【龔成問答信箱】（Q21881-Q21900）

Q21881：

阿sir，我做緊你課堂比你 評估表，做功課，六福，我想問下 點定義 「負債增長不過快」？我見佢每年平均負債增速10%，有冇過快？

龔成老師︰

主要你可以睇翻，佢負債指標，會唔會因此而轉差。若果負債增長同時，資產都有一定提升問題不大。

但若負債增長較快，令指標惡化，你就要了解當中原因。指標變差，唔一定代表有問題。

如果你有印象，我上堂講過近年會計制度有改變，令集團租金支出，由成本支出，現變成負債去計算。若因這類情況，就算負債指標轉差，我地都唔洗在擔心。

現時六福(0590)負債不多，整體負債指標都理想，故負債問題不大。

------------------------------------------------

Q21882：

龔sir你好，多謝你無私分享投資知識，你嘅股票班由淺入深，教學易明而且每堂都好精彩，學到嘅嘢絶對係一生授用，亦打開咗我對於投資、財富嘅知識領域嘅興趣

現在睇關於財富嘅書已經成為我每日嘅習慣，我會不斷努力，期待有一日達到目標，然後我會好自豪咁同人講：「係龔成老師教我嘅！」

以下係我嘅股票組合，大概港幣60萬投資，係我可動用現金嘅一半，淨返嘅錢係等真正大跌市時先再入市，潛力股＆平穩增長股都係上完堂後開始慢慢收集，現在比例是60／40（我36歲）

策略係等潛力股倍升後，會續漸轉投到平穩增長股，而平穩增長股我打算未來20年都只買不賣，或永遠持有。

潛力股：
388 ＠ 477 （2手）16％
1810 ＠27.1 （15手）13％
9988 ＠244 （2手）8％
1821 ＠26.7 （8手）7％

2382 ＠211.75 (2手) 6％
1448 ＠ 7.62 ( 4手) 6％
1177 ＠7.17 （4手）5％
1297 ＠1.58 （10手）3％

平穩增長股：
66 ＠ 44.3 (3手) 11％
823 ＠69.3 (6手) 7％
1928 ＠34 （2手）5％
788 ＠1.16 (10手) 4％

收息股
5 ＠51.7 (3手) 9％

1） 想請問會唔會太過分散？或有冇d我睇唔到嘅問題存在？

2）如果太過分散，我想知你對於1297 ＆ 1821嘅睇法？因為我考慮緊好唔好將呢2隻股票都換成我其他嘅潛力股內。

3）005係我以前買落，打算換馬到平穩增長股，如果已經有呢個打算，你同唔同意我蝕住放咗佢，定等到平手先走？

多謝你抽空回覆，其實最主要都係想答謝你，我非常鼓勵我身邊嘅朋友去報你嘅課程！終生授用，祝你身體健康，點石成金！

龔成老師：

加油！我好相信，我地的財富與財務知識，一定成正比的，要多睇書，睇企業年報，保持進步。

好期待你完成目標，同時長遠不斷累積財富！

1）勉強可以，如果去到10隻左右會較好，不過，當你的財富不斷上升，去到10-15隻都是無問題。因此，現時的情況基本上是無問題的。

這些都是有質素的股票，同時比例無問題，只是匯豐（0005）或這類收息股，不宜再加入。

各水桶的配置正確，同時留有現金都正確，整個財富組合無問題。

2）中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。

現價其實有投資價值，但就唔建議太過大注。

ESR（1821）係亞太區（包括中國、日本、韓國、新加坡、澳大利亞及印度）的物流地產平台。

佢主要從事發展及管理現代物流設施。這些設施的租戶包括電子商務公司、第三方物流供應商、實體零售商、製造商、冷鏈物流供應商及其他租戶。

佢亦有管理多間基金及投資公司，於亞太區投資處於不同物業週期不同階段的物流物業。

財務數據方面，增長理想的，相信長遠有發展力，不過，現價唔算平，如投資要控制注碼，這股可長線投資的。

3）現時匯豐佔你組合9%，你可以先減持部分，轉其他增長股。餘下的部分，等過1、2年經濟好轉，股價上翻多少少先賣。

反正現時其他股票，又不算特別平，你賣全部轉其他股，都不能以很平的價位買到，因此，可考慮先賣部分。除非大市出現明顯回落，其他優質股較平，就賣出全部匯豐轉其他。

------------------------------------------------

Q21883：

你好 龔成老師，請教一下，今年32歲，月入43000

樓按負債430萬 (利息H+1.3%)
現金 130萬
每月供樓16000
租金收入11000

月供
恒基 2500
港鐵 2500
港交所 2500
平安 2500
比亞迪1000
小米 1000

持有
800股 hsbc @71
400股 太古地產@18.8
400金莎 @28.3
500比亞迪 @36
7000置富@7.96
2000恆基@36.6

手上現金配置建議

1. 我知道現時持有現金過多，想在配置上做番多啲投資，減少現金，請問有咩建議?

2. 有睇美股，ETF, bond 等等，但唔知從何入手? 還是最簡單買番港股算?

有諗過簡單買中銀都有8%息收，但又好似太悶? 老師意見如何? (因為唔成日睇股票，所以好多時都miss 左襯平價入市的時機。。)

我係一個唔係成日睇股票的人，所以好少做買入動作，多謝老師建議的月供幫我每月儲股票。

3. 另外月供股票選股需要調整嗎? 比亞迪價位好高，還適合月供嗎? 還是需要暫停? 因為我見老師近來推介的月供都沒有比亞迪。。

4. 另外月供的每隻股票需要加大銀碼嗎? 還是加多幾隻股票? 有何推介?

5. 還是我應該再加大月供金額去將手上的現金逐步放入去股票? (因為成日都捉唔到平的市價)

謝謝

龔成老師︰

1) 現時大市只係合理水平，現金佔比重大約3-5成。你現時持有現金比例有點多，可以再用分注形式，再買入多些優質股，會較好。

2) 其實我地投資優質股，就係希望透過佢自然增長，達至財富增值目的。由於係長線策略，因此係唔需要成日睇住個市。

投資選項方面，債券本身只係產品，性質上唔係一個理想的財富增值選擇。而且，佢增長力較弱，建議你集中係優質資產，好似優質股、物業等會較好。

至於投資在港股、美股，其實都係可以，視乎你對邊個市場較認識。如果你對個別股票無研究，你可以買該個市場的ETF，例如盈富(2800)、VOO、QQQ等。

3) 你現時月供配置，己經可以。比亞迪(1211)現價略貴，但你只係小注月供，所以係無問題。

現時大市只在合理區，每月資金唔好盡用。你要留有部份資金，等大跌市出現時，可以用來掃貨。

4) 若你有更多資金，可以投入月供。你可以考慮加入盈富(2800)，去令組合平衡性提高。

5) 其實我地投資，唔係只係捉住平個一刻，去全力入市。而係透過策略，去有系統地，在不同平貴水平，去慢慢儲貨。

因為，我地唔會知道，每一隻股票最終會唔會跌入平宜區。如果佢一直係合理區，唔跌落去，就會失去入市機會。

所以，我地會分注策略去入貨。在合理區先入1注，每有回調10-15%再加注。當真係跌到入平宜區，我地就大力入貨。

如果你掌握唔倒平貴機會，你可以將手上資金，以分注或月供形式入貨，去平衡風險。

------------------------------------------------

Q21884：

龔sir你好，都未好好多謝你上次嘅回覆，喺我身上已發生咗一件好重大嘅事，家人啱啱決定同資助我少部分買咗鴨脷洲-恆基逸南-186呎單位

我喺之前雖然睇咗樓好耐，但此決定事岀突然，前後兩日。 我一路記得老師話細過250/270呎左右，唔係幾好，不過家人好堅持應把握機會上樓作投資用途，

唯有寄望個地點唔差... 。

我都係啱啱先冷靜落嚟少少。我想麻煩老師為我嘅以下諗法作少少意見:- (注:- 我年尾32歲/收入20k左右/正職從事法規行業):-

1.我需賣岀部分股份:-

a) 中生($6.88入/6000股 )，打算到$9.5放1000股
b) 中國平安 ($82.77/500股 )， 打算到$86放晒
c)比亞迪 ($242.57/175股 )， 打算繼續守
d) 金沙 ($30.60/400股)， 打算守住先
e) 光大綠色環保 ($3.375/4000股 ) ， 打算守住先

2.係同一行業搵緊工，希望呢個夏天內人工有上調

3.有個網店，生意未見起色，但就繼續努力中，同時同批發商簽咗約到下年年頭，同有間studio約租到下年二月

4.新樓下年10月尾建成，以放租用途為先

多謝龔sir，老實講我自認心理質素麻麻地，係一門功夫，但真心好多謝你平日慷慨，特別係你好冷靜、客觀又正面嘅精神！ 默默中真係好多謝你。！

龔成老師︰

從投資角度，一個不足300平方呎的單位，連基本家庭的需求都達不到，投資價值會較低。

而且，一手樓都會有溢價，變相令你買入成本貴左。唯一可取地方，是樓盤好近利東港鐵站，往返市區十分方便，會係加分位。

但整體投資價值，始終只算係中等。

其實佢隔離有另一個幾年樓齡的盤，倚南，都是主打細單位，可以作為參考，睇翻佢的租金等情況，該盤最初賣到30000呎，近年去翻25000，算是合理翻d。其實所有野，都要計租金回報率等因素。

1) 你持有股票，都係有質素，最好係可以長線持有。

但若有實際需要沽貨，我建議你先沽出光大綠色環保(1257)，佢係當中質素較弱的一隻。

之後，可以考慮多於1手持股的中生(1177)。最好留有部份，因為此股係有質素。

2) 只要你努力，相信會找到的。

3) 新生意，好多時就係透過不斷嘗試，之後再慢慢調整，去一步一步咁前進。

4) 用"以租養樓"模式去操作，係可以。但長線，我建議你將佢換成較大單位，投資價值會較好。

------------------------------------------------

Q21885：

Hello, 龔sir, 我已留意你FB page 一段時間，好認同你的理論，想學習多啲股票知識，因為我今年才開始嘗試買股票，希望財富增值，

但現時有兩隻股都被扣著，希望可以指點一下。

現時持有:
3800 保利協鑫 4000股 2.6375買入
2013 微盟 1000股 19買入
1398 工商 1000 5.02買入

25歲 有個女1歲
月入 23000
固定支出 12000
其他洗費 3000-6000 不等
流動資金 有30000-40000 （但有28000被扣在股票）

謝謝

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。

微盟(2013)有質素，同時有不確定性，不宜持有太多，暫時唔好再加注。

工行(1398)只係收息股，增長力欠奉，唔適合你。

保利協鑫能源(3800)比較麻煩，佢現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

未來投資策略，建議你每月5成儲蓄做月供。其餘先儲起，用一邊月供一邊儲蓄的策略。

但你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

餘下現金和每月一半儲蓄，我地就等機會，當大市出現較大回調，就加大力度掃貨，然後作長線投資。

------------------------------------------------

Q21886：

老師你好，我手持股票：

1500股 00052（$26入）
500股 02388 （$33入）
3000股 06823 （$11入）
另月供$2000 2800

想請問以上股票組合有需要調整嗎？另外亦有意購入中電股份，請問是否應等股價下調才入市？謝謝你！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，當中的股票，都是有所素的。

這算係一個較保守的平穏增長型組合。若你係中年至退休人士，以上持股和月供組合，係可以。

中電(0002)主要係收息，再加少少增長力，同樣適合上述年齡層人士。現價算合理區，已可以慢慢分注入貨。

------------------------------------------------

Q21887：

龔成老師你好，想你畀意見而我，以下嘅財務狀況能否購入第二層屋。

月入 ：65000
支出 ：家用雜費8000 / 供樓 18500 / 日常生活開支 4000
資產 ：600000 流動現金 / 800000 股票
貸款 ︰380萬屋 （自己名）
狀況 ：已婚

不會考慮用另一半名字購入，想用自己名
沒有小孩

目標 ：再購入一層樓，希望錢唔好貶值

龔成老師︰

首先，你是非首置人士，會有較高印花稅要收取。另外，由於係你第二個物業，能做的按揭成數都會較少。

以你現時資金狀況，要購入第二個物業，相信較困難。

從財富增值角度，要避免資金貶值，最好方法就係將貨幣換成優質資產。優質資產並非只有物業，優質股都係其中一類。

所以，你可以先用現有資金，投資優質股增值，去累積第二個物業所需資金。

你可以利用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

大市現處於合理水平，那60萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃平貨。

------------------------------------------------

Q21888：

龔sir，有一個問題想請教，銀行嚟緊會借閒錢一百萬畀我，3.25%p.a., 鎖2年。一定要借的。

我應唔應該攞去有6厘息嘅股票2年 compensate 個利息加賺少少呢？

其實我想全部去買1211，1810，388和700 instead of 工行或港燈。你點睇？請賜教

我日日都睇你啲Q&A，多謝你的耐心解答。

龔成老師︰

這個好視乎3個因素，你自已投資能力、風險承受能力和這筆資金，可用作投資時間。

若你投資能力一般、風險承受力較弱、或者這筆資金，2年後必要全數歸還，可動用投資時間較短。我都建議集中投資「收息股」，會較好。佢地增長力係弱，但在波動性較低。同時，有一定派息。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)

如果你有一定投資知識和經驗，而且風險承受能力都高，而借貸又不必急於清還。你係可以投資你所講的「潛力股」，比亞迪(1211)、港交所(0388)、騰訊（0700）、小米（1810）

但你要明白，佢地增長潛力大，但風險同樣好高。你用借貨得來的資金，去投資潛力股，風險唔細。

另外，比亞迪(1211)現價偏貴，要回到$135才算較合理，才可小注。而港交所(0388)、小米（1810），要回多1,2成才算合理區頂，才可開始分注入貨。

騰訊（0700）則現價已經算係合理區頂，但由於未算平，在這水平，只宜小注。

同埋，你要建立一個平衡的組合不要過度集中在部分股票，就算你想買潛力股都不能過多。另外，記得要有部分留現金，不能全部都投資，要有備用，以及「等投資機會」的作用。

------------------------------------------------

Q21889：

龔sir你好！我今年22歲剛畢業開始工作及有儲蓄約8萬，現時月入約萬五，有約20萬學債需償還、年供醫療保險約萬五及家中的財政負擔。

我的目標是大概五年後薪金至少達到月入3萬以上。現時我希望可以好好理財建立適應的投資組合，未來目標能上車買樓。

因我修讀商科會計財務相關的學位及從事金融業相關職業，對市場有一定的基本知識，可是我從未有實戰投資經驗及相對的不敢面對太多風險(因我自認為現時我的財政狀況不佳，害怕不夠穩陣)

請問有甚麼建議我應何時開始(例如至少有多少備用現金)投資(e.g.月供股票) 嗎？我應還清債務才開始嗎？

謝謝你的指教

龔成老師︰

雖然你係讀金融相關課程畢業，係投資上有一定優勢。但你要明白，實戰跟書本很不一樣。因此，你都要保持學習心態，去累積更多實戰經驗，投資才會做得好。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時22歲去計，是財富增值的黃金時期，故投資計劃越快開始，會係越好。

備用現金方面，你可以視乎自己實際情況，我一般建議留有半年開支的應急錢，會較理想。

由於，你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

策略上，你可以投資「平穏增長股」和「潛力股」。你每月用5成儲蓄做月供。其餘先儲起，用一邊月供一邊儲蓄的策略。

潛力股是風險較高的股票，由於你現時投資經驗不多，風險承受能力又較弱，建議不要持有過多，最多維持2-3成好了，甚至全部先集中係平穏增長股。

若你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

餘下的另一半儲蓄，我地就等機會，當大市出現較大回調，就加大力度掃貨，然後作長線投資。

至於現有8萬現金用來先還學債，還是投資先，是一個機會成本問題。一般學債利率不高，你用這筆資金先作投資增值，效益會較高。

現時大市在合理區，你可以先用4萬。餘下4萬就連同每月一半儲蓄，等大跌機會。

------------------------------------------------

Q21890：

hi, 成老師，想請教我在之前入左以下股票，
9988 $266入
1024 $370入
3718 $1.71入

想請教仍可作中長線持有嗎？
因已蝕好多。謝謝！

龔成老師：

你持有的股票，其實是有質素的，不過買入價，都全部貴，相信你很易受當刻市況影響，見到短期市況氣氛較好，以及較多短期利好消息，就會追入，同時相信你無企業估值的能力。

建議你住後學好投資，又或同一些平均入市法或月供，能有效助你減少風險。

阿里（9988）有得守的，無問題。

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍略貴，這股質素無問題，但股價上落會大，如果持貨太多可能要減少少。但如果不過多，其實可守，不過要較有耐性。

北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中間，你有貨可持有。

------------------------------------------------

Q21891：

龔sir你好！我和先生抽中白居二，但見未補地價的居屋樓價都好高，其實值得買嗎？

謝謝你

龔成老師︰

雖然居屋投資價值，比私樓為低。但由於佢售價跟市場價相比﹐係有折扣。

你考慮時，應從長線角度去考慮，邊個方法先至可以令我地，有較多現金流空出來，作投資增值。因此，從財富增值角度，居屋係值得考慮。

而作為自住用家，只要你能夠做到"供得起"這個大原則，咁就可以。

當然，你都要跟同區同類型樓盤作比較，如果係貴得無道理，就不要考慮。

------------------------------------------------

Q21892：

老師你好！通問你點睇越南ETF 2804同3087？現階段適合月供嗎？如果二選一應該選邊隻？

多謝抽空解答！

龔成老師︰

ＰＰ越南(2804)投資目標是提供在扣除費用及開支前與MSCI越南指數 (NTR)

ＸＴＲ富時越南(3087)投資目標是追蹤指數的表現，而該指數為越南富時指數。

2者初步睇，分別唔算太大。我自己無研究越南股票，如果你有認識。你可以再仔細D，睇埋佢10-15大持股，才作決定。

越南相信會係其中一個，未來發展得唔錯的東南亞國家，你用佢作月供係可以。但由於佢係新興市場，風險會較高，故投資時不要太大注。

------------------------------------------------

Q21893：

龔sir你好,本人28歲 現持有股票0，2年前與前度合資購入物業，明年夠3年將會放售，大約取回60萬左右。

另外，家人想將現值800萬的自住物業放售套現增加現金流。因只有本人有收入，家中有長者，所以未能儲到錢。

想問取回錢後，如何安排會比較好？又應否賣樓套現？多謝解答

龔成老師︰

每人都有自住需要，我唔建議你沽出自住物業。因為你咁做等同沽空樓市，你要承受租金波動，所帶來的風險。

因此，我建議你最好保留自住物業。另外，善用取回的60萬，作投資增值，會較好。

假設，你現時家庭現金流有巨大壓力，你可以將全部或部份資金，買入一些「收息股」，去創造現金流，以分擔部份生活開銷。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）

若你現時家庭現金流壓力不大，我建議你先用取回到60萬，去投資「平穩增值股」+「潛力股」這類增長股，先做好財富增值部份。

如果你投資知識不高，可較集中在平穩增長類股，至於潛力股，只宜小小注。到你有一定投資知識，才慢慢增加翻潛力股比例。

現時大市只是合理區，60萬資金可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

另外，由於你係家中唯一收入支柱，在實行以上任何一個投資計劃前，都要先預留半年開支，作應急之用。

除了上述投資計劃，你都要審視自己開支部份，盡量避免一些不必要開支。另一邊，你可以考慮做一些兼職，或者網上小生意，去提升自己收入。

重點係，你要相辦法令自己每月有一定閒錢，可以作投資增值，令自己可以走出這個「財務死胡同」。

------------------------------------------------

Q21894：

你好！龔生！我今年30歲，月入18000元，與月入35000元，比我大十年的老公租屋住，2人買入12萬元ibond，和有十多萬定期。

每月二人共儲蓄16000元，有看過你的80後百萬富翁，與財務自由行，加上定期睇你回覆的讀者來信，得益不少，

今年開始用8000元月供3隻平穩增長股，和一隻潛力股，這樣足夠嗎？如何可以以投資改善生活？但另一方面，新聞經常話可能中國或美國經濟可能會急轉向下，

投資時有要注意的地方嗎？

之前我喺投資方面已經錯過咗好多時間，期望得到你嘅回覆，幫助我！thank you

龔成老師︰

記住，我地投資唔好估走勢，我地著眼點，係企業長線質素。宏觀經濟係要考慮，但唔會係佔最大比重。

最主要都係睇翻企業和所屬行業本身，有無發展潛力和質素，去決定是否值得投資。

中國或美國經濟會唔會急轉向下，無人會知。我地只會用現時狀況，去制定投資策略。

係投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，你用「平穏增長股」 + 「潛力股」作組合，每月儲蓄月供一半和儲一半的做法，都係正確。

iBond和定期這類定息產品，增長力好弱，唔建議持有太多，因為會拖慢你財富累積速度。

另外，你要留意「潛力股」係有一定波動性，你投資經驗較淺，只宜先小注，大約佔組合2-成左右。到你有一定經驗，你可以投資到約4-5成比重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21895：

你好呀龔成，想問一啲股票問題想問你，亦有不斷留意你的Facebook

最近我自己的股票已經下跌了很多，不知道應該怎樣做，想減持一半，想問吓你的意見

本人持有以下：
1772 140
981 28
9988 278
6666 11

多謝你的寶貴意見 多謝你

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時持有的股票，都係有投資價值，都不需要因為跌價，而作出減持。令你出現虧損原因，主要係你買入價偏貴。

這些持股都係潛力股類別，佢地雖然有增長潛力，同時風險都較高，不宜持有過多。

特別係贛鋒鋰業（1772)、中芯國際（0981）這些上落較大的潛力股，更加不宜只可小注。

若你係偏年青，持有潛力股係可以，但只宜佔組合約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

另外，由於你現對企業定平貴能力，似乎較弱。為免再出現同類型情況，我建議你再投資時，最好利用月供，或者分開多注去入貨，從而減低買貴貨風險，相信會對你較有利。

------------------------------------------------

Q21896：

龔Sir, 你好, 首先多謝你對我們的分享。因為最近才認識你, 已經開始看你的書及FB, 希望可以做到為自己財富增值, 亦已經開始學會儲股票。

有些問題, 請多多指教!

1) 本人40歳, 現金約有$800,000, 人仔$160,000,

股票有 (5: 800股, 1398: 15000股, 2800: 2000股, 2628: 2000股, 3067: 200股, 371: 30000股, 751: 20000股),

每月可用$5,000投資, 想60歳後可以每月有被動收入$10,000, 我現在還能做到嗎?

2) 當初都是聽人講亂買, 又短炒, 以下2隻股票應該保留還是放棄?

2.1) 371 (30,000 股) (平均價$5.12)
2.2) 751 (20,000 股) (平均價$3.51)

謝謝! 祝工作順利!

龔成老師︰

1) 若果你希望60歲後每月有2萬蚊現金流，以股息率6%計，你需要本金200萬。你可以透過一些增長型股票，去累積這筆資金。

人民幣係貨幣的一種，長線只會貶值，除非你有明確用途，否則你換回港元去投資，會較好。

匯控(0005)、工行(1398)、北控水務集團（0371）只係收息股，增長力好弱，不宜持有太多。

中國人壽(2628)和創維數碼（0751）質素只係中等，同樣不宜佔比太重。

現時40歲，可以投資一些「平穩增值股」+「潛力股」，作為增值目標。

現時大市處合理區，你可以先用每月儲倒的一半資金投資，另一半就先儲起，等大跌市時才出手。

如果你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-4成，視乎你投資經驗多寡和了解這些股票程度而定。

大市現處於合理水平，大約HKD100萬資金，你可以先多用30-50萬，以"分注"形式，慢慢入貨。餘下資金和每月儲蓄，就等大跌市機會出現，才大力度掃貨，並長線投資。

我假設投資回報有10%（連股息再投資），你每月投資$5000 + 現有資產約120萬(現金+持股)，20年後大約會增值至過1000萬，故這樣安排相信很大機會達至你的財務目標。

2) 北控水務集團（0371）只係收息股，雖然有質素，但增長力不高。創維數碼（0751)增長力只算一般，整體質素較中等。

我建議你，2隻股票至少都沽出部份，換至以上有增長力的優質股，會對你較有利。

另外，你唔好再用短炒作策略。想做到理想回報，一定係長線持有一些優質股，會係最有效。

同埋，唔係單係聽消息，就去入一隻股票，咁係好危險。

我地買入一隻股票，一定要知道佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

------------------------------------------------

Q21897：

老師, 剛從朋友那裏聽到關於你的資訊, 看過你的facebook, 覺得很有用, 我想請教你所說的公司資訊如ROE...可以在哪些網頁上得知呢?

另外你會開班教授基本的投資方法和理論嗎? 我完全是新手。

龔成老師︰

你可以去中銀網，AASTOCK等，一些坊間常用的投資網站，都可以找到。

我自己都有開辦投資課程，就算你係投資新手，都無問題。

【投資倍升股課程】適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資時機、配置、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

------------------------------------------------

Q21898：

龔成老師您好！小弟已婚，育有兩子，已移民外地。銀行戶口除了有大約 4 個月家庭開支的儲備外，有大約 HKD400000 現金可用作投資，

但兩年後需將這筆錢再次存入現金儲蓄戶口，用作繼領簽証的資金証明。

似乎我不能作老師教導的長線投資。這個情況下，你有甚麼投資建議？先謝。

龔成老師︰

2年時間不長，而且你這筆錢，有一個明確而重要的用途。因此，就算投資，我地都只可以好保守。

最穏當做法，當然係做定期。但你願意承受少少風險，你可以將部份，買入一些收息股，作適度的增值。

到你要用這筆錢前半年，慢慢套現變成現金，咁就可以。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)

現時大市只在合理區，資金唔好盡用。最好留有部份，等大跌市出現時，可以用來掃貨。

如果你想做長線投資，等到你每月有一定閒錢，才用月供進行，咁會較好。

------------------------------------------------

Q21899：

你好！我是一個股票新手，請問咩係「平穩增長股」同「潛力股」，可否有時例子作參考？

龔成老師：

所指的是「企業」，我地買股票就是買企業，因此要從企業基本面著手。

平穩增長類就是有基本增長能力的企業，例如港鐵、六福、金沙。

而潛力股，就是該企業增長快速，例如比亞迪、美團，你會見到佢地的業務，都是快速增長，身處的市場同樣增長快速。

------------------------------------------------

Q21900：

Sir，想問下資產型企業係點理解，我上網睇過你答讀者問題，當公司資產愈多，賺錢會愈多，例如銀行同保險公司

咁佢地係用邊d資產去賺錢

係咪用客戶既錢再去投資，就屬於資產型企業？

龔成老師︰

如果佢資產價值，可以有效反映佢賺錢能力和質素，就算係一個資產型企業。

例如銀行，佢主要係透過收取存款，再借貸出去，從中賺取息差，這類就是資產型企業。

又或者，一些公用股好似港燈(2638)，佢係用佢發電廠去發電，以賺取電費，這類都係資產型企業。

但有些企業，表面上係資產型企業，實際上未必完全係，所以點去定義，會有少少複雜。

我課堂上，會有更詳細解釋，如何去分辨資產企業。但你可以簡單咁理解，其資產價值能有效反映其賺錢能力，就是資產型企業。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21801-Q21820）

Q21801：

龔 Sir, 岩岩上完你的投資班，多謝你悉心既教導，真係獲益良多！

我上完堂之後有d問題想再請求下你

1. 想問下「盈利」同「股東應佔溢利」分別在於咩？因為我記得你講過佢地是不同的，尤其想自己計 EPS等等數據既時候應該點揀？

2. 另外見到有同學問你增長率既時候，你用左年度化增長率 (上堂時都唔見你講過）而唔你用複式增長率 (CAGR)去計，想問下應該咩時候用邊個？

因為增長率不同，有代表性盈利可以差好遠

e.g. 388
年度化增長率:
5年增長 (9.11-4.76)/4.76 = 91.4%
年度化增長率: 91.4%/5 = 18%

CAGR:
(9.11/4.76)^(1/4) -1 = 17.6%

感謝龔 Sir!!!!

龔成老師︰

1) 財報上「盈利」，多數係包含「股東應佔溢利」和「非股東權益」。前者，就係股東真正可分到的盈利部份，也是你用來計算EPS用的。

後者，係一些非集團可佔有的盈利部份，這部份會在集團盈利中除去。

2) 其實2者係一樣，個計算方法如下。

(9.11 / 4.76) ，再開方(5-1)，只後將答案再減1，就係得出個增長率+17.6%。

你見之前18%，只係我將小數位進左位，其實背後答案係一樣+17.6%。

------------------------------------------------

Q21802：

龔sir你好，我想請教一下你。我買股票已有一年多，但資產不是升值很多，甚麼很多資金都放在股票裏拿不出來。因此想問下你我而家的投資組合是否有問題：

0005 @800股 (36.28)
883 @4000股 (8.11)
1211 @500股 (192)
2013 @2000股 (12.6)

3800 @1000股 (3.65)
6618 @100股 (110)
9633 @600股 (66)
9988 @100股 (287)

我覺得我買ge股票都好散，每隻都買小小咁，如果我而家加注，應該買邊隻？另外，我亦考慮買一D收息股或儲蓄保險，有穩定的資產增長。

麻煩龔sir有時間可以比Ｄ意見我！感謝！

龔成老師︰

投資股票，就等同買入一間企業，就算再優質的企業，要時間去升值。1年只係一個短期的時間，你唔好預期會有明顯的效果。

我地係投資增值時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時持股，大部部都係有質素和增長力。若你係年青至中年人士，這些股票係合適。

但收息股(包括匯控 - 0005)類，就不宜持有太多，因為佢主要係收下息，增長力較弱，會拖慢你財富增值效果。

"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

中海油(0883)質素中等，不宜持有太多。

其次，我發現你好集中係潛力股類(除了0005, 0883, 3800外)，佢地雖然有增長潛力，同時風險都較高，不宜持有過多。

就算你偏向年青，潛力股都只可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你先要加大翻平穏增長股部份，令組合更平衡。

而持股中，保利協鑫能源(3800)係較麻煩一隻。現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

------------------------------------------------

Q21803：

呀sir! 其實我好認同您 投資係長線 唔係短炒 所以我將來投資果喲優質股 我都會長擺係到 如非必要都唔放

不過 我想問下呀sir 您之前提過升一倍放一半 但如果我只入左一手 放一半會出現碎股問題 甘係唔係代表其實我要係低位入兩手或以上？我用緊富途牛牛做買賣 佢又好似唔比賣一半

另外呀sir 您堂上講到話一隻股票 好似港交所（388）佢既質素甘高 甘佢股價一定長期向上 甘如果我宜家唔入市 將來佢升到好高（假設$600）

甘我係唔係會錯過宜家既入市時機？

同埋呀sir ，我上星期又買左喲新股票，暫時有：
9988@$203 一手
2638@$7.83 一手
VOO @377.04 兩手

我黎緊會繼續定期定額投資VOO 同埋留意大市 入呀sir您上面推薦既優質股 如果長遠甘做 係唔係一個好既投資策略？

唔該呀sir 因為黎緊畢業要搵野做 要係搵野做前學識投資 問既野比較多 唔好意思 唔該您呀sir

龔成老師︰

其實優質股，只要佢一直質素都無明顯變差，我地長線去持有，永遠都係最有利。

而升一倍放一半，主要係比一些較保守投資者，等佢地可以先收回成本。或者一些初學者，佢地未能完全掌握何為貴，才會用這個策略去沽貨。

至於港交所(0388)這類優質股，長線預期係會一直上升。但我地唔可以因為咁，就不理價值平貴，直接入貨。因為若然買貴左，雖然最終都會升，但成個回報就已經差好遠。

因此，我地都要緊守平貴原則，去有計劃地入市。如果你好驚真係會錯失入貨機會，你可以用月供儲貨，咁就可以。但當股價去到異常貴，好似之前比亞迪(1211)成本2XX，就會連月供，都不適用。

而我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你還未畢業，相信是一個年青人，你現時正值財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應該要進取少少，可以較集中「平穏增長股」和「潛力股」。港燈(2638)係收息股，增長力唔高，你不宜持有太多。

至於其餘2隻，都係適合。但長線計，我地唔好成個組合，只集中係2, 3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

將來你投身社會，可能會較忙。但唔好因為離開左學校，但忘記了學習。投資係需要持續學習，提升自己知識，才會做得好的。

------------------------------------------------

Q21804：

你好岩岩上完你第6堂, 好有沖動去用你條FORMULA去中銀網選股, 不過我好貪下, 會先唔用PE

自己篩完一堆搞左兩個鐘之後, 有隻見到好想問下你意見: 8137 - 洪橋集團

另外想問問，除咗你堂上教的公式，有冇一D網站/一條公式岩宜家用可以快搵到D一次性受疫情影響的股票？ 比如之前問你果隻大快活

就會因為PE/ROE問題而篩走左，甘可惜左反而

龔成老師︰

洪橋集團(8137)雖然過到大部份篩選準則，但你要留意佢過往股價都幾波動。

而且，市盈率都一直維持偏低水平，代表市場對佢睇法好一般。你再仔細睇，佢盈利其實主要來自一些公平值變動，唔係實際收入。

因此，佢投資價值，並不如表面睇咁高。

之後課堂，我會教你點睇年報，你就可以理解到，這隻股票箇中問題。

網站方面，暫時我見都係中銀個網會較好用。至於這個篩選並唔係完美，的確會有可能篩走一些優質股。也會好似8137，誤入一些投資價值一般的股票。

但這個已經算係較有效率方法，特別係對初學者，會較易掌握。

之後，你再配合基本面和仔細分析財務數據，已經好大機會，找到一些有價值的股票。

------------------------------------------------

Q21805：

龔sir，您好。我經常留意你的facebook，特別是龔成問答信箱。最近買樓問題很煩惱，可以請教一下您嗎？

本人33歲，先生(33歲)，育有一對年幼子女(幼稚園)，目前2人合共有現金200萬，先生月入5.4萬(5年後可加薪至8萬)，我是sales,平均每月3萬幾，沒有股票、物業。

現在同家人一齊住，大概還可以一齊住5年。之後搬出來，會請工人。我們現打算置業，有幾個唸法:

1. 直接買3房，但只可以買到30+樓齡的舊樓，八成按揭，只可即刻自住。(擔心舊樓不保值)

2. 唔理地區、大細，買400萬樓，5成按揭，放租，之後換樓(擔心之後樓價升，難換樓)

3. 買2房半新樓，八成按揭，即刻自住，有機會再換3房。(都係擔心難換樓)

目前呢5年沒有迫切住屋問題，只是先生錯過左兩次置業機會，擔心樓價再升難而置業，而且即使現在開始供樓，也要供到退休了。現在儲了一筆首期想盡快上車

現在未置業，每月開支約3萬。若置業後搬出來住+小朋友返學，每月開支大約7.5萬

最終目標有一套三房樓自住，有機會再置業作收租用途。請問龔sir我應該點做好

龔成老師︰

以你現時情況，用方法1和2都係可以。

至於3，我就唔係咁建議。因為好多時新樓都會有一定溢價，令你變相買貴左。

方法1，30+樓齡唔一直定無投資和升值潛力，但就好睇個物業本身質素、地區、交通配套、是否大型屋苑等。另外，你要留意佢幾時會做大維修，這個潛在成本，你必需要注意。

至於方法2，都係可以，先買一間較細屋，去以資產追資產，從而減低樓市波動，對你將來換大屋的風險。

但大前題，你這間細屋，都要有一定質素和升值能力，最少升幅能跟大市同步。之後，你再利用月供優質股，去累積更多資金。到有一定數量，就可以入市，以細屋換大屋。

由於這間是你自住屋，所以入市與否個重點位，係你是否"供得起"。只要你確保可以長線都"供得起"，而佢又符合你長線生活所需，咁就無問題。

最後，我建議你置業時候，要考慮埋個財富組合的平衡性，唔好過於偏重任何資產類。否則，會有過度集中性風險。

最好你係置業同時，一定要留一定優質股進行增值，成個組合才算平衡和健康。

------------------------------------------------

Q21806：

Hi 龔Sir, 我想問下美國有機會加息嗎? 如果加息對香港樓市有冇影響？ 謝謝

龔成老師︰

過去一段長時間，全球維持一個較低利率水平。但長遠計，息口必然會重新回升。

雖然，我地唔知幾時會發生這件事，但都要為這個情況，作好準備。

香港樓市現時處於合理區頂，但當出現加息，市民供樓成本上升，必然會直接影響入市資意欲，令樓價下跌。

但我認為香港樓，長期香港樓市，依然會維持向上，好難跌好多。

首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。

佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！

香港樓長期供應不足，需求正不斷累積，這將會令樓價保持向上，跌少少，又會升過。

------------------------------------------------

Q21807：

請問1029鐵貨前景如何？我多年前0.8買入，後來0.3又買，前後有十几萬股，近解套之際政策降温，又面临大股東賣股份……是福是祸，宜守定是宜走换一隻其他的股票呢？

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

鐵貨（1029）經營採礦業務，專注在俄羅斯遠東及中國東北地區開採、開發及經營工業商品項目。

佢擁有多個項目組合，著重於開發礦場、生產及加工鐵礦石及鈦鐵礦，過往業務只是一般，雖然都有生意，但盈利上落較大，有時出現虧損，投資價值唔算好高。

整體分析，只是一般般。賣出會較好。

------------------------------------------------

Q21808：

我有3個問題想請教老師：

1. 新手投資 + 加強儲蓄能力 想問我可以先睇老師邊啲既書藉，除咗實體書，會否有電子書可以係iPhone睇？

2. 關於投資盈富基金既平均買入價, 以下係我唔同時間唔同價位買入，但平均買入價一路上升，請問個原理係點樣，因為越買越貴就唔敢買..

$24.18x500
$27.42x500
$29.26x500
$28.2x500

3. 請問如何計算到宜時既股票屬於貴定平？

龔成老師：

1）你可以睇《80後百萬富翁》
《股票勝經》
《財務自由行》
之後再睇其他。

上述都是最入門及適合你的，另外，我部分書有電子書，如《股票勝經》
https://www.enrichculture.com/products/9789888395767

2）最重要睇長期的，月供往往要5年以上，最好都3年，因此你預需要因為短期的價格上落，影響左策略，只要大方向正確的就得，當然，如果我地評估到現價貴，就可能會減少金額或停止月供，但在一般情況，你保持月供就得。

3）要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21809：

龔成sir,想些問題想請你指敎！小弟剛出社會 有十幾萬美元在投資 我睇左好多關係財富嘅書籍 知道汽車其實係負債

因為會令你現金流出，但我最近對某品牌汽車感有興趣 ，想擁有自己嘅汽車 但我知佢係負債 唔應該擁有 但我真係好中意 每次見到架車 都好想要

但同時又知道唔應該擁有 每次心情都好忐忑 如果係你會點做令自己舒服啲

龔成老師︰

你要分清楚，何謂「想要」和「需要」。

「想要」純粹係你個人感覺，或者想滿足自己一些欲望。

「需要」係有一些客觀因素，你係要持有這個物件，以達成某些實際目的。

簡單咁講，如果你係自顧人士，開車接單送貨。「汽車」就係你生財工具，可以為你創造價值，唔係一個負債。

若你只係覺得鐘意、或者只係想用佢作消閒娛樂，無創造出實際價值，就係你負債。

我唔係話，你完全唔可以用錢，去做一些娛樂性消費，但我地要平衡。最好係先做投資增值，有空閒錢，再考慮消費，咁會較好。

你其實可以用一個方法，就是「定目標」。

例如完成了一個財務目標，例如有$20萬、$100萬等等，你就可以用買車去獎勵自己，這樣就可以平衡，同時令自己更有效追求目標。

我地運用財富的法則，「先增值，後現金流」。

------------------------------------------------

Q21810：

成哥，我本身有留意8473，因為睇佢符合轉主板條件，0.4買左佢，點知港交所轉例，改做盈利要三年8000萬，

而家跌左，我仲未賣，而家心情好灰。

其實我買之前都覺得佢唔係妖股，係靠實力既股票。我個人認為彌明生活百貨管理得好好，我自己作為男仔陪女朋友去呢間鋪都覺得佢好，

另外佢作為零售，在疫市黎講算係好強，加上佢籌備緊做美容院，我個人認為佢會有發展空間，雖然買貴左，但我認為可以繼續持有，呢種心態正確嗎?

我明明有睇你書，但我輸左俾人性

龔成老師︰

你用生活所見，去初步分析一隻股票，係正確。但記住，我地是否投資一隻股票，主要考慮佢長線企業質素。

而能否升主板，跟企業本質無關，雖然轉版能提高了市場價值，但在更多時間，只是炒作，因此，你唔應該作為考量點。而且，這些消息好易相關股份，成為炒作對象，令股價被不合理推高，要小心。

彌明生活百貨（8473）業務不過不失，發展能力中等，不是高增長的類別。

以佢現時的經營情況，算是合理價，但這股始終規模不大，加上近年的盈利有下跌情況，存有風險。投資係可以，但不建議太大注。

另外，政治相關因素，都會令這股波動，要明白股價風險，政治因素是好難預測的。如果你持有太多，宜減。

------------------------------------------------

Q21811：

首先多謝你之前的指導，另外想問1088中國神華及3339中國龍工前景如何，可長期持有嗎？

還有3658新希望服務，剛抽到一手，是優質股嗎？

龔成老師︰

中國神華(1088)始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望，主要係收息的。可長期持有，但不建議太大注。

中國龍工（3339）主要業務為製造及分銷輪式裝載機、壓路機、挖掘機、起重叉車及其他基建機器。佢的產品有出口至俄羅斯、中東、澳大利亞及非洲等地。

雖然近年生意不差，但以過去5年計，生意與盈利都有波動情況，這點不得不注意。而企業的賺錢能力算是中等。

以企業的質素來計只屬中等，現時不貴，股息率都算吸引，但業務波動是風險，因此投資不能大注。但長線基本上可以的。

新希望服務（3658）係中國綜合物業管理及民生服務運營商。

佢為住宅物業、商務物業及其他類別非住宅物業提供物業管理服務，亦向非業主提供增值服務（包括案場管理服務。現時在管樓面面積超過1000萬平方米，物業管理項目全部位於中國一線、新一線和二線城市。

近年企業發展不差，生意與盈利都有一定的增長，不過，企業規模始終不是好大，獨特性未算強，投資價值算是中等，未算好吸引。

你只係一手，唔算太多，可以長線持有。

------------------------------------------------

Q21812：

老師，想講吓投資以外的事。我今年29歲，本身在一間蚊型工程公司工作，人工比大學同學低幾個point。

不過最近老闆想移民，所以佢想我留低幫佢打理生意，等佢走咗之後生意可以繼續營運。(我原本想完成part time master degree 就揾工)本身公司响香港得3個員工，

啫係我，我上司同埋我同事。上司都有好大機會2年之後移民，之後就應該由我接手大部份公司業務。老闆將我人工加咗50%，

而且會有分紅(公司營利嘅某個百分比)同公司股份俾我地。我諗咗幾日，決定試吓留低，因為我覺得接手一盤生意機會唔係人人有，如果可以學習營運整間公司，

相信都係好難得嘅經驗。雖然老師嘅新書有提及只有辭職並全職創富才是財富增值的最佳方法，但我仍想嘗試一下營運這間公司。老師有何看法呢?

龔成老師︰

其實我覺得係一個唔錯的學習機會，你可以親手營運一盤生意之外，仲要唔係孤身作戰，而係有有經驗架人指點，我覺得有嘗試的價值。

我書中講全職創富，除了自己做生意外，都仲有其他幾個方法。所以，你都要睇翻，自己本身個大方向係點。

如果你係想向做生意方向發展，這個是一個唔錯的學習機會。

加上你現時29歲，最緊要試多D野，保持進步，從你長遠人生的角度，這次是很好的進步機會，會對你成長有用，加油！

------------------------------------------------

Q21813：

你好，我而家計劃緊置業結婚及提早退休

本人28歲 與另一半工作穩定，總月薪約50000，扣除開支及家用，每月可儲25000。

資產方面
- 2層內地二線城市收租物業，總市值約180萬，租金回報約2%。2013年以約40萬購入，預期該地區具長遠發展潛力，每年增值約8-10%，
近年內地樓市升勢強勁，正猶豫是否現時賣出一層套現。

- 港美 優質+潛力股票+主要指數ETF，總市值約40萬，科技類（eg科網、半導體、電動車）約佔40%；傳統金融、醫療、能源、消費品類約佔50-55%；
另外投資約5%黃金、白銀ETF+加密貨幣。持倉變動甚少，期望長期穩定增值10-15%。

- 已累積3年股票投資經驗。

- 現金約70萬（包括應急資金20萬）等大冧市掃平貨

- 負債約10萬

- 已購買足夠保障的危疾、醫療及人壽保險。

目標一：預期在5年內以首置、高成數按揭買入市值800萬內市區樓作結婚自住之用。

目標二：希望40歲前累積1000萬淨資產（當中包括1層香港自住物業）。

我可以用咩方法完成以上目標？
唔該成哥

龔成老師︰

首先，係開始投資計劃前，你要睇翻你負債部份。如果個息率係較高，你要先處理好，否則會拖低長線投資效果。

現時你持有2間內地物業，租金回報率只係一般。雖然你預期有增長力，但由於你計劃5年內要在香港置業，如果再加上這2間內地樓，你成個組合就會偏左係物業類，會有過度集中性風險。

若果你覺得這2個物業，長線升值能力會唔錯，你保留都可以。但往後新資金，要集中係股市，以免太偏中係單一資產類，因而造成風險。

現時你每月儲蓄和現有資金，可以用優質股去增值，為你中短期買入香港物業和長線退休，去作準備。

你可以投資「平穏增長股」和「潛力股」，去創造一個增值平台。你先用每月5成儲蓄，即是用$12500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，現有50萬現金和每月儲蓄，就等大跌市機會出現，才大力度掃貨，並長線投資。

我假設投資回報有10%（連股息再投資），你每月投資$25000 + 90萬資產(40萬股票和50萬現金)，若你在5年後買入物業(假設你會動用120萬)，到40歲時大約會增值至680萬。

再加上你3個物業，相信都有機會，可以達成1000萬的目標。

------------------------------------------------

Q21814：

現有9988, 700, 388, 有考慮1810, 其他要研究下，總是留不到现金？！

2382, 1177, 2845 可幾錢考慮買入

未有時間可上你堂，你那些書我應該睇呢？

龔成老師︰

你上述的持股，整體都係較有增長力。但你要明白，佢地增長潛力大之餘，不確定性都會較高。

若佢地發展理想，回報當然好。但當發展不似市場預期，股價就會有較大向下調整的壓力，你要主要這個風險。

現在舜宇光學科技（2382）、中生(1177)和GX中國電車(2845)，算係合理區頂至略貴水平。

你最好等佢地回多1成，才開始小注入貨，值博率會較高。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21815：

你好龔成老師，本人最近先開始投資屬於初哥。

現在持有以下股票：
700騰訊 $625 600股
300香港交易所 $459 400股
941 中國移動 $52.8 1500股
1177 中國生物製藥$7 3000股
1810小米 $24.5 400股

請問以上股票是否可以一直持有？

最近騰訊業績是否不大好？

這些股票您有什麼意見給我，可以在什麼地方注意，還請老師指點迷津。

龔成老師︰

你以上股票，都係有質素，但有2個問題，想你注意翻。

首先，你才29歲，應以增值為主。中國移動(0941)係收息股，增長力好一般，不適持有太多。

另外，你而家太偏重左係潛力股(0700,0388,1177,1810)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。但由於你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

至於現有持貨，由於優質，故不用沽出。只要用新資金，去慢慢拉平均個價，咁就可以。

騰訊（0700）發展正面的，業績都無重大問題。

只是近期中央打壓大型企業，令佢股價較波動。但相信政府，應該唔係想佢地做唔倒生意。只係希望加以規管，在可控和對整體經濟安全的條件，去賺錢。

此股有長線質素無大變，你記住我地投資一隻股票，係睇佢長線質素。一些中短期因素，如果無令佢長線質素轉差，就算股價出現波動，你都唔洗太在意，你照長線持有就可以。

------------------------------------------------

Q21816：

老師，我溫習緊notes，有d唔明

1) 388，823 屬於水桶幾？佢地係特殊例子，高派息率，但潛力較大

我這2隻都持有，比例應該怎樣配置？

2) 原本我一家打算去澳洲，但佢封關，無得入境。

為了移民，於是賣樓，但當時打算入籍澳洲後才買澳洲樓

所以去年10月賣出hk大單位，今年1月時買入hk細單位收租,大約每年2.7厘回報

手持hk 100萬用來買股票，亂咁買左d, 依加上左你既堂，想學習下點樣配置

另外，澳洲封關，現打算去UK, 原因為亞仔升學，因亞仔（小二）越來越討厭返學，亂做功課，成日欠交，但佢好聰明，無乜溫書都有85～100分，只是不適合被填鴨

如果去UK, 用hkd 100萬做首期，還是keep on買股票？

sorry寫得有d亂，因為原本去澳洲移民，依加轉UK...近日都好較心亂

龔成老師︰

1. 港交所(0388)係水桶1，而領展(0823)係水桶2。

一般水桶1，派息比率係應該偏低。因為這些企業，都尚在發展階段，需要保留較多盈利去作發展。

但港交所(0388)由於佢業務性質特別，本身行業又係有壟斷性，唔需要留太多盈利，都可以維持其優勢，因此佢派息比率會較高，係正常。

房托類根據規定，佢必須派出最少90%盈利作股息，因此我地會視為水桶3。但領展(0823)有點特別，佢有別於其他房托，只係用組合物業收租。

領展還會定期翻新有潛力物業，去提升佢價值，從而令租金有所增長。因此，我地會視為水桶2，有派息之餘，都有平穏增長能力的類別。

若你係中年人士，港交所這類水桶1，最多可佔組合40%，若你投資能力較一般，可以再下調。水涌2會作為力，再配以少少水涌3，就算得上係平衡。

2. 當你完成課程後，你可以因應自已能力、年紀和風險承受力，去試下配置。如果不懂定平貴，就先月供或分注。總之，唔好急住去投資，要量力而為。

再有唔問，就係INBOX再問我。

至於，100萬點樣用，我會比較偏向建議你用來在英國置業。

從投資角度，你應該考慮這筆資金的機會成本，投資係乜野地方，先可以將佢係合理風險之下，利潤最大化。

若以香港樓和香港股市做例子，現時租金回報率低，股市值博率較高，故資金應留係股市。

但由於你要移居異地，應該先以安頓好生活，減低不明朗因素為優先。加上英國普遍樓價，無香港咁貴，值博率都會較接近。

因此，如果你找到合符你長線生活需要的自住物業，又可以供得起，咁你置業先係可以。到你未來生活一切安定下來，有閒錢時，才再投資增值。

而一刻，你應該保留較多資金，去處理你英國新生活上的問題。優先從生活上考慮，投資放後少少，我相信會較好。

------------------------------------------------

Q21817：

龔兄(1)千萬富翁本書最尾詳解5條致富方法， 如果我唔跟次序去睇得唔得， 先睇股票後睇其他ok ?

(2) 你嘅書裏面提到有錢人經常運用財富系統[借]去創富, 假設我已經做曬自身風險評估，想問下如果我先買咗自己嘅信貸評級報告，

然後先去銀行或者財務公司，咁樣係咪好過佢哋主動去查我嘅信貸記錄(聽人講畀人主動查好似會對評級有影響) ? 其實喺銀行借同喺財務公司借邊度合適? 如何取捨?
感激解答

龔成老師︰

1) 實戰編，你可以先睇你目標的類型，係可以的。

但建議你最終係要睇晒，有助於你了解和幫自己定位，去計劃將來。

2) 以我所知，銀行定你自己去做評級報告，係唔會有分別。至於借銀行定財務公司，一般銀行利息會低D，而且會較方便。財務公司唔係唔得，但你要了解清楚是否持牌，和產品相關細節。

如果係整體成本較低，你都可以考慮。

通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

但現時大市只係合理區，明顯未係機會，若想用借貸投資，建議再等等。

------------------------------------------------

Q21818：

你好龔成老師，本人48歲，丈夫49歲，有250萬現金本身做定期存款多年，現在因為冇利息，希望賜教方法，唔想有風險或者超低風險，

有一層自住樓，（欠按揭80萬），有150 萬股票，有110萬銀行保本保險儲蓄，一層大陸順德細樓（已經付全數）50 萬，20萬基金（低風險），謝謝。

我是主婦，丈夫做生意，有一個三歲小朋友，自住樓約值700 萬。

股票包括 5，2018，3175，405，700，270，2888，1733，2318，1800，1833，6088，2314，6127，2845，2812，2820，2238，1658，1186，3800。

龔成老師︰

其實就算投資最穏健和保守的股票，都係會有風險，只會係多與少的分別。

若你係完全唔想承受任何風險，你可以投資定期，儲蓄保險、美國國庫債券、IBOND等低風險產品。但缺點係，佢地增派息率唔高。

以你現時年紀，應該都要做少少財富增長，才算理想。但若你真係唔想承受太多風險，只買上述產品都係可以。

如果你可以承受少少價格波動的風險，你可以將部份資金，投資「收息股」。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

大市現處於合理水平，那250萬資金，你可以先用多50-80萬，以"分注"形式慢慢入貨。餘下資金就等大跌市機會出現，才大力度掃貨，並長線投資。

至於你現有持股，其實好多波動性都好大。以你較保守的投資取態，佢地唔係咁適合你。

騰訊（0700）、平安好醫生(1833)、昭衍新藥(6127)、GX中國電車(2845)、三星中國龍網（2812）、ＧＸ中國生科(2820)都有質素，但係不確定性較大，股價預期會好波動，建議你不要持有太多，甚至將佢地全部換成收息股，或者一些適合你的產品。

平安(2318)、粵海(0270)、瑞聲(2018)、IT HON TENG（6088）、廣汽集團（2238）、中國鐵建(1186)係平穏增長型，波動性會細D，但風險會比收息股高。你自己再衡量下，是否持有，還是同樣換至其他地方。

Ｆ三星原油期（3175）我無對這基金有特別研究，佢係追蹤油價相關的指數。

中短期油價會好波動，風險高。但長遠計，油價唔會好似現時的低位水平。

因此不是無投資價值，但你最好仔細了解這基金和佢追蹤的指數先。同埋，一定唔可以大注。

易大宗(1733)、渣打(2888)投資價值不高，建議換至其他投資項目。

保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

餘下無提及的股票，都係收息股，若你可承受少少價格波動的風險，長線持有就可以。

最後，你要留意持股總數，以你資金收量，組合大約10-15隻股票好了。過多你會好難定時審視和管理，對你會不利。

------------------------------------------------

Q21819：

你好！龔成老師，本人38歲想請教一下如何調整現有投資組合，邊D適合長揸，邊D應該沽出/減持？

股票組合如下：

香港中華煤氣有限公司 (3) 3024股@ 17.30
思捷環球控股有限公司（330）600股@ 50.00
中國建設銀行股份有限公司—Ｈ股（939）3000股@ 8.00
金利豐金融集團有限公司（1031）4000股@ 6.00

工商銀行—Ｈ股（1398）4000股@ 7.00
醫渡科技（2158）1000股@ 65.15
京東健康（6618）50股@ 71.00
阿里巴巴－ＳＷ（9988）500股@ 250.00

另外如果想加入比亞迪電子（0285），吉利汽車 (175) ，阿里巴巴－ＳＷ（9988）作長線投資，現價可入嗎？謝謝老師

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應以增值為主。建行(0939)和工行(1398)只係收息股，增長力唔高，不宜持有太多。

思捷環球（0330）當多年前，環境改變令佢「生意持續下跌」，佢的質素已經改變，佢已經要進行止蝕的動作。

金利豐金融(1031)質素一般，建議慢慢換至其他優質股較好。

醫渡科技（2158）有潛力的，可長線。但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

你現貨可持有，但暫時唔好再加注了。

其餘持股，都係有質素和適合你年紀，長線持有就可以。

至於想再加入比亞迪電子（0285），吉利汽車 (175)，都係可以。比亞迪電子（0285）現價偏貴，回多1,2成才算合理區頂，才可開始小注。而比亞迪電子（0285）現價算合理區頂，無貨可先小注，到有明顯回調，才正式入貨。

阿里巴巴(9988)雖然現價合理，但由於佢已經佔你組合較高比重，個別企業不應佔組合15%以上，否則會有過度集中性風險，故你暫時不要再加注。

另外，你而家太偏重左係潛力股(2158, 6618, 9988, 0285, 0175)，佢地雖然有增長潛力，同時風險都較高，不宜持有過多。

你算年青，風險承受力較高，但潛力股也最多只宜佔組合約5成，餘下應集中係平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q21820：

你好，龔Sir, 很後悔不早點認識你的專頁，因為跟住你的投資方法，幾個月已經見到明顯的增長，真心感謝你願意將你的心得經驗不吝分享。

現有一問題在猶豫：（現37）6年前買了一份投資保本的保險供10年（還要供4年）因當時幫朋友無留意回報，現發現每年投入5萬，10年後多1萬，

而且供滿期後再放多5年先會多20萬，現在停供會蝕7萬，但因今年（最遲明年）會置業需要資金，請教阿Sir會如何安排？謝謝

龔成老師︰

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

因此，你要視乎翻你持有的投資保本的保險供，當中的特性，以及本身的預期回報，其中保險的作用。

從投資角度計，你保本保險回報，唔算理想。

同一筆資金，若利用優質股去增值，長線好大機會可以跑嬴這份保本計劃。

當然，你這計劃的好處，就係保本和較有保證回報。而投資股票，股價始終會有波動性，有一定風險。

但由於你係有實際置業需要，而資金又不足，那你只能選擇停供。

以你37歲，應先做好增值部份，我較建議先用優質股增值。但若你係好保守架投資者，買儲蓄保本保險，都係可以，但最好不要太多。因為佢會拖慢你財富增長步伐，你要明白這點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21141-Q21160）

Q21141：

老師你好，我係你股票班舊生，正分析信義光能，以及福萊特玻璃，我了解在2020年的數據。

信義銷售及毛利都比福萊特高

但ROE信義明顯低。

這樣睇，是否代表
福萊特基本因素比信義好？

龔成老師：

首先，兩間公司都是有質素的，而你在比較時，不能只分析短期的盈利情況，要分析5年數據，並將數據意義化，你要解釋翻，點解一間公司的數據較好，而另一間較弱，是技術問題？成本？入賬問題？還是甚麼原因。

信義光能（0968）的賺錢能力，的確較強，技術與規模都較福萊特玻璃（6865）好。

信義光能的毛利率較好，而你見到股本回報率福萊特玻璃好似較好，主要有兩個原因，第一，你只睇了較短期數據，而福萊特玻璃近年盈利增長較多，因此數據較好。第二，信義光能規模較大，因此而持續得到高獲利較難，而福萊特玻璃資本相對較少，因此股本回報率的數字會較高。

你在分析數據時，記住要睇5年財務數據。

其實整體來說，仍是信義光能較高質素。

至於兩間公司股價下跌，其中一個原因是光伏玻璃價大福回落，但我地分析時，唔好比短期因素影響得太多，如果你有印象，會記得我第二堂講九巴的例子，我地不是分析油價升跌，而是了解企業的營運模式，以及那個是行業較強的企業。

同時，你要睇一些較長的因素。其實這行業長期，仍是正面，只是中短期仍會較波動。

------------------------------------------------

Q21142：

老師，3988可以入手嗎？
我想月供股票，有什麼推介

2638 及0778 值得月供嗎？

龔成老師：

中行（3988）由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。不過，初步已好轉，但不是高增長型。

現價合理區中間，這股收息可以，但就唔好對股價有太大期望。

至於港燈（2638）、置富（0778）可月供，佢地是收息股，增長力不強。

至於你想月供，要睇你的年齡及投資目標，平穩：盈富（2800）。

進取：恆生科指ETF（3067）

------------------------------------------------

Q21143：

本人現57歲打算退休, 自住樓已供完. 手持現金150萬, 另強積94萬及年金约$100萬(65歲可提取)。

是否建議加按再買一層收租,
還是把現金先增值?

有興趣上堂但有沒有星期六或日上午或下午時間呢?

龔成老師：

加按原理是增加負債，雖然都可以加按後投資收息資產以提高你現金流，但風險始終會增加，對於你退休，唔太建議。

因此，會建議運用現時現金。

你可以考慮將部分現金，投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，亦可考慮將部分，投資銀行的產品，要低風險，有現金流的。

我間中都會開星期六班的，通常一年開1、2次，星期六下午時間。

下次可能在今年年尾。

你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

------------------------------------------------

Q21144：

龔sir，我一直睇開你facebook和書，財務自由行、80後的百萬富翁、致富藍圖等，我想建立被動收入（用股票當資產）

我30歲有一份固定職業，工資2萬7 /月(加上兼職)，計劃下年結婚生小孩，看完你的財務自由行書中提到的5條路，只可惜我沒有資產， 沒有專長，沒有生意頭腦，更不懂做生意，建立團隊成為資產什么的太困難

沒有方向，只有一份正職，但很想創造被動收入，想走出財務”死胡同”，所以全心投放資金在股票上，期望可以通過優質股達到被動收入。

我買的股票大部份衣據龔SIR你介紹的，另外借屋企人錢一齊投資股票，因為屋企人快退休，所以將他們的錢(分開戶口)，用來買收息股(約25萬)保值，自己的錢90%用來投資潛力股(30萬)

幫屋企人買的股票：
買入價
@24.4 盈富2800 2,000股
@7.75 港燈2638 3,000
@6.76 中生物1177 3,000
@14.3 藍月亮6993 2,000
@117.5 平安好醫生1833 100
@28.26 Gx恆生高息率3110 500
@55.9 2158醫渡 200
@6.98 0778置富 3,000
@13.38 0270粵海 2,000
@250 9988阿里巴巴 100
@148 6618京東健康 100

自己的股：
@23.85 盈富 1,000股
@4.73 中信 3,000
@4.48 中銀3988 5,000
@4.9 工商1398 3,000
@22.5 小米1810 800
@14.2 藝龍0780 1,200
@33 金沙1928 800
@21.5 農夫9633 200
@25.7 比亞迪電子0285 1,000
@9 和鉑醫藥2142 2,000
@5.05 澳能1183 2,000
@60.8 領展0823 200
@115.5 中國電車2845 100

另有美股：
US raas 容聯雲
US baba 阿里巴巴

我買的股票較少和分散，原本想分散投資，想問下
1.現時自己和屋企人手持的股票佔的比例合理嗎？繼續持有？
2. 自己和屋企人手持的那些股票可以不要或增加的？
3.會結婚生小孩計劃，每月要存款多少？現時將儲蓄放晒股票上合適嗎？要重新分配還是要將錢套現買物業比較好？

唔該龔sir！！

龔成老師：

如果你沒有專長，努力打工，儲蓄，並利用投資，令財富穩步增值，這是最好的方法。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

要留意一點，家人的風險承承程度不及你，你要盡量低風險，同時留有一定的現金。

所以，新經濟股、新股，其實都唔太適合，1177、6993、1833、2158、9988、6618，都不太適合。

至於你自己，方向都可以，和鉑醫藥（2142）要注意風險，唔建議太大注。

澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但早前股價其實有點超前反映。就算近期回落，這刻投資值博率未算高，如睇好，小小注好了。

至於你會計劃生小朋友，當然要留更多的現金，你可以預計一下，每月家庭的基本開支，然後預計要6個月支出的現金，就較穩健。

------------------------------------------------

Q21145：

呀Sir，我有10萬定期，10萬港股，包括9988，242@2、285，54@2，美股2萬，有3隻都係各2手，8萬現金左右係手，我有以下問題：

25歲，想3年內買樓，呀Sir你買嘅股票入面1810、1830、1177、1448，你覺得邊隻可以比較快完成我目標

另外你覺得我要溝一手285嗎？

因為我覺得自己買入價有啲貴，定係買完呀Sir你推薦股票後留番跌市再買入其他股票或者到時溝手頭上股票
唔該呀sir

龔成老師：

中生（1177）及小米（1810）潛力度都不差，但投資往往要長期先有回報，所以3年是否有收成，未知，加上這兩股現價都唔平，要注意風險，同控制注碼。另外，過度集中都是有風險的。

至於比亞迪電子（0285）去翻$40以下可加。

我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

所以，你應該建立一個長遠組合的方法，然後選股及衡量平貴，建立長期組合。而你唔應該全部集中在潛力股類。

------------------------------------------------

Q21146：

老師 我又要煩你了
如果買國內樓

距離肇慶高鐵站
5-8分鐘車程 《寶能城》一個126平方米單位 105萬人民幣 （有配套辦公大樓/商圈）

但係《時代年華》距離肇慶高鐵站15-20分鐘車程 一個73平方米+一個97平方米 共2個單位 138萬（只有配套商圈）

如果買黎投資等升值 係唔係2個細單位會比1個大單位好呢？

龔成老師：

我唔太認識當區，但如果近高鐵站，我相信都有一定的價值。

其實，幾個個單位不是關鍵因素，最重要是該物業本身的質素，長遠發展力，以及租金回報率。

你要先自行預期，該物業長期的租金回報率。

如果（1）每月回報為$4000

而（2）的兩個單租金回報為$1500+$1500。

你當然要選擇（1）。

因此，你要計算租金回報率等客觀因素怎樣。

------------------------------------------------

Q21147：

龔sir, 我19年問完你意見之後，格左兩三個月後就開始左月供股票， 而家我地屋企可以月儲1萬， 有月供6千比亞迪，盈富，巴巴，各2千， 4千儲cash 。

但比亞迪最貴果時我無停供， 而家跌到咁低，好似就快拉到平均價同市場價差唔多咁， 我洗唔洗停供比亞迪？ 而巴巴我好驚佢無前景，又停唔停供好？

而3067，又唔可以月供，咁我係咪應該扣d月供股價既錢出黎，每月自己買？

另外我真心多謝你比到個希望我地，完來我地呢d 低層都有機會可以財富增值，月供真係好岩我地，我地好似命中註定銀行儲唔到錢咁，儲到小小錢，又有野要用錢

所以月供左，d錢去左第二到，令戶口低結餘，可以破解縮命！多謝你！！龔sir

龔成老師：

比亞迪（1211）你停一停先，去翻$150先開始翻月供，咁樣會較好。

原有貨，就可以長線。

至於盈富（2800）及阿里（9988）其實可以長期月供，阿里（9988）將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區中上部，這股可長線。不過，中短期會波動。

如果有貨，可持有，至於月供，只要金額不過多，無問題的。

至於3067，你只要每2個月，買入1、2手就得。原理都會類似月供的，長期進行。

你要保持長期月供上述的股，當然，都是同時留翻一定的現金，你長遠都可以累積到一定的財富，加油！

------------------------------------------------

Q21148：

你好！老師。請問2878有投資價值嗎？

另外8328，老師你點睇？

龔成老師：

晶門半導體（2878）係一間無晶圓廠半導體公司，主要從事設計、開發及銷售專有集成電路晶片產品及系統解決方案業務。

佢的產品及方案可供應用於智能手機、平板電腦、電視╱顯示器、筆記本電腦以及其他智能產品。

雖然都有一定的生意，但多年來都出現虧損，到近年才算好轉少少。

這企業質素只是一般般，唯一的賣點是現價唔貴，如果可承受風險，這類股不是不能小注，但如果是穩健型，就不應投資這股。

信義儲電（8328）由信義玻璃（0868）分拆上市，主要在香港從事汽車玻璃的銷售、安裝及維修。

佢於中國內地生產及銷售鋰電池產品、電池包、儲能系統，以及提供合約加工服務。

這企業長遠發展正面，有潛力，但要留意業務較波動，同時現價貴，如想投資，小注好了。

------------------------------------------------

Q21149：

我想問投資長期，其實用咩概念去買比較好，睇股價價定公司前景？

龔成老師：

我地買股票就是買入一間公司，所以分析點要從分析公司的角度出發。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入分析，基本上要好仔細的研究企業，要分析好多財務數據用比率，先至有較完整的答案。

我地投資時，會先考慮企業的質素，之後再考慮平貴。

------------------------------------------------

Q21150：

龔成老師，兩年前你比我的建議是好的。奈何身體有點毛病，要用錢，所以手上已經沒有了股票

也無積蓄了

份工因為疫情減人工，無了兩成，得返2萬5左右，所以已經無閒錢了

都不知點生活落去，到底好唔好加長年期去供樓？這樣可以有點資金去做返月供股價了

但現在，都接近3萬的恒指，是否都合再開始供股？

龔成老師：

如果你這情況，不過儲現金先，增加你的防守力，至於投資，暫時就唔好太急。

希望等疫情過去，經濟好轉後，你人工增加翻，可以有更多資金剩，之後先投資。所以暫時唔太建議你改變按揭部分，反而等多1、2年，再睇情況先決定。

加上現時大市又不是特別平，暫時不用行這一步。

------------------------------------------------

Q21151：

Kung sir, 想請教本人現擁有新界西某屋苑一個2房單位，早3年前買入，到現在沒有升跌。

小朋友快2歲，我和太太希望換市區樓，方便小朋友番學，但現擁有既樓按係本人太太，我做擔保，太太現在沒有工作。想請問我們是否應先成功放售現在單位後才用我名買入呢？

因為如果未賣出，我做唔到按揭，但聽聞樓市會有小陽春，如果我賣了，但又未及時買入，變相我成本會增加了，假設樓市升的話。

另外想請教king sir, 如何我想買市區2房，租比人，自己另外租一間3房，想請教kung sir 認為1000萬樓下有咩區會比較有投資價值，同時日後自己住番都係一個好選擇，

很亂，請kung sir 指教

龔成老師：

我先講香港樓市情況，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

至於你的情況，由於較難在未賣出的情況下你買到第二層樓，因此，你先賣出現時物業，是較為穩陣的做法。

只要你賣出及買入，中間的時間差不要太大，就無問題，不用太擔心，你在賣樓過程，都已經可以開始睇樓。

至於你話投資物業出租，可考處堅尼地城、大圍，都是地點不差，出租易，以及長遠正面的地區，你可以考慮，但如果你日後都有自住的可能性，都要考慮自己是否方便的因素。

------------------------------------------------

Q21152：

老師，我係投資初哥，每月大約有一萬儲蓄可以投資
最近買左老師本股票勝經睇
然後打算係恆生銀行做月供股票

$2000煤氣公司
$3000領展

請問呢個組合好嗎？

龔成老師：

要睇你的年齡及風險承受程度，上述兩股，都適合投資初階者的，你可以開始進行月供。

上述兩股都是有質素，可以長期月供的，但增長力就不算好強，整體來說，適合中年、年長的人士。

如果你較年輕，可以等你有較多財務知識後，加入一些潛力股。

------------------------------------------------

Q21153：

龔sir 你好，多謝阿sir你既《股票勝經》& 《年報勝經》，真係令我對股票賺錢有左唔同既諗法。我現時是大學Final Year 有三樣野想問阿sir：

1. 我現時有2手388，想問下好唔好放左1手388轉買1830？有1手388所係幾年前 $36X既時候買；另1手係上年 $2XX既時候買。

之前見你係網度介紹1830，所以當係功課，用《年報勝經》既方法去睇三年年報，發覺1830真係好掂，而且見佢仲打算擴大全球業務

我驚之後冇得係$4-5啲位去買番，唔想走左個機會，但依家唔夠錢，所以諗緊好唔好放左1手388換2手1830？

2. 除左生活選股法，仲有冇其他方法可以好似你搵到甘多潛力股？

3. 聽左你講月供股票，覺得你講得好有道理，但唔想比銀行賺甘多手續費，所以想問，之後出嚟做野買股票，係學番自己依幾年甘蓄夠1手甘去買，定還是都係月供股票好？

龔成老師：

1）買入價並不是分析的重點，最重要是你想設計一個怎樣的財富組合，當中要有質素，要平衡的。

港交所（0388）有質素，但如果你持有%好多，就可以考慮轉少少到必瘦站（1830），兩隻都有質素的。

不過必瘦站現價又唔平，如果你完全無貨，不如買入少少先，之後等跌先正式買入。

2）其實我股票班會教5種選股方法，生活選股法只是其中一種，另外仲有如篩選3步曲，教你由全港2000間上市公司，一步步選出一些優質股，往往是市場未發掘到的。

3）月供股票的好處，就是平均買入價，減少一次過在高位買入的風險。

但如果你本身有一定的投資知識，能把握買賣時機及企業估值，就不用進行月供。

------------------------------------------------

Q21154：

龔 sir，見近期市況不穩，我調整左投資組合，想請教一下：

現持有 9988 (1000股@$236)，728 (60000股@$2.66)，941 (1000 股@ $51)，700 (100股@ $630)，1299 (1000股@ $100)，2845 (1000股@$128)，2628 (10000股@ $17.5)

還持有現金約 200 萬，本人32歲，已婚，有 1 個小朋友，兩人月入共約 8 萬，供樓佔 2.2 萬

想打算中長線持有中移動，想問現價是否合理，還是再等股價回落 50以下?

龔成老師：

現時持有的，都是有質素的股票，基本上都有平衡配置的效果，無太大問題，不過電訊股持有的2隻，都是增長力唔算強的，算是收息股，以你的年齡32歲，可以唔需要太保守，原有貨持有就得，之後不用再加注。

中移動（0941）其實質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，這股有長線投資價值。現價合理。除非去到$50甚至更低，否則，你不用加注。

反而你可考慮其他平穩增長股及潛力股。

------------------------------------------------

Q21155：

老師你好
想問下 我有幾手3690
買入價$322

現階段點睇美團？
應該再溝貨？定係做對沖？

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂至略貴，不過，一定不能大注。

你原有貨可持有，如果持貨不過多，可以等再跌多1成以上，考慮加少少。

------------------------------------------------

Q21156：

想問下，收息用，1883優質嗎
對比6823和941，邊隻好d
Thanks

龔成老師：

3隻都是不差的收息股，中信國際電訊（1883）業務穩定，整體質素算是不差，過往股價的波動亦不大。佢近年的生意都保持穩定，盈利亦是一樣，相信市場結構令佢處於一個穩定賺錢的狀態，不過，增長力就不強。

盈利就穩定並平穩增長，但始終生意無上升，點都會有扣分的地方。

相信佢能平穩發展，收息可以，但就不要對股價有太大期望。

佢股息率比另外兩隻高，不過就不建議太大注。

如果穩健度，就香港電訊（6823）較高。

------------------------------------------------

Q21157：

剛剛買了謝謝

謝謝回覆
我而家33歲
我其實想砌一個
5m 左右長倉

我有800k 煤氣 average $11.8

200k 領展 $69.7

3319 暫時得 1750股 at 33.35

最大問題係之前知識不足
做錯投資

我存有以下股票
50000股 1475 @7.4
800股9988 @260
100股700 @ 680
100 股3606 @ 53
12000股 1337 @ 2.54

以上股票我應否換馬

十分感謝你回覆

我知道自己之前將trade 同investment 混淆左

而家知自己想要咩
以我年紀
30% 保守
70% （穩健増長和潛力）

謝謝你

龔成老師：

保持閱讀，保持進步。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

你現時33歲，財富有一定的增長力，可投資平穩增長股+潛力股。

煤氣（0003）雖然有質素，但增長力唔算好強，所以不應佔你組合比例太多。

領展（0823）這股適合你，但你都要注意，同一隻股票不應佔比太多。

至於你其他持股，都有質素的，只要控制好比例配置就無問題。其實唔需要轉，只要設計好組合比例。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你33歲，可以投資「平穩增長股」+「潛力股」作核心。

------------------------------------------------

Q21158：

龔老師，投資車位係咪睇未來既汽車既增加？

龔成老師，

這只是其中一個因素，並不是核心因素，因為車位最重要是方便，你想想，如果你是車主，如果迫車後返屋企的路要行30分鐘，不如不用車。

所以當我地分析需求時，往往會集中在當區，甚至更短距離的位置。

例如研究該屋苑的單位與車位比例，附近地區的比例，以及當區居民是否有車，收入情況等。

------------------------------------------------

Q21159：

龔sir, 想請教下而家經濟情況好壞嘅分析

而家失業率創十幾年新高，但恒指又未去到你講24000點先算平，股市內見啲人仲係等好價就想買

同第四堂文字版形容2003-2005年當時情況唔一致(當時失業率高，股市同樣成交平淡

2邊情況係一致)所以我要點諗而家究竟係經濟好定唔好呢？

龔成老師：

其實股市會行先過經濟的，所以，你唔單止用這刻的情況分析，同時要分析之後的經濟情況。

同時，每次的危機不同，我地唔能夠完全套用過去的經濟股市情況。

簡單來講，經濟會因疫苗及全球疫情受控，而慢慢好轉，即是，已經過了最差的時候，所以股市已經較難大跌，如果持貨不足，都要分注買翻D優質股在手，當然，不是大手時機。

------------------------------------------------

Q21160：

我與老婆收入約$4萬，供樓$1.4萬，加其他開支月儲約$1萬，現時持有:

823 300股@$70 = $21000
1038 500股@$45.8 = $22900
3067 1000股@18= $18000
餘下現金$7萬

請問組合可以嗎?

將來打算每月入100股3067，每兩個月入100股823，每半年入1手1038，另找機會於$37入1928，$40入66，$22入1972或$30蚊入12，選1隻每半年買入一次，務求令持股各佔20%，股票及現金比例在80:20

希望10年後股票過300萬，股息每年可收$10萬以上，不知計劃是否可行?

此外，路勁1098是否潛力股?高息率及低pe，低pe會否在日後因其轉型為地產股而大幅上升呢?

龔成老師：

你現時的組合，無問題，都是有質素的，你長線持有就得，但你只持有3股，其實會較為集中，所以，長遠最好加入其他優質股，建立一個更平衡的組合。

至於你打算買入的股票及方向，可以。但現金在現時的市況平貴，建議由2成上升至3成。

整本上，大方向正確，你可以進行，但如果要$300萬，其實宜投資翻多少少有增長力的股，1038、1972、1928增長力都只是中等，並不強，你要同時找一些較有增長力，或者提高3067的買入金額。

路勁（1098）佢的業務，包括左發展地產、收費公路、投資管理等。近年，發展地產已經成為左佢的主要業務。

佢業務不差，增長快，基本上都有質素，但負債有點多，加上規模不算大，這就會成為風險。長遠的投資價值有，但就唔建議太大注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

工銀亞洲手機銀行 「e開戶」，最快8分鐘就可以完成開戶申請，除咗可享3個月港元定期存款年利率4.2%外，仲有高達HK$600「e開戶」現金回贈等緊你！

立即click入嚟了解更多：
http://m.icbcasia.info/10006

*「本行」或「工銀亞洲」乃中國工商銀行（亞洲）有限公司之簡稱。投資涉及風險。借定唔借？還得到先好借！優惠需受條款及細則約束。

#ICBCAsia #工銀亞洲 #現金發放計劃 #e開戶

更多精彩請關注►►Let's #tastehappiness
▼ Follow 微辣Manner
YouTube: https://www.youtube.com/channel/UCgSbuhAD48A7RxbvflQfdjQ?sub_confirmation=1
Facebook: https://www.facebook.com/weilamanner
Instagram: https://www.instagram.com/mannerproduction

成為辣粉（部分地區因YouTube官方未開放暫時無法加入）
https://www.youtube.com/channel/UCgSbuhAD48A7RxbvflQfdjQ/join

Manner Store：https://store.mannerdaily.com/

演員YouTube
rosalina：https://www.youtube.com/channel/UCJQ-3ZZH9Y198EDgJyFMX5Q
霍哥：https://www.youtube.com/channel/UCb0GbGfLMVLoIRqt9K4_T9w

▼微辣經典影片
【 劇場版MV -《再想當年》 】
►►https://youtu.be/YYtX7f8bpfc
【微辣遊戲王】
►►https://www.youtube.com/playlist?list=PL_jnj_Gy1MoLrdg07Qq8v7DQ41afvFcgQ
【微辣大排檔】
►►https://www.youtube.com/playlist?list=PL_jnj_Gy1MoIFCKMuGjMiEZHQMTXkSqE9
【微辣狼人殺】
►►https://www.youtube.com/playlist?list=PL_jnj_Gy1MoLkG4nIGuNLZzmBbK9kDDJ9
【微辣搞笑合集】
►►https://www.youtube.com/playlist?list=PL_jnj_Gy1MoL4eDz-J5M_uf419Jj2CLGv
【微辣音樂/劇場版MV】
►►https://www.youtube.com/playlist?list=PL_jnj_Gy1MoKUKBKAmGUSrUp-eBiNIOUx
#未亡人之忘記一種顏色有幾難？
▼微辣MannerProduction
生活的調味►►http://mannerproduction.com

想快啲拎政府一萬蚊兼享三重賞? 記住由2020年6月21日起經工銀亞洲手機銀行或網上銀行登記「現金發放計劃」及收取款項後，就有HK$50獎賞及信用卡2%本地簽賬回贈 (高達HK$200)。成功推薦新客戶登記及取款更可參加抽獎有機會贏取高達HK$10,000添！多薦多抽，抽獎次數不限，獎品更超過2,000份。

仲未有工銀亞洲賬戶? 快啲趁2020年6月30日或之前透過手機銀行「e開戶」，除咗可享受3個月4.2%港元定期存款年利率外，仲有高達HK$600「e開戶」現金回贈等緊你！

立即click入嚟了解更多：https://www.icbcasia.com/ICBC/10kt


*「本行」或「工銀亞洲」乃中國工商銀行（亞洲）有限公司之簡稱。借定唔借？還得到先好借！優惠需受條款及細則約束。

#ICBCAsia #工銀亞洲 #政府派一萬 #現金發放計劃 #e開戶 #登記消費推薦都有賞

更多精彩請關注►►Let's #tastehappiness
▼ Follow 微辣Manner
YouTube: https://www.youtube.com/channel/UCgSbuhAD48A7RxbvflQfdjQ?sub_confirmation=1
Facebook: https://www.facebook.com/weilamanner
Instagram: https://www.instagram.com/mannerproduction

成為辣粉（部分地區因YouTube官方未開放暫時無法加入）
https://www.youtube.com/channel/UCgSbuhAD48A7RxbvflQfdjQ/join

演員YouTube
豪Dee：https://www.youtube.com/channel/UCWrns42mivvozA5DUCWTJZQ
Yelo：https://www.youtube.com/channel/UCTGUUMwIIQA8TTaxXxzWgIw
roberto：https://www.youtube.com/channel/UCmfkG28SL7EaeK9BCDKzseg

▼微辣經典影片
【 劇場版MV -《再想當年》 】
►►https://youtu.be/YYtX7f8bpfc
【微辣遊戲王】
►►https://www.youtube.com/playlist?list=PL_jnj_Gy1MoLrdg07Qq8v7DQ41afvFcgQ
【微辣大排檔】
►►https://www.youtube.com/playlist?list=PL_jnj_Gy1MoIFCKMuGjMiEZHQMTXkSqE9
【微辣狼人殺】
►►https://www.youtube.com/playlist?list=PL_jnj_Gy1MoLkG4nIGuNLZzmBbK9kDDJ9
【微辣搞笑合集】
►►https://www.youtube.com/playlist?list=PL_jnj_Gy1MoL4eDz-J5M_uf419Jj2CLGv
【微辣音樂/劇場版MV】
►►https://www.youtube.com/playlist?list=PL_jnj_Gy1MoKUKBKAmGUSrUp-eBiNIOUx

▼微辣MannerProduction
生活的調味►►http://mannerproduction.com