【龔成問答信箱】（Q22721-Q22740）

Q22721：

老師，上完你的堂，現在看報表，有些問題想請教

1）1310香港寛頻為什麼沒有銷售成本？

2）派息比率由141%至1054%，是否不太正常？有什麼implication on their business direction?

謝謝你

3) 另外偉易達303，初步指標同5年財務數據也好合格，現價是否合理價呢？謝謝你

龔成老師︰

1) 唔係每一間企業年報，都會列出銷售成本。因為有些企業係提供非實體產品，或者以服務為主，其實佢地好難去準備計算一個銷貨成本，所以在年報會見唔到這個項目。

其實除左香港寛頻(1310)，福壽園(1448)由於佢賣地以外收入日漸增，佢係近幾年都開始唔出銷貨成本，都是這個原因。

2) 你要記翻到底派息比率係點計，佢係由"派出股息" / "純利"。而"純利"當中，係會扣除一些非實質支出，好以"拆舊和攤銷"就係其中一種。

以佢2020年純利9700萬計，但"拆舊和攤銷"就足足有成15億，如果加回這部份，你就會發現，其實佢只係派緊本身架純利，無任何不正常狀況。

出現大於100%派息比率，另一個可能性，就係佢用以往賺架錢，拿出來派。

當然，唔係每隻股票派息比率高於100%，都一定係這2個原因。你要每隻去深入分析，才好下結論。

3) 偉易達（0303）佢財務數據係合格，此股可以作為收息及平穩增長股，雖增長力就不算強，但適合你年紀。

本質正面，長遠投資價值有的。

以佢過往正常的經營環境來講，佢派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

此股係收息，再加些平穏增長力。現價合理，可投資，但不能太過大注。

------------------------------------------------

Q22722：

老師你好

一萬股941
一萬股66
一萬股17
二十萬股 3988

10萬股 386
1000股 1113
500股 9988

現在總金額負50萬。不知道應該繼續收息抑或再轉組合?

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持有股票，全部都係有質素，長線持有係無問題。

有無需要轉換組合，就要因應你年紀和投資經驗，再作出調整。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」(0066, 0017, 1113)+「潛力股」(9988)。中年人士，可以較集中翻係「平穏增長股」。當你已近退休之年，就應集中在「收息股」(0941, 3988, 386)，去創造平穏現金流。你可以睇翻自已年紀，去作出配置。

另外，你唔好太集中係幾隻股票身上，你要配置一個平衡性高組合。當中包含不同行業，同時個別企業和行業，不要佔組合15%和30%以上。

以下係一些優質股票，你可以參考下，將適合你的股票，加入組合當中。

潛力股︰安碩恒生科技(3067)、比亞迪(1211)、中生(1177)、福壽園(1448)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）。如果有投資美股，可投資QQQ。

平穏增值股︰指數基金、港鐵（0066）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)。如果有投資美股，可投資VOO。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

但你要留意翻，平穏增長股和收息股，現價都合理。但部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)、QQQ勉強算在合理區頂部，可分注入貨，其餘要等等。

你咁大負數，相信係你買入價過高所致。如果你對估值定平貴，唔係太了解。我建議你先用月供去儲股票，以減低買貴貨風險，相信對你會較有利。

------------------------------------------------

Q22723：

龔成老師你好！本人27歲月入3萬政府工，儲蓄大約有70萬，之前都有月供開1211同823，

想問依家想轉981或1347其中一樣。同1928加405。

可以比些少意見點睇981同1347嗎

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你27歲，應以增值為主，建議你用「平穏增長股」 + 「潛力股」作組合，去創造一個增值平台。

先前月供的比亞迪(1211)和領展(0823)，都是合適的。但由於比亞迪(1211)現價偏貴，暫時不宜月供，就回到$180才好再考慮。

越秀房產信託基金（0405）只係收息股，增長力唔高，唔係太適合你。

中芯國際（0981）業務有增長力，質素係有，但未到最高質素。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，回翻D較合理。

月供都可以，但不宜太多，小注好了。

華虹半導體（1347）有質素，發展不差。

佢主要從事半導體產品的生產及貿易，開發及提供晶圓工藝技術組合，包括嵌入式非易失性存儲器及功率器件，以及ＲＦＣＭＯＳ（射頻互補式金屬氧化物半導體）、模擬及混合訊號、ＣＭＯＳ圖像傳感器、電源管理及ＭＥＭＳ（微機電系統）等多種其他技術。

佢客戶主要為集成器件製造商與系統及無廠半導體公司。中國因為想發展這方面的技術，政策在長遠會對這公司有利，增長正面。

這股長線持有無問題，但現時估值有少少貴，而且都比較波動。做月供的話，小注好了。

我地唔好成個組合，只集中係3,4隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22724：

你好,我32歲，現時持有股票

3690 200股 406.6平均價
0003 3150股 16.82平均價
3319 1250股 37.6平均價
9618 100股 392平均價

想問下應該如何調整投資策略

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你32歲年紀計，應先以增值為主。你現時持有股票，都係質素和適合你。但美團(3690)不確定性會較高，長線不宜持有過多。

但我發現你手上不少股票的買入價，跟現價都有相當距離，雖然可以守，但你要預起碼等一段較長時間。

其實你的情況，都是不少投資新手會犯的錯。其實很多人都是這樣，亦是投資新手必然經過的階段。

投資新手通常都有兩個主要錯誤，第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

未來時間，你唔好只集中係上述3,4隻股票，要加入更多不同行業，令組合更多元化和平衡。

由於你過往經常買貴貨，我建議你先集中利用月供模式，去建立一個股票組合，以減低買貴貨風險。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22725：

龔Sir你好，近期留意你嘅資訊買咗你本「大富翁」未開始睇，反而傾向聽你講多啲。

幾年前買入︰

電能（6）2000股平均價$56.25
匯豐800股平均價$66.89
瑞聲（2018）500股平均價$121.44

全部都好似2018年買入就係你講中晒嘅聽人講無分析胡亂唔睇價。以上股票值得長線持有嗎？

至於配置方面，買咗一筆過投資債券派息基金。

本人52歲，希望幫自己儲錢退休，想請問月供股票/基金分別？邊個相對穩陣？

樓按仲有$280萬左右，每月前夫會俾生活費連供樓$53000都用盡。09年後已經無工作照顧家人，而家仔女大晒結埋婚畢埋業有工作，現時負擔係雙親同自己。

可唔可以俾啲方向，人生交叉點。我已有醫保、儲蓄人壽（1份供完，1份舊式供到死不過固定保費$320）$50萬危疾$200萬定額壽險就係死雙親都要錢。

但人要正面睇如果仲係到生活都要錢靠MPF一定唔夠，醫療又年年加，感謝。

龔成老師︰

書本你都要睇，特別係初學者，最好睇左《80後百萬富翁》、《財務自由行》和《股票勝經》先。雖然平時睇我Q&A都可以，但書本上概念較完整，對你分析和解讀我Q&A或者POST架內容，係有幫助。

你以上股票，都係有質素和適合你，可長線持有。但問題係，你買入價有點貴，才會出現帳面虧損。

月供股票/基金，其實你現睇翻佢投資項目，才知有無投資價值。但我一般會較建議買優質股，因為基金都會有一定費用，長線係蠶食緊你回報。

你現時保險都係保障型多，這些可保留。而儲蓄保險，其實增值能力唔算高，現在一份可以保留，但唔建議加大投入。

以你52歲年齡，其實要開始為退休做準備，但同時，財富仍有增長力（但不是進取）。若單靠MPF，其實真的很難足夠應付退休生活，所以你要累積優質股，去加大退休生活支援。

選股上，你可以投資「平穩增值股」+「收息股」，作為增值目標。

由於你過往都成日買貴貨，相信你對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

策略上，你每月5成儲蓄做月供。其餘先儲起，用一邊月供一邊儲蓄的策略。

若你想進取些，可集中「平穩增值股」，相反你想保守少少，可以集中在「收息股」上。但比重要隨著年齡增加調整，慢慢增加收息股的比例。到退休時，你收息股比例，應提升至100%。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

------------------------------------------------

Q22726：

龔sir 您好，我係澳門既Fans~因為疫情的關係您應該需要一段長時間才能夠在澳門辦課程，但因為我和其他幾位朋友都一直很有興趣上您的堂

未知開辦網上課程我和朋友包堂未知這個方法您是否願意和行得通？

龔成老師︰

抱歉，由於擔心出現盜錄問題，所以我以往一直都唔會開辦網上課程。

而且，我都較希望可以親身，跟學員互動溝通，所以網上課程暫時不會開。

至於包堂這個方法，暫時都未能安排。因為要配合本身課程和工作時間安排，所以偏向一次教一大班學員會較。

你們放心，只要疫情一穏定，我就會盡快重開澳門班，到時就可以見到大家。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

此期間，你可以先睇我架《80後百萬富翁》、《財務自由行》和《股票勝經》，都適合初學者。

之後，你有時間，可以再睇埋《選股勝經》和《年報勝經》，對你課堂上掌握，會有幫助。

------------------------------------------------

Q22727：

龔sir 你好！ 我上左你進階班，呢排摸索緊你教的估值方法。請問如果用你教的方法方析的話，比亞迪、信義玻璃、信義光能現價是否ok?

希望龔sir 你可以呢3間公司作用示範！ 感謝

龔成老師︰

比亞迪(1211)貴。信義玻璃(0868)合理區頂至略貴。信義光能(0968)合理區頂至略貴。

係估值方面，你建議你主力用市盈率比較法，去先做一個估值。

但比亞迪(1211)佢潛力較高，其實較難分析。佢現時市盈率去到200倍以上，我地可以參考佢預測市盈率，現時大約140倍。

以佢增長力，去到50-70倍左右，其實都可以。所以，你預佢回幾成，才算較合理區較頂位置。當然，佢業務不斷增長，因此企業價值正向上。

信義光能(0968)你可以睇翻佢行業市盈率，大約係11-24倍。而佢係行內有一定質素和優質勢，故你可以給予較近上部位置，作其合理市盈率。

之後，你再用我教的方法，找出一個有代表性的每股盈利。由於2021年受疫情影響，參考2020年會較好。以信義光能(0968)計，你預HKD0.65左右。

計算出來的合理區約HKD11-14，當然，企業增長中，有可能有少少調整。

信義玻璃(0868)同樣可以先我上堂教的方法，找出合理市盈率區間和代表性的每股盈利。但由於佢同信義光能(0968)一樣，近年增長力高左，所以都要自行上調。

緊記，近期中央政策都出較利好綠色能源股份，故計算信義光能(0968)和信義玻璃(0868)時，用較近期數據，會較能反映實況。

------------------------------------------------

Q22728：

龔Sir你好，本人40歲公務員，已婚，有一小朋友，月入$45,000 ，可以每月用一萬蚊投資。

2019年6月以4,400,000萬購入一個220尺單位深水埗、6年樓放租，現在每月放租一萬蚊。但同年出咗林鄭Plan，令到細單位吸引力大減。請問：

1. 當夠三年的時候我應該繼續持有放租定還是出售？

2. 我每個月有一萬蚊可以用嚟投資，暫時月供股票盈富基金、中銀香港、港鐵，有咩其他建議？

謝謝龔Sir

龔成老師︰

1) 我偏向建議你出售，因為你這個單位太細，連一個基本家庭需要的呎大小都無，投資價值係會大打折扣。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時40歲去計，可以投資「平穏增長股」和「潛力股」。你現時選擇股票，屬於「平穏增長股」，都係適合你。

你每月5成儲蓄，即是用$5000做月供。其餘先儲起，用一邊月供一邊儲蓄的策略。

但我建議你都加少少「潛力股」，去提升組合增長潛力。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多佔組合2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約4成，視乎你現時投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22729：

你好，龔sir。9988 269均價 / 9618 330均價，係咪要沽好d

9988 1000股
9618 750股
1339 3.02 5000股
1398 5.8 10000股

1086 1.83 10000股
175 22 4000股
2127 2.56 10000股
806 5.89 10000股

有3分2是股票，有3分1是cash。

輸左10幾萬了，中美咁，係咪清倉好。謝謝龔sir

龔成老師︰

國際關係風險，近1,2年的確係高左，但我地分析一隻股票時，最主要都考慮翻佢本身質素。如果無對佢長線本質造成影響，咁就無問題。

阿里(9988)和京東(9618)最近受國家政策和相關風險影響，質素係弱左，但又未算好嚴重，估值會有少少調整。但由於核心價值無大變，從質素上計，依然值得長線持有。

但問題係，佢佔你組合比重好高。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

現時這2隻股票，從個股和行業(科技類)計，都係超左標，故你要沽出部份，換至其他優質股，咁會較好。

而且這2隻都係潛力型股票，若你偏年青，持有係可以。但如果你係中年至退休人士，就不宜太大注。

至於你虧損咁多，主要唔係股票質素出問題，而係你買貴左。如果你不太懂得估值，定平貴，我建議你未來時間，轉用月供或分注模式去儲貨，來減低買貴貨風險。

另外，中國人民保險（1339）、匯森家居（2127）、惠理基金(0806)和好孩子國際（1086）質素唔算好強，長期的投資價值只算中等，不宜持有太多。

現時大市在合理區，你現時股票和現金比例，係合適的。餘下1/3現金，你就等大跌市出現，才加大力度掃貨。

------------------------------------------------

Q22730：

請問龔成老師，若想定期買入股票，而自己又有時間可跟進的話，是否就非必要設定月供，自己定期買入即可？

主要是因月供有費用的支出，自己買入是否可節省這方面的成本？

龔成老師︰

簡單來說，月供股票就是你每月將現金，買入某一隻或多隻股票，慢慢咁樣儲貨。

月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

其實一手手買都可以做到以上效果，你現金只要平均地慢慢投入股市(如保持住每月定額買一手)就可以。

2個方法都可以，正如你所講，一手手買更可以節省月供費用成本，但你必需確保自已可以有自律性地進行﹐咁就無問題。

------------------------------------------------

Q22731：

龔sir，想問你對美股PDD點睇，有乜建議

龔成老師︰

由於之前估值貴，加上監管因素，令股價向下，中短期仍有一定的風險，但長線不差。不過，這刻只建議小注好婺。

拼多多(PDD)本質不差的，佢將娛樂與分享的理念融入電商運營中，由用戶發起邀請，與他人等拼單成功後，能以更低的價格買到所有商品。

同時也通過拼單了解消費者，通過機器算法進行精準推薦商品，這個商業模式不差，長遠其實有發展，只是行業的賺錢能力，存有不確定性。

------------------------------------------------

Q22732：

30萬本而加得番吾夠20萬

持有：
港股：京東，中海油，平安，網易，理想。
美股：360數科，ARKX，樂信，好未來。

龔Sir，想問而加應該點算好？由2020年all in投資至現在-30%

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時持股，大部份都係有質素，雖然你帳面有虧損。但有質素企業，長線會慢慢成長，令股價回升。

持股當中，中海油(0883)只係商品類股份，價格自主能力弱，投資價值只係中等。而京東(9618)、網易(9999)、理想汽車(2015)、ARKX這類股票，不確定性都較大，不宜持有太多。

TAL Education Group 好未來(TAL)業務主要為內地中小學生提供課後輔導課程。該公司主要為幼兒園至十二年級（K-12）的學生提供輔導服務。

其業務正正是近期中央打擊對象，雖然長線會否再次放寬相關要求，我地唔知。但中短期一定好弱，因為政策影響到其核心部份。

若你持貨不多，可以守，博佢之後政策重新放寬對校外課程的限制。但持貨較多，最好沽出部份，換至其他股票去減低風險。

另外，我地投資係會因應大市平貴，去定策略。現時大市只係合理區，其實不宜資金盡用。所以，你再有新資金，最好先儲起，等大跌市機會。

如果你投資經驗不多，擔心好似之前咁買貴貨，你可以考慮用月供股票去做投資，透過平均價格買入法，去平衡買貴貨風險。

------------------------------------------------

Q22733：

老師你好，我29歲月入1萬5，每月可存4千左右。想問問我持有以下股票應該止蝕嗎？要放部分還是全放好？最近見到係咁跌，心好慌。

6618京東健康 109.3有1800股
3888金山軟件 49.6有1400股

謝謝老師

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

其實金山軟件（3888）和京東健康(6618)唔係無質素，但佢地不確定性都較高。特別係現時都未有盈利的京東健康(6618)，波動性就更高，你預佢地會大上大落。

以你年29歲年紀，持有這類潛力股，係無問題。但若果佢地佔你組合比重，係比較高，我就建議你沽少少，平衡下個風險，咁會比較好。

另外，你可以用每月儲到資金，去做供股票，加快你財富增長速度。

你29歲，可以用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、比亞迪(1211)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

但由於你現時資金不多，可以先集中盈富(2800)。以你年紀，如果無特別負擔，建議儲蓄比例最好去到收入一半。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22734：

阿sir, 你好呀！我睇了一段時間futu, 近排才試進買了$110，$108，同$118，平均價$110.5，越買越跌，有100股，真係跌到驚，請問跌完未，值唔值得溝，還是忍痛割？

救你比啲指引，謝謝你。

唉，早上又輸晚上又輸，正宗韮菜

龔成老師︰

首先，我想你清晰翻溝貨概念。我地決定加注(即溝貨)與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

因此，我地先有睇這隻股票，到底有無質素。

富途（FUTU）有增長力的。佢係一家在線經紀公司，提供一站式在線投資服務，騰訊（0700）為股東。該公司通過網上平台提供服務，其中包括香港、中國大陸，以及美國股市的市場數據、交易服務和新聞源。

佢以經紀佣金，以及手續費服務的形式產生收入。這企業雖然有發展，但現時市盈率好高，股價變化大，要留意風險。

此股你長線持有係可以，但由於不確定性都較高，不宜持有太多。如果你現貨只係佔組合好細比重，可以守。但較多的話，最好沽少少，去平衡風險。

另外，每注最好分開10-15%，會較為理想。

------------------------------------------------

Q22735：

sir早晨，我隻285原本已有20％利潤，依家要倒蝕！

龔成老師：

建議你減少睇股價，多睇企業年報。

你要平常心睇股價，我隻比亞迪（1211）之前都是這樣，$88賺錢跌到$12蝕錢。希望你唔好停留在一般散戶思維「著短期短期股」，你要提高層次「著重將來價值」。

------------------------------------------------

Q22736：

龔sir，我今年38歲，自己做小生意，所收入不穩定（每月3-8萬都有可能），我既資產組合，龔sir可唔可以比下寶貴意見

現金大約50萬（當中37萬係政府低息貸款），另有50萬左右股票

領展 60.5@700股
金沙27.9@4400股
福壽園7.23@15000股
平安好醫生81.6@2000股

阿里228@400股
雅生活服務29@1500股
中生制藥 6.52@10000股

唔該龔sir

龔成老師︰

以你38歲年紀，應以增值為主，你現時組合中的股票，都係有質素，而且係有增長力，你長線持有係無問題。

但留意平安好醫生(1833)雖有質素，但佢現時尚未有盈利，不確定性比較高，不宜持有太多。但佢現時郤佔你組合最大比重，建議你估少少，換至其他股票去平衡風險。

另外，你組合都比較偏向潛力股(1448,1833,9988,1177，未來時間要加翻多少少平穏增長股，以免組合風險太高。

平穏增長股︰指數基金、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

最後，相提多你一點。因為你本身有生意，故餘下現金﹐應優先用來支援你業務。因為一盤生意做得好，其實增長力可以比優質股高好多。

當然，如果出現大跌市情況，你都可以動用這筆資金，去掃平貨。

------------------------------------------------

Q22737：

咁龔sir 可唔可以提議我如果$6000月供比例應該如何？例如領展，比亞迪，3067月供比例幾多，盈富仲供唔供好，thx

龔成老師︰

要睇你年齡、風險度。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄，即$3000做月供。其餘先儲起，用一邊月供一邊儲蓄的策略。

如果你年齡較輕，可供3067及領展（0823）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

比亞迪(1211)就暫時唔建議月供住，因為太貴，回到$180才好考慮。若你好想月供新能車股，可以先用ＧＸ中國電車基金（2845）代替。

安碩恒生科技(3067)由係單一行業，若你投資要控制係組合3成以內，否則會有過度集中性風險。

------------------------------------------------

Q22738：

龔Sir, 小妹有十幾萬積蓄, 現時放銀行定期/活期儲蓄都是沒有利息, 想買些收息股, 及作長線投資, 希望所買的股亦有升值的潛質,

因我從未買過股票, 所以無從入手, 最近有留意到以下幾隻股, 但不知那個獲利較高, 你可給我一些意見嗎?

股號 股名
6823 香港電訊
3988 中國銀行
2388 中銀香港
0939 建設銀行
00386 中石化
1398 工商銀行

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

所以﹐投資那一類股票，要先睇翻你年紀和投資取向。

若你係年青至中年人士，應以增值為主。你上述股票，都係收息股(除了2388)，增長力不高，就不宜持有太多，但質素都有的。

策略上，你可以投資「平穏增長股」和「潛力股」。

大市現處於合理水平，那1X萬資金，你可以先用4-6萬，以"分注"形式慢慢入貨。餘下資金，就等你學到一定投資知識，或者大跌市出現，才大力度掃貨，並長線投資。

------------------------------------------------

Q22739：

2809，2846，3097，3134，3175，9845

最建議買那兩隻，這兩星期炒596和2160上落市

（唔知點解我買股票成日輸）

最後想問1357，如在1.45-1.5水位，是否已很合理價錢，這股是否也可以買

龔成老師︰

我建議你，真係唔好再做短炒。你自己都識講，你之前輸左好多錢。

如果你唔改變你投資方法，就算比你選中好股票﹐長線都可以係輸錢收場。你要記住，真正投資方法，應該係長線去持有優質股。

浪潮國際(0596)投資價值不高，而微創心通醫療科技（2160）雖有投資價值，但就好波動，不宜投資太多。

你講的ETF，都係有投資價值，但大多在合理區頂區。若現價投資，只宜小注或月供。

Global X 標普原油期貨增強型 ER ETF(3097)投資於WTI期貨合約。目標係追蹤標普高盛原油增強額外回報指數(指數)。

Ｆ三星原油期（3175）基金之投資目標為追蹤標普高盛原油額外回報指數之表現。2隻ETF都好類似，表現都係睇油價發展。

但短期油價，好難分析，至於中期，相信會由於全球經濟轉弱，表現只會一般。

這2隻基金唔易玩，因為好難準確捉到個位，就算投資都最多只宜好小注。

美圖公司（1357）佢過左最差時期，但始終業務有風險。算是有危有機類的股票。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

------------------------------------------------

Q22740：

老師，1299可作穩定增長股嗎？

另外，我想問股票派息揀捽股，那捽股的買入價是如何計算？

龔成老師︰

友邦保險（1299）不差的，企業有一定的質素，有品牌、有規模，生意雖然做到較大，但仍有增長力，不過就不是高增長，只是平穩增長。

不過盈利就有少少波動，但這都正常，因為保險公司有投資相關收益，所以這亦會令股價略為波動。

前景方面，正面的，佢保持不同市場的發展，利用本身的品牌去加強新市場業務，而長遠的市場仍有增長潛力。

這股有長線投資價值，算係平穏增長股類別。現價就處合理區頂，長線持有無問題。

至於"碎股"，其實買入價同一般完整一手，唔會有分別，你都可以用網上投資平台的股價作參考。

主要分別是，你將碎股做買賣時，有機會買賣差價較高。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20661-Q20680）

Q20661：

你好，龔Sir，自從上完你嘅股票班，令我成長咗好多，但有時都要翻睇啲Notes先明多啲，依家睇緊《年報勝經》慢慢學習。

我近排留意緊隻廣汽2238，我知道汽車行業競爭好大，加上欠缺晶片，都對汽車股有影響，但早前廣汽公布石墨烯基電池超級快充電池技術（聲稱8分鐘可充滿80%電），但市場好快就消化咗。

而家公司話2021年9月會首次搭載自家嘅車型上，如果成功係咪一個突破性技術？依家又同華為合作自動駕駛技術。

但廣汽股價跌咗，點解會咁嘅？ 加上初步睇佢財務數據，佢嘅營業額同毛利都麻麻，現金流仲好差，你講過現金流對一間公司好重要，咁廣汽呢個情況係受疫情同投入資金做研發有關嗎？

另外我用16-20年市盈率計佢估值（＋10%）後係8.70-12.6，咁依家係咪有值搏率？

另外阿Sir我想多謝你，因為我上年年頭開始月供盈富同比亞迪，第一次可以賺到錢，好開心！

依家比亞迪升咗好多，我已供少咗一半，只供$1000，我應該再減嗎？

龔成老師：

廣汽集團（2238）本身都有質素的。

佢係中國汽車製造商之一，主要業務包括製造及銷售乘用車、商用車、發動機及汽車零部件，亦從事一系列汽車相關服務及其他業務。

佢透過共同控制實體廣汽豐田及廣汽本田生產多個系列的乘用車。

業務發展不過不失，但增長力就不算強。

長遠仍有發展，但不是高增長型。現價合理。

之前佢的確有講過，石墨烯基電池超級快充電池技術（聲稱8分鐘可充滿80%電），不過，見佢只是對股價有少許正面影響，之後就回落翻，這反映市場對這個項目，暫時未有好大的期望，這並不是市場完全睇淡，只是市場未能確定這種較新的技術，是否成功，因為之前都有內地一些傳媒是質疑佢的研究的。

而我地作為投資者，這部分最多只能加分，未能好肯定話佢一定成功從而對企業價值有巨大正面因素。

從整體的發展上，這企業其實不差的，但佢過往在研發上，又未去到好強，因此從潛力度，不會比佢好強這方面。

至於佢現金流方面，的確未算強，因此會影響左企業的發展，在投資力度會有限制。而佢過往的增長力的確不算強。

至於你比佢市盈率，太高，要調低翻。你預現價是合理區內，不是特別平。

至於比亞迪（1211），你可長線持有的，月供減金額正確，如果現時只供少少金額，而現金又充足，就可以小注去供。

------------------------------------------------

Q20662：

龔 SIR, 我買入了以下, 我入的價合理嗎. 謝謝!

吉利汽車 港元 2,000股@28.45
小米集團－Ｗ 港元 1,000股@27.1
安碩恒生科技 港元 1,000股@19.91

龔成老師：

合理區頂至略貴。

上述都是有質素的，有增長力，問題不大，只要你不是一次過買入太多，就可以。

最重要是留有一定的現金，如果股市下跌就有投資機會。

------------------------------------------------

Q20663：

龔sir,我想幫自己細佬問下佢嘅組合，佢27歲，現持有緊中國鐵塔，海螺水泥，北京汽車，建設銀行，石藥，請問有冇邊啲股應盡快賣出？

sir,細佬買左2手港交所，好擔心佢，係咪應該叫佢一路長揸？因為你講過係優質股，壟斷市場，但500蚊佢買左，我係咪應該叫佢堅持長揸？

龔成老師：

所持有的股票，都是有質素的，不過27歲，持股增長力不足。

北京汽車（1958），建設銀行（0939），增長力都不算好強。

至於港交所（0388），有質素的，不過最近都貴，投資宜控制注碼。可長線的。

------------------------------------------------

Q20664：

老師你好，我是全職公立醫院註冊護士，由於工餘時間還需要繼續進修。這樣導致我很少時間可以管理股票資產。

請問我如何能夠更有效地去管理已投資或制定投資策略？謝謝老師！

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

你唔好多，只是睇一本，你已經能打好基礎，每日睇幾頁，1、2個月都睇完。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供盈富（2800）。對你來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合不懂選股的人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q20665：

龔老師，你好！想請教一個問題。
我想將我地物業(當年全款買的)
現時市值800萬左右，加按俾銀行

套現4成，套320萬左右，利息2.2喱,供21年左右，每年供1萬5左右，這個金額，我們供款無壓力。

我打算將這些錢先投資優質股，長綫或中長綫，日後有機會或將會將部份金額投資在大灣區買樓。

資産:
1.我們早期在珠海投資了一套物業，現時市值170萬左右，還有40零萬未供完，因國內供款利息較高(現時是4.2喱)所以我們近期打算會清還40萬餘額。

2.自住物業加車位(沒供款，當年全款買入)市值900-1000左右。

3.與家人夾份購入一個單位，現時市值700萬左右。三人夾錢，給父母住。交佐首期後，餘額分攤三家人，每家供款5000蚊左右，供20年。

4.200萬左右本金，在銀行投資優質股，現時帳面280萬左右。

5.還有些緊急俻用金，幾十萬左右。

問題1.你認為我加按存在風險高嗎？我本人認為現時低息想套用一些現金去做一些投資。加大資產滾存嘅力度。

問題2.本人現時，偏重進取點加按取現金出來投資一些優質股，老師有什么建議嗎？我希望高增長的一點的。比亞迪，福夀園這些我一直都持有，亦會趁低吸納。

問題3.我現時一邊工作，一邊留意身邊生意機會，希望5年內可以遲掉本職工作，時間靈活點，可專注自己想做事情，當然會keep住投資穩錢。

龔成老師：

1）風險未算高，其實最重要是睇翻你的的供款，如果無乜壓力，這方面的供款就無問題，加上你本身都有一定的財富，因此負債方面的比例不算太高。

當然，你都要明白加按就是借錢，借錢就一定有風險的，你明白這點就得。

但要睇翻，你現時物業的比例佔總財富較多，所以日後如果增持物業，不要太急，同時分析是否太集中。

2）你可以考慮潛力股類別，但你一定要明白，這類股升得較快，跌都可以跌較多，自己衡量風險。

安碩恆生科技ETF（3067）。

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

3）利用自己的興趣、強項，在空閒時間發展副業，創業要不斷試。市場往往是這樣試出來，唔好想得太多，有機會就試，進行左之後先調整翻。

------------------------------------------------

Q20666：

我現年39，手持三百萬現金，想兩年後買一千萬樓，咁靠投資股票咪無可能，因因你話長線投資起碼五年以上，其實人生得返好少個五年同十年

眼見好多人短炒獲利，其實短炒波幅係咪無可能，短炒唔係幾日，講緊幾個月

龔成老師：

2年要有回報，不是不可，但要睇有無機遇。

你見到近年有人短炒成功，只是剛巧這年發生的事，根據我投資20年的經驗，過往短炒的人都是輸多，只是你剛巧見到近年有人贏錢。

唔好將短期情況放大，要理性及全面分析。

你可以長線投資，但目標是3年內有基本回報，當然仍不能太過期望一定達到你目標。

------------------------------------------------

Q20667：

老師你好！我現在26歲，月薪平均3-3.5萬，持有約30萬股票，5萬黃金etf，可以持有下列股票3年，取得30萬的回報嗎？

另外還持有35萬現金，應該繼續買股票還是持有現金？

香港電訊6823 - 1000股
港鐵 66 - 500股
領展 823 - 200股
盈富2800 - 1000股

海豐1308 - 1000股
鐵塔 788 - 8000股
海爾智家6690 - 800股
阿里巴巴9988 - 100股
騰訊700 - 100股

恆生科技3033 - 4000股
中國潔能2809 - 150股
AAPL - 20股
TSM - 15股
SE - 6股

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」。

收息股如香港電訊（6823）這類，就不用太多。

至於其他股，基本上無問題，都是有質素，同時配合你的年齡與目標的。

我相信你可以完成目標。

我反而想你定一個30歲前有$150萬的目標。

當然，建議你把握這段時間，努力儲錢及投資，你現時的收入建議你每月儲$20000，盡力在這段時間投資。當然你要同時提高投資知識，把握機會，連同你原有財富的滾存，我相信以你的收入，可以完成到。

你年輕，盡力衝這幾年，之後先慢慢享受。

------------------------------------------------

Q20668：

龔sir你好有小小野想請教一下

241之前被納入恆指好還是唔好
長線投資持有可以嗎？

龔成老師：

被納入恆指，正面的，但這只是一些表面因素，我地最重要是分析企業的核心業務。

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

這類股只建議小注持有，但你預佢股價上落大。

------------------------------------------------

Q20669：

龔成老師你好～
睇左你專頁一段時間，一年前開始月供2800

宜家每個月供
2800 $4000
下個月開始再加多一隻月供
3067 $1000

想供多一隻用作收息，因為覺得投資知識唔夠，想都係搵隻穩陣啲，請問匯豐、恒生定中銀比較好？

另外，想問下小米長遠睇係咪都唔錯？ 現價合理嗎？ 想試下入注。謝謝老師解答

龔成老師：

你月供盈富（2800）$4000，及3067$1000，可以。但3067可能無得供，你可自行分注例如每阿隔2個月買入一手。

至於收息股，你可考慮恆生（0011），長線可以。

小米（1810）長線正面的，不過股價較波動，現價略貴。月供好了。

------------------------------------------------

Q20670：

老師，你點睇基金投資？另外現在是入市時機嗎？
謝謝

龔成老師：

對於投資實力不算高，或不想花時間研究投資的人來說，基金是好工具。

不過，基金都有好多類，一定要仔細分析該基金投資那些類別，是主動還是被動，風險程度是否適合自己，過往的表現如何。

所以，好難講現時是否買入時機，如果你不懂分析，可選一些風險唔太高的基金，同時以月供模式投資。

------------------------------------------------

Q20671：

龔老師，我出咗嚟社會工作咗一年，透過朋友介紹得知您經常會引導我哋呢班後生仔女去理財，真的感謝您。

我睇咗您的<<80後百萬富翁>>、股票聖經同潛力股都獲益不少。

我依家月供緊2000蚊3067，我想請教下如果一個月再用3000來月供兩個股票，其中一只選擇了領展，另外就唔知供港鐵定舜宇光學好，定係有其他更適合的股票選擇呢？

龔成老師：

現時你月供的，都是有質素，長期進行就得，唔好太在意大市的波動，長期進行就得。

如果你想較穩陣，就供港鐵（0066），如果想潛力度較高，就可考慮舜宇（2382）。兩隻都有質素的。

------------------------------------------------

Q20672：

老師，我睇緊老師作品大富翁致富之路，想請老師俾d意見我，我現時財政如下：

1.我和先生收入每月約11萬。一家四口加一個工人姐姐。

2.各有一層出租物業，一層負債200萬，一層負債350萬。一層月供8000，一層月供15000。兩層租金互補，剛好夠供樓。

3.大灣區樓一層，月供3700。泰國樓一層，月供2500，疫情租客已退租。泰國另一層樓2024才收樓，俾左50萬首期。

4.現住在僱主提供宿舍，每月租金3000。

5.基金及保險每月6000。無股票。

6.小朋友開支好大，我哋發現好難儲錢，應該如何再分配現時資產及投資？

7.想用一層自置物業換大單位及自住，不住宿舍，可行嗎？

8.手上現金只有幾萬，如何投資？

龔成老師：

你現時物業的比例較多，其實有點出現集中風險的情況，最好在之後的配置上，增加其他類別，以建立一個更平衡的財富組合。

最好是利用幾年時間，利用其他類別的資產去儲錢，滾存財富，到資金較足夠時，可以換樓（要你有實際需要，最好在換樓時，不要用盡財富，要同時有基本資金剩，等你財富可以較平衡。

如果有需要，可以賣出其中一層泰國樓，將資金投資其他資產類別。

你現時現金不多，建議你多儲現金先。

之後，就可以利用資金，投資股票。相信投資平穩增長股較適合你地。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

利用股票去保持財富增長，盡力滾大財富，到適當的時機才換樓，不要太過心急。

------------------------------------------------

Q20673：

想請教一下老師，現價的士牌 $ 500萬左右 ，可以考慮入手嗎？ 謝謝你

龔成老師：

的士牌，你預無乜增長力，只是集中收租方面，中短期會因肺炎而影響租金，但長遠仍是穩定，不過就無乜增長力。

加上叫車程式等因素，都對價值有影響。

現價合理，可視為收息工具。如果本身有一定的財富，作為分配的其中一部分，可以。

------------------------------------------------

Q20674：

老師您好，請問您對亞里巴巴前景有如何睇法，因為暫時股價十分波動,本人$243和$253都買入，請問長期持有可以嗎？謝謝老師

龔成老師：

近期的新經濟股股價回落，加上阿里（9988）將面對內地監管可能收緊，都令佢股價上落大左。新經濟股股價回落只估值問題，由之前的貴，去翻合理水平，反而要從一些核心因素分析。

例如內地監管可能收緊，相信對佢中短期有影響，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區頂部，這股可長線。不過，中短期會波動。

如果有貨，可持有，但就唔需要太急加注，你持有的價約唔算好貴，可守住先。

------------------------------------------------

Q20675：

老師你好～我最近買左你3本書來睇，分別係80後百萬富翁，股票勝經，財務自由行。獲益良多，後悔沒有早點睇到你的書。

本人34歲，月入2萬（公務員），老公40歲，月入4-5萬做網上生意。

2人現金共4百萬，但我們沒有任何物業，現住在一層我爸爸名下的居屋。（不用供或租的）你認為我們現在應該買樓收租還是點樣好？因為現時收租只有2厘左右或更低。所以不知道是否應該買樓。

另外，現在月供盈富1萬，供了2年。請問股票投資方面還有什麼建議？

謝謝老師。

龔成老師：

以你地的情況，應該將資金分成3大類。

第一，做生意的資產及備用現金。

第二，股票，你地現時的組合，股票比例不多，要將部分現金轉為優質股。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

第三，投資物業。

嚴格來說，你地現時無業務。而我地理財，其實是建立一個平衡的財富組合，你現時大多現金，反正沒有物業，不如投資物業去有效運用，以及平衡組合。

這不是一個賺差價的過程，而是將現金轉為真財富的過程。

當然，生意是你地的核心，如果現金在生意上有用就持有現金。要「閒錢」先可以進行配置。

------------------------------------------------

Q20676：

阿Sir，純粹想呻下，唔知點解雖然我落嚟嘅問題其實唔係好關財務知識，不過都想問你意見。話說上年公司因經濟減了人手，所以我由三個人做嘅野全落在我一個人身上。

工作量大增，所以無論放工或者假日都要繼續工作，但我本身有兩個小朋友，所以我唔想完全冇晒work life balance。

加上我老細對我啲態度唔係咁好，成日都鬧鬼我。所以本應諗住捱到今年年頭日派咗花紅就走。其實上星期已經派咗，金額非常之少，完全有啲谷氣捱左咁耐等個花紅原來得個吉。

這幾天我都掙扎着遞信，我自己已經計過畢竟自己有積蓄，慳住用一年其實冇問題，或當老公養><只不過其實係要過心理關口，預咗可能要量地成年都搵唔到工。

依家我係呢個經濟環境，人哋唔炒我，我自己反而去遞信，係咪好愚蠢。

我都已經分唔清，我係未繼續要每日擔驚受怕俾老細鬧，定是自己做咗幾十年人，對自己一次好啲，一年休息時間睇吓書refresh 下自己，陪下小朋友，多睇書吸收啲新知識，唔好成日只係埋首工作乜嘢都唔識

龔成老師：

比較穩健的方法，當然是找到另一工作先辭工。

不過，你都可以睇翻你果行的情況，如果出面的環境無你想象咁差，都有請人的情況，其實你都可以先辭工，始終你現時不是無儲蓄。

簡單來講，你唔好停在這裡空想，而是多找一些出面的實際資料，市道如何，預期幾時會好轉，對疫情有幾大影響，有具體的資料，你就更易做到決定。另外，多從長期的角度去分析。

------------------------------------------------

Q20677：

你好龔成老師。本人25歲，從事航空業。不過最近疫情關係，需放無薪假，導致收入大減至每月約$12,000，每月開支約$3,000。

所以希望做投資，增加收入，同時萬一失業時亦有少量收入支持基本開支。現有流動現金約十二萬，股票約五十萬。持股如下：

823領展： 1500股@$19.02,再加303股以股代息，即總數1803股（多年前買落）
6電能實業：500股@$40.9
83信和置業：4000股@$11.53
778置富產業信託：26000股@$7.365
1038長江基建：2000股@$43.35
1848中國飛機租賃：7000股@$6.46

請問以上股票組合質素如何？
另外我想做月供股票，打算每月

2800 盈富基金$1500
823 領展$1500
66港鐵$1000
會否適合作資產增值？
謝謝

龔成老師︰

我地係做財富增值時，會運用「先增值，後現金流」方法。較年輕人士，應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

策略上，你應集中係增長方面，"平穏增長股"。現時持有電能（0006）、信和置業（0083）、置富（0778）都是收息股，增長力麻麻，不宜持有太多。

中國飛機租賃（1848）有質素的，但要留意，佢的本質是利用大額借貸，然後買入飛機，然後出租，原理是賺息差。由於負債高，因此這企業點都有一定的風險，因此，只宜小注。

而且你現時組合有個大問題，就係好集中係地產部份。單一企業或行業，唔好佔組合15%或30%以上，否則會有過度集中風險。你現時需要沽出部份，慢慢換至其他增長股。

未來策略上，建議你先用每月5成儲蓄做月供，其餘先儲起，用一邊月供一邊儲蓄的策略。你選股都可以，但最好加一些潛力股，去提升增長潛力。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。
潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

餘下12萬和每月一半儲蓄，我地就等機會，當大市出現較大回調，就加大力度掃貨，然後作長線投資。

但由於你行業暫時都未復甦過來，建議在實行計劃前，先儲起半年開支，咁會較為穏當。

------------------------------------------------

Q20678：

龔成老師，請問00659能否用月供形式，長期持有？另外，現價可買入00175嗎？

龔成老師︰

新創建集團（0659）都有質素的，佢係是新世界發展（0017）的基建及服務旗艦，業務遍及中國內地、香港、澳門。

新創建係一間綜合企業，可分為7大業務：道路、環境、物流、航空、設施管理、建築及交通、策略性投資。當中可分為兩大類，即是基建及服務

整體的質素，算是不差，但又未到最高級別，業務分散於多個範疇，部分與公共事業有關，過往的生意雖然穩定上升，但盈利卻停滯不前。

企業本身不是沒有優勢，長遠仍有增長能力，但由於賺錢能力略有下降，加上企業本身已很龐大，增長期望不會太多，過往過價大致穩定，投資宜集中在股息多於股價回報。

另外，近期的肺炎對佢有一定的影響，相信中短期仍弱，不過長期來說。仍是有投資價值。

用佢月供都可以，但這股不建議太大比重。同時要耐心等好轉，你要明白佢增長力不強。

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

現時價位在合理區頂，甚至有少少貴，股價波動，有貨可長線。最好回少少，或這刻小注等跌再加。

------------------------------------------------

Q20679：

龔成老師你好，本人28歲，近呢一兩年先開始學投資，現時股票戶口有10萬，希望可以在三年後翻一倍。

現時股票戶口持有中海油二千股、領展、國泰及美股阿里巴巴和美國航空等，請問你對我現時持有的股票有什麼看法？如果我想平均每年有30%增長，需要轉換其他投資組合嗎？

另外，我有一份供完的儲蓄保險現值$50,000，其餘的同類型保險還在供款當中。如果我把已供完儲蓄保險拿出來投資股票好嗎？謝謝

龔成老師︰

"保險"只係理財中防守部份，買足夠保障就可以，增值可以留比優質資產（如優質股、物業等）去做。

你現時已供完的可以去投資，餘下的也建議你審視一下。

我地做財富增值，一般希望做到架合理回報，係每年增長10-15%。你30%這個目標，用股票投資去做，風險會好大，較難達到。

如果你無其他增值方法，建議你按步就班，透過月供和買入優質股，去為自已資產作增值。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應用"平穏增長股" + "潛力股"的組合。現有持股中海油（0883）質素中等，不宜持有太多。而國泰航空（0293）好一般，最好換至其他優質股。

美國航空我自已無研究，你預期全球航空業中短期都會較弱。

現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q20680：

你好，想請教一些投資問題。我現在手持688 中國外海、6110 滔搏、1833平安好醫生，請問以上三間公司發展潛力可好？

另外如果想建立一個投資組合，包括平穩長線、值搏進取中線、請問有咩建議？

另外應該如何揀選優質股？
謝謝🙏🏻期待老師回覆

龔成老師︰

我地投資股票，係希望買入一些優質企業，透過佢自然增長，達至財富增值目的。所以，只會係"長線"，唔會係睇中短期。

中國海外發展（0688）都算不差的，但在發展商來講，就不算最強，長遠有平穩增長的能力，前景都正面。

睇翻佢的財務數據，基本上都是正面的，但生意增長力不是好強。中短期可能因中國經濟一般而股價一般，但長遠，仍是正面的。

滔搏（6110）主要係中國從事運動鞋服產品零售業務。過往業務不差，有增長，有盈利，有正現金流，只是半新股類，分析與估值上較為困難。

新股上市前一定整靚盤數數，所以要打折扣。業務上，都有投資價值，但考慮新股上市不久，不建議大注。長線投資都可以。

平安好醫生（1833）都可以話係潛力股，但就屬於較高風險的類別。睇翻佢地的財務數據，平安好醫生仍處燒銀紙狀態。此股好難估值，你投資都可以，但小注好了。

若你尚有一段時間，才到退休之年，可以用"平穏增長股" + "潛力股"作組合。越近中年"潛力股"比重要減少，到近退休應集中在"收息股"上。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

至於如何評定優質股，我在課堂也要用數小時去說明。簡單而言，就是透過企業質素、行業發展、財務狀況等，來作出分析。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18641-Q18660）

Q18641：

龔老師您好，想問下您點睇0023(東亞銀行)、0769(中國稀土)、0656(復星國際)、0778(置富產業信託) & 0390(中國中鐵)？現價都值得入嗎？謝謝

龔成老師：

東亞銀行（0023）一般，賺錢能力比過往減弱，現價合理。

中國稀土（0769）無乜投資價值。

復星國際（0656）都有質素，但增長力比過往弱左。

置富（0778）有質素，理想收息股，可投資。

中國中鐵（0390）都有少少質素，但增長力比過往弱左。

------------------------------------------------

Q18642：

老師，看到係的留言，現時手上有一手8140，有點心荒，星期一能走嗎？還有什麽時候會過澳門開班？

龔成老師：

人和科技（8140）的確有點令人擔心，每年生意只有$5000萬，無乜增長力，平均一年的盈利，大約為$1000萬。

行業是建築，係香港從事機械鋼筋業務，這類業務估值唔會太高，加上增長力唔見有，企業的合理價值，應該只有$1億左右。

而佢現時的市值去到$13億，除非你見到佢有一些極利好的因素，否則，這股根本唔會值這得價，小心。

賣出這股較好。

疫情過後，一定會過來澳門。

------------------------------------------------

Q18643：

阿Sir 你好，想請敎恆生0011還有沒有投資價值？佔倉大約5％，而且一直月供緊，應該如何處理？

另外想問同仁堂科技1666、中國通訊服務0552 各佔倉5％，應該持有還是換馬？本人能夠承受高風險，謝謝你賜敎

龔成老師：

恆生（0011）算是銀行股中，較有質素的一隻，可以守守。當然，你要明白佢增長力比過往有所減弱，主力只是收息股，你要衡量，自己的投資組合，應該有多少%是收息股。

至於同仁堂科技（1666）可以守，但中短期仍會較一般，唔好加注。

而中國通信服務（0552）長線持有無問題。

如果你可以承受風險，可以等上述股上翻少少，轉一些更有增長力的股。另外，可以停供恆生，將資金轉其他。最簡單是考慮安碩恒生科技ETF（3067），長期月供。

------------------------------------------------

Q18644：

老師 我今年30歲女 收入算幾穩定 首次買樓 預算1000萬內做高成數 想要唔太舊既

對南昌上蓋匯璽同將軍澳上蓋天晉有興趣 老師你點睇呢兩個樓盤？萬分感謝！！

龔成老師：

從長遠的投資價值，南昌匯璽會較好，始終地理優勢強，長遠會較好。

但新樓較難分析平貴，這方面你要多做功課，唔好只因「易上車」就買，易上車不等如平。你要做呎價，預期租金回報率，去比較分析。

------------------------------------------------

Q18645：

1. 宜家科技指數唔平，如果3088係咪宜家唔應該入貨？同埋大概咩價位入會係合理區呢？

2. 因為我現時已有13隻股票，如果再加會唔會太散呢？同埋加多兩隻潛力股，啊sir你會建議加咩好？

3. 之前試過月供優質股，不過好似每次月供個價都偏貴。所以之後變左一手手買。如果月供潛力股既話，有咩建議呢？

龔成老師：

1）你預現價在合理區頂部，我會建議以慢慢分注，或月供的模式，去入科技指數基金。這類基金可以長期收貨，耐心持有等收成。最重要是不要這刻一次過入太多。

2）13隻股票，如果你的財富組合未算好大，其實已開始多。不過，加入基金無問題的，反而應處理你原有的貨。

3）其實月供始終是較好選擇，或者你自行分注去入都得，除了華夏恒生科技（3088）你可以比較下安碩恆生科技ETF（3067）。

另外可考慮月供：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q18646：

老師我在澳門，香港的股票班怕是趕不上，故熱烈期待你會來澳門開班授徒，或是疫情平穩後我來香港報讀

你推薦的平穩收息股我已悉數買入，並留下一半資金待股市低位再伺機而動

另老師看你的書中提到樓股平衡，我澳門有3個物業，珠海都有3個物業，無貸款，是否不用再買樓宇，只買股票或債券就可以了，另本人享長俸退休金制度，若有餘錢再有什麼應考慮投資呢？

龔成老師：

如果你現時的總財富，已經持有一定數量的物業，你應該將財富，配置到其他類別。

因此，你之後可以強化翻股票部分，令你的財富組合更平衡，而暫時都唔好再增加物業類。

如果未有信心選股，就加指數基金。

疫情過後，一定會過來澳門班！

------------------------------------------------

Q18647：

想再請教一下, 如何比較吉利同比亞迪的發展潛力? 大家都係慢慢走向電動車發展, 吉利會可以為下一隻潛力股嗎?

是因為比亞迪擁有消費電子,汽車電子, 國際商用電動車,這些市場的壟斷嗎?

龔成老師：

雖然大家都是走向電動車，但比亞迪（1211）係2007年已推出第一款電動車，雖然唔太得，但你可以見到佢行得好前。加上佢本身是造電池的，因此這方面始終有一定的技術。

吉利（0175）都有增長力的，但就未必會升得好勁。

------------------------------------------------

Q18648：

你好老師，我今年28歲，租樓，已婚，有一囡，扣除日常家庭開支，只剩餘每月2千元，打算投資基金，但因為需要高流動性，所以本金比較少，但應該點樣揀？ 謝老師

龔成老師：

如果你有家庭，又要高流動性，建議你先儲現金。

到你有足夠的現金數目，比較安心，就開始做月供股票，你可以供盈富（2800）$1000+安碩恒生科技（3067）$1000，長期進行。

由於這些基金都交易所上市，你要賣出套現十分易，相信適合你的。

------------------------------------------------

Q18649：

Sir, 恕小妹愚昧問一個問題, 覺得你應該睇了洛克菲勒自傳, 其中第六章［贈予的藝術］內的部分章節～ ～贈與的精神內涵 ～無私奉獻是成功之路 ～服務社會的慷慨 ～助人的重要原則 ～一些基本原則

1）從而啟發你, 無私奉獻幫助別人, 希望能夠從你身上學習投資知識/選股能力, 將此技術成為他們終身有用選股技能, 所以係FB 免費解答所有網友股票問題（籍此增加知名度, 你的創新思維夠膽, 因為之前沒人做過, 你係第1個非常佩服）

2）當然想進一步增加投資知識, 上股票堂緊係要收費（絕對明白, 理想當然）世上沒有免費午餐, 要付出才有收獲。

3）希望我都有你咁勇就好！

4）自從上了8堂基礎班, 已好努力選股, 因為要返工, 分析1只股票都要2～3個月（盡能力啦）。分析完後email給你, 切磋一下及給予意見🙏謝謝

5）會報讀進階班, 到時見

身體健康 學生～

龔成老師：

1）我都睇過唔少洛克菲勒相關書，所以唔記得了，但我相信，我比社會愈多，我得到的都愈多。

過往我得到好多社會資源（如圖書館），現在有能力，付出多少少都無問題。

2）我從來唔搞免費課程，這反映當蠱知識的價值，有時免費d人就唔珍惜。

3）每個人都有自己的目標，做你喜歡做的事就得！加油！

4）你要保持溫書，分析年報，加油。

5）進階班見！

------------------------------------------------

Q18650：

老師，有幾個問題請教

1）關於心理素質
我忍不住 $85 賣了 一手 1211
$28 賣了一手 1347
是否需要 delete 手機 股票 app
以後只買不賣 ？

2）反向 etf 長遠股價向下，因為大市長期向上的，投資價值不高。

3）投資比讀書考試困難一百倍。完。
謝謝

龔成老師：

1）如果你經常睇股價，例如每日幾次，我建議你delete 手機 股票 app 。

我地要關心企業，如果你著重股價，這就變成了一般的散戶，你這樣投資好難成功。你要平常心面對股價上落，要提自己，這是持有了一間企業，要睇長遠的企業發展，唔好理會大市情況。

2）對，不應投資。

3）要學習心理因素，香港人最弱就是這方面。要訓練到自己，面對持貨股價大上大落，都無感覺的。

------------------------------------------------

Q18651：

成哥，想問一下小米咩價先合理，現在見佢回落打算分注入。

另外想問如果以三年時間，中生1177還是小米1810較高值博率

龔成老師：

小米（1810）有質素的，長遠有發展力，你預去翻$18以下進入合理區。

中生（1177）與小米，兩隻都有潛力，我自己兩隻都有，好難講邊隻3年後會好D，兩隻都是有前景，可能中生潛力高少少，但風險度會大少少。

------------------------------------------------

Q18652：

你好，龔Sir係朋友剛介紹認識你，早些認識你就唔會輸咁多！本人57歲持有股票有：

670/ 3.6入一萬股
1052/ 7.2入一萬股
1313/ 11.6入2千股
6869/ 14入3千股
2628/20.3入一千股
788/1.55入3萬股
939/ 7 入一萬股

這些要怎樣處理，現在想每月用8000元供股有介紹的2800、823、1299、3033、3067邊幾隻好，剛才看你講的ETF手續費又係架唔明，多謝你能幫我分析

龔成老師：

你開始是退休或接近退休年齡，在財富配置上，應該較多穩健類的股票，收息股。

航空企業的賺錢能力唔強，加上風險高，因為好受油價、對沖等因素影響，東航（0670）長遠仍會面對這情況。

雖然本身都有一些業務上的質素，但企業長期價值增長有限，行業有風險。因此投資價值未算好高，你等佢上翻就賣出。

長飛光纖光纜（6869）雖然都有質素，但賺錢能力有所減弱，這刻你可守住先，上翻去就可賣出。

至於其餘幾隻，你可以長線持有。

同供方面，你選股都可以的，不過，你應該加入收息股，如港燈（2638）、香港電訊（6823）、置富（0778）等。

另外，恆指科技指數的基金，有潛力，但你要衡量是否適合自己，因為會較波動，如果想投資，可以，只要金額不要過多就得。上述兩隻，你可選安碩恒生科技（3067），管理費會低D。

------------------------------------------------

Q18653：

龔sir你好，我有問題想請教一吓：

1. 大行報告
a)其實可以信幾成? 有冇邊間大行係準確啲?
b)所謂目標價，我地係唔係可以當係合理區? 如果係，咁係頂部定中間?
c)通常佢預算幾耐會達到目標價?

2. 新世界發展
我利用“生活選股法” 之前喺尖沙咀行K11 Musea新商場，之後經過北角又見到K11 Atelier寫字樓，2個都設計新穎美觀，check 到係 0017新世界發展 項目。

但我見阿sir 推薦地產股似乎無佢份，請問佢是否有啲咩問題？（未做分析，純粹見到佢啲項目覺得幾好）
謝謝

龔成老師：

1）A）你只能當參考下，但我地都會綜合多間作分析（是多間，不能只信一間）。

B）都可以咁樣理解。

C）佢地有些報告會講年期的，例如12個月的目標價，不過，你當參考下好了。

2）你的選股方向正確，不過，新世界發展（0017）同時有好多其他業務，因此一個業務好，不代表全部都好。整體上，這是優質股，你都可以考慮，但佢中短期仍會較弱，長遠會好轉，但不是高增長股。

------------------------------------------------

Q18654：

老師你好
請問7200跟7500能否長揸，謝謝

龔成老師：

（7200）的投資目標，係追踪恒生指數每日表現兩倍（２ｘ）的投資業績。

（7500）的投資目標，係追踪恒生指數每日兩倍反向表現（－２ｘ）的投資業績。

這是一些較為中短線的工具，不太適合長線的，同時，我不太建議投資這類槓杆工具，風險較高，同時當中潛在成本會較大。

------------------------------------------------

Q18655：

同埋龔sir想問問你如果對於買左貴貨既時候下跌既心態？ 係咪應該都係不用理同下跌到合理價位再做買入再等待？

龔成老師：

首先，就算是優質股，也盡量避免有貴的時候買入，就算入，也只能小注投資。

如果你確定持有的是優質股，而你這刻持貨不過量，就算下跌，也完全不用理，如果跌得多，就可加注，當然，要睇翻這股佔你組合的%會否過多，以及你的現金情況。

決定我地持有與否，關鍵是「質素」。

------------------------------------------------

Q18656：

你好，龔sir
想問吓你點睇0035 遠東發展

龔成老師：

遠東發展（0035）業務有點多，物業發展、物業投資、酒店業務及管理、經營停車場，以及證券與金融產品投資。

例如佢的物業發展，其實分布在澳洲、香港、馬來西亞、中國內地、新加坡及英國。至於酒店業務及管理，佢將擁有28間酒店，分布於香港、馬來西亞、中國內地、新加坡、倫敦、澳洲、德國、奧地利及捷克。

不過，全球經濟較弱，地產較一般，都對佢造成一定的影響，但相信只是中短期，長遠仍是不差。整體質素是有的，收息可以，但股價則未必是增長型。現價都可以投資的，合理區。

------------------------------------------------

Q18657：

你好，我26歲，保守型，月薪$30000，當中有$15000必要性開支，每月平均儲$10000-$12000，由今年初先開始學投資，現有約$50萬定期，另有$10萬左右既股票：-

0003 @$11.5 -2000股
0066 @$39.75 -1000股
2800 @$24.975 -2000股

目標3年內結婚同有個$600-700萬左右既物業。

我想問我宜家合適既方向應該係要乘宜家個市差啲，將所有定期盡快轉去買股票

但係我又擔心如果3年內經濟仍然差，我所有既股票不升反蝕，咁我連個本都少左，仲衰過只係放銀行。謝謝。

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

不過，由於你是保守型，加上資金將會在3年後用，因此，又唔能夠太過進取。

你可以主力投資「平穩增長股」，同時，只能動用部分資金，經常都要有3-5成的現金在手。

現時持股，可長線。

另外，你可以將現時的現金，分注投資優質股，
你可以考慮盈富（2800）。

另外再加其他：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18658：

老師，看了你的專頁及財務自由行幾個月了，實在獲益良多，多謝你的無私分享。

由於還未太學識選股，想開始定期買2800穩定投資，現有三手，平均價$24.6。想請教一下環球及香港經濟持續不景氣，如果繼續每月定期入一手是否可行？打算長線持有最少3年。

另外本人有2100股0003，平均價$13，是否值得長線持有？還是先沽出一點止蝕？

龔成老師：

你原有的盈富（2800），可長線，另外，你可以保持每個月入一手，只要你唔好用盡現金，就得，經濟雖然有不確定性，但我地投資最重要是長期，有時中短期的不利反而能令我地在較好的價位買入，因此，唔雖然要擔心，分注投資能將買入價平均，保每月一手可以。

至於煤氣（0003），其實仍是有質素的股票，但增長力弱左，而佢改為20送1，反映增長力可能減少左，但不算差。

香港業務不強，但中國部分不差，中短期雖然較一般，但見佢的長遠發展力仍在，但就要耐心點。

由於佢一向都穩定派「相同股息」，在這情況下，反映派息的增長會少左。但整體來說，這企業仍是有質素的。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

------------------------------------------------

Q18659：

龔老師您好，有事希望請教。因為想嘗試做點小生意，想做網店，然後賣一啲平常既家品，例如清潔劑等，因為老公比較熟依行同供應商。

資金不多，原意係我要臭小朋友又想揾多點家用。請問您可唔可比一點點意見呢？感謝感激

龔成老師：

生意好多時都是試出來，其實你已經可以開始進行，當你有方向後，就可以行動，之後不斷試市場，從而作出調整。

賣清潔劑等絕對有市場，但你要想方法建立你的客戶群，令人地知道你的存在！

另外，你要有你的獨特性，如果你同其他人一樣，點解要幫你買？你要答到這刻問題。

------------------------------------------------

Q18660：

你好，我新手一名，37歲，月入25k，老婆freelance 月入平均18k，不穩定，有兩名子女。目標當然是盡早可以退休。

現有股票餘下:
66 1500股
388 200股
823 800股
1038 2393股
1398 10000股
2388 7000股
2628 2000股
9988 200 股
KO 98股
GOOGL 4股

股票組合需要改變嗎？另打算下月開始月供9988（$2000）1299（$2000）1928（$1000）66（$1000）823（$1000）可以嗎？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你37歲，財富仍有增長力，但就不能太進取，你可以集中投資平穩增長力，加少少潛力股。

上述股票，大多是有質素的，你可以持有，工行（1398）這類收息股，未必太適合你。

至於月供股票，可以最好加入盈富（2800），如果想組合有較高增長力可以加入少少安碩恒生科技（3067）去月供。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。