【龔成問答信箱】（Q16701-Q16720）

Q16701：

老師，點樣先能夠控制自己嘅心理， 每次買股票跌少少就會好驚但係升少少就會好想快啲放咗佢賺錢 往往都會買幾次蝕咗中間嘅差價

有時一隻股大升，但我只是升少少就賣，我能夠捕捉住但係每次都會好早就放咗

我嘗試唔開手機睇下股價但係都做唔到，心裏面都係好想捕捉住每一分每一秒

龔成老師：

第一，你太貼近股市，成日睇股價，你可以做一個訓練，就是一做星期都唔好睇股價，這訓練好重要，是學習的過程，如果做唔到，你之後就無法控制到你的心理。

第二，你要明白買股票就是買企業，買入一盤生意，你想象一下，你朋友叫投資做生意，你會唔會投資後，因為一些短期因素就立刻想賣出？會唔會你可以賺5%就立刻賣出？當然唔會。

你一定要明白，買股票就是買企業，你唔好理一些外在、短期因素，要集中在長期的企業發展。

我20年前，都是短炒者，後來做銀行同證券行，見到了一個秘密，就是客戶的成績，見到短炒都正是輸得最多的一群！長線投資者就是賺最多的！

所以，如果你想日後賺到大錢，而唔係升少少就賣，就要學到這種心理控制。

------------------------------------------------

Q16702：

龔sir，係呢度好想多謝你。其實我實踐你教我既模式十個月左右，過程中都有睇住其他人好似不斷賺錢，不斷同你講短炒仲易有斬獲，個刻個心都有啲唔太好過。

但我記得你講過，心理質素都係好重要既一環，所以我都有無理個啲人既講法，一路去實踐你教既方法，去月供同等待。

而係3月尾既時候買入左1211，迎來左第一隻倍升股，好多謝你教識我價值投資既方法，亦都好多謝你培養左我既心理質素，我會更加努力，將你既理念去實踐

亦都同身邊既人分享呢個思維同方法，多謝你! 祝呀sir繼續開班收爆學生!

龔成老師：

太好了！

相信你已掌握了正確的投資方法，之後只要保持進行得。

短炒表現上會好易賺錢，$9買$10放，等跌到$9再買，升再放，但事實卻是，散戶$10賣出後升到$100。

我過往做了10年銀行同證券行，佢地的買賣成績我已見得太多，所以我好明散戶想D乜，同埋佢地套方法的問題。

要長線投資，賺到倍計或數倍計的回報，要好有耐性，這是香港人最缺少的野，而投資市場，賺大錢的機會只是少數，正正是留給有耐性的人。

------------------------------------------------

Q16703：

老師，我有得兩手981，一買就跌，其實我每次入親咩股都好.都係跌

龔成老師：

中芯（0981）的業務潛力是有的，但近期太熱，就算現價仍貴，這刻唔好再入，原有的貨就只有暫時守住先。

這是因為你投資「市場已好多人講的」，而不是自己發掘的。

------------------------------------------------

Q16704：

Hi，我最近一個月先玩股票，乜經驗都冇，三月尾低價$38.5買左5號仔10000股。

一星期$40.6放左，原本咁易就賺到$20000。你覺得我這短炒態度正確嗎？還是要學分散投資呢？

龔成老師：

你的態度錯誤。

凡表面好易賺的，其實都是有問題的，短炒表面上好易賺到錢，但我過往曾做了10年銀行與證券行，輸得最多錢的一群，就是短炒者，佢地的結果是「贏粒糖，輸間廠」。

你要建立一個平衡的組合，不能只集中一股，同時要分析企業質素，長線投資。匯豐（0005）不是零質素，但增長力已比過往減，因此佔組合的比例都不會過多。

------------------------------------------------

Q16705：

hello 龔成老師
我係一個廿四歲既打工仔, 月入差不多2萬幾, 如果出bonus, 平均月入會有3萬.

最近因為屋企問題,一直都有打算搬出去1個人住, 但始終租屋費令我卻步..

自己一直衡量唔到 要令租屋錢,去投資股票(而家大概有5000股2800盈富),定係要令自己生活開心而搬出去
所以想問下你有冇咩建議比到我呢個生活矛盾既打工仔

龔成老師：

從理財角度，當然是保留資金，因為你搬出去，會有好多相關開支，而你這刻是儲錢的黃金期，你應該用「先投資，後享受」的方法。

就算你遲少少先搬，我相信對你整個人生影響唔會好大，但如果錯過了滾存財富最黃金的時期，之後的財務情況影響就會較大。

但你都可以用另一個方法：「目標」。

即是你為自己設定一個目標，完成後就可以搬出去，例如儲到$100萬。除了可以做到「先投資，後享受」外，同時可以加大你完成目標的決心。

我相信這是較為平衡的做法。

------------------------------------------------

Q16706：

老師你好，本人28，每月預左一萬多少少建倉。暫時目標有HK778做防守同Tesla, 比例會係8:2。

請問方向正唔正確呢？會唔會有更好選擇？同埋想搵多一至兩隻分散風險。

龔成老師：

你應該建立一個更平衡的組合，單一股票佔你組合15%以上，已經是開始有點多，你要注意翻。

你可以加入盈富（2800）及其他優質股，而上述兩股都有質素，可以投資，只是比例的問題。

------------------------------------------------

Q16707：

老師你好 想投稿問答信箱
年齡：28
薪金：$17600
一年跳一次point
跳一次大約加$900 另外再有薪資調整
現租住公屋

資產：
(1)2800@1500股
(2)0006@500股
(3)現金$4000

負債/支出：
五月頭借銀行$30000 買以上股票
分九期 每期$3480 總共還$31320
政府學費 $2000/月 還到2024年
家月$5000/月

飲食車費娛樂上網電話費：$4000/月
如撇除銀行負債，
人工扣除支出每月大約可存$5700

我希望將來能夠達成財務自由
但路上暫時有以下既問題：

(1)現在我股票組合請問老師有乜睇法？

我應該賣出0006 再買入更多2800/其他股票？

(2)現時租住公屋 如果一人家庭
資產上限是$1,280,000

老師我未來應該存到首期資金就馬上去抽居屋？還是繼續增長資產到公屋上限才作打算？

龔成老師：

1）股票組合無問題，但問銀行借貸投資，第一，要有一定的投資實力才可進行，第二，只會在好平的位才會進行，同時要明白當中的風險，因此，這部分未必是理想的動作。

電能（0006）都是有質素的，但以你的年齡來說，增長力就不足。你轉盈富（2800）可以。

但要留意，你應該買入股票長線持有，唔應該經常轉來轉去。

2）如果長遠你都想買居屋的話，其實當你有足夠的資金，已可以進行這一步。

------------------------------------------------

Q16708：

老師你好。油價低落，但疫情好像緩和了、油價也看似跌定了。請問386中石化前景如何？本人買入價為$3.68。
謝謝

龔成老師：

中石化（0386）本質不算差，質素有的，但又不是最高之列。

如果從過往多年的業務表現分析，佢質素算是不差，但又未到好好，始終這只是商品企業，沒有一些太大的優勢。生意近5年只是上上落落，無乜增長力，這是受油價等因素影響，反映佢處於一個被動的狀態。

所以，然股價回左，但只是合理水平，不過作為收息股投資，都可以，但就唔好對股價有太大期望，但由於優質度不算好強，因此不會太大注。

------------------------------------------------

Q16709：

請問投資車位，可分享你的睇法嗎？

龔成老師：

過往年代，車位一般都去到8%的租金回報，但近年市場資金不斷追資產，連車位都不平，坦白講，以上述的租金回報率，約3%，車位的吸引力只屬一般，吸引力不足。

其實，現時的車位市場大致都有這情況。

車位的按息會略比供樓高，所以投資價值未到吸引水平。

在現時車位不算平（甚至有少少貴）的情況下，未必值得，除非你找到租金回報率更吸引的車位。

------------------------------------------------

Q16710：

龔成老師，本人36歲，之前沒有投資股票習慣，也沒有物業，手上現金100萬。

看了你的專頁後，了解到投資的重要，开始了股票投資，希望用按我年纪想做一個穩定+進取的股票组合，下面是現在手上持有股票，請問有什麼改進的地方?感謝

持有股票:
0005 x2000股
0012 x1000股
1038 x1500股
1928 x3200股

2778 x1000股
2800 x1000股
6808 x8000股
9988 x300股

龔成老師：

你的投資概念正確，我地要持有優質股長線投資。你之後只要繼續從這方向行就得。不過，當中可以有一些優化。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

所以，匯豐（0005）未必最適合你，或你只需小注已可。

另外，你可以增加盈富（2800），以平衡組合。

至於其他，則無問題。

至於你手上的現金，比例有點多，如果無特別用途，可以進一步投資。現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16711：

你好，老師
我買了3878，平均價$2.83買入，請問我是否要賣晒？

龔成老師：

唔知點解，近期收到有唔少人買入左VICON HOLDINGS（3878），但這股並唔合符優質股的原則。

企業規模細，無獨特性，現金流負數，基本上無乜投資價值，賣出是較好的做法。

------------------------------------------------

Q16712：

老師，想請問6862海底撈現價是否比較貴，大約要幾多先開始平？

龔成老師：

海底撈（6868）有一定的質素，無論是品牌、規模、財務數據上，都處於理想水平。同時憑大環境及本身的優勢，往後的發展前景正面，這企業有長線投資的價值。

不過，這企業上市年期不算長，令企業的真實業務情況及價值，仍要時間評估，這成為風險。

另外，這企業其中一項優勢就是品牌，但若然這企業的食物出現問題，就會對品牌有很大的打擊，對這企業的股價及長遠發展都會有影響。

整體來說，這企業仍是有質素的，但這股現時市盈率達到70倍，就算業務增長快，令之後的市盈市會減少，仍是處於貴的水平，這刻的投資值博率並不高，如果股價回落較多，如2、3成，令市盈率略減，投資價值會增加。

------------------------------------------------

Q16713：

老師，我想問下關於你既意見。

我一直都相信價值投資，當一隻優質股被低估時/用合理價買入並長期持有。

但眼見身邊好多朋友都學技術分析(K線圖, 穿邊條邊條線就買入咁），想問下你的投資經驗

1）對於優質股並按技術分析作為買入/賣出有咩睇法? 是否值得學習?

2）又或者價值和技術分析可以混在一起用?

這問題我愈上網睇就愈矛盾 似乎每個人見解都不一樣 所以想問下你對這方面有什麼睇法，十分感謝！

龔成老師：

1）我20年前，都是一位技術分析投資者，因為技術分析的原理是統計學，而我數學會考欏A的，所以較強。可惜，我用左幾年，都是輸多贏少。

之後我做銀行同證券行，見好多客用技術分析，大部分輸錢，反而長線投資優質股的，就贏錢。

因此，我已無用技術分析十幾年，而這十幾年我都是贏多輸少。

2）唔少人都會混合一齊用，我都試過，但我之後完全唔用技術分析，反而贏錢最多。

所以，我已經完全唔用技術分析十幾年。

你只要留意下，最球最賺錢的人、基金經理，佢地用咩方法分析就得。

------------------------------------------------

Q16714：

你好，好想聽取你的意見。本人在公營機構工作，即鐵飯碗，每月人工80K，現有積蓄170萬港元。無投資。丈夫從事金融業，收入100K

現供一層樓，每月他供約24K，尚餘530萬未供，積蓄約80萬。有一小朋友，教育開支每月約15K。

我實在很討厭我份工，我目標是唔駛做，你可以教教我嗎？

我不想做到退休。我應如何利用手頭上的積蓄呢？原本打算買多層樓，可能換大少少加投資成分，現住的就放租。但現在樓價太不合理，計劃暫時擱置了。希望能得到你指點迷津

我是投資白痴，連買騰訊都是蝕住放的

龔成老師：

我可以先將資金投資在股票，之後保持儲蓄及投資，令財富滾大，如果日後樓市出現回落，就投資樓市，但這點不用強求。

你可以運用「先增值，後現金流」作方法，初期應投資較多增值類資產，之後，則應投資較多保守類項目。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到累積了相當財富後，才漸漸轉成收息型股票。目的令到你財務自由，不用再工作。

你投資失利，只是由於你無投資知識，不明白長線投資。

你在好消息（貴）時買入，在壞消息時（平）時賣出，產生損失，這反映你不懂計算企業價值。

你可以將你手上的資金，分注投資以下股票，暫時動用3資金先，分注慢慢入。

盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

以你的情況，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16715：

老師你好 我有買你的書 獲益良多 本人33歲 全副身家現金有90萬 暫時失業 過多幾個月才有工開 有工開的時候月入30000至40000左右 冇樓供 冇負擔

1) 想問一下17號新世界發展長遠是好嗎？我有一部分的錢都在平均9元左右買入 因為最近新聞講話會合股 四合一 我怕到時又要供股 又會影響我手頭上原有的股票價格 皆因都有好多手係手上

我應該把所有手頭上的17号全放？還是應該不用理會？我應該怎樣做？

2)渣打同AiA係同業其他公司比較算唔算穩定？可否長揸？

3)想問其實手頭有一舊現金 這舊現金可否一手一手咁買入股票 因為唔想月供 因為覺得月供好像太慢 雖然風險比一手一手買入低好多 你有何建議？

龔成老師：

1）新世界（0017）有質素的，這股可以持有，但就不是高增長型，是平穩增長類別。

佢進行4合，不會對企業價值有實質影響，只是一些虛數的問題，至於會否供股，則是另一問題，但以佢現時的資金情況，暫時睇就無特別需要要供股。

2）友邦保險（1299）有質素，可投活。至於渣打（2888）質素一般。

3）你可以一手手模式投資，但最好分注，即是唔好太集中在一個價去買入，而是分多次進行。

如果你資金無特別需要，可以在3-6個月內，利用$30萬，分注投資優質股。你可以考慮盈富。

另外再加其他股：金沙（1928）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16716：

你好！龔老師。
近日在fb 認識到你，想指教一下：

本人約40歲，女兒出世時幫佢買了份基金保險月供約$2000，供了差不多十年，現在還蝕緊約$20000，想取出轉月供股票！有什麼意見？

另外本人持有以下股票：

388 /200股 $243（買入價）
1428 /10000 $2.4
788 /10000 $1.69
9988 /200 $202
2318 /1000 $84.5
1038 /1500 $46.5
728 /1000 $2.38

大部分現金都放在股票了，怎樣部署會較有增長潛力？
期待你的回覆！感謝

龔成老師：

首先，你要了解翻該基金保險的投資策略，所持有的項目，如果本質有問題，就要賣出，如果本質仍可以的話，就可以守住先。

如果基金取出來，你轉投資盈富（2800）或恭他指數基金，是最好的選擇。

你可以考慮：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

至於你現時的股票，基本上都是有質素的，可以持有，大部分都是有質素的股票，無問題。耀才證券（1428）則唔建議持有太多。

不過要留意，你唔可以只集中在股票，而沒有現金，你都應該有適量的現金作備用，以及等投資機會。

------------------------------------------------

Q16717：

龔成老師你好，黎緊有意投資30至40萬到股票市場，想買美股金山雲，不知它和金山軟件（3888）邊隻較有質素？如大手買入會否太進取？

另外見近日新鴻基(00016)回落不少，建唔建議買入多小小？感謝

龔成老師：

唔建議太過大手。

金山雲，同金山軟件（3888）都是有質素，有潛力的股票，以平衡角度，金山軟件較好。

但由於兩隻都有業務波動的風險，佢地在行業結構上，仍不是完全穩健，加上現時估值又唔算特別平，所以，你唔好太過大注。

新地（0016）有質素，現價在合理區中下部，可以投資。

------------------------------------------------

Q16718：

龔成大哥 我想問如果我用資金黎投資外地（台灣）房地產是否可以增值資產收入 想聽聽你意見

或者應該咁問 你點睇台灣房地產投資

龔成老師：

台灣房地產的投資價值，算是不過不先，台灣獨特性不算是好強，但又不差，所以長遠樓價的升值，算是平穩型。

你最重要分析佢的租金回報率，以及你自己是否熟識當區，無論是位置、租務市場、法規等。

當我地進行財富配置，分配到香港以外的地區，是可以的，這可以平衡你的風險，但你就一定要對當地及項目有所了解。

------------------------------------------------

Q16719：

龔Sir您好，我係一名師奶，第一次買股票，聽人講買左幾手303，請問呢隻股票有增值空間同值得長期持有嗎？感謝您

龔成老師：

偉易達（0303）雖然近年的股價較一般，但本質都算不錯的，但就唔叫好強。

佢過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

因此，這股以收息股看待，會更好。

由於佢之前公布的業績，生意同盈利都出現了下跌，因此股價受壓。現價合理區，可長線，但就唔建議投資得太多。

------------------------------------------------

Q16720：

Hi 老師你好
我今年26 資金大約5萬 收入18k

每月打算月供股票2千再加定期買一手股票
請問買一手 盈富還是煤氣較好？
月供股票方面 港鐵再加上那個股票？
謝謝

龔成老師：

月供方面，建議你每月供盈富（2800）$3000，因為月供金額太少，你成本佔比會較高。同時，盈富是一個組合，你持有多少少都無問題。

至於餘下的資金，你就可以久不久買入一些優質股，港鐵（0066）是首選，之後到煤氣（0003）。

你唔好只集中在1、2隻股，隨著你之後的財富不斷增加，你應該建立一個更為平衡的組合。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【《香港經濟日報》App新會員迎新賞】https://bit.ly/3qF6uWF
【香港經濟日報】《香港經濟日報》專欄作者石鏡泉（石Sir）今日會繼續解答網民問題，焦點股有中信股份（00267）、澳博（00880）、華晨（01114）、裕勤控股（02110）、招商局（00144）、中升控股（00881）、海螺水泥（00914）、中移動（00941）、中海油（00883）、聯通（00762）、中芯（00981）、中糧家佳康（01610）、中國鋁業（02600）及雅居樂（03383），石Sir亦推介中石化油服（01033），詳情請待為你分析。……（更多內容：https://inews.hket.com/article/2824830?r=mcsdyt ）

今日焦點:

分析港交所388季績
本業表現一般，260元成隻底
或再回至256元

-分析騰訊700
仍有上升空間
上望400元

-分析上海醫藥2607
現價買,15.5元止蝕
目標18元

-分析友邦1299
多間大行看好,前景睇好

-分析中移動941,走勢差,
值博率不高

-分析中石化384
23.5至29.5元區間上落

天宏財經台SkyFinance每日為大家送上金、股、匯、大宗商品投資策略，更會請來各界名家、大談理財創富秘笈，讓您每一個理財創富的決定皆百發百中！
本台為新新聞媒體集團成員
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
聲明：個別節目內容不代表本頻道立場。
facebook 粉絲專頁：https://www.facebook.com/skyfinancechannel/