【龔成問答信箱】（Q22501-Q22520）

Q22501：

老師！有個問題我想問好耐！

我見你講1211 現價偏貴。咁點解你而家唔先賣出？？？

低位再買返（我絕對明白投資要長線）

但亦冇理由睇住股價由最高位跌返落去？長期持有但高位沽貨！咁又如何獲利？

龔成老師：

因為無人知股價走勢。你這句「冇理由睇住股價又最高位跌返落去」，是「預期股價走勢」的思維，即是「散戶思維」。

這種思維，令一般散戶，無法賺到10倍回報，因為佢地見到某股到了高位，就會「賣出等跌先買」，但結果是「賣出後一直升」。

如果我真的賣出比亞迪（1211），但佢股價唔跌，然後佢的企業價值不斷增加，今天的$2XX是貴，但過一年可以變成合理，我就會買唔翻。

企業的平貴，與股價的走勢，中短期可以無關。

你仍停留在「一般人思維」，你以「現金」作貨幣單位，而我以「資產」作貨幣單位。

一般人認為「持有現金」才是有財富，認為「獲利，賣出股票」才能賺錢，但有錢人思維，就明白「現金永遠貶值，持有優質股才是真財富」，根本不用賣出股票。

一般人擔心「如果高位不賣出股票，不賺錢，有機會股價跌翻」。

有錢人擔心「如果賣出優質股，有機會買唔翻，持有貶值的現金根本無用」。

------------------------------------------------

Q22502：

老師，想請教隻完美醫療

1）公司向主席授出購股權是什麼意思呢？對公司前景是好與壞呢？

2）上海市打擊非法美容服務，正路理解是如果完美醫療係正規，理論上是可以打擊其他同行違規對手，有利完美醫療做到寡頭壟斷和汰弱留強，

從而整治行業而令其受惠及增加市場競爭力及份額，實屬利好！但問題是……作為我們散戶及投資者怎樣可以知道完美醫療有沒有違規呢？？

現在我們都只是能看財經新聞消息和媒體報導，雖然暫時未见到上海市政府有點名批評（完美醫療有違規）的報導好似之前騰訊或阿里違規而遭罰款和要求改善和禁令，

但目前這兩個月從高位$10.9下跌至$6.6，會否已經提前有些預兆和隱藏一些殺機呢？

3）之前聽你講過$6是合理區間的頂部，所以我也本來打算準備$6.5左右開始分注入市的（之後近$6再加注），現階段的策略應該是怎樣呢？需要調整嗎？

觀望一下還是照原定計劃進行呢？盼龔sir指點一下！

4）另外你曾說你之前有入貨完美醫療，私人想問下你之前什麼價位入呢？如果以你自己角度，你會用咩價位再加注呢？

純粹想了解和學習多D你個人意見及做法（如果你介意的話可以唔需要講的）

謝謝龔Sir

龔成老師︰

1) 購股權，其實就係一個權證，給予持有者可以在未來時間，用特定價格買入該股。不少上市企業，都會以購股權作為管理層獎勵。

因為購股權的行洗價，是固定的。若日後企業股價提升，即管理層有機會用比市場更平宜的價錢，去買入該股。

其實這個動作，唔代表公司前景是好，定是壞。作為投資者，你只要留意購股權數量，當全數行洗，會佔已發行股量多少。

因為，當行洗購股權時，公司係會發行新股，變相令現有股東的利益被攤薄。以完美醫療(1830)為例，發行的70.9萬份購股權，只佔發行股份的約0.058%，這程度就影響不大。

2) 我地唔係行內專家或者用家，更加唔係企業一份子，的確很難去知佢現時有無違規風險。所以，我地只能用佢過去紀錄和現時質素，去作為參考，例如以現時香港情況去分析。初步睇，個風險唔算好高。

至於點解跌咁多，係因為之前股價太貴，現時純粹只係回調至一個較合理水平，當然，市場對潛在監管有擔心，都是風險。但現價未算平，只係合理區頂位，只宜小注。

3) 估值上無大變，現價係合理區頂位，如果你無貨可以先小注。但由於此股都有一定不確定性，故長線不宜持有過多。

4) 我在$2左右入，暫時唔會再加注。

------------------------------------------------

Q22503：

龔Sir，你好!我現年59岁，仍在工作，現持有以下股票，是否会适，請賜教:-

#00003 (香港中華煤氣) 2100股 @11.86
#00011 (恒生银行) 200股 @144.25
#00012 (恒基地產) 1000股 @28.75
#00066 (地鐵公司) 3,000股 @41.12
#00303 (伟易達) 500股 @60.58
#00435 (陽光房地產基金) 7000股 @3.75

#00548 (深圳高速公路股份) 2000股 @6.88
#00590 (六福集團) 3000股 @18.50
#00778 (置富產業信託) 5000股 @6.99
#00823 (领展房產基金) 600股 @70.60
#01310 (香港寬頻) 2000股 @11.04
#01448 (福寿園) 3000股 @7.70

#01928 (金沙中国有限公司) 1600股 @33.33
#01972 (太古地產) 1000股 @21.68
#02388 (中銀香港) 2000股 @25.58
#02638 (港燈) 2000股 @7.70
#02800 (盈富基金) 5500股 @27.44
#03067 (安碩恒生科技) 1300股 @17.71
#03110 (GX恒生高股息率) 1200股 @28.50

1) 老師，最终#00788 (中國鐵塔) 及#1177(中国生物製药)賣出了，前者蚀约1700元，后者賺了150多元。在这段日子裡我也按您给我的意見，

加持了部份的股票，有時間請您抽空再给我宝贵意見。

2) 老師，按以上这个组合，我这个年纪应否到价時可减持或全賣出#01448(福寿園) #03067(安碩恒生科技)，会否造成组合不平衡呢？

3) 老師，另外我想问问#01928 (金沙中国有限公司)，这年头怎麼不公佈業绩的，这情況会对企業有影响嗎？还可继續投资？

4) 而#01310(香港寬頻)，我也希望到价時賣出，加持组合內其它的股票。

老師，請抽出您的宝贵時間多多指教提醒。

龔成老師︰

1) 現時這個組合，大致上可以。但緊記，這個組合不是永遠適用。你要按自己人生階段，慢慢將收息股比例加重，至退休時應佔100%。

2) 如果佢地去到好貴水平，你就可以減持(現價只是合理區上部，跟好貴還有很遠距離)。或者到你退休前2-3年左右，慢慢分段沽出，換成收息股，咁就可以。

3) 中期報告，佢往都係8月尾先有，至於2020年全年業績己在2021年3月公布。上年受疫情影響，出現虧損，但相信只係影響集團中短期，長線投資價值依然存在。

4) 香港寬頻（1310）主要在香港提供固定電訊網絡服務及國際電訊服務，以及產品銷售。

業務發展不過不失，中短期較一般，之後會好翻D。

整體來說，長線投資仍可，雖然增長力唔算強，但作為收息股係可以。而且你持貨不算多，唔建議你沽出

------------------------------------------------

Q22504：

龔老師你好，我於去年買入了一些股票，部分買入後幾日就可以倒蝕，當時問過老師意見，希望到一定價位後放出，但一直未有機會。

直至近期差不多全倉紅了，而我亦認為月供股較適合我，但希望老師指點一下如何處理持倉的股票，謝謝

京東健康 6618 $146 ，550股
小米 1810 $28.35 ，600股
東亞銀行 0023 $16.8，600股
云想科技 2131 $12.08，1000股
清科創業 1945 $19，800股
中策集團 235 $0.25，20000股

龔成老師︰

你太在意個買入價和帳面數字，完全錯左焦點。

你唔好再用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

小米(1810)係有質素的潛力股，若你係年青至中年人士，這股適合長線持有。

京東健康(6618)、云想科技(2131)和清科創業(1945)唔係話無投資價值，只係不確定性較高，你現時只有好少貨，其實你可以長線持有都得。

但京東健康(6618)就持貨太多，就算一般優質股，我地都唔好持有過多，大約佔組合15%好了，行業上限則為30%，以免出現過度集中性風險。故你要將6618沽少少，換至其他股票，去平衡個組合。

東亞銀行(0023)和中策集團(0235)質素一般，建議你分段慢慢沽出，換至其他優質股。

其實若果你無太多投資知識和經驗，對企業估值，點去定平貴不太了解。先利用月供模式去做增值，可以減低買貴貨風險，對你而言會較理想。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22505：

謝謝老師，明白的。如果有一百萬作投資，分注的話，又估計會下跌，是如何分注？

龔老師，我老公叫我全部公積金（4成都係股票）轉現金。我覺得無必要，因為我的股票部份是港股，而且市一定會反彈的。

但是，我快退休，會於明年1月攞番公積金。請問你可以俾我意見嗎？我很不開心，因為工作多年不開心，難得做了決定，現在為賺錢又不退休，非常難受！

我身體不大好，因為多年壓力，不是一般人可以忍受的。

龔成老師︰

若你明年頭就退休，餘下可投資時間不多，公積金組合，真的不宜持有太多股票。你要開始慢慢將佢地換成較保守組合，例如債券、現金類基金。一切以保本為主，之後取回相關資金，再投資收息資產。

但記住唔洗一次過轉晒，分段咁去做會較好，可以平衡價格波動風險。

另外，我地唔好估個市走勢，無人可以估到佢中短期，幾時跌，幾時升。我地只會用股票平貴，去定我地投資策略。

現時大市在合理水平，你100萬可以先用30-40萬，慢慢分注買入我之前講的收息股。餘下資金，就等有再明顯回調，才慢慢加注。

配置比例上，唔洗諗得太複雜，平均分配在我推介你的收息股就可以。只要唔好偏重個別企業或者行業，比例控制在分別15%和30%以內，咁就可以。

辛苦日子將會過去，好好配置財富組合，去享受將至的退休人生。

------------------------------------------------

Q22506：

感謝龔sir意見！因為巴菲特都非常推薦投資者購買ETF，所以我想多了解一下ETF，龔sir在你的股票班中只有在初班有提及到ETF，

當中你提到NAV值，因為財經網站上提供的NAV值都是有延誤的，所以必須自行計算現時的NAV值。

我以安碩恒生科技（3067）做例子，想麻煩龔sir你睇睇我有冇計錯。

8/18恒生指數收市價 25867.01
8/16恒生指數收市價 26181.46

8/18 安碩恒生科技 現價 12.97

8/16 安碩恒生科技NAV 13.416

計算恒生指數8/16和8/18的差額
25867.01 - 26181.46 = - 314.45
- 314.45 ÷ 26181.46 = - 0.012 （-1.2%）

恒生指數差額為 -1.2%

再將NAV值 × 恒生指數差額
13.416 × -1.2% = -0.16

13.416 + (-0.16） = 13.256

8/18安碩恒生科技的NAV值是13.256

比較今日收市價12.97，NAV值大於收市價即代表此刻市場低估此ETF價值，是一個買入的訊號。但是我要如何得知此價是應該大手買入還是小注買入呢？

如果我想多了解一下ETF，請問有冇書籍或者網站可以介紹？

謝謝！

龔成老師︰

你唔應該用恆指去計，而要用恆生科指數數去計！

至於當中的計算模式，和得出ETF被市場低估這個結論，係正確。

但係抽取數據作比較時，就有問題。我地係決定用那個數據，同該ETF比較時，要留意有無比較意義。

你現時分析對象係安碩恒生科技(3067)，是30間科技公司的ETF組合。而恆指，則是60間藍籌企業，當中包括科技股以外，多個不同行業。故2者係有根本性的差別，用來比對其誤差，就有失穏當。

你應該用恆指科技指數，去做比對對象。因為3067，就正正係追蹤這個指數。

8/18恒生科技指數收市價 6226.69
8/16恒生科技指數收市價 6420.14

即大約 -3.0%。

而8/18安碩恒生科技股價$12.97，和8/16安碩恒生科技NAV$13.416，差距都是 -3.3%。故ETF3067跟大市，大約只有0.3%的誤差，唔算係好大。

其實一般大型ETF，好少會出現較大誤差的情況。主要係一些冷門和不活躍的ETF，才有機會出現。

如果真係有較大折讓，而個ETF本身都有投資價值。你可以因應當時平貴，去決定注碼。因為我地唔係短炒，這個折讓純粹係多個機會，令你找到別人不為意的平宜貨。

------------------------------------------------

Q22507：

龔sir 你好，已經過左半年，希望老師審視我既投資組合

2800 @ 27.5 2784股
066 @ 44.5 1402股
2388 @ 28.3 1000股
1211 @ 44 205股
1177 @ 7.7 1200股

788 @ 1.28 18000股
178 @ 2.21 6000股
1212 @ 7.6 4000股
1257 @ 3.2 5000股

1972 @ 21.05 1200股
1928@ 27.8 800股
9618 @ 290 50股
3067 @ 13.9 800股

（1） 持股組合有沒有問題？需要改善？

（2） 持股數目會否太多？

（3）月供緊788仲可以繼續？

（4）想往後賣出2388/178，再轉去其他增長股，可以嗎？

（5） 現在科技股有回落，增持3067/9618得唔得

（6）增持1972/1928/1212/1257可以嗎？

謝謝老師指導

龔成老師︰

1) 無問題，你長線持有就可以。

2) 有少少多，最好集中係10隻左右。

3) 可以，但你預佢增長力無以往咁勁，算係潛力股和平穏增長股之間，依然有長線投資價值。

4) 中銀香港(2388)有質素，唔建議咁做。而莎莎(0178)唔係無質素，但比較受經濟週期性影響，不宜持有太多。如果你想換碼，可以等大環境明顯好轉﹐佢有較大回升時，減持少少。

5) 如果你資金較充裕，現時加小注都係可以。但若資金不多，可以等佢地回多少少先，才考慮加注。

6) 這些股票，現價都合理，你最好等佢回到同你上一注，係有10-15%回調幅度，才加注會較好。

另外，中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值，但不建議太過大注。始終都有風險，同時可能仍會弱一段時期。

------------------------------------------------

Q22508：

龔成老師您好，又想找您問問題。首先，好多謝您回覆所有網友的問題，又會公開俾人睇，您的每個回覆都充滿了正能量，每次我唔開心都會不停睇您的帖子。

我27歲，一事無成，靠努力有4份工，接近番足7日工，每年TOTAL放10全日假都無，雖然D工都係兼職、炒散、正職係低人工的文職，月入都係共$15,000-$17,000左右。

睇左您個page2年左右，由短炒變長渣，由輸好多錢變打和，好多謝您。

現時股票有
12(佔投資組合13%)、
257(佔投資組合7%)、
386(佔投資組合9%)、
728(佔投資組合7%)、
1448(佔投資組合8%)、

1800(佔投資組合6%)、
2388(佔投資組合15%)、
3868(佔投資組合6%)、
3320(佔投資組合6%)、
1(佔投資組合23%)

Total $250,000, 帳面(-5%)

現金$120,000(全數可投資，不用作流動現金)，每月儲$8,300左右，每年股息約$11,000，全數會再作投資

股票好似有D多，但我唔會再買新股，目標係上述10隻股票，平均每隻佔投資組合10%

因為我成日為自己工作好唔開心，所以我目標31歲左右有100萬，之後唔再儲咁多錢，再搵其它開心工作。而果100萬希望之後每年複利息6%增長，

我65歲時就有6,800,000左右，加埋MPF應該有8,200,000，而退休後每年可以用$740,000左右(如果計2021年之後每年3%通帳，我65歲的$740,000即是現時的$240,000)。

如果我現時(27歲)根據每月儲$8,300左右，股票250,000左右，現金120,000左右，再複利息投資上述10隻股票，我31歲時可以有100萬的機會大唔大?

如果我31歲時有100萬，之後不儲蓄但不停複利息增長，我65歲時有6,800,000的機會大唔大?

最後，請問老師有沒有其它財務建議?

萬分感謝，無名的支持者

龔成老師︰

其實你最需要多謝的人，是你自己。因為"改變"唔係一件容易的事，要很大力氣、意志和自律性，才可以做到。

以年均回報6%計，你31歲時100萬，應該在65歲個陣可以升值至720萬。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你27歲這麼年輕的年紀，我會建議先集中係有增長力的優質股(除非你風險承受能力好低)，去累積一筆財富。

而我地以長線平均回報計，每年平均合理增值，大約可以去到10-15%。若以年均10%回報計，你這100萬到65歲，應該已經升值至2000萬以上，故成事機會很大。

我假設投資回報有10%（連股息再投資），你每月投資$8300 + 37萬資產，4年後大約會增值至100萬，配合到你目標。

但較大問題係，你現時持股中，不少是收息股(0728, 3868, 1800,0386)，佢地增長力較弱，主要係收下息，未必可以做到年均10%增長。建議你將部份換碼至以下增長股，同時月供部份，都係以有增長力股票為主。

你可以投資「平穏增長股」和「潛力股」，去創建一個增值平台。你每月5成儲蓄，即是用$4150做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有12萬現金和每月所儲倒的資金，就等大市出現一定程度的下跌，才大力度掃貨，然後長線投資。

到你退休時，將這些股票換成收息資產，去支援你退休生活開支，咁就可以。

------------------------------------------------

Q22509：

阿sir,想問下如果想股換股，因為資金不足

1. 857中石油（賺錢）
2. 788 中國鐵塔 （蝕錢）
3. 9960 康聖環球 （蝕錢）

其實係咪應該將蝕錢的轉倉？如果按質素我覺得可能康聖會係最差？初時諗不如用中石油轉，但如果佢係呢3隻當中最好質素，即佢賺錢能力較強，又冇理由攞佢嚟轉，求賜教，謝謝

阿sir想問呢隻1799可入嗎

龔成老師︰

其實現時係賺錢，定係蝕錢，唔能夠代表佢質素好壞，最終我地都要睇翻佢企業本質而定。

3隻當中，中國鐵塔(0788)最有質素，雖然增長力比以往弱左﹐現算係水桶1至2，但長線投資價值依然存在，建議長線持有。

中石油(0857)都算有質素，但這始終是商品企業，產品沒有差異性，只能賺取合理的利潤，不算是最高質的類別，投資價值中等，這類股不宜持有太多。

石油是商品，當中沒有差異性，佢地要將石油賣出，只能跟國際油價，這令佢處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由價佢會比較受油價影響，自主能力不強，加上油價中短期可以好波動。長遠增長力只屬中等，只宜小注投資。

康聖環球（9960）質素同樣只算是中等。

佢主要於中國向醫院提供6個主要專科領域（包括血液學、遺傳病及罕見病、傳染病、腫瘤、神經學及婦科）的臨床檢測服務，亦提供ＣＯＶＩＤ－１９相關檢測服務及常規檢測服務。

佢亦向合約研究機構、臨床試驗贊助商、製藥公司及研究機構提供臨床檢測服務、諮詢及評估服務，以及標本儲存服務。佢係在武漢、北京、上海、成都、天津及烏魯木齊設有7個實驗室。

其實質素都有的，但不算好高，企業獨特性未算好強，以及這刻佢在虧損中，往後的發展仍有較多不確定性。這類股都一樣不宜投資太多。

如果你0857和9960持貨佔組合較多的話，你係可以沽少少，換至其他優質股。

但緊記我地創建組合時，唔好太集中係單一股票，要平衡。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

------------------------------------------------

Q22510：

老師你好，現年已經27歲，收入35k-45k左右，感謝老師一直以來的意見，現已累積超過100萬的資產現持有以下資產：

股票約60萬左右；

銀河持有2216 股，平均價為55.5；
港鐵持有1888 股，平均價為41；
中國鐵塔持有56814 股，平均價為1.22；
中生製藥持有6444 股，平均價7.7；
比亞迪持有258 股，平均價為48.5；
錦欣生殖持有1144股，平均價17.3；
盈富基金持有9148 股，平均價25.4；

現金10 萬左右；

派息基金Z07 24萬左右（五年內離場要手續費，所以至少放五年，平均每個月7%息）；

危疾（有儲蓄成份，為期25年）、醫療（消耗）以及儲蓄（為期10年，每月$3000）一年合共保費大約6～7 萬；

央積金大約4 萬（政府每年如果有盈餘會加注幾千，到65歲才能拿）；

1.請問以上股票是否有質素可以持續月供？如仍有質素，以上股票比例上需要調整或加入什麼，可以有更大收益？

2.在以上各方面配置中，老師有什麼建議？（風險承受程度中上）

龔成老師︰

1) 現時股票都有質素，但錦欣生殖(1951)不確定性較高，而且現價偏貴，不宜月供。

比亞迪(1211)現價偏貴，最好回少少先重新月供。但如果真的好想儲貨，同時現金足，現價以小注模式去月供，都可以的。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

2) 以上持股配置，問題不大。只要你跟我建議，調整一下月供計劃，咁就可以。

但你27歲很年青，應以增宜為主，派息基金增長力不高，其實不太適合你。但由於離場要收手續費，你照持有都可以，但唔好再加大投資。

------------------------------------------------

Q22511：

！我已經預留登記了星期六班，希望到時學到知識可以識運用！

龔sir, 可否多問一樣關於派息基金，因為這陣子很多不懂投資的同事/ 準備移民，諗住留筆錢比在港父母的朋友都向保險公司買呢類每月派息的基金當家用比父母。

請問您覺得這類型投資如何？值得作為資產配置的一部分嗎？謝謝

龔成老師︰

這類派息基金，其實分好多種，性質上可以成為退休人士資產組合的其中一員。

但問題係，你要明確知道，這些基金派息率是否保證。另外，基金本身有無賺息蝕價的風險。

用這種方法去支援留港父母生活，係一個方法，但必需了解清楚背後條款，以免失算。

------------------------------------------------

Q22512：

我努力睇你既野.可否分柝我既分配是否有問題. 我覺得無咩收息.....加唔肯定幾多錢入注。

2000sh [email protected]高價今明年內賣?
200sh -9988
200sh -1833需再入注?
600sh -0823 應幾錢再入@59.15/66.45
1000sh [email protected]應幾錢再入

以上兩隻我之前等現在升哂
3000sh -3067
500sh -6993
150sh -2807
20000sh -0788
[email protected]可再入注？

應該入金沙?0548/0778？ 收息?

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。

你上述股票，都係有質素(2807相信係打錯編號)，若你係年青至中年人士，這組合係可以長線持有。

除非佢地去到好貴，或者質素變差，否則係唔需要沽出。因此，你3088照長線持有就可以。

至於平安好醫生(1833)佢有質素，但不確定性大，唔建議持有太多。

而領展(0823)有質素，你每注相距大約10-15%咁入就可以。但留意任何股票，都要控制個比重。同一行業或企業，不要超過組合15%和30%，以免有過度集中性風險。

港鐵(0066)現價在合理區中上部，你有貨在手，除非你資金好充裕，否則等佢有明顯回調才加注，會更好。

ＧＸ中國電車ETF（2845）現價在合理區頂部，暫時不宜大注，你等佢回多10-15%才考慮。

另外，你有個較大問題，就係你而家太偏重左係潛力股(3088, 9988, 1833, 3067, 0788, 2845)，佢地雖然有增長潛力，同時風險都較高，不宜持有過多。

假設你年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q22513：

龔SIR, 想問你關於你當時還在儲貨比亞迪既時候, 你話曾經比亞迪試過由$88跌到$12, 想問你當時有冇諗過自己既決定係錯?

因為 公司股價跌,跌左再溝, 又跌再溝, 有好多時會越溝越錯,所以先了解下你當時對比亞迪既諗法係點? 因為當時0幾年既時候

如果電動車將來因為技術上或者其他原因普及唔到, 好可能對比亞迪尼間公司成個諗法就錯唒, 所以好想知你當時考慮左咩因素去決定繼續增持?謝謝你龔SIR

龔成老師：

睇長遠價值，不是睇短期股價。

十幾年前，我已大量睇電動車行業資料，分析行業及技術發展，我見到電動車的最大問題，就是電池技術與配套。

如果這兩大因素解決，電動車一定能普及，因為佢比用油平好多，同時更環保。

然後，我分析電池技術與配套，這兩大因素，中國的配套在近10年間，不斷建設，例如充電設施等，在全球行得較多，多年前已相信，中國這方面的配套成熟，是遲早的事。

之後就是分析電池。

比亞迪（1211）本身就是造電池起家，之後再造車，是全球擁有較高電池技術的車企，其實佢的電動車，2007年已出產，當時已見到唔算差（雖然與市場化有距離），但佢過往的電池研發好強，因此可以推論，只要比時間佢，電池技術一定會提高，因此成功只是時間問題。

我地分析，一定要著重大方向，多年前，當其他人仍停留在「比亞迪的車會爆炸」，我就是分析，這個爆炸的原因是甚麼，是否核心因素，還是能解決的問題，我以「長遠的角度分析」，而不是這刻，我見到佢受短期不利消息，令股價大跌，就會增持，我從不擔心佢股價跌，因為我集中睇企業。

投資潛力企業，就是「這刻未成熟時買入，耐心持有，等企業成長」，所以，我地的分析點一定是長期。

------------------------------------------------

Q22514：

龔成老師你好，暫時冇乜錢，買住一隻先

3067係咪應該長期持有？

龔成老師︰

安碩恒生科技(3067)可以，這隻股票有質素。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你現先買一隻，係可以。但長線計，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22515：

龔sir, 父母50多歲，冇任何保險，如果基本保險要每人2000蚊一個月左右，係唔係都最好買？

龔成老師︰

其實保險係我地理財中防守部份，主要係將一些健康風險，轉移比保險公司。所以，保障型的保險，我地係需要的。

至於$2000值唔值，你要睇翻本身個保障，係唔係真係切合你家人需要而定。

若係儲蓄類保險，我就不太建議，始終增長力不及優質股。除非你本身好保守，或者完全唔識投資，否則就不太建議。

------------------------------------------------

Q22516：

龔sir，你好！一直有關注你嘅post、YouTube Channel ，每日會花一小時去睇你解答問題同研究點可以令自己在股票市場進步，去學長線投資，

現時手頭上新經濟股比較多，都係年頭高位買入，想請教一下你嘅意見！

本人手持150萬左右現金，尚有250樓按要償還，月入3萬+，目標係3-5年後還清樓按再購入600-800物業，股票資產50萬，另100萬現金流

手持股票如下：

9988@270 400股
700@674 100股
388@499 100股
[email protected] 6000股
[email protected] 100股

[email protected] 7000股
6185@344 200股
[email protected] 5000股
2400@95 600股
[email protected] 3000股

好多股票都係高位買入，組合亦比較亂，想問應該如何再配置？等升返還是放部分等底位再吸納？

最後想同你講聲多謝，一直keep住睇你嘅post 令我自己都不斷去學習，以前上網無所事事咁過，依家會多思考點去進步，令將來的生活變得更輕鬆，

我相信越努力越幸運，多謝你令我思考點去做個有錢人，而唔係單單停留喺「想成為有錢人」嘅階段，呢啲都係睇你post學返嚟，哈哈，再次衷心謝謝你花時間睇我嘅留言

龔成老師︰

我地持有一隻股票與否，只會睇佢長線質素。同時我地唔會因為買貴左，就先沽出，等平D買翻。因為中短期走勢好難估，會受很不多因素影響，有些因素甚至係同企業本質無關。

如果你而家沽左，無人可以保證佢係唔係會再回，佢可能一直升，咁你就要用更高成本，才可以買回這隻優質股。

你現時持股，都係有質素，應長線持有。但有個較大問題，就係比較偏重潛力股。佢地雖然有增長潛力，同時風險都較高，不宜持有過多。

同一行業佔組合的比例，不宜多過30%，如果你上述有些行業過了這比例，就要減持。

另外，見你不少股都在貴的價位買入，你要大幅強化企業估值及投資時機的能力，又或日後多用分注、月供等投資策略。

如果你係年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

現貨可以不用沽，但未來時間，你就要加大翻平穏增長股部份，令組合更平衡。以下平穏增長股，現價合理，已可分注。

另外，微盟集團（2013）、心動公司(2400)、康希諾生物(6185)和中國飛鶴(6186)不確定性較高，不宜持有太多。

現時大市在合理水平，你可以多用30-40萬，買入一些平穏增長股。餘下資金，我地就等大跌市，才出手掃貨。

至於物業投資方面，現時按息很低，你唔洗急住清還樓按，反而應該用資金去投資，爭取更大回報。

而投資第二個物業時，緊記要確定買樓同時，你留有一定優質股作增值。否則，你成個財富組合，就會偏晒去物業個邊，造成過度集中性風險。

記住，投資路上係要一直保持學習，長線回報才會好。加油!

------------------------------------------------

Q22517：

老師，可唔可以講解下1825同2944。如果跌到0會點架？

龔sir, 我最終賣咗0136， 另外一隻1825，止蝕離埸，蝕左20万

好彩還有隻1211 保住，15x-17x 入手，入咗6 手，仲有D小注0285，1830，2388， 3319，3918 ， 坐艇。我以後都聴晒你講。

龔成老師︰

美臻集團（1825和2944）過往業務一般，之前因為有炒作，現在只係回調翻去較合理水平。不過以業務發展來分析，這股的投資價值，只是一般般。

正常股票唔好跌到零，點到有些剩餘價格。但由於這股質素好一般，你沽出都係可以。長線換至其他優質股，回報會更好。

至於餘下持股，都係有質素，你可以長線持有。

但組合現時較偏重左係潛力股(1211, 0285, 1830, 3918)，而且非常集中比亞迪系股票，佢地雖然有增長潛力，同時風險都較高，不宜持有過多。

若你偏年青，潛力股可佔約5成，餘下應用以下平穏增長股。若你投資經驗較淺或較近中年，潛力股比重，要再調至3成以下。

未來時間，你就要加大翻平穏增長股部份，令組合更平衡。

------------------------------------------------

Q22518：

你好龔Sir ，你對ESG 投資有咩睇法？邊隻股票好值得投資

龔成老師︰

ESG，就代表環境、社會及管治。是近年多左人討論的一個項目。

這部份係一些非會計上的因素，而這些因素，係有機會影響企業長線經營和發展。

投資者過往選擇投資項目，主要係分析企業長線盈利表現。但近年已開始愈來愈重視ESG，企業能否在賺錢之餘，對社會和環境作出一定貢獻。

而且，全球法律改變，人們對環境關注度增加，都令企業對ESG的實踐造成推動力。但現時亞洲ESG未算好普及，主要都係一些歐洲企業，佢地對ESG關注度會較高。

其實我地係分析企業時，除了財務數據，我地都會分析企業和相關行業本質，如果ESG因素係對企業有長線影響，我地都應該將佢加入估值考量之列。

而我分析無特別用ESG表現，去做分類。但ESG比較多人關注會係綠色能源，你可以向這方向找投資機會。

------------------------------------------------

Q22519：

你好， sir 1.其實700 我453入貨有無錯？

1.其實700 我453入貨有無錯？
2.下一级支持位在哪？
3.rsi 好似無乜用
4.牛熊分析恒指没乜用
5.恒指25000是否有支持？
6. 700,6618那個較好可以吸？

Thx you

可否比d意见

我又放左

龔成老師︰

1) 騰訊（0700）你買入價合理，但你預佢中短期會較弱，長線持有就可以。

2) 我唔會睇支持位，只會睇企業質素，去決定長線持有，還是要沽出。

3) RSI係一些技術分析，只係短炒架人用。我唔建議你用短炒方法去投資，因為中短期會受好多因素影響，只有長線持有，才可以有效反映企業價值出來。

你見全球最賺錢的投資人巴菲特，去都係只會長線持有優質股，唔會做短炒或者用技術分析。

4) 牛熊分析，可以作參考，但實際用途唔大。因為其走向不一定順序的，因為有好多外在因素影響，我不會用「預期」的方法，去估股市、股價點發展，

我只會用「測量狀態」這方法，分析現時處甚麼位置，從而作出策略，但就不會預測。

5) 25000點算係合理區較底位置，有一定值博率。但都要睇翻個別企業平貴，因為大市在合理水平，唔代表企業都一定係合理價，有權可以係好貴。

6) 騰訊（0700）算係合理區中部，而且整體質素都較高，值博率會較高。而京東健康（6618），不確定性較大，無貨現價可小注，但長線不宜佔組合太大比重。

------------------------------------------------

Q22520：

抱歉老師，我發現自己打錯字…是0688 （中國海外）15.3入2000股

不過謝謝老師的詳細解答 我是因為看過老師在fb的發文或閲讀過老師的書籍才有些少能力判斷某些公司的前景。縱然現在大市回落一些，但仍然二千元盈利。

我家人説很多人在這段時間都是虧損 所以還得感謝老師

其實建行是我還在在學期間聽信祖母的意見買入的 現在 家人也建議我待它升回6.X元時便會沽出所以股分。我也有這樣的打算

因為在學期間沒有很多的收入，不太敢輸錢。所以只是把積蓄放在一些收息股上

龔成老師︰

中國海外發展（0688）不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。

可以視這股為平穩型的企業，中短期可能因樓市一般而股價一般，但長遠，仍是可以的，你可以持有。

至於投資初期，買一些波動性較細的收息股，其實都係可以。但由於建行(0939)你持貨都唔少，為免佢過度拖低你組合增長力，你都係沽少少，換至其他我之前建議的優質股，咁會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21381-Q21400）

Q21381：

龔Sir 你好！ 請問如何計算企業價值呢？

700 騰訊為例，用NAV (778M/9.6bn no. of share)去睇，2020 佢只值八十幾蚊人仔，化返做HKD 都係一百蚊左右。

而家股價$600, 係咪當中包括左好多市場情緒同對未來憧憬既估算？想請教你通常點去量化。 感謝

龔成老師︰

你上述所講的價值，只是企業的「資產價值」，這是衡量企業平貴的其中一個方向，但絕對不是唯一的方向，同時，並不是所有企業都適用的。

在些企業，其資產價值與盈利能力、長遠發展未必有太大的關係，市場會較著重企業的長遠發展力，多於擁有多少資產。

簡單來說，有些資產有一定的市場價值，有些資產無太大的市場價值。有些企業長遠的發展及盈利與資產有一定的相關性，有些企業則無太大相關性，有基本的資產後，長遠的發展較受大環境影響，而不是有多少資產。

騰訊(0700)偏向係潛力股類，市場會著重將來，而不單是過去資產，同時會著重其業務價值。

至於點去計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21382：

老師現年48歲，月入4萬8，想每月投資2萬

有一層做咗400萬按揭嘅樓，已租出，租金可cover 每月銀行還款。

有現金50萬
冇股票（因曾輸過）

有保險基金單50萬
想5年後移民，想喺呢幾年做進取嘅投資！睇咗你嘅資料，但遲遲未決定到點入手！

銀行職只又不時想我買保險產品！
請問有咩建議？

龔成老師︰

我地進行理財，應說建立一個平衡的組合，你現時有物業、保險基金、現金，但就缺少了股票，因此應該增加翻股票。

你過往投資失利，相信是由於未了解股票最基本原理，只要你往後明白，投資股票就是持有優質企業，長線持有等企業成長，就得。同時，要建立平衡組合，不是賺差價。

另外，你話「想5年後移民，想喺呢幾年做進取嘅投資」，要留意，財不入急門，加上5年時間不算長，反而不能過度進取。

以你現時情況，我建議你以「平穏增長股」 去創造一個增值平台，在這5年為你的財富增值。

現在你每月先用5成儲蓄，即$10000做月供。其餘先儲起，用一邊月供一邊儲蓄的策略。

月供方面，你可以選擇投資這些平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

到你將要移民的一年前，再慢慢沽出手上持股套現，就可以。但唔好到要走個一刻才一次過沽貨，咁樣會令股價波動性風險大大提高。

至於"保險"只係理財中防守部份，買足夠保障就可以，增值可以留比優質資產(如優質股、物業等)去做，個效率會較好。

你現時那份保險基金單，可以睇翻基金的投資策略，所投資的資產類別、投資策略、風險程度、市場、以及過往的表現(可以睇佢過往5-10年，只回報係比主要投資市場高，就可以考慮繼續投資)。

------------------------------------------------

Q21383：

Hello 龔sir!我現有大概HKD3百萬現金及數百萬股票。

一個人租樓住（租每月HKD20K），無小朋友，考慮3 年內退休，其實應唔應該再考慮買樓自住（死後層樓冇用）？

如買樓就無晒現金同要賣股票了(50 歲,就退休好難做按揭)，變咗3年後唔夠錢退休。。。

繼續租又好似好唔安穩因為租金會一路升，同業主可能會收樓...矛盾中 (退咗休會想讀吓書，所以都有不少洗費)

龔成老師：

以你的情況，租樓會較好，第一，你現時做按揭未必做到，因此去唔翻現在的生活質素，第二，你無後人，因此投資物業的誘因會減少左。第三，買樓後會用盡資金，反而風險提高左。

租樓雖然較好，但坦白講，每月$2萬的租金，長遠都會對你有一定的生活壓力，所以，可能要轉一些較平租的地方。

如果利用$300萬，投資不同的工具，收息股、低風險基金、年金、債券等，建立一個組合，如果能平均有5%現金流回報，$300萬即是每月收息$12500，都算是可以幫你提高現金流。

當然，你到時可以再利用手頭上的股票，進行配置，調整一下，如果持有一些現金流強的類別，就可以增加你到時的現金流。

你要思考一下長期的收入及支出情況，是否要調整生活質素，又或要日後想方法增加收入，或略為延遲退休。

------------------------------------------------

Q21384：

我大學嗰時讀嘅Investment，好似無乜用。

龔成老師：

大學課程，其實我都有讀過「財務系」，坦白講，學校教的是學術，我會認為有基本作用，但睇巴菲特相關書，以及年報，會有用得多。

------------------------------------------------

Q21385：

我想問阿sir，睇youtube聽講你以前未價值投資法時，試過儲一筆錢又蝕左佢，儲一筆又蝕左。

其實，因為我剛剛炒衍生工具蝕光了投資户口的錢，一陣約見了心理醫生了，想問下你當年總共蝕左幾多錢？

同埋蝕左幾多次，可以分享下你的心路歷程嗎？

我蝕左本金十萬，還有14萬儲起在家人到，以前都試過買牛熊證蝕曬錢，所以無將所有錢拿去投資

因為以前蝕曬錢，所以好幾年吾再投資，今年2月入返市，你都知呢排跌市，一買就蝕，實在無法子，又買返衍生工具，結果賺13萬，但後來又蝕返，想追又一直蝕，最後 total lose

睇醫生是因為炒牛熊證心理承受吾住了，需要求醫，好後悔買返衍生工具，但跌市蝕自己又控制吾住

龔成老師：

我20年前，都是短炒者，投機，玩幾年，輸足幾年，當年未算好有錢，相信蝕$10萬左右（其實唔記得），但當年已是全部身價，應該話輸左幾次身家。

之後我明白，衍生工具原本發行商食水好深，散戶只有做水魚，所以，我決定以為唔玩衍生工具。之後只做優質股，長線投資，就開始不斷賺錢。

我之後做銀行同證券行，見大部分輸錢的客，都是偏向短炒、玩衍生工具的！

當然，你問我有無人贏錢，是有的。但就我觀察，長線投資贏錢的人，比短炒的較多。

你這類人，我在過往做銀行時見唔少，因為玩衍生工具輸身家，所以，點解我現時，不斷強調再強調，不要短炒。要買優質股長線持有！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的，佢都唔用技術分析。

因此，我相信長線投資，是真正助我地贏錢的方法。

我建議你倍止所有衍生工具投資，你現時同賭錢無分別！

之後，慢慢儲現金，月供一些穩健的股票，或ETF，例如盈富（2800）、高息基金（3110），我相信是適合你的。

------------------------------------------------

Q21386：

龔成老師你好,多謝您一直鼓勵我地要投資理財,同時經常比正面的信念我地,實在感恩, 自從留意你FACEBOOK後

本人33, 由2019年開始投資,開始時都有小小升調,但最近大部份買入的股票都回落,現時股票價值同入的資金差不多,之前跣時用了大部份資金,現時手持現金好小,

以下是我的股票組合,希望你能給予意見應該如何調配, 感恩

2800 @ 25.82 4000股
3067 @18.52 4700股
1038 @53.72 1600股
0066 @43.95 1706股
1177 @7.21 2800 股

3033 @ 8.005 1600 股
1810 @26.65 400 股
3188 @52.6 200 股
1038/3067 虧得最多,是否需要減持,謝謝

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

股票中短期上落好正常的，不用太過理會，睇「企業長期質素」就得。

現時你的組合，都是有質素的，可以持有。但我見比例上，潛力股類別開始有點多，你要注意翻，因為這類股的風險較高，股價上落會較大，因此在比例上不能太過多。

長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。你持有就得。

至於安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你一定要睇長線，不要太著重短期股價，同時由於現價仍唔平，所以如想加注，一定要慢慢分注。

最後，如果你現時持有現金比例太多，就不要投資住，儲下現金先。

------------------------------------------------

Q21387：

龔成, 您好! 手上持有渣打2888 兩年 - 500 股 @HK$54唔係好多, 見派息不好, 又沒甚麼特別消息.......是否應該放晒佢呢? 謝謝 (私人回覆OK)

龔成老師：

渣打集團（2888）質素只是一般。

雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。

投資價值只是一般，我會建議考慮其他更有質素的銀行股仲好。

因此，你可以考慮部分或全部，轉其他。

------------------------------------------------

Q21388：

您好！現時手上有800股1928(金沙)於$32時買入，現考慮趁行業復甦前增持。

不過看過它2020年剛出爐的年報，它的年末現金由2019年的24億美金，大跌至8.6億；這個數字比起它的流動負責14.1億還要少。

一直以來您都看好澳門博彩股，但面對現時的情況，自己對它變得有所保留，甚至企業本身「捱唔住」。請問您認為這個想法是否恰當？

龔成老師：

上述的情況，會令風險度略有提高，因此會少少扣分，但未至於對佢有倒閉影響。

第一，佢規模好大，品牌、資產、現金流強，要在市場進行集資，好易。

第二，佢負債比率未算好高，要再問銀行借貸，有好多空間。

第三，佢持有的酒店等資產好有價值，如果真的經營環境差，要賣出套現救企業，絕對可以。

第四，佢本身現金流好強，只要澳門好翻少少，佢都有一定的現金流，不斷有資金翻。因此，唔需要太過擔心。

------------------------------------------------

Q21389：

龔sir你好。Follow左你好耐，亦上過你堂，好遺憾無早啲認識你。

之前有買1211，但因為唔夠耐性錯過左佢爆升時間，之後16左右買吉利升左一倍都無放。

因為唔想再錯過，而家佢跌到得$20左右，請問你覺得吉利前景如何？值得再長揸嗎？謝謝

龔成老師︰

記住，我地投資優質股，一定會係長線。因為賣出股票最大的風險，就是買唔翻。

不少人會以為「若果現在賣出 到時再以低價買入」，中間可以賺到個波幅。

但「到時再以低價買入」？真的一定會預期中發生嗎？？？

就好似我經常說，700多年不斷上升，388升100倍。如果我地升少少就沽貨，而唔係用質素，去決定是否持有，我地就無可能賺到近100倍回報。。

所以，你現時長線持有吉利(0175)係正確。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂位，股價波動，現貨可長線。如果現價入貨，小注都得。

------------------------------------------------

Q21390：

老師你好，一直遵從你的指導每月將資金一半用來月供，另一半用來儲現金等大跌時入貨。

由於不知道等到何時大市才大跌，可能一等就半年甚至一年或更長時間，就覺得把這筆現金放在銀行的回報率太低了。

請問老師有沒有推薦的現金替代品，可以令這筆現金可以比放在銀行有更高的回報？謝謝！

龔成老師︰

無錯，我地唔會知道下一個大跌市，係何會出現，可能係1,2年後，但同時間可能就是下一天。

因此，我地最理想係持有現金去等待，因為現金流動性最高。

若你將這筆資金，用來買了其他理財產品，要贖回可能需要些時間，甚至會被收取一定的提早贖回費用。

而用來先買部份較穏定的股票(如收息股)，我都唔建議，因為再穏定的股票都有波動性，到時會跟隨大市下跌，以你可投入資金減少。

所以，我建議你都係持有現金最好，最多可以將部份用作短期定期。我地投資唔好睇太中短期，要用整個組合的長線發展機會，去做考慮，因此用現金等待，會係較理想的做法。

------------------------------------------------

Q21391：

龔Sir您好，我夫妻倆在澳門從事教育工作

對於投資沒有太多觀念之前都是拿錢給長輩在國內買樓買車位。

1. 去年疫情開始後股票大跌後，開始學買股票，我該如何學起？

2. 該從你的哪本書看起？

3. 之前做過一些短炒確實賺到錢，但是現在回頭看若當時沒賣掉那些股票的話現在賺更多，現在決心要開始好好學理財放長線。

我現在這組合可以嗎？會不會太保守還是太高風險？

4. 我該繼續專心供一隻還是先分散幾隻建立好組合後再慢慢提高持有比例？

夫妻倆32歲 未有子女
夫妻倆年收入：約110萬hk

現有流動現金約: 20萬
儲蓄險：40萬
(今年剛繳完2025年後開始拿利息)

國內放租樓盤：廣州2樓、中山1樓、中山3車位
(租金拿來當作給長輩的家用，全部以交清貸款)

固定支出：
在澳租樓(11000HK)
兩人保險每年約:10萬hk
年收入至少15~20%捐給慈善機構
無負債

之前
每月供 5000
00066 港鐵 或 00388 港交所

現在打算每月拿8000出來月供股票

00270粵海 或00066 港鐵 $2000 2選1
00087 太古股份公司Ｂ或 港交所 $3000 2選1
9988 阿里巴巴、 00175 吉利汽車、01211 比亞迪$3000 3選1

現有股票 組合總值約16萬HK。組合總表現： 約+7%
分配如下

00066 港鐵@45.172 18.9%
00388 港交所@406.930 19.4%
00694 北京首都機場@5.240 7.28%
00883 中國海洋石油$7.648 10.02%
01398 工商銀行@5.240 3.32%

02588 中銀航空租賃@60.9 8.67%
02800 盈富@24.2 17.6%
00270粵海投資@12.240 2.4%
01810 小米集團 @28.109 12.33%

龔成老師︰

1) 就初學者而言，你要加強吸收知識，多閱讀理財類別的工具書，以及多接觸財經新聞，而進修相關課程亦是重要的知識來源。

另一問題是價格，初學者未能捕捉股價的高低，所以，策略上宜用分注買入的方法，將一注資金分成多注，然後在不同的價位分別買入，這樣就可避免一次過在高位買入的風險。

2) 你可以先睇我寫架"80後百萬富翁"、"財務自由行"和"股票勝經"，都適合初學者。之後，才看我其餘9本書。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

3) 正確，優質股的確係長線持有，才會有最理想的增值效果。

我地做財富增值，除左講增值能力外，也要注重成個組合的平衡性，當中要包含不同的優質資產(如物業、優質股等)。

你現時組合，明顯係偏重左係物業類，未來要增加優質股的投入，去令組合平衡翻。

而"保險"只係理財中防守部份，買足夠保障就可以，增值可以留比優質資產(如優質股、物業等)去做。現時供完的保險可以不變，但未來唔好投放太多資金在儲蓄類保險產品。

我先講你現時持股組合，北京首都機場股份（0694）、中銀航空租賃（2588）和中海油(0883)本身都有質素的，但只屬中等，不宜持有太多，暫時唔好再加注。

另外，我地組合唔好太偏重係個別企業或者行T%，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

你現時有個別股票，港鐵(0066)和港交所(0388)係超過這個比重，但由於佢地好優質，所以唔需要沽出，只要暫時不要加注，讓新資金慢慢調節就可以。

但盈富(2800)係一個包含55間不同行業的股票組合，故不受15%所限。

新月供組合方面，你可以用粵海(0270)，因港鐵(0066)已有一定貨。再加港交所(0388)，而餘下3隻，阿里巴巴(9988)會係3隻中波動性較低，如果你想進取D，可選另外2隻。

但現時比亞迪(1211)偏貴，不宜做月供。你可以用吉利(0175)或GX中國電車（2845）代替。2845這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

另外，我建議你加入一隻盈富(2800)，用佢做主力，可以令你個組合平衡性高D。

你現時用於月供金額，相對你們收入比例唔算高。以你年紀，應盡力做好財富增值，盡可能將閒錢，都放在投資計劃上會較好。

現時大市只在合理區，每月儲蓄宜先用一半去做月供。餘下一半和20萬就等大跌市機會，才入市。

4) 我地唔好成個組合，只集中係1,2隻股票身上。(當然，盈富除外。)

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21392：

老師，我今年32歲，有兩個小朋友，家庭每月收入30K，持有下列股份。

想問個倉比例合唔合適？有無邊隻唔應該再等？要唔要減持？

如果想睇你啲書，你推薦先睇邊本？
多謝！

9988阿里巴巴248 @300
9618京東集團327 @200
3888金山軟件60 @1000
0285比亞迪電子52.6 @1000
0327百富環球8.2 @4000

0880澳博控股9.8 @5000
3988中國銀行2.9 @120000
0914海螺水泥50 @2000
1530三生制藥7.55 @5000

龔成老師︰

我地係創建一個財富組合時，最重要係有優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

現時你持股中，三生製藥（1530）和百富環球（0327）質素算係中等，不宜持有太多。

安徽海螺（0914）佔組合比例開始多，不宜再加注。

另外，我地個組合唔係可太偏重於個別行業或企業，相同行業不可佔組合多於3成，而單一企業不要高過15%。

你現時中行(3988)明顯係佔比過重，而且此股主要用來收下息，唔會有太高增長力。以你32歲計﹐此股太保守，你應先做好增值部份。

因此，你可以慢慢將此股，換碼至其他較有增長力的優質股。

其餘股票都有質素，長線持有就可以。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21393：

龔Sir,我啲股票比較高位買入，家陣坐晒艇，想你幫忙睇睇

9988，均價285
1810，均價29.27
1833，均價116.7
1024，1手價291（250入見穿左240即斬，導致均價升到呢個位)

除左快手之前想短炒（但依家都變長揸），其他一直都打算長揸或再加注。

龔成老師︰

現時你全部股票都在虧損狀態，好明顯你投資方法上，出現左核心性的問題。

首先，記住我地投資係長線持有優質股，而唔係做短炒，去賺差價。

見你不少股票都是較高位買入，相信你較易受市場氣氛影響，同時你由於未有企業估值能力，因此在貴的價位買位。

這些股票雖然帳面值係虧損，但有質素，你可以守。但若個別股票，係佔組合比重好多，就要沽出部份去平衡風險。

建議你在再投資前，先學好正確的財富增值理念，和投資相關知識。你可以睇我寫架"80後百萬富翁"、"財務自由行"和"股票勝經"，都適合你這類初學者。

就算學好，在經驗較淺時期，我都建議你先用月供，或分注的投資策略。等你真正有企業估值能力後，先一手手買，會較好。

------------------------------------------------

Q21394：

龔sir 我而家20歲 Year2

兩年前喺Facebook見到你，努力儲咗兩年錢，今年開始Value Investing。

目前持倉
$70.45 一手領展
$44 一手港鐵
$26.5 一手2388中銀
$7.43 一手置富
$5.41 一手工商銀行

1. 想請問可唔可以比少少意見我嘅portfolio

2.同埋港鐵公佈業務去年虧蝕。現價會否太貴？ 我需要換股嗎？

龔成老師︰

1) 你現時持有股票，都係值得長線持有。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，以你現年20歲計，你組合持股有少少保守。置富(0778)和工行(1398)主要係用來收息，增長力麻麻。你現時應先著力增值部份，故這類收息股就唔係咁適合你。現貨可持有，但不要加注了。

將來，你可以加入一些潛力股，去提升組合增長力。例如中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但由於潛力股有一定波動性，你投資經驗較淺，暫時不宜持有太多，大約3成好了。到你累積到較多經驗，才慢慢將比重提升至5成。

同時，現時大市只在合理區，資金唔好盡用。最好留有部份，等大跌市出現時，可以用來掃貨。

2) 我地去分析一間企業時，要用「長線」質素和發展去考量，唔係只係集中係1,2年數字。

上年由於疫情關係，對不少企業都造成嚴重的負面影響，港鐵(0066)也不能幸免。

但上年度佢虧損的主要原因，係因為物業重估數字，這只是一個會計上的數字。如果扣除這個因素，其實佢在營運上，是有錢賺的。

但睇翻佢長線，有質素。佢是全港唯一的鐵路營運商，加上政府會比佢地產方面的優勢。長遠正面。

雖然近年有不利因素，影響了中短期盈利，雖然會扣分，但最核心的本質不變。

睇翻資料，港鐵過往正常年份，一年可以賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。

物業發展部分，長線正面，收租部分，無問題。

因此，長遠發展仍是正面的，可長線持有。現價大約在合理區中上部，未算貴。但由於你有貨係手，如果想加注，要等佢回多1成以上，才出手會較好。

------------------------------------------------

Q21395：

老師你好， 因為不經意 在facebook 發現你， follow你 一段時間也有購買你的書籍， 對我不善理財的人， 實在獲益不少！

因為最近工作 非常艱苦 應該很快失業， 我先生已經因為身體問題，去年年尾已經失業！

所以希望用手上的現金資本，向你請教適合的投資方向。

以下是我的 財務背景， 請你多多指教!

本人50歲 ，目前仍然有Part-time工作， 但因為全球因疫情影響經濟，公司業績非常差。我應該估計會在兩個月內失業, 基於經濟問題及身體狀況，應該再有工作機會。

丈夫56歲 因為身體健康問題，2020年尾被迫退休

沒有子女

目前有資產如下:

1. 4個物業(1個自住，2個放租私樓及1個工厦放租)
所有物業合共市值 HK$2300萬

4個物業合共尚欠銀行貸款 HK$750萬
租金扣除每個月銀行供款差餉管理費及物業稅 (包括自住物業在內)剩餘HK$3600.00

2. 已經投資基金 (高風險 )$80萬
每月派息HK$3600.00

3.股票
過往20年投資股票,已經很有耐性等待，持有股票回報欠佳,種種原因，輸了很多錢 ！

因為近1年看 你facebook 和你的書本 所以決定賣了已經持有十多年 的股票， 希望重新再計劃好 ，才重新買股票作遠投資 。

目前手上只持有:
2638*5000
1038*1000
2800*1000

4.現金:HK$200萬
因為手上持有四個物業 ，仍然有銀行掛鉤存款，大概1.3%
即每月利息合共有HK$1500元

希望 保留100萬現金作為日常全活備用金

5. 人壽及各項醫療保險(所有共2人):HK$10,000.00

6.月供高風險基金: HK$5000*10年(2020尾開始供)

7.日常家庭支出:HK$20,000.00( 不包括保險和月供股票及基金)

8.投資目標:
希望利用手上200萬現金，投資股票，作為未來十年退休日常生活費。

若是中途此現金投資回報不夠支付10年生活開支， 五年後可以，減持基金換取現金 作生活費 或提取 保單內的 儲蓄 價值 昨日常生活費。

估計10後,我先生可以提取mpf大約有HK$150萬( 因為目前有接近100萬) ,希望盡量減慢賣物業資產的日期， 以作日後長遠生活開支。

9. 由現在至未來十年投資計劃-銀行月供基金:

月供費用HK$20000.00

目標 計劃月供股票分配組合內容:
1.2800盈富*$6000(30%)
2.2638港燈*$4000(20%)
3.1038 長江基建*$4000(20%)或1113長實， 請提供意見 二選一 ，那一隻較可取？
4.3140 領航標普500*$3000(15%)
4.3067 安碩科技*$3000(15%)

計劃年期: 3-5年(最少36月=HK$720,000.00)

拜託你提供意見，直接評價，我們目前的財務組合 是否恰當作為長遠退休計劃安排？

感謝你經常分享你的經驗和意見
期待你的回覆

龔成老師︰

以你和你先生的情況，由於未來就業收入不確定性較高，加上你們都較接近退休之齡，投資策略唔可以太進取。

你現時物業算係有正現金流，可持有。但考慮到若不幸有部份物業不能出租，會出現額外開支。

另外，你在整個財富組合中，太過集中物業類資產，因此在之後的財富配置，不要再增加物業類的比例，而之後亦未必適合投資太多地產相關類的股票。

係你成個財富配置上面，我地會保守少少。你係投資前，先儲下一筆最少等同半年開支的應急錢，會較理想。

而所講的高風險基金，雖然以派息率計，尚算可以。但你要了解這部份回報是否保證，而當中又有什麼風險，背後是投資什麼股票、債券或工具，你要了解清楚。

例如債券，佢是否投資的都是A級債券。唔好投資一些高收益債券，其實這些是一些評級不高的垃圾債券，風險不少。

至於現有持股可以，但佔整個財富組合比重太少。現時太偏重左係物業類，未來你要加大翻股票部份，令成個組合健康。

月供組合方面，盈富(2800)和港燈(2638)係可以，而長建(1038)和長實(1113)，我會建議你用1038，佢主要係投資一些公用事業，相對較穏陣，而且派息都理想。

而領航標普(3140)和安碩科技(3067)就波動性較高，以你現時情況，我唔係太建議你用。同時3140將會退市。

你可以在以下的「平穩增值股」+「收息股」去選擇。「平穩增值股」有平穏增長力，加若干股息。而「收息股」則主要係收息，無乜增長力，但波動性較低，會較穏陣。

但緊記，隨著年齡增加，慢慢要增加收息股的比例，去減少波動性風險。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只在合理區，資金唔好盡用。最好留有部份，等大跌市出現時，可以用來掃貨。

若然你在月供中途不幸失業，可以先停一停月供都無問題。所有投資的大前題，都係用閒錢。如果資金係用於日常生活或一些短期的必需性開支，就不要動用。要先確保好基本生活，才可以進一步做財富增值。

------------------------------------------------

Q21396：

龔成老師，本人27歲，文職工作，月入約$17000，現在想讀兼讀制大學（外國大學提供的課程，讀商業和英文的範疇，但在香港讀，有資歷架構QFlevel5,今年9月開學，學費共$12萬，讀兩年）

本人現持六萬現金，諗住半工讀。想讀大學的主要原因是增值自己英文的程度，同埋希望有張沙紙多點自信有多點保障。

但又擔心冇咩錢投資，因為要交學費同埋應該會少時間學投資（本人初學，只投資過債券），加上，27歲才開始讀又好似好遲又唔知讀唔讀得黎。

好迷惘，想請教老師意見，會否覺得我應該全副心機集中儲錢同學習財務知識/還是覺得值得一試去讀？先讀一個學期試下？

大學學歷是否很重要？
謝謝！

龔成老師︰

其實學習係無分年紀，但最重要係，這個學習所得到的，是否對你長線發展，係有實際的正面影響。

例如你現時工作的行業，要升職加薪係好需要一紙較高學歷的證書。或者課程當中某些知識，對你將來發展有好大幫助，你都可以考慮進修。

相反，如果你係純粹感覺有張紙會增加安全感，或者你是抱著"人有我有"心態"，我就有保留。你要先認清楚，這個大學課程是實質上，還是心理上幫助你。

另外，如果想增值英文，其實有好多方法，未必一定要上課程。而學習財務知識和報課程係無衝突，你係可以2者並行。

你自已先認清個情況，再決定這些錢，是進修，還是投資。

若然投資，你應該買入一些有質素的優質股，把握在年輕時，累積一筆較理想財富。債券增長力有限，不太建議你用。

------------------------------------------------

Q21397：

你好，我是新讀者，看見板面內容後，真係增長好多股票知識。謝謝你的無施分享。

本人43歲，有2個小朋友，同丈夫供緊層樓。之前貪快，已經係0175，3800，0788虧錢離場。

現手上有貨
2138 ：6000股
2333 ：1000股
0788 ：20000股 （1.27入）
3333 ：2000股 (22.3入）

請問這個股票組合適合嗎？想放棄3333 改入1516，3988適合嗎？

或是直接入你提議嘅3067（安碩恒生科技）好？
感謝你的意見。

龔成老師︰

記住，不要用自己的買入價作為何時沽出的指標。坊間經常用買入價作為何時沽出的標指，這是極度錯誤的。

沽出是基於這股已偏貴，又或沒有前景，質素有問題，而絕非由買入價決定。

因此，若你分析該企業的前景一般，才可沽出。

你已沽出的3隻股票，除了保利協鑫能源(3800)質素一般，其餘吉利(0175)和中國鐵塔（0788）都係有質素，你係應該長線持有。

現有持股方面，香港醫思醫療集團（2138）都有質素的。不過業務中短期會有少少波動，除非你現時現金好充裕，否則我建議你沽出部份，去平衡一下你的風險。

至於，中國恒大（3333）業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，你現時小注持有，都算勉強可以，但都要明白風險。

融創服務（1516）有質素的，主要在中國提供物業管理服務及增值服務。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

而中行(3988)而價合理，但佢主要係用來收息，唔會有太高增長力。以你年紀，這類股票只宜小注。

安碩恒生科技(3067)都有質素，佢係追蹤包含恆生科技股指數，有投資價值。

但留意你上述股票(除了中行3988)，普遍波動性風險都係較高。我地創造一個財富增值組合時，最重要係平衡性，唔可以偏些係一些波動性高股票。

以你43歲，都可以投資安碩恒生科技(3067)這類潛力股。但若果你投資經驗不多，或者較年長，比例就不宜太多。

同時組合上，應加入一些平穏增長股，並以之作為主力。這類股票波動性無咁高，但有平穏增長能，可以令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

------------------------------------------------

Q21398：

Hi 老師，你好，想請教你，買咗以下股票，可以比一些意見嗎？

同睇到你post 又想月供，我39歲，月糧$19,000每月可儲$2000,如果月供可揀什麼？謝謝

778
$9.09 @2000
$8.92 @3000

11
$177.9 @400

1928
$44.55 @1200
$42.5 @800

9988
$285 ,$254.4 各1@ 100

1833
$117 @100

6820
$3.78 @8000

2400
$97,$90.4,$67.8 各1手

1918
$35.95 @1000

6088
$3.18 @6000

1024
$306,$283.6 各1手

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你39歲，應先以增值為主。你現時買股票，都質素。

但當中，融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，自己要控制好注碼。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，現貨可持有，但暫時不宜再加注。

我發現你主要問題不在於選股，而是手上不少股票的買入價跟現價都有相當距離。雖然部分可以守，但你要預起碼等一段較長時間。

其實你的情況，都是不少投資新手會犯的錯。第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

所以，你暫時最好先用月供去投資，每月可以用$1500供盈富(2800)，餘下資金就儲起，等大跌市機會。

另外，你組合波動性股票係佔較多(1024, 6820, 9988, 1833, 1918)，故你長遠要加入大盈富(2800)比重或加一些平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

此期間，你要努力學習投資知識，要學好如何選擇優質股，點為股票定平貴。這些技巧，對你長線投資增值，係十分有幫助。

------------------------------------------------

Q21399：

你好，請問2352，順豐怎樣看

龔成老師︰

順豐控股 (002352.SZ)為內地快遞物流綜合服務的提供商，主要提供倉儲管理、銷售預測、大數據分析和結算管理等綜合物流服務。

此股有質素，集團在內地有領先規模。在電商近年高速發展下，集團長遠發展正面。

但此股現價不平，過往佢股票波動都比較大。此股有水資價值，但現時值博率唔算高，同時要控制注碼。

------------------------------------------------

Q21400：

龔成老師，請問1088 是穩陣的收息股嗎？見今年派息over 10%, 派息比率是100%

謝謝！

龔成老師︰

中國神華(1088)佢始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望。

如果是收息的，都可以。但留意佢派息會跟隨利潤，而有所變動。因此，就唔建議太大注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21021-Q21040）

Q21021：

龔sir，我睇左你大富翁致富藍圖，其中第八章物業創富術並唔係好明白。

你話關鍵係租金回報率要高過息率，雖然你個例子係正確，但我自己再計返，發現又唔一定啱。

假設我要買一個400萬既物業，借90%，貸款金額就是$360萬，還款期30年，息率3%，得岀結果係每月還$15,177，

另外仲有一筆買樓洗費包括按揭保險費、印花稅、律師費及代理佣金，一共係$228,080。

我當個單位租到$15,177，回報率就係4.55%。

結論，雖然回報率高過息率，但並唔會無多餘現金流岀現。

請問我個例子岀現左咩問題？係咪按揭比率太高？但你書入面話低息時，應以最高借貸比率及最長還款期借錢，以達致倍增效果。

龔成老師︰

無錯，我地係低息的時候，應用最高借貨額和最長還款期。

我地要盡量利用貶值的現金，去換取價值不斷上升的物業資產，這是創造財富的理想做法。

但當按揭成數較高，開頭賺取息差的情況，會相對不明顯。

其實當中的關鍵位，就是你還按揭的金額中，包了兩大因素，第一是「償還本金」，第二是「還利息」，如果你單位出租收$15000，而每月還款中，假設本金$8000利息$7000。

雖然每月無正現金流，但由於你有部分是償還本金，所以其實你有實質的得著的，只是「現金流」未出現。

當長遠慢慢加租，正現金流就會開始出現。

長遠而言，你持有的是優質資產，租金和物業價值會慢慢提升。中間息差優勢，會漸漸變得明顯。

至於那些一次性開支，的確會拖低左回報。但作為投資一個優質資產的成本，相較未來資本增值和現金流收入的回報，這部份成本，係絕對值得付出的。

------------------------------------------------

Q21022：

龔老師你好，我是一名澳門的單親媽媽。我現在要獨自養一個3個月的寶寶，才發現自己
一直沒有投資沒有儲蓄，只有受薪收入，每月4萬3千元，花費供樓1萬6，給父母工人以
及家庭開支，每月都沒有儲蓄。
有三個問題想請教老師:

1,今年公司有花紅4萬，以及囡囡利是1萬多，想買股票當幫囡囡儲錢。考慮中銀，工商，
同盈富，請問邊個會適合一點？

2,10年前傻傻的買了1157，這幾天突然想起，找出來，已虧損20%, 應該沽出嗎？14. 508買入
780股。

3, 想看你的書增加投資知識，請問新手應該睇哪一本？
萬分感謝你抽空解答我的疑問，謝謝☺️

龔成老師︰

1） 盈富（2800）和中銀香港（2388）都可以，但前者係一籃子優質股票，分散風險能力會較好。

現時大市算係合理水平，可先用一半資金，餘下一半等有明顯回調，才再出手。

2） 中聯重科（1157）都有少少質素的。佢主要從事研究、開發、生產與銷售工程機械及農業機械，以及融資租賃服務。

業務都不差，生意與盈利都有增長力，發展都正面，但未必是高增長類。佢優質度不是最高，因此又唔太值得持有好多。

3） 我寫架"80後百萬富翁"、"財務自由行"和"股票勝經"，都適合初學者。

現時你要做架事，就係睇翻自已每月開支，睇下有無地方可以改善。令自已每月有一定儲蓄，去做財富增值。

------------------------------------------------

Q21023：

老師 想問下 澳優業績後爆跌 係咪基本面都唔值得渣？13.2 買入。謝謝

龔成老師︰

澳優（1717）不差的。佢主要從事生產、營銷及分銷嬰幼兒配方奶粉產品；及在荷蘭從事乳製品業，業務包括研究及開發、牛奶收集、加工、生產、包裝、營銷及銷售乳製品。

睇翻佢產品，都有一定的品牌與市場，同時過往的增長力理想，長遠有前景。

其實佢質素唔算有大變，只係比較大的問題是估值。現在回調，只係令佢回到較合理水平。此股長線投資可以，但就要控制注碼。以分注模式進行較好。

------------------------------------------------

Q21024：

你好！我收入唔穩定，而且身體唔好，而家每月要幾千醫葯費。是否應逐步把一半或
1/3的股票轉移到高收息股？

我現在持有部份939＆6823, 如再增持收息股中國龍工是否首選？如果是，什麼價可入？

還需增持其他收息股嗎？還有什麼股可推薦？謝謝你🙏

假設收息股6％年利率，我要把2/3股票值轉移到收息股才cover到我每月的所有费用，那是否這樣做適當？餘下的可投資一些值博率或增值潛力大些的股票？

龔成老師︰

這個好視乎你健康問題，係短期定長期。只係短期，你可以照因應自己年紀，去配置。好似年青至中年人，就用增長類股票。

若果你會較長時間（以年計），都會維持現時醫療支出，而收入依然都係會唔穏定。

咁我建議你將2/3股票，慢慢換成收息股，去減輕你醫療支出和心理上架壓力，好讓你可以先集中調養好身子。

餘下股票，就維持係一些"平穏增長股"上。因為佢增長力唔係最高，但勝在平穏，萬一你真係要重用這些股票資產，個價都唔會話變動得好利害，同時可以做到平穏增值效果。

中國龍工（3339）以企業的質素來計只屬中等，現時不貴，股息率都算吸引，但業務波動是風險，因此投資不能大注。

以下都是一些較優質架股票，你可以從中選擇，之後再慢慢調整自己組合比重。

平穩增值股：盈富（2800）、金沙（1928）、恆基（0012）、港鐵（0066）、平安（2318）、粵海（0270）、領展（0823）

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金（3110）都可以。

有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

另外，你再有新資金，建議先儲起一筆應急錢，以應對醫療費用或工作上，可能出現的變化，咁會較穏妥。

------------------------------------------------

Q21025：

龔sir, 你好，我0.75 買了1手勛龍（1930）, 同3蚊買了1手恆發光學（1134）, 現在兩隻都跌了很多，
應該繼續持有還是止蝕，謝謝

龔成老師︰

勛龍（1930）主要在中國從事設計、開發及製造定制模具。

公司規模唔大，上市時間唔算太長，好多數據都未必能作準。此股唔係無質素，若持貨不多，可以守。

恒發光學（1134）係內地和香港的眼鏡製造商。

業務係有的，佢上市不久，好多時要較長時間才見真章。

睇翻佢2019年盈利1000萬都無，但現時市值近10億，好明顯係貴。若你只係小注，可以守。但持貨較多，建議沽出部份﹐去平衡風險。

------------------------------------------------

Q21026：

老師，我年齡:29。有18隻個股(2隻小注,2隻藍籌短炒)+7隻月供

終於報了老師既初級班,希望到時可以多多指教.另外睇左幾本老師既書,我個人反而覺致富藍圖仲重要過股票勝經.

1) 我另外有D問題唸左好耐,想老師幫手俾D意見.
由於之前收息股佔過多比例,想慢慢轉番做穩增值型,其中內銀佔了36%,除了中銀香港會strong hold外,想將內銀減持至2~3隻,尤其民生蝕緊下,應該點處理呢?

2388 15%
0939 7%
3328 4.5%
3988 4.5%
1988 4% (蝕23%)

2) 有5隻股在2,3年前買入後無理,現在應如何處理(hold or sell)?
2 500 @85.05
659 3000 @8.4
788 40000 @1.69
1988 4800 @6.32
2009 2000 @4

3) 睇到新聞見到大陸要求BABA剝離媒體資產,公司股價/股值會是否下跌?仲有咩情況會預見到?

4) 現在留意緊 ,請問下合理區頂 & 便宜區
27
66
2318
3067
2845
2158 (新股是否難以估值?)
1833
9618

5) 正在月供以下股,想問下哪隻現價太貴?
700
1177
2318
2382
9988

龔成老師：

18隻股票太多，你無法每一隻都清楚了解。另外，不建議短炒。

《大富翁致富藍圖》是整個規劃，因此的確較重要。但對於想集中提升股票知識的人來說，《股票勝經》就好有用。

1）內銀要先減持3-5成。餘下的，可以持有，等機會。這些內銀不是無質素，但的確會影響了你的長期組合增長力，因此，要取一個平衡調整的方法。

2）我地最重要睇質素、是否適合你，去決定去與留，而買入價因素不是重要。

這幾股增長力基本都唔強，未必最適合你，因此，要找機會賣出，但有於都有質素，所以不用立刻賣，你找機會就得。

3）阿里（9988）將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區頂部，這股可長線。不過，中短期會波動。

如果有貨，可持有，但就唔需要太急加注。

4）這些都有質素的，而醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

之前貴，現價算是略貴，最好回翻多D先考慮。

另外，提翻你，你應該在投資前，更深入了解該股先好投資，不用太急出手的。

5）基本上都在合理區頂至略貴，都有質素，由於你是月供，本身已有平均買入價的作用，所以，不用停。

------------------------------------------------

Q21027：

如果我
每月要還錢$19000
平均月入只有$7500
每月開支約$3000

請問我可以如何做
但我不想就此破產

借了幾間財務
又經常遲還款
TU極差
不可能問金融機構再借錢了

龔成老師：

要睇翻你現時有無資產項，以及有多少現金，如果有資產，可能要賣部分套現。

另外，就是想方法增加收入，你最大的問題是收入不足，想一切的方法去增加收入。

你再同借錢的方法解決問題，根本是行錯路，不要再想如何借錢了。

另外，可以找翻你現時欠債的機構傾傾，有無得拉長還款期以減少你每月支出金額。又或找一些機構，一次過進行債務重組。

------------------------------------------------

Q21028：

老師你好，一年後再留言請教係因為情況有變，我地決定移民。賣居屋股票套現之後會有近八百萬左右起手。
現打算：

1. 用250萬 做首期，香港買一細單位放租？

2. 如 60 歲每月想有約 2萬被動收入，以下股票正確嗎？

盈富 (2800）
煤氣 (3）
工行（1398)
置富（0778）
深高速（0548）
粵海(270）
中石化（0386）
比亞迪（1211）

每月應供多少及如何分報？

龔成老師：

1）如果你地打算移民，資金投資香港的物業，未必是最好的選擇，因為彈性會較低（香港樓買入要持有3年），同時只是投資，而現時香港樓的投資角度，這刻又不是特別吸引，因此，不用太刻意行這一步

如果你想有物業類資產，可考慮房託，會更加靈活。

2）除了比亞迪（1211）外，其他都可以。

因為你這年齡及投資目標，應該投資風險較低，股息較好的股票。因此，1211不適合，至於其他，你可投資，平均分配就得。

另外，你可加入GX恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

------------------------------------------------

Q21029：

龔sir,想問下你一開始係點樣選擇分析邊d公司？

我就快閱讀完你編寫的年報勝經，想選擇一間公司作練習，但眾多公司，唔知應該選擇邊間好，可否比小小意見我

龔sir,我正在了解中海物業（2669）的年報，見佢既毛利率近兩年都有下跌既跡象

但我見你回覆的文章話2669都係有增長力，我想問毛利率對了解公司發展，有多小影響？

龔成老師：

你選股時，可以選較有優質、大型、獨特性的企業。

簡單來說，我地買股票就是買企業，你要以做生意，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業的質素，以及長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

中海物業（2669）不差的，佢係2015年由中國海外發展（0688）分拆上市。

佢主要於中國內地、香港及澳門從事物業管理業務（如保安、維修及保養、清潔及綠化、為物業發展商提供交付前服務等。

至於毛利下跌，我見情況未算嚴重，而佢的生意仍增長中，因此，仍有質素。

現金流不差，增長力都有，但就不是好高增長，是平穩增長類。現時在合理區中上部，分注投資都可，這股都可以長線。

------------------------------------------------

Q21030：

我近排$21.x買入小米，早幾日咁啱睇左你條影片講比亞迪，個個話「$270高位沽，$180幾再買返，你話無人知幾時高位，幾時低位，優質股買企業理論」，再加上下週小米公佈業績，小米升下跌下，$26.x真係好想沽，其實這個心理關口好難過。

我都不斷提自己比亞迪幾廿蚊時沽左無回頭，買唔返。
但確實錢賺到係代落袋。

係！現金會貶值，而且炒來炒去風險高。
你可不可以教多幾招，扭轉思路。

龔成老師：

你要克服「贏錢」的心態，唔好著重現金，要睇「長遠企業」

如果你同一般散戶一樣，要「賺現金」，「錢要落袋」，你就永遠賺唔到388、700這些100倍回報的股。

我相信你的水平，無理由同一般散戶一樣。

------------------------------------------------

Q21031：

龔sir，愚昧問一下，你回答我的問題:

1) 見老師話$30萬，加每月投資$1萬，"5年後大約會增值至120萬" , 請問如何計算出來?

2) 以恆指過去年平均回報10%計（連股息再投資），請問股息係咪一定可以以股代息? 可以係度先查到某隻個股可唔可以做到以股代息？ 同埋係要另外向銀行申請的嗎?感謝

龔成老師：

1）每月投資$1萬，假設10%回報，5年後會滾存到$72萬（這是複利息公式計出來）。

另外，$30萬如果以10%回報計算，大約會滾存出$50萬。

所以，合共約$120萬。

2）當我假設回報時，要有「再投資」的動作，即是假設收到的股息，再買翻該股。你可以在一般的財經網站，網入該股編號，就能找一公司活動，當中有股息資料。

不過在香港，提供以股代息的股票不多，我認為你唔需要刻意投資這類股。就算該股無以股代息，當佢每次派息時，你先儲先現金，之後先再等機會用現金買翻該股就得。

------------------------------------------------

Q21032：

龔sir，想請教一下你，目前我一家三口住緊公屋，見最近有得抽綠置居，諗緊如果抽中，自己供唔供得起。

家庭只有我有收入每月三萬三，而一家三口支出大約二萬，資產大約有一百八十萬，打算百二萬做首期，三十萬裝修，三十萬做後備資金。

諗住如果抽中買三百萬樓，月供一萬左右。但而家經濟唔好，我擔心我會失業，難搵工。同埋以我目前情況係咪買樓好勉強？希望有人可以客觀幫忙分析，謝謝

龔成老師：

首期方面，我相信無問題的，當然，這最好盡力儲多少少現金，這段時間唔好投資。

至於月供$1萬，你就要想清楚家庭的負擔情況，如果你用翻過去5年去作參考，如果以這情況去供樓無問題的話，我相信都可考慮。

其實，你可以考慮比少D首期（當然要睇翻按揭等情況），雖然令負債增加，每月供樓金額增加，但好處是令你地手上更多現金，就算出現失業等不利情況，防守力會較高。

------------------------------------------------

Q21033：

Sir 如果啲優質股高位買 跟住跌左我又加了注 前後加了2注 但宜家越跌越多 係咪等到佢升返平手走3/4？

分別是175 27.4@ 4000股
285 48.3@ 1500股
1810 27.4@ 2000股

我都知入得太快 太多潛力股 宜家好驚有排返唔到個位 套唔到現 買其他嘢
謝謝你

龔成老師：

只要是優質股，你其實長線投資就得，唔需要上左又賣，你唔應該比「買入價」限制左你的投資思維，我地最重要睇翻「這優質股應該佔你組合比例多少」。

現時你持有的，都是有質素的類別，不過買入價都貴，你在貴的價位，其實唔應該買入得太急。另外，你組合集中在近期較熱炒的類別，已經出現了集中風險，反而你缺少一些平衡組合的其他經濟版塊。

你現時儲下現金先，唔好心急加注。

------------------------------------------------

Q21034：

你好成哥，我現在42歲，擁有以下虧損證券。 我是否應該全部出售, 然後購買其他具有潛在增長和有利息收入的證券？

（夫妻月薪HK$100,000, 家庭支出HK$60,000）, 擁有自住樓宇一個（供滿），剛剛購買了600萬港元的舊樓用於出租[借成六按揭30年]）

1. 0001 長和, 1000股, 買入價$80.55
2. 0006 電能, 1500股, 買入價 $66.5
3. 0011 恒生, 300 股, 買入價 $176
4. 0778 置富, 5000 股, 買入價 $10.64
5. 1038 長建, 2000 股, 買入價$58.1
6. 1310 香港寬頻, 3000 股, 買入價$14.56
7. 6823 香港電訊, 10000 股, 買入價$11.22
謝謝你的無私分享

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

你現時持有架股票，係有質素，算係一個收息+平穏增長架組合。以你年紀計，有少少保守。

你42歲，財富仍有基本增長，你可以加入盈富（2800）去平衡組合，以及加入少少潛力股，令個組合增長力高翻少少，咁會較理想。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

但你要留意翻，部份潛力股已有輕微過熱情況。只有安碩恒生科技（3067）、阿里（9988）、中生製藥（1177）、福壽園（1448）勉強算在合理區頂部，可分注入貨，其餘要等等。

另外，你現時財富組合都好偏重左係物業上。未來要加大股票比重（避免買入地產相關類股），令成個財富組合更平衡。

------------------------------------------------

Q21035：

請問龔Sir會不會幫忙指教強積金問題？如果可以，以下是本人問題；

本人55歲，已退休2年，未來下半年可能會再投入工作。
最近檢討MPF（宏利），整個基金已有50%增長，基本上是全部放在股票基金上，基金配置如下：

1）中華威力 26%
2）康健護理 24%
3）北美股票15%
4）富逹增長25%
5）亞太股票10%

想知道，這十年期間應如何安排基金配置？以保存現有價值及合理增長至我65歲。
若果再工作供的強積金，如何配置？

另外以下是我現在持有的股票，這個組合適合我嗎？虧蝕的應該換碼嗎？尚想投入多$15-20萬
資金入股票，應該再入那些？何時可再入？

#2800 -3360 股 $招股價
#1398 -1000 股 $招股價
#939 - 5000股 $7.3
#1099 - 800 股 $27.7
#1093 - 3840 股 $8.03
#1044 - 500 股 $62.8
#9988 - 200 股 $197
#1810 - 1000股 $27

謝謝！

龔成老師︰

強積金是長線投資，你要跟自已年齡，去作出調整就可以。

年輕人宜將較多資金投資有增長潛力的組合，例如股票佔70%，到40歲開始慢慢減少，例如45歲減至50%，隨著年紀漸長，股票類別適宜逐步減少，例如60歲就20%以下。

所以，你現時不宜持有咁多增長類MPF，大約佔30%左右好了，否則會太高風險。

是否換碼與帳面虧蝕無關，我地考慮架應該係佢本身質素。如果係有，中短期股價波動，我地唔洗太在意。

現在你持股都有質素和適合你，但阿里（9988）和小米（1810）始終有一定波動性，以你年紀，不宜持有太多，故不要再加注。

其餘股票現時都在合理區，可分注。但由於你已有一定持貨係手，而大市又只係合理水平，未到平宜。建議你現有$15-20萬應等有明顯回調出現，才慢慢去加注，咁會較好。

------------------------------------------------

Q21036：

老師，想問下2388 和0011 ，那個會好一點，另外0778 和0823 ，又那一個較優勝？

龔成老師︰

4隻股票都係有質素，可長線持有。

當中最大分別，係中銀（2388）和領展（0823）除了有若干股息外，也會有一定平穏增長力。

而恆生（0011）和置富（0778）則係純收息股，你預佢增長力唔高，但股息穏定性會比中銀和領展好。

若你係年青至中年，中銀（2388）和領展（0823）會較適合你。而你已經近退休之齡，或者你投資取態係好保守，恆生（0011）和置富（0778）就會比較好。

------------------------------------------------

Q21037：

你好龔sir，想問問龔sir對3988 中國銀行看法，本人持有此股2萬股，高位3.6入，已持有3年，近期此股有點起色，想問問應該繼續守收息？

還是轉股會較好？如果轉請問龔sir有什麼推介，
應如何步處？謝謝

龔成老師︰

中行（3988）由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。

現價合理，但此股主要係用來收息，但就唔好對股價有太大期望。

你可以睇翻自已人生階段和投資取態，去決定是否換碼至其他股票。若你係較接近退休，或者好保守，這類收息股就適合你。

------------------------------------------------

Q21038：

龔sir，請問如果不計現時值搏率，潛力度的話是否2382比9988更高？

雖然2382未平，但似乎9988已有完善系統，而2382仍有進一步發展的可行性？如果我2382等到市盈率接近25

搏值率會否比現時9988更高？因9988賺錢能力可能比以前弱了。謝謝

龔成老師︰

舜宇光學科技（2382）和阿里（9988）質素都接近，而舜宇潛力度會較高。而近期政府對阿里架整改，有機會對佢長線發展有影響，要再觀察。

但預期唔會係太大改動，主要都係想調整規管。

至於，舜宇光學未來在手機和車載鏡頭，相信都會有唔錯發展，前景正面。

以現價計，阿里（9988）在合理區，可以分注。而舜宇光學科技（2382）最好等佢回多1成較合理，才開始入貨。或現時月供。

------------------------------------------------

Q21039：

你好，龔Sir，一直有睇你d書同fb，更加有上你堂，多謝你幫左我好多。以下有d關於月供問題想問問。
我而家既月供組合如下:

12 $3000
823 $3000
66 $2000
27 $1000

有鑑於我想為組合增加返較高增長力，所以想加返d潛力股，而當中睇中小米1810同安碩3067，想加入去。如果同樣月供$9000，你建議點樣分佈以上組合呢？
謝謝你。

龔成老師︰

先講你現時組合，有一個較嚴重架問題，就係太集中係地產股（港鐵0066都算半隻）。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你長遠要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

所以，你想加入小米（1810）同安碩（3067）的話，可以透過減少地產股供款去調節。

至於比例佔多少，要睇你年紀。若你係年青人，小米（1810）同安碩（3067）這類潛力股加起，佔一半都可以。年紀越大，潛力股比重就要相對減少。

另外，現時大市只在合理區，記得每月留翻一定資金，儲起等大跌市機會。

------------------------------------------------

Q21040：

新經濟股裡面，投資平安好醫生算係安全嗎？因為佢未必受國際政治問題所影響？

龔成老師︰

你都可以咁講，佢相對係不受國際關係影響的股票。平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂，但好波動，月供就得，如直接買入只能小小注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。