【追蹤 MarketFocus 看更多詳盡財經及投資分析】【#BF投資焦點】【真股災】恒大危機惡化內房崩潰 金沙下瀉 港股再挫400點跌破2萬5

內地針對科網股、內房股的監管措施層出不窮，昨日澳門又推諮詢文件準備嚴厲監管博彩業，令市場氣氛完全崩潰，恒指今晨最多跌超過400點，2萬5關口徹底失守，兩日內下跌千點。其中陷入2萬億債務危機的恒大，內地足球隊陷解散邊緣，其公司債券又突宣布停牌一天，投資者恐慌下今股價再大跌逾8.5%，低見2.57元新低，不少內房股被拖累，跌幅亦達7%；濠賭股金沙（1928）昨大跌逾3成後今再跌近6%。連領展及中電等傳統亦跌1至2%，滙豐40元心理關口失守，除了部分資源股如石油股外，散戶近乎無險可守。

美股反彈，道指升236點，港股今早原輕微高開，恒生指數開報25042點，但之後急瀉不止，大跌超過400點，低見24631.63點，最大跌幅1.6%，之後仍在低位徘徊。金沙 （01928） 昨挫逾三成後今早續跌5.9%，低見15.84元；另一濠賭股銀娛（0027）則反彈2%；騰訊（700）、美團（3690）跌逾1%；油價造好，中石油（0857）曾升近3%至3.81元破頂。

恒大（3333） 跌幅擴大至逾7%，破底低見2.57元；恒大物業 （06666） 跌半成；恒大汽車 （00708） 一度跌逾12%，股價低見3.4元。恒大地產集團16日早公告，恒大地產目前所有存續的公司債券自16日開盤起停牌一個交易日，於17日開盤起復牌，復牌之日起上述債券交易方式發生調整。

內房股受累全面下瀉，剛除淨的中海外 （00688） 跌3.6%；潤地 （01109） 跌近4%；雅居樂 （03383） 破底跌近8%；碧桂園 （02007） 破底跌逾3%；融創 （01918） 破底跌半成；世茂（00813） 跌逾4%破底。

傳統避險股亦失靈，領展（823）低見66.35，最多跌2.4%；中電（0002）亦創一個月低位，低見75.9元，跌1.4%，故散戶今日可謂損失慘重。

Text by BusinessFocus Editorial

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。
—————————————————
【TapNow玩樂著數優惠】
K11 ARTUS海景套房Staycation優惠!
連雙人早餐 + 下午茶【 bit.ly/3Ch7pSU 】

南豐紗廠 EONIQ手錶組裝工作坊
心意禮物之選【 bit.ly/3xrEjN9 】
—————————————————
了解更多最快最新的財經、商業及創科資訊，請追蹤
Instagram:www.instagram.com/businessfocus.io/
—————————————————
追蹤 MarketFocus 看更多詳盡財經及投資分析
—————————————————
時刻接收市場最新資訊，請追蹤Telegram頻道：
t.me/businessfocusofficial
—————————————————
請於本專頁cover photo下方，按『Following』按鈕然後選擇『See First』
—————————————————
若有任何商業、財經及科技資訊的新聞稿，歡迎
Inbox或電郵至info@businessfocus.io！
廣告合作請電郵至sales@businessfocus.io
—————————————————
如果你對初創、商業及科技界有所見解，敬請投稿
至info@businessfocus.io
訂閱BusinessFocus YouTube頻道：
www.youtube.com/channel/UCzZszEpbE87Mfh-q7D472BA
歡迎"Join" BF討論區暢談財經、商業及創科話題：BusinessFocus.io 討論區-¬¬¬

【龔成問答信箱】（Q22401-Q22420）

Q22401：

Hello 依家溫緊進階班第5堂 notes 你話如果附屬公司多而且比較接近50％ or 小數股東股益較大 個純利率會扭曲左

想問下幾多間附屬公司先為之多。同樣 小數股東股益點樣先為之大 例如佔左總盈利既某個%就叫大？

龔成老師︰

我地要估這個調整，主要係因為當集團對附屬公司持股，較接近50%時，即附屬公司盈利中，有不少比重非有集團所有，令計算出來的純利率出現偏差。

所以，我地有時係會唔扣"非控股權益"，直接用盈利(而非股東應佔溢利)去除營業額，去計算純利率。

但我地唔需要一見到"非控股權益"有數字，就去做這個調整。因為有時個數字好細，當你調整後，發現純利率其實無明顯變化。

所以，你預"非控股權益"大於"盈利"10%，我地才會對純利率進行調整，令佢數字更能反映真實情況。

------------------------------------------------

Q22402：

你好請教1928，見佢近期弱左，如靠債去還債，賺到的利潤都會被利息蠶食。

派一次中期息都要10億美元，好難想像何時內可以做到。

還未計續牌等政治風險，以你的專業分析點解可以對此企業有咁堅定信心？


龔成老何：

金沙（1928）風險度的確增加左，但投資者分析時，不要將中短期因素太過放大，其實只要澳門疫情穩定翻少少，其實就無事。

睇翻上半年，金沙中期經調整物業EBITDA 2.34億美元，銀娛都是EBITDA有正數的，反映如果唔計會計因素，佢是有錢賺的，除非疫情惡化，否則，佢無問題，而我地從投資，是投資企業的長期，不用將當刻的短期因素太過放大，同時佢持有的資產好有價值，要融資都十分容易。

至於政治因素，的確有少少，但如果從「澳門政府想那些博企續牌的角度」，就是金沙、銀娛，這是從就業、澳門發展等的角度去分析。

------------------------------------------------

Q22403：

你好。想問9926同2878點睇，9926跟人買跌左十元。點算，唉。守唔守好

龔成老師：

康方生物（9926）你預佢上落會較大，不宜持有太多。

主要從事生物製藥業務，專注於腫瘤學及免疫學治療領域。

佢候選藥物例如有ＡＫ１０４：適應症包括子宮頸癌、肝細胞癌、食管鱗狀細胞瘤、胃癌、非小細胞肺癌、黑色素瘤、晚期實體瘤、外周Ｔ細胞淋巴瘤；預計於２０２１年下半年在中國提交治療子宮頸癌的首次ＮＤＡ（新藥申請／生物製品許可申請），及開始在美國進行治療晚期或轉移性實體瘤的Ｉｂ／ＩＩ期臨床試驗，以
及聯合治療實體瘤的試驗。

這企業現時是投資期，回報要慢慢先見到，不過，這股估值十分難。因為無實在的收入與盈利進行計算。

只可以話，風險較高，是有危有機的類別。投資注碼一定不能大。

如果持貨，小注，長線，不是不可。投資得就一定長線，等佢長期回報。

如黑持貨多，宜減。

晶門半導體（2878）都算有長線投資價值，佢係一間無晶圓廠半導體公司，主要從事設計、開發及銷售專有集成電路晶片產品及系統解決方案業務。

佢的產品及方案可供應用於智能手機、平板電腦、電視╱顯示器、筆記本電腦以及其他智能產品。

雖然都有一定的生意，但多年來都出現虧損，到近年才算好轉。行業需求對佢是利好的。

這企業質素未算好高，因為技術未算好強，這股如果持貨不過多，都可守住先。

------------------------------------------------

Q22404：

我想請教你
2869在11元買入
1313 在 9.9買入需止蝕嗎？

我知3319/1313是優質股可以守，2869是優質股嗎？
多謝阿sir解告令我心態有改變

龔成老師：

綠城服務（2869）仍算有質素的。佢為中國高端住宅物業服務供應商，提供以下三類服務：

（１）物業管理服務：包括保安服務、保潔及園藝服務，以及物業維修及保養服務。

（２）顧問諮詢服務：包括在建物業服務（示範單位管理服務及建築工地保安服務）及管理諮詢服務（於項目設計及開發階段提供物業開發諮詢服務，以及於物業交付後提供各種物業管理諮詢服務）。

（３）園區增值服務：包括園區產品及服務（購物協助、拎包入住服務、交通服務、文化教育服務、房屋返租與置換服務及二手房交易的經紀服務）、家居生活服務（物業維修及保養、家政服務、保健及娛樂），以及園區空間服務（出租廣告空間，並提供廣告設計、製作及出版服務）。

過往發展不差，業務有增長，現價合理區中上部。

這股都可以守，但你預佢中短期會有少少波動。

至於另外兩股，都可持有。但你較集中在內地地產相關行業，小心行業集中風險。

------------------------------------------------

Q22405：

如果我40歲，加按d錢出嚟投資會唔會有風險？謝謝你的意見

龔成老師︰

以你年齡可承受的風險程度(以你年紀，建議總負債，最多只可以佔總資產6成)，加上現時仍處低息期，加按是沒有問題的。

關鍵是加按後，將資金買入其他資產，創造更高的回報，由於加按是要支付利息的，所以新資產產生的利息回報一定要比加按的利率高，這樣才值得做。

最好有比較明顯的息差回報，這樣才能抵銷加按後，加大負債為你所帶來的風險。因此，你加按前，最好先計劃如何分配新資金，如何平衡風險，怎樣說服自己獲得理想的回報，即是有充分的理由，而非為加按而按。

若是投資於股市，相信中低風險會較合適，公用股、內銀股、收息股、房託等，都可考慮，策略為長期的增值及收息，期望股息回報大於加按利息，這樣就值得做。但絕不建議炒賣等方式投入股市。

------------------------------------------------

Q22406：

到目前為止，我們現住的村屋政府還沒有任何收地計劃。估計還可以起碼多住十年八載。我想得到一些資料關於鄰近地區政府收地價、土地私人買賣價錢等資料，

從而比較一下地主開出的價錢是否合理。請問以上資料可以從哪裏得知呢？謝謝你的幫忙！祝生活愉快！

除了以上住屋問題之外，從二月至今，已分段買入以下股票合共約200,000。(之前打算用1,000,000投資，其中500,000分注入市及月供股票；

其餘500,000手持現金等大跌市才大力度掃貨)，請問暫時這個股票組合是否合適我？分注買入速度又是否過急呢？

66 - 43.50 （12.3%）
1658 - 5.70 （9.6%）
1928 - 29.20 （13.2%）
1972 - 22.90 （12.9%）

2800 - 27.80 （7.8%)
3067 - 17.60 （19.9%)
9633 - 56.80 (12.8%)
9988 - 198 (11.2%)

另外，月供股票方面也開始了兩個月。分別月供以下股票。月供股票因為剛開始，未有計算在以上。

2800 - $3000
27 - $2000
66 - $1000

請問以上我的股票組合是否潛力股方面佔約40%太多呢？之後再分注買入的資金，我會偏向平穩增長股及收息股。請問龔sir有什麼股票建議加入我的組合呢？

以上問題太多，不好意思。希望得到你的抽空回覆。祝身體健康，生活愉快！

龔成老師︰

你可以去田土廳和地政總署，可以睇到交易金額和一些補償計算資料，你可以用來參考。

你現時持股和月供計劃，大致上係可以。但安碩恒生科技(3067)和阿里巴巴(9988)係潛力股，這類股票以你48歲，最多佔2成左右好了。

未來時間，就正如你所講，要偏向平穩增長股及收息股，去慢慢拉低翻潛力股比例，以免風險過高。以下都是一些合適選擇，現價都合理，你可以參考下。

但緊記唔好偏重個別企/行業，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時你投入了1/5資金，這個比例係可以。當再出現多10-15%左右回調，就可以再加下一注。而另外50萬，但等大跌市出現，才分注入貨。

------------------------------------------------

Q22407：

1) 龔sir , 想問一問關於美股TLRY , 持有半年虧損接近40% , 應繼續持有還是止損，能幫手分析一下嗎

2) 龔sir, 6993 係米仲可以持有 ,仲可以守

龔成老師︰

1) Tilray Inc (TLRY)從事是一家從事製藥業務的公司。該公司是一家向藥品分銷商供應大麻產品的供應商。

大麻股過往曾是熱炒對象，過去一年波幅好大，由$5至到$67。上市後，更曾經升至$300，可見這隻股票，有一定投機味道。

我自己無仔細研究過大麻行業和相關股份，但從佢財務數據睇，上市後收入係有明顯上升，但依然未能達至收支平衡。

因此，此股現價不少部份，係來自投資者對"將來"的睇去。只要未來前景稍有偏離，你預佢會有較大幅調整。

此股唔係話無投資價值，但確定性較高，只宜小小注。

2) 藍月亮（6993）不是劣質，但最新業績令人失望，由於上市前的數據幾靚，因此，有可能佢上市前執靚盤數，這亦是我對新股/半新股有保留的原因。

佢最新的中期虧損約$4400萬元，去年同期純利約$3億元。虧損主因是市場上，其他平台出現過剩的較低價產品，導致佢定價策略及產品在市場上的價格體系受到干擾。

為統一產品在市場上的定價，佢向其客戶提供若干折扣以穩定產品的市場價格，此類折扣對其於上半年的毛利率產生約9%的負面影響。

相信中短期未必強，但長遠，其實又不算好差，佢成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一。

整體有質素，不過之前貴，現價算是合理區中上部，如果你小注持有都可以。

------------------------------------------------

Q22408：

龔老師你好，我想聽一下老師的意見.本人可承受高風險。

1. 持有1257，20,000股平均價3.4。現價掉到2.77左右，應否繼續持有或減持?

2. 持有1448，6,000股平均價7.02。現價7.42應否增持?

還是增加其它平衡增長股?

龔成老師︰

1) 中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值。但不建議太過大注，始終都有風險，同時可能仍會弱一段時期。你明白這些風險，你照長線持有係可以。

當然，若你持股佔組合較多的話，我比較建議你沽出少少，去平衡翻個風險，咁會較好。

2) 福壽園(1448)有質素，現價算合理區頂，如果你現貨佔組合比重不多，或者資金較充裕，現價可以再加小小注。

否則，你等佢回多10%左右，才再加注會較好。

以下增長股，都適合你30歲年紀，你可以參考下。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、粵海(0270)

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22409：

真的衷心感謝，讓我瞓吾著幾日不斷思考過去錯在哪！同時，我並非抗拒買股票，亦十分認同你價值投資的方法。

我從不同category 選了一些之前心儀的和你推薦的選一至两隻，想把台灣現金調回來建立一個組合，比D意見？

銀行-滙豐/恆生/中銀3988（但PE 4倍不到，好似鬼鬼哋）/citibank
地產 - 恒基/新世界/置富
科網-阿里/騰訊/MSFT
手機-小米/舜宇/瑞聲
網絡-電盈/香港電訊/移動

電車-比亞迪/中國電車/雅廸
公共-地鐵
醫療-和黃醫藥/平安好醫生
零售-佐丹奴/六福/周大福
休閒-金沙/銀河
指數或基金-2800或3086華夏納指

建倉用80至100萬，留150萬現金等。

有點長，抱歉！

老實講，我清楚年齡影響可承擔的投資風險，只是希望在還有生產力（10-12年）間，除完成兩個小朋友在外地讀完書和以後照顧到自己已滿足了！

龔成老師︰

以你48歲年紀，我唔建議太進取。你可以用恒基(0012)、地鐵(0066)、金沙(1928)/銀娛(0027)、六福(0590)/周大福(1929)、指數基金作為核心，為組合提供平穏增值能力。

之後，再配以一些收息股，好似滙豐/恆生/中銀3988、置富(0778)、佐丹奴(0709)。

中行(3988)和一些內銀股，你會發現地市盈率都係好低。因為市場覺得佢地壞帳潛在風險大，所以市場唔會比佢地個市盈率太高。

最後，若果你想個增長力強少少，可以加入一些潛力股，例如阿里(9988)、騰訊(0700)、比亞迪(1211 - 但現價偏貴，可先用2845代替)。但由於潛力股風險較高，總額不要高於組合2成。

現時大市只在合理水平，先用80至100萬建倉，再另留150萬現金等大跌市機會，係可以。

若你想加快增值速度(但會承受較高風險)，你可以調高少少潛力股和平穏增長股比重。

否則，你這個年紀，我建議按潛力股/平穏增長股/收息股(20/40/40)的比例，會較穏當。

------------------------------------------------

Q22410：

龔成老師, 你好~ 本人35歲, 月入2萬幾, 60萬左右, 買了以下股票~ 月儲萬五至2萬左右~

買了以下股票, 但一直持續跌勢, 雖然以下股票都是有質素的, 但.. 某些股票仍需要賣出先止蝕嗎? 謝謝!

另外, 怎樣可以增加財富呢.. 因有可能10年後便跟小朋友去外國讀書, 相信在外國對於我來說, 不易搵工作… 買那些股票是比較隱陣呢, 謝謝!

700 騰訊 買入: $616 x 400 (現價約: $537)
1211 比亞迪 買入 $157 x 500 (現價約: $218.
388 港交所 買入: $437.5 x 200 (現價約: $531.5)
2800 盈富 買入: $28.43 x 3000 (現價約: $27.72)
3690 美團 買入: $290.30 X 200 (現價約: $268.80)

9988 阿里巴巴 買入: $223.8 X 100 (現價約: $202.60)
1398 工商銀行 買入: $5.33 X 3000 (現價約: $4.39)
1810 小米集團 買入: $24.75 X 400 (現價約: $26.
1972 太古地產 買入 $23.10 X 400 (現價約: $22.95)

1177 中國生物製藥 買入 $7.44 X 1000 (現價約: $6.99)
3067 安碩 買入: $17.12 X 300 (現價約: $15.28)
2638 港燈 SS 買入: $7.61 X 500 (現價約: $7.80)
3088 華夏恆生 買入: $10.34 X 200 (現價約: $9.22)

龔成老師︰

你現時持股都係有質素，你唔好太比個買入價或者大市氣氛影響，令你做出錯誤決定。緊記只要係有質素，長線投資價無轉壞，就算股價下跌，我地都應該照持有。

由於你尚有10年時間，用以上股票去增值，都係可以。

但有個較大問題，你而家太偏重左係潛力股(0700, 1211, 0388, 3690, 9988, 1810, 1177, 3067, 3088)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

但你唔需要減持任何股票，只要未來時間，加大翻平穏增長股部份，令組合慢慢回復平衡，咁就可以。

平穏增長股：指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

但到10年後，你要移居外國，你可能會需要穏定現金流，去支援生活，多於財富增值。

那時候，你可以將部份股票，慢慢換成收息股，用股息收入，去減輕你生活負擔。至於比重多少，你就按自己實際情況而定。

------------------------------------------------

Q22411：

龔 sir 您好！又要打擾您！有關一些資產問題希望您可提供一些意見。

本人有一層剛供完的樓，由於預計子女在未來五至八年後會移居外國 （他們已有當地護照），所以我希望在當地置業。但由於疫情關係，

暫時不能往來外地親自考察當地不同區域的環境，而我又不想只靠海外agent 隔山買牛，所以暫時對於將要付出的金額只有很初步的概念。

現在問題是，我應否在此期間先翻按現在的居所，先keep 錢向手，再等時機去用這筆錢於海外買樓（根據疫情，有機會我要兩年左右才真正落實買到，

甚或如果到時樓價因大量移民而飛升, 海外置業計劃亦可能泡湯）

另一考慮是，我自己工作的房屋津貼將會屆滿，人工也已經到了max, 所以翻按的還款能力會降低，我應否take risk 仍然去翻按 （因市場常有消息指高息時代很快重臨）

不好意思，可能說得有些亂。盼龔sir 比D意見

龔成老師︰

你2個問題，都係建基於一些假設性結果(外地樓價大升/環球息口大升)，但這些結果，到底會否成真，幾時會成真，無人會知。

我地係投資時，係唔應該用"估"去做策略。我地係因應現時情況，平衡各方利弊，去找出一個較可行方向。

由於你子女尚有5-8年才會移民當地，有一定時間。你而一刻其實唔需要急住買當地物，除非你好有信心，長線當地升幅，一定會跑嬴香港樓，咁就另作別論。

至於翻按，你就要一直支付利息開支成本。但你又未知幾時先買外國樓。如果到時外國樓升幅不多，可能這筆錢跟本用不上，你就白比利息。

我建議你先計劃清楚，如果你擔心到時賣左香港樓，都唔足夠你買外國樓。你可以把握這5-8年，用優質股去增值財富，令自己有更多資金可以動用，減少到時的不確定性。

------------------------------------------------

Q22412：

老師，我上了堂， 計算了00698 通達之估價為

市盈率9-12
保守盈利預測0.05
市值股價約$0.45-0.6

不知道為什麼，00698的估價跌了很多，我之前已經減持了很多，上堂後覺得此公司不優質，但還有少量貨，不知道如何處理剩下少量貨，約40000 股，請老師指導

龔成老師︰

佢過往市盈率大約係9-10.5倍，但由於佢質素唔係咁高，我會再打折扣，下調至6-8倍左右。

而每股盈利，可以用佢過去10年平均，大約HKD0.09。

合理價︰HKD0.54 - 0.72。

但要留意，通達集團（0698），只是不過不失。

佢主要從事電器產品（包括手機、手提電腦及其他電器產品）零部件生產；為電子產品及電器提供金屬外殼及其他五金部件；及提供塑膠機頂盒及生產體育產品。

現價計係偏平，但由於質素只係一般，唔值得持有太多，勉強可長線。若40000股只係佔你成個組合，一個好低的比重，你照持有係可以。否則，當有反彈，就要再沽多少少。

------------------------------------------------

Q22413：

老師,其實etf回報係唔係理應回報多過投資個股? 我見差唔多全部etf股價都係步步向上,好似無邊d係大起大落 或者 長線向下? 想問下呢個係ETF特性?

問題二. 想請問下一我地係咪應該買ETF好過買個股? 一般人理應唔會下下買中倍升股,但係etf就基本上股價係一直向上? 長線好小跌?

謝謝你的寶貴意見

龔成老師︰

1) 唔一定，因為ETF係一籃子優質企業，可以係追蹤一個股票市場、一個行業、或者特定產品(如黃金)。

以盈富(2800)這隻較為人所熟識的ETF為例，佢係追蹤恆生指數，等同買入58間優質企業。

但當中有潛力股，有平穏增長股，也收息股。若你用當中的比亞迪(1211)為例，佢近2年一定係跑嬴盈富(2800)。

但如果你用中國人壽(2628)做比較，佢就明顯係跑輸恆指。所以，ETF唔一定係跑嬴個股。只係佢較有風險分散能力，令個整體回報相對穏定。

2) 如果你係初階投資者，不懂選股，但又睇好個別市場，ETF就會係一個唔錯選擇。

因為佢係一籃子股票，就算當中有些股票，表現未如理想，但只要大市或者相關行業係正面發展，你都會享受到成果。這就是分散風險，有利之處。

當然，如果你係買中一隻較具潛力的企業，升幅係有權優於ETF。但若投資個股時，你選擇錯誤，係可以大市/行業升，但你個隻跌。

------------------------------------------------

Q22414：

龔成 我係你fans 有買你啲書 亦曾經係你股票班學生 不過喺度好想同你講聲對唔住 我覺得自己好似辜負咗你咁 因為你當初教嗰套信念我無好好記住

搞到依家由賺錢變倒輸 初初我齋買港股都好哋哋 後尾學人買美股 賺咗少少之後就開始心雄 再玩埋沽空 結果依家輸到損手爛腳 我好嬲我自己

當初嫌你嗰套賺錢慢 於是就不知不覺好似走咗入賭場咁 仲要唔識走 越賭越大 到依家諗返轉頭 原來你一路教嗰套先係最穩陣 雖然唔會一夜致富

但最終一定有收成 依家我down得好緊要

近排工作 前途 甚至依家股市 無一樣嘢順利 好似時不與我咁 唔知點樣走出呢個困局…

龔成老師︰

其實，有唔少人都會因為短炒成功幾次，就會心雄，只後走上短炒之路。這就是點解我成日Q&A度提讀者，以前做證券行個陣，見短炒個班，可能會短期賺，但長遠都係輸晒架原因。

我地投資要成功，除了要學好一套投資方法外，經驗、自律性和心理素質，都係同樣重要。

有些人，本身心理素質好穏定，可以好好地操作個長線投資計劃。有些人，要好像你有一樣，要有所經歷才會明白。但重點係，這2種人最終都會走到財務自由之路。原因是，他們都"學懂"了。

你現時才34歲，依然很年青，只要你現時開始用正確方法，去創造你財富增值組合，係一D都唔遲。

而且，你比其他人經歷更多，對未來操作"真正"大升大跌市時，你心理上優勢，係會更加明顯，這都對你長線投資有利。

所以，你現時要做，就係收拾心情，做你應該做的事，一切自然慢慢會好。加油!!!

------------------------------------------------

Q22415：

老師，我手持幾隻蟹貨，可唔可以strong hold 牙？

3692 $33.1 2000 shares
2160 $16.7 5000 shares
1913 $55.5 500 shares
873 $24.7 3000 shares

謝謝

龔成老師︰

持有與否，你要睇翻企業本身有無質素。如果無，就算唔係蟹貨，係賺緊錢，都要減持，甚至係沽出。

微創心通醫療科技（2160）和翰森製藥（3692）不確定性較高，近期中央相關政策，令佢地風險高左，故暫時不要再加注。

普拉達（1913）有質素的。

佢係全球時裝及奢侈品集團之一，透過Ｐｒａｄａ、Ｍｉｕ　Ｍｉｕ、Ｃｈｕｒｃｈ’ｓ　及Ｃａｒ　Ｓｈｏｅ品牌，從事設計、生產、推廣及銷售高級皮具用品、成衣及鞋履，以及透過特許協議提供眼鏡及香水。

有一定的品牌價值，但都較受經濟週期情況，你預佢中短期都會較波動，這股有長線投資的價值。

世茂服務（0873）由世茂集團（0813）分拆上市，業務有（１）物業管理服務（２）社區增值服務（３）非業主增值服務。

睇翻佢過往的財務數據，基本上都正面，業務不差同時有增長力，不過上市年期不算耐，因此參考價值會減。

股價上落較大，要注意風險。這股都有質素，有長線投資價值。

------------------------------------------------

Q22416：

龔sir, 睇而家個勢6088同788前景如何。6088坐緊3.48，788坐緊1.44

1858之前40入跌到20放埋一邊冇理到 點知前排彈咗一彈上30 好後悔冇溝 係咪繼續坐吓等

龔成老師︰

唔好用買入價，去決定是否持有一隻股票。我地要睇的是企業質素，只要佢有長線投資價值，中短期帳面虧損，唔係咁重要。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，但預期長遠的增長力只是中等。若你持貨不多，可以守。

中國鐵塔（0788）質素無大變，但你預佢增長潛力同幾年前相比，會係弱左。整體而言，都有長線投資價值。

春立醫療（1858）長遠有發展的，但本身佢股價和盈利，都係較大上大落。你現貨照持有，只要唔係佔組合太重比例，咁就可以。

------------------------------------------------

Q22417：

老師點睇1024快手？佢差唔多每曰都跌，有投資價值嗎？現價$142是否仲係貴既水平？

問題2，另外今個月開始每月會買1手你書中介紹的潛力股1833（平安好醫生），用老師上堂教的估值計是合理價，現價吸引，會持續1年至2年買入，佢升到咩價位應該停買？

想問請如何操作？老師又覺得e家1833是處於咩水平？

龔成老師︰

1) 快手(1024)之前貴，現價開始合理，大致在合理區中上至頂。近期受大市和中央政策風險所影響，有較大回調，但本質上無太大轉變，有貨可照持有。

2) 平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區中間位。

但好波動，你每月買1手，去平均個價格，係可以。但此股始終不確定性較高，不宜佔組合太多。

如果一個月買一手，會令佢佔你組合比例過重。你可以更改為月供，或者隔開多少少，例如每2,3個月才買一手，去平衡。

------------------------------------------------

Q22418：

龔sir，我有個理財問題想請教你，我手上有兩個物業出租，一個已經供完每月收租金$11500.00，

另一個仲有20幾年要供，每月租金收入$12500.00，租金可以cover供款和物業管理費等支出。

我的問題係我自己住的單位是租的，每月扣除租金收入後還需要付$20500.00。

我上完你初階股票班後一直思考，我係咪應該把手頭上兩個出租物業賣出，先幫自己買入一個自住用的物業來減底支出呢？

謝謝！

龔成老師︰

其實都唔一定，因為香港買賣樓宇成本唔細，你這個變動，可能要用你唔少錢。你可以主要考慮翻，邊個方法可以令你有更在資金空出，作投資增值之用。

如果你現時置業，反而令你每月投資優質股資金少左，其實係成個配置角度，就未必值得咁做。

當然，長線計你照好都持有一個適合自己長線生活需要的物業，但唔需要過急去進行。

你現時持有2個物業，若都有一定質素，你可以照持有，用佢地來資產追資產，平衡樓市波動的影響。

另一邊，你繼續用優質股去增值，到你可以做到買自住樓之餘，又可以保留一定優質股(最好可保留一間收租物業)，才去出手買自住樓都未遲。

------------------------------------------------

Q22419：

1) 也想請問你1093, 《50值博倍升股》中亦提及此股能穩中求勝，請問此股的便宜區是多少？

2) 1297的便宜區是多少？

3) 你的著作《50值博倍升股》中提及1181是穩中求勝之選，請問此股的便宜區是多少？

4) 《50值博倍升股》中提及1458成功打開了一片藍海，請問此股的便宜區在哪？

5) 《50值博倍升股》中提及1373是穩中求勝之選，請問此股的便宜區是多少？

6)《50值博倍升股》中提及868是穩中求勝之選，請問此股的便宜區是多少？

7) 讀完仍的《50值博倍升股了》，但發現很多股票已升了很多，如果現時從書本中選一隻，你會選哪一隻？

8) 想問根據過往數據，本港樓市平均每年會上升多少？（樓價、租金分別上升多少？）我已在書中找到了。

9) 想問現有哪隻優質潛力股已跌至便宜區？

龔成老師︰

1) 石藥集團(1093)現價算合理區上部，要平宜區，要有好大幅回調，接近回一半才到。

2) 中國擎天軟件（1297）規模較細，以及行業存有風險。此股較難做個穏當估值，如你想投資，現價都有投資價值﹐但要控制注碼。

3) 唐宮中國(1181)現價計，你預回多3,4成，會開始到初步平宜區。

4) 周黑鴨(1458)雖然近期回落唔少，但都仲係偏貴，你預佢真係有好大跌幅，去有機會進入平宜區。

同埋，其股都有一定風險，不宜大注。

5) 國際家居零售（1373）你預跌在多2,3成，才算係初步平宜區。

6) 信義玻璃（0868）過往一段時間，累積了不少升幅，就算合理區，都要有一個明顯大回調才會到。所以，暫時唔好入市住。如果真係想入，最好用月供去儲貨。

7) 我會選中生(1177)和信義光能(0968)，2隻雖然只在合理區上部，但本身質素較高。故在當中，值博率會係較好的2隻。

但由於現價唔平，只宜小注，等有明顯回調，才正式入市。

8) 過往數據，你可以作為一個參考。但更重要，你應著眼面前轉變、房屋政策、樓市供求問題。未來預期，香港中短期房屋都係維持供不應求。

再加上，近年多國政府都用量化寬鬆政策去救市，令市場資金大量增加。所以，可預見的將來，樓價都會維持上升。

9) 沒有，其實高質素的潛力股，極少跌到平宜區。所以你唔好諗住平宜區先入，要係合理區就開始分注，如果唔係，好機會錯失入市機會。

------------------------------------------------

Q22420：

老師，我睇返中國銀行和中銀香港每年既股息增長率，中國銀行既股息增長比較快，而家中國銀行呢個價位股息有8厘，如果股息再增長股價必定有影響，那投資中國比行不是比中銀香港好嗎？

同埋我想問如果我想查返中銀香港10年前既股價可以係邊到查詢？

同我想問通漲對阿里巴巴，騰訊，香港中華煤氣，同中銀香港會唔會有影響，我照你推介已買入呢四隻股票，之後仲想入d香港電訊同置富

龔成老師︰

我地唔可以單憑派息增長力，就去判斷一個企業情況。無錯，當中行(3988)股息再上調，有機會令股價再上。但

但始終中行(3988)本身已經好大間，加上佢業務上發展比中銀香港(2388)細，故增長力預期會較弱。

以你3X歲年紀，應該集中係財富增長上，故中銀香港(2388)會較為適合。

至於你想睇10年前股價，你可以去YAHOO財經，或者睇各個財經網的圖表，都會有。

阿里巴巴(9988)，騰訊(0700)，香港中華煤氣(0003)，同中銀香港(2388)都係有質素的企業，長線都會跑嬴通漲，你長線持有就可以。

至於指數基金都係適合你，但香港電訊(6823)只係收息股，增長力不高，不太適合你這個年紀。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15061-Q15080）

Q15061：

成哥，可否分享一下你當年有冇如何戰勝恐懼？你講過2008年大跌市，2016年股災，當時都令你當時身家大縮水，但之後反而身家大增，點做到？

你見住自己股票價不斷跌，點可以克服？當時驚唔驚？點解可以把握到機會令升你之後身家大增？

龔成老師：

經驗是其中一個重要元素，過往20年，經驗多次大市上上落落，身上大升與大跌，就會學懂訓練，平常心面對股市上落。

第一要明白，大市恐慌期，持股的股價雖然會跌，身家看似減少左，但在長期來說，這是難得的機會，所以野都要從長遠角度分析。

另外，買股票就是買企業，只要企業有質素，完全唔需要理中短期的股票，當你愈有企業方面的知識，愈了解該企業的業務情況，這更平常心面對中短期不利情況。

原理就如同買樓，個個都想要沙士價，到近期新沙士，好多人就驚，2001年買樓，會跌到2003年，心理壓力好大，但而家睇翻，就賺到幾倍。永遠都係，係最差的經濟與市況，就是長期入貨機會，但我地唔會知幾時先係最底，現時如同2001年？還是2003年？無人知。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15062：

老師你好，我是股票班學生，有野請教：

醫藥企業主要透過"自家研發"或"收購合併" 去增加自身出售產品，好似康哲製藥(867)主打收購，綠葉製藥(2186)就2樣都有。其實這2個方法，有無話邊個會睇高一線?

"自家研發"會有研發成本，除始之外會有失敗風險。

"收購合併"一般都有現成產品，失敗風險較低，但好多時收購都要付出很高溢價，而且感覺較被動。

龔成老師：

其實沒有絕對的答案，因為兩者其實都有風險，自己研發有失敗風險，購買並有可能較貴。

從企業發展來說，自己研發會較有一致性，品牌等各方面都可以較好，但這類企業，最好本身有多種藥，多個研發同時進行，這才可以減少風險，即是用多個已賺緊錢的業務，去賺得資金，用資金去支持新業務。這類企業只要業務模式穩定，可以有不錯發展。

至於收購類，有可能令企業有較高的增長，但當然會有收購價過高的風險。所以要小心睇佢裡面的情況。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15063：

如果大約在11月尾入了 中國鐵塔（788） 1.61入了200000 股
應該如何部署

龔成老師︰

中國鐵塔（0788）有質素的，這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。

由於這股有發展力，你唔需要太理個買入，我地應著重企業本質。此股有質素，你手上的貨可長線持，只要唔係佔你投資組合比重太多就可以。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15064：

請問1672、1652兩股怎樣？

龔成老師︰

歌禮製藥（1672）主要於中國從事生物製品研發。此股上年年期不長，較難估值。

加上風險十分高，因為佢仍然無錢賺。投資此股有點像博一博，風險高，雖然潛力可以好大，但如果從穩健來說，就唔建議投資。但如果小注博下，你則可以試，但你要明白投機味較重。

福森藥業（1652）主要於中國從事製造及銷售藥品。此股雖然有盈利，但上市年期不長。

新股半新股好多時都要些時間，才可以見到真實面，加上佢股價十分波動，估值困難，只建議小注，同時你要明白當中的風險。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15065：

你好，我睇了你的page 一段時間，有D 野想請教一下。

我30歲，月入約5.5萬，每個月會儲起$15000現金，另外約一年前開始一個月會用$20000 月供股票。

月供戶口入面有17隻股票 （中電、煤氣、恆基、銀河娛樂、港鐵、萬洲、中國聯通、領展、建行、聯想、中國生物製藥、BYD、友邦、中國平安、港燈、盈富基金、中國恆大）。

但係感覺好似好分散，所以上月開始調整到只供10隻 （中電、煤氣、恆基、港鐵、中國聯通、領展、中國生物製藥、BYD、港燈、盈富基金）。

我現時手上有現金大約60萬，另外月供戶口同埋自己另外買的股票各有23萬同埋6萬。

我目標係一兩年內買樓，預算都係6百萬左右的市區2房單位。

想請教老師，月供股票是否不宜過多隻股？如何可以一兩年內令現有的資金增值多少少少少，令我可以在買樓時多D選擇？

龔成老師︰

月供10隻股票有少少多，但都可以，但反而問題係有部份月供股票唔適合你。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。中電（0002）和港燈（2638）都是收息股，增長力唔高，唔係咁適合你。已供左架就算，保留住。而這2隻股票的供款，可以全數加在其他組合中的股票。

至於你想1,2年內增值多少少，其實好難有個有效方法，因為就算再優質股票，中短期都會出現波動。2年是一個很短時間，很難確保你回報。

如長線計，你可以加大潛力股供款比重（BYD和中生）。但這做法同樣增加了回報波動性的風險，你要明白這點。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15066：

Hello, 前幾天買醫療股賺了一些, 然後再下注大買8225, 3681, 1011, 1345 .......結果股價大瀉.....

求救！請問這些股有機會回升嗎?

龔成老師︰

首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

中國醫療集團（8225）市值不高，股價會好波動，加上過去有2年損益表都出現 （修定報告），可能會有古怪，我會盡量避開而D企業。

最近集團向藥監局申請恢復生產對新型冠狀病毒（2019-nCoV）有抑制作用和療效的利托那韋（Ritonavir），雖令其股價倍升。但這藥是否真的有力令佢盈利持續大幅增長，這是一個問號。加上武漢肺炎過後，需求必然下跌。

這些你都要好好考慮，如果你覺得佢有潛力可以買少少，但唔好大注。

中國抗體（3681）這類新股，好難分析，佢係香港的生物製藥公司，從事研究、發展、製造及商業化免疫性疾病療法，主要研製以單克隆抗體為基礎的生物藥。

風險高，可能回報大，但現時市值都成幾十億，其實唔算特別平宜。如貨多，要減，這類股小注博下就算。

泰凌醫藥（1011）質素較弱，同時之前核數師報告曾經有少少問題 （修定報告），你要注意翻，賣出較好。

中國先鋒醫藥（1345）質素都一般，盈利和股價都十分波動。同樣，此股只可小注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15067：

老師，我現在二十五歲..我現在大約有十五萬可作投資用途,希望三年後可以達百萬..最近股市唔好...我放哂手頭上的股票了...有幾個問題想問一問:

1. 我考慮緊恒指跌穿25800會入市，以下係我想買入的..銀河..比亞迪電子..小米..美團..亞里巴巴..吉利..舜宇..
但我唔知點分配同埋揀股揀得岩唔岩..

2. 如果我唔岩老師你有咩推介?

3. 另外有冇其他方法能盡快達成百萬如月供?

謝謝

龔成老師︰

我想先給你一些正確的投資概念。

首先，3年唔係一個長時間，就算再優質架企業，中短期都會出現波動（投資時間5年或以上會較合理）。而且你係講緊3年內由15萬增值至100萬，係一個好唔合理架增長幅度，我地一般期望優質股架係年增長10%至15%。

另外，股市唔好從來唔係一個要賣出持股的原因。我地投資股票就如投資企業，只要佢本質和前景無出現問題，應該一直持有，才是最有效的財富增值方法。

1） 你比較年青，投資時應以增長為主。你選的股票可以，但美團點評（3690）、小米（1810）風險較高，不宜大注。而阿里巴巴（9988）現價較貴，都只宜先小注或用月供去儲貨。

我建議你組合中加入盈富（2800），佢係包括50間質素不錯上市公司股票的組合，有助你平衡組合中風險，建議佔你組合約3-4成。

25800點只算大市合理區，你買貨時必需"分注"。到24000點以下，才算進入初步平宜區。

2） 以下股票都優質和適合你年紀︰

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）、深高速（0548）
潛力股︰比亞迪（1211）、中生（1177）或福壽園（1448）

3） 你可以考慮做生意，從一些自己專長或興趣地方著手，有機會可以做到比投資股票更高增長。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15068：

龔成你好 想請教下現在的環境是否不適合裸辭？

本人38歲 做了約17年文職 人工現在是$18000. 沒有樓未婚獨生跟父母同住. 資產約二十萬元 現在沒有投資 只買危疾保險和做定期賺取約1000 港元（per yr).

想做些投資 應會買1手 煤氣作長線

龔成老師：

你裸辭的目的是甚麼？如果沒有特別的原因，我不建議這樣做。

如果你做了17年文職而無突破，我認同應該轉下環境，但建議你先計劃，想好自己的大方向，唔好在無計劃的情況下進行。

加上現時香港的經濟轉弱，而你本身累積財富不算多，你應該好好計劃，才決定下一步點行。但我好建議，你之後要有突破的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15069：

老師想問371點樣？

同埋金沙既話係咪有6%息率果陣會更好

龔成老師：

北控水務集團（0371）本質不差的，但由於佢的負債在近年不斷上升，市場認為佢的風險度提高左，對佢估值方面都保守左。

整體來說，這股可以長線投資的，不過不建議大注。而現價合理。

至於金沙（1928），這股有質素，可長線，現價合理，當然，去到6%股息率會更吸引，6%可說是合理區中下部的區域。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15070：

老師~我已經盡能力留左80000現金留在大跌市時掃貨 但80000現金始終不多 例如 就算我等到銀娛(27)跌到落$40 恆基(12)跌到落32我各買1手都已經用了9成資金

做不到分注效果 而且 如果其他心水股如中生，福壽園，中銀香港等優質股都跌到落便宜區 就會因為用盡資金買銀娛同恆基而買不到。

因此 我想請教如何可以在這次潛在大跌市中更善用這80000資金呢？ 是否應把資金投放在入場價較低而同時又去到便宜區既優質股呢？

謝謝你

龔成老師：

首先，要睇翻你現時現金與持貨的比例，如果現金百份比好少，就盡量不用。如果在合理的水平，就建議先在跌入一手，餘下等平宜區。

你可以等大市回落時，在上述的股票中，投資跌得最多，相對最平宜，投資值博率較高的。而餘下的最後一注資金，就等再下一次暴跌時，先出手。

你現金比例愈少，就要用「等愈平宜區」去入的策略進行。你只能夠將手上現金，分2、3次去等跌市機會去入不同的股票。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15071：

龔成老師，之前0.66買入新石文化（1740）四手，但現時股市不斷下滑，請問是否應現時止蝕？還是可以再觀望？

另外，對平安好醫生（1833）感興趣，應否趁低吸納呢？
謝謝

龔成老師︰

我地投資股票，其實唔太需要理會大市，應著力在企業本身質素和前景。

新石文化（1740）主要在中國從事電視劇投資、製作、發行及許可業務。客戶包括電視台（包括其營運實體）、從事電視劇發行業務的公司、電視劇執行製作人及版權擁有人。

其電視劇會在一些較知名電視台播放，如中央電視台、天津廣播電視台、山東廣播電視台及安徽廣播電視台以及愛奇藝、騰訊視頻、風行網及PP視頻等網上視頻平台。

業務上，的確有吸引力的，不過，我一向都新股半新股都無興趣，因為真實面要慢慢先見到，故估值困難。如果佢佔你組合比例唔高，可持有。

平安好醫生（1833）都可以話係潛力股，但就屬於較高風險的類別，我自己會比較怕投資這類。

首先，佢地的上市年期不算長，加上上市時是市場熱炒期，當時估值過高，對這類股有少少保留。

業務上，佢地的確是高增長，同時業務有發展潛力，但睇翻佢地的財務數據，平安好醫生仍處燒銀紙狀態。你覺得佢有潛力，可以小注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15072：

請問813到什麼位才入，現等低位想買，謝！

龔成老師：

世茂房地產（0813）業務不差，增長力理想，但這企業最大的風險是負債。

中國的經濟轉弱，以及負債多，都會對這企業造成影響，增長力將會有所減慢。這股都可以長線投資，現時處合理區，都可以分注，當然，跌多1成會較好。但你要預總投資金額不能多。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15073：

老師你好
請問一下，信義玻璃現價值得入手嗎？之前睇過你留言呢隻值得長揸

龔成老師：

信義玻璃（0868）有質素，這股有長線投資價值。

不過，佢近年增長力減左，你預佢只是平穩增長型企業，現價處合理區，分注投資可以，長線無問題。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15074：

你好老師，想問金界控股現價可以買入一手嗎？我見它因短期因素 罷工 而跌了下來，現價合理嗎？建議分注還是一手

龔成老師：

金界控股（3918）有質素的，相信仍由於多種因素，例如中國遊客減，會對佢中短期有一定的影響，不過在長遠而言，佢的發展仍然是正面的。

現價合理，可分注投資，長線持無問題。但要留意，佢始終處於較為新興的市場，因此有點風險，所以資金不能大注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15075：

龔老師。我係你之前嘅學生，今晚都會睇番課堂講嘅野，溫下書。不過，我有啲資產分配嘅問題想請教你。

我今年35歲，每月可以儲約$15000，有現金約$650000，未持有任何股票或物業。目標係希望2021年中左右可以有筆資金置業（薪金而過買居屋門檻，只能買私樓），另外希望有少少資金可以繼續投資股票。

喺呢個情況之下，其實我應該持多少比例的現持有的現金，其他拎去投資？

而每月所儲嘅$15000又應該分別分配幾多比例儲現金同投資？ 另外，如果投資嗰筆資金，其實放喺月供股票嘅比例最好幾多好？

謝謝你，龔成老師。

龔成老師：

你應該持有較多現金。

因為你目標買樓的年期，在2年之內，而我地投資，一定要長線先有效果。優質股當然會長期向上，但中短期都會有不確定性，如果你買樓時大市剛剛好差，你要賣股票去買樓，就有機會出現損失。

因此，建議你過半持有現金，部分可投資一些收息股，以及平穩增長股。

每月現金方面，你可以考慮做月供股票，每月$7000已足夠。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15076：

龔老師,最近看到你的發文,知道現在等個市跌到24000(便宜區)後會入貨,想問下如果真的跌到24000左右~我手上的那隻股票比較值得入貨呢?

持有港鐵00066,比亞迪1211,中銀香港2388及盈富2800...平時每月都有做開月供盈富及比亞迪

龔成老師：

24000是平宜區，不過，現時大市處合理區，你都唔好完全無貨，要以分注投資，同時留現金的模式進行，只是24000是掃貨區，動用現金。

你月供的部分，可以保持，原有持股無問題，可持有。

你要睇翻這刻的持貨與現金比例，去衡量這刻點配置。

若到了24000，就可以加大力度，你可以睇翻到時那一隻股跌得最勁，投資值博率最高，這個要到時先知。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15077：

1177點樣比石藥優勝？

龔成老師：

這兩股都是有質素，有潛力的股票，兩隻優質度好相近。

當我地比較時，會考慮佢地的業務獨特性，長遠發展空間，同時會利用財務數據作比較，例如生意與盈利的增長，這已經能初步分析到近年企業的增長力。

另外，亦會分析股本回報率，可以計算5年的平均數，這可以令我地了解企業的賺錢能力，你可以見到這兩間企業，都是處高水平，比其他企業、其他行業明顯地高。

而在兩隻中，你會見到中生製藥（1177）會略高，所以賺錢能力較強，不過從整體上，這兩企業優質度相近，都有投資價值。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15078：

你好，龔成老師，

本人37歲，投資計劃比別人慢，一年前才月供恆地及金沙，各$2000，現有意投資以下股票，可否提供意見，好讓本人作進一步投資，謝謝。

152 深圳國際
2138 香港醫思醫療集團
1665 檳傑科達
1157 中聯重科
3319 雅生活服務
1238 寶龍地產
1513 麗珠藥業
1727 河北建設
1098 路勁
1600天燃倫氣潛力
3380 龍光地產

龔成老師：

上述的股票，有好有壞，我講3隻較有投資值博率的。

首先是比較穩健的，有深圳國際（0152）及天倫燃氣（1600），都是能平穩增長，有投資價值，現價合理的股票。基本上現價已可投資，分注，長線就得。

另外，有較大發展潛力的，有雅生活服務（3319），這股的前景正面，只是現價有少少貴，你可以考慮回少少開始小注。然後等較大回落先正式入。

至於你月供恆基（0012）、金沙（1928），當然可以長線月供。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15079：

老師你好 一直有留意你教人投資 但我人在悉尼生活 未能去上你的堂 但好想你可以指點迷津

我今年30歲 老公26歲 在澳洲剛拿到永久居民身分 現在現金儲蓄大概有12萬港幣（2萬多澳元）

每月供樓供車開支大概$4000澳元 兩人入息大概$8000澳元 但不穩定 每月兩人淨儲款共$3200澳元 現在想存款3年內在澳洲買樓（首期大概15萬澳元）

但感覺只靠每月現金儲款好慢 想穩陣投資增加儲款 請問應買邊隻股票？

恒基地產？港鐵？
老師還有其他建議？

龔成老師：

3年時期，都可以投資平穩增值類的股票，作為滾大財富的工具。

你可以部分資金作月供，同時部分留現金等機會。如果不想進行月供，就自行分注投資（同時留有現金）。

盈富（2800）、恆基（0012）、港鐵（0066）是核心的部分。

餘下再考慮銀娛（0027）、粵海（0270）、領展（0823）、港交所（0388）、中生製藥（1177），總之，現時大市處合理區，你要分注投資，同時留現金。

留現金部分，是重要的等機會入，這將好影響你往後財富的成敗，要小心掌握，耐心等機會。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15080：

我和先生今年38歲，結婚6年，沒有亦不算有小朋友，家庭月入$11萬。

每月開支
-每月給四大長老家用$26000
-每月合共儲起$30000入聯名戶口，以支付每月供摟$10000 （2012年尾購入$250萬40年樓齡居屋430呎，供18年，現值$550萬，按揭還有$160萬左右），扣減供樓後的錢會用作其他生活開支（水電煤上網食物等），剩餘的就當儲蓄（大約$10000）
-每月二人洗費$25000

持有現金
- 港幣$120萬
- 美金$5萬，做3個定期，1.5% 利息

MPF
- 太太$75萬（之前買中國股票+恆指股票，2018年年尾，全部轉做保守基金）
- 先生$20萬

現時沒有任何投資產品。

補充：每月收入扣除以上開支，還有$29000 剩下，應該怎樣安排資產增值？將一半用作月供股票？風險應該怎樣定？以我們年紀，20% 高風險，50%中風險，30% 低風險？另一半用作現金儲備，做港幣定期？換美金定期？感謝解答

問題：

1） 我哋完全沒有任何投資知識，
不知道應該怎樣開始？
2）應該怎樣利用現有資金投資？
股票？定期存款？
3）MPF 應該繼續買入高風險（中國/亞洲/恆指股票），還是以現時市況買入保守基金？
4）是否應該加按層樓套現出來投資？
例如：月供股票？
5）如果以月供股票，應該怎樣選擇股票？
每月供多少？可否給建議？
6）希望50歲前可以財務自由，退休後家庭每月有$4萬洗費，應該要儲多少退休金？

謝謝

龔成老師：

1）你最好睇《80後百萬富翁》《股票勝經》，掌握一些基礎的理財、投資知識先。

而利用月供股票、月供基金這些方法，是好適合一些初階投資者去累積財富。

2）以你地的情況，其實可以做得更好，你要好好運用手上的資源。我地進行理財，不是炒賣，而是一個財富的配置過程，在你可承受風險的情況下，建立合適的組合。

你現時現金已好多，建議將部分資金，投資股票，以及ETF，我相信你地最初投資，ETF是最好的，例如盈富（2800）、領航標普五百（3140），可以作為核心，再加上其他股票。

3）強積金的策略好簡單，只要按你的年齡及風險度配置就得，以你地現時的情況，可以中高風險。

4）原理是可以的，但你要明白風險度高左，因此只適合較能承受風險的人士。另外，只建議有一定投資知識的人進行，因此，你可以利用一年時間，去學投資及取經驗，下年先考慮加按投資。

5）你可以考慮總數月供$18000，盈富、領航標普五百佔一半。

另外幾隻：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

6）如果每月要有$4萬現金流，即是一年$48萬。

假設到時投資6%收息股，你到時需要的資金為$800萬，我相信你地無問題的，只要在這段時間保持儲蓄投資就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。