「有序」，亦難逃匯率市場機制的影響，又有哪些投資者會願意信賴這樣的貨幣呢？那些說「效法冰島而不用脫歐」的人，基本上都是政治文宣，不能作準。

為人忽略的是，「冰島奇蹟」並非毫無外力幫助，但效果卻遠比希臘成功，這恐怕也和希臘的歐元區身份有關。冰島危機爆發後，就與IMF達成協議，換取近21億美元貸款，貸款條件包括削減政府營運開支3-5%，削減對老人及宗教團體的資助，增加個人入息稅等。另一方面，冰島央行亦與北歐多國央行達成「貨幣互換協議」，從而穩定冰島的外匯儲備，及協助冰島在國際金融市場集資。反之希臘問題的來源，是當年與高盛以貨幣互換方式隱瞞債務問題，以求達到使用歐元的條件，而使用歐元後，貨幣互換協議已由歐洲央行主導，希臘已沒有其他工具可用。所以縱然希臘不斷接受貸款，嘗試節衣縮食，卻已失去了自己掌控貨幣政策的能力，「奇蹟」自然不會發生。

文化篇

昨天論及「冰島模式」難以複製與希臘，除了歐元區這結構性因素，還有更多國情問題需要理解。

冰島主要撇帳的是銀行債務，屬私人性質，而希臘希望撇帳的卻是公共債務，因為負債的正正是政府，其實希臘民間倒是還有底氣的。根據經濟合作發展組織（OECD）統計，2011年冰島政府的債務，僅為國民生產總值的不足1.1倍，這已是冰島自2008年危機爆發後，數字上最壞的一年；相較下，希臘同期公共債務高達國民生產總值近1.8倍。「冰債」主因是銀行業過度擴張，種種不成熟及高風險的私人借款，令冰島三大私人銀行的槓桿越來越不健康，危機爆發前一年字面上的總「資產」超過國民生產總值8倍；當美國爆發次按危機，私人銀行難在國際市場獲得資金，就出現信貸危險。但希臘危機的成因複雜得多，可追溯至政府長期的財政黑洞，甚至在加入歐元區時已存在。當冰島政府為三大銀行重組，將本地業務轉移到新銀行，並讓舊銀行破產，都沒有影響冰島的整體公共債務，希臘政府就幾乎什麼也做不到。

何況冰島和希臘一北一南，雖然都不屬歐洲核心，但文化差異極大，「民族性」也難相提並論。冰島和其他北歐國家一樣是新教主導社會，較容易得到其他北歐國家支持，例如達成貨幣互換協議；相反希臘和歐洲國家的淵源有限，反而和俄羅斯的歷史聯繫還多一些。加上長久以來，新教國家相對接受財政紀律，遇上危機，也較容易接受非常舉措。學者如Brent F. Nielson等觀察歐債問題與宗教取向的關係時指出，新教國家傾向在債務問題上，以緊縮政策解決問題，令冰島較容易忍辱負重、堅持貨幣主權，走自己的路。

反之希臘雖然是最早加入歐盟的東正教國家，但也和冰島一樣，對歐盟（特別是德國）存有一定抵觸心態；然而另一方面，卻沒有意欲強烈執行堅縮政策，結果沒有冰島的優點，卻充滿冰島的缺點。東正教社會普遍對於歐盟東擴有矛盾心態，一方面擔心歐盟東擴，會令天主教及新教逐步蠶食東正教文化；另一方面卻希望借加入歐盟，換回歐洲身份及經濟利益，卻缺乏自我付出的意識。另據學者Daniel Philpott及Timothy Samuel Shah研究指，希臘這類東正教國家對歐盟的心態，只是搭便車，而不會真正投入。當經濟利益在歐債問題後消失於無形，希臘社會的就越來越討厭歐盟、討厭德國，令公民社會更抗拒執行歐盟及IMF訂下的政策。即使執行「冰島模式」的政策，恐怕希臘也沒有相同成效。

說到底，希臘人口過千萬，冰島全國則不過30萬，只是希臘的零頭，經濟規模不可同日而語。冰島天然資源頗豐富，鋁和魚都頗有經濟潛力，也研發了新能源發電，不像希臘除了旅遊和投機，就乏善足陳。冰島危機頂點時，曾有中國富豪黃怒波打算在冰島購地建「度假村」，被懷疑為有軍事用途，但無論真相如何，幾宗大型國際交易，已足以扭轉小國命運，不如希臘空有優良港口，卻難借用天然資源解決危機。要徹底解決希臘危機，即使是希臘諸神下凡，恐怕也是無能為力。

小詞典：歐洲自由貿易協會 (EFTA)

1960年成立的自由貿易組織，由英國主導，作為當時歐共體的競爭對手，創始成員包括英國、葡萄牙、奧地利、丹麥、挪威、瑞典、瑞士，但成效始終有限，最終諸國紛紛加入歐共體，目前只剩下無足輕重的四國（挪威、瑞士、冰島、列支敦士登）。香港與EFTA簽有自由貿易協定，理論上是鋪墊未來與歐盟的相關談判。

小詞典：黃怒波

中國商人，兼有詩人身份，以向北京大學捐贈10億人民幣馳名。2011年擬在冰島危機期間，以1億美元購買300平方公里冰島土地興建「度假村」，被西方媒體懷疑為中國建立的北極軍事基地。計劃原獲冰島政府支持，但陰謀論曝光後，在西方壓力下，最終冰島政府拒絕投資申請。

沈旭暉 信報財經新聞 2015年9月9-10日

延伸閱讀：中國能拯救希臘嗎？
https://www.facebook.com/…/a.1005777136123…/989982864369197/