做職業運動員係一件非常之寂寞嘅事。

見到 @黃文萱LeticiaWong講得咁清楚，我都想講吓自己嘅經歷。同埋再講一次，伍家朗真係好好波，識打羽毛球嘅人一睇就知，打到佢咁水平係極唔容易，大家唔好忘記佢曾經贏過林丹。

細細個，我打羽毛球都真係幾叻嘅，原因好簡單，我嘅童年同青少年，基本上係喺CCC渡過。即係跑馬地口嗰間木球會，我好鍾意打波，瞓醒就跳住去打，有啲天份，亦幾勤力，後來CCC有埋泳池就打完波游水，絕對係一個多動症兒童。去到中學， Form one我已經打贏晒全校，順手打埋校隊打埋學界，有教練叫我去打港隊青年軍，什麼去銀禧集訓，什麼練體能，老實講去到佢寫嘅第二第三點，我已經放棄咗。

我唔鍾意練體能嘅枯燥，同堅辛苦，亦都覺得生活只有訓練太過單調。（我咁鍾意吃喝玩樂enjoy life！ 中五嘅時候，Eng Lit嘅老師Miss Luk苦口婆心同我講：會考喇，你真係要勤力啲唔可以再enjoy life喇，但我冇聽佢講，仍然enjoy life，不過成績都好好）F.3 嘅時候，我老竇同我講，唔可以再成日打波，一係揀讀書一係揀打波，揀打波你讀書唔會好得去邊。香港亦都冇好似美國北卡（North Carolina University)專比籃球精英讀大學嘅地方，米高佐敦同Vince Carter都係嗰度畢業。

當時我諗，如果變成職業運動員，我應該唔會enjoy，而讀書我都真心鍾意。結果我揀咗讀書，同貪圖逸樂，所以對於啲選擇刻苦，長期受高度紀律訓練嘅專業運動員，我有無比嘅respect。

實不相瞞，小學嘅時候，PE先生已經睇得出我骨格精奇，抽咗我出嚟訓練，叫我跑學界短跑。全間小學，得我一個人跑，同學仔上堂、玩，我就俾先生叫我孭住個好重嘅背囊，負重喺操場跑圈，當時冇乜嘢專業器械，老師係咁將一啲好厚、一磚磚嘅書塞入個背囊度等我個袋重啲，然後就叫我跑。全學校得我一個，去比賽得我一個。嗰時我讀緊小學，訓練嘅時候你就會知道你會冇晒朋友，冇正常生活，天煞孤星一樣。我仲記得，老師帶咗我去PE房入面一堆釘鞋度揀我嘅size，都唔知有幾多人着過，殘殘舊舊嘅釘鞋佢叫我揀一對，其實我都唔係好啱着，就着咗去比賽。係去政府大球場，當年仲未裝修，有啲荒蕪，跑咗第一，對釘鞋仍然係咁核突。我覺得做運動員好慘。

或者你有所不知，網球名宿Agassi同佢老婆嘉芙，兩公婆打網球咁叻，世界第一，但佢哋係嚴禁自己嘅仔女做職業網球手，覺得付出太大、壓力太可怕，而且會冇咗正常生活。我嘅小打令希臘網球手Tsitsipas，目前世界排名第四， 22歲，五年前即係佢17歲時轉打職業，啲人訪問佢，佢好坦白咁講，話佢嘅青少年時期，從來未睇過演唱會，未去過所有年輕人去玩嘅活動，平日只有訓練同埋比賽。

講咗咁耐，最想講嘅係，做高水平嘅專業運動員真係好唔容易，做香港嘅運動員，更加唔容易，伍家朗曾經世界排名第六，依家都排第九。今日大家好記得張家朗，希望香港人唔好淨係喺國際大賽，同埋攞到獎嘅時候，先記得撐香港嘅運動員，因為佢哋係比賽之間、攞獎之間，仍然係努力不懈咁好辛苦去鍛鍊。

張家朗又好伍家朗又好，其他不知名嘅香港運動員都好，佢哋嘅努力，好多時係我哋睇唔到嘅，我特別希望香港嘅廣告客戶，多啲留意一啲未必係最高調嘅香港運動員，我好相信佢哋嘅故事，佢哋嘅堅毅，佢哋嘅努力，係可以做到好好嘅代言人。

至於我自己，體能上嘅刻苦我未必夠堅持，但精神上、知性上、創作上、文字嘅馬拉松，我從不鬆懈，每一篇稿都用最謙卑最專注嘅心情，好認真咁唔俾自己揸流攤去寫。

點解咁辛苦做廣告都要寫稿，係因為想任何時候都繼續磨劍，我相信「寫學雙長」，希望唔好俾自己懶，長期練好個腦嘅能量。從未停過飢餓地去睇書、強迫症地吸收知識同新事物，希望令自己可以比到更有營養嘅創作、文章同內容大家。我稿品應該係唔錯嘅，廿幾年來從未脫稿，從未臨時請假，夜晚2 am先放工，我就返到屋企寫到朝早六點。

每個人，可以揀一條同自己過唔去嘅路，埋首刻苦耐勞咁去行、去修，亦係一種幸福。希望呢種辛苦幸福，唔好太過寂寞。

再一次，多謝支持我Patreon，等我可以繼續創/寫作嘅每一位，多謝你哋。

#有感而發啫
#撐香港運動員
#希望多啲廣告客戶撐佢哋

-—-——-------------------------
👉🏼https://www.patreon.com/budming

謝謝你的訂閱，讓我不必學習光合作用，可以繼續創/寫作、分享知識。

黎緊8月23-25將會同puma
搞一個中學生既訓練營，希望無左學界比賽都打翻個3人賽，有興趣可報名選拔呀😊
可看ig profile連結到報名表格登記
報名表格: https://hk.puma.com/explore/hoopscamp21
@PUMAHK
#PUMAhoopsHK

PUMA HOOPS CAMP 詳情

日期 : 8月23-25日(3日2夜)
教練團隊：Coach Fui 及專業團隊
訓練內容：核心力量個人技巧訓練
7-9 技巧課 / 11-1 體能訓練 / 3-6技巧/ 8月25日 3x3比賽
訓練營地：香港中華基督教青年會烏溪沙青年新村
訓練場地: 香港浸會大學附屬學校王錦輝中小學體育館
參加年齡：18歲或以下中學生
參加人數：30人
費用：$1600 包括訓練、住宿、早午及晚餐
裝備：PUMA HOOPS PACK (籃球服一套及籃球鞋一雙)
截止報名日期: 7月31日(星期六)

選拔詳情

日期：8月4日(星期三)
時間：下午3:30 - 5:30
地點: 香港浸會大學附屬學校王錦輝中小學體育館 (王廖惠文大樓2樓)
　
選拔時間組別，將於報名後再以電郵方式通知。

話說我發現有個大埔校友相認區。

利申，並唔覺得自己係名人，大埔讀書咁多年一直都好摺，我記得上次同班中學同學傾計，我真係好活喺自己世界，又好毒，又好古怪，以致我參加過校際音樂節而我果位好出名嘅朋友話完全唔記得我有去過...我當時個心傷咗一下，我估我唯一喺中學有做過嘅名事，就係喺學界籃球比賽臨完場3秒一手拉停咗對手，搞到T Foul🤣🙈sor心急咗，累全隊輸波。

BTW好想知呢位網友嘅朋友嘅仔仔係邊一位，事關我真心無讀過三育。

#沐恩讀到中五 #大光讀到中七
#喺名校學識聽英文 #喺大光學識做人
#band幾都好 #最鍾意佛教學校有教無類
#三育我淨係去過打波 #打完飲汽水
#我果位好出名嘅朋友 #中樂團㗎
#好寸㗎佢由我家姐果屆讀到我果屆
#仲要唔記得我有份彈中阮
#傷心咗好耐 #沐恩讀太多年令人麻木
#細個好希望可以做交流生
#一年讀一間學校
#後尾先知要俾人趕出校先可能一年一間
#sosad #沐恩個英文名太難讀
#去到大光好好多😆 #taikwong
#wiki話我係傑出校友 #唔敢當🙈

「其實『高妹』好難發掘唔到。」浸信會永隆中學女子籃球隊教練林碧怡口中的「高妹」，是身高達1.8米的球隊隊長黃惠婷，「佢係個行出嚟就可以入港隊嘅人，我自己打波又好，睇咁多人打波又好，佢有咁嘅身高得嚟，又有呢個彈跳力、靈活性，係香港未見過。」

米八高妹成球隊瑰寶　十射十足助校破宿命

身兼港隊女籃隊員的Miss Lam對高妹讚不絕口，憑的不只是主觀的感覺，高妹在剛過去的「NIKE全港學界精英籃球賽」八強一役，全場射十球、中十球，協助學校勝出球賽，首次晉身四強，更打破過去三年兩度於八強止步的宿命。

缺自信賽前壓力「爆煲」　教練鼓勵終取勝

1.8米的身型在學界完全佔優，但又怎料到她也曾對自己無信心，「嗰陣打屯門區學界冠軍賽，我有另一個隊友比賽前一日受傷，我驚到喊咗出嚟，因為我覺得自己唔可以帶領隊友贏比賽。」高妹憶述說。

面對心理壓力「爆煲」，幸而高妹當時有Miss Lam的鼓勵，「Miss喺比賽前同我講『黃惠婷，你要相信自己』、『唔好諗到自己係咁差、咁弱』，嗰陣都相信Miss，Miss咁相信自己，覺得自己都應該可以。」最後高妹與隊友順利贏得比賽，高妹也上了一堂重要的課。

射失罰球球隊出局　一世難忘

但人生要上的課豈只一堂，高妹要面對的挑戰也接踵而來：在去年的精英賽八強，她與隊友發揮出色，原本勝利在望，可惜高妹在最後關頭射失了四球罰球，間接令球隊以一分之微落敗，這場比賽也成了她心中難以拔走的刺。

「嗰種唔開心嘅感受仍然喺度，係有種刻骨銘心嘅感覺。」高妹冷冷地說，「嗰場完咗後好似兩日無離開過屋企張床，就係喺度喊，因為覺得自己點解無能力去帶領球隊贏波，反而係因為自己而輸，仲只係輸一分，無試過因為輸波喊咁耐。」

再一次面對挫折，但教練又再一次令「高妹」重新站起來，靠的是不斷用Whatsapp訊息鼓勵。而球隊不只高妹一人，Miss Lam亦會以短訊關心及了解其他隊員情況，成功令球隊凝聚得如家人般親密，「我哋學校有四個字，『修己善群』，就係想佢哋先喺籃球場搵到自己嘅品德，品格好，然後再服侍呢個社會，感染其他人都會有咁好嘅品格。」

以熱情激勵他人　津貼中學亦有出頭天

Miss Lam教過不少球隊，在她眼中永隆最特別的地方是「夠簡單」，「佢哋打波好簡單，真係為打波去進步，唔係想爭咩返嚟。」全憑對籃球的熱情，即使作為津貼中學的永隆不如直資中學般有充裕的資源，也能在今年成功擠身四強，Miss Lam對此也十分感觸。

「永隆係我最覺得對教學失去衝勁，佢哋一路畀鼓勵我、一路唔放棄，係令我對教學重新充滿熱誠，係話畀我知原來我仲係可以，教到學生有份熱情、有感染力。」Miss Lam不禁流着淚說，「我哋永隆打籃球呢份熱情，係令其他寂寂無名嘅學校都可以掘起，可以令更多新面孔被呢個籃球圈認識。」

戰幔再起　東網「睇體」現場直播

今年精英賽即將戰幔再起，東網「睇體」屆時會現場直播「2018-2019年度NIKE全港學界精英籃球比賽」四強(26/1)及決賽賽事(27/1)，永隆中學將在四強硬碰協恩中學，今集《港。故》會用5分半鐘，帶大家感受永隆女籃對籃球的喜愛及熱情。

------------
《港。故》：東網每周專題習作，講故事、講香港人的故事。
FB：http://bit.ly/oncckonggu_FB　
IG：http://bit.ly/oncckonggu_IG　
Youtube：http://bit.ly/oncckonggu_Youtube

「老頭子，你最光榮的時刻是何時？全日本的時代嗎？而我，只有現在啊！」《男兒當入樽》的故事中，櫻木花道面對全國霸主山王，賭上自己的人生。這部在90年代掀起籃球熱潮的熱血漫畫，深深影響了一代人。主角們帶着各自的故事與滿腔熱血，站上高中生最光輝的舞台—全國大賽。

二十幾年後的今天，在這支球隊上看到了同樣的堅持、同樣的熱血、同樣「只有現在」而拼上一切的中學生涯。由學界D2經歷數次敗仗、出局，慢慢升上D1組。對上沙西區勁旅，一度落後20分下逆轉奪冠。三年裏由精英賽十二強、八強，到今年四強，成功踏上籃球員夢寐以求的舞台—伊利沙伯體育館，這就是林大輝中學男籃奮鬥的故事。

籃球就是中學生涯的一切

「我好似無時無刻都同籃球一齊，朋友、兄弟、自信嗰啲都係籃球畀我嘅。」已經中六的球隊主力陳仲顯，回想起自己的中學生涯。籃球彷彿就是他六年裏的全部，無論是午休還是放學，或是放假，似乎只要一有空閒，他就會在籃球場上奔跑。教練、隊友、兄弟，陳仲顯在籃球上找到了自己的故事，在球場上打出了自己的信心與價值。

同樣是中六，擔任球隊隊長的張峰碩，也在不斷進步的球隊中看到了自己的目標，並帶領着球隊一步步向目標進發。對他來說，籃球就是他中學生涯中的唯一色彩。「籃球就係呢幅黑白畫上面嘅色彩，嗰啲色彩就係籃球嘅回憶同埋成就。」張峰碩看着手中的籃球笑道。

見證球隊成長的伯樂

球隊打出歷來最好的成績，開心的除了球員外，還有一個陪着球隊訓練、見證球員長大的老師陸志成。「最初林大輝中學係一個籃球嘅『魚腩部隊』，我哋唔係一隊好強嘅隊伍，所以我哋每一場比賽都一定要好努力，先有機會贏。」陸Sir神采飛揚地說起球隊的努力和成績，一時忘記了自己身上的傷。在運動中傷到四條肋骨的他，負着傷觀看學生在這屆精英賽八強的賽事，在球隊擊敗傳統勁旅英華書院的那刻，興奮地衝上前和球員相擁，肋骨的傷也好像不痛了。的確，沒有甚麼事情能夠比得上，去見證自己的學生踏上香港籃球員的「聖地」。

本身也是籃球員的陸Sir，很欣慰能夠帶領學生走進伊利沙伯體育館的賽場。「新伊館呢個地方，係一個籃球員嘅朝聖之地，能夠去射上幾球，人生係無憾嘅。」

「黃金三角」的教育方針

身為老師的陸Sir，看到學生在球場上證明自己的努力，固然開心。不過他更關心的是學生在品格、學業上的發展。他知道球員生涯的艱辛和短暫，只有在籃球、品格、學業三方面平衡發展，日後才會有更好的前途。畢竟不少學生因為傷病、學業、或工作而放棄了熱愛的籃球。

曾因成績差而留級的隊長張峰碩就十分認同陸Sir的說法，「要堅持讀書，如果唔係就可能無大專呢個舞台。」視運動為一種教育的陸Sir，希望透過體育去影響、去磨練學生。他認為打籃球的過程需要刻苦的練習，亦會面對不同的挫敗，而人生就是這樣，需要刻苦與挫敗的磨練，才有機會成功。

衝進新伊館　四強迎戰強敵男拔

東網「睇體」屆時會現場直播「2018-2019年度NIKE全港學界精英籃球比賽」四強(26/1)及決賽賽事(27/1)，而林大輝中學在四強將碰上拔萃男書院。「希望可以喺球場上發揮到自己，做到最好。呢件事咁難得，可能一生只有一次。」陳仲顯難掩心中的興奮。

大戰前夕，今集《港。故》先用5分鐘，帶大家走進林大輝中學這個「魚腩」翻身的熱血男籃故事。

------------
《港。故》：東網每周專題習作，講故事、講香港人的故事。
FB：http://bit.ly/oncckonggu_FB
IG：http://bit.ly/oncckonggu_IG
Youtube：http://bit.ly/oncckonggu_Youtube

今集港故的主角任明敏(Dora)說出了很多「金句」：

「練球是一隊人齊人的事，一個也不能少，每個人除非入醫院，都要來練習。」

「她們可能下不了場，行動上跟不上進度，但精神上都要跟上進度。」

「做人的態度比任何事情更重要，一個冠軍可能是過眼雲煙，但做人態度會跟著她們一生。」

Dora就是協恩中學籃球隊的教練，她形容每次訓練一班十幾歲的隊員們都是「行入嚟，瞓住出去。」協恩中學籃球隊素有學界女籃「神之隊」的美譽，上星期剛奪得Nike學界籃球精英賽的女子組冠軍，連續第六年稱霸學界比賽。

然而所謂的「神」並非渾然天成，而是全賴日常刻苦的訓練。

Dora中學時期在協恩就讀，當時已是校內的運動健將。初中時，她是乒乓球校隊成員，亦有參加田徑隊，但後來發現最愛的是在籃球隊中與師姐們合作帶來的化學作用。從師姐身上，她學習到每次比賽都要全力以赴，以及為母校爭勝的使命感，令她大學畢業後回到母校，希望將這份「協恩精神」傳承給師妹。

今年已是Dora回到協恩執教的第十八年，帶領籃球校隊是她的主要工作之一，她笑言平日九成時間都與籃球隊隊員相處。

訓練過程，Dora極重視籃球隊隊員的紀律性：「佢哋練波時一散，我就要佢哋罰跑；聽我講嘢嘅時候，佢哋一過嚟，我畀3至5個指示佢哋，佢哋一落場就要做齊嗰3至5個，佢哋淨係做一個都要處罰，因為代表佢哋聽指令時冇集中去聽。」

此外，她也著重球員的團隊精神。

球員在上學日的午膳和放學時間，都要訓練球技和體能，星期六也要回校練習，連長期都不例外：「我唔畀佢哋放假，我話『聖誕節唔可以走、新年假唔可以走、復活節假唔可以走』。」在這些假期裡，球員每天需要在校訓練球技和體能最少七小時，晚上則在學校過夜。

而平日訓練中，即使球員受傷，她都要求她們坐在旁邊觀看，了解球隊的狀況：「練波係成team人嘅事，一個都不能少。佢哋可能落唔到場，行動上跟唔上進度，但精神上都要跟上進度。」

但即使贏波，Dora亦都會大鬧球員。好像去年年尾的學界籃球精英賽八強賽事中，「神之隊」在比賽中段險被對手追平，最後仍反敗為勝，卻被Dora責罵太在意個人表現：「每個球員都會好在意自己喺場上打幾分鐘，或者喺場上拎到幾多分數，但對於我嚟講，球隊勝出先至係應該放喺第一位。一隊波總會有人打多啲，有人打少啲。」

除了籃球技術要精，Dora亦重視學生的學業成績，因她深明讀好書是進入社會的入場劵。任教數學科的她，有時會在校逗留到深夜，幫成績較弱的學生補習。她要求學生在學業上要跟打籃球一樣，每次皆有進步：「我成日同佢哋講，讀書要擺第一，籃球擺第二。每個人讀書能力都唔同，有啲人讀成日都未必考到第一名，但進步係重要嘅，要畀老師睇到佢哋想進步嘅心。」

不過，Dora做這一切，最渴望的始終是想讓學生學懂待人處事的態度：「做人嘅態度比任何嘢更加重要，一個冠軍可能係過眼雲煙，但做人態度會跟佢哋一世。」她希望學生在籃球訓練中，培養與人合作和凡事盡力拼搏的精神。

近年學界籃球的競爭愈趨激烈，Dora坦言擔心協恩球隊成績下滑，但她認為這正正能教曉學生重要的人生一課：「我覺得有時球隊需要一啲衝擊，輸咗都係衝擊，令佢哋再進步，學識點樣面對逆境，訓練到佢哋面對困難時要經歷，經歷之後再跨過，會對佢哋人生有好大幫助。」

《港。故》帶大家窺探「神之隊」背後的辛酸，並了解她們這位「愛之深、責之切」的教練。
-------------
《港。故》：東網每周專題習作，講故事、講香港人的故事，請關注《港。故》fb：https://goo.gl/YJXtcw