【龔成問答信箱】（Q20081-Q20100）

Q20081：

老師，澳門可月供的股票種類比較少，如1448，3067都不在月供計劃名單上，考慮到手續費的問題，我該如何制定計畫定期收貨呢？

是轉為季供，每三個月投入一筆相對於月供資金三倍的方法收貨嗎？

我都想報讀老師你ge股票班，可惜暫時去唔到香港，已在WhatsApp報名留澳門班ge位，希望疫情快d穩定老師你可以快d過黎澳門開課啦

龔成老師：

對，你可以自行進行季供，例如每3個月，入一定的貨，長期進行，已經可以，上述兩股都可以這樣進行的。

其實月供股票的目的，就是長期儲貨，以及平均買入價，只要你自行能做到類似的動作，就可以。

好！希望疫情盡快過去，到時澳門股票班見！

------------------------------------------------

Q20082：

老師你好，睇左你唔少既問答信箱，去年9月開始了月供盈富＄5000，請問月供股票有什麼要注意？

月供盈富既根本目標是什麼？等收息還是等佢增值然後賣出？何時賣出較好？

最近盈富升左，月供股票需要暫停，等低一點再買嗎？

還是應該不停買入直至一個時期？
概念上唔太清晰，麻煩老師解答

龔成老師︰

月供係一個長線計劃，最重要係一直持續咁做，月供最少維持3年，並持有這些股票5年以上。

唔好供下停下，或者經常改變供款額或股票組合，就會有理想效果。

盈富（2800）是包括52間質素不錯上市公司股票的組合，這些股票有升有跌，但長期計，都有不錯的回報。買入盈富主要有兩個回報（分別是股價升幅，加上股息回報），股息不多，大約只有3%。

而股價升幅，其實有升有跌，每年都會波動，但長期平均計，都有5%-10%，當然，這是不一定的。

此股適合你長線持，可以邊增值之餘，都有一定股息。現價計，盈富只是合理水平，唔需要停供。

當然，你要同時有一定的現金在手。

另外，如果你想提高回報，可以同時加入自己的選股（當然這要有你選優質股能力）。

------------------------------------------------

Q20083：

你好龔成老師，我今年24歲，每月可以儲蓄$20000，所有現有股票/基金/儲蓄保險總共約40萬，而流動現金約$10萬。

目標是28歲有能力買入大約800-1000萬的物業。

我有以下問題想請教老師。

1. 我一直也有月供領展及盈富各$6000，但最近盈富好像太高，我打算暫停月供盈富，你意見如何？

2. 我打算加碼月供領展，由原本月供$6000，加碼至$12000，打算長期持有，儲資產，你認為以上調整好嗎？

3. 我也想月供內銀股，長期持有，儲資產，你認為那隻股票比較適合我？謝謝老師教導

龔成老師︰

1） 盈富（2800）現時係合理區，唔算貴，又唔算平，月供可維持進行。

2） 首先，我唔建議你太偏重係個別股票。而且，你組合增長力唔算太高。我建議你加一隻潛力股，去提升組合增長力，咁會較好。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

3） 內銀股大部份規模都唔細，令到佢地增長空間有限，唔適合你年紀。若你想供銀行股，可供中銀香港（2388）。

------------------------------------------------

Q20084：

早晨龔成老師，之前我請教你供股增加財富，但我去銀行整供股個經理同我講供股要比息唔抵，咁我就冇供，而家有以下呢幾隻股

港交所100股（$245
福壽園1000股（$7.41
領展200股（$66.8

阿里巴巴100股（$247.9
港燈3000股（$7.78
盈富1000股（$26.3
安碩恒生科技500股（$17.2

請問港交所持有還是放？
我想响2021年有50萬增長

這些股需要增加邊隻？
或者有冇其他更好嘅股選擇？

我成日睇你d post 我就入咗福壽園領展安碩，而家見到有少少增長都好開心，好多謝你老師
不過我成日都好驚一高位入之後跌，跌咗會好驚，而家經濟唔好，都驚冇工做，所有每次都一兩手入或者冇入，
你post 1177 .1830我有留意，想入又冇入，唔知咩價位入好，點樣先知每隻股個價位係高定低定合理？thank you 老師

龔成老師︰

正常月供股票，係唔需要比利息，但會有相關手續費成本，你可以再去了解清楚。

你現時持有組合，有唔錯增長力，係偏茌取架組合。我地一般希望做到合理回報，係講緊一年10-15%。

若你要一年有50萬增長，係要翻倍以上，股票唔會做到。而且1年係一個好短架時間，中間難免有波動。

我地投資股票，係希望買入一些優質企業，透過佢自然增長，達至財富增值目的，所以一定係長線，講緊5年或以上。

港交所（0388）長線發展正面，長線持有就可以。你要明白就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，你要調節好個心態。

要知道點定股價平貴，我課堂都要講好幾小時。簡單講，就係睇企業質素、行業發展，財務狀況等，去得出一個合理估值。

中生（1177）現價在合理區頂部，可分注，但由於未算平，要控制注碼。小米（1810）偏貴，回翻D才算較合理。

------------------------------------------------

Q20085：

老師好，我是家庭主婦，50多歲，在家帮手看小孩，今年買了老師的兩本书。

覺得自己以前的投資方向是錯的。我手中持有的股票請您幫我分析下。多謝賜教

788 30000股$1.56
778 2000股$7.（今年買） 1177 4000 $7
1288 20000 $3.4（買了幾年）$4.75賣出過10000股，3.68又買返10000
1816 12000股$2.78
2388 500股招股價

3988 10000 $3.34
728 8000股$2
9999 100股 $136
386 8600股$5.6
883 1000股$8.83

請問老師以上持股哪些可以長期持有，哪些可以短炒？多謝

龔成老師︰

任何股票，都唔應該去做短炒。我之前做銀行、證券行多年，見證大量客短炒全部都蝕錢，只有長線才能有錢賺。

以你情況，投資可以進行一定程度增值，但整體上都係要偏向保守。你可以利用一些"平穏增長股"和"收息股"，去創造一個增值+收息組合。

你現時持股中，大體上都有質素，可持有。

網易（9999-S）和中國鐵塔（0788）波動性會較高，不宜持有太多，唔好再加注了。

中廣核電力（1816）、中石油（0883）、中石化（0386）質素上唔算太高，同樣不宜大注。

另外，你組合有不少是銀行股。緊記，個別行業唔好佔組合3成以上，否則會有過度集中風險，進行新投資時要留意。

------------------------------------------------

Q20086：

老師，我係一個初哥，現年40歲，而家有$230000現金，同1份每月供USD$150嘅基金，現值$240000左右

股票方面：

2000股6823@$9.85
2000股6823@$9.99
1000股883@$8.35
100股2158@$26.3

249股2800 - 月供3個月（2個月$2000，1個月$3000，之後會繼續供$3000）

請問我股票組合有冇問題？如果想再月供多$2000，供邊1隻或2隻股票好？謝謝！

龔成老師：

香港電訊（6823）是收息股，你持有無問題，但你預佢增長力唔強。

中國海洋石油（0883）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。你小注持有好了。

至於盈富（2800）你可長期月供，對於投資較初階的人，這基金好適合。

如果你想加入股票月供，你可考慮恆基（0012），如果想有增長力，就恆生科指ETF（3067）。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20087：

老師，今個月開始月供2800, 月供$7000，現升左咁多，有需要減少供款嗎?

另外3067在17.78當月供，只入了一手，可以在咩價位再入多啲？

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時月供2800+3067，正確！

盈富暫時可保持月供，至於3067，買入的速度要慢，你可以每1、2個月入一次。

總之，現時你同時要留有現金，而3067加注不能快。

------------------------------------------------

Q20088：

老師，我想問下你現在的組合如何：

2382x100股
1772x200股
823x600股
1995x2000股

6x1000股
590x2000股
788x20000股
1928x1200股

2319x2000股
3690x100股
1211x500股

1830x8000股
1177x4000股
1398x5000股
謝謝你

龔成老師

持有的股票，基本上都無問題。

贛鋒鋰業（1772）有潛力，但不建議持有太多。

至於電能（0006）、工行（1398），則是收息股，你要明白增長力不強。

整體的組合，持股都是有質素的，同時有平衡作用，你長期持有就得。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20089：

老師, 我成年冇買股票了, 之前買左隻股被人斬倉...輸左好多錢, 宜家唔知點樣翻身....就黎結婚, 想賺番少少錢幫補

輸到阿媽都唔認得
2768 佳源國際控股
12.8 +2000
12.5 +2000
11 +2000
4 +2000
3.25 -4000
另持有以下股:

2638 港燈
8.23 +500
8.04 +500

633 中國全通
0.54 +20000
0.5 +20000
0.38 +20000
0.3 +20000

133 招商局中國基金
11.72 +2000


386 中國石油化工
6.02 +2000
5.03 +2000

3988 中國銀行
3.49 +5000
3.28 +5000

3315 金邦達寶嘉
2.31 +10000

龔成老師：

你要記住一個概念，最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

第一，你要分析你的投資目標，你想潛力股的比例多少？平穩股的比例多少？組合風險程度如果？這些股有無質素？

即是你想設計一個怎樣的投資「優質」組合？

同埋，你唔應該有好心急賺翻D錢，投資要長線的。

佳源國際控股（2768）不太好，無增長力，轉其他較好。

港燈（2638）、中石化（0386）、中行（3988）是收息股，可長線，但你要睇翻是否適合你的年齡。

中國全通（0633）質素一般般，轉其他較好。

金邦達寶嘉（3315）質素一般般，轉其他較好。

如果你選股能力唔算強，月供盈富（2800）是最好的選擇。

------------------------------------------------

Q20090：

老師你好，新一希望重整一下月供股票組合
本人29, 每月可供金額可有10000.
有什麼企業可以建議？

另外 最近有沒有類似從前你建議的`比亞迪' 的有潛在巨大前景的企業可參考？？謝謝

龔成老師：

我叫人供比亞迪（1211）相信已有5年，但近期上得太多，所以已無再叫人供，原有貨持有。

現時如果要找潛力股，我會建議安碩恒生科技（3067）可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20091：

你好 龔成老師，我原本擺左10萬去投資股票,但因為自己唔太掌握投資技巧,目標方向唔清晰,一路買d細股同埋一路蝕嘅時候又無放手

一黎唔捨得蝕住走,導致依家得返5萬蚊貨 ,曾經再入過幾萬再買..追唔返之前,擺左好多年都無點理會...但睇到你出d資訊教人點投資 , 突然興致勃勃! 希望老師可以指點迷津 無限感激

現時持有
1 手 11恆生 147入
2手 939建行
2手 2888渣打
3手 00315 數碼通 平均價 12.8
5手 127 華人置業 平均價 12.6
6手 3988 中銀 平均價3.43
7手 539 冠華 平均價 0.121

1.我係咪應該 忍心將315,127,539 放哂佢?轉買其他股票

2.如果持有10萬現金應該要留意邊d股或者買邊類既股?

麻煩哂老師!

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

1）數碼通（0315）增長力不強，實力比過往弱左，如果你想收息，這股可以，但如果想增長，應該轉其他。

華人置業（0127）過往賣了不少之產，之後派息高，現時企業的增長力已不強。

冠華國際控股（0539）質素一般般，轉其他轉好。

至於銀行股，你預只是收息，增長力不強，同埋唔好太集中在同一行業。

2）你可以動用小部分資金，餘下就留現金。

我會建議你考慮較穩陣的股，你可以考慮盈富（2800）。

另外再銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

你同時增加投資知識，之後再選一些較有潛力的股票。

------------------------------------------------

Q20092：

你好，龔成老師，想請教你，本人30歲，已婚有2個小孩，我同先生都係公務員，穩定收入，今年開始想試下買股票投資

打算最多羅10萬出泥試下水溫先，如果向好之後再追加，睇左你ge page之後想問下如果買0868信義玻璃、2800盈富基金、788中國鐵塔同埋1810小米集團你覺得點？

可唔可以俾d意見要入幾多股會比較好？
感謝你

龔成老師：

如果你是初階者，我會建議你先投資盈富（2800），這是一個組合，較穩健。

至於上述的3股，信義玻璃（0868）、小米（1810）現價都唔算平，因為佢地股價較波動，因此對初階者，可能有風險，除非有較大的回落才考慮。

中國鐵塔（0788）不差的。中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

但如這刻買入，小注入可以的。

反而我會建議你，同時尋找其他較穩健類的股，建立一個平衡的組合。

你可以考慮銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q20093：

老師，請問最近配股以致股價下跌係咪短期因素，長期股價仍會上升
是嗎？

另外想請教配股會令股東利益攤薄嗎

龔成老師：

配股，你可以理解就是企業發行新的股票，以某一個價位賣比某些投資者。

公司會得到資金，而股數會因此而增加。

所以，每一股的價值當刻可能會減少，不過，由於公司得到資金，只要公司運用資金有更好發展，將來價值就會向上，對公司及股東都有利。

------------------------------------------------

Q20094：

龔sir 、你好 。我係你舊生。
我想聽取你意見。

你覺得1717同6186 哪間較有質素？
最近初步分析左 1717 同 6186 。
但6186 ，2019才上市，資料性好似唔多足夠。
但規模上 佢較1717較大 ，財務比率上 較1717更優秀。

1717 ，做左好基本嘅資料收集 ，基本嘅指標都算合格
而我自行估算 eps:0.4
PE : 20- 37
估值：$8-14.8

初步兩隻暫時估值都較貴 。

請問：
1，點解普遍食品股的市盈率都會咁高？

2，兩隻算是優質股的考慮嗎？

3，6186 是否有較高的投資價值？

另外，謝謝你 基礎班及進階班的教授。 今年由帳面虧損到現在帳面漲到6位數字 （人生第一次，原來努力睇財務報表係可以換黎成功感）

但當刻仍然心無雜念，繼續學習用「價值」代替「股價」

努力向住 每月被動收入 10萬前進

龔成老師：

先講基本資料。澳優（1717）主要從事生產、營銷及分銷嬰幼兒配方奶粉產品；及在荷蘭從事乳製品業，業務包括研究及開發、牛奶收集、加工、生產、包裝、營銷及銷售乳製品。

睇翻佢產品，都有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部水平，股價有時投資值博率不算好高，但都可以，長線投資可以，但就要控制注碼。以分注模式進行較好。

至於中國飛鶴（6186）佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

比起澳優，中國飛鶴就更有規模，每年的盈利數目數十億，而澳優不足十億。

1）因為市場對中國的內需睇好，相關股票都有較高估值，不過中國飛鶴的估值的確有少少高，我地都唔好盲目認同這刻高估值。

2）有質素，但要留意平貴度。

3）從質素上，中國飛鶴較高，但市場對佢估得太高，現價投資值博率唔算高。

你保持財富增長太好了，之後保持學習！我深信知識與財富成正比。

------------------------------------------------

Q20095：

想請教saas 走勢，2021年仍有大增長嘛
微盟這一年可否升到40$?是否值得繼續持有

龔成老師：

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

過往股價增長理想，但能否令股價再上，最終都要睇佢的業務增長是否配合，如果業務增長減慢，佢股價就有可能受壓。

------------------------------------------------

Q20096：

其實都每月可以儲一萬蚊，但係唔係咁捨得拎出嚟，其實咁樣諗係咪唔應該，因為等於財富貶值

龔成老師：

你要多用「將來」的概念分析，你如果持現金，將來就會不斷貶值。

當你投資，就有機會增值，你要將這筆錢將來能滾存到多少錢的角度去睇。

記住，現金只是「交易工具」，不是真財富。

------------------------------------------------

Q20097：

老師，我有好多長和同中國旺旺，老師建唔建議我走敢d?我又唔知買乜好，好多好股都貴，無乜位上。有啲根本睇唔到頂。定係我轉多啲美股好？

另外，有人話小心股災，老師你點睇？係咪疫情，資金無出路，同拜登上場大刺激牛市？感覺有種泡沫味，唔係公司有實力⋯⋯

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

長和（0001）與中國旺旺（0151）都有質素的，但增長力不強，同時你組合唔應該只集中兩隻股，這樣會有集中風險出現。

你要好部分轉其他。

如果你無心水股，就部分轉盈富（2800）。

如果你想較有增長力，就安碩恒生科技（3067）。可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你唔好分析大市走勢，股災無人能估到。你要建立「組合」，長期持有。同時，這刻都要留一定的現金在手。

------------------------------------------------

Q20098：

我會買的，另外請問澳能1183幾錢可入？
可渣長線嗎？

同埋1351

龔成老師：

澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但近期股價其實有點超前反映。這刻投資值博率未算高，如睇好，小注好了。

輝煌明天（1351）係中國的廣告公司，主要提供以下兩類移動廣告服務。

（1）中介服務：擔任客戶的廣告代理，將客戶與其指定的媒體發佈商相連接並投放廣告；該等廣告以不同形
式發送，包括動態消息廣告、應用程序商店廣告及視頻形式廣告。

（2）精準廣告服務：為客戶計劃及進行廣告投放，並負責整個廣告流程；該等廣告通常以在媒體發佈商營運
的移動應用程序出現的彈屏廣告等形式展示。

佢主要為客戶宣傳的5大服務或產品類別包括移動互聯網服務、移動工具程序、金融服務、手機遊戲及電商。

睇翻過往財務數據，業務都有增長的，不過盈利就有少少波動，反映好受市場環境影響，對經濟較敏感。

規模較細，未見有好大獨特性，現價雖然合理，但值博率未算好高。

------------------------------------------------

Q20099：

老師 剛剛接觸投資股票
請問本金6000元

請問月供邊幾隻股票較好？
感謝

龔成老師：

第一，你要增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20100：

你好，吖sir，我系你書迷，最近有疑問，什麼是股票借出計劃，會有什麼利弊，謝謝

龔成老師：

即是同證券行定立協議，將你手頭上的股票借出，你可以從中收取利息的。具體的情況，你要向證券行了解下。

這個動作你本身一定要長線投資，不打算短期賣出股票，才可以借出股票。

至於風險，則是你忽然想賣出時無得出貨。又或該企業及大環境轉差，股價持續下跌，你想賣都無得賣。要等協議取回股票先得。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17461-Q174800）

Q17461：

成哥，一般人靠打工，似乎純投資好難財務自由，是否一定要做生意才能達到財務自由？

龔成老師：

我在《財務自由行》中，有詳細講5種財務自由的方法。

生意、投資物業、投資股票、專家、銷售團隊，部分可以一邊打工一邊進行，每種都可以做到財務自由。

以投資股票為例，我過往人工$10000時，都可以靠股票滾存到數百萬，但我付出的都不少，我睇左過千本投資書，每星期要自己研究一間企業，每次花6小時，一年研究52間，尋找潛力股。

如果你認為唔做功課可以賺到錢就好危險，投資絕對可以財務自由，但你一定要做大量的付出。

------------------------------------------------

Q17462：

老師，我係股票班學生，想問農夫山泉，我試分析其質素及計算其股價。

基本數字面上，經營效率，盈利能力都是合格的。然而2019年的流動比率(0.59)是比較令人在意的。

翻查原因，[因為19年提取了資金以向本公司股東支付人民幣9,598百萬元的股息]，以致結構性存款大減，從而影響了流動資產總額 。這個股息好像沒有解釋其發放的原因。另外，股份過份集中亦是扣分位。

[鍾睒睒先生持有我們全部股本中約87.4472%的權益]。不過，將以上兩點一同研究時，才是令我感到最不安的事。(好像沒原因下)無故發放大筆股息，以致公司現金減少至有風險的水平。

同時股息受益人幾乎只是一個人。我不清楚這樣解讀有沒有問題，希望可以指教。無論如何，基本數據面上都稱不上太完美。

品牌以及大環境上，農夫山泉的確有一定品牌護城河。[中國軟飲料市場前四名，亦遠拋離第5位]。

以強項(包裝飲用水)來說，更是中國國內一支獨秀，以現時其質素下，中短期都難以被取代。

而且以商品來說，經濟環境並不會對其造成嚴重影響。雖然上市文件中收益部分沒有記載，但相信大部分的銷售對象為中國內地。

因此國際形勢不會對其有明顯影響。危機上，招股書都表示了不少潛在風險(塑膠價錢、水源污染等)，如果不太嚴重的話，農夫山泉是有能力解決的。

招股書中亦沒有表示會大力發展全新市場。未來PE不會太明顯改善，參考旺旺及維他奶，預定為18-30。

每股盈利推算方面，單以17-19年的平均數0.41港幣計算。合理區為9.2-15.4，減去20%包括以新股上市的水份後，大約為7.41-12.36。

結論：股權集中及派發令公司蒙上風險的股息。如果這個結論是對的，後果可以十分嚴重。而公司為平穩發展類型，難有爆發性增張，因此上市價格明顯偏貴(PE50明顯不值)。

PS:我在HKEX找到的招股書中，有很多資料被[編纂]，到底是有何意思呢?

而且，這是第一次分析新股而翻閱招股書，它比年報更多資料，可能有遺漏的地方(因為難以整份細閱)。以年報的方法分析未知有沒有問題?抑或有其他重點需要留意呢?
謝謝解答。

龔成老師：

新上市的資料及數據，往往會經過修飾，這就是我唔抽新股的原因。因此當你分析時，要明白這點。

你上述的資料基本上都正確，分析方向可以，而你將新股因素打拆扣，是正確的做法，因此你的分析都有參考價值，但就要留意，始終都只是一個參考數，不能盡信。

至於你所講的派息問題，這並不是第一次見到有上市公司這樣做，公司先派股息，然後再利用上市取回現金，其實是間接令原有股東收到上市得來的資金，這當然要扣分。

招股書的資料十分多，「行業資料」「公司資料」「前景」是你要重點睇的部分。

整體來說，這股質素是有的，但就似住自己有質素，以高價集資，因此，這股雖然前景正面，但最好等回先入。

------------------------------------------------

Q17463：

老師你好， 我剛剛月供地鐵和領展各2000元， 但感覺前景不太樂觀， 應該暫停月供， 轉供盈富4000元， 這樣做法好不好呢？ 請老師給小妹意見

龔成老師：

月供是一個長期的策略，因此，唔應該轉來轉去，當你決定左，就應該供5年，這樣先會有效果。

這兩股都是有質素，雖然不是高增長股，但仍是正面。

你可以想清楚，睇下自己想長供那些股，佢地3年、5年後的經營情況如何，投資是一個長期的過程，轉來轉去並不是好事。

------------------------------------------------

Q17464：

Hello 老師 我現時月供緊3000蚊銀娛 其實睇返平均買入價都唔算平 同埋疫情反覆

所以想問吓繼續用月供嘅方法黎供銀娛仲好唔好? (雖然仲係睇好銀娛 但總係有啲擔心賭牌個方面)

龔成老師：

銀娛（0027）是有質素的股票，你可以長期去供，月供股票要長線，先產生到作用。疫情反覆，會對佢中短期不利，但反過來睇，這是收貨的時機，只要你耐心持有就得。

至於賭牌，佢基本上好穩陣，唔擔心。

------------------------------------------------

Q17465：

中國鐵塔
我有朋友買左 我都想買

但未來可能都有機會升 長遠黎講
究竟我買唔買好呢

同盈富 中煤 領展比 好似冇咁吸引
如果月供呢

龔成老師：

我地最重要分析企業的長遠質素、發展。中國鐵塔（0788）有質素的，長遠有發展力，這股都有投資價值的，但就不是爆升類型。

月供可以的，但你在組合中，應該以盈富（2800）作核心，而這股只是其中一部分。

------------------------------------------------

Q17466：

龔sir個陣聽你講開始月供股票,之後月供加左比亞迪。真係非常感謝你,令我由以往只識拎住現金,到依家都叫有啲醒覺。

我近年轉左工作, 收入大概$48000,比以前多了一萬多
我現在月供組合

1211 1300股 $48.61 (月供1500)
0003 5600股 $13.78 (月供 1500)
0066 1100股 $43.79 (月供 1000)
0823 1000股 $74.74 （月供1000)

另持有 0778 4000股 $9.23 及 50萬現金 股票與現金比例 ~4:6

1.想問下1211是否需要停月供? 如果停1211月供,想問有沒有推薦可代替放入月供組合?

2.現在疫情及中美博奕,是否先拿著50現金比較好?

希望制造更多財富 提早達到財務自由

龔成老師：

1）如果比亞迪（1211）去到$8X，你可以停一停。這股是潛力股，可長線，不過股價就好波動，當去到貴的水平，都可以停一停。而原有的貨就可以持有。

你現時所供的，都是有質素的股票。你可以加入盈富（2800），會令組合更加平衡，如想增加組合潛力，加入中生製（1177）、騰訊（0700）都可以，只要長期供，同時注碼不過多，仍可供的。

2）持有一定的現金是一定要的，問題是比例多少。

如果你現時的現金比例較多，其實可以找機會買翻少少唔貴的股票。但如果現金比例唔算多，就持有現金等機會。

------------------------------------------------

Q17467：

龔成老師你好
看到基金很多10％年息
每月派息基金很吸引

但說所有回報乃累積回報，以 2020年之基金價格及資產淨值計算，並把股息在派息日再投資

然後眼見累積回報3年才7％
是不是代表輸了23％？
派了3年應該30％以上才對？

然後就是期望龔成老師出基金的書本 為大家提供更多知識

龔成老師：

近年有不少所謂的高息基金，特別是債券基金，出現了賺息蝕價的情況！

佢地用「高息」，保證有多少利息去吸引投資者，但原來有些基金，當中的派息，是利用原有本金派出，因此，這只是「製造」出來的高息，實際的回報是負數。

我有機會都會出書講多D，你都可以睇《大富翁致富藍圖》，當中有部分講述基金的。

基金有好多，有好有壞，你要小心分析，如唔明就問職員，要清楚。

------------------------------------------------

Q17468：

你好，老師，我女兒現在3歲，我幫佢儲左d錢大慨4萬，但又想可以有增長/收下息唔想就咁放係度

我想了解下日清1475，煤氣，定老師您講既788，邊隻長揸較好？

我見依家好多都唔平，定等個市跌，有其他股建議？
友邦又好嗎？

龔成老師：

你可以投資一些穩例健類的股票。

日清（1475）雖然有質素，但現價唔平。

煤氣（0003）現價合理，雖然增長力比過往略有減慢，但仍是穩陣之選，你可以分注投資，長線持有。

至於中國鐵塔（0788），有質素，但股價上落會比煤氣略高，你可以小注投資。

友邦（1299）都有質素，同樣可考慮。

其實，你可以投次盈富（2800），再加上其他有質素的股，這已經是一個組合。

------------------------------------------------

Q17469：

您好，龔老師，我之前買左你本書，5年買到細價樓，所以拎左黎做目標！

現時有15萬，無家庭負擔，想平均投資係5-6隻股票當中，想知道有什麼建議或者tips比我？

暫時目標股票有長和 香港電訊 中銀 置富 中移動 盈富共6個，每隻股票應買幾多手為合適？打算買一筆收息 一筆投資，謝謝

龔成老師：

你可以投資一些有質素，有增長力的股票，你上述的股票，盈富（2800）無問題，但其他的增長力不算強。

另外：銀娛（0027）、港鐵（0066）、平安（2318）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382），但就要明白波動性比上述會高少少。

當然，如果你想以收息為主，你上述提出的股票，都是可以投資。

你可以視乎自己的風險承受能力，目標，而決定點配置。

------------------------------------------------

Q17470：

龔sir你好，小弟買了你的50博值倍升股，獲益良多，十分感謝！

小弟想問下，新天綠色能源股價節節上升，市盈率7倍，現在它2.7，從公司估值方面算便宜嗎？現時價位值得買入作長遠投資嗎？感謝

龔成老師：

新天綠色能源（0956）本質不差，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

------------------------------------------------

Q17471：

龔大師你好,想請教你投資心得,平時冇做其他投資增值,
50歲

現想月供股票,請問供那比較穩健和收息好, （本人不懂月供股票程序, 是否不要選股價高的股票来供？

例如388現價升了很多 如選388會太貴？）
多多指教

龔成老師：

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

以你的年齡情況，建議你供盈富（2800），以及加少少港交所（0388），長期進行就得。港交所的確升了不少，但只要注碼較少，同時長期供，都無問題的。

------------------------------------------------

Q17472：

你好龔成老師 我雖然沒有上過你的投資班 但一直都有看你的書 係你的書裏學到好投資既嘢 財富有點增值 近期睇你的（財務自由行）

我認同財務自由之路係有好多方法 而創業係我認為係比較快增值財富嘅方法 認同後生時先增值財富後現金流

但是由於我身邊沒有朋友熟人做生意所以這方面的知識不多

近期知道一點資訊可以在創業群組認識同道中人 但是完全唔識嘅陌生人合作我又怕比人騙 究竟創業時要注意啲乜嘢？

投資股票可以睇財務報表 去衡量公司值唔值得投資 但是初創公司沒有財務報表那我怎樣知道做實業嘅公司 ？

龔成老師：

《財務自由行》講左5個財務自由的方法，投資股票、創業等，你選自己喜歡，以及並行發展都可以。

至於同人合作搞生意，要非常小心。

就算同朋友搞生意（過往我都試過），都會有好多煩野，有問題，有唔清楚，如果同陌生人搞，就更難。

就算是細公司，都有財務數據，都有一些銷售數據，營運模式。總之，如果你無律信心，有疑問，就唔好搞。

我反而建議你試下自行創業，最初可能會失敗，但這是一條財務自由的路，你試多幾次就會成功，加上，你現時無經驗，同人合作更不搞分析生意的好壞與問題，當你試過，有經驗後，你的實力會提升，情況就不同。

------------------------------------------------

Q17473：

龔sir你好，我係你股票班學生呀，一路有留意開濠賭股，地產股同保險股

但未上到估值嗰堂未識計合理區~ 想問下面呢幾隻股咩價錢可以入手呀？1928, 27, 14, 66, 823, 1972, 1299, 2378

另外依家疫情似乎愈黎愈嚴重，雖然我地應該著重企業本質，但短期消息不利地產股同保險股，係咪可以等多一陣先入手？Thank you

龔成老師：

上述的股票，都是有質素的，都是處於合理區，如果處於較近合理區底部的有：金沙（1928）、希慎（0014）、領展（0823）、太古地產（1972），不過，佢地都受疫情影響，中短期會較弱，投資要分注，唔好太急入，同時要耐心持有，長線投資。

另外，唔好太著重中短期因素，要以長線角度作為核心。好難估事件之後的發展情況，所以分注投資，以策略去平衡風險，同時留有一定的現金，這是最好的策略。

------------------------------------------------

Q17474：

我見某些投資大師都會這個會趨勢分析、 週期等，如索羅斯、羅傑斯等都有用此方法，有無用？謝謝

龔成老師：

佢地是考慮經濟與市場，並不是股價的趨勢，而要分析經濟的變動趨勢，對一般散戶來說太困難，索羅斯的《金融練金術》，提出的「對射理論」，更講翻短期市場由情緒組成，要分析趨勢根本好難。

至於羅傑斯，市場供求在商品應用較好，而股票的價值會變，單睇供求趨勢會好危險，就算係佢10年前所寫的《給女兒10封信》，其實都是「價值」為核心。

------------------------------------------------

Q17475：

龔成老師，你好，睇左你幾本書，令我獲益良多。最近開始睇你推薦既「萬能金鑰」，提到（任由思緒漫遊至靜止）同我一向練習既冥想，正念療法只諗住自己既呼吸，概念完全不同。

如果任由思緒漫遊不停想唔同既野好難靜止，定係我理解錯？老師，請問你係用咩方法可以做到？謝謝

龔成老師：

其實佢整本書的其中一個功用，就是教你「控制潛意識」，令你有能力掌握思想、情緒、心態、心理質素等，這些一般人無法完全控制的事。

書這一課，意思就是要做到「控制」，就算在「思緒漫遊」的狀態下，試下用潛意識去控制。過往你用「呼吸」去掌握身體節奏，這是較簡單的，書的意思是再高一個層次，在放棄以呼吸掌握身體節奏的狀態下，第一步先學習思緒漫遊而能夠靜止，啟動潛意識的部分。

------------------------------------------------

Q17476：

老師，最近都睇一直留意你facebook啲留言同post, 雖然最近有想置業既打算 但都想運用少少資金開始無股票市場做一啲長線投資 因為唔想又錯過一啲令財富增長既機會

但我有幾個問題想問一問 因為我驚我經驗不足 會做錯決定同時又未必對想購入既股票有充分既理解 所以想老師俾啲意見

1. 最近好多股都俾人炒番上去 所以想搵啲暫時未被炒熱又現價合理既優質股做投資。宜家有幾隻心水想買，想睇下老師點睇

- 1928 金沙 想購入一手
- 1972 太古地產 vs 14 希慎興業

(想2選其1 ，初步會選1972 購入2手。因入場門檻較低 所需資金較少。根據老師留言，兩股應該都進入便宜區/合理區底)

- 52 大快活集團 打算等跌落$15 購入一手

2. 1830必瘦站最近又升上高位 現價$3 之前$2.2的時候話跌2成先叫便宜 但根據現在情況 係咪都係以$2.2既價錢跌2成先叫便宜？

3. 有打算長線投資1177 1211 388可惜水股都升左唔少 打算回落看時機購入

1177 係咪~$10都可以入貨 定高少少都開始叫合理/平？
同樣 1211 係咪都可以等到$40-50區間可以小注？定$60都已經可以購入？

388宜家幾錢先算平同合理區底？

4. 如果我真係投資以上組合，會否太散？以我28歲既年紀 是否都適合投資盈富基金2800？定可以比較進取一些投資值博股票如小米/阿里巴巴/其他股票？如果買盈富可以佔幾多比例？

5. 之前都有同老師講過有想買樓收租既打算 打算先將物業放租幾年再自住/換樓 都有物色到東涌大約550-570萬既樓盤打算買入

但有親戚講話1)樓市可能會繼續下行 經濟會繼續轉差 宜家未係一個合適既時機，加上2)供樓初期都係俾緊利息同現時租金回落導致回報不吸引...但以上種種因素係咪投資物業要考慮的？

但亦考慮老師提到1)長遠樓價都會向上 因供應不足以滿足需求，2)樓價哩1年價錢相對有啲回落(因受到武漢肺炎及近日社會事件及國安法影響) 3)只要供得起樓就唔洗怕樓價升跌 我計過 我入息23000 每月供樓大約$17000 (未計差餉同管理費)

我怕如果宜家唔買就會上唔到車 始終人工追唔上樓市升勢

買左老師新書5年買樓4步曲準備睇

個篇幅有啲長 多謝老師解答 謝謝

龔成老師：

1）建立平衡組合是重要的，你這刻可投資這類股，因為值博率較高，但不能只集中在某些股。

這幾隻股，都有質素，但都同樣樣正受經濟因素而影響，中短期較弱，長遠無問題。投資可以，但要分注，同時唔能夠只集中在這類。你可考慮金沙（1928）、太古地產（1972）、大快活（0052）。

2）必瘦站（1830）現價合理，你預$1.8先開始平。

3）這些都是優質股，都可以長線，但現價都唔平。大約回翻10%先開始合理。

4）唔會散。你可以以投資盈富（2800）為核心，同時加上其他股，建立一個平衡的組合。

5）香港樓，仍會因供應不足，而長遠向上。

至於中短期，就較難分析，經濟有波動，加上疫情與政治因素，都令中短期樓市變數較多。只可以話有可能跌，但唔好預期跌得多，因為需求大，你自己睇下點樣把握機會。

------------------------------------------------

Q17477：

龔老師你好,感謝老師無私分享! 本人28歲, 疫情爆發前在高位買了物業, 扣除供款、家用和各種洗費後, 每月只約可儲 $8000, 現時現金約15萬, 股票約38萬 (由於很多於高位購入, 現時只值26萬左右), 包括:

4000股匯豐@$60
500港鐡@$41
400領展@$66
1600永利@$29
400金沙@$29.5
500中國平安@$88

我知道自己年紀應該投資比較進取, 匯豐並不適合, 但一直糾結是不是應該蝕著沽出。

現時股市已開始重新熾熱, 但我現時現金只剩這麼少, 我應該留起等待機會還是可以照入市? 由於銀行手續費較貴, 不考慮月供

但因為2年後想儲到大約40萬為物業進行裝修, 在45歲達致財務自由, 想請教老師我應如何規劃, 感謝。

龔成老師：

其實樓市無大跌，你不用擔心，香港樓始終需求大，預期下跌有限，長遠更會向上。

至於股票除了匯豐（0005）外，其他都無問題。匯豐不是劣質，但賺錢能力的確比過往減少左，同時你比例較多，這股會影響你的組合增長力。

你可以等經濟好翻少少，等佢上多D時，賣出部分，將資金投資其他更有增長的股，這樣會更好。

現時的股市，只是部分版塊少少熱。

其實你只要合理地進行投資就得，只要投資一些較熱的版塊，就要小心。

至於投資其他優質，合理的類別，其實無問題，只要你這刻「同時持有現金」就得，如果你現金較少，就唔好用住這刻儲多D現金先。

另外，如果你2年後要有一定的現金，就要開始留現金，唔好心急入市。至於財務自由，你要再加大力度儲蓄，
你要運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

------------------------------------------------

Q17478：

龔sir，原本我一直月供領展、港鐵、中國生物製藥、比亞廸(1211)同盈富。但近排見到比亞迪嗰價升左，我諗住停供，等佢正常返至再供。我想問咁做有冇問題？

其實我三月時見比亞迪跌到三十幾，我即刻買一手，但見佢升到五十幾就忍唔住放咗，宜家諗返都唔知佢嗰價仲會唔會跌返。

啱啱我見股市升得好勁，雖然知危險，但都忍唔住試吓短炒，頭一次真係眨下眼賺咗一成，但第二次就即撞板，一買即跌！第二日見佢冇乜升返就即放。兩次加埋雖然都賺咗，但真係驚，感覺同賭錢一樣。其實係咪我心理質素太差？

最後，我儲咗廿萬想買騰信同阿里巴巴。但佢哋實在太貴！想問你覺得遲啲有冇可能跌返到正常啲嘅價位？謝謝抽空回覆！

龔成老師：

我20年前，都有你這種心理，短炒，而為可以賺多D，以為賣左之後好快跌翻可以再買，但好多時股價都唔似預期。之後我發現，我同其他無知散戶一樣，都出理了「贏粒糖，輸間廠」的情況，所衝之後我就改變策略，長線投資，回報就變得可觀。

上述的股票，你保持月供，長線，比亞迪（1211）去到$8X略貴，可以停供。

至於騰訊（0700）同阿里巴巴（9988），都是有質素的，但都唔平，你可以月供，或小小注，等跌先正式入。

另外，大市好波動，要留有一定的現金，唔好心急用盡。

------------------------------------------------

Q17479：

龔老師，我有下列問題，希望你為我解答：

（1）有關（50優質潛力股）書中第23頁，買入價$50，每年複息股價回報32.0%是怎樣計算？

（2）我現時有10幾萬，想長線持有中電，金沙中國，恒基，不想月供，是否要等2萬4仟點以下才買？

（3）我現時有4手（領展），3手（地鐵），若再買（恒基）是否太多地產股？

龔成老師：

1）其實這是一條代數題目：
$50X（1+？）5次方=$200
（1+？）5次方=4
（1+？）=1.32
？=32%

2）如果你現時現金比例多過4成，可以先價買入金沙（1928），然後視乎資金，投資恆基（0012）、中電（0002）。如現金不多，就唔好急入。

3）少少，恆基與港鐵（0066）都有部分是地產股，你要計算，領展、地鐵、恆基，合共比例會否多過3成。

------------------------------------------------

Q17480：

老師，想請教一下，如果有約500k的資金作投資，可以怎分配和選擇嗎？謝謝

龔成老師：

要睇你的年齡、負擔、風險承受程度。因為我地理財，就是「建立組合」，在可承受風險的狀態下，盡力爭取回報。

我假設你的風險承受程度為中等，你可以投資「平穩增值股」。分注投資，或月供，都可以，總之要留有一定的現金。

你可以考慮盈富（2800）。

另外再加其他股：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382），但就要明白波動性比上述會高少少，所以注碼會較少，或等回先開始入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14401-Q14420）

Q14401：

老師，請教一下

我本身的工作，收入非常不穩定，自己年紀不輕了，快50歲，自己單身，但因為家庭有成員長期欠債，搞得自己都沒買到樓，錢久不久就會被清袋.....

手上有大約300萬，現在大部分錢都放在一些派息基金，還有少量是股票，散散的盈富、中電、港交所、領展、雅居樂、中鐵都各有一二手

現在開始想要為退休打算了

1) 派息基金，看似息口真不錯，不過清楚知道價格向下調，息口都是從本金來的，幸好3、5年來，總計算帳面沒怎虧，但這幾年沒增長，就是虧囉

2) 自己感覺供股對我來說，不是很適合，有錢時就直接買，不過我很少能把握到好時機，每次都是高價買入，但又不願意賣出，例如港交所290元會走去買....

3) 因為自己一直都是，當有一筆錢進袋時才買投資產品，有時因為對股票太不熟悉了，不想買股票，便去買基金

也因為經歷過幾次，家人要等錢時，什麼價位的股票、基金都賣，幾次碰上幸運基金都沒怎虧...所以又繼續買基金

是不是該轉一轉？因為年紀問題，不想再小注小注買，現在看似市道不好，是不是該把基金都放出，等股票下調後買入你一直看好的派息股？

龔成老師：

所有野，都應該以長期的方向去想，你應該開始做一些長期的調整，唔好太著重中短期策略與因素。你唔好再著重「賺多少」，應該著重，如果得到每月穩定的股息收入，你要改變你的思維，這點最重要！

以你的年齡，其實會開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$300萬，暫時只能動用$150萬，因為大市唔算平，你要分注投資，同時留下一半資金。長線投資。

你可以投資「平穩增值股」+「收息股」，但就隨著年齡增加，慢慢增加收息股的比例。如果你唔中意月供，你就用分注模式去投資。

你過往太著重短期價格，以為捉到低位，但其實不易，建議你改用「分注投資模式，例如每隔3個月入一次，將一注資金分成多注去入，將買入價平均，對你會最為有利，能大大改善你的投資問題

至於選股方面，平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

如果你不想選股，就簡單投資ETF，例如盈富（2800）、南方Ａ５０（2822）、領航標普五百（3140），都是很適合你的。

至於你現時的基金，是否應賣出轉上述股，你可以睇兩樣野，第一，這基金過往5年的總回報，即是價格與股息，如果回報不供，不如投資收息股，收息股每年都有5%回報。

另外就是睇金基金的前景，你要分析基金組合、投資策略，如果只是一般，就賣出。

總之，你這刻要開始為你的退休準備，而所有野，你都要分析，這個項目，是否能在你的退休組合內發揮到作用。

------------------------------------------------

Q14402：

老師你好, 先感謝你無私的分享，我都追看你寫的書和文章一段日子，因為你嘅教導我也係開始左月供股票兩年了和每日都mark 低支出，月供計劃當中有賺有蝕但係我堅信你教導的月供概念，打算一直長線供款投資落去。

我有幾個問題，希望你抽空不嫌煩替我解困一下。

本人35歲, 下年年底打算結婚，職業是sales，收入大概係$60,000, 女友28歲收入大概$16,000。我現在跟我媽咪 (已退休，68歲，兩層樓收租$36,000)暫時兩人同住一層480尺私樓，結完婚打算都同媽咪一齊住，因為我好細過就單親。

自己支出大概如下:
- $10,000 家用;
- $19,800 供樓;
- $17,000 月供股票 (選股方面，$3,000盈富(2800), $1,000 金沙（1928), $2,000恆基（0012), $1,500 中銀（2388), $2,000 港鐵（0066), $1,000 煤氣（0003),$2,000 長建（1038), $1,500 領展(0823), $1,000比亞迪（1211) 和 $2,000銀娛(27);
- $7,200 月供一個公司儲蓄計劃 (利息大概5% 回報)。

資產大概如下:
- 一層自住市區私樓 (我個名)市值: $10M, 30年按揭欠$4.8M;
- 一層市區私樓 (媽咪名) 市值: $7.5M, 收租$18,800, 本來無按揭，但因為我當時無首期，媽咪要加，呢家按揭仲欠$1.1M, 每月供翻$16,000
- 另一層市區私樓 (媽咪名) 市值: $7M, 已無按揭，收租$17,200, 無按揭;

- 兩年前加按左層樓$1.12M走去買咗個車位 (我個名)收租大概$2,800, 放左大概一年都放唔走;
- 有個大概$1.96M (今年2019Q1開始投資@$2.2M) 嘅港股portfolio (由一向替我投資嘅長輩打理，每年review, performance charges 是15% out of performance, 即係個盤賺幾多，他就分個賺個啲嘅15%);

- 同時，可以建立一個$400,000收息股的組合，包括2500股（2388), 13000股冠君（2778), 10000股越秀 (405), 1000股(66), 開元 (1275), 8000股春泉(1426) 5000股置富（0778), 8000股陽光(0435), 20000股匯賢產業 (87001), 8000肌泓富 (808)和8000股 (貿易通);
- 另外有一個$200,000嘅普通股票組合，包括 300股騰訊 (700)，100股港交所 (388), 1000股吉利 (175), 6000股高偉電子 (1415), 12000股易大宗 (1733)。

1. 明白老師一向都提議大家月供嘅好處，所以如果想再加月供銀碼，我都想加多隻潛力股中生 (1177), 可惜我用嘅銀行無得選擇你有沒有提議我應該加碼到邊隻好？

2. 我如果月供加埋REITs (2778, 788, 808, 405, 87001 & 435) 好唔好？因為我呢家自己一手一手個個收息組合好似太少貨。

3. 我女朋友都聽完我介紹之後，開始每月$3,000 ($1,000 盈富，$1,000港鐵，$500 領展，$500煤氣), 你覺得需唔需要改？

4. 收息組合和普通股票組合，我都係高高地位購入，我知大部分可以叫做優質股可以長線投資，但你有冇特別意見？

5. 近排社會運動令好多retail 業務好重的公司股價影響好大 (例如利福，莎莎, 六福, 周大福), 如果係依個時間當儲貨長線值博率高唔高呢?定都係買番啲民生比較重嘅例如大家樂/大快活好啲？

6. 我其實想結婚之前搵三房單位，到時候住大少少，起碼三個人住，有多啲私人空間，可惜我媽咪住慣市區，唔肯搬入去新界或交通不太方便嘅地方，我其實3個方案，你可以俾我少少意見嘛？

方案1: 租我個名嘅單位俾人，大概收$20,000租金，再補少少錢 (大概$5-$8,000)去租三房;

方案2: 問媽咪攞層樓去銀行加按做首期，不過年紀問題，我相信加唔到幾多，而且就算有首期，我同媽咪都有物業，只可以用女朋友個名入市，但係她收入有限

方案3: 賣晒我自己個名嘅單位同車位

個車位最煩係賣唔出，我當賣出我自己單位有$10M, 還咗銀行個按揭$4.8M, 再拎$5.2M睇市區樓，媽咪因為最想住翻紅磡 (但黃埔花園三房都要大概$12M)，媽咪都接受美孚新村 (三房大概$9-$10M)，前者不用擔心老人家適應，後者我就可以樓換樓仲有啲錢套! 如果我買樓，我想儘量俾少啲首期!

7. 記得之前有另一個讀者問關於年金嘅計劃，老師亦都回答如果單以收息股和年金比較，都知你嘅建議就係我哋嘅年齡修息股同埋年金計劃都可能唔係一個好嘅投資但係我嘅portfolio 比較着重左係股票所以如果我真係可以慳到税嘅情況下，其實年金計劃係咪都係一個不錯嘅選擇？

謝謝指教，我嘅問題比較長背景亦都可能好複雜但希望老師可以花啲時間去睇吓我嘅問題分享下你嘅意見。

龔成老師：

1）我地一定是股票行先，即是該，你長遠想建立一個怎樣的組合，當中股票的質素如何，不會因為該銀行無得供，而買另一股。

中生製（1177）有潛力，可投資，如果無得供，在現價又少少貴的情況，你可以自己分注，小注小注慢慢入。

2）這些都是有質素的股票，但我怕你組合開始有少少散。第一，這是造成管理混亂，因為我地買得的股票，都應該完全了解，並在每次出業績時仔細分析，但當你股票好散，就好難全部都了解到。

第二個缺點，你要較長時間先能夠買入到一定的股數。

3）整體無問題，只要長期月供就得，如可以的話，盈富（2800）加多$500-$1000。

4）買入價不是重點，企業質素與前景才是。

你現時持有的股票，大部分都有質素，可長線持有，不過就有點散，你要注意翻這點，要記住，每隻股票都要充份了解先可以投資。

另外，易大宗（1733），核數師在近年的意見都是「保留意見」，反映盤數「有古怪」，這企業不宜持有。

5）零售股的投資值博率正在增加，雖然中短期會較弱，但長遠來說，仍有投資價值，零售股可考慮。

6）從累積財富的角度，方案二是較好，你可以賣出現時的車位（減多D、同找多幾間經紀幫手放，就較易賣出），再利用加按物業，去進行這一步，不過，就要你女友的名，不知你及你媽的想法。加上，按揭情況亦要問清楚。

如果這方案做唔到，就做方案三，這其實是一個換樓的模式，都是可行的方法。

7）以年金去慳稅，在理財中可行，不過，這難免會減少了我地整體的投資回報率，因為始終你仍年輕，投資應著重增值。

不過，你都可以將小部分資金，投資在這類慳稅年金產品，視為財富組合中防守的一部分，只要不多就無問題。年金在理財中，是防守性產品，有其存在價值。

------------------------------------------------

Q14403：

您好，想請教下，本人現時36歲，有穩定職業，但月薪只有$15000+不固定佣金，有陣時工時會好長，除開同最低工資差不多，拆賬率好低，好想自立門戶，但又好怕收入更加唔穩定。

有兼職可賺取三千多一個job，接到幾多job好難講。現時外債、學債、欠家人大約70-80萬，有咩方法可以喺兩至三年內扭轉而家呢個局面？

個人資產只有十幾萬嘅MPF, 同埋供咗四年經保險公司買嘅儲蓄單，要供十五年，而家供咗$6-7萬。

龔成老師：

坦白講，你這個年齡，是突破的最後機會，我會建議你盡快做突破這動作！

自立門戶是其中一個方向，如果你做了該行一段時間，應該了解到客戶的來源，這是重點，你要分析這行，你是否有能力自己爭取到，除了一些跟開你你的客戶外，能否自行到時找到新客？難易度如何？

你現時負債70-80萬，單靠你現時的工作，基本上要10年時間先處理到。但如果你肯突破，就有可能有轉機，當然，無人知結果。

不過，如果是我，36歲，我知道係我好重要的時期，我會用最大的決心突破，我會用盡所有方法去爭取生意，建立自己的事業，目標是2年常內處理好負債，並在之後有一定的財富！

------------------------------------------------

Q14404：

老師你好
想了解一下你的投資風格都是中長線嗎？

龔成老師：

長線。

20年前試過短炒，唔成功，之後我做過10年銀行同證券行，見好證好多散戶的投資成績，輸最多的就是短炒者，所以，決心永遠唔短炒。

------------------------------------------------

Q14405：

老師，我係你股票班的學生，仲上緊堂，你的堂令我獲益良多，謝謝你的教導。

我正在分析現時財富組合及檢討自己投資組合，
有以下的問題想請教一下：

1/ 計算財富分類

樓的資產值計算 , 是否只計淨值?
如一個單位現時銀行估值$600萬，但還有$200萬借貸，當做財務整體分析分類時，是否應該只計算$400萬？

2/ 水桶分類

我現時擁有以下的股票，請問下列分類是否正確？
水桶1: 1211
水桶2: 1 /3 /11 /12 /66 /823 /2800
水桶3: 5 /6823

如正確，現在組合應該是：
水桶1: 0.1% (剛於11月月供$1000）
水桶2: 78.7%
水桶3: 21.3%

現在年齡近50歲，你課堂上建議比例 20/40/40。

那我是否應該轉移多一點至水桶1， 如加大月供1211 至$2000， 再加入1177 （$1000）？

同時加入多一至兩隻收息股，如 2638 / 778 / 435 加上原有的 6823 每月每隻供$2000？

或者現時股價是否已可直接各入一手！之前再月供？

令組合分配更平均，正確嗎？
謝謝老師！

龔成老師：

我地會計算「總值」，即是每項資產，現時的總市值，所以，物業計算是$600萬

至於股票方面，上堂是大致的分配建議，你要睇翻自己本身的風險承受程度，以及本身的收入穩定、家庭財政情況而決定。

你可以加翻多少少水桶1，但唔好只集中一隻，最好有2隻或以上，比亞迪（1211）與中生製藥（1177）各$1500可以，到了這兩股佔你組合15%，就要減慢。

整體上，你上述持有的股票，都是有質素，並且都是適合你，方向無問題，只是比例上，可以慢慢增加翻收息股，令組合更平衡（增加收息股這動作，可以慢慢配置，例如用1年時間去做。

你可以現價，先買入置富（0778）、香港電訊（6823）、陽光（0435）、港燈（2638），之後再以分注成月供的模式進行。

------------------------------------------------

Q14406：

龔sir:您好！我由12月份開始用小册子記錄低每日的開支，但就冇分類。

我今天下載了應用程式。我由今日開始慢慢轉成手機記帳，呢個app有分類，希望下月可以有完整的數據。目標每月儲1千5至2千

另外，盈富基金，佢依家$28.10,價格是否偏高？合理價錢依然是24-26嗎？

之前曾經在$7.38和$6.9買入1177,之後升到$10賣出，今日看到1177升到$11。是否要等跌返落去$10以下才合理範圍。

總結以上，由於我可動用的資金不多（4萬），我心諗等到2800和1177跌回合理價錢範圍，才各買一手來長期持有。

上個禮拜我睇完你的著作「大富翁致富藍圖」，今個禮拜開始睇「選股勝經」，預計下個禮拜睇「50穩健收息股」之後再睇「50優質潛力股」，再之後睇「股票勝經」，我手上暫時只有你這幾本書，對於我呢個由零開始的中年人，以上的次序是否合適呢？

謝謝

龔成老師：

理財最重要是適合自己，同時保持進行，堅持最重要！

盈富（2800）現價仍是合理價，可以投資，不過，由於不是平宜價，所以在買入價，要同時留有現金，不能用盡現金。

至於中生製藥（1177），$10以上略貴，但記住，永遠無人知佢的走勢，我地只能從平貴角度分析。你可以等$10以下先入。

你應該次序：《大富翁致富藍圖》、《股票勝經》、《選股勝經》、《50穩健收息股》、《50優質潛力股》。

完成後，再睇翻我其餘的書。

------------------------------------------------

Q14407：

老師，中國鐵塔和福壽園，是否中國鐵塔比較有潛力和值博率呢?

未答都先謝謝!

龔成老師：

兩隻都是有質素的股，潛力度同樣有，但要睇未來大環境的方向。

中國鐵塔（0788）是5G相關股，接下來會進入5G年代，佢業務一定受惠，不過，佢本身的回報率不算好高，加上現時估值唔平，因此，又未算好高值博率，但投資價值有的。

至於福壽園（1448），本身有質素，不過不會象中國鐵塔有主題，但長遠有增長潛力，但現價都唔算平。

兩隻都是有潛力的股，這刻中國鐵塔會略略高D，加上有5G主題，相信中期會較強。

------------------------------------------------

Q14408：

龔 sir想請教下 我而家睇緊你既3 本 <50> 你當中會經常講到 如果股本回報率高係反映到再投資回報率 好。
但如果本身派息率高 就不能反映到。

我理解係。 如果大部分息都派俾股東 甘股東權益大左(分母) 但個息細左(分子) 甘除落去好似不大 但其實間公司賺到好多盈利 ?

龔成老師：

有關股東權益與派息等部分，你理解錯誤。其實，這部分要解釋不易，我上堂都要花一定時間，學員先大致明白。

我做一個好初步好初步的結構同你講，如果一間公司股東權益$1000萬，當佢今年賺左$300萬，佢將其中$200萬派息，這$200萬就會派走左，唔會再屬於公司，股東袋左，自行運用。

至於餘下的$100萬，就會成為「保行盈餘」，再投入在公司裡，這樣，股東權益就會變成$1100萬。

當我地計算下年ROE，就會以下最新的盈利，除以$1100萬，這就會反映到再投資的動作。

------------------------------------------------

Q14409：

老師 我不太明白 你在書中 的各公司5 年業績表 , 收益 同盈利代表乜 ?

因為往往收大好多 例如六福 2013 年 收益係134 . 盈利12. 4, 每股盈利係 2.11 , 其實係點計出黎？

龔成老師：

收益就是做生意的最基本收入，以六福（0590）來說，佢賣一個珠寶比你，例如$5萬，未計成本人工等，佢實收你$5萬，這就是收益。

佢到最後，扣除所有的人工、成本等，最後得到的就是盈利。

例如2013年，收益就是$134億，盈利就是$12.4億，而將這數除以總發行股數，就是每股盈利，即是每一股賺到$2.11。

你可以睇《股票勝經》，當中有較多股票基本的解釋，上我的股票班亦可。

------------------------------------------------

Q14410：

老師 ，之前見到你最3大持倉係，比亞迪，中生同金沙，如果學你咁用呢3隻做最大持倉做前題，再買其他股票，咁樣得唔得?

龔成老師：

你可以參考我的組合，但每個人的風險承受程度，以及佢的財政情況都不同，因此，你可以參考，但不建議複製。

這3隻都是可長線持有的股票，我會好長線投資（5年以上），會唔理中短期股價，所以，你都要有這個投資想法，先適合參考我的組合。

------------------------------------------------

Q14411：

師傅
請問1382買得過嗎？

龔成老師：

互太紡織（1382）本質不差，近年的增長力不強，整體算是不過不失。

從長遠的大環境，以及這企業過往的發展政策去分析，這股收息較好，不要對股價太有期望，而睇翻過往的派息政策，管理層都是將盈利中，絕大部分用作派息。

因此，這股收息不差，但見到管理層發展的野心不大。以收息來計，現價已可，有約9%股息率，的確吸引，已反映了業務一般的情況。

但始終增長力不強，業務有潛在向下壓力，因此，不建議太大注。

------------------------------------------------

Q14412：

你好。我最近加按，留一半錢在mortgage link戶口後，約有200萬想建立約6厘的收息組合。我暫時打算投資:

6823香港電訊，659新創建，1052越秀交通，3煤氣，778置富，405越秀，012恆地，1212利福國際，1848中飛租及1928金沙。

我本身已有匯豐(2400)，長建(2000)，比亞迪(3000)，佐丹奴(60000)，金沙(1600)，煤氣(3300)，新地(500)，恆地(2200)，灣區發展(10000)，冠君(8000)，中飛租(6000)。

另有月供21000股票，有中電，領展，友邦，中銀，金沙，地鐵，比亞迪等。

請問約6%新組合的股票是否合適?金沙會否太多?

月供的股票還有盈富

龔成老師：

首先，你上述持有的，都是有質素的股票，可以長線，繼續進行，同時在平衡組合方面無問題。

至於200萬想建立約6厘的收息組合，方向正確，因為加按而得的資金，風險度宜低少少，你可以投資上述股票，這些都是有質素的股，如果單一股票佔你組合15%以下，仍是無問題的，所以，你最重要是計算總比例。

（盈富當然可以較多，因為這本身就是一個組合）。

另外，現時大市處合理區，可以一邊投資一邊留現金，因此，不能用盡現金。

而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14413：

老師，我現在手上有6060、在28.9入659、在11.16入857、在3.84入，以上這幾隻可以繼續持有嗎？

龔成老師：

唔好比買入價限制左自己，最重要是企業的質素、前景。

眾安（6060）唔敢完全話佢無潛力，但暫時睇，業務仍未得，投資價值只是中等，小注可以，如持有太多，要賣出部分。

新創建集團（0659）可持有，這股有質素，但中短期會較弱，增長力為中等。

中石油（0857），商品企業，雖然有質素，但不是高質之列，可持有，但唔建議太多，企業處比較被動的狀態。

------------------------------------------------

Q14414：

龔成老師你好，本人26歲，學歷不高，不想做錯決定令將來痛苦。

我係一個普通打工仔，基本月薪23000，年尾花紅有5-6萬元，有現金100萬，已婚。曾持有939、1299，都已止賺離場。

由於已婚，打算買樓自住，首期、入息不算充裕，所以仲未睇啱。

股票方面，大部分都已沽出，只剩大約十萬蟹貨，沒有明確投資方面，希望老師可以指點一下。另外如果要睇老師嘅書學習投資理財觀念、知識，應由邊本書開始？謝謝。

龔成老師：

你要明白翻投資的正確觀念，我地進行投資，是整個理財的一部分，唔可以無整體性。簡單來說，理財投資，就是進行一個財富配置。

由原本只是持有貶值的現金，轉為持有有質素的資產，建立一個優質，平衡的組合。

不過，你現時仍有改善的地方，例如持有一些蟹貨（我地唔應該以賺蝕去決定繼續持有與否，而是以企業質素），相信，你賣出了建行（0939）、友邦保險（1299）這些有質素的股票。

首先，你要清楚翻自己的目標，是否打算買樓，目標樓價大約是多少，能否支付到，如果首期未足夠，之後的儲錢計劃如何？記住，買樓，最重點，不是分析之後樓價的走勢，而是你買入後，是否「供得起」。

如果這刻已足夠，還欠甚麼？是否可以開始睇樓？

當你計劃好買樓的資金及所需後，就可以更有效進行財富配置，例如，現時的股票，是否要賣出套現？還是，可以有剩餘資金作長線投資？

以你的情況，我會建議你睇《財務自由行》、《大富翁致富藍圖》、《股票勝經》。

------------------------------------------------

Q14415：

老師，我係你學生，我正在研究中國燃氣的年報，發現他毛利及盈利都增長理想，但每股盈利增長卻比較低我不太看得明白，請問你知道原因嗎？

在說的是2019-2020年頭半年的最新中期報告

我另外我想問你認為看公司賺錢能力應該看毛利，盈利或還是每股盈利最有代表性？

因為中國燃氣毛利增長有兩成半然而盈利增長只得18%以每股盈利增長就知道15%

龔成老師：

中國燃氣（0384）業務正面的，無論是行業發展，大環境，前景，這股都不差。財務數據正面，生意與盈利保持向上，股本回報率高，賺錢能力強，不過，負債少少高是扣分的地方。

整體來說，這企業都有投資的價值。

毛利是反映企業最基本的賺錢能力，反映當中最直接的成本，以及售價之間，是否有一定的利潤。至於盈利，則已是扣除了各開支後得到的淨利潤。

所以，當你見到毛利增長較盈利增長多時，反映企業在產品售價方面雖然有提升，但有一些成本卻無法完全轉嫁，如員工、維修等成本。

至於每股盈利增長不及盈利，這是由於增加了股數的發行，影響了每一股的盈利價值。

在分析企業時，我地會先分析毛利及盈利等這些財務數據，因為這是反映整間企業，而我地會先集中企業質素與估值的分析。之後，就會再考慮每股價值的問題。

------------------------------------------------

Q14416：

龔成先生：本人是你粉絲，現26歲，月入7萬，有約50萬股票（平均價：煤氣$15@5000、建行$6.5@20000、旺旺$6.5@20000、人保$3@10000和中聯重科$5.7@10000）。

首期預300萬，想2020年買市區兩房1000萬內自住，期望只供15-20年。

有沒有高回報穩建的股票和收息股介紹？中長線理財應如何分配？謝謝！

龔成老師：

坦白講，你打算中短期買樓，資金應該投資較低風險的項目，因為你的資金有實際需要，因此在投資上不能太進取。

現時你持有的股票，基本上都有質素，你可以持有，至於投資方面宜投資平穩增長股，恆基（0012）、太古地產（1972）、港鐵（0066）都可考慮。

------------------------------------------------

Q14417：

九毛九，買得過？

龔成老師：

九毛九（9922）這類半新股，分析比較難，因為財務數據少，好難做到準確的估值。

佢係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，不過現價就唔算平，小注都可以，初步睇，這股都有長線投資的價值。

------------------------------------------------

Q14418：

成哥，有個問題想請教，朋友內地母公司準備明年春天在美國上市，公司名字叫XX控股。

據朋友所說，認購pre-ipo，上市失敗會有12％息，上市成功的話最差預期是12％，保守預期是30％收益，有底層協議。

公司2018年利潤是1.8億，保守估計2020年利潤是3億。下有保底上不封頂

請問這個投資風險大嗎？朋友說是沒有損失本金風險的
他說公司上市後表現好就會退出，表現不好就會部分回購

龔成老師：

你首先要確認，這公司的財務數據是否真實，佢所講的情況是否真，在金錢方面，任何一個人，你都不能盡信，你都要有保障自己財富的概念。

如果你確認可以，這可以視為一個有風險，有潛在回報的項目，小注投資可以，但一定不能投入太多資金。

------------------------------------------------

Q14419：

您好老師，本人35歲，每月可儲25000, 想用15000作月供股票。

分配想是 2800 $7000, 0968 $3000, 0354 $3000 和 1515 $2000。請問這樣分配可以嗎？

龔成老師：

上述都是有質素的股票，基本上，月供長線投資無問題。

不過，信義光能（0968）、中國軟件國際（0354）都是潛力股，這類股，業務始終會有點不確定性，因此，每隻月供$2000會較好。盈富（2800）則可以加至$9000。

------------------------------------------------

Q14420：

成哥，你好，我請教你，你覺得如果想係投資上獲得成就，認認真真地去讀關於金融既課程還是去讀一些股票班會比較好？

龔成老師：

我之前讀高級文憑同大學，都是修「財務學」的。

課本上的知識，都有少少用，但坦白講，我自己出面狂睇書、不斷研究股票、不斷睇年報，這樣的得著更大（我相信讀書時的知識，佔我現時「能運用到的投資技巧」，大約2成。

因為就算是我的股票班，都唔會教到好似學術模式咁，我會將部分學術，配合現實的投資情況去講，學術野太理論，要調整先可以用得。

我會認為你與其花幾年去讀這些課程，不如花時間睇書、睇年報、出去上下堂。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。