［葬禮進行曲］你四十歲人，去過幾多次葬禮？

TLDR ：Always Go To Other People's Funerals — Otherwise, They Won't Come To Yours

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

1. 而家聲名極臭嘅朱利安尼，講過相當老派嘅人情世故嘢：婚禮呢，其實唔得閒真係未必要去，反正錦上添花，少你一個唔少。但葬禮，雪中送炭，務必要去支持遺屬，多你一個好多。況且，人可以唔結婚，結婚亦可以唔行禮，但總會死。死咗嘅，唔係完全無親友嘅，總會做啲嘢。當然明顯唔係佢發明呢套講法，佢只係在書講，我亦只係聽人講佢本書講

2. 況且葬禮，相當Flexible，流水席，幾時就到時間咪過去，見到遺屬講兩句，望下有冇識嘅人，喜歡嘅好快都走得。

3. 後生嘅朋友寫咗篇文（https://lkdin.io/3VOb），佢剛四十，即係後生我幾年。咁我呢幾年都冇去過葬禮（我記錯嘅請你報夢話我知），所以我四十時嘅數字，同而家一樣。朋友話三個或四個，咁我應該多過佢。你可以計下，去到你四十歲為止，去過幾多個葬禮。未夠嘅？「自己pro rata返」。「當然唔好計咩法治已死香港已死嗰啲一日去幾次嘅」

4. 當中，不存在咩「四十歲人應該去過幾多次葬禮」，正如我不打算研究「四十歲人應該打過幾次飛機／有過幾多性伴」之類。但背後，總會反映到啲嘢。雖然又話人老咗去嘅葬禮多咗，但照計四十歲呢，你同年啲朋友，一般都未死。你去嘅都係長輩之類，細細個都可以去。

5. 朋友話去得少，反映佢毒，冇乜朋友，同屋企人關係惡劣。可能都有啲關係。我都冇乜朋友，同屋企人關係都惡劣（但好似冇佢咁惡劣，真係人上有人）。但仲有好多因素影響，例如你有另一半嘅，往往就去多一倍。

6. 我試下數，我去過嘅葬禮，應該八個？有兩個我好似冇印象有去到，但照計我係有去的。然後寫完呢篇文我就會洗自己腦，十年後我就又變得肯定自己有去。人嘅記憶幾咁唔好可告！況且我地年代唔興「懷念爺爺」咁影響，好似暫時我都冇在殯儀館打過卡。（然後我查返手機app，原來係有！三次！都話記億唔可靠。咁其實殯儀館打卡冇乜嘢。冇人叫你在入面打嘛。）

7. 我父母好早生我，老母今年62，老豆64．兩個都唔食煙（老豆N年前食，戒咗好耐），所以根據大數法則，健在嘅機會比較大。咁你估到，八個之中佔咗四個嘅，就係阿爺阿麻，阿公阿婆，全數釘蓋，好合理。

8. 我嘗試排序，雖然未必太準。但，頭兩次應該最震憾，冇經驗嘛，況且細個（雖然都十歲以上），有啲驚的。

9. 第一個死嘅，係我阿公，我讀緊小學，四五年班咁上下？嗰時放學成日同老婆出去瑪嘉烈探病。應該係九龍大酒店？冇玩咩破地獄嗰啲，但都真係都仲係一回事，去足全程，同學校請假的。冇守夜，或者有人有但我冇份。阿公印象都多，細個在石圍角村，拎佢本不文集睇，佢又會帶我飲西茶，西多士冇餡嘅年代，幾咁美好。星期六佢睇賽馬，我就睇中間插播嘅大力水手，或者德國波。不過死嘅人太多，不能個個講好詳細

10. 之後係我阿爺，更加親近。冇錯係我出世時已經著咗草去台灣嗰個，堅稱自己冇收片但又走咗佬嗰個。但我有記憶時，佢已經返咗香港做返老正，當然亦唔見有乜錢（聽聞在台灣敗晒）。阿爺嘅感覺，就係唔係幾好老脾，但又唔係會打我嗰種，都係慈祥嘅。但又不過，我完全不能將佢同差佬扯上關係，雖然我一路都知，但總係覺得好似換咗另一個人。阿爺都算死得早，大約我中二三時死咗。嗰時佢臥病在床，我仲在側邊打機，真係不孝。記得佢死前健康當然更差，脾氣亦差，好多嘢唔食得，最記得成日要食田雞—唔係佢要食，係好似唔食得其他嘢。嗰時就開始知道死亡，可以揀真係長痛不如短痛，但邊度你揀？我唔相信阿公或阿爺咁選擇。當然佢地亦未去到話受好多痛苦，或者吊住好耐咁。阿爺最後死在大陸，唔知返去搵神醫定換腎定乜鬼。就係記得解穢酒食過「黃埔炒蛋」，記得阿麻好似幾風騷。唔知係因為照顧病人好累丫（咁阿爺病重時都真係好臭脾氣），定係拎咗唔少錢。冇錯，阿爺到底有幾錢遺產，去咗邊，都係大家扯貓尾，永遠冇真相，有人話根本冇，有人話去咗我阿麻度，有人話去咗我老豆度（應該都有啲），總之冇一仙去過我度。

11. 講咗咁耐先兩件，加快速度。見到嘛？阿公阿爺死先，佢地老婆反而擺耐好多。咁好合理，一來女人長命過男人，二來佢地娶老婆都揀後生，阿公更加係再娶，所以阿婆未咁快。由我中二定中三（1992？），打後十年，好似都冇再去過葬禮。阿婆幾時去架呢？慚愧，我都真係唔係好記得。細個當然都有啲感情，但後來阿婆已住老人院，咁大家知，慢慢就少深，我就更加少去 —唔好記嗰時我已經高中或者大學，有自己多姿多彩嘅生活，主要係溝下女做下愛咁，點都好玩過去老人院吧？你反對嘅，我同你交換。直到而家，我都唔記得阿婆幾時死，甚至唔記得我有冇去佢葬禮（希望阿婆唔好上嚟留言話：仆街仔！你死我都未死呀！），但合理地假設，應該總有出現下？當埘我同我老母關係未咁惡劣，佢叫我去我應該會去。不過又諗下，實情阿婆唔係佢親老母（都話再娶），至於我老母親母，我冇見過的，好早死咗。

12. 然後，又好似一輪高峰，嗰幾年去較多。我阿麻死咗，好似十年前多啲？留意佢最後就住在我而家住嘅地方，佢瞓廳（唔通我瞓？況且床架高，佢爬唔到）。事實佢臨終前幾年，都係同我一齊生活嘅。我係咪喪盡天良？都未完全係嘅。有時都會慚愧，冇陪佢多啲。佢健康尚好時，都試過我返工拎漏嘢佢拎去中環畀我（！），又或者我要帶女返屋企搞嘢時，醒一百蚊畀佢落去飲茶（唔係點？）。

13. 無論如何，當時已經有Facebook，亦係比較深刻嘅。當時係年尾，阿麻之前健康並唔特別差，即係長命病嗰啲當然有，但佢話唔舒服入醫院時，都仲係自己執嘢自己叫車。佢去醫院時我都探過下佢，都仲係幾健康。但話咁快。有一日我老母打嚟，就同我講，「你阿麻走咗啦」。我想講，我老母當時在屯門醫院返工，阿麻亦都住屯門醫院，我真係以為佢嘅走咗係出咗院，然後佢先話我知。當時我在公司，仲係十分搏命嘅分析員，我甚至諗緊使唔使放工先去，好似有上Facebook出post，甚至諗係咪要坐的士之類。無論如何最後就坐的士，去到叫做見佢最後一面（已香，但仲在床上，明啦）。

14. 往後嘅事，好多人都聽過。見完最後一面，不過係午飯時間咁上下？我返咗屋企瞓（分析員嗰時七點幾就返到公司，我係摸黑出門的）。然後？我去咗旺角。做乜？睇戲。同埃汾太睇戲。睇嗰套戲，叫做《3D娜塔莉的情人》，聲稱係全世界第一套3D韓片，條韓妹好靚，又好波，我都冇深究係咪整，有乜關係？

15. 我走咗去睇《3D娜坦莉的情人》（https://bityl.co/8Hsd），非常之卡繆，非常之《異鄉人》。我甚至應該係因為睇咗《異鄉人》先會咁。成件事我已經唔係好記得。我上一次寫文，係講「咁買咗飛丫嘛，唔通唔睇，點預到佢咁啱嗰日死」。但，我諗返件事唔係好合情理，首先嗰個年代，我好似仲唔多興網上買飛。之但係又不過，如果我唔係一早買咗飛，照計我唔會特登出旺角睇戲？Anyway同埃汾太睇完，就梗係上床啦。都話十分之《異鄉人》（正因如此，如果我冇買飛，點會特登出旺角？唔係叫埃汾太返屯門會簡單啲？留意我午飯已經返咗屯門）。第二日，我照樣七點半返到公司。冇能力的人嘛，唯有早返工。

16. 埃汾太當然都見過阿麻，食過好多次飯，當然都有去葬禮，不過遺憾阿麻冇機會見到我成婚。亦冇機會同我影畢業相。當然遺憾係佢嘅遺憾，我先唔理呢啲嘢。咁而結婚亦冇可能特登就阿麻，況且當時亦唔知佢就死，佢都唔知自己咁快死。但畢業相嘛，理論上可以就老人家嘅，不過事實上港大行畢業禮時我已去咗英國，英國行禮時我又返咗香港，而我又唔會唔係正日自己搵套衫同勞蘇影相咁

17. 第幾個？數完第四個。然後第五個，我老豆老婆（非我老母，但亦唔係「後母」，都冇一齊生活過，正如我老母老公我都唔會叫「後父」，佢出現時我都中七啦大佬），其實時序上早過我阿麻，但舖排上好似應講晒麻爺公婆先。實在件事有點複雜，我亦都唔係好想講。當然唔係死者嘅問題，又唔係我問題，係顧及下其他人感受。話說我老豆老母，在我阿爺死後就好似離咗婚，冇因果關係，但時間大約係咁。我老母再嫁但冇小朋友，我老豆再娶，生多咗件，所以我有個同父異母嘅妹，不過比較少提，亦唔係十分熟。但講時講，我老豆呢個再娶嘅對象，廿年前左右就死咗，自殺的，燒炭，成件事十分震憾。當時係我大學畢業後，去英國之前，我在老豆公司過下日晨（係佢返工嘅公司，唔係佢開間公司咁爽）。佢都有講另一半抑鬱症呀之類，然後事發當日我甚至係同佢一齊在公司的，不過冇同佢一齊返去破門，嗯，成件事都幾震憾，所以我都唔係好想講太多。佢嘅葬禮我有冇去？我估應該有吧？（我同死者關係並不差，反正都唔會成日見到，亦冇啲啲咩「你拆散咗我屋企」嘅憤恨，畢竟真係冇人拎支槍迫我老豆有婚外情的，對不？）

18. 第六個，我外母。同樣地，涉及其他未死嘅人不講太多。當時我已經結咗婚，當然係有去葬禮的。不過講真，結婚冇耐外母就去咗，一直都唔係太多交集，同外父就多啲。外交仲係好健康，日日炒股票，大家有心。

19. 第七八個，算唔算特別少少？第七個係恐龍，冇錯，就係叫恐龍。中學同學嘅大學同學，成班一齊玩，稱不上極之好朋友，但至少會私下傾計兩個人食飯咁。點死的？自殺。我仲記得佢在甚麼教堂定乜做後事，平日嘅夜晚，我仲要一半走咗出去同倫敦鬼定美國鬼conference call講港交所。嗰時嘅工作真係十分困身。真係搞搞下嘢在時鐘酒店 conference call又有，聽聞有人一路conference call一路被吹蕭（唔通幫人吹咩），無從證實，但唔係我。亡友好多金句，被其他朋友拎出嚟講，例如嗰句「呢啲我愛你呀會結婚呀，性行為嘅潤滑劑嚟啫，唔想講嘅咪去樓下買支KY，雖然凍啲但效果唔爭太遠」，好多人以為係佢創作，實情係我話佢，佢發揚光大的。

20. 如果我冇記錯，亡友好似細我兩年，副作用就係我在英國返嚟香港後，仲會借用佢啲大學戶口做各樣嘢，例如上呢個 data base搵工．我最記得，好似嗰時佢畢業我未搵到工，佢都有安撫我，同我講，「唔緊要，一個恐龍倒下，仲有竹萬萬隻恐龍」—講嘅係佢細佬仲讀緊大學。不過後來我冇用到恐龍二號，放心，我搵到工，佢都搵到，佢死時我都差不多離開金英了，好似2012年前後？

21. 多得電話，我都仲保留住同佢最後嘅message（當然唔知佢自殺），就係我推介完元朗嘅煲仔飯，佢覺得好正。就係咁。後來我都仲成日去，都會諗起佢，雖然我同佢冇一齊食過。

22. 最後一個，你可以話「最不重要」，但亦係性質上完全唔同。工作上嘅……前輩？唔係我本書鳴謝嗰幾個，但係嗰堆人。亦都係自殺，相當震驚。佢不算同我極熟絡（雖然我在倫敦出trip佢都打畀我有嘢搵我救火），亦唔算直接幫咗我極多嘢（咁當然都有啲）。但始終係個慈祥嘅長者，亦係業界有啲聲望嘅人。壇嘢都搞得幾大，俗啲講句，生前好友們幫佢風光大葬，算係極度榮哀？未致於好似「大時代」咁，但的確見到一啲猛人，甚至會同我講「佢都有提起你」。

23. 我記得應該係英國脫歐公投嗰年（冇錯，相入面嗰次，睇返日子正係公投之後嗰日），就係我最後一次去葬禮，就係呢位前輩。我嗰日不停心諗，到底葬禮係咩回事？係畀邊個睇（當然係畀生嘅人睇），係為咗表達大家對佢懷念？定係話畀大家知，第時你死咗大家都會咁對你？

24. 總之，都係嗰句，Always Go To Other People's Funerals — Otherwise, They Won't Come To Yours

25. 冇乜特別，都唔算寫得特別好，甚至差過我朋友，「都幾大鑊」，只係留個紀錄。另外，關於葬禮，寫過篇舊文，原來都未夠一年前。舊文就寫得幾好（https://fbook.cc/3Z0d）

26. 不過有個講法，一個人死兩次，最後一次有人提起佢地先係真正死。咁以上呢啲故人，我又幫佢地續一續命咁，個感覺好似泊車餵錶咁。以前仲有個紅色旗，十分有實感。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

［Something is wrong］韓國係第十大經濟體，三星共和國亦出晒名，但，韓國首先200億美金身家？同Dyson整風筒整吸塵機差不多？有啲嘢喎

TLDR：比韓國更細嘅經濟體系，西班牙墨西哥之類，首富都有錢過韓國首富。關鍵係，李健熙只係拎住4%三星股權。亦唔係一早畀晒個仔（否則就佢個仔係首富啦！）。但點解會咁？就要講韓國國情了。好大可能係隔住幾十重渣住，或者搵人頭渣住。

1. 星期一，重陽節快樂（！）。香港放假，但韓國應該係冇假放嘅。所以睇下三星股價如何。

2. 因為，韓國首富死咗！正係三星嘅會長李健煕。股價可能冇乜反應，又可能有，點知？但我估冇乜反應多。上次樂天嘅辛格浩一釘蓋，股價就勁升。留意辛先生已經成百歲，一早已經冇參與業務。但三星嘛，應該更加早交咗棒。

3. 上次有講（https://fbook.cc/3Hap），樂天辛格浩，係韓國五大財閥中最遲死嘅。第一代嗰班，已經死晒。樂天嘅辛格浩（Lotte，嚟自……德文！少年維特的煩惱，Charlotte夏綠蒂。同日本嘅Rakuten冇任何關係，但韓國樂天本身係在日本成立的），現代汽車（現代集團鄭周永，留意好多其他現代公司已經冇直接闗係），SK（崔鍾建，SK一名嚟自鮮京織物，朝鮮東京），LG（具仁會，L for 樂喜Lucky，G for GoldStar金星，所以LG就係樂金），仲有三星嘅李秉喆。

4. 今次死嘅韓國首富李健煕，已經係第二代。理論上交咗捧畀第三代嘅李在鎔，應該唔會爭產…..掛。

5. 不過有少少阻滯嘅就係，遺產稅。遺產稅呢味嘢，表面上非常屈機，做乜我畀錢我個仔要政府斬一筆？但細心諗就知，稅務嘅嘢，核心價值係收入再分配。所以市場塔利班可以話全世界都係左膠，因為一有收稅就係收入再分配，根本政府嘅功能就係收入再分配。遺產稅，係用嚟拉近貧富懸殊嘅，至少本意如此。亦都係斬有錢人一筆，等佢地冇咁易可以千秋萬代（實際作用冇乜，等佢啲仔女自爆好過），亦都拎啲錢嚟貼下其他窮人

6. 韓國嘅遺產，出晒名重，抽你50-60%不等。差不多全世界最高。所以好多韓國富豪，一早就將啲股票分畀仔女，在生時分，唔使抽一大舊。有啲係幾歲已經分—you never know．外國其實興用信託（Trust），但一來在韓國冇特別稅務優惠，二來，韓國人信唔過外人。

7. 睇返報導（https://bityl.co/48ds），就話「三星繼承人或將面臨76億美元遺產稅」「支付巨額遺產稅可能使得李氏家族對三星集團的控制變得複雜化。」

8. 我就見到好eye catching，所以有呢篇文。你睇到問題未？睇你對數字同金錢敏唔敏感，同埋有冇常識有冇世界觀（嘩，吹到咁大）。

9. 問題係乜？韓國首富，抽一半身家，先得嗰76億美金？！？！？！？！Something is wrong, doesn’t add up

10. 用你嘅常識諗下。韓國係世界第10大經濟體系（巧勁的說）。而再冇常識都知，三星共和國，韓國人由出世（三星醫院）到死（三星保險，殯儀館係啲友作的）都係三星。正所謂韓國人不能避逃嘅三件事：死亡，交稅，三星。
11. 問題嚟啦喎，韓國係第10大經濟體系，三星在韓國咁大，而佢嘅話事人，先得76億美金X 2 （遺產稅抽一半嘛？）= 150億美金身家？你真唔覺有問題？！

12. 為咗有可比性，我地用返Bloomberg Billionaire Index（有一排我成日貼，有讀者問關佢乜事，有乜用。而家你咪見到，埃汾寫文台上一分鐘台下十年功）（https://bityl.co/48dv）。韓國首富嘅資產，200億美金。全世界排65

13. 200億，都係好少！排到65，更加少。特別係韓國係第10大經濟體系（再重覆），三星在韓國咁惡（再重覆），又係半家族生意咁滯。點會排到65？

14. 可以比較下，幾個比韓國細嘅經濟體系，西班牙，墨西哥，俄羅斯，愛爾蘭，新加坡，香港。佢地嘅首富，都有錢過三星嘅李健熙。200億美金身家講緊咩水平？講緊係James Dyson咁嘅水平。All due respect，搞間吸塵機定風扇公司，有錢過三星？！

15. 其中一個好大嘅原因係，李健熙，在三星嘅股份唔多。但亦唔係一早畀晒個仔，「否則佢個仔先係首富啦」。李健熙在三星嘅股權，就只係2-3%（有啲講法話5%）

16. 呢樣嘢亦好重要。Elon Musk點解有錢過Steve Jobs或者添曲？唔係Tesla大過蘋果（暫時未係），而係佢渣住多股份，添曲只係高級打工仔。Steve Jobs係創辦人，但渣嘅股份好少。

17. 到底點解咁少？係咪真係咁少？就唔知了。因為種種原因，韓國好多呢啲情況。之前講嘅樂天，創辦人個仔，好似渣唔夠1%—但佢地唔係Steve Jobs式，係相反，間公司好似仲係家族企業咁。

18. 但你話，唔會畀人趕走咩？呢度就重要了：亦係日本常見嘅兩招（都話韓國樣樣抄日本），首先係交叉持股，另外係鐵索連舟，極權複雜，俄羅斯套娃咁嘅企業架構。仲有就係，「人頭」。有唔少高層甚至街外人，係代客泊車嘅。但唔怕條友唔認數？咁呢個又要講韓國嘅倫理社會，同埋法制了。發唔發現韓國好多啲藝人都係咩老豆借錢唔還要上身，甚至阿哥阿妹？外國嘅睬你有味。你咪斬撚死佢。要唔要佢地址？

19. 所以，李健熙副身家，應該係大幅低估。枱面渣住2-3%啫，枱底呢？況且，又係韓國（日本都係）特色文化，渣咁少一樣可以話事嘅。你估你可以在街邊忽然掃5%然後換董事會？香港就可能得嘅。

20. 關於韓國財閥云云，有個網幾好睇，有英文版（https://bityl.co/48bn），但唔知up唔update

21. 關於李健熙，仲可以講些少。講過佢老豆係創辦人，但佢排第七，計男丁就第三（嗰個年代嘅韓國人極少會傳祖業畀個女啦，重男輕女）。佢二哥就死咗，自殺的（李健熙個女都係自殺的，韓國特色）。

22. 反而值得一講佢大哥李孟熙。大哥都死咗，但自然死。生前係run CJ 集團嘅。去過韓國應該知道CJ，有拍戲（上流寄生族就係佢地發行），有戲院（CGV，香港都有，越南都有）。有咖啡嘅Twosome Coffee，有麵包店Tous Les Jours。

23. 但CJ邊度爆出嚟？頭先講韓國傳統五大財閥都冇佢地份。CJ唔係後起之秀，你估到了，原本係三星嘅一部份。第一製糖，CJ個名就係咁嚟（C咪第一，J咪製糖，韓文呀）。

24. 當年李孟熙同細佬（剛剛死咗嘅首富李健熙）仲爭產，成件事好有三國演義袁紹嘅feel，一個字講完就係，廢長立幼。原本老李生屬意大仔接班，但佢令人失望，成日爆鑊，於是想立三子接班。大仔見到失勢，索性攬炒，爆埋老豆啲醜聞。最後被踢出家門，老豆話「唔畀佢返嚟韓國」。當然最後老豆香埋，細佬接班，就開始爭產了。最後都係爭唔到，只係得間CJ

———————————————————
Ivan Patreon：螞蟻全攻略（https://bityl.co/48eM）
———————————————————
instagram @ivanliresearch．七成金融（短打）兩成嘢食一成其他嘢。
——————————————————————————
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010

內容:
*軟件股IPO狂潮
*買平台股好過
*人民幣強勢買咩好?

本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145