//本Page Patreon經已開通，請訂閱支持本Page運作，謝謝！ 連結： https://bit.ly/2TvzIaF //

3月23日突然爆出44宗新增確診個案，結果令各界引起一片恐慌，好多人都話呢個係香港新一輪武肺大爆發，結果原先打算全面復工嘅公務員系統都急急煞停，然後林鄭仲要追加禁酒令同收緊封關措施添。

咁究竟香港目前算唔算進入第二輪社區大爆發呢？我認為係一半一半。唔啱嘅一半係，呢排大量新增嘅案例都係黎自海外輸入個案，本地新增確診只係佔兩三成左右，而且可能都同呢堆輸入個案有關。只要成功捱得過呢輪外來輸入激增個案，咁響進一步收緊出入境政策後可能過一排又會回復平靜。

但啱嘅另一半卻係，呢兩日新增嘅輸入個案都係響正式宣佈所有入境人士都要自我隔離後開始，亦即響禁令實施後嘅19、20日左右響海關截獲。大家留意林鄭響3月17日宣佈收緊封關政策，但又比兩日Buffer去到19日先正式實行，結果係令到消息公佈之後好幾日嘅海外香港人蜂湧番黎香港，造成極大嘅疫情爆發危機。

要知道早兩日確認嘅海外輸入個案，全部都係19至21日或之後，響海關截查果刻確認嘅──好明顯就係因為響19日檢疫隔離措施收緊咗之後嘅結果，但之前呢？會唔會響17-18日呢兩日之間，已有超多患病個案因為檢疫措施仲未開始比佢地偷偷潛入社區傳染？又呢幾日多咗一啲不知源頭嘅染病個案，可能就係癥兆。

呢度又要客觀講，林鄭有個論點係錯唔哂：佢話響近百個新增外來輸入個案入面，只有4個係非本港居民，換言之真正需要封關針對嘅，從來都係香港人──即係根多香港人係咁狂鬧政府拒絕封關先搞到社區大爆發，當日林鄭曾經反問支持封關人士同罷工醫護：「封關係咪代表連香港人都唔比番香港？」，果陣係全部人都話「唔係，只係限於非香港居民」，但現實卻係絕大多數嘅輸入個案其實都係本港居民。

雖然仍然有人堅持話「如果本港居民回港就應該強制隔離檢疫」，但以當時每日有成十幾萬人入境嘅數量黎講，要求所有人自我隔離根本係不切實際嘅事。所以當日要求政府封關嘅人其實某程度上都搞錯方向，因為最有力嘅措施應該係「禁止所有人士出入境，直至疫情平息為止」嘅徹底鎖國，先係真正有效嘅封關。

但當然咁並唔代表當日醫護嘅罷工係白費氣力。因為我仲記得當日政府仲係諗住維持各個關口嘅正常運作，林鄭仲諗住話「入境人士只需填寫健康申報表」就當防疫措施，日後發現好多潛伏個案原來響健康申報表都無寫病癥，證明呢項措施根本係廢。但就係因為醫護罷工嘅壓力下，林鄭先心不甘情不願全面中止羅湖同落馬州嘅運作，如今睇番可以話係斷絕武肺進一步大爆發嘅關鍵因素──＊所以今日香港無冚家剷，我對絕對要多謝班罷工醫護。＊

不過去到今日，當大家響針對「非本港居民」，尤其係中國藉人士仲可以借漏洞來港，仲要因為中國宣佈自己零感染，所以連隔離令都可以豁免埋，真心覺得呢個政府係堅痴線，黑心啲講，我係等緊響武漢復關之後，由當地傳入第一個響香港爆發嘅感染個案，到時肯定牽起新一輪不分藍黃嘅仇中情緒。

不過作為香港人都要同時思考一下，係咪仲係容許居住海外嘅香港居民入境，持續令佢地成為疫情隱患源頭呢？我認為最低限度，應該係要為入境人士設配額分配比航空公司，確保入境人數限制至香港防疫措施可以承受倒嘅水平之內。

最後不得不提而家「手帶自由行」嘅問題。呢個明明係創科局大展拳腳嘅一刻，但垃圾局長卻同我地講，好多監控手帶係無GPS之餘，有啲仲要乎Activate，再次證明當日莫乃光投票成立呢個垃圾局，足以令佢成為千古罪人。我明白林鄭係要扮喊搏同情，但成個記者會入面最唔需要扮喊果Part就係「手帶自由行」問題。

喂大佬你政府係有哂條例懲罰呢班違反自我隔離措施嘅刁民架，違反《檢疫令》入獄6個月同罰款25000丫嘛，問題係而家就算你響街捉倒手帶人，都只係送佢地入隔離營，根本全無阻嚇力！與其扮喊，點解唔直接宣佈所有違反法例嘅人一律罰款兩萬，仲要拎一萬做獎金比舉報嘅人，咁我都幾日信心，過多兩日手帶人應該就會絕跡街頭。

所以有網民講得真係好，假如林鄭對待疫情、封關同違反隔離令人士有佢對待抗爭者十份一咁強硬，香港疫情一定唔會好似而家咁大鑊。問題係無論中共定林鄭，永遠對缺乏公德者寬容、挑戰政權者殘酷。