【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19381-Q19400）

Q19381：

老師你好，想請教你
我一向都有投資股票

175，2013，268等等
亦有大隻股例如9988 2318

當中有幾年前買落的蟹貨例如2018，386，788

現在需要一些現金所以需要賣部份股票套現

如果以資產質素黎計，我打算買走一啲長年蟹貨，但預計現金都係唔夠，所以諗緊究竟係賣一啲嚟緊增長比較慢嘅9988 2318

定係一啲已經升幅頗大有好多利潤在手嘅股票呢，定係一半一半好呢？

龔成老師：

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

上述股質素不差的，第一，你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？

如果你想組合較有增長，就賣出中石化（0386）瑞聲科技（2018），如果你不想承受太多風險就賣部分微盟集團（2013）、金蝶國際（0268）。

------------------------------------------------

Q19382：

龔成老師，我目標是達致財務自由。我有聽過一些人是不斷買入收息股，待四十多歲便可從收息股獲得穩定收入，從而達到財務自由

但老師建議我不能過早買收息股，請問一下原因是甚麼？另外，甚麼時候才應該買入收息股？

因我一直以為買收息股是最能令我財務自由的方法

另外想請問一下，上投資課程時疫情嚴重，會否改為網上授課或延期？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

如果你一開始買收息股，你得到的股息有限，但如果你先增值，再買收息股，得到的股息就會更多。

如果到時疫情嚴重，會延期的，之前都有試過延期，如果你到時擔心疫情，亦可以主動同我地講要轉去下一期課程，我差不多每個月都有開班。

------------------------------------------------

Q19383：

老師！
1787山東黃金？點睇？
如長線，現在低吸可以嗎？

另外，隻9997我有2500股
我$28買，算唔算多？
係咪可以繼續keep?

龔成老師：

山東黃金（1787）主要於中國從事黃金採礦及加工，以及銷售黃金產品。

佢係於中國合共控制及經營十幾座礦山，大部分位於山東省，並於中國擁有多個選礦設施及冶煉及精煉設施；當中，持有一定數量的黃金。

佢雖然有一定的資產價值，個都要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

現價合理的，但就未算特別平，你投資可以，但不是大手時機。

康基醫療（9997）睇翻佢的資料，佢係中國最大的國內微創外科手術器械及配件(MISIA)平台。

根據資料，按銷售收入計，2019年中國MISIA市場規模達到人民幣185億元，集團在國內廠商中排名第 一，在所有廠商（包括國際和國內廠商）中排名第四，所佔市場份額為2.7%。

根據資料，2019年銷量計，集團在中MISIA市場的多個細分領域，包括一次性套 管穿刺器、高分子結紮夾、第三類一次性電凝鉗以及重複性套管穿刺器和鉗中亦排名 第一。

佢不是無質素，不過由上市開始一直都唔平，所以之前貴，現價仍未平。算是合理區中上部。

你買入價貴，不過這股有質素，只要不是持貨%過多，都可以守住先。

------------------------------------------------

Q19384：

龔sir 你好
我想問下你意見 我持倉既分配

小米4000股 均價24.6
澳博控股 5000股 均價9.7
中國生物製藥 4000股 均價7
恒騰網絡 52000股 均價 0.34

這幾隻股票 我都睇長遠價值 唔賣
因為本人仲後生 拼搏 所以無入2800
風險承受強

龔成老師：

上述都是有質素的股票，除了澳博控股（0880）外，幾隻都是潛力股，如果你能承受風險，可以的。

盈富（2800）是平穩增長型的ETF，如果你能承受風險，不投資都得。同時，如你日後想投資ETF，可以考慮恆生科指ETF（3067），相信都是適合你的。

上述都是有潛力的，你可持有，但恒騰網絡（0136）風險度較高，不宜太過大注。

------------------------------------------------

Q19385：

你好，請問我應該放棄3033，買3088嗎？
我係新手，如果本金有3萬，應該買邊一隻？

盈富的話，依家買就不平
請問有咩建議？有邊隻可以長擺？

我只買左一隻3033
我係直接在銀行買3033，一次過買左3600股

投資港鐵好嗎？

我現時25歲，只買左一隻3033，請問我應該點揀好？除左盈富，還有什麼選擇？

我比較怕麻煩

所以只會一次過投資某隻股票，不會月供
當儲蓄左某個數之後，就會一次過買幾股

我係中意買左之後，長擺等收息果隻
吾知道今做係咪岩的

我係新手，所以麻煩你教教我吧

龔成老師：

其實投資3033或3088都無所謂，因為都是追蹤同一指數，不過如果你打算長線投資，其實可考慮轉去3067，因為佢管理費較低，長遠會較有利（幾隻ETF都是追蹤相同的恆生科技指數）。

恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

但要留意，上述的ETF，不是收息類，是潛力類，好少好少股息的，同時價值會有波動風險，你要睇翻風險度是否適合自己。

至於港鐵（0066），有質素的，可以長線投資，現價未貴。收息不差。

我建議你睇《股票勝經》，增加翻一D基本知識先。

------------------------------------------------

Q19386：

成Sir,想請教遠大住工嘅基本面？我$30有貨，之前博佢回A破頂，但失敗無走到

最近2個月又回調得好嚇人，想問你看法，如果上唔返會考慮斬叉燒，因為浪費時間等值。

感謝你的時間。

龔成老師：

遠大住工（2163）主要在中國提供裝配式建築解決方案，包括製造裝配式混凝土構件（ＰＣ構件）與裝配式混凝土生產設備（ＰＣ生產設備），以及裝配式建築項目的施工總承包。

例如佢有裝配式混凝土構件可分為豎向構件、水平構件及其他構件。豎向構件是可按垂直方向裝配成建築物牆體的加固混凝土板。

佢亦包括預製夾心保溫剪力牆板、預製夾心保溫外牆板、預製內牆板、預製隔牆板等。

過往業務都有增長，算是不過不失，不過，業務獨特性不，無太大的優勢。

絕對唔好博回A這類概念，之前中芯（0981）都是咁，股價由$40跌到$20。

現價合理，但投資價值不算高，唔建議持有太多。或者你可等佢上翻D賣出。

------------------------------------------------

Q19387：

龔成老師, 你好, 本人是澳門人37歲, 一家四口(小朋友分別為3歲和3個月),收人: 家庭總收入約HKD35,000.

現持有以下股票及現金23萬。
#1928 金沙2400股
#0016 新鴻基500股
#0066 港鐵500股
#0823 領展 1000股
#1038長江 3500股

支出: 現住澳門居住的300尺房屋供款約HKD4000. 工人開支約HKD5000, 雜費HKD2000

剛在橫琴購買了一個口岸細住宅物業作投資用途, 月供HKD12,000。但預計若出租初期幾年會出現負現金流, 所以暫未有出租打算。

已購入的書學習如下：
<<80後百萬富翁>>、<<股票勝經>>、<<財務自由行>>、<<50優質潛力股>>

心願是不出售現有物業資產的情況下將來在澳門可以購入另一較大的單位給2位小朋友居住。但現在有點迷惘, 請教老師往後的投資策略意見。感激不盡。

龔成老師：

你現時持有的都是有質素的股票，可以持有。你37歲，可投資平穩增長股+潛力股，上述都是平穩增長股類別，但你應該加翻少少潛力股，能提高組合的增長。

你自住物業方面，不要變動。

比較好的做法，是你日後出售橫琴物業助你在澳門買更大的物業，現時自住樓就作收租。

但如果你全部物業都唔想買出，你策略要集中利用股票去進行增值，難度與時間會高左，你要盡量每月投資資金在股票，進行增值。

如果能承受風險，就將部分資金投資安碩恒生科技（3067），可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19388：

老師最近見到好多ARK投資的科技公司，升幅十分之高，這一類科技公司好多近幾年都虧蝕中，但也有大量資金仍然湧入投資這類的股票。

價值投資法點樣應用係呢一類股票？

新科技行業是否唔應該用過去幾年的利潤去估值？

到呢一類新科技公司開始盈利嘅時候再去投資會否失去投資先機？

龔成老師：

近一年新科技類的公司大升，如果有些基金專投資這類股，表現會好好。

不過，現時科技股有少少貴，唔好用這刻的股價，去定義基金或該投資方法就是成功，過2、3年後，股價仍是正面，或是大跌，其實未有答案，所以唔好因為「短期股價」利好就盲目相住。

價值投資法同樣能找到這些公司，不過就會較集中將來分析，其實與平時分析的原理一樣。

不過，由於太多將來因素，所以估值時的準確度會較一般，不能盡信。

投資一些已有盈利的公司，會較穩陣，而投資未有盈利的公司，潛力度較高（當然，風險度較高，因為在你見到有些股價升得好勁，其實，同時有唔少公司股價跌得好勁）。所以這是一個風險與回報的問題。

------------------------------------------------

Q19389：

老師，如果用100萬買入平穩增值股，專注買一隻？組合？

還是選出幾隻心水買入？應如何分段買？每月固定時間買還是每跌一個%就入巿？

另外我想入美團，亞里爸爸！可以嗎？
我手上還有長城汽車$7.5買入，香港電視$7.5買入，建設銀行$6.8買入，滙豐$45買入，中銀香港25.5買入，恒生銀行$145買入，現時應該持有還是take profile?

龔成老師：

是建立「組合」。

在我地整個股票組合中，同一行業不能多過30%，同一股票不能多過15%，我地不是博，而是建立一個平衡風險，同時長期優質的組合，所有都是策略。

至於點買入，最好是分段入，除非你見這刻的股價好平，否則，分注入，同時留有現金，這是最好的策略。

美團（3690）、阿里（9988）都是有質素的潛力股，不過現價唔平，小注好了。

至於你手上的貨，銀行股太多，出現了集中風險，而其他股則無問題。

------------------------------------------------

Q19390：

謝謝老師，因我公司公積金的股票基金及債券基金主要集中投資國家是美國，沒其他可選。老師是否認為美股現在真的偏貴？

因我主要留意老師分析在香港上市的股票，投資美股基金和債券都是因公司公積金沒有其他國家基金選擇，故對美股真不熟但又別無他法一定要選

現在美股由高位下跌未決定如何部署。老師是否認為美股已被推高偏貴？

龔成老師：

美股長遠正面的，現價仍算合理區內，都可以投資，如果你是每月供款，其實會長垃平均左買入價，就不用太擔心平貴問題，同時，唔需要太理會中短期股市波動。

可以投資，長線持有就得。

------------------------------------------------

Q19391：

龔sir,你好，之前是你的學生。
如果想每月有被動收入利息約3萬元，應怎樣選收息股組合？

另外現時買車位又是否適合呢？
謝謝龔sir

龔成老師︰

如果你希望每月有3萬蚊現金流，以股息率5%計，你需要本金720萬。

我地先會用有增長的優質股，去累積至這個本金。之後，到有720萬時，就換碼至以下收息股，並長線持有收息。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

而車位，現時一般租金回報率都唔高，投資值博率只是一般，未必是好時機。當然，如果你財富較多，作為小部分的配置，不是不可。

------------------------------------------------

Q19392：

你好！龔Sir，本人33歲 ，打算開始月供股票。

2800 盈富$2000
14 希慎 $1000
1211 比亞迪 $1000

請問現在供1211比亞迪是否適合？如果遲啲多1K 供VOO 定 3088 會好啲？

另外，持有3手小米$24.33

龔成老師︰

你現時月供組合，有增長力，適合你年紀。但由於比亞迪（1211）偏貴，暫時唔建議你估住，等到$120左右才開始會較好。

此期間，你可以將佢個$1000月供住恒生科技ETF（3067）或Vanguard標普500（VOO）。

而小米（1810）都係有質素的潛力股，可持有。

------------------------------------------------

Q19393：

龔城老師好，本人已默默留意左你個page 好一段時間，很想參加你的股票班奈何全職媽媽太困身，希望等子女再大一點的時候可以有時間上你的股票班。

本人30歲，全職媽媽，由2018年開始月供股票$10000
。 分別為$4000盈富，地鐡、中銀香港及煤氣各$2000。

另外現持有股票為：

6618 100股 @70.58
0016 170股 @116.7
0003 3037股 @13.78
788 90000股 @2.059
1211 1000股 @175.3
2800. 8441股 @24.31
939 60000股 @6.46
388 1000股 @224
66 9118 @49.46
700 2000 @524

想請問老師如何改善現有及將來的資產配置令每月的被動收入有$30000？

另外月供股票以我的年齡是否應更進取？例如將中銀及煤氣換上潛力股？謝謝老師！

龔成老師︰

如要每月有3萬蚊現金流，以股息率5%計，你需要本金720萬。但由於你年輕，只要維持現時月供計劃（每月1萬），以每年回報率10%計，在你55歲前已經可以做到。

現時你持股和月供組合，大致係合適。除了建行（0939），佢只係收息股，增長力唔會太高，建議沽出部份換碼至其他股票。

但月供組合，我建議你換入或新增一隻潛力股，去提升增長力。你可以優先換走港鐵（0066），因為佢已經佔組合比重過高。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

但留意，現時大市只在合理區，資金唔好盡用。最好留有部份，等大跌市出現時，可以用來掃貨。

另外，京東健康（6618）其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，同時暫時計唔平。所以，你現時小注持有係可以，但暫時唔好加注住。

雖然你而家無時間參加我課程，但唔好因為咁而停左學習。你可以買我寫架"80後百萬富翁"、"財務自由行"和"股票勝經"睇住先，這幾本都適合初學者，會對你有益。

------------------------------------------------

Q19394：

阿sir 你好，由0投資知識，到開始睇你嘅書，覺得你唔似係考投資，仲教埋做人道理😂，多謝你。

我之前未睇你書就跟風買入9988 （$288x200 and $278 x 200） 睇完你書後，開始分析間公司

近期不斷有消息和政策影響9988發展，但我對佢基本面和公司仲有信心。我應唔應該等佢跌番落合理價再買入

但中長線你對9988點分析
多謝你

龔成老師︰

阿里巴巴（9988）有質素、阿里的業務層面，擁有相當的優勢，不少業務處於壟斷狀態，同時增長理想。

加上正不斷發展延伸業務，這都會成為企業增長的潛力，預期增長會持續，這是阿里最大的賣點。

最近聽到不少有關反壟斷的消息，集團有機會受到影響。但現階段會影響幾大層面，定係純粹想佢收歛下個別業務，無人知。

佢面對內地監管可能收緊，因此風險度增加左，最大的影響在於螞蟻的貸款業務，這亦是中國叫停上市的其中一個原因。

因為這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

如果我從長遠與整體分析，阿里，長遠仍是有發展，賺錢能力雖然有少少減，但長遠會同政府同議一些監管方法，以及找到合理的賺錢模式，你預阿里$250以下是合理區的頂位，這股可長線。不過，中短期會波動。

如果有貨，可持有，但就唔需要太急加注，如果未有貨，現金足，可以這刻小注，之後跌1成以上再加注。

------------------------------------------------

Q19395：

老師，本人有新秀麗3手11.7，小米3手19.45，金沙1手32，農夫山泉1手37，另每個月供緊3000蚊盈富1000騰信，依家供左3個月

想問下會唔會太多新經濟股？如何分配？想再投資落其他股票應該買邊隻好？太古1972/中煤3/領展823
還是繼續新經濟好？

龔成老師︰

你持股都有質素和增長力，若你是年青至中年的話，這些持股和月供組合，係可以。

現時不少潛力股都略貴，而且你組合本身個波動性都高。若你想加大投資，可先集中在一些平穏增長股，現價都在合理區，可分注。

但由於大市只在合理水平，唔好盡用資金，要留有部份，等大跌市機會。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）

另外，新秀麗（1910）本質唔差的，但較受經濟影響。

這企業對貿易的風險都唔少，這方面會對中短期有較大影響，雖然話長期影響唔算太大，但貿易保護主義，有可能成為較長期的問題。

而且企業近年負債增加得好快，都令佢風險增加左。最近2年業績盈利都出現下跌，反映佢賺錢能力弱左。

但這股長期仍是正面的，質素上因負債減左少少分。此股可持有，但不宜再加注。

------------------------------------------------

Q19396：

龔sir ,除隻1858外，想問問如何優化我啲股票組合，前境如何

持有
中興（763）$23入
中芯（981）$30.5入
澳博（880）$10入
嘉和生物（6998）$27入
上海復旦（1385）$18入
春立醫療（1858）$40入

全部加埋約90萬，而家價值6x萬左右

想換碼，但又驚一換呢啲股升返，所以想問問你點睇呢幾間公司

龔成老師︰

我地投資唔好"估"，而係要用質素去衡量，是否值得長線持有一間企業。

中興（0763）、中芯（0981）、澳博（880）、嘉和生物（6998）波動會較大，整體質素唔係話無，但唔係較高類別。你可以持有，但不宜太多。

上海復旦（1385）主要提供集成電路（ＩＣ）產品測試服務、並從事設計、開發及銷售專門ＩＣ測試軟件等產品。

見佢賺錢能力一直在減弱，2019年更出現虧損，投資價值一般，建議慢慢換碼至其他優質股。

未來，你可以將沽貨出來資金，投入以下優質股。只要你未近退休之年，這些股票都係合適的。而且現價合理，已可分注去入貨。

平穏增長股︰盈富（2800）、銀娛（0027）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

------------------------------------------------

Q19397：

老師，我見3918上半年嘅財務報表，佢嘅流動資產少於流動負債都有過2億，現金存款少於應收款項

相信係肺炎影響左佢嘅現金流，係呢個情況下，佢嘅風險高左好多，如果情況持續

係咪有機會動用非流動資產黎應對負債呢？咁對企業係咪有好大嘅負面影響呢？投資價值仍在嗎？

龔成老師︰

金界控股（3918）有質素的，佢是柬埔寨最大的酒店、博彩及娛樂運營商。

賭業本身是高毛利行業，而金界壟斷了金邊的業務，加上業務平穩，財務穩健，企業有一定的質素。

由於全球疫情關係，收入難免會受影響。但睇翻佢2020年中期收入，又唔係真係跌得好誇張。

至於流動負債高於流動資產2億，唔算好多。短期可以透過貨款處理，唔一定要賤賣資產。預期疫情只會影響中短期，唔會一直出現咁架情況。

但要留意，金界始終係在較新興市場，增長及潛力都大，但當中的風險同樣略高，因為業務難免存有不確定性，這點你要明白。投資此股係可以，現價算係合理區中上部，可分注入貨，但在注碼上不能去得太盡。

------------------------------------------------

Q19398：

你好，龔成老師！本人26歲，現持有

0285比亞迪電子 500股
1972 太古地產 200股
0778 置富產業信託 1000股
0435 陽光房地產基金 2000股
0066 港鐵公司 500股

月入1.5萬，諗住長期持有，想在35歲前有一百萬，這個組合ok嘛？謝謝你！

龔成老師︰

首先，在選股上有2個較大問題。

第一，你非常集中係地產股，除了比亞迪電子（0285）外，其餘都算是。個別行業，最好控制係組合3成內，否則會有過度集中問題。

第二，以你年紀，應以增長為主。置富（0778）和陽光（0435）只係收息股，增長力一般般，唔建議用佢地做組合。

以你現時組合市值6萬計，要10年後有100萬。以平均年回報10%計算，你要每月再用多$5000做月供，才可以做到這目標。

策略上，你每月先用$2500去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或潛力股︰比亞迪（1211），中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

若你每月供款金額唔多（例如只能每月供$2500），可集中晒係盈富先。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q19399：

你好龔老師，本人26歲，現持有以下股票

00005 800股@47
01359 16,000股@2.77
03988 10,000股@3.86
00288 2,000股@6.62
00788 10,000股@1.44

00823 200股@61.6
01177 3,000股@9.00
01810 200股@19.88
01833 100股@114.8
01877 200股@45.8
01928 400股@29.8

02018 500股@44.8
02126 500股@23.8
06869 500股@11.38
06988 1,000股@2.88
09988 100股@279
09997 1,000股@15.88

請問以上股票如何，非常感謝老師的指導

龔成老師︰

現時係你財富增值的黃金時期，應集中"增值"部份。

匯控（0005）、中行（3988）是收息股，無乜增長力，不宜持有太多。

中國信達（1359）質素較中等，唔好再加注。

平安好醫生（1833）、君實生物（1877）、藥明巨諾（2126）、樂享互動（6988）、康基醫療（9997）都有質素和潛力，但始終不確性較高，不宜大注。

現時，你組合中股票太多，你會好難管理，建議控制在10隻以內。而且很多都係波動性高股票，未來應加入一些"平穏增長股"，咁個組合會較健康。

平穏增長股︰盈富（2800）、銀娛（0027）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）。

------------------------------------------------

Q19400：

龔sir你好，我係一名投資新手，最近透過關注你嘅fb page同閱讀你嘅書籍，獲益良多，十分感謝。以下想請教少少問題：

我宜家yr1，每月大概可儲$5500，想下個月開始月供股票$2500，儲$3000現金

月供股票組合為:
2800 $1500
0823 $500
2382 $500
1177 $500

請問以上計劃合理嗎？

以及本人之前有幾萬元現金儲蓄，但早前以$1.31購入10000股中國鐵塔，請問宜家應該守住先嗎？

會唔會損失把這筆錢投資其他優質股嘅潛在利潤？
十分感謝！

龔成老師︰

你是年輕人，這個時間要努力學習投資理財知識之餘，同時間也要盡力去做財富增值。

你組合選股係可以，但由於你金額唔多，供得太散會令月供成本過高。建議你$1500盈富（2800） + $1000（中生或者舜宇光學）。

每月儲到$3000和餘下資金，就等大市有明顯回調，才慢慢用佢來入貨。

中國鐵塔（0788）有質素的，這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。

行業上，佢係有壟斷優勢，而且中國5G和未來發展成數字大國架策略，都會對佢有利。

此股係有發展，不過有少少減弱，你買入價合理，中短期波動唔好太在意，長線持有就得。但由於佢已佔你唔少比重，就算再跌，都唔好再加注住，否則會有過度集中風險。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18701-18720）

Q18701：

龔sir之前上最後一堂，你講自己故事，好貼地又勵志 好想比大擁抱你！

真係好鍾意聽你講課，大家加油向目標邁進。感謝您每堂超時用心講課

龔成老師：

我希望用自己的故事，去話比同學聽「我同大家都是一同努力，我相信自己做到，大家都要相信自己」。

大家加油！我相信每個人都有自己的夢想與目標，為自己努力就得！

記得要多溫書、睇年報、用課堂比的「企業評估表」。

------------------------------------------------

Q18702：

老師你好我們選股時是否用以下的標準決定
1.Roe
2.Roa
3.槓桿比率
4.市盈率
看報表時是否只閱讀現金流,財務報表,資產負債表?

龔成老師：

上述的4個指標，都是分析企業時的指標，當然，只是其中，不是唯一。

財務比率有好多的，例如我在進階班，會教同學分析24大財務比率，因為一個公司有好多野要睇的。

另外，損益表、資產負債表、現金流量表，是投資者經常會睇的，這屬於年報下半部，同時，我地要睇年報上半部，即是主席與管理層的講話，業務展望等，都要配合分析，先有作用。

總之你記住，買股票如同買入一間企業，你要盡能力去了解這企業。

------------------------------------------------

Q18703：

Sir，早晨吖，近排諗左好耐，都係決定問下你

我24歲，澳門人，最近我家人想我買樓，佢地比首期我供，但其實我一個月得一萬四，月供一萬，淨低嘅都要用

基本冇可能草到錢，甘就投資唔到股票，而且澳門嘅樓感覺唔會再升，大家都過珠海橫琴買樓，所以而加甘高價買左樓

你覺得我應該買嗎？
thx sir

龔成老師：

你暫時唔好買住，因為你的供款能力不強，加上應該無急切的需要，同時，澳門樓在中短期相信不會上升。

始終澳門經濟轉弱，但這只是中短期。長期來說，澳門樓市仍是向上的，不過，不是大升，是平穩。

所以，你這刻唔需要心急買樓。

反而你這刻應該多儲錢，同時想方法提高你的收入，過兩年後，等你有更大的準備，再決定是否買樓。

------------------------------------------------

Q18704：

成哥早晨，話說我2019年年尾
好有心機咁揀了幾十隻收息股
劃咗個表,寫低哂派息,回報率嗰啲
隻隻都覺得好抵買
不過期間發生咗啲事

就係大手Short put 5 號仔遠價期權
以為肯定唔洗接貨
輸咗唔少錢

當時無聽你講 ,因為真係好遠價
為咗 $1000 唔見咗 $20000 😫
好後悔

最近終於有番錢
諗住跟你嗰套做法
但係再睇番之前啲心水股
發現好多隻都跌咗幾成

真係好可怕
只有 2638無事
我睇嚟緊等到出年先敢開始入貨
以下股票, 我唔知仲入唔入好, 就係由上年睇到依家 ,有以下:

1,2,5,12,14,939,941,1044,823,1113,2800,435,778,66,709,1382,52,836,2638,1038,2388,1928,3918,6823,737,3,83,659,1288,3328,3988

請問龔 sir 有無咩意見可以俾我?
喺入場費方面隻隻都跌咗咁多 ,感覺上好抵買
要時刻留意住企業有無變化真係唔容易
請求你俾啲意見, 謝謝

龔成老師：

你有四個問題。

第一，太過亂，我地投資前一定要好小心，要經過仔細分析，你要慢慢重組上述的股票組合，留翻較有質素的股票長遠。

盈富（2800）、房託，地產，賭業，是較有得守的。

第二，Short put 期權一向是「回報有限，風險無限」的工具，同時，你「預期」股價，這好錯的投資概念，巴菲特都強調無人能預期股價走勢。

第三，我地投資，一定要有策略，不能一次過或集中一段時間去入，正是這原因，你見我通常會建議人月供股票，目的就是將買入價分散。

第四，你覺得「入場費」低就易買，這是好錯的概念，股價大小，入場費多少，跌多少，與我地是否投資說股，完全無關係的。

現時，你只要慢慢重組組合，現金唔好太急用，要分注投資，慢慢去運用。集中持有有質素的股，小心選股，計好估值先入市。

------------------------------------------------

Q18705：

老師，想問下我現時大約有20-30萬流動資金，想投資3-5隻股票，以穩陣收息為主，請問有什麼建議？

龔成老師：

投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜，因此買入時宜分注，同時不能用盡現金。

------------------------------------------------

Q18706：

請教龔sir，我自己為盈富做估值，大約22蚊開始進入平宜區，唔知同阿sir你估值是否接近？

另外，長建早前賣了間風力發電公司，在歐洲擁有的公用事業又即將要和當地政府商討准許回報，似乎賺錢能力會有所下降，我自己估值，長建去到40蚊以下已經好平，即使質素有所下降仍有值博率投資？

龔成老師：

盈富（2800）差不多是這裡，最近加入了新的成份股，而這些成份股都唔平，因此，令整個指數貴左。相信$22、$23。是初步平的位。

長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

如果$40以下，大約是合理區中下，其實都已經有投資價值。長遠仍是可考慮的。

------------------------------------------------

Q18707：

龔sir想問一下關於你對"中國"字頭股票既睇法

我見大部份"中國"字頭國企，特點係吾驚會執亦有錢賺，但又吾會比佢有大既盈利增長

投資的話是否"吾應該"選擇呢類型既股票。我見都係有波幅無升幅。

我想法係股價既上升，係因為有前景，而前景係有盈利增長既支持。如果每一年都係賺固定數目或者多少少，咁其實股價係吾係只會得波幅？

相反如果揀中國股票係吾係應該揀私人公司更佳？

謝謝

期待下個月上你堂！

龔成老師：

其實要睇翻企業業務特點，以中移動（0941）來說，就是你上述所講的公司，因為中央行「提速降費」，即是想電訊公司的速度提高，但月費減少。即是政府唔想電訊公司賺得太多，不過，政府又唔會要你死，所以，只能夠賺到一個合理而不過多的利潤。

在中國，唔少行業都有這情況。

不過，並不是所有，有些企業佢自己發展較強，又或政府較支持行業，其實對佢是有利的，例如比亞迪（1211）、中生（1177）。

所以，你要識得睇大方向，以及從個別企業來分析。

股票班見！

------------------------------------------------

Q18708：

老師你好！有一事不明想再請教：承蒙指導，不該經常看手持股票的價位，但如果想在跌市中增持手上股票，或增持未有股票，該如何操作？還望老師指點

龔成老師：

我地不會經常睇股價，但並不是完全不睇的，但不用每日睇，同時，價值投資者不關心短期股價，但會關心企業，關於大環境的變化。

因此，當我地不斷關心企業，關於大環境的變化時，其實已經能捕捉到一些關鍵的買賣時機。

總之，心態上不是「心理上」不斷想睇股價，而是策略上要知道大環境、企業發生咩事。

------------------------------------------------

Q18709：

龔sir 如果我宜家重新佈局噶話 以我的月薪和年紀 你會有咩建議？我26歲 女仔 月薪22k 每月可存儲15k 無買任何保險

龔成老師：

適當的保險與應急錢，在理財中都有作用的。我地理財要平衡，要攻守兼備。當然，守不用太多，餘下資金要把握進攻。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你26歲，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$8000
。

你可以考慮盈富（2800）$4000。

另外再加2隻（每隻$2000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

如果你不懂股，就集中供盈富$8000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18710：

龔成老師，想問點解你唔推薦人買美股，美股都有好多人吹捧回報率高，比投資港股好好多，係未因為我地熟悉港股，就要投資港股呢？

龔成老師：

無論港股、美股，只要是優質股，就可以投資。

所以，其實都是可以投資的，只是我較專注研究港股，因此無特別講美股。

我地投資，最重要是「優質度」、「熟識程度」，兩地都有優質股，但我對美股熟識程度未算好強，因此，唔想亂推介美股。

------------------------------------------------

Q18711：

老師 有個慨念我唔係好明
假設我月股比亞迪
每月供1000
大慨供左3年

3年後我應該點樣計算 3年後的股價值多少？
我係將每月供的股價加哂再搵出個平均股價？

現在比亞迪股份還值得月供嗎？會否太貴？我會想月供1500

龔成老師：

你只要將你投入資金「總金額」，除以以到時持有多少股，就能得出平均價，比較最新價位後，就能知回報。

坦白講，比亞迪（1211）$100以上，已經唔太值得月供，處貴水平，雖然有可能因企業價值向上，而慢慢由貴變合理，但始終投資值博率唔算高。

你可以等回少少先開始，又或考慮其他去月供。

------------------------------------------------

Q18712：

龔sir~我想問下～我差銀行5萬蚊到～我現家既現金夠清左呢條數，我應該還左錢先定係羅筆錢去投資？

因為如果唔還～就要拖多2年黎還

龔成老師：

除非你的欠債利息好平，否則，我會建議你還左佢。

始終數目不多，你清還，再努力儲蓄投資，建立財富，會較好。

------------------------------------------------

Q18713：

龔成老師，你好，想請教有關股票問題，現持有以下股票，請問應繼續持有/ 止蝕/ 減持一半轉馬/ 溝貨，謝謝分析指點。

1. 788@30000股 $1.56
2. 939@14000股 $6.02
3. 386@6000股 $3.52
4. 2777@3000股 $13.00
5. 2628 @2000股 $19.90
6. 981 @1000股 $32

龔成老師：

持股並不是無質素，但增長力唔算強，同時部分買入價未算好。

內銀股唔好加注，同時明白佢增長力不強。如果想組合增長力提高，可以見有較多反彈後轉其他。

中芯國際（0981）、富力地產（2777）、中國人壽（2628）都唔好加注。不過就可以守。要跌較多先考慮加注。

至於中國鐵塔（0788）可考慮加注不，不過，你要計翻這股佔你組合的比例，唔好太多。

------------------------------------------------

Q18714：

龔sir， 我睇左你個本50優質潛力股的書， 現時賭股下跌一定水平， 如果以家入手金沙中國（1928）作長遠是否仍合理？

同埋你提及 的 福壽園 （1448）是否可投資的水平線，因為我見到市盈率到26， 處於市盈率很高既位置⋯謝謝

龔成老師：

金沙（1928）現時處合理區，可以投資，賭業中短期不利，但長遠無問題，這提供了一個不錯的投資機會比長線投資者。

至於褔壽園（1448）$7以下合理，你現價如投資，小注都可，之後再跌先正式入貨。

------------------------------------------------

Q18715：

你好 我係一個對投資無概念嘅人 但近來發現淨係靠份糧好難有出頭天 見好多朋友都follow你 想聽取一下你嘅寶貴意見

我今年29歲 無父幹 月入$22,000 每月開支約$10,000 當中包括$3,000儲蓄保險 現有現金流約10萬 完
請問我可以做啲咩令財富增值。感謝

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

現時的$10萬，你唔需要心急動用，可以等你多D投資概念先，暫時，你可以做「月供股票」。或者自行分注投資。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18716：

老師，想請教下，巴菲特建議將雞蛋放在同一籃子裡並好好看護，如果成實外教育（1565）在只持有10-15%

而其他股票佔比亦是如此，持倉就有6-10股票，會否太分散影響回報？長遠來說，小弟計劃倉內只持有2-3隻股票，每隻都仔細研究

龔成老師：

巴菲特因為唔想散升「為分散而分散」，因此會建議人，集中投資較優質的股票，同錯好小心看管。

另外，佢自己集中投資，是因為佢有一定的投資技巧，如果一般散戶未有投資技巧，我會建議適當的分散始終較好，但絕不是亂買股，而是都是優質股，但同時適當分散。

如果一個$100萬以內的組合，我會建議5-10隻股票。

2、3隻就太集中，如果其中一隻出事，你的組合會面對較大風險。

成實外教育（1565）這股都不差的，不過會受政策影響，令業務較波動，同時令股價波動。其實你持有10-15%，已經是一個適合的比例。

------------------------------------------------

Q18717：

龔成老師你好，我係投資新手，大約半年前開始睇你PAGE獲益良多，之前睇左你嘅分析入左四萬股工商銀行1398,溝左貨後價都仲係5蚊

見而加個價去到四蚊，而我仲有現金係手，應吾應該再溝一啲貨，感謝！（而加除左內銀，仲手持一啲科技同濠賭股，但內銀仍佔我股票組合大比數）

龔成老師：

工行（1398）並不是無質素，但我唔建議你再加注。

工行有一定的規模，在全球都有網絡，本身不會無質素的。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

同時，佢前景算是不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。

而長遠，會慢慢穩定的，不過，增長力不強。

因此，你可以持有這股作收息，但就唔建議不斷加注。

另外，同一隻股佔你組合的%，都不能過多的，我地加注及持有與否，不是睇「拉低平均價」，而是睇質素，睇這股適合你與否，睇這股佔你組合比例多少。

------------------------------------------------

Q18718：

之前有朋友推薦您，我網上睇左您一D Q&A後，覺得很實用

我買左《50隻優質潛力股》，您的分析很詳細而且很貼地，所以再有繼續購買您的著作《股票勝經》《5年買樓4步曲》，同時很想報名您的課堂，可惜疫情關係未能到香港，感謝您的分享

另外想請教一下，您認為香港的股票市場會否因最近的政治問題造成長遠的影響？

如會否因香港的邊緣政治而減少吸引力，導致股市交投下降，「0388港交所」等相關的股票潛力相應降低？

龔成老師：

香港股市的確會因政治而受影響，無論是本地的，還是中美間，都會有影響，不過，政治市件通常只是中短期，你睇翻過往幾十年的情況就明。

有時會令股市大跌，但之後總會慢慢向上翻。

至於港交所（0388）反而因為之前的中美角力，不少在美國上市的中資公司，出現擔心，於是不斷來港上市，反而對港交所有利，當然，這因素已在股價反映。

因此，唔需要太擔心政治因素，往往只是一些中短期的影響。

------------------------------------------------

Q18719：

龔sir, 現年 23歲, 月入15.5k, 一個月儲蓄幾千，現時戶口大約28-29萬，包括3手0005, (29.3買入），如想在最短時間內擁有100萬應該點manage/ 投資？

另外今日00005升到過31， 幾錢應該離場或轉投其他股票？ Thank you!

龔成老師：

財不入急門，合理增值是最重要的，追求過高回報好多時都會面對太大風險。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

至於匯豐（0005）未必是最適合你的投資，你可以考慮賣出匯豐部分或全部。當然，如果你目標是收息的，持有不是不可。

------------------------------------------------

Q18720：

老師你好，我嘅股票組合如下，

694北京機場，買入價5.2，持有4手。
763中興，買入價21.6，持有3手。
883中海油，買入價8.2，持有2手。
981中芯，買入價19.2，持有2手。

1038長建，買入價42，持有2手。
1833平安好醫生，買入價120.4，持有1手。
1928金沙，買入價32.75，持有1手。
2018瑞聲，買入價50.8，持有2手。

想請問一下，現時股市走勢依堆股票適唔適合進行溝貨？大概咩位置先係便宜位？定係再投資其他股票較好(例如鐵塔、京信通信)？謝謝。

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

上述股票，大部分都唔建議加注，你原有貨可以持有。

金沙（1928）如再跌，可加。瑞聲（2018）都是。

至於中國鐵塔（0788），你可以考慮，佢本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

考慮到佢的質素、發展能力，這股算是合理價。

由於這股有發展力，可長線。

但如這刻買入，分注入可以的。

不過你要注意，現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（龔成）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。