【龔成問答信箱】（Q21881-Q21900）

Q21881：

阿sir，我做緊你課堂比你 評估表，做功課，六福，我想問下 點定義 「負債增長不過快」？我見佢每年平均負債增速10%，有冇過快？

龔成老師︰

主要你可以睇翻，佢負債指標，會唔會因此而轉差。若果負債增長同時，資產都有一定提升問題不大。

但若負債增長較快，令指標惡化，你就要了解當中原因。指標變差，唔一定代表有問題。

如果你有印象，我上堂講過近年會計制度有改變，令集團租金支出，由成本支出，現變成負債去計算。若因這類情況，就算負債指標轉差，我地都唔洗在擔心。

現時六福(0590)負債不多，整體負債指標都理想，故負債問題不大。

------------------------------------------------

Q21882：

龔sir你好，多謝你無私分享投資知識，你嘅股票班由淺入深，教學易明而且每堂都好精彩，學到嘅嘢絶對係一生授用，亦打開咗我對於投資、財富嘅知識領域嘅興趣

現在睇關於財富嘅書已經成為我每日嘅習慣，我會不斷努力，期待有一日達到目標，然後我會好自豪咁同人講：「係龔成老師教我嘅！」

以下係我嘅股票組合，大概港幣60萬投資，係我可動用現金嘅一半，淨返嘅錢係等真正大跌市時先再入市，潛力股＆平穩增長股都係上完堂後開始慢慢收集，現在比例是60／40（我36歲）

策略係等潛力股倍升後，會續漸轉投到平穩增長股，而平穩增長股我打算未來20年都只買不賣，或永遠持有。

潛力股：
388 ＠ 477 （2手）16％
1810 ＠27.1 （15手）13％
9988 ＠244 （2手）8％
1821 ＠26.7 （8手）7％

2382 ＠211.75 (2手) 6％
1448 ＠ 7.62 ( 4手) 6％
1177 ＠7.17 （4手）5％
1297 ＠1.58 （10手）3％

平穩增長股：
66 ＠ 44.3 (3手) 11％
823 ＠69.3 (6手) 7％
1928 ＠34 （2手）5％
788 ＠1.16 (10手) 4％

收息股
5 ＠51.7 (3手) 9％

1） 想請問會唔會太過分散？或有冇d我睇唔到嘅問題存在？

2）如果太過分散，我想知你對於1297 ＆ 1821嘅睇法？因為我考慮緊好唔好將呢2隻股票都換成我其他嘅潛力股內。

3）005係我以前買落，打算換馬到平穩增長股，如果已經有呢個打算，你同唔同意我蝕住放咗佢，定等到平手先走？

多謝你抽空回覆，其實最主要都係想答謝你，我非常鼓勵我身邊嘅朋友去報你嘅課程！終生授用，祝你身體健康，點石成金！

龔成老師：

加油！我好相信，我地的財富與財務知識，一定成正比的，要多睇書，睇企業年報，保持進步。

好期待你完成目標，同時長遠不斷累積財富！

1）勉強可以，如果去到10隻左右會較好，不過，當你的財富不斷上升，去到10-15隻都是無問題。因此，現時的情況基本上是無問題的。

這些都是有質素的股票，同時比例無問題，只是匯豐（0005）或這類收息股，不宜再加入。

各水桶的配置正確，同時留有現金都正確，整個財富組合無問題。

2）中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。

現價其實有投資價值，但就唔建議太過大注。

ESR（1821）係亞太區（包括中國、日本、韓國、新加坡、澳大利亞及印度）的物流地產平台。

佢主要從事發展及管理現代物流設施。這些設施的租戶包括電子商務公司、第三方物流供應商、實體零售商、製造商、冷鏈物流供應商及其他租戶。

佢亦有管理多間基金及投資公司，於亞太區投資處於不同物業週期不同階段的物流物業。

財務數據方面，增長理想的，相信長遠有發展力，不過，現價唔算平，如投資要控制注碼，這股可長線投資的。

3）現時匯豐佔你組合9%，你可以先減持部分，轉其他增長股。餘下的部分，等過1、2年經濟好轉，股價上翻多少少先賣。

反正現時其他股票，又不算特別平，你賣全部轉其他股，都不能以很平的價位買到，因此，可考慮先賣部分。除非大市出現明顯回落，其他優質股較平，就賣出全部匯豐轉其他。

------------------------------------------------

Q21883：

你好 龔成老師，請教一下，今年32歲，月入43000

樓按負債430萬 (利息H+1.3%)
現金 130萬
每月供樓16000
租金收入11000

月供
恒基 2500
港鐵 2500
港交所 2500
平安 2500
比亞迪1000
小米 1000

持有
800股 hsbc @71
400股 太古地產@18.8
400金莎 @28.3
500比亞迪 @36
7000置富@7.96
2000恆基@36.6

手上現金配置建議

1. 我知道現時持有現金過多，想在配置上做番多啲投資，減少現金，請問有咩建議?

2. 有睇美股，ETF, bond 等等，但唔知從何入手? 還是最簡單買番港股算?

有諗過簡單買中銀都有8%息收，但又好似太悶? 老師意見如何? (因為唔成日睇股票，所以好多時都miss 左襯平價入市的時機。。)

我係一個唔係成日睇股票的人，所以好少做買入動作，多謝老師建議的月供幫我每月儲股票。

3. 另外月供股票選股需要調整嗎? 比亞迪價位好高，還適合月供嗎? 還是需要暫停? 因為我見老師近來推介的月供都沒有比亞迪。。

4. 另外月供的每隻股票需要加大銀碼嗎? 還是加多幾隻股票? 有何推介?

5. 還是我應該再加大月供金額去將手上的現金逐步放入去股票? (因為成日都捉唔到平的市價)

謝謝

龔成老師︰

1) 現時大市只係合理水平，現金佔比重大約3-5成。你現時持有現金比例有點多，可以再用分注形式，再買入多些優質股，會較好。

2) 其實我地投資優質股，就係希望透過佢自然增長，達至財富增值目的。由於係長線策略，因此係唔需要成日睇住個市。

投資選項方面，債券本身只係產品，性質上唔係一個理想的財富增值選擇。而且，佢增長力較弱，建議你集中係優質資產，好似優質股、物業等會較好。

至於投資在港股、美股，其實都係可以，視乎你對邊個市場較認識。如果你對個別股票無研究，你可以買該個市場的ETF，例如盈富(2800)、VOO、QQQ等。

3) 你現時月供配置，己經可以。比亞迪(1211)現價略貴，但你只係小注月供，所以係無問題。

現時大市只在合理區，每月資金唔好盡用。你要留有部份資金，等大跌市出現時，可以用來掃貨。

4) 若你有更多資金，可以投入月供。你可以考慮加入盈富(2800)，去令組合平衡性提高。

5) 其實我地投資，唔係只係捉住平個一刻，去全力入市。而係透過策略，去有系統地，在不同平貴水平，去慢慢儲貨。

因為，我地唔會知道，每一隻股票最終會唔會跌入平宜區。如果佢一直係合理區，唔跌落去，就會失去入市機會。

所以，我地會分注策略去入貨。在合理區先入1注，每有回調10-15%再加注。當真係跌到入平宜區，我地就大力入貨。

如果你掌握唔倒平貴機會，你可以將手上資金，以分注或月供形式入貨，去平衡風險。

------------------------------------------------

Q21884：

龔sir你好，都未好好多謝你上次嘅回覆，喺我身上已發生咗一件好重大嘅事，家人啱啱決定同資助我少部分買咗鴨脷洲-恆基逸南-186呎單位

我喺之前雖然睇咗樓好耐，但此決定事岀突然，前後兩日。 我一路記得老師話細過250/270呎左右，唔係幾好，不過家人好堅持應把握機會上樓作投資用途，

唯有寄望個地點唔差... 。

我都係啱啱先冷靜落嚟少少。我想麻煩老師為我嘅以下諗法作少少意見:- (注:- 我年尾32歲/收入20k左右/正職從事法規行業):-

1.我需賣岀部分股份:-

a) 中生($6.88入/6000股 )，打算到$9.5放1000股
b) 中國平安 ($82.77/500股 )， 打算到$86放晒
c)比亞迪 ($242.57/175股 )， 打算繼續守
d) 金沙 ($30.60/400股)， 打算守住先
e) 光大綠色環保 ($3.375/4000股 ) ， 打算守住先

2.係同一行業搵緊工，希望呢個夏天內人工有上調

3.有個網店，生意未見起色，但就繼續努力中，同時同批發商簽咗約到下年年頭，同有間studio約租到下年二月

4.新樓下年10月尾建成，以放租用途為先

多謝龔sir，老實講我自認心理質素麻麻地，係一門功夫，但真心好多謝你平日慷慨，特別係你好冷靜、客觀又正面嘅精神！ 默默中真係好多謝你。！

龔成老師︰

從投資角度，一個不足300平方呎的單位，連基本家庭的需求都達不到，投資價值會較低。

而且，一手樓都會有溢價，變相令你買入成本貴左。唯一可取地方，是樓盤好近利東港鐵站，往返市區十分方便，會係加分位。

但整體投資價值，始終只算係中等。

其實佢隔離有另一個幾年樓齡的盤，倚南，都是主打細單位，可以作為參考，睇翻佢的租金等情況，該盤最初賣到30000呎，近年去翻25000，算是合理翻d。其實所有野，都要計租金回報率等因素。

1) 你持有股票，都係有質素，最好係可以長線持有。

但若有實際需要沽貨，我建議你先沽出光大綠色環保(1257)，佢係當中質素較弱的一隻。

之後，可以考慮多於1手持股的中生(1177)。最好留有部份，因為此股係有質素。

2) 只要你努力，相信會找到的。

3) 新生意，好多時就係透過不斷嘗試，之後再慢慢調整，去一步一步咁前進。

4) 用"以租養樓"模式去操作，係可以。但長線，我建議你將佢換成較大單位，投資價值會較好。

------------------------------------------------

Q21885：

Hello, 龔sir, 我已留意你FB page 一段時間，好認同你的理論，想學習多啲股票知識，因為我今年才開始嘗試買股票，希望財富增值，

但現時有兩隻股都被扣著，希望可以指點一下。

現時持有:
3800 保利協鑫 4000股 2.6375買入
2013 微盟 1000股 19買入
1398 工商 1000 5.02買入

25歲 有個女1歲
月入 23000
固定支出 12000
其他洗費 3000-6000 不等
流動資金 有30000-40000 （但有28000被扣在股票）

謝謝

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。

微盟(2013)有質素，同時有不確定性，不宜持有太多，暫時唔好再加注。

工行(1398)只係收息股，增長力欠奉，唔適合你。

保利協鑫能源(3800)比較麻煩，佢現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

未來投資策略，建議你每月5成儲蓄做月供。其餘先儲起，用一邊月供一邊儲蓄的策略。

但你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

餘下現金和每月一半儲蓄，我地就等機會，當大市出現較大回調，就加大力度掃貨，然後作長線投資。

------------------------------------------------

Q21886：

老師你好，我手持股票：

1500股 00052（$26入）
500股 02388 （$33入）
3000股 06823 （$11入）
另月供$2000 2800

想請問以上股票組合有需要調整嗎？另外亦有意購入中電股份，請問是否應等股價下調才入市？謝謝你！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，當中的股票，都是有所素的。

這算係一個較保守的平穏增長型組合。若你係中年至退休人士，以上持股和月供組合，係可以。

中電(0002)主要係收息，再加少少增長力，同樣適合上述年齡層人士。現價算合理區，已可以慢慢分注入貨。

------------------------------------------------

Q21887：

龔成老師你好，想你畀意見而我，以下嘅財務狀況能否購入第二層屋。

月入 ：65000
支出 ：家用雜費8000 / 供樓 18500 / 日常生活開支 4000
資產 ：600000 流動現金 / 800000 股票
貸款 ︰380萬屋 （自己名）
狀況 ：已婚

不會考慮用另一半名字購入，想用自己名
沒有小孩

目標 ：再購入一層樓，希望錢唔好貶值

龔成老師︰

首先，你是非首置人士，會有較高印花稅要收取。另外，由於係你第二個物業，能做的按揭成數都會較少。

以你現時資金狀況，要購入第二個物業，相信較困難。

從財富增值角度，要避免資金貶值，最好方法就係將貨幣換成優質資產。優質資產並非只有物業，優質股都係其中一類。

所以，你可以先用現有資金，投資優質股增值，去累積第二個物業所需資金。

你可以利用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

大市現處於合理水平，那60萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃平貨。

------------------------------------------------

Q21888：

龔sir，有一個問題想請教，銀行嚟緊會借閒錢一百萬畀我，3.25%p.a., 鎖2年。一定要借的。

我應唔應該攞去有6厘息嘅股票2年 compensate 個利息加賺少少呢？

其實我想全部去買1211，1810，388和700 instead of 工行或港燈。你點睇？請賜教

我日日都睇你啲Q&A，多謝你的耐心解答。

龔成老師︰

這個好視乎3個因素，你自已投資能力、風險承受能力和這筆資金，可用作投資時間。

若你投資能力一般、風險承受力較弱、或者這筆資金，2年後必要全數歸還，可動用投資時間較短。我都建議集中投資「收息股」，會較好。佢地增長力係弱，但在波動性較低。同時，有一定派息。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)

如果你有一定投資知識和經驗，而且風險承受能力都高，而借貸又不必急於清還。你係可以投資你所講的「潛力股」，比亞迪(1211)、港交所(0388)、騰訊（0700）、小米（1810）

但你要明白，佢地增長潛力大，但風險同樣好高。你用借貨得來的資金，去投資潛力股，風險唔細。

另外，比亞迪(1211)現價偏貴，要回到$135才算較合理，才可小注。而港交所(0388)、小米（1810），要回多1,2成才算合理區頂，才可開始分注入貨。

騰訊（0700）則現價已經算係合理區頂，但由於未算平，在這水平，只宜小注。

同埋，你要建立一個平衡的組合不要過度集中在部分股票，就算你想買潛力股都不能過多。另外，記得要有部分留現金，不能全部都投資，要有備用，以及「等投資機會」的作用。

------------------------------------------------

Q21889：

龔sir你好！我今年22歲剛畢業開始工作及有儲蓄約8萬，現時月入約萬五，有約20萬學債需償還、年供醫療保險約萬五及家中的財政負擔。

我的目標是大概五年後薪金至少達到月入3萬以上。現時我希望可以好好理財建立適應的投資組合，未來目標能上車買樓。

因我修讀商科會計財務相關的學位及從事金融業相關職業，對市場有一定的基本知識，可是我從未有實戰投資經驗及相對的不敢面對太多風險(因我自認為現時我的財政狀況不佳，害怕不夠穩陣)

請問有甚麼建議我應何時開始(例如至少有多少備用現金)投資(e.g.月供股票) 嗎？我應還清債務才開始嗎？

謝謝你的指教

龔成老師︰

雖然你係讀金融相關課程畢業，係投資上有一定優勢。但你要明白，實戰跟書本很不一樣。因此，你都要保持學習心態，去累積更多實戰經驗，投資才會做得好。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時22歲去計，是財富增值的黃金時期，故投資計劃越快開始，會係越好。

備用現金方面，你可以視乎自己實際情況，我一般建議留有半年開支的應急錢，會較理想。

由於，你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

策略上，你可以投資「平穏增長股」和「潛力股」。你每月用5成儲蓄做月供。其餘先儲起，用一邊月供一邊儲蓄的策略。

潛力股是風險較高的股票，由於你現時投資經驗不多，風險承受能力又較弱，建議不要持有過多，最多維持2-3成好了，甚至全部先集中係平穏增長股。

若你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

餘下的另一半儲蓄，我地就等機會，當大市出現較大回調，就加大力度掃貨，然後作長線投資。

至於現有8萬現金用來先還學債，還是投資先，是一個機會成本問題。一般學債利率不高，你用這筆資金先作投資增值，效益會較高。

現時大市在合理區，你可以先用4萬。餘下4萬就連同每月一半儲蓄，等大跌機會。

------------------------------------------------

Q21890：

hi, 成老師，想請教我在之前入左以下股票，
9988 $266入
1024 $370入
3718 $1.71入

想請教仍可作中長線持有嗎？
因已蝕好多。謝謝！

龔成老師：

你持有的股票，其實是有質素的，不過買入價，都全部貴，相信你很易受當刻市況影響，見到短期市況氣氛較好，以及較多短期利好消息，就會追入，同時相信你無企業估值的能力。

建議你住後學好投資，又或同一些平均入市法或月供，能有效助你減少風險。

阿里（9988）有得守的，無問題。

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍略貴，這股質素無問題，但股價上落會大，如果持貨太多可能要減少少。但如果不過多，其實可守，不過要較有耐性。

北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中間，你有貨可持有。

------------------------------------------------

Q21891：

龔sir你好！我和先生抽中白居二，但見未補地價的居屋樓價都好高，其實值得買嗎？

謝謝你

龔成老師︰

雖然居屋投資價值，比私樓為低。但由於佢售價跟市場價相比﹐係有折扣。

你考慮時，應從長線角度去考慮，邊個方法先至可以令我地，有較多現金流空出來，作投資增值。因此，從財富增值角度，居屋係值得考慮。

而作為自住用家，只要你能夠做到"供得起"這個大原則，咁就可以。

當然，你都要跟同區同類型樓盤作比較，如果係貴得無道理，就不要考慮。

------------------------------------------------

Q21892：

老師你好！通問你點睇越南ETF 2804同3087？現階段適合月供嗎？如果二選一應該選邊隻？

多謝抽空解答！

龔成老師︰

ＰＰ越南(2804)投資目標是提供在扣除費用及開支前與MSCI越南指數 (NTR)

ＸＴＲ富時越南(3087)投資目標是追蹤指數的表現，而該指數為越南富時指數。

2者初步睇，分別唔算太大。我自己無研究越南股票，如果你有認識。你可以再仔細D，睇埋佢10-15大持股，才作決定。

越南相信會係其中一個，未來發展得唔錯的東南亞國家，你用佢作月供係可以。但由於佢係新興市場，風險會較高，故投資時不要太大注。

------------------------------------------------

Q21893：

龔sir你好,本人28歲 現持有股票0，2年前與前度合資購入物業，明年夠3年將會放售，大約取回60萬左右。

另外，家人想將現值800萬的自住物業放售套現增加現金流。因只有本人有收入，家中有長者，所以未能儲到錢。

想問取回錢後，如何安排會比較好？又應否賣樓套現？多謝解答

龔成老師︰

每人都有自住需要，我唔建議你沽出自住物業。因為你咁做等同沽空樓市，你要承受租金波動，所帶來的風險。

因此，我建議你最好保留自住物業。另外，善用取回的60萬，作投資增值，會較好。

假設，你現時家庭現金流有巨大壓力，你可以將全部或部份資金，買入一些「收息股」，去創造現金流，以分擔部份生活開銷。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）

若你現時家庭現金流壓力不大，我建議你先用取回到60萬，去投資「平穩增值股」+「潛力股」這類增長股，先做好財富增值部份。

如果你投資知識不高，可較集中在平穩增長類股，至於潛力股，只宜小小注。到你有一定投資知識，才慢慢增加翻潛力股比例。

現時大市只是合理區，60萬資金可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

另外，由於你係家中唯一收入支柱，在實行以上任何一個投資計劃前，都要先預留半年開支，作應急之用。

除了上述投資計劃，你都要審視自己開支部份，盡量避免一些不必要開支。另一邊，你可以考慮做一些兼職，或者網上小生意，去提升自己收入。

重點係，你要相辦法令自己每月有一定閒錢，可以作投資增值，令自己可以走出這個「財務死胡同」。

------------------------------------------------

Q21894：

你好！龔生！我今年30歲，月入18000元，與月入35000元，比我大十年的老公租屋住，2人買入12萬元ibond，和有十多萬定期。

每月二人共儲蓄16000元，有看過你的80後百萬富翁，與財務自由行，加上定期睇你回覆的讀者來信，得益不少，

今年開始用8000元月供3隻平穩增長股，和一隻潛力股，這樣足夠嗎？如何可以以投資改善生活？但另一方面，新聞經常話可能中國或美國經濟可能會急轉向下，

投資時有要注意的地方嗎？

之前我喺投資方面已經錯過咗好多時間，期望得到你嘅回覆，幫助我！thank you

龔成老師︰

記住，我地投資唔好估走勢，我地著眼點，係企業長線質素。宏觀經濟係要考慮，但唔會係佔最大比重。

最主要都係睇翻企業和所屬行業本身，有無發展潛力和質素，去決定是否值得投資。

中國或美國經濟會唔會急轉向下，無人會知。我地只會用現時狀況，去制定投資策略。

係投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，你用「平穏增長股」 + 「潛力股」作組合，每月儲蓄月供一半和儲一半的做法，都係正確。

iBond和定期這類定息產品，增長力好弱，唔建議持有太多，因為會拖慢你財富累積速度。

另外，你要留意「潛力股」係有一定波動性，你投資經驗較淺，只宜先小注，大約佔組合2-成左右。到你有一定經驗，你可以投資到約4-5成比重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21895：

你好呀龔成，想問一啲股票問題想問你，亦有不斷留意你的Facebook

最近我自己的股票已經下跌了很多，不知道應該怎樣做，想減持一半，想問吓你的意見

本人持有以下：
1772 140
981 28
9988 278
6666 11

多謝你的寶貴意見 多謝你

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時持有的股票，都係有投資價值，都不需要因為跌價，而作出減持。令你出現虧損原因，主要係你買入價偏貴。

這些持股都係潛力股類別，佢地雖然有增長潛力，同時風險都較高，不宜持有過多。

特別係贛鋒鋰業（1772)、中芯國際（0981）這些上落較大的潛力股，更加不宜只可小注。

若你係偏年青，持有潛力股係可以，但只宜佔組合約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

另外，由於你現對企業定平貴能力，似乎較弱。為免再出現同類型情況，我建議你再投資時，最好利用月供，或者分開多注去入貨，從而減低買貴貨風險，相信會對你較有利。

------------------------------------------------

Q21896：

龔Sir, 你好, 首先多謝你對我們的分享。因為最近才認識你, 已經開始看你的書及FB, 希望可以做到為自己財富增值, 亦已經開始學會儲股票。

有些問題, 請多多指教!

1) 本人40歳, 現金約有$800,000, 人仔$160,000,

股票有 (5: 800股, 1398: 15000股, 2800: 2000股, 2628: 2000股, 3067: 200股, 371: 30000股, 751: 20000股),

每月可用$5,000投資, 想60歳後可以每月有被動收入$10,000, 我現在還能做到嗎?

2) 當初都是聽人講亂買, 又短炒, 以下2隻股票應該保留還是放棄?

2.1) 371 (30,000 股) (平均價$5.12)
2.2) 751 (20,000 股) (平均價$3.51)

謝謝! 祝工作順利!

龔成老師︰

1) 若果你希望60歲後每月有2萬蚊現金流，以股息率6%計，你需要本金200萬。你可以透過一些增長型股票，去累積這筆資金。

人民幣係貨幣的一種，長線只會貶值，除非你有明確用途，否則你換回港元去投資，會較好。

匯控(0005)、工行(1398)、北控水務集團（0371）只係收息股，增長力好弱，不宜持有太多。

中國人壽(2628)和創維數碼（0751）質素只係中等，同樣不宜佔比太重。

現時40歲，可以投資一些「平穩增值股」+「潛力股」，作為增值目標。

現時大市處合理區，你可以先用每月儲倒的一半資金投資，另一半就先儲起，等大跌市時才出手。

如果你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-4成，視乎你投資經驗多寡和了解這些股票程度而定。

大市現處於合理水平，大約HKD100萬資金，你可以先多用30-50萬，以"分注"形式，慢慢入貨。餘下資金和每月儲蓄，就等大跌市機會出現，才大力度掃貨，並長線投資。

我假設投資回報有10%（連股息再投資），你每月投資$5000 + 現有資產約120萬(現金+持股)，20年後大約會增值至過1000萬，故這樣安排相信很大機會達至你的財務目標。

2) 北控水務集團（0371）只係收息股，雖然有質素，但增長力不高。創維數碼（0751)增長力只算一般，整體質素較中等。

我建議你，2隻股票至少都沽出部份，換至以上有增長力的優質股，會對你較有利。

另外，你唔好再用短炒作策略。想做到理想回報，一定係長線持有一些優質股，會係最有效。

同埋，唔係單係聽消息，就去入一隻股票，咁係好危險。

我地買入一隻股票，一定要知道佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

------------------------------------------------

Q21897：

老師, 剛從朋友那裏聽到關於你的資訊, 看過你的facebook, 覺得很有用, 我想請教你所說的公司資訊如ROE...可以在哪些網頁上得知呢?

另外你會開班教授基本的投資方法和理論嗎? 我完全是新手。

龔成老師︰

你可以去中銀網，AASTOCK等，一些坊間常用的投資網站，都可以找到。

我自己都有開辦投資課程，就算你係投資新手，都無問題。

【投資倍升股課程】適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資時機、配置、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

------------------------------------------------

Q21898：

龔成老師您好！小弟已婚，育有兩子，已移民外地。銀行戶口除了有大約 4 個月家庭開支的儲備外，有大約 HKD400000 現金可用作投資，

但兩年後需將這筆錢再次存入現金儲蓄戶口，用作繼領簽証的資金証明。

似乎我不能作老師教導的長線投資。這個情況下，你有甚麼投資建議？先謝。

龔成老師︰

2年時間不長，而且你這筆錢，有一個明確而重要的用途。因此，就算投資，我地都只可以好保守。

最穏當做法，當然係做定期。但你願意承受少少風險，你可以將部份，買入一些收息股，作適度的增值。

到你要用這筆錢前半年，慢慢套現變成現金，咁就可以。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)

現時大市只在合理區，資金唔好盡用。最好留有部份，等大跌市出現時，可以用來掃貨。

如果你想做長線投資，等到你每月有一定閒錢，才用月供進行，咁會較好。

------------------------------------------------

Q21899：

你好！我是一個股票新手，請問咩係「平穩增長股」同「潛力股」，可否有時例子作參考？

龔成老師：

所指的是「企業」，我地買股票就是買企業，因此要從企業基本面著手。

平穩增長類就是有基本增長能力的企業，例如港鐵、六福、金沙。

而潛力股，就是該企業增長快速，例如比亞迪、美團，你會見到佢地的業務，都是快速增長，身處的市場同樣增長快速。

------------------------------------------------

Q21900：

Sir，想問下資產型企業係點理解，我上網睇過你答讀者問題，當公司資產愈多，賺錢會愈多，例如銀行同保險公司

咁佢地係用邊d資產去賺錢

係咪用客戶既錢再去投資，就屬於資產型企業？

龔成老師︰

如果佢資產價值，可以有效反映佢賺錢能力和質素，就算係一個資產型企業。

例如銀行，佢主要係透過收取存款，再借貸出去，從中賺取息差，這類就是資產型企業。

又或者，一些公用股好似港燈(2638)，佢係用佢發電廠去發電，以賺取電費，這類都係資產型企業。

但有些企業，表面上係資產型企業，實際上未必完全係，所以點去定義，會有少少複雜。

我課堂上，會有更詳細解釋，如何去分辨資產企業。但你可以簡單咁理解，其資產價值能有效反映其賺錢能力，就是資產型企業。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18621-Q18640）

Q18621：

你好！有追蹤你fb！睇過你的支持者留言！相信你的善心助人！才敢私訊你！因現在太多欺騙個案了！

我是一位單親媽媽（42歲了）有2個女兒（中六丶中三），多年前剛有左細女的時候…老公便有第三者而離開了這個家

夫家叫我將2個女送（孤兒園），當冇事發生從新行過人生路…如果我唔聽指示便會永遠不理我們⋯還説明（生死不相往來）！

但我覺得錯的丶承擔後果的也不是小孩子丶錯的負責任的係父母，為什麼要小孩成受永遠冇了親人的折磨和傷痛！留住2個女自己照顧成長…我知道日後條路一定好難行.…但我願意承擔責任。

我一日返2份工⋯10:00am-7:00pm做售貨員（$8000冇假放）丶7:30pm-11:55pm做樓面$180日兼職），放工後還要接回2女回家教功課，已經沒有多餘時間返到第三份工了，就這樣過了15年了

大女將快考Dse了（一直成績中上）大有可能入到大學，我想買股票希望可以增加收入！

買了1211（$185）
9988（$221）
700 （$509）

我一直收入不高、還有2個女要照顧，所以好難丶好辛苦才儲到這些錢，但返第三份工真的冇時間再分身了（女兒已沒有了父愛，我不想連咁微小的母愛都比不到女兒

所以我令願睡小啲也要做好家務丶關愛和照顧好女兒，所以希望用股票這方法去（財富增值），求指引丶指教一下，怎樣可以改變生活！！

一日只有24小時丶得一雙手丶想再做多啲丶努力多啲去改變生活，但15年來總是（無論我幾咁拼命向上丶總是吃力也上不到）

沒有其他資產，現住公屋
我也留意到你出的書，我應該怎樣開始看的次序

我現在持有的股，應該點做？中長線持有…會大風險嗎？要轉嗎？轉什麼？

龔成老師：

坦白講，你很堅強，你好勁！我相信這15年不易過，我相信你之後會無過往咁辛苦。

我相信兩個女都會見到你的堅強，這對佢地來說都是一個學習。

首先，你要提高收入，一個人的時間有限，你就算用盡，也不過是24小時，所以，著眼點要在「提高收入」。試下找時薪更高的工作，或從長遠角度去想，怎樣可以有較高收入的工作，不要只著重這刻，而是長遠，不要只解決眼前問題，而是要長遠。

另外大女中六，考完Dse後，鼓勵佢做兼職，就算日後讀大學都要做兼職，例如私人補習，起碼可以減輕負擔，同時令佢明白大家都是這個家一份子，希望大家一同努力。

至於股票方向，我見你買的都是潛力股，這反而令我擔心，這些股雖然可長線，但你唔好太過集中，始終潛力股的風險比一般股票風險較高。

之後建議你平穩增長股，例如盈富（2800）。

恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

書方面，你可首先睇：

《80後百萬富翁》
《股票勝經》
《財務自由行》

之後再睇其他。

我相信你已經過了較難的時期，之後會開始好翻d，加油！

------------------------------------------------

Q18622：

阿Sir , 我係股票班的同學。好想衷心感謝你，你多次提醒我們要著重企業價值，有耐性，不要短炒，以自己的故事激勵我們，用心良苦。

我們最後一堂有好多問題，留到你咁夜，你也一一解答，你真心為同學好，謝謝你。有少少唔捨得，覺得自己未學滿師，課程就完了，對自己揀股無乜信心，不過我會努力溫習，多用企業評估表，將來再請教你。

感激！祝你也早日達成自己的終極目標。

龔成老師：

其實我都好開心，所以我都好願意同大家講到好夜。

保持學習，多溫書，同評估表。

知識要慢慢累積的，你已經行在正確方向，加油呀！

------------------------------------------------

Q18623：

老師，我月供以下，可以嗎？

港鐵公司 4,000 - 2,000
粵海投資 3,000 - 3,000
中國鐵塔 1,000 - 1,000
領展房產 4,000 - 3,000
長江基建 4,000 - 3,000
中生製藥 3,000 - 3,000
盈富基金 8,000 - 6,000
南方A50 3,000 - 3,000
小米 - - 2,000
美團 - - 2,000
阿里巴巴 - - 2,000

龔成老師：

上述都是有質素的股票，基本上是可以的，如果之後想優化，可以加大盈富（2800）的金額，以及加入追蹤恆生科技指數的ETF，長期月供就得。

你上述選股無問題，可長線月供，當然，最好你能夠每月有現金剩，等大市如果出現較大的回落，可以把握機會。

------------------------------------------------

Q18624：

呀sir~你係點訓練自己定力？
同點樣令自己對事更加平常心。

我最近想買270粵海，雖然知道12.x應該算合理區，可以入一注。

但係我就好執著d細價位，想12.3樓下先入，等左兩日又怕自己set得太低，改價做12.66入。

過程中不斷睇，好唔平靜呀！怕自己為左幾百蚊差價，錯過左入手既時機，又怕買貴左少少唔抵。

最後12.66入了，想等12.3再入一手。因為呢隻股派息好，有前景，而且我對佢股價一年內重上13-14有信心。

我反思自己既行為，覺得我唔夠成熟，而且好浪費時間。

希望阿sir教我點樣可以心態更加進步，多謝呀sir。

1211之前聽你講買了，96.7覺得太熱，所以放左。

我而家將舊錢加少少換左做 0270粵海同66港鐵。

因為呢兩隻最近價錢都在合理區，受經濟周期影響少，而且有潛力。
唔知岩唔岩

雖然比亞迪我無等到過百蚊，但都叫賺錢。
多謝呀sir之前不斷分享比亞迪，感謝你。

龔成老師：

當你好集中分析企業價值，好明白自己買入的是企業，佢有無股價，股價多少已經無關。

同埋，有好多時我的心態是「買入後假設自己永遠都唔賣出」，如果你這樣想，你就不會想股價升，只會想股價跌，等你可以買入更多。

你可以做一個訓練：「一個月唔好睇股價」。

如果你停在你上述的買賣模式，只會同香港一般的散戶一樣，「贏粒糖，輸間廠」，所以，你要著重企業，唔好著重細數，唔好太急賣出優質股。

粵海（0270）港鐵（0066）有質素，現價合理，可長線。

比亞迪（1211）都算幫你賺到錢，都唔錯！

------------------------------------------------

Q18625：

你好，近排巴菲特先生破例大手買入ipo, snowflake 。之前老師講過ipo定價會比真實價值為高，而巴菲特先生更以高於定價買入。再者snowflake過往依然係虧蝕嘅狀態。

請問snowflake投資價值高唔高？
可否分析一下呢？謝謝

龔成老師：

Snowflake，佢主要提供企業可在雲端上儲存，以及一些管理資料的數據倉庫服務。

佢的強勁之處是增長快速，客戶增長快速（佢主要做公司客，如Sony），相信有一定的潛力。

不過我無特別研究這公司，但相信巴菲特睇好雲端的長遠發展。

------------------------------------------------

Q18626：

老師，想再問一個問題，我預計今年12月前會存到第一個十萬，而且準備2022年中移民。

因為有兩年後移民的打算，所以未必能把資金放長線（3年以上）請問老師仍會建議我月供盈富/港鐵的股票嗎？
我的目標是10年後可以不用打工，靠投資賺取生活費
謝謝老師

龔成老師：

你都可以月供，但就不能太進取，始終這只是一個中線投資，因此，你有兩L點要注意。

第一，唔好全部資金去月供，要部分月供，同時留現金。

第二，一定要供一些穩健、優質股，盈富（2800）與港鐵（0066）可以的。

你到左2年後，安頓好後，到時先再進一步開始10年的財務自由目標。

------------------------------------------------

Q18627：

想問下若果想分散風險揀買etf還是月供股票會比較好？

因為我現在是一手手甘買股 但岩岩出泥做野 一手手甘買甘多都會有點負擔 不過現在又吾太方便沽出拎反甘多現金

我有睇過一d有關月供股票的影片

但比較concern的是每月固定日期甘入有時明知係高位個價都好似要局住買 聞說係可以改組合作調整 但若果成日都調每次收手續費都感覺不太化算

而且大家月供股票係米若果d股票跌吾可以沽出收翻現金先？明知已買入的股票個價係甘貶值都無得做止蝕？

基於以上想法
我不太肯定會不會趁價低買不同類型的ETF 例如追蹤科技股加其他指數股

再定期入正股甘既投資方法會比較好？
etf就長期keep

正股就留dd keep住等十幾廿年 有d岩既時機就沽出

不過d個方法我可能不同類型的股票只可入一兩手
所以想請教龔sir既睇法 謝謝

龔成老師：

我會建議你月供指數基金，例如盈富（2800）+安碩恒生科技ETF（3067），長期進行。

只要你每次月供的金額不太多，就算這刻好似有少少貴，多年後睇翻，可能是平，月供的作用，除了可以平均買入價減少我地的風險外，另一個就是減少「人為主觀的因素」。

好多散戶以為自己好勁，但其實不是，利用月供如用程式般進行，往往有更好的效果。當然你不用所有資金都用供，可以每月同時留少少現金。

當見到大跌市，就可以動用現金，平價買入優質股。

------------------------------------------------

Q18628：

成哥，我係分析時候有小小野唔明，關於巴菲特所講ge自由現金流折現法，例如2382同669，需要兩個唔同行業要比較唔係咁岩，但我重點想問

因為e個方法著重自由現金流，2382比669多自由現金流，但計完到最後，兩間ge市值除以股數，遠遠低於現時ge時值

所以想問下 係米我當中計得唔太岩定係有野未了解到，假設兩間企業增長率同折現率風險都唔高，都差唔多水平，但就因為低現金流，咁因為咩原因？

因為兩間企業我都認為優質，但計唔岩數

感覺兩間企業過千億市值，但本身自由現金流近年都小，e重情況我唔識點樣計得比較準確d

龔成老師：

其實，估值有好多方法，你唔好只用一種方法就認為是答案，因為，估值其實只是一個概念，並無絕對的。

我一般以多種方法同時進行，原理就是以不同角度去估值，這就更立體。

另外，每間公司的折現率計算並不一樣，因此你不能這樣比。

同時，你要「預計」之後的現金流，並不是只集中過往數據，這將會成為影響你能否計算正確的關鍵。

------------------------------------------------

Q18629：

老師，follow老師都有兩年時間。好感謝老師，令我在比亞迪，小米，中生制平宜區都有入貨。

而家升到貴區，反而有d失落，因為入得唔夠多貨。而家要發掘其他潛力股

暫時得金界3918 有值搏率(8蚊均價)。其他潛力股(853微創, 2168佳兆業, 3316濱江, 6186飛鶴)都合理區中上或頂部，買唔落手。

唯有再等下機會。
老師加油

龔成老師：

「而家升到貴區，反而有d失落」，這證明你已經是一個價值投資者，你的想法正確，我自己都是，持有的股票，並不想股價升，而是希望股價跌，等自己可以不斷入貨，將貶值的現金轉成優質資產。

我地投資，唔好心急，耐心等合理價先入，金界（3918）有質素的，的確可以留意下。不過股市近期波動，我建議點都要有一定的現金在手。

------------------------------------------------

Q18630：

龔sir，想請教下你少少問題
我依家同屋企人一齊住

今年疫情見到樓價有所回落，如果啱就想買樓，短期3年內租出去先以後有小朋友先再自住或者換樓，係咪唔應該買45年樓齡以上樓，如果3年後要換樓接近50年樓齡樓會唔會比較難賣出？

同埋如果油尖旺區同觀塘區邊區會比較值得投資？我地預算係430-500萬左右，唔該曬龔sir

我係今年年初無意中關注咗你facebook，覺得你好好不停耐心解答大家投資問題，都學到好多關於股票知識

好有正能量
我都開始買你嘅書來睇

龔成老師：

你的確可以把握樓市下跌機會買樓，先出租，後自住。

觀塘都有投資價值，但就未算最好的地區，不過，你都可以考慮，始終商業區開始成熟，加上長遠啟德的發展。

45年是較高的樓齡，你要睇翻當中的維修問題，成本等，以及日後你如果賣出，到時的樓齡問題。最好當然找翻D樓細無咁高，例如30年會較為接受。

------------------------------------------------

Q18631：

龔成你好，想同你請教下銷售手法。

之前你po文提到，想事業有突破，可以試下銷售工作，例如地產經紀，我自己都心思思想試。之前你有篇文提到兩種銷售手法：

有2個學生做金融產品銷售，一個會hard sell；另一個會幫客戶客觀分析，唔會一味叫客戶買，反而令客戶更信任佢。

我ge問題係，做地產固然有跑數壓力，似乎難免要將唔好ge樓盤講到天花龍鳳；以你經驗嚟講，應該點樣喺呢兩種銷售巧取得平衡呢（等自己良心好過啲）？
謝謝賜教

龔成老師：

其實，我在約20年前，都有短時間做過地產經紀。

一個成功的經紀，是做「配對」。

你並不是將一個不適合佢的盤，強行賣比客，而是幫你的客，找到最適合的盤，只要你做好配對，你的生意就會最多，長遠做得最好。

當然，有時在銷售一個盤時，你可以避重就輕，但唔能夠將不適合佢的盤賣比客，同時，你唔能夠亂講，要將事實講出來，但技巧地包裝。

------------------------------------------------

Q18632：

你好 龔sir 點睇儲蓄保險同盈富基金或美國voo
唔該

龔成老師：

我地理財，要攻守兼備，要做好配置，所以，上述3個項目，都有佢的作用，你同時持有都得。

儲蓄保險是防守部分，這在理財中不是無用，但「足夠」就得，不用過多，餘下資金應該要進攻。

盈富（2800）及VOO，都是有增長力的，你都可以投資，盈富針對中港，VOO針對美國，同時持有可以令財富組合更平衡。這些都適合你長期月供。

------------------------------------------------

Q18633：

龔成老師你好
一直很欣賞你的努力 和無私教導
讓很多人受惠
我仍然在努力閱讀你的書籍中 希望能增加投資知識
但因為學習中從來沒有接觸投資/金融方面

所以很多地方在看起來都較難明白或記住 請問有沒有什麼地方或你的書藉能先教入門學習這些知識呢？

另外在較早前曾以53.15買入1手0005
後來認識你後知道是錯誤的決定
本想在股價回一點的時候再賣出
但它一直再下試谷底⋯⋯

現時已不斷跌 而且不利因素還有很多
本人28歲
留作收息股也並不適合
你認為現階段賣出換作另一增長股適合嗎？

我明白老師教導投資其中一樣最重要的是耐心
但眼見它虧損快約50%
又沒有升值潛力
收息股也不是我這歲數的選擇

所以想忍痛放掉
雖然價值並不多 才一萬多元
但老師教導 錢是自己的
要著緊才是

我也想早點學會自己捉魚！
希望龔成老師能作出指導
謝謝

還有一件事
本人是一位護士
雖說是一種專業
但除此以外

我完全沒有其他技能和特別興趣
我也很想學習老師增加收入
但完全無從入手

好想早日財務自由
請問老師有無啲咩建議？

龔成老師：

你可首先睇：

《80後百萬富翁》
《股票勝經》
《財務自由行》

之後再睇其他。

如果你想財務自常，但無其實專業或做生意的技能，最好的方法就是利用投資，一邊打工，同時努儲錢，利用投資都可以將資金滾大。

你應該大量增加你的投資知識，努力研究股票，都可以幫你財務自由。

你28歲，匯豐（0005）並不適合你，你等佢上翻多少少，應該轉其他。

匯控（0005）賺錢能力與增長力的確弱左，但又未去到完全無質素，近期股價受壓，除左佢經營環境影響，佢派息問題都是因素，因為市場一向理解這股是「收息股」。

我從股息角度分析這股。

相信長遠是收息股，但股價增長就有限。可以先從佢近年唔派息及財務情況分析。

首先睇翻佢財務數據唔算話特別差（但當然不好），近期停派息，主要原因係接獲英倫銀行透過審慎監管局發出的書面通知，要求匯豐取消派息。

所以，在派息方面，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線來說，並不是零質素（當然，質素比過往差左）。而銀行業的賺錢能力，已不及過往年代。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題（同時，不能集中在銀行股）。

記得，唔好佔比太重就得。同時明白這只是收息股，唔好對股價有太大期望。同時不能持有太多，記住，這股唔建議持有太多。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

------------------------------------------------

Q18634：

老師，我買你的書，由0慢慢開始學習，看完有些地方想問問

《大富翁致富藍圖》中提到現金換小資產，小資產再變大的

因為書是2017年，現今不論車位、樓價都處於高位，想問

1）公式還可繼續套用嗎？將現金換資產

2）之後的資產還是會不幾升值嗎？還是升值的潛力，差距而不再？

3）我是身處澳門的，澳門樓價太貴，買樓必須借貸，但如果將澳門買樓的錢（首期）放回大陸（新會）自己的家鄉買樓投資，同樣將現金變資產，可以嗎？

新會的新樓，一百萬葡幣左右便買到
不過每月要交水電管理費，亦不打算租出去，如果買，或者買埋車位，約二十萬人仔一個
所以買了，會是消耗性的

但升值潛力比澳門高嗎？

自從睇完你出的書，我打算幫屋企人投資收息股（58歲），收息股比放銀行存款高息，諗住先試10萬，如果分散投資，那隻股票和什麼價位入市，才比較好？謝謝老師！

1.盈富基金 （1500股）首選
2.中電（500股）/中華煤氣（3000股）
/港燈（4500股）/粵海投資（2000股）
3.陽光房產（6000股）/領展房託（400股）

龔成老師：

1）放心，《大富翁致富藍圖》當中大部分的方法，只要是大方向，原則可用，但我地要有配合現時的分析技巧。

「小資產追大資產」，這是長遠正確的，但要考慮當刻情況去運用。

因此，我地要分析資產的平貴度，不是盲目去用，車位的確不平，因此當我地運用時，可考慮用股票先。

2）資產長遠仍會不斷升值，但你要有選資產的能力。

尋找有潛力，能長遠成長的資產項。

3）你最重要是分析「利息成本」與「回報」之間，有無正差距，如果利息低，而你租金回報高過利息，就可以考慮。另外，你要同時分析升值的可能性，升值都是回報的一種，但就有較大的不確定性。

如果計好這些後，你有正回報，就可考慮進行。

投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

但要留意，現時股價只是合理，未到平宜，因此買入時宜分注，同時不能用盡現金。

------------------------------------------------

Q18635：

老師你好，我之前都係享樂為主，冇點投資，2018年開始接觸股票，當初都係買收息股為主，我手上有15000股939，均價好高，差唔多7.2

依家建行跌到新低我應唔應該再買黎溝下？

最近又$9.27買左1177 8000股，又應唔應該再買溝下？求指點

龔成老師：

建行（0939）本身不是零質素，佢有一定的規模，在全球都有網絡。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。

而長遠，會慢慢穩定的，不過，增長力不強。

唔建議你加注，你加注只會令新資金「投資的回報率只得到股息」，你應該善用新資金去投資其他更有增長力的項目。

至於中生（1177）有質素，你可以持有，$8以下先合理，你現價唔好心理加注。

------------------------------------------------

Q18636：

你好，想問下2018前境如何？49蚊有貨可以繼續等下嗎？

還有想問12/1972邊隻更值博呢？
謝謝

龔成老師：

瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別。

你如果持貨不過量，無問題的，這股可以長線持有。

至於恆基（0012）、太古地產（1972）都是有質素的股票，兩隻都可以長線，現價都合理。如果想較平衡，就選恆基。

------------------------------------------------

Q18637：

你好，我在2019年年初高位開始買股票，持有以下股票成本77萬，現在蝕左18萬，期望在兩三年內套現置業，現在狀況應否套現部份股票止蝕？應選哪隻股票套現？

0012
2388
0066
435
737
6823
659
778
2800
823
1928
1038
1398
0005

龔成老師：

如果你2、3年內要置業，其實要睇下邊D股票，需要賣出，或等上翻D賣出。

我地持股的原則，不是買入價，不是賺蝕。而是「優質」、「增長力」，有質素的股票你可長線，無質素要賣，質素轉弱要減。

上述的銀行股，要較優先賣出，你可以等上翻D就分段賣。中銀香港（2388）可留。

之前，你要考慮賣出增長力較一般的，新創建集團（0659）、灣區發展（0737）。

------------------------------------------------

Q18638：

你好,請問老師點睇1611及2899
謝謝

龔成老師：

火幣科技（1611）無特別研究，但見佢的生意好普通，幾年都無增長力，加上中期業績出現虧損，投資價值唔算高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

------------------------------------------------

Q18639：

龔成老師您好！感謝您一直以來的分享及鼓勵，讓我也跟著老師不斷加強自己對學習的熱誠，非常感謝。

想請教一下有關最近市場上追蹤恒生科技的幾種ETF。
3032及3088在誤差率及管理費均較3033的為好，但以成交量相比，3033的卻遠勝3032及3088。

在此情況下，若以長遠的投資角度而言，該選擇成交量較多的好，還是以低誤差率及管理費作優先考慮為宜？謝謝！

龔成老師：

我地一般會考慮管理費及誤差率為先。

當然，成交都是一個因素，如果成交太少，買賣差價可能較闊，而成交活躍，一般都反映該基金現時的價格，能夠有效反映當中的真正價值。

------------------------------------------------

Q18640：

老師你好，請問我如果買股每三個月買一手1038或2800好嗎？因為資金有限，你提及到啲股我買吾到咁多，澳門月供股票手續費較貴，所以想每三個月買一手作投資，謝謝老師！

因為我吾太識計，我見1038股息較好

同埋我害怕長和系涉及政治因素，似匯豐

龔成老師：

如果手續費較貴，你的確可以自行分注，每隔幾個月入一手。

盈富（2800）無問題，你可以每隔2、3個月入一手。

至於長建（1038），由於是單一股票，因此佔你組合的比例，唔應該太多，所以買入的速度應該比盈富較慢。

我地要建立一個平衡的組合，因為所有企業都有自身的風險。

長建是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17561-Q17580）

Q17561：

你好 龔成老師 我是一位大學一年級生 之前閱讀過你幾本著作後 嘗試學習投資 現在每個月的兼職有$6000收入 自己有一份每月$2000的儲蓄保險 所以想用剩餘的$4000作投資

自己想比同年的人優勝 所以現在接觸投資 希望盡快有一個可觀的資金 以便我可以畢業後創業 自己亦傾向長期持有股票 因為覺得自己不適合投機

現在持有的股票分別有：
1137 @7.95
0006 @42.8
1099 @18.5
1810 @24.9

另外都有留意 幾隻股票 分別是： 1638 1772 2382 1199 同 1766 想請問你會從中推薦哪幾隻股票 謝謝你

龔成老師：

你的心態正確，你要保持一份進步的心，要同年的人優勝，這是成功的因素。

而你的投資方向同樣正確。

現時你持有的，都是有質素的股票，基本上可長線持有，不過，電能（0006）只是收息股，則未必適合你投資。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

舜宇光學（2382）適合你投資，這股有質素，現價合理區中上部，你可留意。

贛鋒鋰業（1772）都可留意，這是潛力股，不過風險度就比舜宇光學高，投資要控制注碼。現價略貴。

------------------------------------------------

Q17562：

你好老師，我想問財務自由的問題，

1）如果要月入2萬，應該要多少本金?

2），如果到了财務自由的本金，但只是4至50歲，應否轉投收息股?

3）如到7至80歲時，收息的購買力會否，不如現在?

龔成老師：

1）假設每月要收息$2萬，一年$24萬，以6%收息股來計算，就要「$400萬」的本金。

2）對，我地會用「先增值，後現金流」作策略。先將財富增加左先。

3）對，所以最好投資一些「股息會增加的收息股」，這就可以對抗通賬。

------------------------------------------------

Q17563：

你好呀, 想請教下你. 希望你有時間回覆我. 我36歲, 同先生2人月薪得4萬, 有15萬股票(月供+整手)另有25萬現金, 想係40歲前獲得100萬, 想問下有咩方法.

本人持有股票如下
1)0005 (匯豐控股) 1600股+191碎股, 現在已停止月供, 在55蚊入1600股
2)883 (中國海洋石油) 在11.2 入了4000股
3)其餘的都是月供 (供了一年 每月5000元)

組合有 006 (電能實業)290股, 823 (領展房產基金)有384 股，每月$2000 2800 (盈富基金)389股每月$2000.

想問我咁樣去投資有無問題, 同埋點樣再可以滾大筆錢到我目標. 盼覆. 謝謝!

龔成老師：

匯豐（0005）暫時持有住先，但預佢只是收息，增長不強，唔好再加。

中國海洋石油（0883）的質素，同樣不算好高，只是商品企業，持有可以，但未必值得增持。

至於月供的，都是有質素，但你要明白電能（0006）只是收息，無乜增長力。另外兩隻無問題。

如果你想加大組合增長力，就要調整策略，換入一些較高增長力的股票，當然，風險度會比原本略有增加，你可以睇下點平衡。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高少少。你可以等回少少先入，又或月供。

------------------------------------------------

Q17564：

我係進階班學生，想問下隻1772, 819. 我今年年初19元買了1772, 35元沽出. 之前回到24,25便沒有買入. 因這隻股份只上市一年有多, 只得有一年的年報.

所以不能從年報當中找到有多資料. 但今年公司和寶馬公司簽訂了5年合約, 金額約每年49億左右. 已經等如前一年的收入.

今年合理價是31.2元, 安全邊際下20%-30%, 21.84-24.96 就是便宜區, 這樣理解我有沒有錯?

819 基本面都唔錯, ROE 5年都過20%, 收入和每股盈利都有增長, 這隻股合理價是多少? 這兩隻股, 那一隻增長潛力會較好?

龔成老師：

贛鋒鋰業（1772）在進階班有講過，這是潛力股，但估值較難，分析時的確資料較少。由於上市年份少，我地較難有比較的數據，你可以用一個預測盈利，例如3年後的盈利作基準去進行估值，這會較為好。由於不確定性較大，估值出來的數據只能參考，這股$3X合理區，如果要平，我會去到$20以下，這樣能有效反映風險。

至於天能（0819），有質素與增長力的，但企業規模唔算大，加上業務存有不確定性，因此這股估值時會較保守，唔建議太大注。你預現時在合理區中上部。

兩隻都有增長力，我相信贛鋒長遠發展會略好。

------------------------------------------------

Q17565：

老師 謝謝你.我已入手 1448. 868 1177

想問問. 868 9蚊入.1448 ： 7.1入. 如何

龔成老師：

上述持有的都是有質素的股票，可以持有。

信義玻璃（0868）買入價合理，這股有長線投資的價值，無問題。

至於福壽園（1448），買入價略貴，不過這股有增長力，如果買入的貨不過多，無問題，市場認為這股「貴得有道理」。

------------------------------------------------

Q17566：

老師，我睇完你幾本書之後我哋有決心可以買到樓 仲可以喺30歲之前買 簡直覺得充滿希望

我分開咗幾個部份去投資同埋儲錢

由於我計劃喺2022年可以儲到一筆錢上車

但係今年嘅六月開始做咗$5000嘅月供股票

我嘅問題就係：

1.繼續做月供股票到2022年
買樓嘅時候攞返出嚟用，會否有少許增長？

2.定還係而家就暫停月供股票會比較好，係咪因為年期太短同埋扣除費用都唔夠cover個本金

老師再次多謝你
我係一個90後從來都冇諗過可以買到樓 睇咗你嘅

Facebook同埋睇咗你幾本書之後開始改變左我嘅人生方向同思維 我同我嘅未來老公而家都充滿希望

真係好多謝你
希望將來書展或者其他你嘅講座可以同你影返張相

萬分感謝

龔成老師：

1）由於你目標是買樓，因為這是較前的目標，你月供都要配合這目標，月什的股票不能太進取，同時要留有一定現金。

所以，你可以月供一些較穩健類的股，增長力不會高，預佢有基本的。你可以考慮盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

2）你可以部分資金月供，部分儲現金，這是較穩陣的方法。當然，你要計清楚手續費等，是否值得供。

------------------------------------------------

Q17567：

老師，2013 ok 嗎
我6.85有貨

有甚麼高見

龔成老師：

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁，你有貨可以長線持有，但就不建議太大注。同時，由於估值較難，業務變化大，因此，唔建議心急加注。

------------------------------------------------

Q17568：

6978永泰生物前排$15.4買入，200新濠14個幾買入，可以繼續等？唔該曬

龔成老師︰

永泰生物（6978）為國內細胞免疫治療生物醫藥公司。佢主要從事Ｔ細胞免疫治療的研發及商業化，當中包括實體瘤治療及血液癌症治療。

此股唔敢話佢無潛力，但由於佢上市不久，要些時間才能見到真章。佢未有盈利，但市值到65億，很大程度上高估值係來自對佢"未來"估算。

若然藥物研發成功，可以好賺錢。但失敗，回報則變零。此股算有危有機，你可以投資，但只可小注。

至於新濠（0200）中短線走勢我估唔倒，但長線發展是正面的。但你要預佢增長力唔會好強，如果你持貨唔多，繼續持有係無問題。

------------------------------------------------

Q17569：

老師你好，我有人民幣大約十萬，幾年前匯率82買入，而家9x，想問應唔應該轉返港幣再投資股票？

龔成老師：

你預人民幣大致都是這個價，好難有大突破。

所以，從長遠來說，都要投資其他工具去進行增值，投資港股都是其中一個考慮方案。

------------------------------------------------

Q17570：

龔成老師您好, 近排經朋友介紹 想向你學習
大家同為80後, 我覺得你好犀利 身家過千萬

我而家已經40歲, 感覺好似浪費左人生十年咁
因為我對於資金係非常保守既人, 可以話唔敢投資股票/基金

以前跟人買過少少股票, 蟹左幾年之後 重返買入價就放左，自此之後就沒再買股票

所以我一直以來都係靠儲錢 不斷做定期賺息
直至到近期, 開始對香港未來感到迷茫
有考慮應否BNO移居英國的問題

所以更加不敢在香港亂咁投資
但係近來定期利率越來越低息

龔成老師, 咁我應該點做好呢? 應否把部份定期資金轉為其他投資策略呢?

我的背景如下:

目前單身, 工作穩定月入3萬, 每月大約儲到1.2萬
每月基本開支是屋租水電約1萬+不定期支出 飲食交通娛樂

我的資產大約有170萬, 分佈如下:
美金定期約12萬 (約等值港幣 92萬)
人民幣定期約33萬 (約等值港幣 37萬)
港幣定期約30萬
流動資金約港幣10萬
另外有MPF 48萬

萬分感謝老師的解答

補充多少少, 目前未決定去唔去英國, 至少未來這2-3年都會留係香港再儲多D錢先, 我希望可以用我現有的資金, 改變投資方針, 獲得更高的回報

龔成老師：

由於你有可能過英國，但未落實，所以在理財中，宜保守少少，始終如果過去，無論在部署上，又或到時進行中，你都要有現金去生活。所以，你這刻應該持有較多現金。

如果少未來這2-3年都會留係香港再儲多D錢先，都可以作一些中長線的投資，以3年為目標。投資就唔會太過進取，同時以基本的增長為主。

你可以考慮將$30萬-$50萬，投資平穩增長股，盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市波動，你要分注投資，慢慢用資金，唔好急，同時，這$50萬要一邊投資一部分留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17571：

你好，新手想請教你
1728正通汽車買入左

睇到佢要配股
都睇唔明啲日期，配股目的等等
可指教一下嗎？

龔成老師：

正通汽車（1728）計劃以先舊後新形式配售最多2.45億股，每股1.09元，由於配股價比之前的股價低，加上這動作會令總股數增加，每股價值減少左，自然下跌。

佢話所得款項淨額估計約2.63億元，用作一般營運資金。

這企業本質一般，業務有向下情況，不過現價就唔貴。這類股唔建議持有太多。

------------------------------------------------

Q17572：

大師您好，新手玩股票大約一個月，請問點睇1156, 9906, 6820, 302, 6808 同710？

呢啲買完之後都大跌，係唔係應該止蝕徹退？🙏

1156 $0.57入一手
9906 $2.5入一手
6820 $3.44入一手
302 $3.47入一手
6808 $12.54入一手
710 $2.52 同$2.47 入各一手
請指教大概咩價閃人？

龔成老師：

我地繼續持有一隻股票與否，最重要睇「質素、前景」，買入價只是一個心理因素。

另外你要記住，買股票就是買企業，一定要從企業長期發展去分析。

CHINANEWENERGY（1156），質素一般般
宏力醫療管理（9906），質素一般般
友誼時光（6820），可持有，但要留意股價上落較大
中手游（0302），可持有，但要留意股價上落較大
高鑫零售（6808）有質素，可持有
京東方精電0710）質素中等。

------------------------------------------------

Q17573：

你好成哥，好開心可以睇到你個page 同買左你d書之後，買股票開始有小小方向，想請教一下你：

本身32歲，月入$33K，每月可儲$18K，現金有5萬，股票有大約10萬

1. 之前月供開005，大約有2000股，平均價約6x，而家已經停左，請問應該賣出部分去買其他股票嗎？

2. 我想係3年內儲到$100萬，應該點樣月供股票有機會達到目標？唔該晒！

龔成老師：

1）這股只是收息股，其實並不適合你的年齡，因此唔應該再供，原有的貨暫時持有住先，到香港經濟好轉後，佢個價上翻多少少後，可轉其他股。

你現時可以供一些較有增長力的股。

2）你要加大儲蓄先有機會做到，因為3年不是一個很長的年期，投資要好高回報先做到。所以，你首先要從開發收入，同時加大儲蓄方面著手。

另外，你都可以加強投資潛力股，但這類的風險會較高，你要自己平衡風險。

阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性較大，同時風險大左，你要自己平衡。

同時，由於潛力股要求你有一定的投資知識，建議你多增加投資知識，在選股、企業估值、投資時機上落功夫，對你長遠財富有好大影響。

現時大市波動，你除了月供外，要同時留一定的現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17574：

你好 龔sir 我之前有買股 但依家冇收入 冇得返工 有幾個股票都係好高位入貨 我應該等再低位入貨？定高位賣小部分？如何可以快速穩陣搵到多d錢？要投資咩股好？我仲有三萬左右現金可以投資

788 1.78
939 6.0
1972 18.58
1870 0.495

龔成老師：

第一，你現時無收入，要留一定的現金，最好唔好投資。

第二，過往我做了10年銀行與證券行，見了大量客的買賣成績，發現短炒者是輸得最多的一群。

上述的股，除了益美國際控股（1870）外，其實都可以守住先。

如果你有資金利，想投資，建議投資一些較穩健的股，例如盈富（2800），會較適合你。

------------------------------------------------

Q17575：

老師最近我多聽你的分享。我想聽你建議月供 盈富基金3000元。但我想知道如果幾年後。

我想分次提取出來。再換其他股票。如何處理月供購入剩下的碎股？

有無銀行係可以處理到的。因為我怕處理唔到剩下的碎股。所以我仍未決定去銀行開月供盈富基金3000元

如果處理唔到剩下來的碎股。
我便會有損失

龔成老師：

盈富（2800）可長期進行月供，你可以開始。

至於碎股，唔需要擔心，第一，碎股都可賣，只是比正股價低少少，可以1%、2%。其實無所謂，影響好少。

另外，有些銀行比你月供得來的碎股，以正股價出售，例如中銀，不過你問清楚先。

------------------------------------------------

Q17576：

你好，想問下點睇 9906 1415 947 719呢4隻股票？

龔成老師：

宏力醫療管理（9906）質素中等。

高偉電子（1415）都不差的，但業務有點波動。

摩比發展（0947）質素中等，增長力不強。

山東新華製藥股份（0719）都有增長力，不過規模較少，唔好太大注。

------------------------------------------------

Q17577：

阿Sir，有啲關於海外投資嘅嘢想問問你，希望你可以幫我confirm一下我嘅概念。

事緣我媽媽同我講起投資問題，佢話屋企可以借錢畀我做首期賣樓。

我話，而家我嘅人工不足以供樓，所以未有打算，加上香港局勢太亂，又擔心國安法對於個人財產會有影響，買香港樓、擺錢喺香港都有被充公嘅隱憂。

所以我話，不如我借屋企一啲錢，放去海外做投資，例如開離岸戶口放去美國買美股。

但係我阿媽一向對投資股票好抗拒，成日都覺得買投資保險或者基金好啲。

加上阿媽又話，美國量化寬鬆得好犀利，瘋狂印銀紙去頂住個市，唔化算。

我記得阿Sir你教過，投資性保險、基金，去到最尾都係一個數字，唔係資產，所以嚴格嚟講只可以算係防守性投資，股票、物業、的士牌，呢啲有價值，獨立於貨幣價格以外，先至係真資產。

而美國印銀紙，根本係十幾年不斷做嘅事，而影響範圍不限於美金，因為世界上大部分貨幣都係美元債本位，美元系統倒塌嘅一日，全世界都會陪葬，起碼銀碼上會一齊出事。

我想問我呢啲投資概念啱唔啱？

當然，如果我拗贏咗屋企，將資金放去海外投資美股或者其他工具，分段入手去減低高位/貴價入、先了解企業/工具性質再考慮買，就基本啦。

仲有冇其他注意事項？

龔成老師：

你的概念方向正確，但又不用過份擔心，美國不斷印銀紙，而全球的貨幣系統，都以美元作為中心，所以美元只會不斷貶值，持有外幣、港幣、現金都無乜用，而「資產」則不斷升值。

另外，香港的情況，都唔需要太過擔心。但如果你擔心，可以買美股，或投資一些美股的ETF，追蹤一些美股或全8球的股市指數，其實已好穩健。

你家人只擔心你風險高，而你擔心香港。因此，只要你投資一些外國指數基金，已同時處理到這兩個問題。如果有選股能力，就可投資美股。

------------------------------------------------

Q17578：

老師你好！想請問1093和1177合理價是多少？兩隻股票最近都有送紅股的舉動，合理價應該怎樣調整？還有送紅股其實有什麼作用？

0823股價回落了不少，我手上有貨平均買入價約74蚊，因為最近股價一直下跌所以我入多了貨，但比例已經佔我現在持有的股票的四份一。現階段應該繼續掃貨嗎？約60蚊的水平算是合理或是便宜嗎？

另外，我替我媽媽在約60蚊的時候買了0005，現在全成了蟹貨，股價更加每況越下。

老師說過企業質素不變可以繼續持有，但0005連續兩次不派息，現價40蚊不到，要重回60蚊水平還有可能嗎？還值得繼續持有嗎？謝謝！

龔成老師：

中生製藥（1177）之前進行了2送1紅股，因此股價自然下調，新的合理區大約在$8以下（我同時調整左佢的估值）。

至於石藥（1093），你預現價在合理區中上部。

送股的計法，例如2送1，調整就是（2÷（2+1））=0.67，例如中生製之前的股價$15，新的股價會調整至$10。

領展（0823）有質素，但你預中短期都會較弱，要長線。這股$60是合理區中下部，已經可以分注投資。

至於匯豐（0005），賺鐵能力與質素都有向下。你暫時只能視佢為收息股，增長力唔好有太大期望。如果想組合增長力提高，可考慮等經濟好翻D，佢股價上翻D時賣出。

------------------------------------------------

Q17579：

老師，麻煩你，已有一手1038，買00823，1972，會否唔太好？如果只選一隻（非月供），邊隻好d，現價應該ok?

另外，港交所，阿里同騰訊，現價如一手買，仍貴，但如果去到合理價，你會建議邊一隻？都係一手

1211去到咩價可入（一手買）
現時一手買，又冇邊幾隻可推介？

龔成老師：

長建（1038）可持有，這股要時間先慢慢向好。至於另外兩隻，都是有質素的股，都有投資價值，領展（0823）這刻的投資值博率略高。

至於港交所（0388）與騰訊（0700），兩隻都好質，要選好難選，如果你想增長高D，就騰訊。

另外，比亞迪（1211）在$8X是初步貴的水平，如果一手手入，較好的價位是$70以下，同時要小注分注模式進行。

------------------------------------------------

Q17580：

龔sir 你好,今次亦係問返投資組合，希望吾會麻煩到你

現在計劃左既組合
水桶1
1211 (10%) 等回先買，未有
1177 (10%) 等回先買，未有
1810 (10%) 等回先買，未有
XXXX(15%) 計劃中

水桶2
1928 (10%) 少量，分注進行中
788 (10%) 少量，分注進行中
823 (10%) 少量，分注進行中
9988 (10%) 等回先買，未有
2800 (10%) 等回先買，與月供一同進行

水桶3
941 (5%) 已有

現月供2800, $5000一個月
(現在90%現金，10%股票)

想問下2013, 3319同1833其中一兩隻加入組合，當部份水桶1投資 (15%)

2013 開始有盈利，雲業務有前景，但競爭不少。想問下現在PE太高，如果要考慮，等PE回落到30,是否相對合理？

3319 每年盈利有慢慢增長，以前抽新股有抽過，但平手就走左。
現在 P/E 42 太貴，如果要考慮合理價是否P/E約20-25,而平價在P/E 15?

1833 雖然未有盈利支持，但認為網上醫療有前景，想問$80 以下是否合理價 可考慮？

小弟知道大部份股票相對貴，亦不想太貴買入未算合理既股票，會睇住書，慢慢等機會。謝謝

龔成老師：

你計劃的水桶分配比例，基本上無問題，同時當中都是有質素的股，可以長線。這個方向可以進行。

當然，部分股現唔平，你投資時要注意。

但同時，永遠等跌先入，又有可能入唔到，因此，你可以利用策略，例如先小注，等跌先正式入，這樣可以確保就股股價向上，你都有一些貨在手。

至於想加入的股票，你可以考慮平安好醫生（1833）、雅生活服務（3319），這都是有質素的股，同時實際業務在不斷增長。

平安好醫生長遠有發展的，潛力股，去翻$80當然最好，但如果去到近$100，你都可以考慮。

至於雅生活服務，現時在合理區頂，其實可以小注慢慢入，入貨後等跌再入。由於佢有增長力，可以調高少少估值。

等機會是大方向，但都時，都要有一些平衡的策略。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。