【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21221-Q21240）

Q21221：

老師，我聽咗你的選優質股和為何不賣出優質股覺好有道理。多謝你咁好的片，以下請假你幾個問題：

1）優質股會否因時因市而異？宜家個個都話唔好選新經濟股，但如騰信，巴巴，京東，小米（都持有）百度
，b站（目標股等待中）等我始終認為係優質股（我錯咗高追快手所以唔買，美團雖佢好但太貴）

2）最好的組合應集中買賣幾多隻優質股？定都要唔同行業優質股去平衡？

3）快手有排都未到家鄉令我反省覺以後應集中少隻優質股（80%想全買700），我是否錯？

4）我諗住係選優質中的優質，咁騰信應該係優中之優，你的優中之優係邊幾隻？

5）我之前670入過700賺唔多放咗跟住等到630再入，假期最後一日654我無放

見你答FB答話唔好放如果630買，但好多都話個市仲有機會跌，我矛盾中：覺你話唔好放啱，但又諗當日670入賺10唔放我入唔到630，我諗住短期若有機會去到660-680就放，定你都係建議我唔放嗎？

6）我205入咗比亞迪，太多信息話仲會跌（26000），我應放定唔理照長期持有？

感覺有時睇太多財經跟住個個都話會跌（之前話好多次跌真的跌），我唔理先會失手放買快手（分幾注買都係貴）

所以好矛盾（我個人都覺會再跌尤其疫情反覆，身邊見到好多行業都好差）

7）我52入咗中移動我會長揸
若跌穿50應再加注定幾多錢再加？

8）我唔會奢望3百萬變一千萬，我只要本金有一半的回報已好感恩，但感覺真的唔易，不過會努力，你要我地自己選優質股係好啱，因授人而漁，我設388@410-430入唔到因佢一跌標升，你現在建議388的買入價是多少？

9）你對來緊一個月的股市點睇？會跌至27000定會升至29000以上？

我見你叫人忍手，是否你都唔睇好後市嗎（第二季）？

龔成老師︰

1） 我地最主要都係睇企業本身質素，去確定是否一隻優質股。之後，再利用平貴，去定一個買賣策略。

現時有不少新經濟股，出現輕微過熱架情況。但唔係代表佢地無質素，唔值得買﹕只係用現時價值買入，個風險會太高，再等佢回調會較好。

我地只會係合理至平宜水平入貨，或者利用月供去儲貨。就算再好的股票，都唔好係貴價時高追，咁係好危險。

2） 一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你預大約8-10隻左右，會較理想。

3） 就算質素再好，都不要過份集中，因為咁個風險反而大左。因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

4） 金沙（1928）、港鐵（0066）、比亞迪（1211）、中生（1177）、福壽園（1448）、小米（1810）等，都係一些有質素架股票。

但除了質素，我地都要考慮佢現價，到底有無值博率。好似比亞迪（1211）好有潛力和質素，但現價太貴，我地都唔會去入貨。

5） 你依然停留左係"賺差價"架思維，我地投資增值，係透過長線增有一些優質企業，去等佢自然咁升值，而唔係炒炒賣賣。

所以，只要係優質，你長線持有就可以。你見我比亞迪（1211）買左咁多年，中間升升跌，我都無賣過，現在才可以享受數倍升值的效果。

同埋，你唔好諗住自已估到個市點走。如果佢唔係好似你預期咁賣完，之後跌翻比你入，反而大升，你就會進退失據。

6） 你比亞迪（1211）個買入價係貴左，但由於佢好優質，你長線持有就可以，但現價唔好再加注。

記住，睇財經新聞，我地睇下個客觀資訊，唔係意見。

7） 中移動（0941）都有質素，但佢主要係收下息，如果你未近退休之年，唔建議持有太多。

至於再跌是否加注，就睇翻你本身預算投資此股的資金，是否已經用盡。如已用盡，就算再平也不要加注，否則只會增加風險。

如尚有資金，可每跌10-15%就加1注。

8） 其實只要你學習一套正確財富增值方法，再比些耐性，要令資產倍升，唔係話咁難做到。

港交所（0388）現價略貴，你預回多1,2成才算較合理。

9） 中短期股市走勢，我唔知道。我只係從大市水平和個別股票平貴，去定投資策略。

現時不少新經濟股，都有過熱情況，暫時不宜投資住。至於舊經濟股，普遍價格都合理，依然有投資價值。

------------------------------------------------

Q21222：

sir,可唔可以比D意見, thanks a lot!
（學員附上了6919的分析練習，但不便登出）

Sir,我有3隻蟹貨,都keep左3年,覺得唔係幾睇到未來既增長力,覺得食之無味棄力可惜

371 4.44@12000
698 0.84@40,000
315 6.44@14500
788 1.73@18,000

我覺得依幾隻質素都唔差,但睇唔到個增長力,每次出完業績就想等派息,派完息就想等業績希望有轉機,,明明其他資金買增長股回報都唔錯

但下唔到決心沽貨,從來未試過蝕錢沽貨,我係咪應該咁做,可唔可以比D意見我,THANKS!

龔成老師︰

你分析人瑞人才（6919）的練習，睇得出你花了一定的時間去進行研究，同時都有心機做的，基本資料方面無問題，至於評分方面，你的答案大致正確，你給了15分，我相信這個數與這企業優質度接近，相信你大致掌握了該評估表的指標方向。

至於你在SWOT分析，你可以寫更多（雖然評估表該格位不是很大，但你可以自行寫更多），你只簡單寫定位清、效率高，其實可以延伸這更多，佢怎樣效率高，這因素如果幫到這企業將來發展。

至於評估表第5頁，你表示負面因素是行業競爭加劇，其實可以再延伸寫更多，如果這情況發展，是否會對佢賺錢能力有所影響，你表示佢最終因經營本低而勝出，這是否佢最終能站得住腳但賺錢能力會減，到時如果真的行業競受加大，佢盈利會否減少，這企業怎樣保持現時的賺錢能力？

至於企業估值方面，你計算出的企業價值都大致正確。

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

現價算係合理區頂部，此股係可以投資，但不宜太大注。

其實整份評估表，你都做得不錯，運用得很好。你要大量這樣分析企業，實力才會大幅提高，我自己多年來，都是不斷分析企業、分析企業，去提高實力，同時以「分析好多，投資好少數企業」去提高投資準繩度。

至於你這些持股，是否沽出換碼，你要從投資回報角度去考慮。如果換至其他優質股，長線有明顯較理想的增長，我地就應該行動。

北控水務集團（0371）和數碼通電訊(0315)都有質素，但你預佢主要係收息，唔會有太明顯增長力。

通達集團（0698），算是不過不失。但就唔值得持有太多，始終質素唔算好高。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股長遠仍算有發展力，可長線。不過，潛力度比過往略減。

你可以睇翻自己年紀、持股比重和風險承受力，去決定是否減持。

------------------------------------------------

Q21223：

龔sir.您好我今年40歲，以前有跟家人投資新股（白表）如下：

招行 1,000
領展 2,000
工商 2,000

中行 2,000
中鐵建 500
中鐵 2,000

因為自己唔識炒，輸多贏少，最後儲蓄都係做定期多，不過近期連一厘都無，跑輸比通漲。

現在收入二萬多，供養兩位已退休家人，住私樓（唔洗供）。

手持五百萬現金，應該點開始建立資產組合？

龔成老師︰

我地投資股票，係希望買入一些優質企業，透過佢自然增長，達至財富增值目的，絕對唔係"短炒"。

而定期這類方法，在財富增值上，効果都唔高，不建議你用。

只要選股和買入策略正確，並長線持有，就會有唔錯架財富增值效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你40歲，建議你用「平穏增長股」 + 「潛力股」的組合，當中以「平穏增長股」為主。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

現時大市只是合理區，你現有500萬資金，可先扣起等同半年開支的應急錢。

餘下部份，可以先投入一半，用"分注"形式，慢慢買貨。另一半就等大市出現一定程度的下跌，才大力度掃貨，然後長線投資。

不過，你投資經驗與知識不足，加上過往投資虧損較多，我會建議你先集中「平穩增長股」，而「潛力股」，只能小注，等你有較多知識後先加大投資潛力股。

同時，買入時要慢慢分注，或用月供作策略。

暫時只建議你動用$50萬-$100萬，到你有一定知識、經驗後，先慢慢去到約$250萬作投資。

------------------------------------------------

Q21224：

你好, 本人38歲, 已婚有一個3歲小朋友
手頭現金約100萬, 而家同老公屋企人一齊住

想盡快買樓…..但兩公婆月搵4萬蚊, 問過銀行按揭只借到400萬, 要再儲多D首期先有望
上車, 現每月可儲萬五蚊

1. 點先可以滾儲到多d資金

2. 投資新手, 之前都係抽下新股咁

3. 岩岩睇多左你既FB, 想4月開始月供三千2800, 請問是否OK?

4. 知道買私人樓保值/升值潛力高D, 但budget有限, 買居屋自住係咪都OK

5. 我地住將軍澳區, 因想屋企人幫手睇小朋友,想搵番同區,但而家樓價越升越有, 真係追唔係幾到, 係咪應該搵遠d地方住呢

另現有股票組合約27萬如下, 請問有沒有重複??否需要調整

0005,1600股, 平均買入價49
0175, 1000股, 平均買入價33
1177, 3000股, 平均買入價7.63
1299, 400股, 平均買入價200股抽新股中, 200股96.5
1810, 800股, 平均買入價22.7
2388, 500股, 平均買入價15
9988, 100股, 平均買入價229.6

感謝!

龔成老師︰

1） 如果你打算1、2年內買樓，就建議留較多現金。

但若果你不打算太快買樓，就可以先利用投資，滾存更多資金先。

由於你係新手，我建議你先用月供模式，去投資一些有增長的優質股，以達至財富增值目的。

2） 抽新股係可以，但你要明白我地分析新上市企業合理價和質素時，除了了解行業發展、佢本身業務狀況外，都要參考過往財務數據。

但新股都唔會有太多這方面的可靠資訊，令成個分析唔完整。所以我地係投資新股時，就算覺得佢基本面再好好，我地都要比較保守，唔可以太取，去平衡翻參考數據不足這個風險。

3） 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應用「平穏增長股」 + 「潛力股」的組合。我建議你用每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

由於你係新手，未有選潛力股的能力，也未必能掌握投資時機的能力。你可以簡單地先集中投資係盈富基金（2800）。到你有經驗，才選其他我建議架股票。

至於現有100萬，可先用30萬，分注咁入盈富。餘下現金和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

4） 私人樓一般情況，升值潛力都較高。但從自住角度，居屋都係有佢吸引之處。當你資金不多，而目的又係自住，居屋其實都可以考慮。

5） 除非你有迫切性要搬離現有居所，否則，你應先利用優質股增值，去先增值一筆財富。另一邊，再慢慢物悉價格較合理物業，咁會較好。

另外，其實將軍澳區已經是全香港，相對唔太貴的地區，所以日後其實唔太建議你轉其他區。

因為你手上資金不多，勉強買入單位，都會令你供款好吃力。而且，買物業後，我地都應該同時留有一定股票去做增值。所以，現時未必係咁適合。

建議你如果有較長時間，先用優質股累積起一筆財富，再慢慢換屋，會較理想。

至於現有持股，都適合你。除了匯控（0005），佢主要係收下息，唔會有太大增長力，不宜持有太多。

------------------------------------------------

Q21225：

龔sir你好，因為留意你啲post開始有買少少股收息，你嘅分析同意見都好實用！

想請教你以下情況，我應該如何理財，同埋有咩理財組員較適合我

本人28歲，
月入24k，
每月儲蓄大概15k-17k，
銀行現金20萬。

唔識理財，睇完你嘅分析先識買股票收息。多謝你嘅無私分享！！！

我個倉有:
0011一手@154.2
0006一手@45.9
1972一手@23.5

現金20萬中應該用幾多錢做投資？

另外如有每月月供股票應該每月供幾多較好，同埋哪一隻股適合？

目標期望5年內儲人生第一個一百萬，同埋一直想置業，但當有一百萬個時肯定樓價升到唔夠錢買樓。

仲有一個目標就係一直都好想創業，有好多想法，但好怕蝕哂d錢，所以一直遲遲未行岀第一步

我嘅目標係創業初期賺到嘅錢一部分捐岀去比有需要嘅人，我知失業率高企，好多人飯都無得食，有能力就要幫多啲人，平時每月都會買拉車仔買乾糧捐去食物銀行

所以如果創業我希望可以賺到更多錢，同時可以利用我嘅部分盈利再去幫人。感謝龔sir

龔成老師︰

你的想法很好，有能力時，我地係應該盡力回饋社會，這才有意義。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲，可以選擇一些「平穩增值股」+「潛力股」作投資目標。現有持股都合適，但電能（0006）增長力唔高，只係收下息，長線唔好入太多。

以現時大市合理區狀況，月供最好用一半每月儲蓄，另一半就先儲起架策略。

由於潛力股要求你有一定的投資知識，因此這刻不用急著投資，你可以集中在平穩增值股先。

每月用$7000去月供盈富（2800），餘下就儲起，等大跌市機會。其餘合適股票，到你對佢地有一定了解，才從中選股。

平穏增長股：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市處合理區，20萬資金，可先用7,8萬，分注咁慢慢盈富及其他平穩增長股。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

當你累積到一定資金，就可以入市買樓。若此刻資金不多，可先從小物業入手，再慢慢換成大物業。（詳細做法，你可以睇我本<5年買樓4步曲>）

至於創業，你可以從你的興趣、強項、認識的事著手。

例如你本身對某類產品很有興趣，你會在那裡買？如果你在網上買這產品，這個網站的模式如何？

初期投入唔一定要多，可以用網店模式、網上買賣這些低成本模式著手。一邊做正職，一邊創業咁試都可以。最重要係行出第一步，因為未行過，你係唔會知乜野情況。

你最初要有學習的對象，你先尋找一些自己認為不錯的商店，了解一下佢地的商業模式，最始好大型及小型都有，先以小型作學習對象，然後就試下佢地的模式，能否成為你創業的方向。

記住，最好唔好做得太雜，要專注在某一範疇，等人容易記得你。

------------------------------------------------

Q21226：

龔Sir，想請教一下。

1. 522同981有潛力嗎？可以作月供選擇嗎？如可以，那一隻比較好？

2. 另外，聽你講過3067係供股好選擇，請問現價合理嗎？

龔成老師︰

1） ASM PACIFIC（0522）有質素。

佢係半導體和發光二極管行業的集成和封裝設備供應商，為跨國芯片製造商，為獨立集成電路（ＩＣ）裝配工廠和消費電子產品製造提供半導管裝配設備及材料。

過往的生意與盈利都有增長，不過盈利有點波動，這都會令股價略有波動。長遠有一定的發展，可長線投資。現價合理區頂位，如分注小注或月供，仍可以。

而中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，也不建議用作月供選項。

2） 安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q21227：

龔sir你好。我又忍不住在反思自己的組合了，希望你能給些意見！

問題1：我現在計劃的組合比例ok嗎？（我19歲）

問題2：現在的組合內，所有都有持股，除了小米。最近見你話小米波動性大咗
（因開發電動車），我應仍選擇它嗎？（如不應該，組合比例亦會考慮調整）

我月供的金額分配ok嗎？（每月有$17000能放入股票市場）

問題3：我另外還有些以前買咗，但現在不太想加入做我的組合的股票。你覺得我對這幾隻股票的處理正確嗎？（特別是9988）

現在計劃的組合：
科技 （700, 1810） —— 22%
安碩科技 （3067） —— 30%
醫療 （1833） —— 8%
舊經濟潛力 （388） ——5%
平穩 （66, 823） —— 10%
盈富 （2800） —— 25%

一手手買股票
- 騰訊 （when drop to $520）
- 平安好醫生
- 領展
- 小米

月供股票 （至少供3年持有5年）
- 港鐵 （1k）
- 港交所 （1k）
- 騰訊 （2k）
- 盈富 （2k）
- 安碩科技指數 （每個月買1手）

組合外現持有的股票：

打算就咁擺喺到：
11恒生1手@124
12恒基162股@30.92 （放棄了月供因增值較其他慢，好似我大個啲再買翻好啲）

等賣：
883中海油1手@6.7
9988阿里巴巴2手@272 （知道有質素的，但我現在好像已有不少科技股，而個人對這股
有些失去信心） （但如果不要小米，應保留？）

謝謝你的無私幫助

龔成老師︰

1） 19歲係一個好年青架年紀，正值財富增值的黃金時期，策略上可以相對進取些。

你現時月供組合，無問題。其實恆基（0012）仍是有質素，當然增長力減少左，預期佢中短期都是弱，不過，這股是睇長線及超長線的。

如果你將來有資金多，都可以考慮月供翻佢。至於恆基（0012）和恆生（0011）現貨，可持有。

但你現有持股，有少少偏重左係潛力股，令個組合波動性略高。以你年紀，唔好超過6成。

2） 小米（1810）由新能車發展有一定不確定，故你要預佢波動性大左，但整體質素係有，你照持有係無問題。

你現時月供金額和選股，都無問題。

3） 這些股票都係有質素（包括0011, 0012, 0883,9988），唔建議你沽出，照長線持有就可以。

但留意中海油（0883）只係商品類，價格自主性低，質素只算中等，不宜再加注。

------------------------------------------------

Q21228：

龔sir，你好，本人今年46 歲，有現金 $200,000，想買公用股作長線增值投資和收息用途。
目標有：

中電（0002），煤氣 （0003），電能（0006）
請問那一隻較適合我？

龔成老師︰

若果以收息角度，中電（0002）和電能（0006）會較好。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時才46歲，都應該作一定程度上的財富增值，而唔係純收息。我建議你用「平穏增長股」，去創造一個增值平台。

現時大市只在合理區，你20萬可先用一半，分注咁慢慢儲貨。餘下一半，就等大市有明顯回調，才再出手。

------------------------------------------------

Q21229：

成老師你好呀，我現年22歲，月入21k，我學習價值投資開始了大約9月開始月供11k股票

直至現時，月供包括（均價）2800（$26.9）,0066（$41.9）,0002（$73.1）,0027（$60.1）,2013（$13.5）,0981（$21.2）,9988（$237.4），另外曾一手買入9988（$227.8）一手，0981（$20.2）一手，0823（$58.4），一手。

1.我想問一問我的投資組合風險會唔會唔太適合我這個年齡？

2.這個月供組合會唔會太保守是否需要作出轉換？

3.是否需要加大月供額？

4.我亦有儲現金作一手低位買入，如果需要買會唔會有一些建議？

我亦想好好把握黃金10年做好投資將現金轉換成資產。
謝回覆

龔成老師︰

1） 以你22歲計，係財富增值的黃金時期，可以承受較高風險。

你月供組合中的股票，大部份都有質素。但中芯國際（0981）業務有增長力，質素都有，但未必稱得上最高質。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。故此股作月供，就不太適合，或最多小注月供好了。

微盟集團（2013）財務數據的增長都強勁，但波動性較高，唔建議用來月供。

但這2隻股票現貨，你照持有就可以。

2） 我不清楚你月供供款比重，故難言是否太保守。但從選股上看，都可以。你22歲，建議你用「平穏增長股」 + 「潛力股」作組合，比例約各一半。

以下都是一些適合你月供的股票，你可以用來加入。

平穏增長股︰盈富（2800）、銀娛（0027）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。

現時大市只在合理區，每月資金唔好盡用。最好留有部份，等大跌市出現時，可以用來掃貨。

3） 最好將可以動用的閒錢，都用來投資。因為你年紀，越做累積財富，個複利效果會越理想。

4） 現時大市在合理水平，現金和股票最好各佔一半。若果你現金唔多，可以先等大跌市出現，才出手。

至於投資目標，就係我2）中所講的股票。到時你可以因應自已持股情況和股價平貴，去用現金掃入這些優質股，並長線持有。

------------------------------------------------

Q21230：

老師你好，一直以來我都係對股票投資既概念都係半桶水，直至幾年前開始睇你既書，睇你係網絡

上分享你既心得同知識，慢慢學識投資係應該長線同睇企業既價值，亦都因為你，比亞迪

令我賺咗人生第一桶金，所以好想多謝你令我感受到賺錢原來咁開心，我來緊想抽居屋

同老公買樓，但係我唔知道應該點樣分配，所以想請教老師既意見

我現在持有268金鍱，9988阿里巴巴同3067，大約總供有二十萬

現金二十萬，每月可儲蓄15000，我應該月供股票令資產增值，還是應該儲蓄現金作為首期，我想兩至三年之間可以

賺多少少，幫補買樓，希望老師能夠指點一下，謝謝老師

龔成老師︰

比亞迪（1211）係有質素，雖然股價已升了不少。但由於佢有潛力和質素，最理想係繼續長線持有。

我建議你先用股票增值，但2至3年唔算係一個長架時間，增值時要保守些。

現有持股可持有，但由於佢地波動性略高，唔建議再加注住。未來以平穏增長股作為目標，去創造一個組合。

你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

大市現處於合理水平，20萬資金和每月儲蓄，就等大跌市機會出現，才出手掃貨。

------------------------------------------------

Q21231：

大佬，我依家股票組合係咁

Stock 5, $46.3, 14000股
Stock 386, $6, 4000股
Stock 737, $3.95, 10000股
Stock 941, $74.75, 1000股
Stock 1789, $12.77, 4000股

Stock 1810, $31.75, 2000股
Stock 2333, $27.65, 2000股
Stock 2638, $6.84, 5000股
Stock 2800, $26.5, 5000股

我想問再整合一下。有冇咩股票會放左佢會好d ?

龔成老師︰

從質素上計，這些股票都係優質，可以長線持有。

但我地財富組合，除了係優質股外，都要因應自已年紀，去做相應的配置。

我地會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時這個組合，主要收息股為主，係偏向保守。若你係中年或接近退休的人士，這個組合都可以。

但當中有個較大問題，就係成個組合偏重左係匯控（0005），佢佔組合近一半。緊記，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

建議你，慢慢沽出部份，換碼至以下股票，去令組合回復平衡。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金（3110），都可以。

------------------------------------------------

Q21232：

龔sir: 早前$15入咗3手藍月亮6993，之後係咁跌，買入的時候冇考慮市盈太貴，依家又冇咩息收，呢隻可
繼續持有？還是溝多兩手平倉就沽？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

另外，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，唔係加注的時候。但此股有質素，現貨持有係無問題。

------------------------------------------------

Q21233：

成哥
本人38
我現在持有物業自住
每月可儲二萬
用作月供1177 及700
每月6000 供1177
8000 供700
其餘用作儲現金
手頭現金 約二十萬

手上持股
388 @ 451.6 100 股
700 @ 580 100 股
788 @ 1.2 20000 股
1211 @ 228 500 股
2158 @ 61.6 200 股
3067@ 17.83 400 股

6618@ 29.2 100 股 （因高位賣了接低成本）
9618 @330.7 100 股
9988 @ 255.2 300 股
2638 @ 7.2 8000 股
2800 @ 28.5 10000 股
3033 @ 8.3 4000 股
1177 及700 供了幾個月

目檟 ： 希望在十年後 有每月五萬被動收入

1）現在月供出這兩隻 可以嗎？
2）想增加潛力股 有那些值得投資十年後收成的倍升股？
3）現在持倉可以嗎？
4）想再集中儲倍升股 有沒有推介？ 例如 儲1448 及3067 可以嗎？
5）以上做法 能否做到十年後 有被動收入五萬？
6）現在倉位 會否太散？
7）178 好想買 值得現價大量入嗎 大約1.8

龔成老師︰

1） 我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時持股和月供組合，都係太偏重係潛力股。以你38歲去計，潛力股和平穏增長股最好各佔一半。否則，你個組合架波動性風險會過高。

而且，大市只在合理區，每月儲蓄最好先用一半，另一半儲起去等機會。

2） 以下股票，都係有質素架潛力股，有力可以成為倍升股。

潛力股︰中生（1177）、福壽園（1448）、小米（1810）、港交所（0388）、阿里（9988）、騰訊（0700）、比亞迪（1211）

但大部份現價偏貴，買入前要做好估值。

3） 跟月供組合一樣，偏重左係潛力股類，但情況無咁嚴重。這些股票可以持有，再利用月供和新資金，慢慢修正翻個比例。

若你想投資恆生科技股ETF，我建議用安碩恒生科技（3067），佢費用成本比3033為低。

另外，港燈（2638）係收息股，增長力欠奉，你不宜持有太多。

4） 這兩股都可以的，同時你都可以睇我本<50值博倍升股>，當中會有更多選擇，但要注意組合比重問題。

5） 要做到10年後每月有5萬蚊現金流，以股息率5%計，你需要本金1200萬。

以大市過去年平均回報10%計（連股息再投資），你每月投資$20000再加上你現有資金和持股（約值85萬），10年後大約會增值至600萬。

如果要達至你的財務目標，你要再加大投資力度。可以看看你自已的開支，有沒有一些部份可以調整來增加月供金額。

如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升。或者拉長增值年期，以助你達成10年後1200萬的目標。

6） 有少少，長線最好維持8-10隻，咁會較易管理。

7） 莎莎（0178）仍有質素，但佢已經無過往年代般的賺錢能力，同時香港的零售市道有風險，都令這股近年的表現較一般。

這企業本身在行業有一定的地位，賺錢能力不差，但就會受經濟及零售市道影響，令股價較為波動。

其實股票班我都有講這股的估值，在過往10年，自由行較為黃金年代過左，所以從估值上，無之前咁高。

佢在行業的優勢仍在，但整體行業及零售市道，無過往咁強。長遠仍有質素，這刻處合理區，但投資注碼不能太大注，亦要有耐心先有收成。

------------------------------------------------

Q21234：

請問2186 綠葉製藥 $6入左3萬股，請問前景好何？止蝕位？待覆。謝謝

龔成老師︰

綠葉製藥（2186）主要銷售腫瘤科、心血管系統以及消化與代謝三個領域的新藥品，基本上都係有市場的，其實長遠又不是太差，只是市場有時對佢的增長力會有不同。

但近年佢質素的確有少少轉弱，但相信最差時間已過，這股本身的風險較高，唔建議投資得太多。若佢佔你組合比重唔多，可長線持有。

至於止蝕位，我唔會用一個價格來定。

只會在其長線質素出問題，或者個市去到好狂熱，令個價異常地高，我才考慮沽貨。若質素不變，就算中短期出現波動，都需要太在意。

除非你持有貨太多，就建議你在反彈時減少少。

------------------------------------------------

Q21235：

龔Sir，想請教一下，我有10000股中國人壽是賺返嚟的, 我想賣咗佢, 換馬 買比亞迪, 請問你意見如何？

雖然換取比亞迪只係大約800 - 900股, 但前景會更樂觀嗎？

龔成老師︰

這些股票賺翻黎與否，佢始終都係你做財富增值的本錢，我地都要認真對待。

中國人壽（2628）並不是無質素，不過增長力唔強。同埋企業的賺錢能力不及過往年代。

長線持有價值都算有，但暫時唔好對股價有太大期望。你可以考慮沽出部份，換至其他優質股，都係可以。

比亞迪（1211）去年營業額1530億人幣，按年增長26%，而市場一般預期為1400億-$1500億。

至於盈利為$42億，比上年增長1.6倍，不過，這就差過市場平均預期的46億人幣。每股盈利1.47。

其實整個業績，都算同市場相差唔太遠，而我地分析時，最重要是長遠的企業發展。業績初步反映，新能源車的市場仍處增長狀態，動力仍在，不過賺錢能力這刻仍算好強，但當技術進步、市場規模增加、成本控制等因素慢慢出現，賺錢能力進一步提高。

預期佢2021年新能源車銷量，應該能達到40萬至50萬輛的水平，已經能獲得一定的市場佔有率，新能源車仍是增長動力，仍是正面。

反映比亞迪長遠仍是正面，不過我自己在估值上，暫時未有提高，始終這刻市場太著重前景因素，因此，這刻仍是略貴，初步保持我之前對這股的合理價，$120。如果想投資去翻$150先月供會較好。

當然，之後到比亞迪正式有詳細財務數據、年報、附註等資料，會正式重新估值，相信調高的機會有超過一半。

你現貨可長線持有，但想現時將中國人壽（2628）換碼至比亞迪（1211），我就不太建議。

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21236：

成sir，你好。小弟睇了《年報勝經》，書中提及經營現金流-資本開支＝自由現金流。

如果要搵上述資料，是不是在年報中的現金流量表就可以？

我想計算［215］和記電訊的自由現金流，可唔可以麻煩你指教一下。

以上是和記電訊的現金流量表，要計算自由現金流，應該用那一個金額計算呢？麻煩晒成sir。謝謝。

龔成老師：

佢2020年的資本開支，$5.93億

而佢的經營活動現金流，為$12.97億

所以，你只要將$12.97億減去$5.93億，就可以理解為佢的自由現金流。$7.04億。

------------------------------------------------

Q21237：

老師你好，我想請教一下買樓問題。我個portfolio入面己有70%係樓(澳洲投資物業），現已達正現金流狀態，睇個勢仲有機會升，真心唔想賣。

而我依家喺香港跟屋企住，都會想有更多私人空間，但稱不上係有迫切需要。

而我依家買樓唔係唔得，因為我人工穩定而且接近6萬，但要放晒所有股票做首期，就會變成All-in樓市既狀態

所以想請教老師，你認為我應否係香港買層自主樓？定係保持分散風險嘅原則，keep返三成股票？

龔成老師：

澳洲物業如果已有正現金流，同時質素唔差，其實可以持有

由於你這刻在香港，無太大的逼切自位需要，加上你在整個財富配置比例中，已經較集中在物業，因此，暫時你未必要好急在香港買樓。

你可以集中用股票作為投資工具，先將財富增值，到你有自住需要，又或樓市出現較明顯下跌，有明確機會時，才考慮買樓。

其實最好是，當你買樓時，只需賣出部分股票，買樓後仍有一定的現金及股票剩，就最平衡。

------------------------------------------------

Q21238：

龔sir 你好！我有個疑問：一般來講，投資股票越早越好，因為時間越長越有複利效果，而分注/月供就可以減低市場波動的風險。（我理解對嗎？）

但經過上年3月，我之前月供的股票（約供了兩年）帳面蝕咗好多，雖然我明白長線不用擔心，而之後今年年頭都升返啲

但好似輸咗機會成本，因為如果不月供而將儲到嘅錢大跌時入貨會賺多好多。

我知道老師你都沒有月供，而係耐心等機會。

咁其實我應唔應該停月供/分注，儲現金等到個市再大跌至入貨？

但又覺得留現金會蝕通脹及享受不到複利效應。我現在股票現金比例（2:1）（金額都好大下）......
謝謝

龔成老師：

股票愈早買愈好，這個大方向是不變的，當然，只限於優質股，但都要留意，這是講長期的，而中短期會波動，簡單來說，你今年買，會著數過5年後買，但如果以中短期計，只要我地能把握到買入時機，有機會在一年後的買入價比這刻好。

另外，月供是一個長期儲貨的策略，好處是平均了買入價，有效減少一次過在高位買入的風險，但缺點就是，無法一次過捉到低位。

因此，對於投資實力不足的人，利用月供是很好的方法。

但如果本身已有投資實力，能把握投資時機，有企業估值能力，其實不用月供都得，所以我自己都無月供。

而我一般的建議，都是部分資金月供，同時留部分現金，等機會，這是一個較平衡的做法。

你現時現金的比例，都可以的。

------------------------------------------------

Q21239：

龔sir，有幾個問題想問

第一，請問閱讀你12本著作的順序

第二，我已有1百萬流動資產，是否可以不去讀（80後百萬富翁）？

第三，你的二個面授課程，應分別在讀完你那本書的時候報讀？還是讀完你的12本書便無需報讀？

第四，看到你有一網上課程，你的12本書或面授課的內容可完全覆蓋到嗎？讀了你的12本書後是否無需報網課？

第五，我即將38歲，對於我閱讀你的書、面授課、網課的計畫會有建議嗎？

第六，網課會再推出限時優惠嗎？

第七，你的12本書中，相信大部分會是說「心態」、「經驗」，不會過時，但其中3本：50優質、50穩健、50值博，提及的股票會因時間而出現變化，現在或將來才買的話，會否過時呢？

龔成老師：

1）你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

2）不是，因為書都是教你累積財富，同時無太大順序的。

3）課堂大部分內容，都是無在書講過的，而一些實戰，更具體的投資技巧，都只會有課堂講述。

例如企業估值技巧、5種選股模式、選股程式的具體應用、年報分析的實戰技巧，同時會派一份6頁紙的「企業評估表」給學員，令你可以自行為企業進行有系統的質素評分。

你可以當書只是頭1、2堂的入門部分。

4）網上課程是配合《大富翁致富藍圖》的，你可以理解是書的實戰版。

5）我建議你先睇《80後百萬富翁》、《股票勝經》、《財務自由行》，然後可以上股票班（基礎班），這樣進取最大。

6）暫時都無推出特別優專。

7）《50股》的3本書，你要睇下出版日期，因為久不久會更新的。當中分析股票，因為都是一些大方向，因此無太大變化，但平貴度，你就要留意可能會變。

------------------------------------------------

Q21240：

老師，如果想幫港交所做估值，應該使用甚麼模型比較適合？

龔成老師：

你可以用現金流折現法，以及市盈率估值，如果用市盈率估值，可以用佢過往的市盈率作參考。

其實要深入進行估值，要考慮企業長遠的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21181-Q21200）

Q21181：

我晤係太清楚：股息率 / 派息率/ 實際派幾多股息 係咪三樣晤同嘅嘢？

如2800.hk 盈富基金 每手1000股 股息率 2.74% 咁即係派幾錢股息？

龔成老師︰

股息率 = 每股派息 / 現時股價 [你現價計的投資金額，所收到的股息百分比]

派息率 = 每股派息 / 每股盈利 [集團會用多少比重的盈利，作為派息之用。]

實際派息 = 每股派息 X 你持有股數 [你實際落袋的錢]

假設，盈富基金(2800)每手500股、每股盈利$5、每股派息$3、現時股價30蚊

股息率 = 每股派息$3 / 現時股價$30 [即係10%派息率]

派息率 = 每股派息$3 / 每股盈利$5 [派息率係60%，即佢每有$1盈利，就會將其中$0.6以股息派發比股東。]

實際派息 = 每股派息$3 X 你持有股數$500 [假設，你收息動作，中間無其他費用成本要扣除，你就會有$1500股息落袋]

------------------------------------------------

Q21182：

龔sir 想請教
1833 （現價$99），
2382 （現價$180）,
66（現價$44.7）

現價屬於合理區頂部嗎？

這3隻的合理價區大概是多少？

龔成老師︰

平安好醫生（1833）、舜宇光學科技（2382）算在合理區頂部，而和港鐵（0066），大約在合理區中上部。

這些股票都有增長力和質素，適合年青至中年人士。

但你要留意，平安好醫生（1833）佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況。你預佢會好波動，此股現價計，只宜小注。

------------------------------------------------

Q21183：

老師，有一事請教一下，以下係我嘅組合，請問現時我應該採取咩策略最好？

1）6690 1000股 31.16入
2）909 1000股 56.85入
3）6865 2000股 31.7入

4）968 2000股 19.1入
5）2333 2000股 26入
6）1357 5000股 3.9入

另外現金有約30萬左右。

龔成老師︰

你現時持有的組合，都係有增長力架股票有質素。若你係年青至中年人士，這組合適合你長線持有。

但你要留意翻，美圖公司（1357）佢雖然過左最差時期，現時正向好。

見佢財務數據改善，這企業仍有發展力，有長線投資價值。不過業務變化始終大，不建議佔比重太高。

現時大市只在合理水平，現金和持股最好係各佔一半。故你可以再入多少少，大約5-10萬，以分注形式去儲貨，會較好。

------------------------------------------------

Q21184：

老師 我啱啱月供股票，每月6000，供緊3328交通銀行同3690美團，意見如何？

謝謝老師

龔成老師︰

美團點評（3690）有潛力的，同時見佢增長都快，算是一隻有危又有機的股票。

由於佢不確定性偏高，作為月供股票，就未必適合。或者唔建議太大注，小注月供都得。

交通銀行（3328）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，增長力不強。月供係可以，此股會相對適合較年長和保守架投資人士。

建議你，未來組合唔好單單集中係1,2隻股票身上。我地要建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21185：

成老師，本人32歲，與女友同齡，兩人月入共7萬。上年購入現在自住的一間約800萬私樓，尚欠樓按380萬。買樓後的一年逐月建倉買入股票，現值60萬，現金還有30萬，股票倉如下：

1177 $7.1*5000
1317 $2.29*24000
0823 $59*500
0016 $91*500
0012 $29.2*1000

3988 $2.62*15000
0011 $117*300
0636 $24.2*1000
0941 $46.9*1000
0788 $1.25*40000

0857 $4.33*16000
0178 $2.33*22000
6618 $70.6*50
2238 $7.1*4000
3067 $17.67*200

1）請問股票組合買入價如何？適合我的年紀嗎？需要精簡一點去集中投資嗎？

2）我的策略是在每個月買入特價的股票，結果存了十多隻股票，請問如何抉擇集中投資還是分散投資？

3）請問為何中人壽比友邦及平保，市值差得這麼遠？前者是長期落後，後者節節上升

4）現時還可以投資車位嗎？

多謝閣下寶貴時間解答

龔成老師︰

1） 以你現時32歲計，應以增長為主要目標。中行（3988）、中國移動（0941）都係收息股，增長力不高，唔適合你。

中石油（0857）質素中等，京東健康（6618）則波動性較高，2者都不宜持貨過多。另外，你組合最好維持10隻以內，會較理想。

2） 我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

簡單咁講，就係分散不同行業的優質股，當中關聯性較少，就可以做到分散風險。

3） 市值只係一種參考，一隻股票值唔值得投資，都係要睇佢本身質素而定。

中人壽（2628）質素係有，但有下滑架情況，已經無以往咁優質。所以，市場比佢架估值都低左，因而你會見倒平安（2318）一直升，但中人壽（2628）就停滯不前。

中人壽整體質素算係中等，不宜持有太多。

4） 現時車位租金回報率唔好高，約只有3%，吸引力只屬一般。

------------------------------------------------

Q21186：

成SIR你好! 我都係80後, 但一直都無咩投資, 係十幾年前買過幾十蚊港交所, 就唔知點解放左, 就到而家都無再玩股票, 一直都抱住得過且過生活, 勁hea!

但這數月開始追你的FB和 睇你幫網友解答的無數問題, 就開始覺得自己要開始認真去投資, 就算我投資廿年, 我都未到退休年齡, 如果投資正確, 我都應該可以好舒服咁退休,什至提早退休再去享受世界! 希望而家先投資唔會太遲啦~

1. 我想請教一下, 以下的投資方案得唔得?
- 每月供$3000盈富2800
- 現有200股 3067（@17.5）, 計劃每隔兩三個月買一手
- 現有港幣約12萬, 外幣約12萬.
想用約8萬港幣買一手0001長和 + 1手1830必瘦站 + 1手1833平安好醫生 + 1手2382舜宇光學

2. 必瘦站, 平安好醫生, 舜宇光學 現價是否太貴?

3. 長和早幾年有16X, 近幾年維持$50-$60左右, 成SIR你認為佢有無機會再升返上去?

4. 現有1手 1972太古地產, 值唔值得之後再慢慢入多幾手? 定分散買其他例如港燈?

5. 同仁堂, 中藥龍頭咁滯, 但股價持續十幾年都係$4-$5, 現在買唔買得過?
感謝成SIR!

龔成老師︰

由港交所（0388）這個例子，你可以睇到，其實只要長線持有一隻優質股，個平均回報係會好唔錯。

你是一位80年人士，都算係偏年青，只要正確方法去做增值，依然會有唔錯架效果。

1） 以你年紀計，這些有增長力的股票，都係適合的。

外幣方面，如果無實際用途，最好換回港幣，用來投資增值。

現時大市算係合理水平，股票和現金最好各佔一半。所以，每月儲蓄唔好盡用，要留有部份。同時現有資金，都可以跟這個50/50比例，慢慢進行配置。

2） 舜宇光學（2382）算係合理區頂，至略貴。而必瘦站（1830）要回多1,2成，才算較合理。

至於，平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂。但好波動，你直接入貨的話，只能小注，或者用月供儲貨都可以。

3） 長和（0001）有質素的，由於歐洲弱，相信佢中短期仍會較一般，不過，長遠會慢慢好轉。

但這股並不是高增長，收息及少少增長力。要回到這個水平，可能要較長時間。此股唔係大升類別，但作為平穏增長股，係一個唔錯架選擇，現價合理，可分注。

4） 太古地產（1972）都有質素的，算係平穏增長類別，都適合你。現價合理，有長遠投資價值。

而港燈（2638）就係純收息股，增長力唔會太高， 以你年紀，唔建議持有太多。

5） 同仁堂科技（1666）仍有質素的，不過增長力比過往略減。

佢係一家集產供銷一體的高科技現代化中藥企業，通過了澳大利亞ＴＧＡ和國家ＧＭＰ認證，企業通過了質量體系認證。

佢生產六味地黃丸、感冒清熱顆粒、牛黃解毒片等著名產品。

過往生意不差，不過增長力有所減少，由於近年賺錢能力減左，股價所以向下。其實長遠仍有發展的，但就唔值得投資太大注，當小注等佢回勇不是不可。

------------------------------------------------

Q21187：

你好，龔成老師，有個好消息最近已搵到新工作，呢段時間一直睇你之前嘅書同埋文章 ，就係想準備有穩定工作之後進行適當投資。

所以希望先儲錢，然後進行月供股票。我現時每個月大概一萬9千，扣除其他洗費一個月大概可以儲起4000-5000。

而家計劃希望每月可以多兩萬蚊投資進帳。咁我分析嘅計劃如下,，希望老師可以畀啲意見：

盈富（2800） $2000
比亞迪（01211）或 舜宇光學（02382）
銀娛（00027） 或港鐵 ， 會選擇其中兩個各$1500

之後如果有多餘資金，會想入手福壽園（01448）
唔知以上嘅計劃係咪正確適合我現在的狀況

而我亦會選擇證券行因為收費較低， 因為我亦相信香港嘅監管應該唔錯。
多謝老師嘅時間！

龔成老師︰

恭喜你! 在投資和新工作上，都要保持努力。

你以上投資選股都可以，若你係年青至中年人士，這個組合和配置係合適的。

但我地一般合理投資回報，係講緊每年10-15%。若你希望以現時投入，獲得每月額外2萬投資進帳，好難做到。建議你按部就班，用優質股慢慢為你財富增值。

你選股方面，比亞迪（1211）現價偏貴，你最好等佢回到$120才月供，或者可以用ＧＸ中國電車基金（2845）暫時代替。

至於銀娛（0027）或港鐵（0066）都可考慮，你按自己喜好選就得。

而福壽園（1448），你的策略可以，但由於現價唔算平，所以要控制注碼，同時都要留有一定的現金。

至於用銀行定證券行，正如你所講，香港監管係唔錯，2者都可以。主要考慮翻邊個方便你自已，和收費問題就得。

------------------------------------------------

Q21188：

成哥，你好！我想問下 1）長城汽車，2）中國航空，3）農夫山泉前景如何。

1）28蚊入左之後係咁插，最低見過19.x，真係心都離一離，係近排炒消息升返D, 你認為
我應該止蝕定繼續長揸？

2）買佢係因為等全球復飛嘅時候可以爆升，你認為合理嗎？ （買入價6.65～6.7）

3）見佢係高位6x跌到落黎43.4就入左，開初都有賺，但放左業績之後就跌到落38.x，你認為
（半年內）有冇機會上返買入價？
萬分感謝

龔成老師︰

1） 首先，當股價下跌，你一定要了解當中的原因。基本上，股價中短期上落好正常。若無一些影響企業核心質素，咁就無問題。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值，可以持有。

2） 中國航空工業國際（0232）主要主要從事通用航空飛機活塞發動機及備件的設計、開發及生產、以及提供活塞發動機的售後市場服務及支援。

航空業復甦，的確會對相關企業正面影響。但我地投資與否，除左睇行業本身狀況，都要對企業本身質素，進行考量。

睇翻集團過去數年﹐多年出現虧損，可見佢估值較差，唔係單純因為疫情所致。暫時唔見有明顯投資價值，故不建議你投資此股。

3） 中短期架股價走勢，無人知。我地持唔持有一隻股票，應從長線投資角度去考慮。

農夫山泉（9633）有質素的。

是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。佢係中國擁有10個區域取水許可證，並在其周邊建立生產基地。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，的確有吸引力的，不過，我一向都新股半新股都無興趣，因為真實面要慢慢先見到。此股可投資，但只建議小注，同時你要明白當中的風險。

由於有一定的品牌價值，因此企業質素與發展正面，財務數據不差，生意與盈利都有理想增長，不過上市不久，股價較波動，同時上市前數據可能執靚過，因此要注意風險度。

這股適合長線的，只要佔你組合唔係好多，就無問題。

------------------------------------------------

Q21189：

老師，你好！

１）我之前 3898 分別係$39.5 & $44.5 高追, 我相信佢長遠有價值,, 但我唔識計佢值幾多,佢一直都跌,請問你有咩建議可以卑我呢?

２）有長輩係早好多年前幾乎用所以存款去買 0005,買入價＄130, 一直以股息過活

但近年股息股價都不理想，甚至無股息，生活拮据，但佢不懂股票，覺得股價同當年差太遠不願放出，即使放又唔知點做， 買返咩類型股票

請問老師有咩建議可以卑到佢呢?
感謝老師的時間！！

龔成老師︰

1） 中車時代電氣（3898）係中國鐵路車載電氣系統供應商及集成商。

佢的產品可分為兩大類：（１）車載電氣系統：包括列車牽引變流器、輔助供電設備與控制系統、列車行車安全裝備。（２）電氣元件：包括電力半導體元件、傳感器及其他相關產品。

佢主要客戶為鐵道部及其地方鐵路局、中國主機廠及城軌運營商。

佢向主機廠及城軌運營商提供新造機車車輛的車載電氣系統，以及向鐵道部的地方鐵路局及城軌運營商提供作維修及更替用途的車載電氣系統。

業務不是無質素，但增長力一般是較大的問題，企業價值無乜向上，盈利亦很普通。

整體質素只是中等，增長力不強。若你持貨不多，可照長線持有。但持貨比較多的話，最好沽出部份，換碼至其他優質股，咁會較好。

（2）至於你長輩方面，其實睇翻匯控（0005）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

用佢作為收息股係可以，相信派息方面，會慢慢回復較正常水平。由於你長輩目標係收息，故唔需要太在意個股價波動，長線持有就可以。

但成個收息組合，唔可以只有單一隻股票，咁會太高風險。要做一個全面組合，包括不同行業架優質收息股，才算係理想。

所以，如果佢太過集中在匯豐一隻股票，可以放部分轉其他，如果佢唔想這刻賣，可以等匯豐股價過多1年，經濟好翻D，銀行股經營環境好翻D，到時股價上翻D時，轉其他股。

你可以建議佢，建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金（3110）都可以。

若能承受到風險，有些更有超過8%、10%的高息股，但股價就略有風險，要自行衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理區，未到平宜，因此買入時宜分注，同時不能用盡現金。

------------------------------------------------

Q21190：

你好龔sir，我本身入左3333恆大物業18蚊，仲有6993藍月亮16.8，因為都跌緊請問可以等佢升返？

定止蝕換馬？感謝！

龔成老師：

中國恒大（3333）業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，但如果你只是小注持有，勉強可以，但都要明白風險。如果大注宜減。

至於藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，仍略貴，風險比恆大低，但同樣不建議太大注，如果你小注可守。

------------------------------------------------

Q21191：

請問老師6993藍月亮，302中手遊，你點睇呢2隻股？

書本里面提及賭業是穩賺行業，1383太陽城有投資價值嗎？

龔成老師：

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，你長線持有可以。

中手游（0302）主要於中國從事手遊發行及遊戲開發業務。佢提供多種類型的手遊，包括ＣＣＧ（可收集卡牌遊戲）、ＲＰＧ（角色扮演遊戲）、ＭＭＯＲＰＧ（大型多人網絡角色扮演遊戲）、ＳＬＧ（模擬遊戲）等。

過往生意不差，有持續的生意與盈利增長，財務數據初步正面。

不過，上市年期不算長，這會令財務數據代表性較低，同時，行業業務波動，不確定性大，都令這股造成風險。這股如果你投資不過多，小注投資都可以，始終不是無質素。

至於太陽城集團（1383）主要在中國從事物業開發、物業租賃及管理、酒店與綜合度假村管理及顧問服務、銷售旅遊相關產品以及提供旅遊代理服務。

開賭的確是好賺，但不一定是每個範疇及每間公司都好睇，持有賭牌的當然好賺，例如金沙（1928）、銀娛（0027）。

太陽城集團，當睇翻佢過往經營數據，當澳門賭場人人賺錢（疫情前時代），太陽城卻出現虧損！反映經營方面有問題，因此，這股唔建議投資。

------------------------------------------------

Q21192：

老師你好，從上年剛疫情開始看到你fb，決心做好理財及做一些兼職額外增加收入，終於儲到人生的第一個十萬！！

很感謝你，雖然我知道十萬不是很多，但對於過往月光族的我來說，已經進步了很多 （講緊2020年因為疫情，我身處的美容業是重災區，我上年只返了大概半年工，停業期間是無薪假的）

有很多問題想問你：

1）這十萬，我該如何部署投資？ 已經做了月供股票每月3000

$1000 2800
$1000 1810
$1000 1211

2）其實我還有一些銀行貸款的，每月供$1500左右，尚餘本金$28000 ，我應該提早還款還是將錢投入股票，增值後再還款？

3）我現時的工作是美容顧問，收入不穩定，有時可以月入三萬，條數差時可以只有萬幾人工，而且做得不是很開心，可能我天生不是很進取的人，不會太chur客，加上上司不是很支持我，有時都感到很大壓力。

我的目標是成為營養師，所以一直都在進修中，現時亦攻讀了online degree ，這是我一直會前進的目標。

那麼老師你認為我應該繼續留在現有的工作，為了有時賺多點？ 還是退一步，找其他較穩定的工作，或者做回美容師，然後一路讀書一路有穩定收入較好？

抱歉老師，問題比較多
謝謝你

龔成老師：

先恭喜你！第一個$10萬好重要的，之後的財富就會繼續增長，你已經方向正確，保持進行就得。

1）現時月供的，都有質素，可以保持，長期進行就得。但要留意，你現時月供的2隻，都是潛力類別，這樣會較高風險，因此，建議你之後，加大其他類別的月供，以平衡組合。

2）如果銀行貸款的利息較高，就應該先還錢，減少利息上的開支。

3）你長遠你營養師是大方向，這段時間，就保持工作，加上讀online degree，如果你支出不是好大，其實可以轉去同營養師有關的職業，可能這刻未有專業資格而人工較低，但對你長遠發展可能更加有利，預早認識相關行業。

記住，所以野都是為長遠目標而行的，你用5年、10年這方向想想，就知這刻應該做甚麼。

------------------------------------------------

Q21193：

還想問，當你比亞廸由88跌到12時，你怎知道 或 為何有信心這股一定會升回88以上？

因為你看公司每年毛利純利，股東資金回報等，知道盈利是沒問題？

龔成老師：

所謂的股價，是這刻二手市場的成交價，而我的著眼點，不是當時的$12，而是比亞迪（1211）這企業長遠的發展，這類潛力企業，一定有高有低，有時研發及產品出問題。

但我地要從長遠的角度分析，視點是5年、10年，而我分析到這企業會在行業中行前，而這行業普及時遲早的事，即是佢的發展更強大，都是遲早的事，這就是我當時的分析點。

分析潛力企業，往往不是分析當刻的財務數據，而是研發、將來的市場情況等。

------------------------------------------------

Q21194：

老師，看完你書後想看看賭業股個價抵唔抵入，看能否在疫後受惠，你怎看？

但問題幾間大賭股都沒了市盈率看，為什麼？

龔成老師：

賭業當然是有質素的行業，長遠一定有賺錢，不過現時已比上年疫情時升了唔少，上年時平，現時是合理，銀娛（0027）、金沙（1928），現價合理區中上部。

至於你話市盈率，因為佢地上年度虧損。

而我地分析時，不止要分析一年數據，要分析多年，要分析「正常經營環境」下的營運情況、財務數據。

------------------------------------------------

Q21195：

我今年43歲，十年前移民加拿大，現在政府工作，有兩個小朋友！現在每月儲$500加幣，其中$400放在穩定mutual fund，$100放在股票戶口，我想問你點睇well health? 可否月供嗎？

我想問你會唔會開網上課程？

龔成老師：

Well Health有潛力的，見到李嘉誠都有入股。

佢通過人工智能和大數據等科技手段提高診所的效率，致力于將加拿大極度分散的初級醫療市場帶入數字時代。

Well Health能够為診所提供它們無法獨立承擔成本的軟件工具，這能提高它們的運營效率，進而改善結果，以及縮短患者的等待時間。

醫生可以加入公司不斷擴張的診所網絡，合作方式可以是簽署收入分成協議，或者是直接爲該公司的電子病歷軟件支付服務費。

相信長遠有發展力，不過我唔清楚現時估值，你要自行控制注碼，平衡風險。

我最近同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q21196：

你好，請問保險股前景點樣?
2318同2628邊隻較好?
謝謝!

龔成老師：

中國平安（2318）會較中國人壽（2628）好。

中國人壽並不是無質素，不過增長力唔強。同埋企業的賺錢能力不及過往年代。

相信這股唔會再大跌，但要佢大升都不易，長線持有價值都算有，但暫時唔好對股價有太大期望。

反而中國平安近年做得更好，佢有質素，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

------------------------------------------------

Q21197：

老師，之前睇左你在牛牛節目嘅分享

跟你嘅posts大概4-5年, 知道你揸1211好耐, 但今次至知原來10年, 仲今次至知原來1211試過10幾元升上80幾元又跌番10幾元你都無放。

我21元入吉利,本已經高位跌落來至入, 入左㸃知仲跌, 無走學你話長揸, 升上30幾, 好開心, 㸃知最近跌低去番19, 又非常後悔...覺得應該高位放, 低位再入過...

其實. ...長揸, 吾放, 到想掉動大筆資金來買樓時, 又適逢股價跌番低位就真係似乎錯過良機？？
請龔sir有空指教吓

龔成老師：

你要克服心理問題，你現時的心態，仍停留在一般散戶的心態，如果你想在股市真正贏錢，就要學投資大師，不要學散戶。

投資大師只著重「企業」，不著重當刻股價，你現時被當刻股價上落影響，明顯已經錯左！

好多人事後孔明，以為能捕捉過往股價，但真的能捉到嗎？其實好難好難！

吉利（0175）有質素的，你長線就得。

但要提翻你，我地投資股票，一定要長線，5年是經常事，最少都3年，如果你想快速滾大買樓，就要調整一下心態。

------------------------------------------------

Q21198：

龔sir！！又係我啦！上年我辭左職多謝過你開拓左我對理財既思維，我依家每日都覺得好開心好有動力！

上年23歲生日前我立左目標要搵到第一個一百萬，自己將副業變左全職打理後有一排壓力都真係好大，開支大左但收入好似無咩增長。身邊朋友又話女仔咁辛苦做咩，搵個好老公咪得。

雖然灰左一段時間，但總算跨過左個難關，的確人既潛能係要逼既。雖然我唔反對我朋友所講伴侶重要性，但我覺得一件事還一件事，投資自己先係最重要。

我一直同屋企人住係公屋，我都曾經好自卑，屋企人從不理財，係月光族，依家兩老退休了都無好多積蓄。

上過你課程，睇過你書我反而「強逼」番父母每個月係我比既家用裡面扣除部分左月供：$3000盈富$2000港鐵$2000領展。仲買左本簿仔比佢地每日寫低用左幾多錢，交功課比我睇，佢地話好得意好開心每個月真係洗少左好多

最後我地離開左公屋呀，雖然我只係買左一間舊樓既細單位，但勝在上手業主全新裝修過節省唔少裝修錢。我相信呢個只係其中一個milestone，我會繼續努力希望真係5年內買到我既dream house。

要贏！

多謝既說話希望你唔好嫌多，因為你，當然我自己都有努力啦，啟蒙左我，我相信自己未來會更好的！老師，你也會的，謝謝你

龔成老師：

我相信尋找自己的夢想、事業發展，與找另一半，是無衝突的。

同時，心態上唔應該有「依靠別人，我不想努力了」的心態，我地做好自己最重要，其他人往往只是輔助。

加油！你的方向正確，同時心態很好，你23歲，已經有這種心態，可以預計你將來有可定的成就。

記住，成功的路不是直線，當中一定有相當的困難，但只要你保持正面心態，就一定能成功。

恭喜你成功置業，我會等你更多好消息，加油！

------------------------------------------------

Q21199：

你好！如果睇好電動車板塊，請問應該買比亞迪定2845 ETF 較好？咩嘢價位適宜買入？

另外，中銀香港近日績後股價報跌，請問是否現價可買入定選中國銀行息率較高？

龔成老師：

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

中銀香港（2388）係本地銀行股裡面，是較有質素的一隻，有長線投資價值。唔需要太理會中短期情況。

不過，整個銀行業的賺錢模式已有減弱，無以前咁好賺，之後主力是收息及平穩增長模式。現價合理。

中銀香港有增長力，而中行（3988）就集中收息，要睇你的投資目標。

------------------------------------------------

Q21200：

如果我現在差不多30歲 是否該選擇3319？另外請問823和3319是否都屬同一類 是物管？

現在科技股很多都下跌 是否應該開始物色優質科技鼓？謝謝

龔成老師：

雅生活服務（3319）適合30歲這年齡人士投資的，佢本質不錯，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理區中上部，不過股價都會有時出現波動，投資宜分注進行。

佢是物業管理，領展（0823）是收租，不同類的。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟，不同行業，不用類股都要有。

而同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。