隻狗幫我追女神（下） . 旺財開始講：「我主人有夜盲症，燈光太暗，佢就幾乎睇唔到嘢。」 . 「夜盲症？我冇聽過呢件事啊。」我好意外。 . 旺財話：「有病唔醫係唔得嘅，你研究吓有咩辦法幫到佢啦。」 . ， 旺財又講：「仲有，我主人好憎細路。」 . 我更加驚訝：「我見佢成日同親戚嘅細路玩，擺相上IG，好似好鍾意小朋友咁。」 . 「梗係啦，鍾意小朋友形象正面嘛，但佢一個人嗰陣，見到細路都會避開。」旺財解釋。 . ， 旺財加多一點：「仲有，主人鍾意肥佬。」 . 「吓？」我目瞪口呆。 . 旺財咁樣講：「你估唔到哩，我哋樓上有個肥佬，主人每次見到佢，都會同佢冇嘢搵嘢嚟講，可惜人地唔多理佢。」 . ， 夜盲症、唔鍾意細路、鍾意肥佬……呢三點都超出我嘅預期，我甚至有懷疑，旺財係唔係呃我，唔想我追到芸芸。 . 但轉念一想，如果我冇旺財幫手，我追到芸芸嘅機率本來都好低，旺財應該冇必要呃我掛。 . 我決定搏一搏，照旺財所講去做。 . ， 我一方面努力增肥，一方面收集咗一啲有助醫好夜盲症嘅食譜、藥材。 . 等到芸芸旅行完番嚟，要接走旺財嗰陣，我就順勢將啲食譜藥材畀埋佢。 . 芸芸望一望：「咩嚟㗎？」 . 我好婉轉咁講：「就係令你夜晚對眼都會……明亮啲嘅嘢。」 . ， 「吓，我冇病喎，唔駛食藥。」芸芸想將啲嘢還畀我。 . 我當然唔肯接，芸芸翻咗個白眼，就將啲藥材丟晒落垃圾桶。 . 我冇怪佢，我知道，佢係唔想人地知佢有夜盲症啫。 . ， 自此之後，我成日寄啲夜盲症藥材畀芸芸。 . 但芸芸冇咩反應，我決定再搵旺財打探吓消息。 . 我喺芸芸屋企附近徘徊，終於撞到放狗嘅芸芸。 . 佢一見到我，就皺晒眉頭：「你肥咗咁多嘅。」 . ， 旺財就大叫：「你都變咗肥佬啊。講你知先，你寄嚟嗰啲嘢，主人都丟晒，我都唔知點解。」 . 我皺皺眉頭，可能夜盲症呢一點係錯嘅，但至少我仲有「鍾意肥佬」同「唔鍾意細路」兩項情報。 . 眼見芸芸正要離開，我衝口而出：「其實我覺得，結咗婚之後，唔生小朋友都唔緊要。」 . 芸芸隨口答：「呢個係你嘅自由，我就好鍾意小朋友啦，第日一定要生。」 . ， 我望向旺財，一人一狗，四目交投，大家都呆咗。 . 我忍唔住問：「你唔係……行街見到小朋友都會避開咩？」 . 「你講咩啊？」芸芸一頭霧水，然後望向旺財：「哦，旺財咁大隻，放狗嗰陣，我怕嚇親小朋友，或者小朋友衝上嚟激親旺財，咁咪遠遠避開啲小朋友囉。」 . ， 我又問：「你都唔鍾意肥佬？但你成日同樓上個肥佬搭訕。」 . 「我樓上住咗個獸醫，係有啲肥，我諗住同佢打好關係，咁旺財有咩小問題，我都可以免費請教吓佢。」 芸芸覺得好奇怪：「呢啲嘢，邊個話畀你聽㗎？」 . 我指住旺財，火冒三丈：「佢講㗎，佢仲話你有夜盲症！」 . 「狗識講嘢？係咪你有妄想症啊。」芸芸撇撇嘴。 . ， 我無言以對。 . 芸芸諗咗一陣：「不過，如果旺財識講嘢，可能佢都會以為我有夜盲症。」 . 我完全唔明。 . 「我唔想旺財夜晚太興奮嘛，所以熄咗燈之後，旺財再嚟嗲我，我都會扮睇佢唔到。」芸芸咁樣講。 . ， 謎底已經解開，我同旺財面面相覷。 . 旺財冇講大話，但呢三項「情報」，都係由旺財得知嘅情報，再加一隻狗嘅理解能力而判斷出嚟。 . 「真話」同「真相」，可以完全相反。 . ， 大家都以為自己知道真相，但每個人所理解嘅「真相」，都經過自己嘅思維過濾。 . 哪怕同一件事，唔同人都會產生唔同嘅理解。 . 結果，我哋知道嘅，未必係錯， . 但我哋知道嘅，好可能只係真相嘅一部份。 . －完－ . #短故 #短篇 #小說 #陳美濤 #廣東話 #粵語 #tomatochan #隻狗幫我追女神