【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19321-Q19340）

Q19321：

阿sir 我係你舊生！最近嘗試對幾隻新經濟股進行估值，但面對以下困難：

1. 多隻股票因是半新股，財務數據不足
2.有些仍然處於虧損狀態
3. 市盈率超高，不知如何衡量

另外遇到一個問題是找行業市盈率。阿sir 提過網上的「同行比較」包括範圍太廣，但有時又不知道哪幾間是真正的同業，因此無法找出行業市盈率作比較。

阿sir 可能會叫我先選一些簡單的公司作練習（例如功課六福），但因為想買入一些有潛力的新經濟股，又不想每次麻煩阿sir 給意見，所以想自己先嘗試。煩請阿sir 有時間指導一下，謝謝

龔成老師：

1）半新股的確有這個情況，所以我自己都會保守D，或等佢上市一段時間後，有更多數據，會較好。

2）這類股要睇將來的發展，如果這刻是處於投資期，虧損都是正常，而投資者分析時，就會建基於將來的業務與盈利，多用將來的數據分析。

3）同上一點一樣，如果是一些業務增長快的股，你用過去數據計市盈率無意思，要用將來，預期的數據去計算先得。當然，估值會較難，同時唔會一定準。

至於行業問題，你可以睇一睇佢自己或同業的招股書，一般都有行業分析的，佢可能會講述行業情況及競爭對手，就可以從中找到對手。另外，你要以「消費者」的身份去想，有那些產品會選？這就是尋找對手的方向。

------------------------------------------------

Q19322：

Hello龔成老師，我睇緊你嘅有關50隻優質股嘅書，我有個投資嘅問題想問，就係公司年報顯示股東嘅淨利潤增加，嗰年股價就會上升？多謝！

龔成老師：

這是一個複雜的問題。

我地買股票，就是買企業，企業賺錢，企業價值就會上升，股價自然上升。當盈利不斷增長，股價同樣會向上。

因此，在簡單的概念，盈利向上，股價向上，這是有關係的，但不是一定。

因為企業的價值是長期的，我地不能只睇一年的情況，如果佢今年盈利跌，但預期之後會利好，都可以股價向上。簡單來說，我地買企業，就是買佢往後多年的情況。除了盈利外，仍有好多野要分析的。

------------------------------------------------

Q19323：

請問9988，1177可以咩價入？
3690、388、1299點呢？

龔成老師：

阿里（9988）面對內地監管可能收緊，因此風險度增加左，最大的影響在於螞蟻的貸款業務，這亦是中國叫停上市的其中一個原因。

因為這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同議一些監管方法，以及找到合理的賺錢模式，你預阿里$250以下是合理區的頂位，這股可長線。不過，中短期會波動。

如果有貨，可持有，但就唔需要太急加注，如果未有貨，現金足，可以這刻小注，之後跌1成以上再加注。

中生（1177）出左業績，比預期差，所以股價都有所回落，都是正常市場情況。

不過，又唔需要太過著重短期業務，一間企業中短期業務總有變化，都好正常，最重要是睇長期。這刻長期分析，又未算差，整體質素無變，長遠仍是有發展的。當然，仍要多觀察之後的業績，先有更立體的情況，但暫時見唔到核心改變。

佢由之前的貴，去翻現價合理區中上部，現價又未到大手時機，相信中短期仍波動，要有心理準備，但長遠無問題的。

友邦（1299）有質素，現價勉強合理，都可分注小注。至於另外兩隻，都有發展力，但現價略貴，回翻少少先。

------------------------------------------------

Q19324：

老師 我最近轉了股及加了月供 想問o唔ok呢？
我年齡30 想5年儲到100萬 已婚 1子

股 ～ 6618 500股 ＄117
11 100股 ＄137.8
9988 200股 ＄272

月供
2800 ＄3000
700＄2000
1211＄2000
388 ＄1000

龔成老師：

你持有的股票，都是有質素的，恆生（0011）是收息股，而阿里（9988）及京東健康（6618）則是潛力股，都可以持有，其實你應該加翻D平穩增長股，之後就唔算要增加收息股，因為你年齡仍有增長力的。

我見你供都是都是有質素的股票，都可長期進行，基本上是無問題的。

但要留意翻，現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19325：

咁如果市區物業較細，得200尺左右，但樓齡幾年至10幾年較新，有投資價值嗎？

我怕納米樓將來無價值，而我暫時又只可負擔到400萬以內物業。謝謝老師！

龔成老師：

最好當然在250呎以上，因為這是一個家庭最基本的需要，所以，在價值層面，200呎的樓點都會差少少，或者你找一些樓齡高少少的樓，但又未算太舊，區份唔好太差，去平衡。

------------------------------------------------

Q19326：

6099宜家係入市時機嗎？
謝謝

龔成老師：

招商證券（6099）主要業務包括財富管理等業務，例如代理買賣股票、基金、債券、期貨及其他衍生工具，賺取手續費及佣金。

同時亦有投資銀行業務，為企業客戶提供一站式的投資銀行服務解決方案，包括股票承銷及保薦、債券承銷、財務顧問服務及場外投資銀行等服務。

質素都有少少，但不算好強，因為睇翻佢過往的業務情況，有點不穩定，同時未算好賺錢。業務會較受投資市場影響。

現價合理，但這類股增長力未必好強，唔建議投資太多。

------------------------------------------------

Q19327：

老師，1628你點睇呀？
而家2.8元
值得買入嗎？

龔成老師：

禹洲集團（1628）主要於中國廈門、上海、福州及合肥從事物業開發、物業投資、物業管理以及酒店業務。

佢係新加坡、香港、上海、合肥、福州、廈門等地均設有分支機搆。

整體質素都有，但未算好強，佢在行業中，未算有好大的規模與優勢，另外，負債較高都對這股造成風險。加上業務有點波動，這股唔建議投資太多。

現價合理，如果控制注碼都可考慮這股，長線投資價值都有，但未去到最高質類別。

------------------------------------------------

Q19328：

老師，有什麼優質股可以推介我呢？因為自己買的股全都下跌的。

只希望能在一年賺回30-50万...可以嗎？

龔成老師：

財不入急門。

你要用平衡，穩健的方法有效增值。要建立一個長期的優質組合，唔好太著重中短期股價表現。

你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19329：

你好老師，我就近40歲，打算買一些收息股長擺到55歲左右退休時收息做日常開支 。

我的組合如下
3988+2388銀行
941 電信
87001 +00978 房產
883 資源
548 +1800 基建

共大約200萬
你覺得以上組合如何？
謝謝

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你的年齡，其實財富仍有增長力，建議你投資「平穩增長股」+「收息股」，到50歲先較集中在收息股。

你上述的股票，都可以，建議加上置富（0778）及恒生高股息率ETF（3110）。

另外，建議你同時加上平穩增長股，你可以考慮盈富（2800）。

另外再加幾隻：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19330：

其實本來一直有每月供開 2800，0066，0012，0003，1038同埋金沙的。每月供款11,500.

只是今年股市突然大跌，我停了月供上面幾隻，只保留月供2800。因為看不到前景，所以無為個幾隻股票月供了。

5年一百萬可以嗎？月供仍要20,000嗎？

上面講的0066，0012，0003，1038 同埋金沙，只係供咗8個月左右，所以唔多股數。

龔成老師：

其實月供股票，盡量都唔需要停或改變，只要保持長期策略就得。

另外，當我地分析時，應該著重企業長期業務發展，而不是當刻股價，你上述供的都是有質素的股，可保持進行。

相信$100萬有可能的，月供$11500。

如果你想進取少少，可以加入安碩恒生科技（3067）去月供。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

另外，現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19331：

老師，全球係金融海嘯之後不停印錢，不停借貸，各國負債水平已經好高，加上最近嘅疫情，最近聽到好多嘅有關債券違約嘅消息

聽唔少人講黎緊會有一個金融危機，如果係咁，我係咪應該放曬啲股票，等金融危機出現再買入會好啲呢？

同埋我宜家5成現，5成股票，會唔會太多現金？
5成現金

龔成老師：

如果真正有金融危機來到，可以這樣講。

不過，我過往20年，久唔久都見到有評論話會出現金融危機，可惜，通常多人講都唔會發生。

反而真正的金融危機，通常都是無乜人講，這樣才會造成更大的殺傷力。

我唔建議你賣晒所有股票等，因為有一半機會，你只會眼白白見所有股票不斷升而買唔翻。

因此，你保持原有的投資策略，持有優質股，長線就得，反正優質企業都不會因金融危機而倒閉。而你現時持有3-5成現金可以。

------------------------------------------------

Q19332：

老師你好，剛轉做全職媽媽。早前買咗老師「財務自由行」深受啟發，所以買了年報勝經、股票勝經

想趁空閑時間學習分析年報，希望日後有機會上到老師投資班。

因經驗尚淺，近來見blogger 推介而於 2.73 買了一隻 00697 首程，請問這股合理價如何？

是否一隻有潛力嘅股票？ 另外老師書中提及年報最好睇五年，但首程近呢幾年先轉型，請問如何分析？

另想請問老師仲有無分析年報嘅書推介？

謝謝老師解答

龔成老師︰

首程控股（0697）主要在中國從事停車場經營管理，以及私募基金管理業務。

佢由過往鋼材製造、礦物開採及加工業務，轉型至現時業務。分析年報時，應集中翻現時尚持續的業務上。

其業務會比較波動，甚至出現過虧損。整體質素只屬一般，見佢最近有盈利改善的情況，如果你持股不多，可以睇下企業的業務係唔係真正有改善，才決定處理方法。

我自己對一些轉型企業，一向都只是一般般。

書本上，你可以睇<巴菲特寫給股東的信>、<證券分析>。

記住，在投資一隻股票前，一定要做足功課。好以睇年報、公司網站、一些統計數據等。唔好單單聽消息就去入貨，咁係好危險。

當你想投資一隻股票時，發現答唔倒自已，間公司係做乜生意、個企業架賺錢模式、行業未來發展和競爭會點、財務狀況健唔健康等問題時，就最好唔好入貨住。

------------------------------------------------

Q19333：

龔sir，想問下0823，3319，0012，1038，這四隻的業務是否相關性較高，現價也是合理區，若一同持有會有相關性風險嗎？若4選1，那隻會較好。

還有0941可上望返去$60嗎？

還有0005和0011那一隻較好呢？

謝謝龔sir解答

龔成老師︰

長建（1038）是從事國際基建項目，好似電力供應。而另外3隻，都係地產類，係有一定相關性。

當中講潛力和值博率，現時恆基（0012）會佔優。

中國移動（0941）會唔會上翻$60，或者幾時上翻，我估唔倒。但以現價計，股息率超過7%，有投資價值。如果你目標係收息，現價可分注。

而匯控（0005）和恆生（0011）都是收息股，整體質素上會係恆生較好。

其實你要睇翻自己的年齡與風險承受程度，去設計一個長遠的財富組合配置。

------------------------------------------------

Q19334：

老師你好， 因為我未投資過 想開始試下投資 , 但未知點開戶 ,
是否去任何一間銀行開投資戶口就可以

因我看你問答的講到月供手續費5% 比較貴 , 正常應該係大約幾多%左右？

另外月供股係要每個月自行入錢 定銀行開戶後會自動過數幫你買入？

因看到你其中一個問答講到月供最少應持續3年以上 , 持5年

（係米意思3年keep 住入錢， 3年後就放係到等到大約5年先決定提取與否？

謝謝老師

龔成老師︰

你可以去銀行或者證券行開戶口，睇係邊個方便你。

之後，每個月會在戶口中扣除指定金額，去買入你所選的股票。銀行的話，佢基本上會每個月在你戶口扣數，你可以再問清潔。

而每月月供成本，最好持係1%。即係你用$5000供A股票，咁個成本最好係$50以內，。否則，會較影響你長線回報率。

而月供目的，就要係去平衡價格波動風險，所以越長越好。最基本要求，月供維持3年以上，並持有這些股票最少5年，咁個月供效果先會理想。

------------------------------------------------

Q19335：

亞sir,你好呀...想問你點睇隻1759?之前3.8入咗..而家跌到傻咗...唔知應該點..

龔成老師︰
中油潔能控股（1759）在廣東省、河南省及江西省經營液化石油氣和壓縮天然氣相關業務。

本身這類商品企業，賺錢能力就唔會太強。因為佢產品無差異性，故定價能力唔會太高。

佢本身規模好細，盈利都唔多，連1千萬都無。見佢近年盈利一直下跌，暫時所見質素好一般。長線計，最好慢慢換碼至其他優質股，咁會較好。

------------------------------------------------

Q19336：

龔成老師，您好⋯⋯一直有follow 你FB，所以係2019年開始月供股票，每月各$5000供煤氣同中電。

我現在45歲，開始想10年後可以財務自由。月入有$11萬，但用稅貸早年在外地買了物業，所以要每月要還大概$4萬（直到2022年中），現金流大約只有$10萬，由於在香港沒有物業

租金加上其他使用及交稅同照顧家人，月供股票後，每月都係差唔多月光族。

所以很想知道我要點做才可以在10年後做到財務自由？感謝

龔成老師︰

現時除了審視開支部份，有無一D可以刪減架不必開支。另外，可以做一些兼職或小生意，去增加現金流。

現時你用月供去做財富增值，就是向著財務自由的一個好方法。

但問題是你投資2隻股票都係同業，會有過度集中風險。較理想方法，就係將佢部份資金（或取消其中一隻），分散到其他行業股票，或投放在盈富（2800）身上。

以下股票都適合，你可以從中選擇。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、粵海（0270）、領展（0823）。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q19337：

你好呀龔成先生，我係一名師奶仔，自今年5月開始追你post, 一開始跟你建議買盈富基金（$23.9）

之後見你教我地月供組合可以考慮希慎，我又喺$20，$22，$24入左貨

近排見佢升到上$30，我仲應唔應該入貨？

雖然希慎收租暫時未有好大影響，但未來公司可能會傾向WFH,租細啲/ 租平啲

對希慎都有影響。
多謝你的意見，謝謝

龔成老師︰

希慎（0014）有一定的質素，可以長線投資。雖然會多左人在家工作，長遠會對寫字樓有影響，但好多公司都接受唔好員工長期在家工作，我自己都是顧主，都唔完全放心員工在家工作。

佢係銅鑼灣商舖及寫字樓地區中，係其中一個最大商業大廈業主，投資組合擁有逾4百萬平方呎之樓面面積，希慎廣場、利園等，都是十分優質的商場。

佢過往出租率均多處於95%以上，商場及寫字樓很多時更處98%以上的高水平，係典型的收租股。雖然受疫情影響，但長線相信會回復至較正常水平。

這股可長線投資，有平穩增值作用。現價計，在合理區中間。

但你要留意，我地投資時除左要選優質股外，也要注重組合的平衡性。因為一個行業就算更有優勢，也有機會面對行業週期及突發風險，太集中會對你整個財富組合不利。

相同行業不可佔組合多於3成，而單一企業最好不要大過15%。

------------------------------------------------

Q19338：

請問2269 和 2359 大家都係藥明系。請問邊隻會好啲啊？

係咪2269 入左藍籌好d？但每股盈利 2359 又高d。
所以唔識揀

龔成老師︰

藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

而藥明康德（2359）是委託研究機構，佢一定有發展的空間，加上佢是大型的機構，因此本身已有優勢，可以作長線投資。

藥明生物（2269）現價唔平，當價格出現回調，我擔心幅度會唔細。藥明康德（2359）都有類似情況。從業務上，兩隻都是有質素，同時有一定的增長力，質素以藥明生物較好。

從估值上，兩隻都貴，如果要2選1，會選藥明生物。

------------------------------------------------

Q19339：

本人今年50歲，現失業中，現有15只股票，帳面虧損13萬多，不知如何處理，希望阿Sir可以在百忙之中指點迷津

應該如何處理以下股票，是否繼續持有，還是買出，可否拜托教導應怎樣處理

現持有股票：
14@2000股$28.5買
460@8000股$1.9買
547@30000股$0.83買
548@2000股$9.67買
576@2000股$6.33買
939@3000股$7.8買
1060@10000股$3.31買
1093@6000股$18買
1800@3000股$11.6買
2280@8000股$4.25買
2318@500股$87買
2800@3000股$26.2買
1177@2000股$8.72買
9618@200股$340.4買

無限感激🙏

龔成老師：

只要佢地有質素，又適合你人生階段，中短期波動唔洗太在意。

睇翻你現有持股，四環醫藥（0460）比較麻煩，因為曾經停過牌一段時間。

如果你睇翻佢年報中，每年獨立核數師的意見，你會見到在2014年出現「不表平意見」，2015年、2016年出現「保留意見」，這都反映核數師對佢盤數感到有可疑，這是一個十分不利的因素。因此，賣出是較好的策略。

數字王國（0547）如果睇睇佢的業務情況就明，營業額每年下跌，年年虧損，根本沒有投資價值，你賣出這股較好。

阿里影業（1060），炒作較多，風險高。這企業到現時仍未有盈利，市場只憑佢前景去評估，其實這會有相當的風險，這類股最多只能小注。

慧聰集團（2280）多年出現虧損，投資價值不高，建議換至其他優質股。

京東（9618）和中生（1177）係有質素潛力股，但波動性較大，唔係咁適合你年紀。現貨可持有，但不要加注。

未來投資增值時，可集中在以下"平穏增長股"身上，會較理想。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

------------------------------------------------

Q19340：

成哥，我係之前既畢業生，首先多謝你教左我咁多野，用你教既價值投資法，我第一次係股票市場中贏到錢

之前上完你堂，我都睇好未來電動車既前景，由於我之前買唔到比亞迪，又無水桶1既股票，所以現在都幾頭痕

咁唯有轉向其他既相關既汽車類別股票啦（以下依隻都係朋友介紹），我盡量用你之前既估值方法去計算股價，但由於新手信心不足，唔知計得岩唔岩，所以想問呀sir對下答案

1）425敏實集團前程如何？ 是手桶1潛力股嗎？
自己估價
PE 31.4-35.04
Ev/edita 21.06-31.06

2）恆基地產12
自己估價 27-34.8岩唔岩呀？

3）3319雅生活服務
之前上堂聽你介紹過，嘗試初步評估，但好似上市年期得2年資料，真係唔識計，想問估值合理區係邊呀？

4）由於我未有置業，所以想買一些地產股係每月租金支出上做平衡對沖（每月租金11000支出）
現在持有領展+恆基地產

想問我應該買多少金額的地產股，大約平衡租金上既開支？

5）順帶一問，除左香港，成哥有沒有睇好邊一個城市既物業有投資價值？

祝身體健康，財源廣進
你派既note真係好厚

龔成老師：

1）敏實集團（0425）不過不失，佢產品都供應比一d國際著名汽車集團，豐田、福特、通用、戴姆勒等。

佢係中國外部汽車車身零部件供應商，主要從事設計、製造及銷售以下三大類商品車身結構件等。

整體都有發展的，但未去到最高質素的企業類別。這類股，投資不是不可投資，但就唔適合佔組合比例好多，現價合理區中上部，都可長線的。

你計算的估值大致都合理。

2）恆基（0012），這股有質素，可長線，不過增長力不算強。計算估值大致合理。

3）雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

當然，行業有時會有較大的炒作，股價上落大，要注意風險，而整體是有長線投資價值的。

由於佢上市年期較短，因此估值時會運用行業的數據較多，你可以盡量找與這企業相近的公司去比較。現價大約為合理區中間。

4）雖然這做法都可，但你要留意，在你股票組合中，同一行業唔好多過你組合的30%，否則會太過集中。你用長期的角度分析。

5）最重要是地少人多，長遠經濟向好，香港、澳門都是這類地方。另外，吉隆坡、曼谷、倫敦都可留意下。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18741-18760）

Q18741：

老師：

有一個問題想問你: 為何你多次提到唔好集中於銀行股呢？我的看法是他們比較穩健

龔成老師：

因為銀行業是高負債的企業，你的存款，其實是佢地欠你的錢，如果金融市場出現危機，銀行其實會有一定的風險。

當然，現時銀行已有一套較穩健的風險管理方法，不過，始終都是有風險的。所以，投資不是不可，但就唔建議太過集中。

------------------------------------------------

Q18742：

龔sir，你好，我未上過你股票班，但剛剛開始拜讀到你嘅注作，想請教一下如果去計算或者去界定一個公司的股票是否值得係現價或者而家係高估或低估，謝謝！

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q18743：

龔成老師，最近我做了一些決定打亂了我人生的節奏，我在深圳買了一層樓，手上的資金應該如何倍大.或增值令我可以快啲供甩深圳呢層樓呢？

錢放在銀行會安全但是會貶值，錢放到股票有機會贏大錢但如果不幸就轉不到身，錢就被扣住了，失了靈活性.....看到信息有空回答我這個80後，謝謝老師

龔成老師：

最重要是分析投資的回報率、風險、值博率。

你要分析下，資金持有這深圳樓，回報率有多少，收金收多，預期長遠的升值多少。

如果想相同的資金，轉到股票，預期會得到多少。

你唔好用短期的角度分析，要睇長線，物業的發展，股票（企業）的發展。

供甩與否，不是重點，重點是資金的配置。例如你擁有一筆資金，用作還錢可以減少利息，但如何用作投資，可能回報更高，因此，你要分析投資回報率，思維將資金投放在那裡。

------------------------------------------------

Q18744：

老師早晨,想問吓中國鐵塔同順豐合作的消息出咗,我覺得呢啲消息應該會令股價上升,但而家反而跌落去

我真不明白？另外,請問香港電訊而家價位可以入嗎？

龔成老師：

中國鐵塔（0788）與順豐集團簽署戰略合作框架協議，
雙方將共同推動能源服務、產業鏈物流等方面的深度合作。

中國鐵塔將依托現有的換電網絡為順豐超過55萬快遞、同城配送騎手提供換電、充電服務，為順豐集團解決低速電動配送車輛充電不方便、不安全、效率低的問題。順豐集團將在年底前為3萬騎手開通鐵塔換電業務。

不過，整個合作對中國鐵塔的核心增長力不強，未至於去到十分利好的狀態，因此，唔會對企業價值帶來好大的提高。

加上市場近期對科技類的企業都有估值減少的情況，因此，中國鐵塔股價都有所回落。

你唔需要太著重中短期股價與消息。

香港電訊（6823），現價合理，可分注投資，是不差的收息股，但增長力不強。

------------------------------------------------

Q18745：

先生您好！本人50歲，以下為本人股票分佈，請問比例分佈可以嗎？

應否增持或減少或增加哪種股票更為適合，另外#435，$3.5可入嗎？謝謝

#27，[email protected]
#548，[email protected]
#3，[email protected]
#939，[email protected]
#2800, [email protected]
#941, [email protected]

龔成老師：

你50歲，適合投資平穩增長類的股票，另外再加部分收息股。

從上述持有的，基本上都是有質素，以及屬於這類別的股票，方向正確，你可以持有。

你之後的方向，可以同步增加平穩增長類股+收息股。你可以投資盈富（2800）、港鐵（0066）、陽光（0435）等股票，陽光可入。

不過，這刻大市未算平，唔好用盡現金。

------------------------------------------------

Q18746：

老師，我最近第一次係股票市場損手，蝕咗7千幾，但感覺安穩d，唔使下下擔心幾時變仙股/跌到得幾蚊。

我買咗你幾本書，好informative 同深入淺岀！但我一直都懶，睇得80後百萬富翁既一半。今次之後我會努力研究

我本身對econ無咩概念，你d書對我有d難，要分開日日睇d，否則太多資訊有啲難消化。多謝你分享！

龔成老師：

止蝕是十分重要的一課，好多散戶一世都學唔識，但如果你要成為一個有實力的投資者，這一步好重要。止蝕是一個理性的處理方法。

不過，你要仔細分析，是這企業本質有問題，還是只是你「擔心變成仙股」的心理因素，你做每一個決定前，都要做功課，要有足夠的理據，這都是學習。

《80後百萬富翁》
《股票勝經》
《財務自由行》

是較為入門的類別，你暫時可以集中睇這3本，如果唔明，睇多次，慢慢會掌握得到。知識要保持增加，才可以提升長遠的財富。

------------------------------------------------

Q18747：

龔成你好,步入中年困惑, 誤買債基餐損失慘重, 手上還有現金但不敢投資, 有點徬徨，從經濟一週及網上看到你的信箱, 請求幫手重組投資組合而確保資產每年有高回報10-15%)及之後生活安穏.

先生及自已40歲, 夫婦二人合共月薪$70,000, 資產如下:

- 自己名 , 先生擔保, 物業價值 $900萬, 貸款: $700萬
- 現金: $150萬 (現想買些股票, 基金或ETF增值, 3年後可否增值到可多買一屋)
- 債基: 100萬槓100萬, 每月收息$9000
- 股票: $50萬 (中國鐵塔 / 小米 / 路勁(1098) / 紅星美凱龍1528

謝謝你幫忙.

龔成老師：

債券基金有好有壞，要小心平衡風險，總之你要記住，這不是保本的工具，同時你利用槓杆，放大了風險，投資價值未必如你想像般高。

由於你打算3年後，目標希望買多一層樓，所以在投資上，未必適合太過進取，同時，應該投資一些較有流動性的項目。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可小注考慮安碩恆生科技ETF（3067），但這基金現時處合理區頂位，因此唔好一次過入，要慢慢分注投資。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18748：

龔成老師. 你好, 小弟仍股票市場初階投資者, 想請問國藥控股1099睇法, 看其業績過往十年都有平穩增長(雖然未必算是爆發性增長)

嚟緊銷售疫苗應該亦對其業績幫助很大, 為何其股價仍然沒有點樣升幅, 其現市盈率都唔算高

現時這個價位是否值得持有, 想懇請龔成老師指教

龔成老師：

國藥控股（1099） 質素都可以，但增長力不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。

佢有個比較大問題就係負債比較高，而度會扣左D分，整體而言此股有質素，可投資，現價合理的，你可以分注投資。

------------------------------------------------

Q18749：

老師，你好! 想請教一下，２８歲情侶，月入共7萬，預計兩年內月收入共９萬，未有任何物業。

現時資產如下
現金：６０萬
股票：８５萬
定期：１０萬

正計劃結婚置業。

請問以下那個置業計劃較理想？

１）現時先用一人名義購買約四百五十萬單位，先上車自住，留待日後收入增加，以另一人名義購入多一個細價單位放租，產生被動收入

２）現時直接用一人名義（加另一人作擔保）購買約六百萬至七百五十萬的單位自住，期待日後有升值潛力再換樓。謝謝你的時間

龔成老師：

要睇你地的實際需要，如果你地唔想轉來轉去，認為（2）的物業較適合你地自住，就（2）。但如果唔考慮自住（1）的方法會較平衡。

（1）的方法，置業後仍可有現金與股票剩，在配置上會較平衡。

不過，香港買樓物業的成本貴，你最好計算一下，（1）的方法，在長遠怎樣配合你的置業自住計劃。

簡單來說，如果不考慮自住，（1）會較好，但（2）可能較適合你自住計劃。其實你可以睇《5年買樓4部曲》，對你有幫助的。

------------------------------------------------

Q18750：

老師，我接觸左股票半年左右, 暫時蝕5萬5, 前兩個月開始睇左龔sir你幾本書,都開始睇緊巴菲特相關ge書,的確學左唔小, 認為市盈率估值法最容易同最接近合理預估.

1. 而我係 （股票勝經P.268） 睇到折現率計算,係關於1.無風險利率（長期:香港外滙基金票據）, 2.風險溢價（恒指十年複息回報率連股息）, 同埋該股的3.啤打系數, 即係大約折現率可以用E個方法求到?

同埋1同2我上網搵過, 但係係香港金融管理局同恒生指數官網都唔太清楚實際係邊度可以搵到?

2. 請問「預計」之後的現金流, 要如何做到, 因年年不穩定, 如未出新年報業績, 並不會知道公司現金流ge使用情況?

3. 而剛剛9月中係股市回調向下前兩日已經察覺唔對路已放曬貨,無賺蝕收手已經算有進本, 現時我預估, 都等緊恒指跌到21000-22500 及恒指市盈率低過10, 認為到合理偏低區就開始揀優質股入注?咁樣可以嗎?

4. 我25歲,持有25萬左右, 打算選2-3間優質企業作長線起碼1-2年持有, 如及後繼續評估並分析數據及年報,如優質不變會繼續持有, 觀察名單有3968, 11（銀行類打算選一間平衡風險,但認為越接近年底,銀行類會越向下調）,

以下的打算選其中兩間企業, 241, 285, 1169, 1797, 3918（風險較大,但認為潛力較大增長）, 345, 669, 823, 1211, 2382（認為風險較小, 但較優質於市場同類型及較平穩）, 希望龔sir能比意見, 組合ge優質度, thx

龔成老師︰

1）坦白講，我好講在這裡三言兩語講到，因為就算在股票班，都要較長時間同學先明到。

WWW.CMU.ORG.HK，這是「金管局債券報價網」，你找香港外匯基金--10年期--買入孳息率

另外，這是恆指服務公司的網：www.hsi.com.hk

2） 我地只能根據佢以往紀錄，去做一個合理估算。如果佢過往現金流都平穏，而未來佢業務上優勢，我都預期唔會有太大變動，咁我地可以假定佢將用現金流走勢，會同以往係一致。

如果企業過往現金流都好波動，咁就唔適合用這種估值方法。

3）你這個方法唔正確，記住我地投資絕對唔好用"估走勢"去做策略。因為無人會估到個市中短期點走，如果你當日放左，之後佢唔跌，反而一直升。咁你就要用較高成本，去買翻D優質股。

我地定買賣策略時，只會用平貴去做決定。現時大市在合理區低位，如果你無貨，應該分注入翻D先，唔好完全100%揸現金。否則個市之後升，你就會因無貨，而完全地失去一個增值機會。

4） 投資1-2年唔係一個長時間，5年以上才算係一個較理想長度。

你以上所講的股票，大致上都有質素。但有部份風險性較高，以下幾隻會較為理想，你可以參考下。

較平穏可選海爾電器（1169）、招行（3968）、恆生（0011）、維他奶（0345）、創科（0669）。

金界控股（3918）、比亞迪（1211）、比亞迪電子（0285）、舜宇光學科技（2382）就會有較大潛力，但同時波動也會較大，你要自己平衡。

由於部份股價已經係貴，如比亞迪、比亞迪電子、舜宇、維他奶等，入貨前要做先做好估值。

------------------------------------------------

Q18751：

龔成老師您好啊！我係您既fans，雖然未有機會上您的堂，但我一直都有留意您的每一個post, 2年前左右講到我同男朋友的儲蓄只有10餘萬

呢2年我地都有努力儲錢同增值自己，再加上適當投資，而家我地既資產（唔計儲蓄保險）大概有60幾萬

我地希望2022年前可以成功上車（屯門300呎左右小單位蝸居，有開始睇樓），我地會繼續努力的，想同你講聲多謝！

另外，最近我地睇到保利物業有點下跌，同時亦睇到中國內地物管市場，都想參考下您的意見

龔成老師︰

唔好客氣，做到這個成績，好大程度上係你自已的努力，要KEEP住，你一定可以完成更多財務目標！

保利物業（6049）係中國的物業管理服務綜合商，主要提供以下三項服務：（1）物業管理服務（2）社區增值服務（3）非業主增值服務：主要向物業開發商提供案場協助服務。

這企業的業務增長理想，現金流強，但上市時期短，規模細，都是不利的因素。過去市場這類股有少少熱，所以估值都偏高。

現時只係回翻去一個較合理水平，佢投資價值係有，只要投資唔過多，這股可長線的。

------------------------------------------------

Q18752：

龔Sir請問2101係味真係老千股？

龔成老師：

不是最近的騙案類別。

但最大的問題，就是上市價已貴。福祿控股（2101）是中國的第三方虛擬商品及服務平台運營商。

此股上市不久，有睇開我FB朋友都知，其實我唔係咁推薦新股。因為可參考數據唔多，很難估值。而且要時間，才會見真章。

以佢2019年盈利8000萬計，上市估已值貴，業務潛力度是有的，但要明白業務波動及現價仍唔平。

------------------------------------------------

Q18753：

老師喺沿用價值投資法之後有冇試過比較大既失敗/失誤既投資經歷？

如果優質股係價格越低越好 公司基本面冇變的話係咪唔需要理止蝕？

龔成老師：

其實又不算「價值投資法」失敗，是我當時運用得不好。

這是十幾前年，投資了一隻嘉利國際（1050），財務數據不差，於是投資了不少，但當時忽視了這股沒有太大的議價能力，佢有好多大客，但客太大，不斷壓佢價。

同時，十年前中國的成本上升，佢無法轉嫁比客，於是盈利大幅下跌。

當時我無仔細分析佢的業務模式，當大環境改變時，佢的弱點就出現，最後我止蝕了這股。

------------------------------------------------

Q18754：

龔sir：2638、6823,1398、11、778、435、548要在什麼價位入,還是現價入呢？

阿sir我應看你邊本書適合呢？我想從書本上先了解吓選股知識.唔該晒龔sir

龔成老師：

上述的股票，基本上都在合理區中間，你已經可以投資，只要分注，慢慢入，不要一次過入，同時留有現金，這樣就可以。

這些都是有質素的股，但由於是舊經濟，因此仍受疫情影響，股價表現未必好，但收息不差，長遠則會慣慢好轉的。

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q18755：

老師。我想問亞盛醫藥6855呢隻股值唔值得繼續持有。我35蚊有貨。

渣到呢加都唔識升。好驚會繼續跌

龔成老師：

亞盛醫藥（6855）這上市年期不長，我無仔細研究，因為新股一向的風險較高。另外這股最大的問題，是未有正式的盈利。

佢主要從事生物製藥業務，核心治療領域包括癌症、ＨＢＶ及衰老相關疾病。到目前，佢共有8款候選藥物進入臨床開發，正在進行28項臨床試驗和21個在全球範圍內提交的ＩＮＤ（試驗性新藥）。

企業不能話無潛力，但不確定性實在太高，是較高風險的類別，有危有機，如果成功當然股價好勁，但失敗都可以有好大打擊，而我地投資者要判斷佢的藥是否成功，其實都幾困難。只可以話，如睇好佢的產品將來市場發展，你小注持有都可，唔好理將來股價，重點是佢之後的研發與產品如何。

------------------------------------------------

Q18756：

龔老師早晨，今日又想請教老師，我現在正閱讀學習老師您的作品，但係發現自己係生活環境上的敏銳好唔夠，往往事情發生左一段時間才注意到

好想改善下慢一拍的思維，仲有想請問老師係咪要經常睇國際新聞或財經，有冇一個比較集中嘅app可以睇

我現在睇富途app，但係都覺得自己好似仲係好混亂揾唔到重點，都係東睇吓西睇吓。謝謝老師指點下

龔成老師：

我每日都會睇新聞與財經的，我睇電視，這已經夠。

反映app太多訊息，有時未必知邊d重點，而電視的，一般都是較重點的，這已經得到了基本的資訊。當知道最近發生的基本大事後，兩就著這些大事都找資訊就得。

但你有兩點要注意，第一，我地要「資訊」，不是要「意見」，第二，中短期，對企業無核心性影響的資訊，你不用過份放大。

------------------------------------------------

Q18757：

成哥，最近儲咗200,000現金，本身有10萬股票分別係月供嘅港鐵同盈富儲出嚟(每月5千)，仲有一手領展。除咗20萬現金，我每月可供多3千。

如果我想加碼，穩健上升嘅選擇，有乜嘢可以揀？
thank you!

龔成老師：

盈富（2800）與領展（0823）可長線。

如果想運用$20萬，你可以考慮盈富（2800），再加上其他股。

例如：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。最好當然回翻D先入。

現時大市處合理區，可以一邊投資一邊留現金（暫時你可留$10萬現金，用$10萬去分注買入慢慢入貨）。

而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18758：

成哥你好，我係你股票班學生，多謝你禁有耐性分享投資知識同埋一邊鼓勵學生培養正面心態，有啲覺得太遲先認識你！哈哈！如果早啲開始睇你書既話，應該可以走少好多冤枉路。

以下係我現時既狀況:
31歲
每月收入：正職35k，兼職5k，物業收租12k
每月支出：(租住+供樓) 21.5k
每月供緊：保險3k + 國指基金2k + 股票9k
每月可儲淨現金：10k
備用現金有20萬 (其中10萬諗住長擺唔用)
預計40歲時有2份保險基金可取現金70萬

現時股票大約22萬：
水桶1: 約30%
1177: 平均價$9 ，持倉佔比15% (月供1k)
777: 平均價$22.68 ，持倉佔比14%

水桶2: 約65%
1113: 平均價$9 ，持倉佔比48% (月供1k)
270: 平均價$12.78，持倉佔比2% (月供1k)
9988: 平均價$267.8，持倉佔比1.3% (月供1.5k)
388: 平均價$370，持倉佔比1.5% (月供1.5k)
2688: 平均價$86.5，持倉佔比6%
2800: 平均價$21.37 ，持倉佔比7% (月供2k)

水桶3: 約5%
1313: 平均價$11.49，持倉佔比0.5% (月供1k)
939: 平均價$5.7，持倉佔比4%

想求投資方向。唔好意思，我有好多問題都好需要你既指導

問題1: 1113長實
我知道持倉太重，但已經係認識你之前已經買落，而且睇完公司數據同基本面後，都對佢有信心(相信中美港政治同疫情情況只是中期，長期會回復正常)，期望10年後的回報。

如果繼續趁現價平，值搏率高，小注長期月供，慢慢拉低持倉比例，有冇大問題？

問題2：777網龍
本身見公司業務做開手遊，前景做海外網上教育，覺得中長期有前景，知道現階段公司教育方面仲係投資階段，未有回報。

但明明潛力高既公司，以往業績亦不錯，為何價位會一直插落去既？有啲不解，雖然有set止蝕位，但因為覺得基本面冇變，所以冇跟住止蝕，繼續揸緊。

成哥你點睇呢間公司？如果我期待回報期係2至3年，依家應該慢慢再加注(keep住15%持倉)嗎？

問題3: 9988阿里
我睇中佢既網上平台同雲端潛力，同埋現金流高，好穩陣，好想加大月供注碼，因為現時月供銀碼細，感覺要儲好耐先夠貨。

但心理上硬係覺得現價好貴。我係咪應該拋開呢個心態問題，加注呢？

問題4: 388港交所
覺得香港未來前景都係靠金融投資發展，所以覺得公司有長遠前景，怕依家唔買的話，將來升左買唔翻。

見你有講過呢間公司有個週期，請問現時是否週期狂熱期？可否繼續現有的小注月供，等下個交投淡既週期先加大注碼？

期待10年後回報或以後揸到退休。

問題5：
現時個倉蝕緊3萬，數目唔大，但心理有啲覺得唔太舒服，會有個壞習慣每日睇價位，會盡量睇多啲價值投資書去令自己有信心少少，但真係好難做到。

之前有試過短炒1313潤泥同1810小米，賺到成哥課程既學費，所以成日心癢癢想玩下短炒。

如果我分多一舊細錢專玩短炒，係咪其實都只係純止癢，效率一定不及價值投資高？

因為幾乎身邊冇親戚朋友同我一樣睇長線，佢哋仲會話我咁樣永冇發達，話我比龔sir洗腦 (我有啲嬲，所以想用時間同成績証明自己係岩)

想請教下成哥你當時點解決呢個心態問題？

問題6:
請問我個倉咁樣分配會唔會散？裡面既公司有沒有邊隻唔優質，可以剔走？

*2800我會慢慢加注。

多謝龔sir既耐心解答，期待你既答覆，同埋我應該會繼續在上課期間有無限多問題指教

龔成老師：

1）唔建議你再加注了，這股佔比已多，這是一個組合風險的問題。我對這股都正面的，雖然長遠不是高增長股，但好轉是無問題的。

你原有貨就持有，不過唔建議加注了。

2）網龍（0777）主要從事網絡遊戲開發（包括遊戲設計、編程及繪圖）及網絡遊戲營運；教育業務；移動解決方案及移動營銷業務。

另外，佢近年有發展教育業務，相信長遠都有前景的，但業務始終有不確定性，市場具體情況仍有未知數，所以，投資價值是有，但唔建議太大注。

我見你水桶1佔30%，但只得兩股，你保持30%無問題，但就唔應該只得兩股，這股較為集中。

3）阿里（9988）現價的確略貴，不過，由於本身有質素，加上業務有發展力，因此，這類股要大跌又唔易。最好的方法是月供，可以的。

4）這股好優質，但近年上左唔少，最適合的方法是月供，只要你同時留有現金在手就得。

5）你用巴菲特做例子就得，世上投資賺最多錢的人，唔建議人短炒，只會長線投資。

你之後唔好再短炒，同時唔好成日睇股價，唔好理中短期賺蝕數目。

同時唔需要同其他人爭論投資方法，你做好自己就得。

6）其實都有質素，唔算散，只要分配的比例可以慢慢調整。

------------------------------------------------

Q18759：

龔成老師，您好。我最近好迷茫，想請教你意見。這一年，我由月入三萬幾，變成失業。最近開始做一份七千蚊的half-time, 邊借政府錢讀master，希望捱過這兩年。

目前煩惱的是，前兩年開始買的醫療(無儲蓄，今年交一萬)及危疾保險(2 份無儲蓄，1份有儲蓄，合共交兩萬幾)，及投資基金保險(每月三千) 成為了負擔。

我應該如何是好？

朋友說現在有一份半職十分好，可以邊做邊找工作。 但看形勢，找不到之前收入的工作。

想起要交的保險，令我想索性放棄找一份收入比較接近的工作，及目前的half time，索性找一份能夠交保險及應付生活的勞工工作⋯⋯ 但又擔心日後回不了頭。

我應不應該放棄部分保險，令自己比較輕鬆面對低迷？

龔成老師：

我相信分成兩步先。

第一，你從收入著手，唔好太快停左果邊保險。

反正你現時都只是兼職，其實試下做其他工作都無所謂，我成日覺得，疫情是有危有機的，你可以做到好多原本無打算做的野，有時可能是一個突破位。

如果你這刻生活費方面有壓力，就唔好理，任何工都照做，提高翻收入先，這是做最重要的第一步。

如果生活費真的有問題，就行第二步，就是問清楚你手持的儲蓄及保單，睇下停供有那些問題，應該停那一份。

你這刻進行「提高收入」這步先。

------------------------------------------------

Q18760：

老師,怎樣可以分辨隻股票是否優質??
Thanks.

龔成老師：

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是分析的基礎。

如果要講，真的有排講，總之你要找出，一些較有競爭優勢，比其他企業較強，賺錢能力較高的企業。

在長遠的經濟發展上，這類企業的得益會較其他企業強。

----------------------------------------------

若你有問題想向本人發問，可在龔成的fb專頁中（龔成）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。