［王維基］天貓未到，已經腳仔軟？股價都軟咗好耐

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

TLDR：其實真係辛苦錢，一個月5億GMV，收入仲可能只係得一半—恒地母親節個母女雙飛盤一日已經套17億

1. 你可以睇返通告原文（https://bityl.co/6lDO），其實係有啲嘢的。平時就咁每個月出數，咪出數咯。咁以前都試過偶然最尾講兩句。

2. 但今次唔同，講咗一大堆公司動向，然後先話你知，今次4月嘅數字都受乜乜乜影響嘅。然後最尾先出堆數。

3. 咁，都話，估到應該係難睇啦。

4. 以前都講過好簡單嘅定律，間公司話自己係乜乜20大，咁即係18或者19。否則佢會話自己15大。同樣地，有人出書寫自己係「乜乜乜碩士」，即係佢冇PhD．咁而卡片印FRM嘅人，當然係冇CFA

5. 咁到業績嘅，都講過，當年仲睇銀行股，有年去中銀香港業績（冇錯係花園道，老母中國銀行反而興租酒店），一見份Powerpoint，第一版係講個收入再創新高，咁就知仆街了，即係個純利唔係新高。

6. 講返，4月啲數真係麻麻地。當然正路睇按月比。每日訂單數量都還好，今年新高。平均訂單值（每張單幾銀）就連跌三個月了，雖然公司話預咗。平均每日嘅GMV（自己Google）亦係近半年嘅新低。咁當然成個月嘅GMV按月都大跌，但又因為4月少咗一日，同埋多假期。

7. 無論如何，你睇頭4個月，加埋GMV都只係20億咗右。公司全年目標係66-70億，當初都畀人覺得保守，但分分鐘未必達得到。

8. 早排股價都跌唔少，有話係天貓正式開業，都跌咗好多日了。5月好似日日跌

9. 天貓嘅嘢我就唔識啦，但觀乎大陸公司嚟香港，即使政治氣氛未咁緊張之前，其實幾多都水土不服。問題係天貓都未到，王維基啲數都麻麻地了。

10. 當然另一樣嘢亦因為估值，講到尾都係最緊要，雖然好多時極難量化，大升市時更加有人當唔關事，但不等於不存在。有啲話舊經濟股今年發威，新經濟股風水輪流轉，都只係啱一半。你見Cathie Wood堆嘢散晒，但咩FAAMG好多都在高位，Nasdaq亦差不多係高位。係震走啲「發夢股」啫

11. 咁王維基呢檔嘢，又唔算好發夢，話晒都有錢賺（好唔發萬架啦，好多發夢股連收入都未有！係，收入都未有！）。但始終增長空間唔係好大，香港網購市場有幾大？畀你做晒都還好，但亦多人爭，連啲外賣平台都做埋百貨 （其實在台北都係咁，埃汾都有幫襯，反而香港冇）

12. 即係，真係辛苦錢嚟的。你諗下，而家發到咁大，公司都只係幾億GMV一個月—「等於人地賣一個單位咋」—OK，可能冇咁極端，但就母親節老母送女呢個Henley I，你知唔知一日賣咗幾多？賣咗17億。等於王維基3個幾月嘅GMV。當然行業不同規模不同，但拍埋一齊比真係爭好遠的。

13. 仲有，GMV並唔係等於「收入」，公司收入往往細過GMV一截。舊年公司60億GMV，但收入係30億唔夠的。差額係乜？唔一定係咩「假單」，最常見嘅，買家取消呀，賣家出唔到貨呀，或者之後退貨嘅都係。（亦即係，個母女雙飛盤，一日套嘅錢，等於王維基半年收入）

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝