［賠率速遞］奧斯卡2020 唯一看點 — 韓片《上流寄生族》拎最佳電影

1. 又標題黨啦，其實唔係唯一看點，但都會係一大看點。

2. 本人雖則鍾意睇戲，但不見得好有深度（睇下同咩人比啦下），況且只要係返工呢，其實好多時都唔夠訓，偶然都入場恰眼訓。所以我多數都揀啲冇乜人嘅戲院，廢事影響人。特別係啲 「悶片」 「長片」，就揀星期六日精神啲先睇。

3. 不過我自己經驗發現，眼訓指數呢，最大影響固然係片長，但第二大就唔係內容—我睇 《轟天猛將》The Expendables都訓著。比較大關係可能係語言，一般睇港產片冇咁易訓。

4. Anyway，所以都唔係咩權威，「但即係就係睇多你少少」，齋睇港產片都多過你睇成年戲。但篇文都係講奧斯卡2020

5. 你心諗，名單都未出喎！係！就係名單都未出先好玩。正如你可以買定2022世界盃邊隊捧 ．「到時如果入唔到決賽周咪好戇鳩？」係！就係咁好玩。當然亦都代表你賠率會高啲。

6. 同一道理，奧斯卡1月2號先投票，1月13出名單。到時歡迎再返嚟抽水。

7. 但都講返，看點，就係 韓片《上流寄生族》拎最佳電影。

8. 你心諗，你老味你痴邊條筋？你想講外語片咋？（其實今年改咗叫「國際長片獎」，但是但，明就得）。

9. 根據我嘅research （即係，Google頭幾個結果），外語片係連賠率都好似未有嘅，可能實在係冇乜人理。而加上其實同其他獎唔同，個評審提名機制亦都唔同（不詳解了），而非評審嘅喱文其實真係好多唔會睇過，盤都唔知點開。

10. 但去到呢一刻，其實已經有咗十強，就係上面呢十套。除咗《上流寄生族》外，我一套都冇睇過。但，咪撚玩啦，呢個獎應該《上流寄生族》係拎梗。唔係武斷（係喎，未睇過另外九套），而係你睇影展嘅鬼佬口碑，其他細獎嘅結果，或者睇啲影評人選十大，已經估到。相當多鬼佬影評人放佢入全年十大電影（http://bit.ly/2Flud7L）—係所有電影十大喎，唔係外語片十大。仲要唔少係放到第一。奧巴馬都放到全年十大（當然佢唔係影評人）。所以拎最佳外語片，應無懸念。

11. 而如果信市場嘅，《上流寄生族》拎最佳電影，真係唔係吹水。部份莊家放到去最熱，唔係最熱都放到次熱，基本上就係佢，同埋《愛爾蘭人》The Irishman之爭。嘩。《愛爾蘭人》我冇睇，不過留意馬田史高西斯Martin Scorsese其實拎過最佳導演（《無間道風雲》The Departed），但冇拎過最佳電影．會唔會敬老呢又？不過睇賠率，今年好似咬得幾緊，真係好似幾套都有機會。

12.留意，奧斯卡史上，從來冇一套外語片拎過最佳電影。畀《上流寄生族》拎到，韓仔J到出血都得．外語片拎最佳導演就試過，正係上屆嘅《羅馬》Roma

13.去到最佳導演，你見，其實都係最佳電影嗰班友。亦係《愛爾蘭人》馬田史高西斯，同《上流寄生族》奉俊昊之爭。其實都咬得緊，但比較大機會就會係一人拎一個。而上面講過，外語片拎過最佳導演，但未拎過最佳電影，又睇下點

14.仲有可以提下嘅，《小丑》Joker在最佳電影賠率有頭五，但導演係拉到好落先見嘅，正如本人舊文話頭，係靠男主角救返套戲，編導係二流水平（http://bit.ly/364YfZm）。《Little Women》小婦人評語好似幾好，但最佳電影賠率極冷，反而導演Greta Gerwig就不太冷。當然實務上，10倍賠率嘅好少跑出，正如世界盃都N咁多年冇一隊係超過10倍賠率捧盃（對上你估唔到，係1998年法國主場捧盃）（賠率係計決賽周名單出晒）。市場都係幾有效率嘅

15.其他獎，快手講下。男主角啦喎，《小丑》華堅馮力士Joaquin Phoenix熱到爆，唯一對手係《婚姻故事》Marriage Story（未睇）嘅Adam Driver 。即使《小丑》套戲在美國其實有啲批評聲音，相信男主角冇乜問題，唔使咁政治正確。

16.女主角啦喎，一樣，亦係一支獨秀。久違了嘅BJ Renée Zellweger，新片Judy相當叫好（票房就算啦）。但我估有暗湧，賠率次熱就係《婚姻故事》嘅Scarlett Johansson—但我睇好冷冷地（其實都未夠十倍），《爆炸性醜聞》Bombshell嘅Charlize Theron．唯一不利係套戲唔係個人發揮晒，而當然Renée Zellweger鹹魚返生嘅故事比較動人。Just saying

17 呢篇文原本係2019年尾寫，結果等到香港時間1月5號先出。因為同一日會有金球獎（香港時間就1月6星期一朝早），照計會對啲賠率幾大影響，到時又再睇下。不過留意，金球獎最佳電影名單係冇《上流寄生族》嘅。
________________________________________
18.總之，有啲後悔冇在飛機上睇多次《上流寄生族》。最佳外語片已無懸念，當然都有得J，韓片咁多年都冇拎過最佳外語片。但奉俊昊期望應該唔止係咁，至少係最佳導演或最佳影片拎到一個吧。

19. 之前都簡略講過《上流寄生族》。風評咁好，我估因為社會不均，貧富懸殊，真係世界問題，鬼佬都睇得好有共鳴。奉俊昊之前嘅《末日列車》Snowpiercer，英文片，主要都鬼佬演員，一樣風評幾好，票房亦都OK（好重要的說），亦係圍繞類似主題。

20. 再講一次，拎到最佳導演或最佳電影是但一樣，都係韓仔／韓片嘅大勝利（我未大愛到會講「都係亞洲人」）。每次我寫韓國都會重覆一樣嘢：我輩港男，多數認為韓仔嘢膚淺，日本文化先係王道，韓國產品就抄人（有一定道理），韓劇狗血，韓仔女人型，韓妹就只係整容隆胸（但照J），MV就腿張開扭籮袖。

21. 但like it or not，韓國文化的確好有影響力，特別係韓片。以一個小國（其實計經濟規模或人口都唔算細）嚟講，好堅。你見真係日本片中國片港產片印度片，都未有咁嘅高度，可以鬼媒齊齊認討論，選做十大甚至最佳電影。

22. 但係咪完全因為《上流寄生族》係神片？未必。我係鍾意呢套戲，但唔係當到神作咁—至少我都冇睇第二次。我自己認為奉俊昊嘅戲（我都睇唔少，佢唔算多產），最出色反而係早期嘅《殺人回憶》同埋《韓流怪嚇》。前者可以當係韓版嘅《殺謎藏》( Zodiac，但留意殺人回憶仲早幾年），後者其實同而家上緊嘅 《白頭山：火山浩劫》主題相似（朝鮮民族之情，韓國人自救，政府正仆街，美國人正仆街，中國人都係仆街）

23. 好產品都要有好marketing，其他電影再好，都好似去唔到咁層次。我認為就係韓仔深耕細作嘅結果，在鬼媒一早搭晒線，亦多得好多海外韓人不停寫文，仲有在social media 度做好多嘢。韓國人嘅「民族意識」的確好強，我見嗰啲美藉甚至海外成長嘅一樣好強調個身份認同。我睇嘅鬼媒長期都有好多評論寫韓國，睇名就知係韓裔，仲要成篇文啲link都係韓文。你見咩Wonder Girls 之類一樣上Billboard極賣得，同一道理。就係因為唱英文？又唔係喎，《上流寄生族》都係完全嘅韓國戲，《江南Style》都唔係英文。

24. 舊評重貼：關於「上流寄生族」嘅message係乜，都仲有啲爭議。奉俊昊刻意唔拍得好清晰。有人話套戲係「批判富人」「揭示社會窮富不均」，有啲表面。睇佢舊作（西片）《末日列車》（Snow Piercer），其實係有啲相似，以火車喻社會。畀你打到大佬，去到最前一卡，同上流一齊食牛扒，你又會點？同樣地「上流寄生族」入面，朴社長全不可憎呀，地底人日日多謝社長（當然你可以話係反諷剝削者被剝削到感恩）。反而係窮人偷呃柺騙，仲要自相殘殺，拎到少少甜頭就壓迫其他窮人，所以呢套唔係一套仇富嘅戲。當然亦有話，「係因為佢地咁有錢先咁好人咋」。

25. 但，朴社長其實只係高級中產（從來冇講佢點發財，甚至連做乜都唔知），同權貴都仲好有距離。我自己嘅演繹，反而係好不負責任嘅「社會嘅錯」(留意主角一家完全勝任工作，只係因為佢地出身先要講大話呃入去）．另外就係宿命論，就好似蠍子過河嘅故事咁，本性難改。最後朴社長做乜畀人拮死？咪因為不由自主咁，都係覺得窮人有陣味。留意呢個係佢嘅本能！甚至佢唔係想羞辱任何人。但有錢人就係同你不一樣，最好都係唔好過界。

26. 真係最後，寫完文先發現英國衞報都有寫 《上流寄生族》拎奧斯卡最佳電影嘅機會(http://bit.ly/39AOtQV) 。留意英國其實未上。